Pinadayag 12–13

Pasiuna

Nakita ni Juan sa panan-awon ang bahin sa usa ka dragon nga mihulga sa usa ka babaye ug sa iyang anak, nga nagsimbolo sa tinguha ni Satanas sa pagguba sa Simbahan sa Ginoo ug sa matinud-anong mga miyembro niini. Gisulat ni Juan ang mahitungod sa Gubat sa Langit ug ang mahitungod sa mga gingharian sa kalibutan nga makig-away batok sa mga sumusunod sa Dios.

Mga Sugyot alang sa Pagtudlo

Pinadayag 12

Gipakita ngadto ni Juan nga si Satanas ug ang iyang mga anghel kanunay nga nakiggubat sa Ginoo ug sa Iyang Simbahan

Sa dili pa magklase, kopyaha ang mosunod nga matching activity diha sa pisara. Human masugdan ang klase, dapita ang pipila ka mga estudyante nga sulatan og linya nga mokonektar sa matag hulga nga gilista sa wala nga kolum ug sa mga paagi sa pagbatok niini nga gilista sa tuo nga kolum.

Mga hulga	Mga paagi sa Pagbatok sa mga Hulga
Sunburn	Mga kamatuoran diha sa Pinadayag 12
Kaawayng mga sundalo	Medisina o pahulay
Sakit	Proteksyon sa init o sinina
Sala ug pagbati nga sad-an	Paghinulsol ug pagsalig kang Jesukristo
Mga impluwensya ni Satanas	Mga hinagiban sa gubat

Asa niini nga mga hulga ang inyong gipakigbatukan bag-ohay lang? Asa niini ang sa inyong hunahuna ang pinakapeligro? Ngano man?

Dapita ang mga estudyante sa pagpangita sa mga kamatuoran samtang sila nagtuon sa Pinadayag 12 nga makatabang nila sa pagpakigbatok sa mga impluwensya ni Satanas. Ipasabut nga ang Pinadayag 12–14 nagrekord og usa ka interlude, o paghunong, sa panan-awon ni Juan sa mga panghitabo sa ikapito nga timri o silyo. Ang Ginoo tingali nagtabang ni Juan nga makasabut sa kahulugan sa mga pulong nga “ang gingharian sa kalibutan” ug “ang gingharian sa atong Ginoo” diha sa Pinadayag 11:15.

Ipakita sa mga estudyante ang kauban nga litrato sa babaye nga dunay dragon sa iyang luyo. Dapita ang mga estudyante sa pagkonsiderar kon unsa kaha ang girepresentahan niini nga mga simbolo.

Dapita ang usa ka estudyante sa pagbasa og kusog sa Pinadayag 12:1-2, 5. Hangyoa ang klase sa pagsunod, nga mangita kon unsay nahitabo sa babaye. Ipasabut nga ang Hubad ni Joseph Smith mibutang sa bersikulo 5 direkta human sa bersikulo 2.

Unsay nahitabo sa babaye? (Nanganak siya og usa ka lalaki “kinsa magahari sa tanang kanasuran” [bersikulo 5].)
Unsa kaha ang buot ipasabut nga siya “magahari sa tanang kanasuran pinaagi sa olisi o gunitanan nga puthaw”? (bersikulo 5). (Ang bata posibling mogamit sa olisi o gunitanan nga puthaw, nga pwedeng magsimbolo sa ebanghelyo, sa priesthood, ug sa pulong ug gahum sa Dios, alang sa matarung nga pagdumala sa mga nasud sa kalibutan [tan-awa sa Bruce R. McConkie, Doctrinal New Testament Commentary, 3 vols. (1965–73), 3:517].)

Dapita ang usa ka estudyante sa pagbasa og kusog sa Pinadayag 12:3–4. Hangyoa ang klase sa pagsunod, nga mangita sa mga simbolo nga gihulagway niini nga mga bersikulo.

Unsa kaha ang girepresentahan sa mga simbolo nga gihulagway sa mga bersikulo 1–5?

Dapita ang mga estudyante sa pagbasa og hilum sa Hubad ni Joseph Smith, Pinadayag 12:7-8 (sa Giya ngadto sa mga Kasulatan). Hangyoa sila sa pagpangita kon unsay girepresentahan sa dragon, sa babaye ug sa bata.

Sumala sa Hubad ni Joseph Smith, Pinadayag 12:7–8, unsa ang girepresentahan sa dragon, sa babaye ug sa bata sa panan-awon ni Juan? (Ang dragon nagrepresentar kang Satanas [tan-awa sa bersikulo 8]; ang babaye nagrepresentar “sa simbahan sa Dios;” ug ang bata nagrepresentar sa “gingharian sa Dios ug sa iyang Kristo” [bersikulo 7], nga usa ka politikal nga gingharian nga tukuron sa Ginoo atol sa Milenyum, diin Siya ang magdumala sa tanang kanasuran. [Tan-awa sa New Testament Student Manual (manwal sa Church Educational System, 2014), 550–52, alang sa dugang nga pagpasabut sa mga simbolo niini nga mga pahina.])
Sumala sa Pinadayag 12:4, unsa man ang katuyoan sa dragon? Ngano kaha nga si Satanas nagtinguha man sa pagguba sa gingharian sa Dios ug ni Kristo”?

Dapita ang usa ka estudyante sa pagbasa og kusog sa Pinadayag 12:6. Hangyoa ang klase sa pagsunod, nga mangita kon unsay gibuhat sa babaye tungod sa pagpanghulga sa dragon.

Unsay nahitabo sa babaye? Unsa ang gisimbolo niini? (Ang babaye nga milayas ngadto sa kamingawan nagrepresentar sa Simbahan nga misulod sa Dakong Apostasiya ug sa priesthood nga gikuha gikan sa kalibutan human sa pagkamatay sa mga Apostoles [tan-awa usab sa D&P 86:3].)

Ipasabut nga human nakita ni Juan ang dragon nga mihulga sa babaye ug sa bata, nasaksihan niya ang Gubat sa Langit tali ni Satanas ug sa mga Santos sa Dios. Dapita ang pipila ka mga estudyante nga magpuli-puli sa pagbasa og kusog gikan sa Hubad ni Joseph Smith, Pinadayag 12:6–11 (diha sa Giya ngadto sa mga Kasulatan). Hangyoa ang katunga sa klase sa pagpangita unsay nahitabo ni Satanas sa Gubat sa Langit ug ang laing katunga sa pagpangita kon giunsa sa mga Santos sa Dios sa pagbuntog si Satanas ug ang iyang mga sumusunod.

Unsa man ang nahitabo ni Satanas ug sa iyang mga sumusunod? (Mahimo nimong ipasabut nga ang Pinadayag 12:4 nag-ingon nga ang ikog sa dragon “misapupo sa ikatulo ka bahin sa mga bitoon sa langit.” Nagsimbolo kini sa dako nga gidaghanon sa espiritung mga anak sa Langitnong Amahan kinsa mipili nga mosunod ni Satanas. Mahimo usab nimong ipasabut nga si “Miguel ug ang iyang mga anghel” [Hubad ni Joseph Smith, Pinadayag 12:6] mao si Adan ug ubang matarung nga espiritung mga anak sa Dios.)
Sumala sa bersikulo 11, giunsa sa matarung nga mga panon sa langit sa pagbuntog si Satanas? (“Pinaagi sa dugo sa Kordero,” o pinaagi sa Pag-ula sa Manluluwas, ug pinaagi sa pagpabiling matinuoron sa ilang mga pagpamatuod sa ebanghelyo. Isulat kini nga mga tubag diha sa pisara.)
Sumala sa bersikulo 8, asa man gipadala si Satanas ug ang iyang mga sumusunod human sa ilang rebelyon?

Dapita ang usa ka estudyante sa pagbasa og kusog sa Hubad ni Joseph Smith, Pinadayag 12:12, 17 (sa Giya ngadto sa mga Kasulatan). Hangyoa ang klase sa pagsunod, nga mangita kon kinsa ang gigubat ni Satanas human siya giabug gikan sa langit.

Kinsa ang gigubat ni Satanas human siya giabug gikan sa langit?
Base sa unsay atong nakat-unan sa bersikulo 11, unsay atong mahimo aron mabuntog ang mga impluwensya ug mga pang-atake ni Satanas sa atong kapanahunan? (Tabangi ang mga estudyante nga mahibaloan ang usa ka baruganan nga susama sa mosunod: Mabuntog nato ang mga impluwensya ni Satanas pinaagi sa Pag-ula sa Manluluwas ug pinaagi sa pagpabiling matinuoron sa atong mga pagpamatuod sa ebanghelyo. Isulat sa pisara kini nga baruganan.)

Dapita ang usa ka estudyante sa pagbasa og kusog sa mosunod nga pamahayag ni Elder James J. Hamula sa Seventy. Hangyoa ang klase sa pagpaminaw kon sa unsang paagi giatake ni Satanas ang ilang henerasyon.

“Giandam nga motunga niining katapusang mga adlaw ug paghago alang sa atong Amahan ug sa Iyang Anak mao ang pipila sa labing isug ug hamiling mga anak lalaki ug babaye sa atong Amahan. Ang ilang kaisug ug kahamili gipakita didto sa kinabuhi sa wala pa dinhi sa yuta sa pakigbisog ni Satanas. …

“Uban sa gipahiuli nga gingharian sa Dios sa yuta ug sa inyong pag-anhi sa kalibutan, si Satanans nasayud nga siya adunay ‘gamay na lang nga panahon’ [Pinadayag 12:12]. Busa, si Satanas nagtigum sa matag kapanguhaan nga iyang magamit aron sa pagdani kaninyo ngadto sa pagpakasala. Siya nasayud nga kon siya makabitad ninyo sa pagpakasala, siya mahimong mopugong kaninyo sa pag-alagad og full-time mission, sa pagminyo sa templo, ug sa pagsiguro sa umaabut ninyong mga anak diha sa pagtuo, ang tanan diin mohuyang dili lamang ninyo apan sa Simbahan. Siya nasayud nga walay makalumpag sa gingharian sa Dios ‘gawas lang [sa] mga kasal-anan sa [iyang] mga katawhan’ [Mosiah 27:13]. Ayaw pagkasayop kabahin niini—ang tumong sa iyang gubat karon anaa na kaninyo” (“Pagdaog sa Gubat Batok sa Dautan,” Ensign o Liahona, Nob. 2008, 50, 51).

Giunsa sa pagpaningkamot ni Satanas ug sa iyang mga sumusunod aron sa pagluya kanato?

Dapita ang mga estudyante sa paghunahuna kon giunsa sila sa pagpakiggubat ni Satanas sa personal.

Unsa ang ubang mga butang nga atong mahimo aron molambo ang atong pagtuo ni Jesukristo ug malig-on ang atong mga pagpamatuod Kaniya? (Isulat sa pisara ang mga tubag sa mga estudyante.)

Basaha og kusog ang mosunod nga duha ka mga pamahayag, ug dapita ang mga estudyante sa pagtubag sa usa niini diha sa ilang mga class notebook o mga scripture study journal:

Isulat ang usa sa inyong mga kasinatian dihang ang inyong pagpamatuod ug pagtuo sa Pag-ula sa Manluluwas nakatabang nga inyong mabatukan ang mga impluwensya ni Satanas.
Irekord ang inyong pagpamatuod sa Pag-ula ni Jesukristo, ug ipasabut kon sa unsang paagi ang Pag-ula makatabang sa atong pagpakiggubat batok ni Satanas ug sa iyang mga sumusunod.

Human sa igong panahon, dapita ang pipila ka mga estudyante nga ipakigbahin unsay ilang gisulat.

Awhaga ang mga estudyante sa pagpili og usa o mas labaw pa sa mga ideya nga gilista sa pisara ug gamiton kini sa ilang pagpakiggubat batok ni Satanas ug sa iyang mga sumusunod.

Pinadayag 13

Nagsulat si Juan mahitungod sa mga gingharian sa yuta nga modawat og gahum gikan ni Satanas

I-summarize ang Pinadayag 13 pinaagi sa pagdapit og usa ka estudyante sa pagbasa og kusog sa summary sa tsapter. (Kon imong gusto, mahimo nimong ipasabut nga si Juan nakakita og panan-awon sa makahadlok tan-awon nga mga mananap nga nagrepresentar sa dautang mga gingharian sa yuta nga kontrolado ni Satanas. Nakita usab ni Juan nga pinaagi niining mga gingharian, si Satanas mohimo og mga katingalahan ug mini nga mga milagro aron malingla ang mga lumulupyo sa yuta.

Ribyu sa Scripture Mastery

Atol sa katapusang semana sa seminary, hunahunaa ang paghatag sa mga estudyante og final scripture mastery nga test. Mahimo nimong awhagon ang mga estudyante sa pagtuon sa ilang balay o diha dayon sa dili pa mag-test. Ang mosunod mao ang pipila ka matang sa test nga imong magamit (mahimo nimong ipahiuyon kini nga mga ideya aron makab-ot ang panginahanglan sa mga estudyante):

Reference test: Hatagi og clue ang mga estudyante gikan sa mga scripture mastery passage. Kini nga mga clue pwede nga mga keyword, mga doktrina o mga baruganan, o mga summary sa tudling o passage. Dapita ang mga estudyante nga isulat ang reference sa passage sa usa ka pirasong papel human nimo mahatag ang matag clue.

Doctrine test: Ilista ang mga Mahinungdanong Doktrina diha sa pisara. Hangyoa ang mga estudyante sa paglista sa katugma nga mga reference sa scripture mastery ubos sa matag doktrina. Mahimo nila kini pinaagi sa paghinumdom sa mga scripture mastery passage gikan sa hunahuna o pinaagi sa paggamit og lista sa mga mastery passage.

Memorization test: Dapita ang mga estudyante sa paggamit og memoryadong mga pulong ug mga baruganan gikan sa mga scripture mastery passage sa pagpasabut sa Mahinungdanong mga Doktrina. Dapita sila sa pagsulat sa ilang mga pagpasabut ug pagbasa niini og kusog diha sa klase.

Hinumdumi ang pagpasalamat sa imong klase sa ilang paningkamot nga i-master kini nga mahinungdanong mga tudling sa kasulatan ug ang Mahinungdanong mga Doktrina. Ipamatuod ang espirituhanong gahum ug pagpamatuod nga atong madawat kon atong i-master ang mga tudling sa kasulatan ug mga doktrina.

Komentaryo ug Background nga Impormasyon

Pinadayag 13. Mga mananap nga makahadlok tan-awon

Gawas sa kahibalo nga ang mga mananap nagrepresentar sa kalibutanong mga gingharian, wala kitay interpretasyon gikan sa Ginoo mahitungod sa mga mananap. Samtang naghisgot mahitungod sa mga misteryo sa basahon sa Pinadayag, gisulti ni Propeta Joseph Smith ang mosunod:

“Matag higayon nga ang Dios naghatag og usa ka panan-awon sa usa ka larawan, o mananap, o imahe sa bisan unsa nga matang, Siya kanunay mihimo sa Iyang kaugalingon nga responsable sa paghatag og usa ka pagpadayag o interpretasyon sa kahulugan niini, kon dili man, kita dili responsable o walay tulubagon alang sa atong pagtuo niini. …

“… Ayaw gayud panghilabut sa mga panan-awon sa mga mananap ug mga hilisgutan nga kamo wala makasabut” (sa History of the Church, 5:343, 344).

Pinadayag 13:8. “Ang Kordero gipatay sukad sa katukuran sa kalibutan”

Ang mga pulong nga “Ang Kordero gipatay sukad sa katukuran sa kalibutan” (Pinadayag 13:8) nagpasabut kang Jesukristo ug sa Iyang Pag-ula. Ang “sukad sa katukuran sa kalibutan” nagpasabut sa premortal nga kinabuhi, sa wala pa mamugna kining kalibutana. Busa, atong masabtan gikan niini nga bersikulo nga ang mga epekto sa Pag-ula sa Manluluwas anaa nang daan sa wala pa matawo si Jesus. Sama pananglit, ang mga tawo nga nagpuyo sa wala pa ang kapanahunan ni Kristo makagamit sa ilang pagtuo kang Kristo, makahinulsol, ug mapasaylo sa ilang mga sala pinaagi sa gahum sa Iyang Pag-ula, bisan og ang Manluluwas ipahimugso pa (tan-awa sa D&P 20:25–26).