Juan 2–6 (Unit 13)

Materyal sa Pagpangandam alang sa Magtutudlo sa Home-Study

Summary sa mga Leksyon sa Daily Home-Study

Ang mosunod nga mga summary sa panghitabo, mga doktrina, ug mga baruganan nga nakat-unan sa mga estuyante dihang gitun-an nila ang Juan 2–6 (unit 13) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.

Day 1 (Juan 2)

Dihang gibasa sa mga estudyante ang mahitungod sa unang milagro nga paghimo sa tubig ngadto sa bino, ilang nakat-unan nga si Jesukristo dunay gahum labaw sa pisikal nga mga elemento. Nakat-unan sab nila nga ang Manluluwas nahigugma ug mitahud sa Iyang inahan. Dihang gitun-an nila ang istorya bahin ni Jesus nga milimpyo sa templo, nakat-unan sa mga estudyante nga ang templo balay sa Dios.

Day 2 (Juan 3)

Nakat-unan sa mga estudyante ang mosunod nga mga kamatuoran gikan sa mga pagtulun-an sa Manluluwas kang Nicodemo: Ang pagpabunyag ug pagkadawat sa Espiritu Santo gikinahanglan aron igaanak pag-usab sa espirituhanong paagi ug makadawat sa kahimayaan sa celestial nga gingharian. Ang tanang tawo makabaton og kinabuhing dayon pinaagi sa Pag-ula ni Jesukristo. Ang Langitnong Amahan nahigugma kaayo sa Iyang mga anak nga Siya mipadala sa Iyang Bugtong Anak aron mag-antus para sa ilang mga sala. Kon motuo kita ni Jesukristo, diin naglakip sa paghinulsol sa atong mga sala ug pagsunod sa Iyang pulong, maangkon nato ang kinabuhing walay katapusan pinaagi sa Iyang Pag-ula. Gikan sa ehemplo ni Juan Bautista, nakat-unan sa mga estudyante nga kita makaimpluwensya og kaayohan sa uban pinaagi sa paggiya kanila ngadto kang Jesukristo.

Day 3 (Juan 4)

Dihang gibasa sa mga estudyante ang mahitungod sa mga pagtulun-an sa Manluluwas ngadto sa usa ka babaye nga Samarianhon sa may atabay, ilang nakat-unan ang mosunod nga mga kamatuoran. Kon moduol kita kang Jesukristo ug matinguhaon nga moambit sa Iyang ebanghelyo, nan makadawat kita og kinabuhing dayon. Si Jesukristo nahibalo sa atong mga sala ug nagtanyag kanato sa Iyang ebanghelyo aron matabangan kita sa pagbuntog niini. Kon simbahon nato ang Amahan sa espiritu ug kamatuoran, Iya kitang panalanginan sa Iyang Espiritu. Samtang makaangkon kita og pagpamatuod kang Jesukristo, mapuno kita sa tinguha nga mapakigbahin kini sa uban.

Day 4 (Juan 5–6)

Dihang gibasa sa mga estudyante ang mahitungod sa Manluluwas nga miayo sa tawo nga masakiton, ilang nakat-unan nga pinaagi sa gahum ug kalooy ni Jesukristo, kita mamaayo. Nakat-unan sab nila nga pinaagi lamang sa pagduol kang Jesukristo nga kita makaangkon og kinabuhing dayon. Gikan sa sermon sa Manluluwas bahin sa Tinapay sa Kinabuhi, nakat-unan sa mga Estudyante nga ang usa ka lig-ong pagpamatuod kang Jesukristo makatabang natong magpabiling matinud-anon atol sa mga panahon nga ingon og lisud ang pagsunod sa Manluluwas o pagsunod sa Iyang mga pagtulun-an.

Pasiuna

Sa adllaw human sa milagruso Niyang pagpakaon sa panon nga kapin sa 5,000 ka mga tawo, gitudlo Niya nga Siya ang Tinapay sa Kinabuhi.

Mga Sugyot alang sa Pagtudlo

Juan 6:22–59

Gitudlo ni Jesus nga Siya ang Tinapay sa Kinabuhi

I-display ang usa ka pirasong tinapay. Dapita ang usa ka estudyante nga mo-summarize sa istorya bahin sa Manluluwas nga mipakaon sa kapin sa 5,000 ka mga tawo pinaagi sa lima ka piraso nga tinapay ug duha ka gagmayng isda.

Unsa kaha ang inyong mahunahuna kon didto pa mo atol niini nga milagro ug nakahibalo nga si Jesus dunay katakus sa paghatag og pagkaon sa milagrusong paagi?

Ipasabut nga ang Juan 6:22–25 nagrekord nga daghan sa mga tawo kinsa milagruso nga gipakaon ni Jesus mibiyahe ngadto sa Capernaum sa pagpangita Kaniya.

Dapita ang usa ka estudyante sa pagbasa og kusog sa Juan 6:26–27 . Hangyoa ang klase sa pagsunod, nga mangita kon unsay gisulti ni Jesus ngadto sa mga tawo.

Ipasabut nga ang Joseph Smith Translation sa Juan 6:26 miklaro sa pagpasabut nga, “Ug si Jesus mitubag kanila, Sa pagkatinuod, sa pagkatinuod, magaingon ako kaninyo, nga kamo nangita kanako dili tungod kay nakakita kamo sa mga milagro, kondili tungod kay kamo nakakaon man ug nangabusog sa tinapay” (Joseph Smith Translation, Juan 6:26 ). Ipasabut usab nga ang pulong nga kalan-on diha sa Juan 6:27 ug sa Biblia nag-refer sa pagkaon. Ang pulong nga pagkaon gigamit usab sa pag-refer sa gitawag nato og karne.

Sumala sa Manluluwas, ngano nga nangita man kining mga tawhana Kaniya? (Ang mga pulong sa Manluluwas nagsugyot nga sila misunod Kaniya aron makakuha og daghan pang pagkaon gikan Niya.)
Unsa ang gisulti sa Manluluwas kanila nga maoy angay nilang pangitaon?

Ipasabut nga ang “kalan-on [o pagkaon] nga molungtad ngadto sa kinabuhing dayon” sa (Juan 6:27) mahimong mag-refer ngadto sa mahangturong mga kamatuoran sa ebanghelyo sa Manluluwas.

Dapita ang usa ka estudyante sa pagbasa og kusog sa Juan 6:28–31 . Hangyoa ang klase sa pagsunod, nga mangita kon unsay gitinguha sa mga tawo kang Jesus aron makadawat sila og dugang pa nga pruweba nga Siya ang Mesiyas.

Unsa ang gusto sa mga tawo nga buhaton ni Jesus alang nila? (Ipasabut nga ang manna mao ang “tinapay gikan sa langit” [Juan 6:31] nga gihatag sa Dios alang sa mga anak sa Israel dihang didto sila sa kamingawan; tan-awa sa Exodo 16:14–15, 35.)

Dapita ang pipila ka mga estudyante nga magpuli-puli sa pagbasa og kusog sa Juan 6:32–35 . Hangyoa ang klase sa pagsunod, nga mangita kon unsay gitudlo sa Manluluwas sa mga tawo agig tubag sa ilang gipangayo nga timailhan.

Unsa man ang gitudlo sa Manluluwas mahitungod sa Iyang kaugalingon dihang gihisgutan Niya ang manna, o tinapay gikan sa langit?

Mahimo nimong isugyot nga markahan sa mga estudyante ang mga pulong nga “Ako mao ang tinapay nga nagahatag og kinabuhi” sa Juan 6:35.

Sa unsa nga mga paagi atong mapahisama ang Manluluwas ug ang Iyang mga pagtulun-an sa tinapay?
Sa inyong hunahuna unsay ipasabut nga kadtong kinsa moduol kang Jesukristo “dili gutumon”? (Juan 6:35.) (Usa ko posibling tubag mao nga Siya moamuma kanila sa espirituhanong paagi.)
Unsa nga kamatuoran ang atong makat-unan gikan sa mga pagtulun-an sa Manluluwas diha sa bersikulo 35? (Bisan og ang mga estudyante mogamit og lain-laing mga pulong, kinahanglang mahibaloan nila ang baruganan sama sa mosunod: Kon moduol kita ni Jesukristo, Siya moamuma kanato sa espirituhanong paagi. Isulat sa pisara kini nga baruganan.)

Isulat sa pisara ang mosunod nga dili kompleto nga pamahayag:

Moduol kita kang Jesukristo pinaagi sa …

Moamuma siya nato pinaagi sa …

Ipares-pares ang mga estudyante. Hangyoa sila nga magtinabangay sa paghimo og lista diha sa ilang mga class notebook o mga scripture study journal sa pipila ka mga butang nga ilang mahimo aron makaduol kang Jesukristo ug sa mga paagi nga Siya moamuma kanato sa espirituhanong paagi. Dapita ang pipila ka estudyante sa pagreport sa ilang mga tubag ngadto sa klase.

Ikonsiderar ang pagdapit og pipila ka estudyante sa pagpakigbahin sa unsang paagi sila nakadawat og espirituhanong pag-amuma dihang miduol sila sa Manluluwas.

Aron maandam ang mga estudyante nga mahibaloan ang dugang nga baruganan nga gitudlo sa Manluluwas, dapita ang pipila ka estudyante sa pagduol sa atubangan ug hatagi sila og usa ka piraso nga pan. Dapita sila sa pagsimhot sa tinapay ug ipa-imagine kon unsa kahay lami niini.

Sa unsang paagi kaha kini nga tinapay makabusog kon inyo lamang kining simhuton, i-imagine lang kon unsay lami, ug sigihon lang og dala-dala sa tibuok adlaw?
Unsa ang angay natong buhaton aron makabenipisyo sa unsay ikahatag sa tinapay?

Dapita ang pipila ka estudyante nga magpuli-puli sa pagbasa og kusog sa Juan 6:49–54 . Hangyoa ang klase sa pagsunod, nga mangita kon sa unsang paagi ang kasinatian sa ilang mga classmate ikapahisama sa gitudlo sa Manluluwas niini nga mga bersikulo.

Sa unsang paagi ang Tinapay sa Kinabuhi lahi kay sa regular nga tinapay? (Dili sama sa tinapay nga makatagbaw nato sa mubo lang nga panahon, si Jesukristo mitanyag kanato og mga panalangin nga molungtad sa kahangturan.)
Sumala sa bersikulo 53–54, unsa ang gitudlo sa Manluluwas nga buhaton sa mga tawo?

Ipasabut nga ang Manluluwas migamit sa mga pulong nga pagkaon ug pag-inom isip simbolo. Aron matabangan ang klase nga makasabut sa mga pagtulun-an sa Manluluwas, dapita ang mga miboluntaryo nga mga estudyante sa pagkaon sa pan. Dayon pabalika sila sa ilang mga lingkuranan.

Unsa ang mahitabo sa pan ug sa mga sustansya kon kini gikaon na. (Ang mga bitamina ug mga sustansya nahimong kabahin sa lawas, naghatag og kusog ug kamaayo sa panglawas.)
Sa inyong hunahuna unsay ipasabut sa pagkaon sa unod ug pag-inom sa dugo ni Jesukristo? (Mahimong nagpasabut kini nga ipatuhop gayud dinhi kanato ang Iyang mga pagtulun-an ug Pag-ula. Mahimo sab nga magrepresentar kini sa pag-ambit sa sakrament, nga sa wala madugay gihimo sa Manluluwas.)
Sumala sa Juan 6:54, unsa nga panalangin ang atong madawat kon atong ipatuhop o gamiton, ang mga pagtulun-an ug Pag-ula ni Jesukristo? (Human makatubag ang mga estudyante, isulat sa pisara ang mosunod nga baruganan: Kon atong ipatuhop, o gamiton, ang mga pagtulun-an ug ang Pag-ula ni Jesukristo, atong madawat ang kinabuhing dayon.)

Dapita ang usa ka estudyante sa pagbasa og kusog sa pamahayag ni Elder Bruce R. McConkie sa Korum sa Napulog Duha ka mga Apostoles. Hangyoa ang klase sa pagpamninaw sa mga pamaagi nga iyang giingon nga atong mapatuhop dinhi kanato ang mga pagtulun-an ug Pag-ula ni Jesukristo.

“Ang pagkaon sa lawas ug pag-inom sa dugo sa Anak sa Dios mao, una, pagdawat kaniya sa tinuoray ug sa kinatibuk-ang kahulugan, nga walay pagduha-duha bisan sa unsa man, isip personal nga kaliwatan sa lawas sa Mahangturon nga Amahan; ug, ikaduha, kini mao ang pagsunod sa mga sugo sa Anak pinaagi sa pagdawat sa iyang ebanghelyo, pagpamiyembro sa iyang Simbahan, ug sa paglahutay pinaagi sa kamasulundon ug kamatarung hangtud sa katapusan. Kadtong kinsa nga subay niini nga pamaagi mokaon sa iyang lawas ug moinom sa iyang dugo makaangkon og kinabuhing dayon, nagpasabut sa kahimayaan sa kinatas-an nga langit sa celestial nga kalibutan” (Doctrinal New Testament Commentary, 3 vols. [1965–73], 1:358).

Unsa ang gisugyot ni Elder McConkie nga atong mapatuhop ang mga pagtulun-an ug Pag-ula ni Jesukristo?

Ipasabut nga ang kinabuhing dayon mao ang pagpuyo sa kahangturan ug mamahimong sama sa Langitnong Amahan ug sa iyang Anak, nga si Jesukristo. Dapita ang usa ka estudyante sa pagbasa og kusog sa Juan 6:56–57 . Hangyoa ang klase sa pagsunod, nga mangita kon sa unsang paagi kita mahisama Kanila samtang atong ipatuhop dinhi kanato ang mga pagtulun-an ug Pag-ula ni Jesukristo. Hangyoa ang mga estudyante sa pagreport sa ilang nakit-an.

Ipasabut nga ang Manluluwas dili makig-uban kanato sa pisikal, apan hinoon ang Iyang balaang impluwensya magpabilin kanato aron matabangan kita nga mahimong mas sama Kaniya ug sa Langitnong Amahan.

I-summarize ang Juan 6:59–66 pinaagi sa pagpasabut nga ang ubang mga disipulo ni Jesus misalikway sa Iyang mga pagtulun-an ug wala na mosunod Kaniya.

Ipaambit ang imong pagpamatuod bahin sa mga kamatuoran nga nahibaloan sa mga estudyante. Dapita ang mga estudyante sa pagsulat diha sa ilang mga class notebook o mga scripture study journal og usa ka tumong kon unsaon nila nga mas mapatuhop ang Pag-ula sa Manluluwas o ang usa sa Iyang mga pagtulun-an.

Sunod nga Unit (Juan 7–10)

Sultihi ang mga estudyante nga sa sunod nga unit ilang kat-unan kon giunsa sa pagtratar ni Jesukristo ang usa ka babaye nga nasakpang nanapaw ug unsay Iyang gisulti hinungdan nga nanglakaw ang mga tawo nga gustong mopatay kaniya. Mahimo nimong papiyungon ang mga estudyante ug ipa-imagine kon unsa ang pagbati sa usa ka buta. Dayon pangutan-a kon unsa ang pagbati nga mamaayo gikan sa pagkabuta ug makakita sa pinakaunang higayon? Mabasa sa mga estudyante ang mahitungod sa usa ka tawong buta kinsa wala lamang makadawat og pisikal nga panan-aw apan nakadawat usab og espirituhanong panan-aw ug pagsaksi nga si Jesus mao ang Kristo, ang Anak sa Dios. Makat-unan sab nila nganong ang Manluluwas mitawag sa Iyang kaugalingon nga Maayong Magbalantay ug unsa nga gahum ang giingon Niya nga Iyang nadawat gikan sa Amahan.