Pasiuna sa Ikaduhang Sulat ni Juan

Ngano nga kinahanglang tun-an kini nga basahon?

Sa iyang Ikaduha nga Sulat, gipahayag ni Juan ang iyang kabalaka mahitungod sa impluwensya sa mga miapostasiya sa Simbahan. Sa samang higayon, gipahayag usab niya ang kalipay alang sa mga miyembro sa Simbahan kinsa nagpabiling lig-on ug maunungon sa ebanghelyo (tan-awa sa 2 Juan 1:4). Kini nga mga pulong naghulagway sa kalipay ug pasalamat nga gibati sa mga lider sa Simbahan alang niadtong mga nagpabiling matinud-anon sa Ginoo. Samtang magtuon ang mga estudyante sa 2 Juan, mahimo silang malig-on sa mga pahinumdom ni Juan sa paghigugma sa usag usa, pagsunod sa mga sugo sa Dios, ug matinud-anong mosunod sa doktrina ni Kristo.

Kinsa ang nagsulat niini nga basahon?

Ang tagsulat mipaila sa iyang kaugalingon isip “ang anciano o elder” (2 Juan 1:1), ang tradisyon nagpakita nga si Juan, usa sa orihinal nga Napulog Duha ka mga Apostoles, ang misulat niini nga epistola (tan-awa sa Ang Giya ngadto sa mga Kasulatan, “Mga Epistola ni Juan”).

Kanus-a ug diin kini gisulat?

Wala kita mahibalo sa tukma kon kanus-a ug diin ang 2 Juan gisulat.

Kon ang tradisyon sa dugay nga pagpuyo ni Juan sa Efeso husto, ang sulat tingali gihimo gikan niadtong lugara sa tunga-tunga sa mga A.D. 70 ug 100.

Para kang kinsa kini gisulat ug ngano?

Ang Ikaduhang Sulat ni Juan gisulat para sa “pinili nga senyora ug sa iyang mga anak” (2 Juan 1:1). Wala mahibaloi kon namulong ba si Juan ngadto sa sa iyang pamilya o sa laing pundok sa mga tawo o namulong ba siya sa tibuok Simbahan sa mahulagwayon nga pinulongan.

Si Elder Bruce R. McConkie sa Korum sa Napulog Duha ka mga Apostoles misulat nga ang 2 ug 3 Juan tingali mga sulat nga gihimo ni Juan para sa mga sakop sa iyang pamilya (tan-awa sa Doctrinal New Testament Commentary, 3 vols. [1965–73], 3:409–10, 412–14).

Laing posibilidad mao nga “ang pinili nga senyora” sa aktwal nagpasabut sa Kristiyanong kongregasyon (tan-awa sa 2 Juan 1:13). Ang Gresyanhong pulong alang sa simbahan usa ka babaye, ug komon ang paghulagway sa Simbahan isip usa ka babaye (tan-awa sa Mga Taga-Efeso 5:25–27, 32; Hubad ni Joseph Smith, Pinadayag 12:1–3, 7 [sa Giya ngadto sa mga Kasulatan]; Pinadayag 19:7–8).

Kabahin sa 1 Juan, tataw nga gisulat ni Juan kini nga epistola sa pagtubag sa sayop nga mga pagtulun-an nga si Jesukristo sa literal wala moanhi sa unod. Iyang gipasabut nga ang mga miyembro kinsa mitudlo nga si Jesukristo walay pisikal nga lawas dili dawaton ngadto sa iyang balay, o kongregasyon (tan-awa sa 2 Juan 1:7–10).

Unsa ang pipila ka mga butang nga nakalahi niini nga basahon?

Niini nga sulat mipasidaan si Juan mahitungod sa mini nga mga magtutudlo kinsa nakasulod sa Simbahan. Gitambagan niya ang mga miyembro sa Simbahan sa dili pagpatalinghug o pakig-uban niining mga tawhana.

Outline

2 Juan 1 Gipahinumduman ni Juan ang Simbahan sa sugo nga maghigugmaay sa usag usa. Mipasidaan siya sa mini nga mga magtutudlo ug mga tiglimbong o tiglingla sulod sa Simbahan ug gitambagan ang mga miyembro sa Simbahan nga dili sila tugutan nga magpabilin sa ilang mga kongregasyon.