Leksyon 144: 1 Pedro 1–2

Leksyon 144

1 Pedro 1–2

Pasiuna

Misulat si Pedro aron mapalig-on ang pagtuo sa mga Santos samtang nag-antus sila sa grabe nga pagpanggukod gikan sa Kagamhanan sa Roma. Mihatag siya og gibug-aton nga sila natubos na pinaagi sa bililhon nga dugo ni Jesukristo ug mipahinumdom kanila sa ilang diosnon nga panulundon isip talagsaong mga tawo sa Dios. Mitudlo si Pedro sa mga Santos sa paghimaya sa Dios taliwala sa mga tawo ug sa pagsagubang sa pag-antus sama sa gibuhat ni Jesukristo.

Timan-i: Tan-awa ang sidebar “Advance nga pagpangandam” aron sa pagpangandam sa leksyon 149.

Mga Sugyot alang sa Pagtudlo

1 Pedro 1

Nagtudlo si Pedro sa mga Santos sa ilang potensyal nga kabilin ug sa kamahinungdanon sa mga pagsulay

Ipakita o i-drowing ang litrato sa usa ka tunawanan, ug ipasabut nga ang tunawanan usa ka sudlanan diin ang mga metal ug uban pa nga mga butang gipadalisay, nagpasabut nga kini giinit ug gitunaw aron matangtang ang mga kahugaw ug lig-unon ang katapusan nga produkto.

Dapita ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles:

“Samtang nagbiyahe ko sa tibuok Simbahan, makita nako ang mga miyembro nga gisulayan diha sa tunawanan sa kasakit” (“Hyrum Smith: ‘Firm As the Pillars of Heaven,’” Ensign, Nob. 1995, 9).

Unsa kaha ang gipasabut ni Elder Ballard sa iyang mga pulong “tunawanan sa kasakit”? (Ang mahagiton nga mga pagsulay og mga kalisdanan sa kinabuhi.)

Ipasabut nga misulat si Pedro sa iyang Nahaunang Sulat aron sa paglig-on ug pag-awhag sa mga Santos samtang nakasinati sila sa tunawanan sa kasakit. Ipasabut nga hangtud duol na sa A.D. 64, sa panahon nga si Pedro misulat niini nga sulat, ang Romano nga gobyerno nagpakita og pagkamatugtanon alang sa Kristiyanismo. Sa Hulyo nianang tuiga usa ka sunog milaglag sa dakong bahin sa Roma. Ang pipila ka inila nga mga Romano mipasangil sa mga Kristiyano nga maoy mipasiugda sa sunog. Kini misangpot sa hilabihan nga pagpanggukod sa mga Kristiyano sa tibuok Kagamhanan sa Roma. Ang pipila sa pagpasipala nga nasinati sa mga Kristiyano naggikan sa ilang kanhing mga higala ug mga silingan.

Dapita ang mga estudyante sa pagpangita og mga kamatuoran samtang nagtuon sila sa 1 Pedro 1–2 nga makatabang nato nga magpabiling matinud-anon kon kita sulayan diha sa atong mga tunawanan sa kasakit.

I-summarize ang 1 Pedro 1:1–2 pinaagi sa pagpasabut nga mitimbaya si Pedro sa mga Santos didto sa mga probinsya sa Roma sa Asia Minor (gitawag karon og Turkey) ug mipahinumdom nila nga sila usa ka pinili nga katawhan, nagpasabut nga sila gipili nga modawat og espesyal nga mga panalangin kon nagpakabuhi sila nga matinud-anon.

Dapita ang usa ka estudyante sa pagbasa og kusog sa 1 Pedro 1:3–5. Hangyoa ang klase sa pagsunod, nga mangita kon unsay gipahinumdum ni Pedro sa mga Santos nga gibuhat ni Kristo ug alang sa umaabut nga mga panalangin nga gisaad ngadto sa mga Santos.

Unsa nga umaabut nga mga panalangin ang madawat sa mga Santos kon magpabilin silang matinud-anon ngadto sa ebanghelyo ni Jesukristo?

Ipabasa og kusog sa usa ka estudyante ang 1 Pedro 1:6, ug hangyoa ang klase nga mangita sa unsang paagi mitubag ang mga Santos sa saad niining umaabut nga mga panalangin. Ipasabut nga ang mga pulong mga tintasyon diha sa bersikulo 6 nagpasabut nga mga pagsulay ug mga kasakit.

Nag-unsa ang mga Santos agig tubag sa saad niining umaabut nga mga panalangin? (Sila naglipay og maayo.)
Unsa nga baruganan ang atong makat-unan gikan sa bersikulo 3–6? (Ang mga estudyante kinahanglang mahibalo og usa ka baruganan sama sa mosunod: Bisan og nakasinati ta og mga pagsulay, mahimo kitang magmalipayon diha sa Pag-ula ni Jesukristo ug sa umaabut nga mga panalangin nga gisaad sa Dios nga ihatag kanato.)
Sa unsang paagi ang paghinumdum sa umaabut nga mga panalangin nga gisaad sa Dios nga ihatag kanato makatabang nato nga magmalipayon bisan og nakasinati kita og mga pagsulay?

Dapita ang usa ka estudyante sa pagbasa og kusog sa 1 Pedro 1:7–9. Hangyoa ang klase sa pagsunod, nga mangita kon unsay gitudlo ni Pedro mahitungod sa pagsulay sa hugot nga pagtuo sa mga Santos.

Sumala sa 1 Pedro 1:7, unsay gitandian ni Pedro sa nasulayan, o naprobaran, nga hugot nga pagtuo sa mga Santos?
Sa unsang mga pamaagi ang nasulayan nga hugot nga pagtuo nahimong sama sa bulawan? (Ang nasulayan nga hugot nga pagtuo, sama sa bulawan, bililhon. Bisan pa niana, mas bililhon pa ang hugot nga pagtuo kay sa bulawan tungod kay ang bulawan “madugta ra” [bersikulo 7] samtang ang hugot nga pagtuo kang Jesukristo modala ngadto sa kaluwasan [tan-awa sa bersikulo 9], nga mahangturon. Agig dugang , ang bulawan gidalisay pinaagi sa kalayo. Sa samang paagi, ang atong hugot nga pagtuo kang Jesukristo gisulayan ug gidalisay samtang kita matinud-anong nagsagubang sa mga pagsulay. Isulat sa pisara kini nga kamatuoran.)

Dapita ang usa ka estudyante sa pagbasa og kusog sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles, kinsa mipasabut unsaon nato nga magpabiling makanunayon ug dili matarug sa panahon sa usa ka pagsulay sa hugot nga pagtuo:

“Unsaon ninyo sa pagpabilin nga ‘makanunayon ug dili matarug’ [Alma 1:25] kon sulayan ang hugot nga pagtuo? Isubsob ninyo ang inyong kaugalingon sa mga butang nga nakatabang sa paglig-on sa pagtuo: ipakita ninyo ang inyong hugot nga pagtuo kang Kristo, mag-ampo kamo, mamalandong sa kasulatan, maghinulsol, magsunod sa mga sugo, ug moserbisyo sa uban.

“Kon mag-atubang og pagsulay sa hugot nga pagtuo—bisan unsay inyong buhaton, ayaw pagpalayo sa Simbahan! Ang pagpalayo gikan sa gingharian sa Dios kon may pagsulay sa hugot nga pagtuo sama ra sa pagbiya sa luwas nga lawak taguanan dihang nagkaduol na ang buhawi” (“Pagsulay sa Inyong Hugot nga Pagtuo,” Ensign o Liahona, Nob. 2012, 40).

Unsay gi-awhag ni Elder Andersen nga atong buhaton diha sa atong mga pagsulay sa hugot nga pagtuo?
Ngano kahang mahinungdanon man nga buhaton nato kining mga butanga kon ang atong hugot nga pagtuo pagasulayan?

Ipasabut nga pipila sa mga Santos nga gisulatan ni Pablo tingali natintal sa pagbiya sa ilang hugot nga pagtuo dihang misinati sila og relihiyoso nga panggukod. Dapita ang mga estudyante sa pagbasa sa 1 Pedro 1:13–17 sa hilum nga paagi, nga mangita sa mga pag-awhag nga gihatag ni Pedro aron matabangan ang mga Santos nga matinud-anong mosagubang sa ilang mga pagsulay. Ikonsiderar ang pagdapit sa mga estudyante sa pagmarka sa unsay ilang nakit-an.

Unsa man ang gi-awhag ni Pedro nga buhaton sa mga Santos?
Sa unsa kahang paagi ang tambag ni Pedro nakatabang nila nga matinud-anong mosagubang sa ilang mga pagsulay?

Dapita ang usa ka estudyante sa pagbasa og kusog sa 1 Pedro 1:18–21. Hangyoa ang klase sa pagsunod, nga mangita sa dugang nga mga kamatuoran nga gitudlo ni Pedro sa mga Santos aron sa pagtabang kanila nga matinud-anong mosagubang sa ilang mga pagsulay imbis nga mobiya sa ilang hugot nga pagtuo.

Unsa nga mga kamatuoran ang gitudlo ni Pedro sa mga Santos niini nga mga bersikulo? (Ang mga estudyante mahimong mogamit og lain-laing mga pulong, apan siguroa nga mahibalo sila sa usa o duha sa mosunod nga mga kamatuoran: Natubos kita pinaagi sa bililhon nga dugo ni Jesukristo. Tungod kay si Jesukristo walay sala, makatugyan Siya sa Iyang kaugalingon isip usa ka hingpit nga sakripisyo alang kanato. Si Jesukristo gi-orden nang daan nga mahimo natong Manunubos.)
Sa unsa kahang paagi ang paghinumdum niini nga mga kamatuoran nakatabang sa mga Santos nga matinud-anong mosagubang sa ilang mga pagsulay?

Aron matabangan ang mga estudyante nga mabati ang kamahinungdanon sa mga kamatuoran nga ilang nahibaloan diha sa 1 Pedro 1, dapita sila sa paghunahuna og usa ka panahon diin sila o ang usa nila ka kaila mipili sa pagsagubang sa usa ka pagsulay uban ang hugot nga pagtuo kang Jesukristo. Hangyoa ang pipila ka mga estudyante sa pagpakigbahin sa ilang mga kasinatian uban sa klase.

Awhaga ang mga estudyante sa pagpamalandong kon unsay ilang buhaton aron magpabiling matinud-anon kon gisulayan sila diha sa tunawanan sa kasakit.

I-summarize ang 1 Pedro 1:22–25 pinaagi sa pagpasabut nga gi-awhag ni Pedro ang mga Santos nga higugmaon ang usag usa ug hinumduman nga sila natawo pag-usab pinaagi sa pagdawat ug sa pagpakabuhi sa pulong sa Dios, nga molahutay sa kahangturan.

1 Pedro 2:1–12

Si Pedro naghatag og importansya sa mga responsibilidad sa mga Santos

Unsay pipila ka mga pamaagi diin ang mga miyembro sa Simbahan lahi sa kalibutan?
Unsay pipila ka lisud nga mga kahimtang nga tingali atong atubangon tungod kay lahi kita?

Dapita ang mga estudyante sa pagpangita sa usa ka baruganan samtang nagtuon sila sa 1 Pedro 2 nga mopalig-on sa ilang tinguha nga mahimong lahi sa kalibutan isip mga miyembro sa Simbahan sa Ginoo.

I-summarize ang 1 Pedro 2:1–8 pinaagi sa pagpasabut nga mitudlo si Pedro nga ang mga Santos sama sa buhi nga mga bato ug nga si Jesukristo sama sa usa ka bato sa pamag-ang o pundasyon ngadto sa mga matinud-anon. Apan ngadto sa dili masulundon, Siya “usa ka bato nga sa mga tawo kapangdulan, usa ka dakung bato nga makaingon sa ilang kapukan” (bersikulo 8), nagpasabut nga napasilo Niya sila.

Dapita ang usa ka estudyante sa pagbasa og kusog sa 1 Pedro 2:9–10. Hangyoa ang klase sa pagsunod, nga mangita kon giunsa paghulagway ni Pedro ang matinud-anon nga mga Santos.

Giunsa paghulagway ni Pedro ang mga Santos?

Ipasabut nga ang mga pulong iyang kaugalingon sa Dios diha sa bersikulo 9 gihubad gikan sa Gresyanhon nga pulong nga nagpasabut nga gipalit o gipreserbar ug nagtugma sa Hebreohanon nga pulong diha sa Exodo 19:5 nagkahulugan nga ang mga katawhan sa pakigsaad sa Dios usa ka espesyal nga panag-iya o Iyang gimanggad nga bahandi.

Sa unsang paagi ang mga pulong nga gigamit ni Pedro sa paghulagway sa mga Santos diha sa bersikulo 9–10 nakatabang nila nga magmaisugon dihang nakasinati sila og relihoyoso nga panggukod?

Dapita ang usa ka estudyante sa pagbasa og kusog sa 1 Pedro 2:11–12. Hangyoa ang klase sa pagsunod, nga mangita kon unsay gipangamuyo ni Pedro nga buhaton sa mga Santos isip talagsaon nga mga tawo sa Ginoo. Ipasabut nga mahimong gitawag ni Pedro ang mga Santos nga “mga dumuloong” ug “mga langyaw” tungod kay nagpuyo sila taliwala sa katawhan nga lahi sa mga Santos sa kultural ug relihiyoso nga paagi o tungod kay layo sila sa ilang langitnon nga panimalay, temporaryo nga nagpuyo isip mga mortal.

Sumala sa bersikulo 11, unsay gisulti ni Pedro nga kinahanglang buhaton sa mga Santos aron malahi sa kalibutan?
Sumala sa bersikulo 12, unsa nga impluwensya ang gisulti ni Pedro nga mahimong mahatag sa mga Santos ngadto sa uban isip pinili ug talagsaon nga katawhan sa Dios?
Unsa nga kamatuoran ang atong makat-unan gikan ni Pedro mahitungod sa unsay gidapit sa Dios nga buhaton sa mga Santos? (Ang mga estudyante kinahanglang mahibalo og usa ka kamatuoran susama sa mosunod: Ang Dios nagdapit sa Iyang mga Santos nga mahimong bulag ug lahi sa kalibutan aron makita sa uban ang ilang ehemplo ug mohimaya Kaniya.)

Dapita ang usa ka estudyante sa pagbasa og kusog sa pamahayag ni Sister Elaine S. Dalton, kinsa mialagad isip kinatibuk-ang presidente sa organisasyon sa Young Women:

“Kon nagtinguha mo sa paghimo’g kalainan sa kalibutan, kinahanglang lahi kamo sa kalibutan” (“Karon ang Panahon sa Pagtindog ug Pagpakita!” Ensign o Liahona, Mayo 2012, 124).

Sa unsang paagi ang imong pagpili nga mahimong bulag ug lahi sa kalibutan naka-epekto sa uban alang sa kaayohan o nakatabang nila nga madala ngadto sa Dios?

Awhaga ang mga estudyante sa paghunahuna kon unsay mas maayo nilang buhaton aron mabulag ug malahi sa kalibutan aron mahimo silang ehemplo. Awhaga sila nga buhaton ang bisan unsa nga impresyon nga mahimo nilang madawat.

1 Pedro 2:13–25

Nagtambag si Pedro sa mga Santos nga sagubangon ang pag-antus sama sa gibuhat sa Manluluwas

I-summarize ang 1 Pedro 2:13–18 pinaagi sa pagpasabut nga mitudlo si Pedro sa mga Santos nga itugyan ang ilang kaugalingon ngadto sa mga balaod ug sibil nga mga awtoridad nga nagmando nila (lakip ang emperor sa Roma kinsa nag-aghat sa panggukod batok nila, tan-awa usab sa D&P 58:21–22). Miawhag siya niadtong nag-antus sa kalisud isip mga sulugoon nga agwantahon ang ilang pag-antus uban sa pagpailub ug hinumduman nga ang Dios nasayud niini.

Dapita ang usa ka estudyante sa pagbasa og kusog sa 1 Pedro 2:19–20. Hangyoa ang klase sa pagsunod, nga mangita sa tambag ni Pedro sa mga Santos kon unsaon nila pagsagubang sa mga pag-antus.

Unsay tambag ni Pedro mahitungod sa unsaon sa mga Santos pagsagubang sa ilang mga pag-antus?

Hangyoa ang mga estudyante sa pagbasa sa 1 Pedro 2:21–25 sa hilum nga paagi, nga mangita sa paghulagway ni Pedro kon sa unsang paagi si Jesukristo mitubag sa pagpanggukod.

Giunsa ni Kristo pagtubag ang pagpanggukod?
Sumala sa bersikulo 21, unsay usa ka katarungan nga ang Manluluwas miantus alang kanato?
Unsa nga kamatuoran ang atong mahibaloan gikan sa bersikulo 21–25 mahitungod sa pagsagubang og mga pagsulay? (Ang mga estudyante kinahanglang mahibalo og usa ka kamatuoran susama sa mosunod: Makasunod kita sa ehemplo sa Manluluwas sa mapailubong pagsagubang sa mga pagsulay.)

Ipakigbahin ang imong pagpamatuod sa Manluluwas, ug dapita ang mga estudyante sa paghunahuna unsay ilang mas maayong buhaton aron mosunod sa Iyang ehemplo sa mapailubong pagsagubang sa mga pagsulay.

Komentaryo ug Background nga Impormasyon

1 Pedro 1:6–8. “Ang pagkatinuod sa inyong pagtoo … mosangpot ngadto sa pagdalayeg ug paghimaya ug pagpasidungog”

Si Elder Orson F. Whitney sa Korum sa Napulog Duha ka mga Apostoles mitudlo kon unsay mahimong moabut gikan sa mga pagsulay nga atong giantus niining kinabuhi:

“Walay kasakit nga atong giantus, walay pagsulay nga atong nasinati ang makawang. Kini nakapakat-on kanato, sa pagpalambo sa mga kinaiya sama sa pagpasensya, hugot nga pagtuo, kalig-on, ug pagkamapainubsanon. Ang tanan nga atong giantus ug tanan nga atong gisagubang, labi na kon mapailubon kitang nagsagubang niini, nagpalig-on sa atong kinaiya, nagputli sa atong mga kasingkasing, nagpalambo sa atong mga kalag, ug naghimo natong mas mabination ug manggiangayon, mas takus nga tawgong mga anak sa Dios … ug pinaagi sa kasubo ug pag-antus, kahago ug kalisdanan, kita makadawat sa pagmatuto nga kita mianhi aron sa pag-angkon ug diin mohimo natong mas sama sa atong Amahan ug Inahan sa langit” (diha sa Spencer W. Kimball, Faith Precedes the Miracle [1972], 98.)

1 Pedro 2:18–25. Gipakita ni Jesukristo kon unsaon nato pagsagubang ang pag-antus

Si Elder Alexander B. Morrison sa Seventy mitudlo:

“Si Pedro, ang bantugang apostol, kinsa sa iyang kaugalingon miantus og kamatayon sama sa usa ka martir (tan-awa sa Juan 21:18–19), nahibalo nga ang diosnon nga ganti may kalambigitan sa mapailubon nga pag-antus alang ni Kristo apan dyutay nga himaya ihatag kanato kon nag-antus kita [isip resulta] sa atong kaugalingong mga sala. Misulat siya: ‘Takus gayud sa pagpasalamat kon ang usa ka tawo, tungod sa iyang kahibalo sa Dios, moantus sa mga kasakit nga igapahamtang kaniya bisan siya dili sad-an. Kay kon kamo makapailub sa mga pagbokbok kaninyo inigpakasala ninyo, unsa may dalaygon niini? Apan kon makapailub man kamo sa diha nga magabuhat kamog matarung ug paantuson tungod niini, nan, kamo kahimut-an sa Dios.’ (1 Pedro 2:19–20.) Samtang nagsagubang kita sa dili angay nga pag-antus, nagpalambo kita sa Kristohanon nga mga kinaiya nga mohingpit sa atong mga kalag ug mopahiduol nato ngadto Kaniya” (Feed My Sheep: Leadership Ideas for Latter-day Shepherds [1992], 166).