Mateo 13:24–17:27 (Unit 4)

Mga Materyal para Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang nagtuon sila sa Mateo 13:24–17:27 (unit 4) wala gitumong nga itudlo isip kabahin sa imong leksyon. Ang leksyon nga imong gitudlo nakatutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang naghunahuna ka sa mga panginahanglan sa imong mga estudyante.

Day 1 (Mateo 13:24–58)

Gikan sa sambingay sa trigo ug sa mga bunglayon [tares], nakat-unan sa mga estudyante nga ang Ginoo mopundok sa mga matarung panahon sa katapusang mga adlaw ug dayon molaglag sa mga dautan atol sa Iyang Pag-anhi. Sa dugang nga mga sambingay ilang nakat-unan ang mahitungod sa gipahiuli nga Simbahan ni Jesukristo nga mopuno sa tibuok yuta ug ang mahangturong mga panalangin nga mahimong moabut niadtong nagsakripisyo aron makabaton sa ebanghelyo ni Jesukristo.

Day 2 (Mateo 14)

Gikan sa Mateo 14 nasabtan sa mga estudyante nga pinaagi sa pagpakita og kalooy alang sa uban bisan kon nakasinati kita og kaguol, nagsunod kita sa ehemplo ni Jesukristo. Nakat-unan usab nila nga kon tinguhaon nato ang panabang sa Dios kon ang atong pagtuo mohuyang, makadasig Siya kanato gikan sa atong mga kahadlok ug mga pagduha-duha.

Day 3 (Mateo 15)

Gikan sa instruksyon sa Manluluwas ngadto sa mga escriba ug mga Pariseo, nakat-unan sa mga estudyante nga kon tinguhaon nato nga mapaduol sa Dios, kinahanglan gayud natong ibutang Iyang mga sugo ibabaw sa bisan unsa natong mga tradisyon ug mga kustombre. Nakat-unan usab nila nga kon pilion nato nga mohangup sa dautan o sa dili angay nga mga hunahuna ug mga tinguha, nan kadto nga mga hunahuna ug mga tinguha mopahugaw kanato, ug nga samtang magpakita kita og hugot nga pagtuo diha ni Jesukristo, makadawat kita og mga panalangin sumala sa atong matarung nga mga tinguha.

Day 4 (Mateo 16–17)

Sa ilang pagtuon sa Mateo 16–17, nakat-unan sa mga estudyante nga ang Simbahan ni Jesukristo gitukod diha sa pinadayag gikan sa Dios. Nakat-unan usab nila ang mahitungod sa mga yawe sa priesthood nga gitugyan sa karaang panahon ug sa atong panahon nga motugot sa mga sulugoon sa Ginoo sa pagdumala sa Iyang Simbahan dinhi sa yuta.

Pasiuna

Gibadlong ni Jesukristo ang mga Pariseo ug ang mga Saduceo nga nangita og timailhan sa Iyang kabalaan. Mipamatuod si Pedro nga si Jesus mao ang Kristo ug gisaaran sa mga yawe sa gingharian sa langit. Ang mosunod nga mga ideya sa pagtudlo makatabang sa mga estudyante nga masabtan kon unsaon sa pagpalig-on ang ilang mga pagpamatuod.

Mga Sugyot alang sa Pagtudlo

Mateo 16:1–12

Ang mga Pariseo ug ang mga Saduceo nagtinguha og timailhan gikan sa Manluluwas

Sa dili pa magklase, isulat sa pisara ang mosunod nga mga pulong:

Pinaagi sa pagpakita sa usa ka anghel

Pinaagi sa Espiritu Santo

Pinaagi sa pagtuo sa mga gisulti sa usa ka higala o sakop sa pamilya

Pinaagi sa pagsaksi og usa ka milagro

Sa pagsugod sa leksyon, hangyoa ang mga estudyante sa pagpili og mga pulong diha sa pisara nga mas naghulagway kon sa unsang paagi nila gustong madawat ang pagpamatuod sa ebanghelyo. Dapita ang pipila ka mga estudyante sa pagreport kon hain nga mga pulong ang ilang gipili ug ipasabut kon nganong ila kining gipili.

Dapita ang mga estudyante samtang nagtuon sila sa Mateo 16 sa pagpangita alang sa mga kamatuoran kalabut kon unsaon sa Ginoo sa pagtabang kanato aron makadawat ug malig-on ang atong mga pagpamatuod bahin sa ebanghelyo.

Dapita ang usa ka estudyante sa pagbasa og kusog sa Mateo 16:1. Hangyoa ang mga estudyante sa pagsunod, nga mangita sa unsay gusto sa mga Pariseo ug mga Saduceo gikan kang Jesus.

Unsa man ang gusto sa mga Pariseo ug sa mga Saduceo gikan kang Jesus?

Dapita ang pipila ka estudyante nga magpuli-puli sa pagbasa og kusog sa Mateo 16:2-4. Hangyoa ang klase sa pagsunod, mangita sa tubag sa Manluluwas ngadto sa mga Pariseo ug sa mga Saduceo.

Unsa nga timailhan ang giingon sa Ginoo nga Iyang ihatag?

Ipasabut nga si Jesus nag-refer ngadto sa propeta sa Daang Tugon nga si Jonas, kinsa gilamoy sa usa ka “dakong isda” (Jonas 1:17). Ang “paglubong” ni Jonas diha sa sulod ug dayon sa pagguwa gikan sa tiyan sa isda human sa tulo ka adlaw nagsimbolo sa kamatayon, paglubong, ug pagkabanhaw ni Jesukristo gikan sa lubnganan sa ikatulo nga adlaw.

Si Elder Bruce R. McConkie sa Korum sa Napulog Duha ka mga Apostoles mipasabut sa timailhan bahin ni propeta Jonas: “Ang paglubong ni Jonas ug ang pagguwa gikan sa ‘dakong isda’ (Jonas 1:15–17; 2) nagsimbolo sa kamatayon, paglubong, ug pagkabanhaw ni Kristo” (Mormon Doctrine, 2nd ed. [1966], 711–12).

Unsa ang gibuhat sa Manluluwas human Niya badlunga ang mga Pariseo ug ang mga Saduceo?
Unsa man ang atong makat-unan gikan niini nga kasinatian mahitungod sa dili angay nga paagi sa pagtinguha og espirituhanong kamatuoran? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Dili kita makadawat og espirituhanong kamatuoran pinaagi sa pagtinguha og mga timailhan.)

I-summarize ang Mateo 16:5–12 pinaagi sa pagpasabut nga gipasidan-an sa Manluluwas ang Iyang mga disipulo mahitungod sa sayop nga mga pagtulun-an sa mga Pariseo ug sa mga Saduceo.

Mateo 16:13–20

Mipamatuod si Pedro mahitungod ni Jesukristo ug gisaaran sa mga yawe sa gingharian

Ipasabut nga human badlunga ni Jesus ang mga Pariseo ug ang mga Saduceo tungod sa pagtinguha og timailhan, gitudloan Niya ang Iyang mga disipulo kon sa unsang paagi nga makadawat og pagpamatuod mahitungod sa kamatuoran. Dapita ang usa ka estudyante sa pagbasa og kusog sa Mateo 16:13–14. Hangyoa ang klase sa pagsunod, nga mangita sa pangutana nga gipangutana ni Jesus ug sa tubag nga gihatag sa Iyang mga disipulo.

Unsa ang gipangutana sa Manluluwas sa Iyang mga disipulo? Giunsa nila sa pagtubag? (Mahimo nimong ipasabut nga sila si Elias ug Jeremias mao ang mga propeta sa Daang Tugon nga sila si Elijah ug Jeremias.)
Unsay mapakita sa ilang tubag ngari nato kalabut sa unsay nasabtan sa mga tawo kon kinsa si Jesus nianang puntoha sa Iyang pangalagad?

Pahinumdom: Diha sa leksyon alang sa day 4, gitun-an sa mga estudyante ang scripture mastery passage nga Mateo 16:15–19. Hunahunaa ang paggahin og pipila ka minutos sa pagribyu sa tudling uban kanila.

Dapita ang usa ka estudyante sa pagbasa og kusog sa Mateo 16:15–17. Hangyoa ang klase sa pagsunod, nga mangita sa ikaduhang pangutana nga gipangutana sa Manluluwas.

Unsa man ang ikaduhang pangutana nga gipangutana sa Manluluwas? Giunsa man pagtubag ni Pedro?
Sumala sa bersikulo 17, giunsa pagkasayud ni Pedro nga si Jesus Anak sa Dios? (Ipasabut nga gipadayag sa Langitnong Amahan kini nga kamatuoran ngadto kaniya pinaagi sa Espiritu Santo.)
Unsa nga kamatuoran ang atong makat-unan gikan niini nga mga bersikulo kalabut kon unsaon nato sa pagbaton og pagpamatuod mahitungod ni Jesukristo? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga kamatuoran: Makabaton kita og pagpamatuod mahitungod ni Jesukristo pinaagi sa pagpadayag gikan sa Espiritu Santo.)
Sa inyong hunahuna nganong importante man alang kanato nga makadawat og pagpamatuod pinaagi sa pagpadayag gikan sa Espiritu Santo imbis nga sa laing paagi?

Aron matabangan ang mga estudyante nga masabtan ang tahas sa Espiritu Santo sa pagtabang kanato nga makabaton og pagmamatuod mahitungod sa Manluluwas, dapita ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith:

“Ang Espiritu sa Dios nga namulong sa espiritu sa tawo dunay gahum sa paghatag sa kamatuoran sa mas dakong epekto ug panabut kay sa kamatuoran nga gihatag pinaagi sa personal nga kontak bisan sa langitnong mga binuhat. Pinaagi sa Espiritu Santo ang kamatuoran modulot sa kinahiladman ug sa kaugatan aron kini dili gayud hikalimtan” (Mga Pagtulun-an sa mga Presidente sa Simbahan: Joseph Fielding Smith [2013], 208).

Unsa ang pipila ka mga butang nga atong mabuhat aron maandam ang atong kaugalingon nga makadawat og pagpadayag pinaagi sa Espiritu Santo?
Giunsa ninyo pagkasayud nga si Jesukristo mao ang Anak sa Dios ug ang inyong Manluluwas? Unsay inyong gibuhat aron maandam nga makadawat nianang pagsaksi gikan sa Espiritu Santo?

Dapita ang mga estudyante sa pagpamalandong kon unsaon nila sa pagpalig-on ang ilang mga pagpamatuod o unsay angayan nilang buhaton aron makadawat og pagpamatuod pinaagi sa Espiritu Santo. Awhaga sila nga buhaton ang bisan unsa nga pag-aghat nga ilang madawat.

Sunod nga Unit (Mateo 18:1–22:26)

Hangyoa ang mga estudyante sa pagkonsiderar og usa ka higayon sa dihang lisud alang kanila ang pagpasaylo sa laing tawo. Ipahunahuna nila ang mosunod nga mga pangutana: Nganong mibati ka nga makapangatarungan nga dili mopasaylo niini nga tawo? Nganong kinahanglan kita nga mopasaylo sa uban sa ilang mga kalapasan bisan kon mibati kita nga makapangatarungan nga dili mopasaylo kanila? Ipapangita sa mga estudyante ang mga tubag niini nga mga pangutana samtang magpadayon sila sa ilang pagtuon sa umaabut nga semana.