Leksyon 75: Juan 15

Leksyon 75

Juan 15

Pasiuna

Sa katapusang gabii sa mortal Niya nga pagpangalagad, human sa Katapusang Panihapon, gitudloan sa Manluluwas ang Iyang mga Apostoles nga Siya ang Tinuod nga Parras ug ang Iyang mga disipulo mao ang mga sanga. Gisugo Niya ang Iyang mga disipulo nga maghigugmaay ug gipahimangnoan sila bahin sa pagpanglutos nga ilang masinati tungod sa ilang pakig-uban Kaniya.

Mga Sugyot alang sa Pagtudlo

Juan 15:1–11

Si Jesus mipasabut nga Siya ang Tinuod nga Tanum nga Parras

Sa dili pa magklase, isulat sa pisara ang mga pulong nga malampuson, dili malipayon, malipayon, patay, makalingaw, dili mapuslanon, mabungahon, mapuslanon, buhong, ug dili malampuson.

Dapita ang mga estudyante sa pag-imagine sa ilang kaugalingon nga sugod sa karon ilang ihanduraw ang kanhi 60 ka tuig nilang kinabuhi.

Asa niining mga pulonga ang gusto ninyong gamiton nga maghulagway sa inyong kinabuhi? Ngano man?

Idrowing sa pisara ang litrato sa tanum nga parras [grape]. Mahimo nimong isugyot nga kopyahon ang drowing diha sa ilang mga class notebook o mga scripture study journal. Ipasabut nga si Jesus migamit og pagkumpara sa tanum nga parras aron masabtan sa Iyang mga disipulo kon unsaon nga kita makaangkon og mabungahon, mapuslanon, ug buhong nga kinabuhi.

Dapita ang usa ka estudyante sa pagbasa og kusog sa Juan 15:1–5 . Hangyoa ang klase sa pagsunod, nga mangita kon unsay girepresentaran sa mga elemento niini nga pagkumpara.

Unsa ang girepresentaran sa tanum nga parras? (Butangi og label ang tanum nga parrasdiha sa pisara nga Jesukristo.)
Unsa ang girepresentaran sa mga sanga? (Butangi og label ang mga sanga nga Mga Disipulo ni Kristo.)
Kon si Jesukristo mao ang tanum nga parras ug kita ang mga sanga, unsa ang gireprentaran sa prutas? (Ang prutas mahimong magrepresentar sa matarung nga mga buhat ug linihukan nga kinahanglang maoy bunga sa mga disipulo ni Jesukristo. Butangi og label ang prutas nga Matarung nga mga buhat.)

Ipasabut ang pulong nga tig-alima diha sa bersikulo 1.

Unsa ang tig-alima? (Tawo nga tig-atiman sa ubasan.)
Sumala sa mga bersikulo 1–2, sa unsang paagi ang Langitnong Amahan sama sa tig-alima? (Ipasabut nga ang Dios nga Amahan mitanom og tinuod nga parras [si Jesukristo] diin ang tanang pagkaon didto kuhaon.)

Ipakita sa klase ang gamayng sanga o salingsing nga giputol nimo gikan sa kahoy ug ipasabut unsa ka ka excited dihang mahimo kang mangutlo og prutas gikan niining sanga ug makakaon niini. Pangutan-a ang klase kon kanus-a kaha sila sa ilang hunahuna makakaon og prutas gikan niining sangaha.

Nganong kini nga sanga dili man makapamunga? (Tungod kay giputol na kini gikan sa kahoy, dili na kini makadawat og iyang pagkaon para makapamunga.)

Dapita ang usa ka estudyante sa pagbasa og kusog sa Juan 15:4–5 . Dapita ang mga estudyante sa pagsunod, nga mangita kon unsay gisulti sa Manluluwas nga gikinahanglan para motubo ang prutas gikan sa sanga.

Unsa ang giingon ni Jesus nga gikinahanglan aron ang prutas motubo gikan sa sanga? (Ang sanga kinahanglang “magpabilin” sa punoan.)
Sa unsang paagi kini nga sanga susama sa tawo nga mibulag o gipahimulag gikan sa Manluluwas?

Dapita ang mga estudyante nga ikonsiderar ang pagmarka sa matag pulong nga pabilin o magpabilin diha sa mga bersikulo 4–5. Ipasabut nga ang pulong nga magpabilin nga gigamit niini nga mga bersikulo nagpasabut nga magpabiling lig-on ug padayong nagkapot kang Jesukristo ug sa Iyang Simbahan (tan-awa sa Jeffrey R. Holland, “Abide in Me,” Ensign o Liahona, Mayo 2004, 32).

Sumala sa bersikulo 5, unsa ang resulta sa pagpabilin, o lig-ong nakakaput, sa Manluluwas? (Ang mga disipulo ni Jesukrsito modala og daghang bunga.)

Isulat sa pisara ang mosunod nga dili kompleto nga pamahayag: Kon atong sundon ang mga sugo pabilin kita nga mohigugma sa Manluluwas ug …

Aron matabangan ang klase nga masabtan ang usa ka paagi nga kita matabangan ni Jesukristo sa pagtuman sa mga sugo ug magpabilin diha sa Iyang gugma, dapita ang usa ka estudyante sa pagbasa og kusog sa mosunod nga pamahayag:

“… pinaagi sa grasya sa Ginoo ang mga indibidwal, pinaagi sa hugot nga pagtuo sa Pag-ula ni Jesukristo ug paghinulsol sa ilang mga sala, makadawat og kalig-on ug tabang sa paghimo og maayong mga buhat nga dili unta nila mahimong mapadayon kon mapasagdan lang sa ilang kaugalingong mga paagi. Kini nga grasya mao ang makaabag nga gahum nga nagtugot sa mga lalaki ug mga babaye nga makaangkon og kinabuhing dayon ug kahimayaan human sila makahimo sa labing maayo nga paningkamot” (Bible Dictionary, “Grace”).

Unsa ang pipila ka paagi nga si Jesukristo milig-on kanato aron sa pagtuman sa mga sugo?

I-summarize ang Juan 15:6–8 pinaagi sa pagpasabut nga gitudlo sa Manluluwas nga kadtong dili magpabilin diha Kaniya sama ra sa usa ka sanga nga giputol. Malawos kini ug mamatay, apan ang mga indibidwal kinsa magpabilin kang Jesukristo mamunga og matarung nga mga buhat nga makahimaya sa Dios.

Unsa ang atong mahimo aron kita magpabilin, o lig-ong magkapot, sa Manluluwas?

Dapita ang usa ka estudyante sa pagbasa og kusog sa Juan 15:9–11 . Hangyoa ang klase sa pagsunod, nga mangita kon unsay gitudlo ni Jesus ngadto sa Iyang mga disipulo nga buhaton ug unsang mga panalangin ang ilang madawat.

Unsa ang gitudlo ni Jesus nga buhaton sa Iyang mga disipulo?
Sa unsang paagi ang pagtuman sa mga sugo magtugot nato nga magpabilin sa gugma sa Manluluwas? (Ipasabut nga samtang ang Amahan ug ang Anak nahigugma kanato uban sa hingpit ug walay katapusang paghigugma, ang pagtuman sa Ilang mga sugo magtugot kanato nga makadawat sa kahingpitan sa mga panalangin nga mapinanggaon Nilang gitinguha nga ihatag kanato [tan-awa sa 1 Nephi 17:35; D&P 95:12; 130:20–21].)
Sumala sa bersikulo 11, nganong gitudlo man ni Jesus sa Iyang mga disipulo ang pagpabilin uban Kaniya ug mohimo og matarung nga mga buhat?

Pangutan-a ang mga estudyante kon unsaon nila sa pagkompleto ang dili kompleto nga pamahayag nga naa sa pisara isip usa ka baruganan basi sa unsay ilang nabasa diha sa bersikulo 11. (Gamit ang mga pulong sa mga estudyante, kompletuha ang pamahayag diha sa pisara aron maghatag kini sa mosunod nga baruganan: Kon atong sundon ang mga sugo magpabilin kita sa paghigugma sa Manluluwas ug makadawat og hingpit nga kalipay.)

Ngano kaha nga ang pagpabilin diha sa Manluluwas magtugot man nato nga makadawat og hingpit nga kalipay?

Hangyoa ang mga estudyante sa paghunahuna og usa ka tawo nga ilang nailhan kinsa adunay kalipay tungod kay nagpabilin siya sa Manluluwas. Pagdapit og pipila ka estudyante sa pagpakigbahin mahitungod sa tawo nga ilang nahunahunaan ug mopasabut nganong kanang tawhana usa ka maayong ehemplo niini nga baruganan. Mahimo sab nimong ikonsiderar ang pagdapit og mga estudyante nga mopakigbahin kon sa unsang paagi ang pagpabilin diha sa Manluluwas magdala diha kanila og kalipay.

Dapita ang mga estudyante sa paghunahuna og mga paagi nga sila magpabiling lig-on nga konektado sa Manluluwas ug sa ingon makadawat og dakong kalipay?

Juan 15:12–17

Gisugo ni Jesus ang Iyang mga disipulo nga maghigugmaay

Isulat sa pisara ang mosunod nga pamahayag ni Presidente Russell M. Nelson sa Korum sa Napulog Duha ka mga Apostoles. (Kini nga pamahayag makita sa “The Mission and Ministry of Jesus Christ,” Ensign, Abr. 2013, 38.)

“Ang labing maayo nga ebidensya sa atong pagsimba ni Jesus mao ang pagsunod Kaniya” (Presidente Russell M. Nelson).

Badlisi ang mga pulong nga pagsimba ug pagsunod diha sa pamahayag nga naa sa pisara. Dapita ang mga estudyante nga mopasabut unsay ipasabut sa mga pulong nga gibadlisan. Ang (pagsimba mao ang dakong gugma ug pagtahud, ug ang pagsunod nagpasabut nga pagsundog o kopyahon.)

Ngano kaha nga ang pagsunod kang Jesus pinakamaayo man nga paagi nga atong ikapakita ang atong gugma ug pagtahud Kaniya?

Dapita ang usa ka estudyante sa pagbasa og kusog sa Juan 15:12 . Hangyoa ang klase sa pagsunod, nga mangita sa unsang paagi mihangyo ang Manluluwas kanato nga sundon Siya.

Unsa ang gisugo ni Jesus kanato nga buhaton? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga kamatuoran: Siya nagsugo kanato sa paghigugmaay sama nga Siya nahigugma kanato. Awhaga ang mga estudyante sa pagkonsiderar nga markahan kini nga kamatuoran diha sa bersikulo 12.)
Sa inyong hunahuna unsay ipasabut sa paghigugma og tawo sama sa paghigugma ni Jesukristo kaninyo?

Dapita ang mga estudyante sa pagbasa og hilum sa Juan 3:13–17, nga mangita kon giunsa kita sa paghigugma ni Jesus. Human sa igo nga panahon, ipares-pares sila ug hangyoa sila sa paghisgot niini uban sa ilang mga kapares kon unsay ilang nakit-an. Dayon pangutan-a sa mosunod nga mga pangutana:

Sumala sa bersikulo 13, unsa ang giingon sa Manluluwas nga pinakadakong pagpakita sa gugma?
Giunsa Niya sa pagpakita ang ingon niini nga matang sa gugma?

Aron matabangan ang mga estudyante nga makasabut pa og dugang unsay ipasabut sa paghalad sa atong kinabuhi, dapita ang usa ka estudyante sa pagbasa og kusog sa mosunod nga pamahayag ni Elder Claudio R. M. Costa sa Seventy:

“[Si Jesukristo] mihatag kanato sa labihan ka maayong ehemplo sa paghigugma dihang miingon Siya nga ‘Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala’ (Juan 15:13). Siya sa kaulahian miula sa tanan natong mga sala ug sa katapusan mihatag sa Iyang kinabuhi alang kanatong tanan.

“Kita makahalad sa atong kinabuhi alang niadtong atong gihigugma dili pinaagi sa pisikal nga pagpakamatay alang kanila, pero pinaagi hinuon sa pagpakabuhi alang kanila—paghatag sa atong panahon; kanunayng anaa sa ilang kinabuhi; moalagad kanila; magmatinuoron, magmahigugmaon, ug magpakita og tinuod nga gugma alang sa atong pamilya ug sa tanang tawo—sama sa gitudlo sa Manluluwas” (“Ayaw Paugmai Unsay Inyong Mabuhat Karon,” Ensign or Liahona, Nob. 2007, 74).

Sumala ni Elder Costa, unsa ang ubang paagi nga atong mahalad ang atong kinabuhi sa pagpakamatay alang sa uban?
Kanus-a dunay tawo nga mihalad sa iyang kinabuhi sa pagpakamatay sa usa niini nga paagi para kaninyo?

Dapita ang mga estudyante sa paghunahuna sa sugo sa Manluluwas nga higugmaon ang uban sama sa Iyang paghigugma kanato. Hatagi sila og pipila ka minutos nga mosulat diha sa ilang mga class notebook o mga scripture study journal mahitungod sa tawo nga sa ilang hunahuna maoy gusto sa Manluluwas nga pakitaan nila sa ilang gugma ug sa plano kon unsaon nila sa paghimo niini.

Juan 15:18–27

Gipahimangnoan ni Jesus ang Iyang mga disipulo bahin sa pagpanglutos nga ilang masinati gumikan sa pagpamatuod Kaniya

Ipasabut nga human ang Manluluwas mitudlo sa Iyang mga disipulo mahitungod sa pagpabilin uban Kaniya ug pagpakita og gugma sa usag usa, Iya silang gitudloan unsay mahitabo kanila tungod sa espesyal nila nga pagsaksi bahin Kaniya ug sa responsibilidad sa pagpakigbahin niini.

Dapita ang usa ka estudyante sa pagbasa og kusog sa Juan 3:18–20, ug hangyoa ang klase sa pagpangita kon unsay gitudlo ni Jesus kon unsa ang pagtagad sa kalibutan ngadto sa Iyang mga disipulo. (Ipasabut nga niini nga mga bersikulo, “ang kalibutan” nag-refer ngadto sa mga tawo nga makasasala ug supak sa Dios.)

Unsa ang gitudlo ni Jesus mahitungod sa unsaon pagtagad sa kalibutan ang Iyang mga disipulo?

Mahimo nimong ipasabut sa mga estudyante nga tungod kay “ang kalibutan nagdumot” sa mga disipulo sa Manluluwas, malagmit nga ang mga estudyante makasugat og mga anti-Mormon ug puno sa kayugot nga mga media ug mga website. Ang ubang estudyante makasinati og pagsalikway, panggao-gao, ug pagpalagot, lakip ang paggamit sa internet para pamugal-bugal.

Kon mahimo, pwede nimong ikonsiderar ang pagtudlo sa mga estudyante kon unsaon ug asa makaplagan ang mga tubag sa puno sa kayugot nga mga akusasyon batok sa Simbahan. Agig dugang sa pagpakitabang gikan sa kasaligan nga mga hingkod, ang mga estudyante makakita og kapanguhaan gikan sa internet diha sa , lds.org/topics, ug sa seektruth.lds.org.

I-summarize ang Juan 15:21–25 pinaagi sa pagpasabut nga gipamatud-an ni Jesukristo nga kadtong nagyugot Kaniya nagyugot usab sa Amahan ug manubag sila sa ilang mga pagpili.

Ipasabut nga bisan pa sa mga kayugot sa uban ug pagpanglutos sa mga sumusunod sa Manluluwas, mihatag si Jesukristo og mga paagi para ang kalibutan makadawat og pagpamatuod Kaniya. Dapita ang mga estudyante sa pagbasa og hilum sa Juan 5:26–27, nga mangita sa mga saksi kinsa makapamatuod ni Jesukristo ngadto sa kalibutan.

Kinsa ang giingon sa Manluluwas nga makapamatuod sa Iyang kabalaan? (Ang Espiritu Santo ug ang mga disipulo sa Manluluwas.)

Dapita ang mga estudyante sa paghunahuna sa mga baruganan ug mga kamatuoran niini nga leksyon. Awhaga sila nga ribyuhon unsa ang gidasig diha nila nga buhaton ug sa pagsunod sa mga pag-aghat nga ilang madawat gikan sa Espiritu Santo.

Komentaryo ug Background nga Impormasyon

Juan 15:4–5. Kon magpabilin kita diha sa Manluluwas, mamunga kita og maayong mga buhat

Si Elder Jeffrey R. Holland sa Korum sa Napulog Duha Ka mga Apostoles mitudlo kon unsay ipasabut nga magpabilin diha sa Manluluwas:

Ang “‘Pabilin kanako’ [Juan 15:4] maoy usa ka salabtunon ug maanindot nga hunahuna sa elegante nga Iningles sa King James Bible, apan ang ‘pabilin’ dili mao nga pulong ang sagad natong gigamit. Mao nga nakaangkon ko og dugang pagpasalamat alang niining pag-awhag gikan sa Ginoo samtang nailhan nako ang hubad niini nga tudling sa ubang pinulongan. Sa Kinatsila kanang pamilyar nga mga pulong gisulat nga ‘permaneced en mi.’ Sama sa Iningles nga verb ‘pabilin,’ ang permanecer nagpasabut sa ‘pagpabilin, sa pagpuyo,’ apan bisan ang [mga Iningles og pinulongan] sama nako makasubay sa pagkasama niini sa ‘permanence.’ Nan ang buot ipasabut niini mao ang ‘pagpuyo—apan mopuyo sa kahangturan.’ Kana ang awhag sa mensahe sa ebanghelyo ngadto sa [tanan] sa kalibutan. Duol, apan moduol aron sa pagpabilin. Duol uban sa konbiksyon ug paglahutay. Duol hangtud sa hangtud, alang kaninyo ug alang sa kaayohan sa tanang kaliwatan nga mosunod gayud kaninyo. …

“… Si Kristo mao ang tanan kanato ug kita gayud ‘magpabilin’ diha Kaniya sa kanunay, dili matarug, makanunayon, sa kahangturan. Kay aron ang bunga sa ebanghelyo molipang [mobuswak] ug mopanalangin sa atong kinabuhi, kita kaninaghlang gayud nga lig-ong magkupot Kaniya, ang Manluluwas kanatong tanan, ug niining Iyang Simbahan, diin nagdala sa Iyang balaan nga ngalan. Siya ang tinuod nga tanom nga parras nga mao ang atong tinuod nga tinubdan sa kalig-on ug ang mao lamang nga tinubdan sa kinabuhing dayon” (“Pabilin Kanako,” Ensign o Liahona, Mayo 2004, 32).

Si Elder James M. Paramore sa Seventy mitudlo kon sa unsang paagi ang Dios mopabalhin sa Iyang gugma ug gahum ngadto niadtong motuman sa mga sugo:

“Kon mapaubsanon kitang mangita sa atong Langitnong Amahan pinaagi sa pag-ampo ug pinaagi sa pagkat-on ug pagtuman sa Iyang mga sugo, Iyang ibalhin diri kanato ang Iyang gugma ug ang daghan sa Iyang gahum. Liboan ang misaksi nga ang Iyang mga pulong nga ‘Kon tumanon ninyo ang akong sugo, magapabilin kamo sa akong gugma’ (Juan 15:10) tinuod. Kita, sama sa giingon sa Manluluwas, magsugod sa pagkapot sa atong mga kaugalingon isip mga sanga sa ‘tinuod nga parras’ ug makadawat sa sama nga kalig-on ug gahum ug makalaum sa sama gihapon nga bunga. (Tan-awa sa Juan 15:1–6.)” (“Love One Another,” Ensign, Mayo 1981, 54).

Juan 15:8–14. “Ang mao gihapon magdala og daghang bunga”

Gitudlo ni Presidente John Taylor nga kita kinahanglan nga magmapainubsanon, magmatinud-anon, magmakugihon, ug magmasulundon kon gusto kita nga mahimong mga sanga nga mabungahon:

“Isip usa ka Santos kamo moingon, ‘Siguro nakasabut na ko sa akong katungdanan, ug nabuhat nako og maayo.’ Tingali ingon niana. Nakita ba ninyo ang gamayng salingsing; green kini, naglambo ug naghulagway gayud kini sa kinabuhi, nagdala kini sa iyang bahin ug proporsyon sa kahoy, ug konektado sa punoan, sa mga sanga ug sa gamot; apan ang kahoy ba magpabiling buhi kon wala kini? Oo, mabuhi kini. Dili kini maghinambog ug magmapahitas-on, ug moingon ‘green kaayo ko ug milambo, ug himsog kaayo ko, maayo kaayo ko ug nia ko sa maayong dapit ug husto ang akong gipanghimo.’ Apan makahimo ba kamo kon wala ang gamot? Dili; inyong gidala ang tukma nga bahin ug posisyon diha sa kahoy. Mao usab niining mga tawhana. Kon gihimo nila ang ilang bahin kon sila nagbuhat sa ilang mga calling, nagsunod sa ilang relihiyon, ug naglakaw nga masulundon sa Espiritu sa Ginoo, anaa kanila ang porsyon sa iyang Espiritu nga ihatag kanila aron mapahimuslan. Ug samtang sila nagmapainubsanon, nagmatinud-anon, nagmakugihon, ug nagmasulundon sa mga balaod ug sa mga sugo sa Dios anaa sila sa tukma nga dapit sa kahoy; molambo sila, ang mga udlot, mga bulak, mga dahon, ug ang tanan mahitungod kanila maayo gayud, ug sila nahimo nga usa ka parte ug usa ka bahin sa kahoy” (Deseret News, Dis. 16, 1857, 323).

Juan 15:13. “Walay bisan kinsa nga may gugma nga labaw pa niini”

Gipakigbahin ni Presidente Gordon B. Hinckley ang iyang mga pagbati mahitungod sa Juan 15:13:

“Si Jesus ang akong higala. Walay laing nakahatag og labaw pa niini kanako. ‘Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala’ (Juan 15:13). Iyang gihatag ang Iyang kinabuhi alang kanako. Iyang giablihan ang dalan sa kinabuhing dayon. Ang Dios lamang ang makahimo niini. Akong panghinaot nga unta ikonsiderar ako nga takus nga usa Niya ka higala” (“My Testimony,” Ensign, Mayo 2000, 71).