Leksyon 110: 1 Mga Taga-Corinto 13–14

Leksyon 110

1 Mga Taga-Corinto 13–14

Pasiuna

Si Pablo mitudlo sa kaimportante sa gugma nga putli. Mitambag siya sa mga Santos sa Corinto aron mag-baton ug magsunod sa gugma nga putli ug sa pagpangita og uban pang espirituhanong mga gasa. Mitudlo si Pablo nga ang gasa sa panagna labaw pa kay sa gasa sa pinulongan ug gihatag ngadto sa mga miyembro sa Simbahan aron ilang mapalig-on ang uban sa espirituhanong paagi.

Mga Sugyot alang sa Pagtudlo

1 Mga Taga-Corinto 13

Si Pablo nagtudlo mahitungod sa kaimportante sa pagbaton og gugmang putli

Sa dili pa magklase isulat ang mosunod nga mga sitwasyon diha sa pisara, o hatagi og kopya ang mga estudyante. Pagdapit og usa ka estudyante sa pagbasa og kusog sa matag sitwasyon, ug hangyoa ang mga estudyante sa pagkonsiderar kon hain niining mga pamahayag ang naghulagway kanila.

Kanunay mo nga mapungot ug saputon sa kinaiya sa usa ka igsoon.
Usa ka klasmeyt nagbinastos diha ninyo, mao nga inyong gibati nga magbinastos usab agi og balos.
Gibati ninyo ang kasina sa mga talento ug kalampusan sa usa ka higala.
Usahay mabantayan ninyo nga sayon ra ang manglibak ug mangdaut sa uban diha sa inyong korum sa priesthood o sa klase sa Young Women.

Unsa nga makadaut nga epekto ang mahimong moresulta gumikan niining mga kinaiya ug pamatasan?

Dapita ang mga estudyante sa pagpangita sa kamatuoran samtang magtuon sila sa 1 Mga Taga-Corinto 13 nga makatabang kanila sa paglikay sa kinaiya ug batasan nga makapakgang sa kalipay ug mga pakigrelasyon sa uban.

Pahinumdumi ang mga estudyante nga ang pamatasan sa mga Santos sa Corinto ang nakaingon sa panagbingkil ug mga pag-iniyahay sa Simbahan. Sa iyang sulat, si Pablo mitudlo nga ang espirituhanong mga gasa gihatag sa kaayohan sa tanan ug sa pagtabang sa mga miyembro sa Simbahan sa pagserbisyo ug paglig-on sa usag usa. Mitambag si Pablo sa mga Santos nga maningkamot sa “labing maayo nga mga gasa” (tan-awa sa 1 Mga Taga-Corinto 12:7–31).

Dapita ang usa ka estudyante sa pagbasa og kusog sa 1 Mga Taga-Corinto 13:1-3. Hangyoa ang klase sa pagsunod, mangita sa pipila ka mga tahas sa Espiritu nga si Pablo midayeg og maayo.

Unsa nga mga kinaiya ug mga gasa sa Espiritu nga gidayeg pag-ayo ni Pablo? (Gugmang Putli.)

Ipasabut nga ang gugmang putli mao ang “ang kinatas-an, labing dungganan, labing lig-on nga matang sa gugma, dili lamang pagbati” (Giya ngadto sa mga Kasulatan, “Gugma nga Putli”).

Giunsa sa paghulagway ni Pablo niadtong walay gugma nga putli bisan adunay ubang espirituhanong mga gasa?

Ipasabut nga ang mga pulong “masaba nga agong” ug “piyangpiyang nga nagatagingting” diha sa bersikulo 1 nagpasabut sa mga instrumento nga makahimog sipa nga tingog o panduyog nga tingog. Diha sa kinatibuk-ang kahulugan bersikulo 1, kining mga pulong nagpasabut nga mahimong mosulti og mga pulong nga mahimong kawang o walay kahulogan kon ang mamumulong wala madasig pinaagi sa gugma nga putli.

Sa inyong hunahuna ngano kaha nga kita walay pulos kon wala ang gugma nga putli?
Unsa ka posible nga ang usa ka tawo mohatag sa tanan niyang mga kabtangan aron ikapakaon sa mga kabus o andam sa pagpakamatay alang sa kamatuoran apan wala lang gihapoy gugma nga putli? (Ipasabut nga ang gugma nga putli labaw pa sa usa ka buhat sa pagkamanggihatagon ug labaw pa sa pagpakamatay alang sa kamatuoran.)

Kopyaha ang mosunod nga tsart diha sa pisara:

Unsa ang Gugmang Putli o ang Buhat niini	Unsa ang Dili Gugmang Putli o Dili Buhat Niini

Ipasabut nga si Pablo mihulagway sa mga kalidad ug mga kinaiya sa gugmang putli aron sa pagtabang sa mga Santos sa Corinto nga mas makasabut niini nga gasa. Ipares-pares ang mga estudyante. Dapita ang mga estudyante sa pagbasa sa 1 Mga Taga-Corinto 13:4–8 uban sa ilang mga pares, mangita og mga paghulagway ni Pablo sa gugmang putli.

Human sa igong panahon, hangyoa ang mga estudyante sa pagduol sa pisara ug isulat ang mga deskripsyon ni Pablo sa gugmang putli ubos sa tukma nga ulohan diha sa tsart. Kon gikinahanglan, tabangi ang mga estudyante nga makasabut sa kada deskripsyon.

Kinsay mohaum sa paghulagway niining mga kinaiya sa gugmang putli? (Si Jesukristo.)

Pahinumdumi ang mga estudyante nga si propeta Mormon mitudlo nga “ang gugma nga putli mao ang tiunay nga gugma ni Kristo” (Moroni 7:47). Ipasabut nga ang gugma nga putli mahimong ihulagway sa duha ka importanteng paagi: (1) Paghigugma ni Kristo alang kanato ug (2) atong Kristohanong gugma alang sa uban. Hangyoa ang mga estudyante sa pagpili og pipila ka mga paghulagway sa gugmang putli gikan sa lista diha sa pisara ug ipasabut ngadto sa klase kon sa unsang paagi nga kini mga maayo nga mga paghulagway ni Jesukristo.

Sa inyong hunahuna unsa kaha ang ipasabut niining bersikulo 8 nga ang “gugma nga putli dili mopakyas”?

Paghangyo og usa ka estudyante sa pagbasa sa mosunod nga pamahayag ni Elder Jeffrey°R. Holland sa Korum sa Napulog Duha:

“Ang tinuod nga gugmang putli … gipakita sa hingpit ug lunsay nga paagi ni Kristo sa dili mapakyas, labing maayo nga paagi, ug maulaong paghigugma alang kanato. … Kini mao ang gugmang putli—iyang tiunay nga gugma alang kanato—kon wala kini kita walay pulos, walay paglaum, sa tanan nga mga lalaki ug babaye mao ang labing alaut. …

“Ang kinabuhi adunay iyang bahin sa mga kahadlok ug mga kapakyasan. Usahay ang mga butang dili mahitabo sumala sa atong gilauman. Usahay ang mga tawo mopakyas kanato, o ang mga ekonomiya o mga negosyo o ang mga gobyerno mopakyas kanato. Apan usa ka butang sa panahon o sa kahangturan ang dili mopakyas kanato—ang tiunay nga gugma ni Kristo” (Christ and the New Covenant [1997], 337).

Sa unsang paagi nga kini mahimong makatabang ang paghinumdom nga ang tiunay nga gugma ni Jesukristo dili gayud mapakyas?
Pinasikad sa unsay atong nakat-unan gikan sa 1 Mga Taga-Corinto 13:4–8, unsay mahitabo kanato kon kita makabaton sa gasa sa gugmang putli? (Ang mga estudyante mahimong makahibalo og nagkadaiyang mga kamatuoran, apan siguroa nga maklaro kana nga samtang nagtinguha kita nga makabaton og espirituhanon nga gasa sa gugma nga putli, mamahimo kitang mas sama sa atong Manluluwas, si Jesukristo.) Isulat kini nga kamatuoran diha sa pisara.)

I-summarize ang 1 Mga Taga-Corinto 13:9–12 pinaagi sa pagpasabut nga si Pablo mitudlo kon nganong ang espirituhanon nga mga gasa sa kahibalo ug panagna sa katapusan mahanaw ra. Si Pablo nakaobserbar nga ang kahibalo nga anaa niining kinabuhia dili kompleto ug nga kita makabaton og hingpit nga kasayuran diha sa kahangturan.

Dapita ang usa ka estudyante sa pagbasa og kusog sa 1 Mga Taga-Corinto 13:13. Hangyoa ang klase sa pagsunod, nga mangita og tulo ka mga gasa sa Espiritu nga gitudlo ni Pablo nga magpabilin, buot ipasabut aron molahutay o magpabiling makanunayon. Dapita ang mga estudyante sa pagreport sa ilang nakit-an.

Unsa ang gitudlo ni Pablo nga mao ang labing mahinungdanon nga espirituhanong gasa? (Ang mga estudyante kinahanglang makaila sa mosunod nga kamatuoran: Ang gugma nga putli mao ang labing mahinungdanong gasa sa Espiritu. Isulat kini nga kamatuoran diha sa pisara.)
Unsa man ang relasyon tali sa hugot nga pagtuo, paglaum, ug gugma nga putli? (Ang hugot nga pagtuo mosangput ngadto sa paglaum, ug ang paglaum mosangput ngadto sa gugma nga putli.)
Pinasikad sa unsay atong nakat-unan diha sa 1 Mga Taga-Corinto 13, sa inyong hunahuna ngano nga ang gugma nga putli mao ang labing mahinungdanong gasa sa Espiritu?

Ipasabut ang tambag ni Pablo sa 1 Mga Taga-Corinto 14:1 sa “pagsunod sa gugma nga putli.”

Unsa man ang atong mahimo aron “masunod” o makabaton sa gasa sa gugma nga putli?

Dapita ang usa ka estudyante sa pagbasa og kusog sa Moroni 7:48. Hangyoa ang klase sa pagsunod, nga mangita kon unsay gitudlo ni Mormon nga buhaton sa iyang katawhan aron makabaton sa gasa sa gugma nga putli. Dapita ang mga estudyante sa pagreport sa ilang nakit-an.

Sa unsang paagi nga ang pagbaton og gugma nga putli makapauswag sa atong mga relasyon sa pamilya, kahigalaan, ug mga kaedad?
Mahimo ba ninyong ihulagway ang panahon nga inyong nasaksihan ang gugma nga putli diha sa pagtagad sa uban diha nimo o sa ubang tawo? (Ikonsiderar ang pagpakigbahin sa imong kasinatian mismo.)

Dapita ang mga estudyante sa pagsulat diha sa mga pirasong papel kon hain sa mga deskripsyon sa gugmang putli nga ilang nabati nga labing lisud alang nila ug ngano. Awhaga ang mga estudyante sa pagsulat og usa ka tumong kalabut sa unsay ilang buhaton aron mapadayon ang pagtinguha sa pagbaton og mas dakong gugma nga putli. Dapita ang mga estudyante sa pagbutang niini sa bisan asang dapit nga kini ilang makita kanunay ug mahinumduman ang ilang tumong.

1 Mga Taga-Corinto 14

Si Pablo nagtudlo nga ang gasa sa pagpanagna labaw pa kay sa gasa sa pinulongan

Pagdala og mga butang sa klase nga mahimong magamit sa pagtukod og tore, sama sa mga bloke, mga kahon, mga card, o mga libro. Pagdapit og usa ka estudyante sa paggamit sa mga butang nga imong gidala sa pagtukod og tore nga patas-on kutob sa mahimo sulod sa usa ka minuto. Pagkahuman, dapita ang estudyante nga molingkod. Hangyoa ang mga estudyante sa pagbasa sa hilum sa 1 Mga Taga-Corinto 14:1–3 nga mangita sa pulong niining mga bersikulo nga may kalabutan ngadto sa pagtukod og usa ka tore.

Unsa nga pulong sa bersikulo 3 ang may kalabutan sa pagtukod og tore? (Pagpalig-on. Kon gikinahanglan, ipasabut nga ang paglig-on nagpasabut sa “pag-uswag,” sama sa paglig-on o paglambo sa espirituhanong paagi.)

Dapita ang mga estudyante sa pagpangita og baruganan samtang sila magtuon sa 1 Mga Taga Corinto 14 nga makatabang nilang makahibalo unsaon nila paglig-on sa uban.

Ipasabut nga si Pablo namulong sa mga miyembro sa Simbahan sa Corinto kinsa nagsinati sa gasa sa mga pinulongan, o sa abilidad sa pagsulti sa laing mga pinulongan. Dapita ang usa ka estudyante sa pagbasa og kusog sa 1 Mga Taga-Corinto 14:1–3. Hangyoa ang klase sa pagsunod, nga mangita kon unsa nga espirituhanong gasa nga gitambag ni Pablo nga tinguhaon hinoon sa mga Santos.

Unsa nga gasa sa Espiritu ang gitambag ni Pablo nga tinguhaon ug pangitaon sa mga Santos?

Ipasabut nga “ang usa ka panagna naglangkob sa balaanon nga dinasig nga mga pulong o mga sinulat, nga madawat sa usa ka tawo pinaagi sa pagpadayag gikan sa Espiritu Santo. Ang pagpanghimatuod ni Jesus mao man ang espiritu sa panagna (Pinadayag 19:10). Kon ang usa ka tawo managna, siya mamulong o mosulat nianang gusto sa Dios nga iyang mahibaloan, alang sa iyang kaugalingong kaayohan o kaayohan sa uban” (Giya ngadto sa mga Kasulatan, “Panagna, Panagna,” scriptures.lds.org).

Isulat ang mosunod nga mga pulong diha sa pisara: pagpanagna = sa pagtudlo ug pagpamatuod pinaagi sa inspirasyon

Sumala sa bersikulo 3, sa unsang paagi nga ang pagtudlo ug pagpamatuod pinaagi sa inspirasyon makatabang nato sa pagpanalangin sa uban? (Gamit ang kaugalingon nilang mga pulong, kinahanglang mahibalo ang mga estudyante og usa ka baruganan sama sa mosunod: Samtang magtudlo ug magpamatuod kita pinaagi sa inspirasyon, makatabang kita sa paglig-on ug paghupay sa uban.)
Sa unsang paagi nga nalig-on kamo ug nahupay pinaagi sa dinasig nga mga pagtulun-an ug pagpamatuod sa laing tawo?

I-summarize ang 1 Mga Taga-Corinto 14:4–30 pinaagi sa pagpasabut nga si Pablo mipasidaan sa mga Santos sa Corinto mahitungod sa gasa sa pagsulti og mga pinulongan. Si Pablo mipasidaan nga kon gamiton sa dili tukmang paagi, ang gasa sa pinulongan mapakyas sa paglig-on sa Simbahan ug makabalda sa mga miyembro sa pagpangita og mas mapuslanong espirituhanong mga gasa.

Dapita ang usa ka estudyante sa pagbasa og kusog sa 1 Mga Taga-Corinto 14:31, 33, 40. Hangyoa ang klase sa pagsunod, nga mangita kon unsay tambag nga gihatag ni Pablo mahitungod sa pagpanagna.

Unsa nga tambag ang gihatag ni Pablo sa mga Santos mahitungod sa pagpanagna? (Tanan, lalaki ug babaye, mahimong managna, o magtudlo ug mopamatuod. Kini kinahanglang himoon sa kahusay, usa ka tawo sa matag higayon.)
Unsa nga kamatuoran ang atong makat-unan mahitungod sa Simbahan ni Jesukristo gikan niini nga mga bersikulo? (Gamit ang kaugalingon nilang mga pulong, kinahanglang mahibalo ang mga estudyante og usa ka baruganan sama sa mosunod: Sa ang Simbahan ni Jesukristo, ang tanang mga butang kinahanglan himoon sa kahusay.)
Sa inyong hunahuna ngano kaha nga importante alang sa tanan nga diha sa Simbahan ang tanang butang pagabuhaton sa tukma nga pagkahan-ay?

Ipasabut nga ang mga sinulat ni Pablo diha sa 1 Mga Taga-Corinto 14:34–35 naghatag og usa ka ehemplo kon sa unsang paagi siya mimando sa mga Santos sa Corinto og kahusay diha sa Simbahan. Dapita ang usa ka estudyante sa pagbasa og kusog sa 1 Mga Taga-Corinto 14:34–35. Hangyoa ang klase sa pagsunod, nga mangita kon unsay gitudlo ni Pablo sa mga miyembro sa Corinto. Dapita ang mga estudyante sa pagreport sa ilang nakit-an.

Ipasabut nga lisud sabton ang tumong niining tambag ni Pablo gumikan kay siya klaro nga wala nagdumili sa mga babaye gikan sa pag-ampo o pagpamulong diha sa mga miting sa Simbahan (tan-awa sa 1 Mga Taga-Corinto 11:5). Sa Joseph Smith Translation gihulip ang pulong namulong sa mga bersikulo 34 ug 35 uban sa mando. Kining kausaban sa pulong nagsugyot sa posibilidad nga si Pablo naningkamot sa pagkorihir sa sitwasyon diin ang uban nga mga babaye sa Corinto wala maghan-ay panahon sa mga serbisyo sa pagsimba o dili tukma nga nagtinguha og responsibilidad sa pagpangulo imbis sa pagpaluyo ug pagsunod sa mga lider sa priesthood (tan-awa sa New Testament Student Manual [manwal sa Church Educational System, 2014], 380).

Tapusa ang leksyon pinaagi sa pagpamatuod sa mga kamatuoran nga gitudlo sa 1 Mga Taga-Corinto 13–14.

Komentaryo ug Background nga Impormasyon

1 Mga Taga-Corinto 13:1–3. Ang gugma nga putli labaw pa sa pagkamanggihatagon

Si Elder Bruce C. Hafen sa Seventy mitudlo sa mosunod mahitungod sa gugma nga putli:

“Posible man ang paghatag og gugmang tiunay—bisan sa ‘Kristiyano’—nga pag-alagad nga walay pag-ugmad og lig-ong sama sa kinaiya ni Kristo. Nasabtan kini ni Pablo sa dihang siya mipasidaan batok sa paghatag sa tawo sa tanan aron sa pagpakaon sa kabus nga walay tinuod nga gugmang putli. … Makahatag kita nga walay gugma, apan dili kita makahigugma nga walay paghatag. Kon ang atong relasyon ngadto sa Dios makompleto, nan, pinaagi sa bunga niana nga relasyon, ang atong relasyon sa atong isig ka ingon makompleto usab. Dayon molihok kita nga mahigugmaon ngadto sa uban, dili lamang tungod gikinahanglan nato, apan tungod kay ingon gayud kita niana” (The Broken Heart: Applying the Atonement to Life’s Experiences [1989], 196–97).

1 Mga Taga-Corinto 13:4–7. Gugma nga Putli

Sumala sa narekord sa 1 Mga Taga-Corinto 13:4–5, Si Pablo mihulagway sa nagkalain-laing mga hiyas sa gugma nga putli; sa laing pagkasulti, ang mga tawo kinsa adunay gugma nga putli mobuhat sa mga butang ug adunay mga kinaiya nga iyang gihulagway. Ang mga pulong “mapuangoron” naghulagway sa usa ka tawo kinsa mapailubon nga molahutay sa mga pagsulay. “Dili masinahon” naghulagway og usa ka tawo kinsa dili masina sa uban. “Dili tigpagawal sa kaugalingon” naghulagway sa usa ka tawo nga dili hambugero. “Dili manghambog” naghulagway sa kalidad sa pagkamapainubsanon. “Dili molihok mismo nga dili tukma” naghulagway sa usa ka tawo nga maayo og batasan o mahunahunaon. “Dili magtinguha sa iyang kaugalingon” naghulagway sa kalidad sa pagbutang sa Dios ug sa uban sa dili pa ang kaugalingon. “Dili daling masuko” naghulagway og usa ka tawo kinsa dili masuko dayon. “Motuo sa tanang mga butang” naghulagway og usa ka tawo kinsa modawat sa tanang kamatuoran.

1 Mga Taga-Corinto 13:8. Ang mga gasa sa pagpanagna, mga pinulongan, ug ang kahibalo “mohunong” ug “mahanaw”

Si Elder Bruce R. McConkie sa Korum sa Napulog Duha ka mga Apostoles mipasabut kon nganong ang mga gasa sa panagna ug mga pinulongan mohunong sa katapusan ug nganong ang gasa sa kahibalo mahanaw:

“Mohunong ba ang mga gasa sa Espiritu? Aduna bay usa ka adlaw diin ang mga santos dili na makapanag-iya sa mga gasa sa pagpanagna ug mga pinulongan? O ang gasa sa kahibalo. Oo, sa paagi nga kini lamyon sa mas dako, ug wala na kinahanglanan sa hingpit nga adlaw. Kon ang mga santos mahibalo sa tanan nga mga pinulongan, walay usa nga makahimo sa pagpamulong sa usa ka wala mailhi nga pinulongan. Kon ang mga santos mamahimo nang sama sa Dios ug masayud sa tanang butang—kaniadto, karon, ug sa umaabut—wala nay kinahanglan o okasyon sa pagpanagna sa umaabut” (Doctrinal New Testament Commentary, 3°vols. [1965–73], 2:380).

1 Mga Taga-Corinto 14:1. “Pagsunod sa gugma nga putli”

Si Elder Robert J. Whetten sa Seventy mipasabut:

“Sama sa hugot nga pagtuo, ang Kristohanong gugma mao ang usa ka gasa sa Espiritu, gihatag diha sa mga baruganan sa personal nga pagkamatarung ug pinasikad sa lebel sa atong pagkamasulundon ngadto sa mga balaod diin kini gilakip. Sama sa hugot nga pagtuo, ang gugma kinahanglang gamiton aron molambo” (“True Followers,” Ensign, Mayo 1999,°30).

Si Elder Dallin H. Oaks sa Korum sa Napulog Duha ka mga Apostoles mitudlo:

“Ang gugma nga putli ‘mao ang tiunay nga gugma ni Kristo” (Moro. 7:47), dili ang usa ka buhat apan usa ka kahimtang o estado sa pagkatawo. Ang gugma nga putli makab-ot pinaagi sa sunod-sunod nga mga buhat agig sangputanan sa pagkakabig. Ang gugma nga putli mao ang usa ka butang nga mahimong makab-ot sa tawo” (“The Challenge to Become” Ensign, Nob. 2000, 34).

1 Mga Taga-Corinto 14:1–3. Ang gasa sa panagna

Si Elder Dallin H. Oaks sa Korum sa Napulog Duha ka mga Apostoles mipasabut sa kalainan tali sa mga miyembro sa Simbahan kinsa nakabaton og espirituhanong mga gasa sa pagpanagna ug kadtong gitawag sa pagserbisyo sa mapanagnaon nga katungdanan:

“Diha sa pagsabut agig pagpamulong sa espirituhanong mga gasa, ang propeta mopamatuod ni Jesukristo, magtudlo sa mga pulong sa Dios, ug motambag sa mga katawhan sa Dios. Diha sa pagsabut sa mga kasulatan, ang pagpanagna nagpasabut nga labaw pa kay sa pagtagna sa umaabut. …

“Importante alang kanato nga makasabut sa kalainan tali sa usa ka propeta, kinsa adunay espirituhanong gasa sa pagpanagna, ug ang propeta, kinsa dunay propetikanhon nga katungdanan” (“Spiritual Gifts,” Ensign, Sep. 1986, 71).

1 Mga Taga-Corinto 14. “Kay siya mao ang namulong managpanultig mga pinulongan”

“Ang mga Apostoles ug ang uban namulong sa ‘laing pinulongan’ sa adlaw sa Pentecostes (Mga Buhat 2:4–8). Niining higayona, ang gasa sa pinulongan nga gipakita pinaagi sa sulugoon sa Dios sa pagtudlo sa ebanghelyo sa pinulongan nga nailhan sa ilang mga tigpaminaw apan wala masayri sa mga mamumulong (tan-awa ang komentaryo alang sa Mga Buhat 2:5–11). Laing pagpakita sa mga gasa sa pinulongan nga mahitabo kon usa ka tawo nga dasigon sa Espiritu sa pagpamulong sa pinulongan nga wala mahibaloi ngadto sa mamumulong o mga tigpaminaw (tan-awa sa Bruce°R. McConkie, Doctrinal New Testament Commentary, 2:383)” (New Testament Student Manual [manwal sa Church Educational System, 2014],°379).

Alang sa dugang nga impormasyon mahitungod sa importanting pasidaan kalabut sa katuyoan ug gamit sa mga gasa sa mga pinulongan, tan-awa sa Robert D. Hales, “Gifts of the Spirit,” Ensign, Peb. 2002, 14–15.