Leksyon 93
Mga Buhat 16
Pasiuna
Ang Espiritu Santo migiya ni Pablo ug sa iyang mga kauban sa pagsangyaw sa ebanghelyo sa Macedonia (amihanan sa Gresya). Usa ka babaye nga ginganlan og Lidia midawat sa ilang mensahe ug gibunyagan. Human gipapahawa ni Pablo ang dautan nga espiritu gikan sa usa ka sulugoong babaye, siya ug si Silas gibunalan ug gibilanggo. Nianang gabhiona, milagroso silang gipagawas gikan sa bilanggoan, humandiin ilang gibunyagan ang gwardya sa bilanggoan ug ang sakop niya sa panimalay.
Mga Sugyot alang sa Pagtudlo
Mga Buhat 16:1–15
Si Pablo ug ang iyang mga kauban nagsangyaw sa ebanghelyo sa Macedonia
Isulat sa pisara ang mosunod nga pamahayag ni Presidente Thomas S. Monson. (Kini nga pamahayag makaplagan diha sa “The Spirit Giveth Life,” Ensign, Hunyo 1997, 5.)
“Ayaw gayud ilangan ang usa ka pag-aghat” (Presidente Thomas S. Monson).
-
Ang usa ka pag-aghat nagpasabut ngadto sa mga pagbati o hunahuna nga atong madawat gikan sa Espiritu Santo sa pagsutli o sa pagbuhat og usa ka butang. Unsa kaha ang mahitabo kon ilangan sa usa ka tawo ang pagpamati og usa ka pag-aghat?
Dapita ang mga estudyante sa pagpangita og baruganan samtang sila nagtuon sa Mga Buhat 16 nga makatabang kanila sa pagsabut pa sa pagpamati sa mga pag-aghat sa Espiritu Santo.
I-summarize ang Mga Buhat 16:1–5 pinaagi sa pagpasabut nga si Pablo, Silas, ug usa ka nakabig nga Hentil nga ginganlan og Timoteos (usab naila isip Timoteo) mibiyahe ngadto sa daghang mga branch sa Simbahan sa pagpahibalo sa desisyon nga gihimo sa mga lider sa Simbahan sa Jerusalem nga makaapekto sa tibuok Simbahan ug makalig-on sa pagtuo sa mga miyembro sa Simbahan.
Dapita ang usa ka estudyante sa pagbasa og kusog sa Mga Buhat 16:6–10. Hangyoa ang klase sa pagsunod, mangita kon sa unsa nga paagi si Pablo ug ang iyang mga kauban (malagmit lakip ni Lucas) nahibalo kon asa moadto samtang sila mibiyahe.
-
Giunsa pagkahibalo ni Pablo ug sa iyang mga kauban kon asa dili moadto? Giunsa nila pagkahibalo kon asa moadto?
-
Unsa ang nakita ni Pablo sa usa ka panan-awon?
-
Sa unsa nga paagi si Pablo ug ang iyang mga kauban mitubag ngadto sa panan-awon ni Pablo?
I-summarize ang Mga Buhat 16:11–13 pinaagi sa pagpasabut nga si Pablo ug si Silas mibiyahe sulod sa daghang mga adlaw hangtud sila miabut sa Filipos, usa ka siyudad sa Macedonia. (Mahimong dapiton ang mga estudyante sa pag-ukab sa Mga Mapa Ug Indeks Sa Mga Ngalan Sa Dapit, nu.6–8, “Ang Una, Ikaduha ug Ikatulo nga Panaw ni Apostol Pablo.” sa Ang Giya ngadto sa mga Kasulatan ug pangitaa ang Filipos.) Sa Igpapahulay nga adlaw, mibiya sila sa siyudad aron sa pag-ampo duol sa daplin sa suba ug misugod sa pagpakigsulti sa mga babaye nga nagpundok didto.
Dapita ang usa ka estudyante sa pagbasa og kusog sa Mga Buhat 16:14–15. Hangyoa ang klase sa pagsunod, mangita kon giunsa sa usa ka babaye nga ginganlan og Lidia pagtubag ngadto sa mga pagtudlo ni Pablo. (Mahimo nimong ipasabut nga ang mga pulong “namaligyag mga panapton nga purpora” [bersikulo 14] nagpasabut ngadto sa kamatuoran nga si Lidia namaligyag purpora nga tina, nga mahal kaayo, ug tingali nagpakita nga si Lidia usa ka babaye nga may bahandi ug impluwensya.)
-
Giunsa ni Lidia pagtubag ngadto sa mga pagtudlo ni Pablo? (Mahimo nimong ipasabut nga ang patalinghugan nagpasabut og naminaw o naghatag og pagtagad.)
-
Unsa nga mga pulong diha sa Mga Buhat 16:14 nagpakita nga si Lidia andam sa pagdawat sa ebanghelyo?
-
Unsa nga baruganan ang atong makat-unan gikan sa kasinatian ni Pablo mahitungod sa unsa ang mahimong mahitabo samtang kita magsunod og pagpadayag? (Ang mga estudyante mahimong mogamit og lain-laing mga pulong, apan siguroa nga ilang masabtan nga samtang kita magsunod og pagpadayag gikan sa Dios, mahimo kitang giyahan ngadto niadtong kinsa andam sa pagdawat sa ebanghelyo. Isulat kini nga baruganan diha sa pisara.)
Ipasabut nga pinaagi sa pagsunod og pagpadayag kita makatabang usab sa uban sa pagsugod o sa pagpadayon sa proseso nga mahimong andam sa pagdawat sa ebanghelyo.
Aron sa pagtabang sa mga estudyante nga masabtan pa kini nga baruganan, hangyoa ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Hangyoa ang klase sa pagpaminaw sa unsay atong kinahanglan gayud nga buhaton aron magiyahan ngadto niadtong kinsa andam sa pagdawat sa ebanghelyo.
“Kita kinahanglan gayud nga mag-ampo alang sa panabang ug mga direksyon sa Ginoo aron kita mahimong mga instrumento diha sa Iyang mga kamot alang sa usa ka tawo kinsa andam na karon—usa ka tawo gusto Niya nga atong tabangan karon. Niana, kinahanglan gayud nga kita magmabinantayon sa pagpaminaw ug sa pagtagad sa mga pag-aghat sa Iyang Espiritu kon unsaon nato sa pagpadayon.
“Kadto nga mga pag-aghat moabut. Nahibalo kita gikan sa dili maihap nga personal nga mga pagpamatuod nga sa Iyang kaugalingon nga paagi ug sa Iyang kaugalingon nga panahon ang Ginoo nag-andam og mga tawo sa pagdawat sa Iyang ebanghelyo. Ang maong mga tawo nagsiksik, ug kon kita maningkamot sa pag-ila kanila ang Ginoo motubag sa ilang mga pag-ampo pinaagi sa pagtubag sa ato. Siya moaghat ug mogiya niadtong kinsa nagtinguha ug kinsa sa sinsero nga paagi naninguha og paggiya sa unsaon, hain, kanus-a, ug kang kinsa makigbahin sa Iyang ebanghelyo” (“Sharing the Gospel,” Ensign, Nob. 2001, 8).
-
Sumala ni Elder Oaks, unsay atong kinahanglan gayud nga buhaton aron magiyahan ngadto niadtong kinsa andam sa pagdawat sa ebanghelyo?
Ikonsiderar ang pagpakigbahin og imong kaugalingong kasinatian kalabut sa giunsa ang pagpamati sa mga pag-aghat sa Espiritu migiya kanimo ngadto sa usa ka tawo kinsa andam sa pagdawat sa ebanghelyo o kalabut sa giunsa sa lain nga tawo ang pagpamati sa mga pag-aghat sa Espiritu paggiya kaniya sa pagkaplag kanimo sa diha nga ikaw andam na sa pagdawat sa ebanghelyo. Hangyoa ang pipila ka mga estudyante sa pagpakigbahin og kasinatian nga sila o usa ka tawo nga ilang nailhan aduna diin siya gigiyahan ngadto sa usa ka tawo kinsa andam na sa pagdawat sa ebanghelyo.
Dapita ang mga estudyante sa pagpamalandong giunsa, diin, kanus-a, ug kang kinsa sila makahimo sa pagpakigbahin sa ebanghelyo. Awhaga sila sa pagrekord og bisan unsa nga mga pag-aghat nga ilang madawat ug sa pagpadayon sa pag-ampo alang sa paggiya.
Mga Buhat 16:16–40
Si Pablo ug si Silas gibilanggo ug unya gibuhian
Pagdapit og pipila ka mga estudyante sa pagpuli-pulig basa og kusog gikan sa Mga Buhat 16:16–19. Hangyoa ang klase sa pagsunod, mangita sa unsay gibuhat ni Pablo sa dihang iyang gikasugat ang usa ka “dalagita” (bersikulo 16), o ulipon nga batang babaye, kinsa gisudlan og usa ka dautang espiritu. Mahimo nimong ipasabut nga ang pagpanag-an mao ang proseso sa pagtag-an o paninguha sa pagtag-an sa umaabut nga naggamit sa too-toohon nga paagi.
-
Sa kadugayan unsay gibuhat ni Pablo sa dautang espiritu nga misulod sa batang babaye?
-
Unsa nga problema ang nasinati sa mga agalon sa batang babaye sa siyudad human gipagawas ni Pablo ang dautang espiritu gikan sa batang babaye?
I-summarize ang Mga Buhat 16:20–24 pinaagi sa pagpasabut nga ang mga lalaki kinsa dili na makapanapi gikan sa batang babaye midala ni Pablo ug ni Silas sa atubangan sa mga “maghuhukom” (bersikulo 20), o lokal nga mga awtoridad, ug mipasangil nga si Pablo ug Silas mitudlo sa mga tawo nga sila kinahanglan nga dili mosunod sa balaod nga Romano. Sa mando sa mga maghuhukom, gibunalan ug gibilanggo si Pablo ug si Silas, ug gigapos ang ilang mga tiil aron dili sila makalakaw.
Aron sa pagtabang sa mga estudyante nga makasabut sa sulod sa Mga Buhat 16:25–36, ipares-pares ang mga estudyante ug hatagi ang matag pares og palid sa papel. Kopyaha ang mosunod nga tsart ngadto sa pisara ug dapita ang matag pares sa pagkopya sa tsart diha sa ilang papel.
Dapita ang matag pares sa pagbasa og kusog sa mga bersikulo diha sa tsart ug unya sa pagpuli-puli sa pagdrowing og yano nga mga hulagway nga morepresentar sa matag usa sa unom ka mga pundok sa bersikulo (usa ka estudyante diha sa pares mahimong modrowing sa mga hulagway nga morepresentar og tulo sa mga grupo sa bersikulo, ug ang lain nga estudyante diha sa pares makadrowing og mga hulagway nga morepresentar sa lain nga tulo ka mga pundok sa bersikulo). Human sa igong panahon, dapita ang mga estudyante sa pagpakita ug sa lakbit pagpasabut sa ilang mga hulagway ngadto sa laing pares sa mga estudyante o ngadto sa tibuok klase.
Aron sa pagtabang sa mga estudyante sa pagpalawom sa ilang pagsabut sa Mga Buhat 16:25–36, ipangutana ang mosunod nga mga pangutana:
-
Giunsa ni Pablo ug ni Silas pagtubag ang pangutana sa gwardya sa bilanggoan mahitungod sa unsa nga paagi siya maluwas?
-
Unsay gibuhat sa gwardya sa bilanggoan sa pagpakita sa iyang pagtuo diha ni Jesukristo?
-
Unsa nga baruganan ang atong makat-unan gikan sa Mga Buhat 16:31–33 mahitungod sa unsay ato gayud nga buhaton aron madawat ang kaluwasan? (Ang mga estudyante mahimong mogamit og lain-laing mga pulong, apan siguroa nga ilang mailhan ang mosunod nga kamatuoran: Ang kaluwasan nagkinahanglan og pagtuo diha ni Jesukristo, ug kita nagpakita sa atong pagtuo diha Kaniya pinaagi sa pagpabunyag.)
Ipasabut nga ang kaluwasan nagpasabut nga “aron maluwas gikan sa pisikal ug espiritwal nga kamatayon” (tan-awa sa Giya ngadto sa mga Kasulatan, “Kaluwasan,” scriptures.lds.org).
-
Sa unsa nga paagi nga ang pagpabunyag nagpakita sa atong hugot nga pagtuo diha ni Jesukristo?
-
Agi og dugang sa pagpabunyag, unsa ang uban nga mga paagi kita makapakita sa atong pagtuo diha ni Jesukristo?
I-summarize ang Mga Buhat 16:35–40 pinaagi sa pagpasabut nga ang mga maghuhukom mipadala og pulong ngadto sa gwardya sa bilanggoan nga pabuhian si Pablo ug si Silas. Midumili si Pablo sa paggawas tungod kay siya nahibalo sa iyang mga katungod isip usa ka Romano nga tagilungsod ug nahibalo nga ang ilang pagtagad kaniya dili makatarunganon. Kini dili pinasubay sa balaod ang pagbunal og usa ka Romano nga tagilungsod nga wala unay paghimo og pagtaral. Sa diha nga ang mga maghuhukom nahibalo nga si Pablo ug si Silas mga Romano, nangahadlok sila tungod kay nahibalo sila nga kon ang ilang mga kadagkoan makadiskubre nga ilang gitagad ang usa ka Romanong tagilungsod ingon sa ilang gibuhat, mahimo sila nga silotan, gani ngadto sa kamatayon. Ang mga maghuhukom miadto sa bilanggoan, gibuhian si Pablo ug si Silas, ug gisugo sila sa pagbiya sa siyudad.
Taposa pinaagi sa pagpamatuod sa mga kamatuoran nga gitudlo diha sa Mga Buhat 16.
Ribyu sa Scripture Mastery
Gamita ang nag-uban nga tsart aron sa pagribyu sa mga scripture mastery passage kutob sa natun-an sa mga estudyante niini nga tuig. Basaha og kusog ang pangutana o kabalaka diha sa wala nga kolum sa tsart ug dapita ang mga estudyante sa pagpangita sa scripture mastery passage nga makahatag og tubag (ang mga tubag gihatag diha sa tuo nga kolum sa tsart). Mahimo nimong basahon og kusog ang mga pangutana o mga kabalaka sa bisan asa nga han-ay. Human ang mga estudyante makakita og kasulatan, pangutan-a sila kon sa unsa nga paagi kana nga scripture mastery passage makatabang og usa ka tawo nga anaa niana nga kabalaka.
|
Mahadlok ako sa pagsunod sa unsay akong gituohan. Maguol ako kon unsay gihunahuna sa uban kanako. | |
|
Nabuntog ako sa akong mga pagsulay og mga hagit. | |
|
Ngano nga ang propeta mahimong makadawat og pagpadayag alang sa tibuok Simbahan? | |
|
Gihigugma ko ang Langitnong Amahan, apan ako naningkamot sa paghigugma og usa ka higala sa pagka-karon. Ang Dios nagpaabut ba gayud kanako sa paghigugma usab kaniya? | |
|
Nahibalo ako nga isip tighupot sa priesthood, ako adunay katungdanan sa pagserbisyo og misyon bisan asa ang Dios motawag kanako, apan naguol ako mahitungod nga malayo gikan sa tanan nga akong kaila ug mag-inusara. | |
|
Sa unsa nga paagi kita mahibalo nga si Jesukristo nabanhaw gayud nga may pisikal nga lawas nga adunay unod ug bukog? | |
|
Ang bunyag gikinahanglan ba gayud aron makapuyo uban sa Dios? | |
|
Ang ubang mga tawo nag-ingon nga kini dili igsapayan kon ako mopili ba sa pagsunod ni Jesukristo o sa lain nga tawo. Samtang magpabilin kong maayo nga tawo, mahalangit ako. | |
|
Unsa ang labing maayo nga paagi alang kanako nga mapakita sa Ginoo nga ako nahigugma Kaniya? | |
|
Ngano nga ang pag-ila sa Langitnong Amahan ug ni Jesukristo mahinungdanon? | |
|
Unsa ang kinahanglan gayud nga akong buhaton aron makadawat sa Espiritu Santo? | |
|
Diha bay bisan kinsa nga nagpuyo sa biblikanhong mga panahon ang nahibalo ug nanagna nga adunay usa ka Pagpahiuli sa ebanghelyo sa ulahing mga adlaw? |
Komentaryo ug Background nga Impormasyon
Mga Buhat 16:1–3. Ngano nga gisirkunsidahan ni Pablo si Timoteo bisan tuod kini wala na kinahanglana?
“Bisan tuod ang mga kinabig nga mga Hentil wala kinahanglana ang pagsirkunsidar … , gisirkunsidar ni Pablo si Timoteo sa wala pa ang ilang panag-uban sa misyonaryong mga kahago ‘tungod sa mga Judeo niadtong mga dapita’ (Mga Buhat 16:3). Human masirkunsidar, [atol niining panahon sa pagkabalhin] si Timoteo makatrabaho nga mas epektibo taliwala sa mga Judeo, kinsa mobati nga ang dili masirkunsidar nga misyonaryo kulang og pagtahud ngadto sa Dios sa Israel ug sa Iyang mga balaod. … Alang sa katuyoan sa ebanghelyo, usahay si Pablo mismo mousab sa iyang batasan aron makaduol sa mga Judeo ug sa mga Hentil (tan-awa sa Mga Buhat 21:20–26; 1 Mga Taga-Corinto 9:20–22). Gitudloan usab niya ang mga kinabig nga Hentil sa pag-andam nga mopugong gikan sa bisan unsa nga batasan nga mahimong hunahunaon nga makadaut ngadto sa mga Judeo, bisan tuod kini wala gidili sa bisan unsa nga sugo (tan-awa sa Mga Taga-Roma 14:13–15; 1 Mga Taga-Corinto 8:9–13)” (New Testament Student Manual [manwal sa Church Educational System, 2014], 312).
Mga Buhat 16:16–18. Ngano nga ang saksi sa sulugoon nga batang babaye kinsa gisudlan og dautang espiritu usa ka problema?
Si Elder Bruce R. McConkie sa Korum sa Napulog Duha ka mga Apostoles mipasabut:
“Ang pagpamatuod sa usa ka giniyahan sa yawa nga dalaga tinuod. Si Pablo ug si Silas mga propeta; diha kanila ang mga pulong ug gahum sa kaluwasan. Apan ang tinuod nga pagpamatuod gikan sa sulugoon ni Satanas dili mogiya ngadto sa kaluwasan. Sa tinuod ang dalaga mingon: ‘Padayon ug tuo diha ni Pablo ug ni Silas ug niining Jesus kinsa ilang gisangyaw. Ako uyon nga sila ug ang ilang Agalon mga iya sa Dios; ug tungod kay kita karon naghiusa diha niana nga punto, kamo makapadayon usab sa pagsunod kanako ug sa pagpahimulos sa bunga sa pagpanag-an.’ Ug unsa ka daghan ang ubang mga tigbansay og mini nga mga relihiyon kinsa naghatag og tam-is nga mga pulong ngadto ni Jesus ug sa iyang mga doktrina aron ang mga tawo mosamot ka andam nga mosunod kanila ug sa ilang talagsaong marka nga ‘makaluwas’ nga grasya. Kini tungod sa mao gayud nga katarungan nga dinhi giapil nga si Jesus mismo midili sa mga yawa kinsa iyang giabug aron sa pagpamatuod nga siya mao ang Anak sa Dios. (Lucas 4:41.)” (Doctrinal New Testament Commentary, 3 vols. [1965–73], 2:149).