Librarya
Leksyon 88: Mga Buhat 9

Leksyon 88

Mga Buhat 9

Pasiuna

Mipakita si Jesus ngadto ni Saulo samtang siya mibiyahe ngadto sa Damasco, diin pagkahuman si Saulo nabuta. Human siya giayo ni Ananias, gibunyagan si Saulo ug misugod sa pagsangyaw didto sa Damasco. Human sa tulo ka tuig, miadto si Saulo sa Jerusalem, apan sa diha nga gihulga ang iyang kinabuhi, ang mga Apostoles mipadala kaniya ngadto sa Tarso. Mihimo og mga milagro si Pedro didto sa Lida ug sa Jope.

Mga Sugyot alang sa Pagtudlo

Mga Buhat 9:1–9

Nagpakita si Jesus ngadto ni Saulo didto sa dalan sa Damasco

Isulat diha sa pisara ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. (Kini nga pamahayag makaplagan diha sa “The Best Is Yet to Be,” Ensign o Liahona, Ene. 2010, 25–26.)

“Adunay usa ka butang nga kadaghanan kanato napakyas ilabi na sa pagpasaylo ug pagkalimot sa kaniadtong mga sayop sa kinabuhi—maato nga mga sayop o mga sayop sa uban. …

“Tuguti ang mga tawo nga maghinulsol. Tuguti ang mga tawo nga mouswag. Tuohi nga ang mga tawo makausab ug makauswag” (Elder Jeffrey R. Holland).

Dapita ang usa ka estudyante sa pagbasa og kusog sa pamahayag diha sa pisara. Dayon pangutan-a ang klase:

  • Unsa ang pipila ka mga sitwasyon diin kini importante nga tugotan ang uban sa pag-usab ug pag-uswag ug sa pagtuo nga sila makahimo sa mao?

  • Unsa ang pipila ka mga sitwasyon diin kini importante ang pagtuo nga kita makausab ug makauswag?

Dapita ang mga estudyante sa pagpangita sa mga kamatuoran samtang sila nagtuon sa Mga Buhat 9 nga kita makakat-on gikan sa kasinatian sa usa ka tawo kinsa nausab ug milambo.

Ipasabut nga kadaghanan sa pulong sa Mga Buhat 9 nagtumong sa mga kasinatian sa usa ka tawo nga ginganlan og Saulo. Dapita ang usa ka estudyante sa pagbasa og kusog sa mosunod nga paghulagway kang Saulo:

Natawo si Saulo sa Gresyanhong siyudad nga Tarso (tan-awa sa Mga Buhat 21:39) ug may Romanhong pagkanasudnon (tan-awa sa Mga Buhat 16:37). Usa siya ka Judeo gikan sa kaliwat ni Benjamin (tan-awa sa Mga Taga-Romano 11:1) ug gipatuon didto sa Jerusalem ni Gamaliel (tan-awa sa Mga Buhat 22:3), usa ka inila nga Pariseo ug tinahud nga magtutudlo sa balaod nga Judeo (tan-awa sa Mga Buhat 5:34). Nahimong Pariseo si Saulo (tan-awa sa Mga Buhat 23:6), ug misulti siya og “Hebreohanong pinulongan” (tingali Aramaic) ug Gresyanhon (tan-awa sa Mga Buhat 21:37, 40). Sa kaulahian nailhan siya sa iyang Latinong pangalang, Pablo (tan-awa sa Mga Buhat 13:9). (Tan-awa sa Giya ngadto sa mga Kasulatan, “Pablo.”)

Pahinumdumi ang mga estudyante nga si Saulo diha nga gibato si Esteban (tan-awa sa Mga Buhat 7:58–59). Dapita ang usa ka estudyante sa pagbasa og kusog sa Mga Buhat 8:1–3 ug lain nga estudyante sa pagbasa og kusog sa Mga Buhat 9:1–2. Hangyoa ang klase sa pagsunod, mangita kon giunsa pagtagad ni Saulo ang mga sumusunod ni Jesukristo.

  • Giunsa pagtagad ni Saulo ang mga sumusunod ni Jesukristo?

  • Sumala sa Mga Buhat 9:1–2, nganong moadto si Saulo sa Damasco?

Dapita ang usa ka estudyante sa pagbasa og kusog sa Mga Buhat 9:3–6. Hangyoa ang klase sa pagsunod, mangita kon unsay nahitabo samtang mibiyahe si Saulo ngadto sa Damasco.

  • Kinsa ang mipakita ngadto ni Saulo?

Ipasabut ang pulong “ginalutos” diha sa bersikulo 5. Ipasabut nga ang usa ka tuslok nagpasabut og usa ka igtutusok, o usa ka talinis nga lipak nga gigamit sa pagpalakaw sa mga hayop (kon posible, pakit-a ang mga estudyante og usa ka talinis nga lipak). Niini nga sitwasyon, ang “paglutos” nagpasabut og pakig-away batok sa Dios.

Dapita ang usa ka estudyante sa paghunahuna og marka sa pangutana ni Saulo nga girekord diha sa bersikulo 6.

  • Unsa ang gitudlo kanato sa pangutana ni Saulo mahitungod kaniya? (Mitinguha siya sa pagtugyan ngadto sa kabubut-on sa Ginoo.)

I-summarize ang Mga Buhat 9:7–9 pinaagi sa pagpasabut nga sumala sa Hubad ni Joseph Smith, Mga Buhat 9:7, kadtong mibiyahe uban ni Saulo nakakita sa kahayag apan wala makabati sa tingog ni Jesus samtang nakigsulti ngadto ni Saulo (tan-awa usab sa Mga Buhat 22:9). Human sa panan-awon, si Saulo pisikal nga nabuta. Gigiyahan siya ngadto sa Damasco, ug wala siya mokaon o moinom sulod sa tulo ka adlaw.

  • Ihanduraw nga ikaw si Saulo. Kon ikaw miasdang sa paggukod sa mga disipulo ni Jesukristo, unsa kaha ang imong gihunahuna ug gibati sulod niining panahona?

Mga Buhat 9:10–22

Giayo si Saulo ni Ananias nga taga-Damasco, gibunyagan, ug nagsangyaw mahitungod ni Jesukristo

Dapita ang usa ka estudyante sa pagbasa og kusog sa Mga Buhat 9:10–12. Hangyoa ang klase sa pagsunod, mangita sa unsay gisugo sa Ginoo ni Ananias, usa ka miyembro sa Simbahan sa Damasco, nga buhaton.

  • Unsa ang gisugo sa Ginoo ni Ananias nga buhaton?

Ipasabut nga ang orihinal nga tuyo ni Saulo sa pag-adto sa Damasco mao ang pagdakop sa mga tawo sama ni Ananias.

  • Kon ikaw si Ananias ug nahibalo sa reputasyon ni Saulo, unsa kaha ang imong mahunahuna human madawat kining sugo gikan sa Ginoo?

Dapita ang usa ka estudyante sa pagbasa og kusog sa Mga Buhat 9:13–16. Hangyoa ang klase sa pagsunod, mangita sa unsay gitudlo sa Ginoo kang Ananias mahitungod ni Saulo.

  • Sa unsa nga paagi nga ang pagtan-aw sa Ginoo kang Saulo lahi sa kang Ananias nga pagtan-aw ni Saulo?

  • Sumala sa bersikulo 15, unsa ang gipili sa Ginoo nga himoon ug buhaton ni Saulo? (Mahimo nimong ipasabut nga ang pulong “pinili nga galamiton” mahimong nagpasabut sa kamatuoran nga si Saulo gi-orden nang daan ngadto sa iyang pangalagad.)

  • Sumala sa bersikulo 16, bisan og si Saulo mahimong pinili nga galamiton ngadto sa Ginoo, unsa ang iyang masinati?

  • Unsa nga mga kamatuoran ang atong makat-unan gikan niini nga mga bersikulo mahitungod sa unsa nga paagi ang Ginoo nagtan-aw kanato? (Ang mga estudyante mahimong moila og lain laing kamatuoran, apan siguroha ang paghatag og gibug-aton nga ang Ginoo nakakita kanato kon unsa kita mamahimo ug ang Ginoo nahibalo sa atong potensyal sa pagtabang Kaniya sa Iyang buhat. Isulat kini nga mga kamatuoran diha sa pisara.)

Dapita ang mga estudyante sa pagpamalandong kon sa unsa nga paagi ang ilang indibidwal nga mga kaagi, mga kinaiya, ug mga abilidad mahimong gamiton sa pagtabang sa Ginoo diha sa Iyang buhat. Hangyoa ang mga estudyante sa pagrekord sa ilang mga hunahuna diha sa ilang mga class notebook o sa mga scripture study journal.

Dapita ang usa ka estudyante sa pagbasa og kusog sa Mga Buhat 9:17–20. Hangyoa ang klase sa pagsunod, mangita sa unsay gibuhat ni Ananias human siya tabangi sa Ginoo sa pagsabut sa potensyal ni Saulo ug sa iyang umaabut nga misyon.

  • Unsa ang gibuhat ni Ananias alang ni Saulo?

  • Sumala sa bersikulo 20, unsa ang gibuhat ni Saulo “dihadiha,”o diha dayon, human mabunyagi ug nakadawat og kalig-on?

Ipasabut nga ang paghinulsol, pagbunyag, ug pagsangyaw ni Saulo mipakita sa iyang hugot nga pagtuo diha ni Jesukristo ug sa iyang pagkamanunuton ngadto sa kabubut-on sa Ginoo.

Dapita ang usa ka estudyante sa pagbasa og kusog sa Mga Buhat 9:21–22. Hangyoa ang klase sa pagsunod, mangita kon sa unsa nga paagi mitubag ang mga tawo ngadto sa pagsangyaw ni Saulo.

  • Sa unsa nga paagi mitubag ang mga tawo ngadto sa pagsangyaw ni Saulo?

  • Ngano nga ang mga tawo natingala samtang sila naminaw ni Saulo?

Pahinumdumi ang mga estudyante nga ang pangutana ni Saulo kang Jesus nga girekord diha sa Mga Buhat 9:6 mipakita sa iyang pagpaubos ug sa iyang tinguha sa pagtugyan ngadto sa kabubut-on sa Ginoo.

  • Sama ni Saulo, unsa ang kinahanglan gayud natong buhaton sa pag-usab ug sa pagtuman sa potensyal nga nakita sa Ginoo diha kanato? (Gamit ang mga pulong sa mga estudyante, isulat ang mosunod nga baruganan diha sa pisara: Kon kita mosunod sa kabubut-on sa Ginoo, niana kita makausab ug makatuman sa potensyal nga Iyang nakita kanato.)

Dapita ang duha ka boluntaryo sa pagduol sa atubangan sa kwarto. Hatagi ang usa ka estudyante og humok nga panghulma nga yuta, ug hatagi ang lain nga estudyante og gahi nga panghulma nga yuta. (Kon ikaw dili makakuha og panghulma nga yuta, dapita ang mga estudyante sa paghanduraw nga nagbuhat niini nga kalihokan, dayon ipangutana kanila ang mga pangutana nga nagsunod sa kalihokan.) Hatagi ang mga boluntaryo og 30 ka segundo o mga ingon niana sa paghimo og usa ka butang nga ilang pinili nga naggamit sa ilang yuta. Kon ang estudyante nga may gahi nga yuta nag-ingon nga kini lisud kaayo, awhaga siya sa pagpadayon og sulay.

Human sa igong panahon, dapita ang mga boluntaryo sa pagpakita kon unsa ang ilang nahimo. Pangutan-a ang estudyante kinsa gihatagan og gahi nga yuta:

  • Nganong malisud ang pagkulit og usa ka butang sa imong yuta?

Pasalamati ang mga nagboluntaryo ug dapita sila sa pagbalik ngadto sa ilang mga lingkuranan. Pangutan-a ang klase:

  • Sa unsa nga paagi nga ang gahi nga yuta mapahisama ngadto sa usa ka tawo kinsa dili manunuton sa kabubut-on sa Dios?

  • Sa unsa nga paagi nga ang maumol nga yuta mapahisama ngadto sa usa ka tawo kinsa manunuton sa kabubut-on sa Dios?

  • Sa unsa nga paagi nga ang pagnunot ngadto sa kabubut-on sa Ginoo mitabang kanimo o sa uban sa pag-usab ug sa pagtuman sa potensyal nga nakita sa Ginoo diha kanimo o diha kanila?

Basaha og kusog ang mosunod nga pamahayag ni Presidente Ezra Taft Benson:

Presidente Ezra Taft Benson

“Ang usa ka [tawo] dili na makapangutana og importanting pangutana sa iyang kinabuhi kay sa niana nga gipangutana ni Pablo: ‘… Ginoo, unsa ang buot nimong ipabuhat kanako?’” (“Listen to a Prophet’s Voice,” Ensign, Ene. 1973, 57).

Dapita ang mga estudyante sa pagpamalandong sa pangutana “Ginoo, unsa ang buot nimong ipabuhat kanako?” Dapita sila sa pagrekord sa bisan unsa nga mga pag-aghat nga ilang madawat. Human sa igong panahon, basaha og kusog ang mosunod nga pamahayag ni Presidente Benson:

“Ang usa ka [tawo] dili makahimo og mas dako nga panlimbasog kay sa pagpaninguha og paagi nga modala kaniya sa tubag ngadto niana nga pangutana ug dayon sa pagtuman niana nga tubag” (“Listen to a Prophet’s Voice,” 57).

Awhaga ang mga estudyante sa pagpadayon sa pagpangita og tubag niini nga pangutana ug sa paglihok sa bisan unsa nga mga pag-aghat nga ilang madawat.

Mga Buhat 9:23–31

Gihulga ang kinabuhi ni Saulo sa Jerusalem, ug gipadala siya sa mga Apostoles ngadto sa Tarso

Ipasabut nga human sa pagkakabig ni Saulo, mipuyo siya sa Arabia ug sa wala madugay mibalik siya ngadto sa Damasco (tan-awa sa Mga Taga-Galacia 1:17). I-summarize ang Mga Buhat 9:23–26 pinaagi sa pagpasabut nga ang mga Judeo sa Damasco nagkunsabo sa pagpatay ni Saulo, apan ang mga miyembro sa Simbahan mitabang kaniya sa pag-eskapo sa siyudad. Tulo ka tuig human sa iyang pagkakabig (tan-awa sa Mga Taga-Galacia 1:18), miadto si Saulo sa Jerusalem, diin ang mga miyembro sa Simbahan nangahadlok sa pagdawat kaniya tungod kay sila wala motuo nga siya nahimo nga usa ka disipulo ni Jesukristo.

  • Ngano sa imong hunahuna ang pipila ka mga miyembro sa Simbahan nagdumili sa pagdawat nga si Saulo nahimong usa ka disipulo ni Jesukristo?

I-summarize ang Mga Buhat 9:27–31 pinaagi sa pagpasabut nga si Bernabe, usa ka miyembro sa Simbahan (tan-awa sa Mga Buhat 4:36–37), midala ni Saulo ngadto sa mga Apostoles ug misulti kanila sa panan-awon ni Saulo ug sa iyang maisugon nga pagsangyaw didto sa Damasco. Ang mga miyembro sa Simbahan dayon miabiabi ni Saulo ngadto sa ilang pagpakigdait. Sa dihang ang Gresyanhong mga Judeo sa Jerusalem naninguha sa pagpatay ni Saulo, ang mga lider sa Simbahan mipadala kaniya ngadto sa Tarso. Nakasinati ang Simbahan og kalinaw ug kalamboan sa Judea, Galilea, ug Samaria.

Mga Buhat 9:32–43

Naghimo og mga milagro si Pedro didto sa Lida ug sa Jope

Bahina ang mga estudyante ngadto sa paris. Hangyoa ang usa ka estudyante sa matag pares sa pagbasa sa Mga Buhat 9:32–35 ug ang lain nga estudyante sa pagbasa sa Mga Buhat 9:36–42. Dapita sila sa pagpangita sa mga milagro nga gihimo ni Pedro ug giunsa sa mga tawo pagtubag. Ipasabut nga ang pagpanglimos (bersikulo 36) maoy naandan sa paghatag og halad ngadto sa mga kabus.

Human sa igo nga panahon, dapita ang mga estudyante sa paghisgot sa ilang pares sa mga milagro nga gihimo ni Pedro ug giunsa sa mga tawo pagtubag. Dayon pangutan-a ang klase:

  • Sumala sa mga bersikulo 35 ug 42, giunsa sa mga tawo sa Lida ug sa mga tawo sa Jope pagtubag ngadto sa pagpangalagad ni Pedro?

  • Unsa ang atong makat-unan gikan sa ilang mga tubag mahitungod sa mahimong mga epekto sa pagpangalagad ngadto sa uban? (Gamit ang mga pulong sa mga estudyante, isulat ang mosunod nga baruganan diha sa pisara: Pinaagi sa pagpangalagad ngadto sa uban, makatabang kita sa mga tawo sa pagbalik ngadto sa Ginoo ug sa pagtuo diha Kaniya.)

Ipasabut nga ang paghatag og priesthood nga mga panalangin maoy usa ka paagi sa pagpangalagad ngadto sa uban. Aron sa pagtabang sa mga estudyante sa pag-ila og dugang nga mga paagi nga kita makapangalagad ngadto sa uban, pangutana:

  • Sumala sa mga bersikulo 36 ug 39, sa unsa nga paagi si Tabita nangalagad ngadto sa uban?

  • Sa unsa nga paagi ang usa ka tawo kinsa “daghang maayong binuhatan” (bersikulo 36) ug kinsa nag-alagad sa uban makatabang og mga tawo sa pagbalik ngadto sa Ginoo ug sa pagtuo diha Kaniya?

  • Kanus-a ang maayong buhat sa uban nga mga tawo mitabang kanimo o sa uban sa pagbalik ngadto sa Ginoo ug sa pagtuo diha Kaniya?

Taposa pinaagi sa pagpakigbahin sa imong pagpamatuod sa mga kamatuoran nga gitudlo niini nga leksyon.

Komentaryo ug Background nga Impormasyon

Mga Buhat 9:1–2. Ang awtoridad ni Saulo sa pagdala sa mga miyembro sa Simbahan padulong sa Jerusalem

Nadawat ni Saulo ang awtoridad gikan sa labawng sacerdote sa Jerusalem sa pag-adto lapas sa Judea ug sa pagdala og mga Judeo atubangan sa Sanhedrin nga taralon, diin ang labawng sacerdote dili makahatag tungod kay “ang mga Romano mitugot sa Sanhedrin sa paggamit og sibil ug kriminal nga katungod (gawas sa dagkong mga kaso) ibabaw sa tibuok komunidad nga Judeo, bisan gawas sa Palestina” (J. R. Dummelow, ed., A Commentary on the Holy Bible [1909], 831). Tungod kay ang balaod ni Moises nagsilbi isip ang sibil ingon man isip relihiyosong balaod alang sa mga Judeo, ang mga Kristyanong Judeo mahimong maaresto isip mga kriminal. Ang mga “sulat” nga gidala ni Saul mga dokumento nga naglangkob og mga panudlo kalabut ngadto sa tuyo ug katinoan sa iyang awtoridad sa pagpahigayon sa iyang katuyoan.

Mga Buhat 9:1–22. Pagkakabig ni Saulo

Si Presidente Harold B. Lee mipasabut nga si “Saulo sa Tarso maoy usa ka tawo kinsa kanunay nga mabinantayon ug sa dakong kakugi miapil sa pagpaninguha nga mawagtang ang Kristyanismo nga gituohan niya nga usa ka sekta nga naghugaw sa pulong sa Dios” (sa Conference Report, Okt. 1946, 144). Hinoon, ang kasinatian uban sa nabanhaw nga Manluluwas midala og dako kaayo nga kausaban ni Saulo. Si Elder Bruce R. McConkie sa Korum sa Napulog Duha ka mga Apostoles mihulagway kon unsa ang nasinati ni Saulo sa panahon sa iyang tulo ka adlaw nga pagkabuta:

“Sulod sa [Saulo] tulo ka adlaw nga dili makakita misugod ang kausaban sa kinaiya nga sa dili madugay mousab sa kasaysayan sa Kristyanismo. Unsa nga kaguol sa kalag nga tingali iyang gibati, unsa nga mga kahasol sa konsyensya, unsa nga diosnong kasubo alang sa sala, samtang nagpaubos siya sa iyang kaugalingon sa pagpangandam sa pagtugyan ngadto sa sugo ni Ananias” (Doctrinal New Testament Commentary, 3 vols. [1965–73], 2:90).

Si Presidente Howard W. Hunter misulti sa mosunod mahitungod sa pagkakabig ni Saulo:

“Aron sa paghimo sa pagkakabig [Saulo] nga hingpit siya gibunyagan. Ang kinabuhi ni Pablo nausab. Kini talagsaon nga ang usa ka lalaki kinsa naghupot sa mga saput sa mga berdugo ni Esteban human niana nahimong pangulong tigpasiugda sa mga baruganan nga gipakamatyan ni Esteban. …

“… Ang kinabuhi ni Pablo nahimong napikas sa Dalan sa Damasco. Kaniadto, siya usa ka agresibo nga tigukod sa Kristyanismo, apan human sa Dalan sa Damasco siya usa sa labing mainitong tigpasangyaw niini” (sa Conference Report, Okt. 1964, 108–9).

Mga Buhat 9:2. Ang mga paningkamot ni Saulo sa pagdakop sa mga sumusunod ni Jesukristo

Gitudlo ni Presidente David O. McKay ang mahitungod sa mga tuyo ni Saulo sa pagdakop sa mga sumusunod ni Jesukristo:

“Hilabihan ka determinado siya sa pagbutang og katapusan sa unsay iyang gihunahuna nga usa ka pagtulun-ang bakak nga nangayo siya og katungod isip opisyal sa Sanhedrin sa pagdakop sa mga sumusunod ni Jesus bisan asa siya makakaplag kanila. Giadto niya ang matag balay, gibunlot ang mga lalaki gikan sa ilang mga asawa ug mga anak. Gani iyang gidakop ang mga babaye ug gibalhog sila ngadto sa bilanggoan! Sa pagkatinuod ang mga hilak ug pangamuyo sa gagmay nga mga bata tingali migisi bisan sa iyang tig-a nga kasingkasing hapit labaw kay sa pagkamartir sa matinud-anong Esteban. Sa pagkatinuod, samtang gipugos niya pagkuha ang mga lalaki ug mga babaye palayo sa ilang mga panimalay, ang luspad nga mga nawong sa nag-uk-ok nga mga bata, ug ang ilang tugob sa kaguol nga mga bakho tingali mipatik diha sa iyang kitid nga mga panghunahuna nga mopaubos kaniya kon dili mohasol kaniya sa tibuok adlaw sa iyang kinabuhi! Usa lamang ka butang ang makahatag kaniya og kalipay sa umaabut nga kinabuhi samtang iyang lingion kadtong makalilisang nga mga kasinatian. Kini mao, ingon nga gipahayag sa iyang kaugalingon nga mga pulong: ‘Ako baya usab nagtuo kanhi nga kinahanglan himoon ko ang daghang mga butang sa pagsupak sa ngalan ni Jesus nga Nazaretnon’ [Mga Buhat 26:9]. Sinsero si Saulo sa unsay iyang gibuhat. Wala siya motuo nga si Jesukristo mao ang Anak sa Dios, ug naghunahuna nga kini makapahimuot ngadto sa iyang Amahan sa langit sa paghimo sa matag tumotuo ni Kristo sa paglimud sa Iyang ngalan” (Ancient Apostles, 2nd ed. [1921], 147–48).

Mga Buhat 9:15–16. Ang Ginoo nakakita kanato ingon nga kita mahimo

Si Presidente Thomas S. Monson nagtudlo sa mga miyembro sa Simbahan sa pagtan-aw sa mga indibidwal sa paagi nga ang Ginoo nagtan-aw kanila (tan-awa sa “Tan-awa ang Uban kon Unsa Sila sa Umaabut,” Ensign or Liahona, Nob. 2012, 70).