Leksyon 29

Mateo 25:14–46

Pasiuna

Dihang gitudlo ni Jesukristo sa Iyang mga disipulo ang mahitungod sa Iyang Ikaduhang Pag-anhi samtang didto sa Bungtod sa mga Oliba, Iyang gisugilon ang mahitungod sa sambingay sa mga talento. Gipasabut usab Niya nga Iyang ibulag ang mga matarung gikan sa mga dautan kon Siya moanhi pag-usab.

Mga Sugyot alang sa Pagtudlo

Mateo 25:14–30

Si Jesukristo mitudlo sa iyang mga disipulo mahitungod sa sambingay sa mga talento

Sa dili pa magklase, pagbutang og lima ka sinsilyo sa pikas kilid sa kwarto ug duha ka sinsilyo sa pikas kilid. Pagbutang og laing walo ka sinsilyo sa imong bulsa.

Sa pagsugod sa leksyon, pagdapit og tulo ka estudyante nga moadto sa atubang aron motabang nimo sa pag-akting sa sambingay nga gitudlo ni Jesukristo sa Iyang mga disipulo isip kabahin sa Iyang instruksyon bahin sa Ikaduhang Pag-anhi.

Dapita ang usa ka estudyante sa pagbasa og kusog sa Mateo 25:14–18. Hangyoa ang klase sa pagsunod, nga mangita sa unsay nadawat sa matag sulugoon ug unsay iyang gihimo niini.

• Unsa ang gihatag sa agalon ngadto sa matag usa niya ka sulugoon? (Ipasabut nga ang mga talento niini nga sambingay mao ang gidaghanon sa kwarta. Kuhaa ang walo ka sinsilyo sa imong bulsa, ug ihatag ang lima sa usa ka estudyante, duha sa lain nga estudyante, ug ang usa sa ikatulo nga estudyante.)

• Unsa ang gihimo sa matag sulugoon sa kwarta nga gihatag diha nila?

Dapita ang estudyante nga dunay lima ka sinsilyo nga mangita sa dugang nga lima ka sinsilyo gikan sa pikas kilid sa kwarto. Hangyoa ang estudyante nga may duha ka sinsilyo nga mangita sa dugang nga duha ka sinsilyo gikan sa laing pikas kilid sa kwarto. Dapita ang estudyante nga may usa ka sinsilyo nga itago o magpakaaron ingnon nga milubong sa sinsilyo.

Hangyoa ang mga estudyante sa pag-uli diha nimo sa sinsilyo ug manglingkod. Isulat sa pisara ang mosunod nga mga elemento sa sambingay (nga dili iapil ang interpretasyon sulod sa parentheses):

Ang agalon sa mga sulugoon (si Ginoong Jesukristo)

Ang mga sulugoon (Mga disipulo sa Ginoo)

Ang mga talento ( Mga gasa ug mga abilidad nga gihatag sa Ginoo sa Iyang mga disipulo)

• Unsa ang girepresentaran sa mga elemento diha sa sambingay? (Ipasabut nga ang pipila ka gasa ug mga abilidad nga naa nato sa mortalidad nadawat ug napalambo na atol sa atong premortal nga kinabuhi. Kita makapili nga ipadayon sa pagpalambo kana nga mga gasa ug ang uban atol sa pagka-mortal.)

• Sumala sa Mateo 25:15, ngano nga gihatagan sa agalon ang matag sulugoon og lain-laing kantidad sa kwarta? (Human makatubag ang mga estudyante, ipasabut nga ang mga pulong nga “sumala sa iyang katakus [abilidad]” nagpasabut nga ang Dios mihatag sa matag usa nato og mga gasa ug mga abilidad nga atong gikinahanglan sumala sa atong mga kahimtang.)

Basaha og kusog ang mosunod nga mga pangutana, ug dapita ang mga estudyante sa pagpamalandong niini:

• Asa nga sulugoon ang gibati ninyo nga pareho kaayo ninyo: ang usa ba nga gihatagan og lima ka talento, duha ka talento, o usa ka talento? Ngano man?

Dapita ang usa ka estudyante sa pagbasa og kusog sa Mateo 25:19–21. Hangyoa ang klase sa pagsunod, nga mangita sa gisulti sa agalon ngadto sa sulugoon kinsa nakadawat og lima ka talento.

• Unsa ang gisulti sa agalon ngadto sa unang sulugoon?

Ipasabut nga ang pagkahimong “piniyalan sa daghang mga butang” ug ang “[pag]duyog … sa kalipay sa imong agalon” (Mateo 25:21) nagpasabut sa pagtuman sa atong balaanong potensyal ug pagdawat og kinabuhing dayon uban sa Langitnong Amahan.

• Unsa nga baruganan ang atong makat-unan gikan sa kasinatian sa unang sulugoon? (Ang mosunod posibling maoy usa ka baruganan nga nahibaloan sa mga estudyante: Kon matinud-anon kitang migamit sa mga gasa ug abilidad nga gihatag sa Ginoo kanato, niana atong matuman ang balaanon natong potensyal ug madawat ang kinabuhing dayon.)

• Unsa ang pipila ka mga example kon unsaon nga kita magmatinud-anon sa paggamit sa atong mga gasa ug abilidad nga gihatag sa Ginoo kanato?

Ipasabut nga ang ikaduhang sulugoon mahimo ra untang moreklamo dihang nakita niya nga gihatagan og lima ka talento ang unang sulugoon ug ang iya duha ra. Hinoon, nagmatinud-anon siya sa paggamit sa mga talento nga gihatag kaniya.

Dapita ang usa ka estudyante sa pagbasa og kusog sa Mateo 25:22–23. Hangyoa ang klase sa pagsunod, nga mangita sa gisulti sa agalon ngadto sa sulugoon kinsa nakadawat og duha ka talento.

• Unsa ang gisulti sa agalon ngadto sa sulugoon kinsa nakadawat og duha ka talento?

• Bisan og ang agalon mihatag sa duha ka sulugoon og managlahing kantidad sa kwarta, ngano kaha nga silang duha nakadawat man og pareho nga tubag gikan sa ilang agalon?

• Unsa nga baruganan ang atong makat-unan gikan sa kasinatian sa tawo nga gihatagan og duha ka talento? (Ang mga estudyante mahimong mogamit og lain-laing mga pulong apan kinahanglang mahibaloan nila ang mosunod nga baruganan: Panalanginan kita sa Ginoo kon magmatinud-anon kita sa paggamit sa mga gasa ug abilidad nga Iyang gihatag kanato, sa bisan kon unsa kadaghan ang naa nato o unsa man kini. Gamit ang mga pulong sa estudyante, isulat sa pisara kining baruganan.)

Hangyoa ang klase sa pagpamalandong kon mibati na ba sila nga naay tawo nga mas daghan o mas maayong gasa ug mga abilidad kay sa ilaha. Itudlo ang baruganan nga bag-o lang nimong gisulat sa pisara.

• Sa unsang paagi ang paghinumdom niini nga baruganan makatabang nato kon mobati ta nga naay tawo nga mas daghan o mas maayong gasa ug mga abilidad kay sa atoa?

Dapita ang usa ka estudyante sa pagbasa og kusog sa mosunod nga pamahayag ni Elder Quentin L. Cook sa Korum sa Napulog Duha ka mga Apostoles:

“Ang paglambo sa kaugalingon natong mga talento maoy pinakamaayong sukod sa atong personal nga pag-uswag. … Ang pakigkumpara sa mga panalangin makapaniguro nga magpalayas sa kalipay. Dili mahimong mapasalamaton ta unya sa samang panahon masinahon usab. Kon tinuoray kitang gusto nga makabaton sa Espiritu sa Ginoo ug masinati ang kamaya og kalipay, kinahanglan kitang magmaya sa kaugalingon natong mga panalangin ug magmapasalamaton” (“Rejoice!” Liahona, Nob. 1996, 29, 30).

• Unsaon man nato sa pagdiskobre ang mga gasa ug abilidad nga gihatag sa Ginoo kanato?

Hatagi ang matag estudyante og papel ug hangyoa sila sa pagsulat sa ilang ngalan diha sa ibabaw. Dapita sila nga ipasa ang ilang mga papel ngadto sa estudyante nga ilang katapad. Hangyoa ang mga estudyante sa pagsulat og usa ka gasa o abilidad nga ilang nakita sa tawo kansang ngalan naa sa papel. Hangyoa sila nga ipadayon og pasa ang ilang mga papel libut sa kwarto ug mosulat sa mga gasa og abilidad nga ilang naobserbahan.

Mag-ugmad og usa ka mahigugmaong palibut, pagtahud, ug katuyoan

Kon mahibalo ang mga estuyante nga sila gihigugma ug gitahud sa ilang magtutudlo ug sa ubang estudyante, mas ganahan silang moadto sa klase nga andam sa pagkat-on. Ang pagdawat ug ang gugma nga ilang gibati mopahumok sa ilang kasing-kasing, mopaminus sa ilang mga kahadlok, ug mopadulot og tinguha ug kamasaligon nga gikinahanglan sa ilang mga hunahuna, kasinatian, ug mga pagbati diha sa klase.

Human sa pipila ka minutos, hangyoa ang mga estudyante sa pag-uli sa mga papel ngadto sa mga tag-iya niini. Hatagi og panahon ang mga estudyante sa pagbasa mahitungod sa mga gasa ug abilidad nga nakita sa uban diha kanila. Dayon hangyoa sila sa pagsulat diha sa ilang mga papel sa tubag sa mosunod nga panguta:

• Unsa ang usa ka paagi nga kamo makagamit sa usa sa inyong mga gasa aron mapadayon ang buhat sa Dios?

Ipasabut nga ang sambingay sa mga talento naglakip og mga pahimangno bahin sa mga gasa ug abilidad nga gihatag kanato. Dapita ang pipila ka estudyante nga magpuli-puli sa pagbasa og kusog sa Mateo 25:24–30. Hangyoa ang klase sa pagsunod, nga mangita kon giunsa sa pagtubag sa agalon ang sulugoon nga mitago ra sa iyang talento. Human mabasa ang bersikulo 27, ipasabut nga ang tubo nagpasabut nga interes (ganansya gikan sa pagpamuhunan o pagpahulam og kwarta).

• Ngano nga ang katapusang sulugoon mitago sa iyang talento? Giunsa man sa pagsanong sa Ginoo ang pagpili nga gihimo sa sulugoon?

• Bisan tuod og ang sulugoon wala gayud mawad-i sa kwarta sa iyang agalon, unsay sayop nga nabuhat sa sulugoon?

• Unsa kaha sa inyong hunahuna ang itubag unta sa agalon ngadto sa sulugoon kon may giuli pa siya nga duha ka talento?

• Unsa ang nahitabo sa talento nga gihatag sa agalon ngadto sa sulugoon? (Gibawi kini ug gihatag ngadto sa uban.)

Dapita ang usa ka estudyante sa pagbasa sa mosunod nga pamahayag ni Elder Sterling W. Sill sa Seventy. Hangyoa ang klase sa pagpaminaw kon nganong mawala kanato ang mga gasa ug abilidad kon dili nato kini gamiton sa maayo.

“Nawad-an ang [ikatulong sulugoon] dili tungod kay nakabuhat siya og sayop, apan tungod kay ang kahadlok ang mipugong kaniya [gikan] sa pagbuhat og mga butang. Gani mao kini ang proseso nganong ang kadaghanan sa atong panalangin nawala. …

“… Kon dili gamiton sa usa ka tawo ang mga braso sa iyang kamot mawala ang iyang kusog. … Kon dili nato palamboon ang atong mga abilidad, mawala ang atong mga abilidad. Kon ang mga tawo kaniadto wala motahud sa Priesthood, gibawi unta kini gikan kanila. … Mao usab ang espiritwal, mental o pisikal nga mga talento dili molambo samtang gilubong kini sa yuta” (The Law of the Harvest [1963], 375).

• Unsa nga mga baruganan ang atong makat-unan gikan sa sulugoon kinsa mitago sa talento? (Bisan og ang mga estudyante mahimong mosugyot og lain-laing mga baruganan, siguroha nga mahibaloan nila ang mosunod nga mga kamatuoran: Ang kahadlok mopugong sa atong paggamit sa mga gasa ug abilidad nga gihatag sa Ginoo kanato? Kon dili nato palamboon ug gamiton sa kaayohan ang atong espirituhanong mga gasa, nan mawala kini kanato.)

• Sa unsang mga paagi nga ang kahadlok mopugong kanato sa paghimo og maayo gamit ang atong mga gasa ug abilidad?

Dapita ang mga estudyante sa pagpamatuod sa mga kamatuoran nga ilang nahisgutan. Awhaga sila sa paggamit niini nga mga gasa ug abilidad sa pagpadayon sa buhat sa Ginoo.

Mateo 25:31–46

Ang Manluluwas nanagna bahin sa pagbulag sa dautan gikan sa matarung sa Iyang Ikaduhang Pag-anhi

I-display ang litrato sa Ang Ikaduha nga Pag-anhi (Libro sa mga Hulagway sa Ebanghelyo [2009], nu. 66; tan-awa usab sa LDS.org). Dapita ang usa ka estudyante sa pagbasa og kusog sa Mateo 25:31–33. Hangyoa ang klase sa pagsunod, nga mangita sa unsay buhaton sa Ginoo ngadto sa mga tawo sa kalibutan human sa Iyang Ikaduhang Pag-anhi.

• Unsa ang buhaton sa Ginoo ngadto sa mga tawo sa kalibutan human sa Iyang Ikaduhang Pag-anhi.

• Unsa nga mga hayop ang gigamit sa Ginoo sa pagrepresentar sa mga dautan? Sa mga matarung?

Ipares-pares ang mga estudyante. Dapita ang katunga sa managpares sa pagbasa og kusog sa Mateo 25:34–40, nga mangita kon unsaon sa pagdeterminar sa Ginoo kon ang tawo usa ba ka “karnero” (Mateo 25:32–33). Dapita ang laing managpares sa pagbasa og kusog sa Mateo 25:41–46, nga mangita kon unsaon sa pagdeterminar sa Ginoo kon ang tawo usa ba ka “kanding” (Mateo 25:32–33).

Human sa igong panahon, i-assign ang matag pares sa pakigtrabaho uban sa laing magkapares nga mibasa og laing tudling [passage]. Hangyoa ang mga estudyante nga i-summarize unsay ilang nabasa ug hisgutan ang mosunod nga mga pangutana diha sa ilang mga grupo:

• Unsaon sa pag-ila sa Ginoo tali sa mga tawo nga nahigugma Kaniya (karnero) ug sa mga wala mahigugma Kaniya (mga kanding)?

• Unsa nga baruganan ang atong makat-unan gikan niini nga mga bersikulo?

Ipasulat sa pisara sa usa ka estudyante gikan sa matag grupo ang baruganan nga nahibaloan sa ilang grupo. Kinahanglang mahibaloan sa mga estuyante ang mga baruganan nga susama sa mosunod: Samtang atong gihigugma ug giserbisyuhan ang uban, atong gipakita ang atong gugma sa Ginoo. Kon atong gikalimtan ang uban, atong gikalimtan ang Ginoo.

Aron matabangan ang mga estudyante nga makasabut niini nga mga baruganan, ihatag ang mga pangutana nga susama sa mosunod:

• Unsaon kaha sa tawo nga naa sa tuo nga dapit sa Ginoo sa pagtratar ang iyang manghud nga nagpatabang sa iyang homework?

• Unsaon kaha sa tawo nga naa sa wala nga dapit sa Ginoo sa pagtratar ang kauban niyang estudyante nga natagakan og mga libro diha sa agianan?

• Sa unsang paagi ang pagsabut niini nga baruganan makatabang nga mapalambo ang atong mga pakigrelasyon sa uban?

Dapita ang mga estudyante sa pagpamalandong kon giunsa nila pagtratar ang uban sa milabayng 24 ka oras. Dapita sila sa paghunahuna kon pilion ba nila ang paghimo og lahi kon anaa sila sa sama nga sitwasyon sa umaabut. Awhaga ang mga estudyante sa paghunahuna og mga paagi nga mas makanunay ang ilang paghigugma ug pagserbisyo sa uban, ug dapita sila sa paglihok sa ilang plano. Mahimo nimong i-follow up ang mga estudyante sa sunod ninyong pagkita ug ipareport ang pipila sa ilang positibong mga ksinatian.

Komentaryo ug Background nga Impormasyon

Mateo 25:15. “Gihatagan Niya … ang matag usa sumala sa iyang katakus”

Si Presidente James E. Faust sa Unang Kapangulohan namulong bahin sa lain-laing mga gasa nga gihatag kanato.

“Gisalig sa Ginoo ngadto sa tanan Niyang sulugoon, lakip sa tanang priesthood, ang espirituhanong mga talento. … Samtang dili managsama ang atong kasinatian, katakus, ug kalig-on, may lahi lahi kitang mga kahigayunan sa paggamit nining espirituhanong mga gasa, ug kitang tanan may tulubagon sa paggamit sa mga gasa ug mga kahigayunan nga gihatag ngari kanato” (“Makahimo Ko, Ako Nasayud,” Ensign, Nob. 2002, 50).

Dugang nga Ideya sa Pagtudlo

Mateo 25:35–40. Pagpasalida sa Video—“The Coat”

Sa paghulagway sa konsepto sa pagtabang sa ubang nanginahanglan sigun sa gihulagway diha sa Mateo 25:35–40, ikonsiderar ang pagpasalida sa video nga “The Coat” (2:08), nga nagpakita sa usa ka hitabo sa pagkabata ni Presidente Heber J. Grant. Kini nga video anaa sa LDS.org. Patan-awa ang mga estudyante sa video, nga mangita kon kinsa anggiserbisyuhan sa batang lalaki.