Mga Buhat 20–Mga Taga-Roma 7 (Unit 20)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga mga summary sa mga panghitabo, mga doktrina, ug mga baruganan nga makat-unan sa mga estudyante dihang gitun-an nila ang Mga Buhat 20–Mga Taga-Roma 7 (unit 20) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang naghunahuna ka sa mga panginahanglan sa imong mga estudyante.

Day 1 (Mga Buhat 20–22)

Gikan sa misyonaryo nga panaw ni Pablo, ang mga estudyante makat-on nga ang tinuod nga mga sulugoon sa Ginoo matinud-anon nga mobuhat sa ilang mga katungdanan, ug sa pagbuhat sa ingon ilang bation ang kalipay. Makat-unan usab nila nga ang tinuod nga mga sulugoon sa Ginoo andam sa pagbuhat sa kabubut-on sa Dios bisan pa sa personal nga sakripisyo. Gikan sa mga istorya sa pagkakabig ni Pablo, ang mga estudyante nakat-on nga kon mosunod kita sa mga pulong ni Jesukristo, mahimo kitang makabig sa hingpit.

Day 2 (Mga Buhat 23–28)

Samtang tun-an sa mga estudyante ang pagpamatuod ni Pablo ngadto kang Haring Agrippa, ilang nakat-unan nga kon maghinulsol kita ug modangop ngadto sa Dios, mabuntog nato ang gahum ni Satanas sa atong kinabuhi, makadawat og kapasayloan sa atong mga sala, ug mokwalipay sa celestial nga gingharian. Mailhan usab nila ang kamatuoran nga aron mahimong kinabig ngadto ni Jesukristo, kinahanglan atong pilion nga motuo ug mopasalig sa hingpit sa pagsunod sa ebanghelyo. Gikan sa istorya sa panaw ni Pablo ngadto sa Roma, nakat-unan sa mga estudyante nga kon kita magmatinud-anon, ang Dios makatabang sa atong mga pagsulay nga mahimong mga panalangin alang sa atong mga kaugalingon ug sa uban.

Day 3 (Mga Taga-Roma 1–3)

Sa sulat ni Pablo ngadto sa mga Santos sa Roma, ang mga estudyante nakat-on sa mosunod nga mga kamatuoran: Samtang nag-angkon kita og usa ka pagpamatuod nga ang ebanghelyo ni Jesukristo adunay gahum sa pagluwas kanato, nan dili kita maulaw sa pagpakigbahin niini ngadto sa uban. Ang tanang tawo nga may tulubagon nakasala ug nagkinahanglan og kapasayloan sa Dios. Pinaagi sa matinud-anon nga pagdawat sa Pag-ula ni Jesukristo, ang tanang katawhan mahimong mahatagan og kaangayan ug makadawat og kaluwasan.

Day 4 (Mga Taga-Roma 4–7)

Gikan sa mga pagtulun-an ni Pablo ngadto sa mga Santos sa Roma, nakat-unan sa mga estudyante nga kita gihatagan og kaangayan pinaagi sa hugot nga pagtuo ug mga binuhatan pinaagi sa grasya. Natun-an usab nila ang mosunod nga mga kamatuoran: Ang bunyag pinaagi sa pagpaunlod mahimong magsimbolo sa atong kamatayon ug pagkabag-o sa espirituhanong kinabuhi. Kon motugyan kita sa sala, nan mahimo kitang sulugoon sa sala. Kon motugyan kita sa Dios, mahimo kitang gawasnon sa sala ug modawat sa gasa sa kinabuhing dayon.

Pasiuna

Isip usa ka binilanggo, si Pablo gidala ngadto sa Roma agi sa dagat panahon sa tingtugnaw. Sa wala pa mobiya, mipasidaan si Pablo nga ang panaw mosangput sa “kadaut ug dakung kapildihan” (Mga Buhat 27:10). Atol sa unos, si Pablo nanagna nga bisan tuod ang barko maguba, ang mga katawhan diha sa barko mabuhi. Ang gipanagna ni Pablo natuman.

Mga Sugyot alang sa Pagtudlo

Mga Buhat 27

Nalunod ang barko nga gisakyan ni Pablo sa dihang gidala siya ngadto sa Roma

Sa dili pa magsugod ang klase, isulat ang mosunod nga mga pamahayag diha sa pisara. (Kini nga pamahayag makita sa Alang sa Kalig-on sa mga Kabatan-onan [booklet, 2011], 4, 11, 16.)

“Likayi ang pagpakig-date kanunay sa samang tawo.”

“Ayaw pagtambong, pagtan-aw, o pag-apil sa kalingawan nga hilas, imoral, mapintas, o law-ay nga talan-awon, sa bisan unsang paagi.”

“Kon ang inyong mga higala moawhag kaninyo sa pagbuhat sa mga butang nga sayop, barug alang sa katarung, bisan kon kamo mobarug nga nag-inusara.”

Dapita ang usa ka estudyante sa pagbasa og kusog sa pamahayag nga nasulat diha sa pisara.

Ngano nga ang ubang kabatan-onan mopili nga dili mosunod niini nga mga pasidaan ug tambag?

Dapita ang mga estudyante sa pagpangita sa mga kamatuoran samtang sila magtuon sa Mga Buhat 27 nga makatabang sa paglig-on sa ilang hugot nga pagtuo sa pagsunod sa mga pahimangno ug tambag sa mga sulugoon sa Ginoo.

Pahinumdumi ang mga estudyante nga si Pablo gipasanginlan nga nagbudhi ug nabilanggo. Siya miapilar sa iyang kaso ngadto ni Cesar sa Roma, diin mao ang iyang katungod isip usa ka katagilungsod sa Roma. I-summarize ang Mga Buhat 27:1–8 pinaagi sa pagpasabut nga si Pablo mibyahe uban sa mga binilanggo sakay sa barko paingon sa Roma, ubos sa kustodiya sa mga guardiya sa Roma. Human sa paglawig sulod sa daghang mga adlaw, mihunong sila sa usa ka dapit diha sa isla sa Creta. Sa ilang pagbiya sa pantalan, mipasidaan si Pablo niadtong anaa sa barko nga kinahanglan dili sila mopadayon sa ilang panaw.

Dapita ang usa ka estudyante sa pagbasa og kusog sa Mga Buhat 27:9–10. Pangutan-a ang klase sa pagsunod, nga mangita sa unsay gipasidaan ni Pablo nga mahitabo kon siya ug ang uban diha sa barko mopadayon sa ilang panaw ngadto sa Roma. Mahimo nimong ipasabut nga ang pulong nga puasa sa bersikulo 9 nagpasabut sa buluntaryong pagpugong nga mokaon. Dinhi niining kahimtang “ang puasa” tingali gipasabut sa mga Judeo nga balaan nga adlaw nga gitawag nga Adlaw sa Pag-ula, diin nagtimaan sa sinugdanan sa panahon diin sa kasagaran gitamud kini nga dili luwas sa paglawig sa Dagat sa Mediterranean tungod sa dagkong mga unos. Ang adlaw sa Pag-ula kasagaran mahitabo sa hinapos sa Septyembre o sayong bahin sa Oktubre. Ipasabut nga ang pulong nga karga diha sa bersikulo 10 nagpasabut ngadto sa kargamento sa barko.

Sumala sa Mga Buhat 27:10, unsa ang gipasidaan ni Pablo ug gipanagna nga mahitabo kon sila mipadayon sa ilang pagpanaw?

Dapita ang usa ka estudyante sa pagbasa og kusog sa Mga Buhat 27:11–12. Hangyoa ang klase sa pagsunod, nga mangita kon giunsa sa pagtubag sa Romano nga kapitan ug sa uban nga anaa sa barko ang mga pasidaan ni Pablo.

Sa inyong hunahuna ngano kaha nga mas sayon ra unta alang sa kapitan sa pagtuo sa tag-iya sa barko kay ni Pablo?
Sumala sa bersikulo°12, nganong ang kadaghanan sa mga tawo diha sa barko mibaliwala sa pasidaan ni Pablo? (Mahimo nimong ipasabut kanang pulong nga dunggoanan nagpasabut ngadto sa pantalan ug ang commodious nagpasabut nga komportable o hamugaway.)

Dapita ang pipila ka estudyante nga magpuli-puli sa pagbasa og kusog sa Mga Buhat 27:13–21. Hangyoa ang klase sa pagsunod, nga mangita kon unsay nahitabo samtang mipadayon ang barko ngadto sa Roma.

Unsa ang nahitabo samtang ang barko mipadayon ngadto sa Roma?
Sumala sa bersikulo°20, unsay gibati niadtong anaa sa barko mahitungod sa ilang sitwasyon?
Unsa nga baruganan nga atong nakat-unan gikan sa bersikulo 21 mahitungod kon unsay mahitabo kon atong ibaliwala ang mga pasidaan ug mga tambag sa mga sulugoon sa Ginoo? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga baruganan: Kon atong ibaliwala ang mga pasidaan ug mga tambag sa mga sulugoon sa Ginoo, nan atong gibutang ang atong mga kaugalingon diha sa kakuyaw. Isulat kini nga baruganan diha sa pisara. Ipasabut nga ang mga kakuyaw mahimong maglakip sa pagkawala sa mga panalangin nga atoa untang madawat.)

Ribyuha uban sa mga estudyante ang mga rason sa kapitan ug ang ubang mga tawo diha sa barko nga mibaliwala sa pahimangno ug tambag ni Pablo (tan-awa sa Mga Buhat 27: 11–12).

Sa unsa nga paagi nga ang mga tawo karon mohimo og susama nga mga pangatarungan sa pagbaliwala sa mga pahimangno ug tambag sa mga sulugoon sa Ginoo?

Gamit ang Alang sa Kalig-on sa mga Kabatan-onan o sa bag-ong mga pakigpulong sa komperensya, mohatag og dugang nga mga ehemplo sa pasidaan ug tambag sa propeta nga imong gibati nga may kalabutan ngadto sa mga estudyante sa imong klase.

Unsa nga mga kakuyaw nga tingali ang mga indibidwal mopahamtang sa ilang kaugalingon pinaagi sa pagbaliwala sa ingon nga mga pasidaan ug tambag gikan sa mga propeta?

Dapita ang usa ka estudyante sa pagbasa og kusog sa Mga Buhat 27:22–26. Hangyoa ang klase sa pagsunod, nga mangita kon unsa ang gisulti ni Pablo sa mga tawo nga anaa sa barko.

Kon diha kamo sa barko taliwala sa grabe nga unos, unsa nga mga pulong gikan ni Pablo nga makahupay kaninyo?
Unsay gipanagna ni Pablo nga mahitabo sa barko?

I-summarize ang Mga Buhat 27:27–30 pinaagi sa pagpasabut nga sa ika-14 nga gabii sa unos, ang mga tripulante sa barko mitunton og upat ka mga angkla sa kadagatan aron malikayan nga ang barko mahampak ngadto sa mga bato. Ang mga tripulante miadto dayon sa atubangan sa barko ug mibuhat nga daw nagtunton sila og mas daghang angkla. Apan, sa pagkatinuod sila nagplano sa pagbiya sa barko ug molayas sakay sa gamayng sakayan tungod kay nangahadlok sila nga malunod ang barko.

Dapita ang usa ka estudyante sa pagbasa og kusog sa Mga Buhat 27:31–32. Hangyoa ang klase sa pagsunod, nga mangita sa pasidaan nga gihatag ni Pablo sa kapitan ug mga sundalo. Ipasabut nga ang pulong kining sa bersikulo 31 nagpasabut ngadto sa mga sakop nga tripulante kinsa misulay sa paglayas.

Unsa nga pasidaan ang gihatag ni Pablo sa kapitan ug sa mga sundalo?
Sa unsang paagi mitubag ang mga sundalo ngadto sa mga pasidaan ug tambag ni Pablo? (Naminaw sila sa iyang mga pasidaan ug nalikayan ang paglayas sa mga tripulante pinaagi sa pagputol sa pisi sa gamayng sakayan ug gipasagdan kining maanud nga walay sulod.)

I-summarize ang Mga Buhat 27:33–44 pinaagi sa pagpasabut nga si Pablo misugyot nga ang tanan diha sa barko mokaon og mga pagkaon aron makusgan. Sa kaulahian nianang adlawa ang barko nadasmag samtang naglawig kini paingon sa mamala, apan ang tanang tawo luwas nga nakalingkawas. Pahinumdumi ang mga estudyante sa gipanagna ni Pablo nga narekord sa mga Buhat 27:22–26 nga walay usa nga namatay bisan og ang barko nawala.

Unsa nga mga baruganan nga atong makat-unan gikan niining istorya mahitungod sa unsa ang mahitabo kon mosunod kita sa tambag ug mga pasidaan sa mga sulugoon sa Ginoo? (Ang mga estuyante kinahanglan makaila sa mga baruganan nga susama sa mosunod: Kon maminaw kita sa tambag ug mga pasidaan sa mga sulugoon sa Ginoo, nan ang Ginoo motuman sa Iyang mga saad ngari kanato. Kon maminaw kita sa tambag ug mga pasidaan sa mga sulugoon sa Ginoo, nan mabuntog nato ang mga kakuyaw nga naghulga kanato. Isulat kining mga baruganan diha sa pisara.)

Aron matabangan ang mga estudyante nga masabtan ang mga baruganan nga ilang nailhan sa Mga Buhat 27, dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan:

“Sa matag higayon sa akong kinabuhi nga ako mipili sa paglangay sa pagsunod sa dinasig nga tambag o mihukom nga ako walay labut, akong nahibaloan nga akong gibutang ang akong kaugalingon sa kadaot. Sa matag higayon nga ako namati ngadto sa tambag sa mga propeta, gibati ang paghimatuod niini diha sa pag-ampo, ug dayon gisunod kini, akong namatngunan nga ako nagpaingon ngadto sa kahilwasan” (“Finding Safety in Counsel,” Ensign, Mayo 1997, 25).

Sa unsang paagi nga ang pagpatalinghug sa mga pasidaan ug tambag sa mga sulugoon sa Ginoo nakatabang ninyo nga makasugakod sa kakuyaw nga naghulga sa inyong espirituhanon ug pisikal nga kahilwasan?

Dapita ang mga estudyante sa pagkonsiderar kon sila mibaliwala ba sa bisan unsa nga mga pasidaan o tambag gikan sa mga sulugoon sa Ginoo o naghunahuna og mga paagi nga sila mas maminaw sa mga pahimangno ug tambag nga ilang nadawat. Dapita sila sa pagsulat og usa ka tumong kalabut kon sa unsang paagi sila mopatalinghug ngadto nianang tambag.

Sunod Unit (Mga Taga-Roma 8–1 Mga Taga-Corinto 6)

Pasabta ang mga estudyante nga samtang sila magtuon sa Mga Taga-Roma 8–16 ug 1 Mga Taga-Corinto 1–6 sa sunod semana, ilang makat-unan ang mahitungod sa maalamong tambag nga gihatag ni Apostol Pablo ngadto sa mga miyembro sa Simbahan sa Roma ug Corinto aron matabangan sila nga maduol ngadto sa Dios diha sa usa ka dautan ug masamok nga kalibutan. Hangyoa sila sa pagpangita sa mga tubag sa mosunod nga mga pangutana: Ngano nga ang atong mga lawas giisip man nga mga templo? Unsaon sa mga miyembro sa Simbahan pagresolba sa ilang mga panaglahi sa usag usa?