Mga Buhat 13–19 (Unit 19)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang sila nagtuon sa Mga Buhat 13–19 (unit 19) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Espiritu Santo samtang imong ikonsiderar ang mga panginahanglan sa imong mga estudyante.

Day 1 (Mga Buhat 13–14)

Samtang gitun-an sa mga estudyante ang mahitungod sa inter-aksyon ni Pablo ug ni Bernabe uban sa salamangkiro, ilang nahibaloan nga ang gahum sa Dios mas labaw pa kaayo kay sa gahum sa yawa. Ingon sa gitudlo ni Pablo mahitungod sa Manluluwas ug mahitungod sa kagul-anan, giila sa mga estudyante ang mosunod nga mga baruganan: Mapasaylo kita sa atong mga sala ug kahatagan og kaangayan pinaagi sa Pag-ula ni Jesukristo. Samtang kita matinud-anong modawat og kagul-anan, pagaandamon kita sa pagsulod sa celestial nga gingharian.

Day 2 (Mga Buhat 15)

Samtang gitun-an sa mga estudyante kon giunsa sa mga lider sa Simbahan paghiusa sa paghimo og mga desisyon, ilang nakat-unan nga kita makahibalo sa kabubut-on sa Ginoo pinaagi sa Iyang buhing mga propeta ug mga apostoles, pinaagi sa pagtuon sa mga kasulatan, ug pinaagi sa inspirasyon gikan sa Espiritu Santo. Nakat-unan usab nila nga pinaagi sa pagtinambagay ug pagpaninguha og pagpadayag gikan sa Dios, ang mga lider sa Simbahan nagdawat og inspirasyon mahitungod sa lisud nga mga problema.

Day 3 (Mga Buhat 16–17)

Gikan sa istorya kabahin sa misyon ni Pablo ug Silas, nakat-unan sa mga estudyante ang mosunod nga mga kamatuoran: Samtang kita nagsunod og pagpadayag nga gihatag gikan sa Dios, kita magiyahan ngadto niadtong kinsa andam sa pagdawat sa ebanghelyo. Ang kaluwasan nagkinahanglan og pagtuo diha ni Jesukristo, ug kita nagpakita sa atong pagtuo diha Kaniya pinaagi sa pagpabunyag. Kon kita modawat sa mga pulong sa mga sulugoon sa Dios uban sa tanang pagkaandam sa hunahuna ug pagsiksik sa mga kasulatan matag adlaw, niana ang atong pagtuo diha sa ilang mga pulong malig-on.

Day 4 (Mga Buhat 18–19)

Pinaagi sa mga pasalig sa Ginoo ngadto ni Pablo sa dihang gibati niya ang kahigawad sa mga tawo sa Corinto, ang mga estudyante nakat-on nga kon kita magpuyo nga takus, ang Ginoo magauban kanato samtang naghimo sa Iyang buhat. Samtang ilang gitun-an ang mahitungod sa pagtudlo ug pagpang-ayo ni Pablo sa Efeso, ang mga estudyante nakakat-on sa mosunod: Aron mahimong balido, ang bunyag kinahanglan gayud nga pagahimoon sa may pagtugot nga sulugoon sa Dios. Aron ang bunyag mahimong kompleto, kini kinahanglan gayud nga inubanan sa pagdawat sa Espiritu Santo. Usa ka paagi nga ang Dios nagpakita sa Iyang gahum mao ang pinaagi sa Iyang may pagtugot nga mga sulugoon. Pinaagi sa pagkumpisal ug pagbiya sa dautan nga mga buhat, kita magpakita sa atong hugot nga pagtuo diha ni Jesukristo.

Pasiuna

Diha sa Bungtod sa Mars sa Atenas, gitudloan ni Pablo ang mga tawo mahitungod sa kinaiyahan sa Dios. Kini nga leksyon makatabang sa mga estudyante sa pagsabut sa pipila ka mga kinaiya sa Langitnong Amahan ug ang ilang relasyon ngadto Kaniya.

Mga Sugyot alang sa Pagtudlo

Mga Buhat 17:16–34

Nagsangyaw si Pablo diha sa Bungtod sa Mars

Dapita ang mga estudyante sa pagpakli ngadto sa Bible Photographs, nu. 29, “Athens,” diha sa appendix sa Biblia. Ipasabut nga kini nga litrato nagpakita og usa sa daghang mga templo sa Atenas nga gigamit sa pagsimba og dios-dios. Sa sulod sa mga templo mao ang mga hinimo sa tawo nga mga estatuwa niini nga mga dios. Sa gawas mao ang mga altar diin ang mga sakripisyo ngadto niini nga mga dios-dios gihalad.

Ipasabut nga aron mapanalipdan si Pablo gikan sa usa ka kaaway nga grupo sa mga Judeo sa Tesalonica, gipadala siya sa mga miyembro sa Simbahan ngadto sa Atenas (tan-awa sa Mga Buhat 17:13–15). Sa Mga Buhat 17:16–21 atong mabasa nga si Pablo nabalaka kaayo mahitungod sa pagsimba og dios-dios sa Atenas, ug nagtudlo siya diha sa sinagoga ug sa taboanan didto. Ang mga batid sa pangatarungan dayon midapit ni Pablo sa pagpasabut sa iyang “bag-ong doktrina” (Mga Buhat 17:19) ngadto sa konseho sa maghuhukom, nga magkita didto sa Bungtod sa Mars.

Dapita ang usa ka estudyante sa pagbasa og kusog sa Mga Buhat 5:22-23. Hangyoa ang klase sa pagsunod, mangita sa unsay namatikdan ni Pablo sa usa sa mga altar sa Atenas.

Unsay nakita ni Pablo diha sa usa sa mga altar nga Atenas?

Ipasabut nga ang Mga Buhat 17:22 nagrekord nga si Pablo mikomplimento sa mga taga Atenas pinaagi sa pagsulti nga sila “masimbahon gayud,”nangahulugan nga sila mao ang ,“labing relihiyoso” o “mabinantayon sa balaang mga butang”. Ang altar “alang sa dios nga wala hiilhi” (Mga Buhat 17:23) mao ang pagsulay sa mga taga Atenas sa paghupay sa wala hiilhi nga dios o bisan kinsa nga dios kinsa wala mailhi pinaagi sa ngalan. Sa dayag sila dili buot nga mopasilo o mopasagad ni bisan kinsa nga dios.

Ipasabut ang katapusang sentence sa Mga Buhat 17:23, ug unya pangutana:

Nganong nagpasabut si Pablo ngadto niini nga altar “alang sa dios nga wala hiilhi”? (Gigamit niya kini sa pagpaila sa ideya sa tinuod nga Dios, Langitnong Amahan, ang Dios nga wala nila hiilhi.)

Bahina ang klase ngadto sa mga paris o gagmay nga mga grupo. Dapita ang matag grupo sa pagsiksik sa Mga Buhat 17:24–31 kutob sa daghang mga kamatuoan nga ilang makita mahitungod sa Dios kinsa wala hiilhi ngadto sa mga tawo sa Atenas. Samtang ilang gitun-an, ilista ang matag numero sa bersikulo (24–31) diha sa pisara.

Human sa igo nga pnahon, dapita ang daghang mga estudyante sa pagduol ngadto sa pisara sa pagsulat og kamatuoran nga ilang nakit-an sunod sa numero sa bersikulo diin ilang nakit-an kini. Aron sa pagtabang sa mga estudyante sa pag-ila og usa ka kamatuoran diha sa Mga Buhat 17:27, ipasabut nga ang Hubad ni Joseph Smith niini nga bersikulo mabasa, “Nga sila kinahanglan nga mangita sa Ginoo, kon sila andam sa pagpangita kaniya, kay siya dili layo gikan kanatong tanan.”

Tingali makasugyot ka usab nga markahan sa mga estudyante ang matag mga kamatuoran diha sa ilang mga kasulatan. Ang pipila sa mga kamatuoran nga ilang gilista diha sa pisara tingali nag-apil sa mosunod:

Bersikulo 24: Gilalang sa Dios ang kalibutan.
Bersikulo 25: Naghatag ang Dios og kinabuhi ngadto sa tanang mga butang.
Bersikulo 26: Nagdumala ang Dios sa tanang kinabuhi.
Bersikulo 27: Kon kita andam sa pagpangita sa Dios, atong mahibaloan nga Siya dili layo gikan kanato.
Bersikulo 28: Kita kaliwat sa Dios.
Bersikulo 29: Kita gilalang sa panagway sa Dios.
Bersikulo 30: Nagsugo ang Dios sa tanan sa paghinulsol.
Bersikulo 31: Pagahukman kita sa Dios; Pagabanhawon sa Dios ang tanang tawo gikan sa mga patay.

Dapita ang mga estudyante sa pagpili og usa ka kamatuoran diha sa pisara nga makahuluganon nganha kanila. Pangutan-a ang pipila ka mga estudyante sa pagpakigbahin kon hain nga kamatuoran ang ilang gipili ug nganong makahuluganon kini nganha kanila.

Itudlo ang kamatuoran diha sa Mga Buhat 17:28, “Kita kaliwat sa Dios.”

Unsay buot ipasabut nga mahimong kaliwat sa Dios? (Kita espiritung mga anak sa Langitnong Amahan.)
Nganong importante kaayong masabtan kini nga doktrina? (Kini makatabang kanato sa pag-ila sa atong mahagturong bili ngadto sa Langitnong Amahan ug sa atong potensyal nga mahimong sama Kaniya.)
Unsa nga mga problema o kalibug ang moabut pinaagi sa dili pagsabut niini nga doktrina?

Kon mahimo, hatagi ang mga estudyante og kopya sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Dapita ang usa ka estudyante sa pagbasa niini og kusog. Hangyoa ang klase sa pagpaminaw o pagpangita og nganong kinahanglan gayud nga kita mahinumdom sa pagtan-aw sa atong mga kaugalingon una ug labaw sa tanan isip nga mga anak a Dios.

“Pagmatngon kon giunsa nimo pagpaila ang imong kaugalingon. Ayaw ipaila o ipasabut ang imong kaugalingon pinaagi sa yutan-ong kalidad. Ang mao lamang nga nag-inusarang kalidad nga kinahanglang mopaila kanato mao nga kita mga anak sa Dios. Kana nga kamatuoran molabaw sa tanang uban nga mga kinaiya, lakip ang kaliwat, trabaho, pisikal nga mga kinaiya, mga dungog, o bisan ang relihiyosong panagsakop” (“How to Define Yourself,” New Era, Hunyo 2013, 48).

Nganong importanting hinumduman nga kita una ug labaw sa tanan mga anak sa Dios?

Dangup sa kamatuoran diha sa Mga Buhat 17:27, “Kon kita andam sa pagpangita sa Dios, atong mahibaloan nga Siya dili layo gikan kanato.”

Sa unsa nga mga paagi kita makapaningkamot aron mahibalo ug mas maduol ngadto sa Dios?
Sa unsa nga paagi nga ang pagsabut sa atong relasyon ngadto sa Dios nakaapekto sa atong tinguha sa pagpangita Kaniya?
Kanus-a nimo nabati nga ang Langitnong Amahan duol kanimo?

I-summarize ang Mga Buhat 17:32–34 pinaagi sa pagpasabut nga ang mga taga Atenas adunay nagsagol nga mga reaksyon ngadto sa paghisgot ni Pablo sa “pagkabanhaw sa patay” (Mga Buhat 17:32). Ang pipila kanila mibiay-biay ni Pablo, ang uban buot nga maminaw pa, ug pipila ka mga tawo mituo.

Mahimong ikaw mopamatuod nga ang mga estudyante mahimo nga makahibalo ug makasabut sa Dios, bisan tuod Siya wala hiilhi sa daghang mga tawo. Dapita ang mga estudyante sa pagsulat og Ngadto sa Maila nga Dios diha sa usa ka pirasong papel o kard ug sa paglista og mga paagi nga sila maninguha ug magpalambo og relasyon uban sa Dios. Awhaga sila sa pagbutang niini nga papel diin kini mopahinumdom kanila sa ilang mga tumong.

Sunod nga Unit (Mga Buhat 20–Mga Taga-Roma 7)

Ipasabut ngadto sa mga estudyante nga sa sunod unit ilang makaplagan ang mga tubag sa mga pangutana “Kinsa ang gibuhi ni Pablo gikan sa patay?” ug “Unsa ang mga kahimtang nga naglibut sa kamatayon niini nga tawo?” Dapita sila sa paghanduraw nga sa walay kapasikaran gidakop, napadpad sa usa ka isla, ug dayon napaakan sa usa ka bitin. Pangutan-a kon unsay sa ilang hunahuna nga tingali ilang makat-unan gikan sa maong mga pagsulay. Hangyoa ang mga estudyante sa pagbantay sa hari kinsa miingon ngadto ni Pablo sa panahon sa taral, “Nagahunahuna ka diay nga dali mo ra akong mahimong Kristohanon” (Mga Buhat 26:28). Awhaga sila, samtang sila magtuon sa nahibilin sa Mga Buhat sa mga Apostoles, sa pagbantay kon sa unsa nga paagi ang mga hagit makatabang kanato nga mas magpaduol ngadto sa Manluluwas. Sultihi sila nga magbasa usab sila og bahin sa sulat nga gisulat ni Apostol Pablo ngadto sa mga miyembro sa Simbahan sa Roma.