Leksyon 124
Mga Taga-Filipos 1–3
Pasiuna
Giawhag ni Pablo ang mga Santos sa Filipos nga magtinabangay sa pagsunod sa ebanghelyo. Gitambagan niya sila nga sundon ang kamapaubsanon ug kawalay hinakog nga ehemplo sa Manluluwas ug mitudlo nga ang Dios nakigtambayayong uban nila aron maangkon nila ang kaluwasan. Gihulagway ni Pablo ang mga sakripisyo nga iyang gihimo sa pagsunod ni Jesukristo.
Mga Sugyot alang sa Pagtudlo
Mga Taga-Filipos 1
Gihulagway ni Pablo ang mga panalangin nga moabut gumikan sa oposisyon
Sa dili pa magklase, isulat sa pisara ang mosunod nga pamahayag ni Presidente Brigham Young. (Kini nga pamahayag makita sa Discourses of Brigham Young, sel. John A. Widtsoe [1954], 351.) Pulihi ang binadlisan nga mga pulong og blangko nga mga linya:
“Sa matag higayon nga imong sikaran ang ‘Mormonismo’ imo kining gisikaran pataas; wala gayud nimo kini sikari aron moubos. Ang Ginoo nga Labawng Makagagahum ang nagbuot niini” (Presidente Brigham Young).
Sugdi ang leksyon pinaagi sa pagpangutana:
-
Unsa ang ubang mga ehemplo, sa kasaysayan man o gikan sa atong panahon, nga ang mga tawo misikad, o misupak, sa Simbahan sa Manluluwas ug sa Iyang mga sumusunod?
Dapita ang mga estudyante samtang tun-an nila ang Mga Taga-Filipos 1 sa pagpangita og kamatuoran nga makatabang nila nga makasabut sa unsang paagi makaapekto ang oposisyon sa buluhaton sa Ginoo.
Hunahunaa ang pagdapit og mga estudyante sa pagpangita sa Filipos diha sa Mga Mapa sa Biblia, nu. 13, “Ang Misyonaryo nga mga Panaw ni Apostol Pablo,” nga makita sa Giya ngadto sa mga Kasulatan. Ipasabut nga miestablisar si Pablo og usa ka branch sa Simbahan didto sa Filipos atol sa ikaduha niyang misyonaryo nga panaw (tan-awa sa Mga Buhat 16). Sa wala madugay gisulat niya ang iyang epistola ngadto sa mga Taga-Filipos samtang naa siya sa bilanggoan, malagmit sa Roma. I-summarize ang Mga Taga-Filipos 1:1–11 pinaagi sa pagpasabut nga gipahayag ni Pablo ang iyang pasalamat ug gugma sa mga Santos sa Filipos.
Dapita ang usa ka estudyante sa pagbasa og kusog sa Mga Taga-Filipos 1:12–14. Hangyoa ang klase sa pagsunod, nga mangita unsay resulta tungod sa oposisyon nga nasinati ni Pablo atol sa iyang misyonaryo nga mga paningkamot.
-
Sumala sa bersikulo 12, unsa man ang resulta tungod sa oposisyon nga nasinati ni Pablo? (“Ang mahangturong panglantaw [pagpadayon sa unahan] sa ebanghelyo.”)
-
Sumala sa mga bersikulo 13–14, sa unsang paagi kini nga oposisyon nakatabang nga makapadayon sa unahan ang ebanghelyo? (Mga katawhan sa “pritoryo [palasyo]” [bersikulo 13], o headquarters sa military, nahibalo nga nabilanggo si Pablo tungod sa pagsangyaw mahitungod ni Jesukristo. Ang pagkabilanggo ni Pablo nakadasig usab sa ubang mga miyembro sa Simbahan nga mas magmaisugon sa pagsangyaw sa ebanghelyo.)
-
Unsa nga kamatuoran ang atong makat-unan gikan niini nga mga bersikulo kon unsay resulta kon makasinati kita og oposisyon tungod sa pagsunod kang Jesukristo? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Ang oposisyon nga atong masinati gumikan sa pagsunod kang Jesukristo makatabang nga mapadayon ang Iyang buhat.)
I-refer ngadto sa pamahayag ni Presidente Young diha sa pisara. Pangutan-a ang mga estudyante kon unsa nga mga pulong ang ilang gamiton sa pagkompleto sa mga blangko. Sulati ang mga blangko sa hustong mga pulong. Mahimo nimong ipasabut nga ang pataas sa kinatibuk-ang pagpasabut o konstekto dinhi nagpasabut og pag-abante.
-
Unsa ang mga ehemplo sa mga pamaagi nga ang oposisyon nakatabang nga mapadayon ang buhat sa Manluluwas?
I-summarize ang Mga Taga-Filipos 1:15–26 pinaagi sa pagpasabut nga si Pablo mipahayag nga mapalambo ang sangputanan sa Manluluwas bisan unsa pa ang mahitabo ni Pablo.
Dapita ang usa ka estudyante sa pagbasa og kusog sa Mga Taga-Filipos 1:27–30. Ipasabut nga ang Hubad ni Joseph Smith sa, Mga Taga-Filipos 1:28 nag-ingon: “Ug dili kamo malisang sa inyong mga kaaway: nga misalikway sa ebanghelyo, kay sila pagalaglagon. Dapita ang klase sa pagsunod, nga mangita sa unsay giawhag ni Pablo nga buhaton sa mga Santos. Ipasabut nga ang paggawi diha sa (bersikulo 27) nag-refer sa kinaiya.
-
Unsay giawhag ni Pablo nga buhaton sa mga Santos?
-
Sumala sa mga bersikulo 29–30, unsa ang masinati sa mga miyembro tungod sa Manluluwas?
Pahinumdumi ang mga estudyante bahin sa kamatuoran nga ila nang nahibaloan sa una.
-
Sa inyong hunahuna sa unsang mga paagi nga ang mga Santos sa Filipos mapanalanginan sa paghinumdom nga ang oposisyon nga ilang nasinati gumikan sa pagsunod kang Jesukristo makatabang nga mapadayon ang Iyang buhat?
Mga Taga-Filipos 2
Gitudlo ni Pablo ang mahitungod sa pagpaubos sa Manluluwas ug gitudloan ang mga Santos mahitungod sa ilang kaluwasan
Dapita ang mga estudyante sa pagbasa og hilum sa Mga Taga-Filipos 2:2 nga mangita kon unsay gitambag ni Pablo ngadto sa mga Santos sa Filipos.
-
Unsaon ninyo sa pag-summarize ang tambag ni Pablo?
Ipares-pares ang mga estudyante. Ipabasa og kusog sa matag pares ang Mga Taga-Filipos 2:3–8 nga mangita sa unsay gipabuhat ni Pablo sa mga Santos aron magkahiusa. Hangyoa ang usa ka estudyante gikan sa kada pares nga isulat sa pisara ang usa ka item sa tambag nga ilang nakit-an.
-
Sumala sa mga pagtulun-an ni Pablo, sa unsang paagi nga si Jesukristo usa ka ehemplo sa kamapaubsanon ug kawalay paghinakog?
-
Unsa nga baruganan ang atong makat-unan gikan sa mga pagtulun-an ni Pablo ang makatabang nato nga mas magkahiusa? (Ang mga estudyante mahimong mogamit og lain-laing mga pulong, apan kinahanglang mahibaloan nila ang mosunod nga baruganan: Kon sundon nato ang ehemplo ni Jesukristo sa kamapainubsanon ug kawalay paghinakog nga paghunahuna sa uban, niana mas magkahiusa kita.)
-
Unsa ang ubang mga paagi diin atong masunod ang ehemplo sa Manluluwas bahin sa kamapainubsanon ug kawalay paghinakog diha sa atong mga pamilya, eskwelahan, o mga ward o branch?
-
Kanus-a ka nakakita og mga tawo nga giuna ang panginahanglan sa uban kay sa ilang kaugalingon? Sa unsang paagi kini nga mga paningkamot makadugang sa pagkahiusa?
Ipasabut nga sigun sa narekord sa Mga Taga-Filipos 2:9–11, gitudlo ni Pablo nga sa katapusan ang tanan moyukbo ug “magasugid nga Ginoo si Jesukristo” (bersikulo 11). Dapita ang mga estudyante sa pagpamalandong kon unsay gilauman nila nga masinati gumikan niini.
Dapita ang usa ka estudyante sa pagbasa og kusog sa Mga Taga-Filipos 2:12–13. Hangyoa ang klase sa pagsunod, nga mangita sa unsay gitambag ni Pablo nga buhaton sa mga Taga-Filipos aron ang ilang kasinatian modala nila sa pagyukbo atubangan sa Ginoo ug magmalipayon. Mahimo nimong ipasabut nga ang “kahadlok ug pagkurog” (bersikulo 12) nagpasabut nga pagtahud ug kalipay (tan-awa sa Salmo 2:11; Giya ngadto sa mga Kasulatan, “Kahadlok,” scriptures.lds.org).
Ipasabut nga ang ubang mga tawo nasayop sa pagsabut sa mga pulong diha sa Mga Taga-Filipos 2:12 nga kita naluwas pinaagi sa kaugalingon natong mga buhat.
-
Kinsa man ang naghimong posible sa kaluwasan para nato? Sa unsang paagi?
-
Sumala sa Mga Taga-Filipos 2:13, unsa ang duha ka paagi diin ang Dios motabang niadtong mga naningkamot sa paghimo sa unsay gikinahanglan para sa kaluwasan? (Ang Dios motabang nila sa “pagtinguha,” o pagpaningkamot, ug pagsunod sa “iyang kaugalingong kahimuot,” o sa Iyang mga sugo. Human makatubag ang mga estudyante, isulat sa pisara ang mosunod nga kamatuoran: Ang Dios motabang nato nga maningkamot ug mobuhat sa unsay gikinahanglan ngari nato alang sa kaluwasan, nga nahimong posible gumikan sa Pag-ula ni Jesukristo.)
-
Unsa ang mga rekisito para sa kaluwasan, nga gihatag sa Ginoo ug gitabang aron atong matuman? (Mahimo nimong dapiton ang mga estudyante nga mo-refer ngadto sa ikatulo ug ikaupat nga artikulo sa hugot nga pagtuo.)
Ipasabut nga pinaagi sa impluwensya sa Espiritu Santo, ang Dios makatabang nato nga mausab ug mahimong putli sa atong mga tinguha aron kita mosunod Kaniya (tan-awa sa Mosiah 5:2). Dapita ang mga estudyante sa pagpamalandong sa unsang paagi mitabang ang Dios nga mausab ang ilang mga kasingkasing aron sila mosunod Kaniya ug sa unsang paagi Siya mitabang nila nga mas magmatinud-anon sa pagtuman sa Iyang mga sugo.
I-summarize ang Mga Taga-Filipos 2:14–30 pinaagi sa pagpasabut nga gipahinumduman ni Pablo ang mga Santos nga sila “nagasidlak ingon nga mga kahayag sa kalibutan” (bersikulo 15) ug gisultihan sila nga mopadala siya og mga mensahero aron mahibalo sa ilang kahimtang.
Mga Taga-Filipos 3
Gihulagway ni Pablo ang mga sakripisyo nga iyang gihimo sa pagsunod kang Jesukristo
Dapita ang mga estudyante sa paghunahuna og butang nga ilang gipakabili nga gikonsidera usab sa kalibutan nga bililhon (sama sa pamilya, mga higala, edukasyon, pagkaon, teknolohiya, o kwarta) ug, kon posible, pag-display og usa ka item nga nagrepresentar sa unsay ilang gihunahuna. Hangyoa sila sa paghunahuna kon unsay andam nilang isakripisyo para niining gipakabili nga mga kabtangan.
Dapita ang mga estudyante samtang tun-an nila ang Mga Taga-Filipos 3 sa pagpangita kon unsay gisakripisyo ni Pablo aron maangkon ang ganti nga maangkon sab nato.
I-summarize ang Mga Taga-Filipos 3:1–3 pinaagi sa pagpasabut nga gipahimangnoan ni Pablo ang mga Taga-Filipos tungod sa kurap nga mga magtutudlo kinsa nangangkon nga ang mga kinabig sa Simbahan kinahanglang makig-uyon sa pihong mga naandang buhaton sa mga Judeo, lakip ang pagpatuli (tan-awa sa New Testament Student Manual [manual sa Church Educational System, 2014], 436).
Dapita ang usa ka estudyante sa pagbasa og kusog sa Mga Taga-Filipos 3:4–6. Hangyoa ang klase sa pagsunod, nga mangita kon unsay gisulti ni Pablo mahitungod sa iyang panulundon sa mga Judeo.
-
Unsa nga sosyal ug relihiyusong mga posisyon sa Judeo nga katilingban ang makausa gihuptan ni Pablo? (Ang iyang pagka-Israelite, posisyon sa pagka-Pariseo, ang iyang kawsa sa Judaism, ug higpit nga pagsunod sa balaod.)
Dapita ang usa ka estudyante sa pagbasa og kusog sa Mga Taga-Filipos 3:7–11. Hangyoa ang klase sa pagsunod, nga mangita kon unsay pagtan-aw ni Pablo sa mga posisyon nga makausa iyang gihuptan sa Judeo nga katilingban.
-
Unsa ang panan-aw ni Pablo sa mga butang nga iyang gisakripisyo aron sa pagsunod kang Jesukristo?
-
Ngano nga si Pablo andam nga “[moantus] sa pagkawala niining tanan nga butang”? (bersikulo 8). (Aron makaila siya ni Jesukristo; “makaplagan ako diha kaniya” [bersikulo 9], o maanaa sa matinud-anong relasyon sa pakigsaad uban Kaniya; mahatagan og kaangayan pinaagi sa pagtuo diha Kaniya; mag-antus tungod og alang Kaniya; ug mahimong kabahin sa Pagkabanhaw sa mga “makiangayon” o matarung.
Dapita ang usa ka estudyante sa pagbasa og kusog sa Mga Taga-Filipos 3:12–14. Hangyoa ang klase sa pagsunod, nga mangita kon unsay nakita ni Pablo mahitungod sa espirituhanon niya nga paglambo. Pasabta nga ang nahimo nga iyang kaugalingon mao ang pagkaangkon.
-
Kay sa magtutok sa mga butang nga gitalikdan, unsa man ang gipaningkamutan ni Pablo nga maangkon? (Ipasabut nga “ang ganti sa langitnong pagtawag kanato sa Dios” [bersikulo 14] mao ang kinabuhing dayon.)
-
Unsa nga baruganan ang atong makat-unan gikan sa ehemplo ni Pablo sa angay natong buhaton aron makaila ni Jesukristo ug maangkon ang kinabuhing dayon? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga baruganan: Kon atong isakripisyo ang tanan nga gikinahanglan alang sa pagsunod kang Jesukristo ug magpadayon uban sa pagtuo, kita makaila Kaniya ug makaangkon og kinabuhing dayon.)
Dapita ang usa ka estudyante sa pagbasa og kusog sa mosunod nga istorya ni Presidente Gordon B. Hinckley, nga naghisgot bahin sa iyang pakighimamat og usa ka naval officer nga gikan sa laing nasud ngadto sa Estados Unidos alang sa advance nga training ug mipasakop sa Simbahan atol sa iyang pagpuyo didto. Pangutan-a ang klase kon unsa ang andam nga isakripisyo sa batan-on aron mosunod ni Jesukristo.
“Siya gipaila diri nako sa hapit na siya mouli sa yuta niyang natawhan. … Miingon ko: ‘Ang mga tawo sa inyo dili mga Kristiyanos. Unsa ang mahitabo kon ikaw mopauli sa inyo nga usa ka Kristiyanos, ug ilabi na, usa ka Mormon nga Kristiyanos?’
“Ang iyang nawong naminghoy, ug siya mitubag, ‘Ang akong pamilya mahiubos. Mahimo nga ila akong isalikway ug isipon nga patay. Alang sa akong kaugmaon ug sa akong trabaho, ang tanan nga oportunidad mahimo nga dili na ihatag kanako.’
“Nangutana ko, ‘Ikaw andam ba sa pagbayad sa ingon ka dako nga bili alang sa ebanghelyo?’
“Ang iyang itumon nga mga mata, naumog sa mga luha, misanag gikan sa iyang gwapo nga tabunong nawong samtang siya mitubag, ‘Tinuod kini, dili ba?’
“Naulaw nga nakapangutana ko sa pangutana, mitubag ako, ‘Oo, kini tinuod.’
“Diin siya mitubag, ‘Nan unsa pay lain nga kinahanglan?’” (“It’s True, Isn’t It?” Ensign, Hulyo 1993, 2).
-
Unsa man ang andam nga isakripisyo niini nga batan-on aron sa pagsunod sa Manluluwas?
-
Unsa man ang imong gisakripisyo (o sa ubang tawo nga imong nailhan) aron sa pagsunod sa Manluluwas?
-
Ngano nga ang mga ganti sa pagkaila kang Jesukristo ug paglambo padulong sa kinabuhing dayon igo nga balus sa mga pagsakripisyo nga inyong gihimo?
Hangyoa ang mga estudyante sa pagpamalandong kon duna bay mga butang nga kinahanglan nilang isakripisyo aron mas hingpit nilang masunod si Jesukristo. Dapita sila sa pagsulat og usa ka tumong sa paghimo niini.
I-summarize ang Mga Taga-Filipos 3:15–21 pinaagi sa pagpasabut nga mipahimangno si Pablo sa kalaglagan nga naghulat niadtong mga kalibutanong kalipay lang ang gitutukan. Gitudlo sab niya nga si Jesukristo mousab sa dili hingpit natong pisikal nga lawas ngadto sa pagka-imortal nga lawas sama Kaniya.
Tapusa pinaagi sa pagpamatuod sa mga kamatuoran nga nahibaloan gikan niini nga leksyon.
Komentaryo ug Background nga Impormasyon
Mga Taga-Filipos 2:3–8. Kawalay paghinakog [Dili maghunahuna sa kaugalingon]
Si Elder H. Burke Peterson of the Seventy mipasabut unsa ang kawalay paghinakog:
“Adunay mga tawo karon kinsa hingpit nga walay paghinakog—sama ni [Jesukristo].
“Ang tawo nga walay paghinakog mao ang tawo nga mas naghunahuna mahitungod sa kalipay ug kaayohan sa uban kay sa iyang kaugalingong kasayon o kahupayan, tawo nga andam sa pagserbisyo sa uban bisan wala hangyoa o dili mapasalamatan, o tawo nga andam sa pagserbisyo bisan ngadto sa mga tawo nga dili niya gusto. Ang tawo nga dili maghunahuna sa kaugalingon magpakita og kaandam nga mosakripisyo, kaandam nga mohikling sa personal niyang mga gusto, ug panginahanglan, ug pagbati. Imbis mag-agad nga mapasidunggan ug aron mailhan, o magtagbaw sa kaugalingon niyang mga gusto, ang tawo nga dili maghunahuna sa kaugalingon makabaton niining tawhanong panginahanglan para sa uban” (“Selflessness: A Pattern for Happiness,” Ensign, Mayo 1985, 66).
Mga Taga-Filipos 2:5–8. Gihaw-asan sa Manluluwas “ang iyang kaugalingon”
Ang mga pulong nga gihubad isip “gihaw-asan” (Mga Taga-Filipos 2:7) naggikan sa pulong sa Gresya nga kenoō, nga nagpasabut nga “gihabwaan sa tanang sulod.” Si Elder Tad R. Callister, nga nakaserbisyo sa Presidency sa Seventy, mitudlo mahitungod sa balaang mga pribilehiyo ug status ni Jesus nga “gihabwaan” ang Iyang kaugalingon sa pag-anhi sa kalibutan:
“Ang Dios nga Anak mibaylo sa langitnon niyang panimalay ug sa tanang celestial nga mga dayan-dayan para sa mortal nga panimalay nga may kinaraang mga dayan-dayan. Siya, ‘ang Hari sa Langit’ (Alma 5:50), ‘ang Ginoong Makagagahum kinsa naghari’ (Mosiah 3:5), mibiya sa trono aron matawo sa usa ka pasungan. Gibaylo Niya ang iyang kamandoan nga usa ka dios nga magtubo sama sa usa ka bata. Gibiyaan ang katigayunan, gahum, kamandoan, ug kahingpitan sa iyang himaya—alang sa unsa?—aron biay-biayon, bugal-bugalan, pasakitan, ug ubos sa mga kahuyang. Usa kadto ka pagbaylo nga dili hitupngan, usa ka pagpaubos nga dili masukod, pagpaubos nga ang kaladmon lisud tugkaron” (The Infinite Atonement [2000], 64).
Mga Taga-Filipos 2:12–13. “Panlimbasugi ninyo ang inyong kaugalingong kaluwasan. … Kay diha sa sulod ninyo ang Dios mao ang nagapalihok sa inyong pagtinguha”
Gitudlo ni Presidente Joseph Fielding Smith sa unsang paagi ang mga miyembro sa Simbahan “[makapanlimbasug] sa [ilang] kaugalingong kaluwasan” (Mga Taga-Filipos 2:12):
“Nangamuyo ko sa mga miyembro sa Simbahan sa paghimo og matarung, sa pagtuman sa mga sugo, sa pagtinguha sa Espiritu, sa paghigugma sa Ginoo, sa pag-una sa gingharian sa Dios sa ilang kinabuhi, ug molihok alang sa ilang kaluwasan uban sa kahadlok ug pagkurog atubangan sa Ginoo” (sa Conference Report, Okt. 1970, 8).
Ang mao nga mga buhat, nga gitugot sa Dios nga atong mahimo, gikinahanglan aron maangkon ang mga rikisito nga Iyang giestablisar sa pagdawat sa tanang panalangin nga gihimong posible pinaagi sa Pag-ula.
Si Elder Dallin H. Oaks sa Korum sa Napulog Duha ka mga Apostoles mitudlo nga gumikan sa Pag-ula sa Manluluwas kita naluwas:
“Ang tawo dili ikapangutana nga dunay makadani nga gahum ug makapahinabo og talagsaong mga butang pinaagi sa walay kaluyahang paningkamot ug kabubut-on nga walay makabuntog. Apan human sa tanan natong kamasulundon ug maayong mga buhat, dili kita maluwas sa epekto sa atong mga sala kon wala ang grasya pinaagi sa pag-ula ni Jesukristo.
“… Dili mabuhat sa tawo ang kaugalingon niyang kaluwasan” (“What Think Ye of Christ?” Ensign, Nob. 1988, 67.