Pasiuna sa Pinadayag ni San Juan nga Balaan
Ngano nga kinahanglang tun-an kini nga basahon?
Isip “Pinadayag ni Jesukristo” (Pinadayag 1:1), kini nga basahon usahay tawagon nga Apokalipsis, nga sa Gresya nagpasabut nga usa ka pagpadayag, pagkuha sa tabon, o pagpakita sa tinago (tan-awa sa Ang Giya ngadto sa mga Kasulatan, “Pinadayag ni Juan”). Kini nga basahon mao ang pagbutyag sa Ginoo nga si Jesukristo ug sa pagpadayag sa Iyang awtoridad, gahum, ug sa labaw nga tahas sa plano sa Amahan sa kaluwasan. Ang basahon daghan usab og gipadayag nga importanting impormasyon mahitungod sa mga panghitabo nga mag-una sa Ikaduhang Pag-anhi ug sa Milenyum.
Ang pagtuon sa basahon sa Pinadayag makatabang sa mga estudyante sa pagbaton og mas lawom nga panabut sa nabanhaw ug nahimaya nga Anak sa Dios ug sa Iyang pakig-uban sa mga anak sa Dios sa tanang kapanahunan sa kasaysayan, ilabi na sa katapusang mga adlaw. Kini nga basahon naghatag og mensahe sa paglaum ngadto sa mga matarung ug makahatag og kadasig sa mga estudyante sa pagpabiling matinud-anon sa ilang mga pagpamatuod sa Manluluwas taliwala sa pagpanglutos ug mga pagsulay.
Kinsa ang nagsulat niini nga basahon?
Si Apostol Juan, ang hinigugmang disipulo ni Jesukristo, ang tagsulat niini nga basahon. Ang Basahon ni Mormon nagmatuod nga si Juan giorden nang daan aron mosulat sa mga butang nga narekord sa basahon sa Pinadayag (tan-awa sa 1 Nephi 14:18–27; Ether 4:16).
Kanus-a ug diin kini gisulat?
Ang basahon sa Pinadayag gisulat sa panahon nga ang mga Kristiyanos nagsagubang og sayop nga mga pagtulun-an, kaluya, ug grabing pagpanglutos (tan-awa sa Pinadayag 1:9; 2:4, 10, 14–15; 3:16; 6:9). Kini nga pagpanglutos labing siguro naggikan sa mga kamot sa Romanong mga opisyal sa katapusang duha ka dekada sa unang siglo A.D. gisulat ni Juan gikan sa isla o pulo sa Patmos sa Aegean Sea, mga 60 milyas (100 ka kilometros) sa habagatang kasadpan sa Efeso (tan-awa sa Pinadayag 1:9).
Para kang kinsa kini gisulat ug ngano?
Misulat si Juan og usa ka mensahe sa paglaum ug pagdasig sa mga Santos sa iyang kapanahunan (tan-awa sa Pinadayag 1:4, 11) ug niadtong anaa sa katapusang mga adlaw. Ang nag-unang tulo ka mga kapitulo sa Pinadayag piho nga gipamulong ngadto sa pito ka branch sa Simbahan sa Asia Minor (tan-awa sa Pinadayag 1:4, 11; 2–3). Tungod sa kagrabe sa pagpanglutos, ang mga Santos anaa sa dako kaayong panginahanglan sa makadasig nga mga mensahe nga anaa makita sa Pinadayag. Agig dugang, si propeta Nephi mipamatuod nga “ang Dios mi-orden [ni] apostol” Juan sa pagsulat mahitungod sa katapusan sa kalibutan (1 Nephi 14:25) ug ang iyang mga pulong moabut ngadto sa mga Hentil ug sa mga salin sa Israel sa katapusang mga adlaw (tan-awa sa 1 Nephi 13:20–24, 38; 14:19–27).
Unsa ang pipila ka mga butang nga nakalahi niini nga basahon?
Si Propeta Joseph Smith mitudlo: “Ang basahon sa Pinadayag mao ang usa sa pinakasayon nga mga basahon nga gipasulat sa Dios” (sa History of the Church, 5:342). Bisan og kini daghan kaayong mga paglarawan ug mga simbolo nga dili sayon nga ilhon sa mga tigbasa sa modernong kapanahunan, ang mga tema sa basahon yano ug makadasig.
Gihulagway ni Juan ang mga kahimtang sa Simbahan sa iyang panahon (tan-awa sa Pinadayag 2–3) ug misulat mahitungod sa milabay ug sa umaabut nga mga panghitabo (tan-awa sa Pinadayag 4–22). Ang basahon sa Pinadayag naglangkob og usa sa pipila ka mga tudling o passage sa mga kasulatan nga naghulagway sa premortal o sa wala pa dinhi sa yuta nga Gubat sa Langit (tan-awa sa Pinadayag 12:7–11) ug nagtanyag kini og overview sa kasaysayan sa kalibutan, nga nagtutok ilabi na sa ulahing mga adlaw ug sa Milenyum. Ang nag-unang mga tema naglakip sa tahas ni Jesukristo sa pagpatuman sa plano sa Dios, ang kamot sa Dios sa kasaysayan sa kalibutan, sa Ikaduhang Pag-anhi ni Jesukristo ug sa kalaglagan sa dautan, ug sa saad nga ang kalibutan sa katapusan mamahimong celestial. Ang basahon nagpasabut usab nga adunay “usa ka permanente nga kadaugan sa maayo batok sa dautan … [ug] sa gingharian sa Dios batok sa mga gingharian sa tawo ug kang Satanas” (Ang Giya ngadto sa mga Kasulatan, “Pinadayag ni Juan”).
Outline
Pinadayag 1–3 Nakakita si Juan og usa ka panan-awon mahitungod ni Jesukristo. Misulat siya og tinagsa nga mensahe ngadto sa pito ka mga simbahan sa Asia; kini nga mga mensahe naglakip sa pagdayeg, mga pahimangno, ug mga saad ngadto sa matinud-anong mga Santos sa matag branch.
Pinadayag 4–11 Nakakita si Juan og panan-awon mahitungod sa Dios nga anaa sa trono sa celestial nga gingharian, sa Kordero sa Dios, ug sa basahon nga gisilyuhan og pito ka mga silyo. Nakita ni Juan ang mga panan-awon nga may kalabutan sa pag-abli sa pito ka mga timri o silyo. Kadtong adunay mga silyo sa Dios sa ilang mga agtang makadawat og proteksyon sa Dios sa katapusang mga adlaw. Nakita ni Juan ang mga gubat, hampak o mga kasakitan, ug daghan pang mga hitabo sa katapusang mga adlaw nga mag-una sa Ikaduhang Pag-anhi.
Pinadayag 12-16 Nakakita si Juan og panan-awon mahitungod sa premortal nga Gubat sa Langit ug sa sumpay niini dinhi sa yuta. Iyang gitudlo nga ang dautang mga pwersa nagplano nga moguba sa gingharian sa Dios dinhi sa yuta. Sa katapusang mga adlaw ang ebanghelyo ipahiuli nganhi sa yuta sa kahingpitan niini pinaagi sa pagpangalagad sa mga anghel. Ang mga pagpangandam himoon alang sa gubat sa Armagedon.
Pinadayag 17–22 Ang Espirituhanong Babelonia mokatap sa tibuok kalibutan. Human sa panagpundok sa matarung nga mga Santos, ang Babelonia mapukan ug ang mga tigsuporta niini magbangutan. Ang mga matarung dapiton ngadto sa panihapon sa kasal sa Kordero sa Dios. Si Satanas gapuson, ang Milenyum magsugod, ug si Kristo personal nga maghari dinhi sa kalibutan. Ang mga patay pagahukman. Ang kalibutan makadawat sa iyang celestial nga himaya.