Leksyon 109

1 Mga Taga-Corinto 12

Pasiuna

Si Pablo misulat mahitungod sa daghang mga gasa sa Espiritu. Iyang gitandi ang Simbahan ngadto sa usa ka pisikal nga lawas ug mipasabut nga ingon nga ang lawas nagkinahanglan sa matag bahin aron tukma nga makalihok, matag miyembro sa Simbahan makagamit sa mga gasa sa Espiritu aron makatampo ug mapalig-on ang Simbahan.

Mga Sugyot alang sa Pagtudlo

Giyahi ang imong mga estudyante pinaagi sa proseso sa pagkat-on

Ang mga estudyante malig-on kon imo silang giyahan pinaagi sa proseso sa pagkat-on nga susama sa unsay imong nasinati samtang gi-andam ang leksyon. Giyahi ang mga bata sa pagsiksik sa mga kasulatan alang sa panabut, ug aron sa pagdiskubre sa mga kamatuoran sa ebanghelyo alang sa ilang mga kaugalingon. Hatagi usab sila sa oportunidad sa pagpasabut sa ebanghelyo sa ilang kaugalingong mga pulong ug sa pagpakigbahin ug pagpamatuod sa unsay ilang nahibaloan ug nabati. Makatabang kini nila nga motuhop ang ebanghelyo sa ilang mga hunahuna ug mga kasingkasing.

1 Mga Taga-Corinto 12:1–11

Si Pablo nagtudlo mahitungod sa espirituhanon nga mga gasa

Ipakita ang usa ka litrato sa mosunod nga bato:

Dapita ang usa ka estudyante sa pagbasa og kusog sa nahisulat sa ibabaw sa bato. Ipasabut nga samtang si Presidente David O. McKay nagserbisyo og misyon didto sa Scotland, nakita niya kining bato ibabaw sa pultahan duol sa Stirling nga Palasyo ug nadasig sa mensahe niini (tan-awa sa Francis M. Gibbons, David O. McKay: Apostle to the World, Prophet of God [1986], 45).

Ipasabut nga ang matag simbolo sa siyam ka kahon niining bato nagpakita og usa ka balor nga numero. Hangyoa ang mga estudyante sa pag-ila sa bililhon nga numero sa matag porma. (Gikan sa wala ngadto sa tuo, ang mga simbolo nagpakita og 5, 10, ug 3 sa kinatas-an nga row; 4, 6, ug 8 diha sa tunga-tunga nga row; ug 9, 2, ug 7 diha sa kinaubsan nga row.)

• Unsa ang sumada sa tulo ka numero nga gipakita diha sa kinatas-an nga row? sa tunga-tunga nga row? sa kinaubsan nga row?

Ipasabut nga ang mga numero nga nakita diha sa bisan asa nga row, kolum, o pinahandag nga linya diha niining bato masumada ngadto sa 18. Usa ka rason niining porma mahimong nalakip niining mga pulong “Bisan Unsa Ka Man Ayoha og Himo ang Bahin Mo” mao nga kon bisan asa niining porma diin subling gihan-ay o kon ang mga balor niini nausab, ang mga row ug kolum diha sa bato dili na masumada ngadto sa 18 sa matag direksyon.

Dapita ang mga estudyante samtang sila magtuon sa 1 Mga Taga Corinto 12 sa pagkonsiderar kon sa unsang paagi nga kitang mga miyembro sa Simbahan nahisama sa mga porma diha sa bato.

I-summarize ang 1 Mga Taga Corinto 12:1–2 pinaagi sa pagpasabut nga si Pablo gustong makatudlo sa mga miyembro sa Simbahan didto sa Corinto mahitungod sa espirituhanon nga mga gasa, diin daghan sa mga Santos nasipyat sa pagsabut. Si Pablo mipahinumdom nila nga sa wala pa ang ilang pagkakabig, sila gipahisalaag pinaagi sa dios-dios.

Dapita ang usa ka estudyante sa pagbasa og kusog sa 1 Mga Taga Corinto 12:3, ug hangyoa ang klase nga mangita kon unsaon nato pagkahibalo mismo nga si Jesus mao ang Ginoo ug Manluluwas. Ipasabut nga si Joseph Smith mitudlo nga ang pulong ingon sa bersikulo 3 kinahanglan sabton isip kahibalo (sa History of the Church, 4:602–3).

• Sumala sa 1 Mga Taga Corinto 12:3, sa unsa nga paagi nga maangkon nato ang usa ka personal nga pagpamatuod ni Jesukristo? (Human ang mga estudyante makatubag, isulat ang mosunod nga kamatuoran sa pisara: Pinaagi lamang sa Espiritu Santo nga kita makaangkon og usa ka personal nga pagpamatuod nga si Jesukristo mao ang atong Manluluwas. Mahimo nimong ipasabut nga kanang managsamang baruganan magamit sa pag-angkon og personal nga pagpamatuod ni Joseph Smith o sa Basahon ni Mormon).

Aron matabangan ang mga estudyante nga mas masabtan kining kamatuoran, hangyoa ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan:

“Ang usa ka pagpamatuod mao ang labing bililhon nga kabtangan tungod kay kini dili makuha pinaagi lamang sa pangatarungan o rason, dili kini mapalit sa yutan-ong kabtangan o mapanunod gikan sa atong mga katigulangan. Dili kita mahimong mag-agad sa mga pagpamatuod sa ubang tawo. Kinahanglan natong masayran sa atong kaugalingon mismo. Si Presidente Gordon B. Hinckley miingon, ‘Kada Santos sa Ulahing mga Adlaw adunay responsibilidad aron makahibalo sa iyang kaugalingon uban sa kasiguraduhan lapas pa sa tanang pagduhaduha nga si Jesus mao ang nabanhaw, buhi nga Anak sa buhi nga Dios’ (‘Fear Not to Do Good,’ Ensign, Mayo 1983, 80). …

“Atong madawat kini nga pagpamatuod kon ang Espiritu Santo mamulong ngadto sa espiritu nga anaa kanato. Makadawat kita og usa usa ka malinawon ug dili mapaling-paling nga kasiguroan nga maoy mahimong tinubdan sa atong pagpamatuod ug lig-on pagtuo” (“Ang Gahum sa usa ka Personal nga Pagpamatuod,” Ensign o Liahona, Nob. 2006, 38).

• Nganong importanting masabtan nga ang pagpamatuod ni Jesukristo moabut lang pinaagi sa Espiritu Santo?

• Unsa ang mahimo natong buhaton aron dapiton ang Espiritu Santo diha sa atong mga kinabuhi?

Ipasabut nga sumala sa narekord sa 1 Mga Taga Corinto 12:4–6, si Pablo mitudlo nga adunay nagkadaiyang espirituhanong mga gasa nga magamit sa lain-laing pamaagi apan kanang tanan naggikan sa Dios pinaagi sa Espiritu Santo. Mahimo nimong ipasabut nga ang mga gasa sa Espiritu mao ang mga panalangin o mga abilidad nga gihatag pinaagi sa Espiritu Santo ug nga ang Dios naghatag bisan usa ka gasa ngadto sa kada miyembro sa Simbahan (tan-awa sa D&P 46:11).

Dapita ang usa ka estudyante sa pagbasa og kusog sa 1°Mga Taga-Corinto 12:7. Hangyoa ang klase sa pagsunod, nga mangita kon nganong ang mga gasa sa Espiritu gihatag ngari kanato. (Kon gikinahanglan, ipasabut nga “aron mapuslan” nagpasabut nga alang sa kaayuhan sa tanang mga Santos.)

• Unsa nga mga kamatuoran ang atong makat-onan gikan ni Pablo mahitungod kon nganong ang mga gasa sa Espiritu gihatag ngadto sa mga anak sa Langitnong Amahan? (Kinahanglang mahibaloan sa mga estudyante ang kamatuoran nga susama sa mosunod: Ang mga gasa sa Espiritu nahatag aron makabenepisyo ang tanang anak sa Langitnong Amahan. Isulat kini nga kamatuoran diha sa pisara.)

Aron matabangan ang mga estudyante nga masabtan kining kamatuoran, kopyaha ang mosunod nga tsart diha sa pisara ug hangyoa ang mga estudyante sa pagkopya niini ngadto sa ilang mga notebook sa klase o mga scripture study journal.

Espirituhanong mga Gasa	Sa Unsang Paagi nga Kining Espirituhanong mga Gasa Nakabenepisyo sa mga Anak sa Dios

Bahina ang klase ngadto sa grupo nga magtinagurha o tinagutlo . Dapita ang matag grupo sa pagtuon sa 1 Mga Taga Corinto 12:8–11 ug mosunod sa giapil nga mga instruksyon. Mahimo nimong ilista kining mga instruksyon diha sa pisara o maghatag nila og handout.

1. Sa unang kolum sa imong tsart, ilista ang matag espirituhanong gasa nga gihisgutan sa 1 Mga Taga Corinto 12:8–11.

2. Hisguti ang kahulugan o paghatag og usa ka example sa matag espirituhanon nga gasa.

Dapita ang matag grupo sa pagreport sa espirituhanon nga mga gasa nga ilang nadiskobrehan ug ang kahulugan sa matag gasa. Kon gikinahanglan, ipasabut nga “ang pulong sa kaalam” sa (bersikulo 8) nagpasabut ngadto sa maayong paghukom ug sa tukma nga paggamit sa kahibalo; ang “pulong sa kahibalo” sa (bersikulo 8) nagpasabut ngadto sa kahibalo sa Dios ug sa iyang mga balaod; “pag-ila sa mga nagkalainlaing espiritu” (bersikulo 10) nagpasabut sa pag-ila sa tinuod ug sa dili tinuod ug pagsabut sa maayo ug sa dautan diha sa uban; ug “nagkalainlaing pagpanultig mga dila” sa (bersikulo 10) nagpasabut sa abilidad sa pagpamulong sa langyaw o wala mailhing pinulongan.

Hangyoa ang matag grupo sa pagpili og duha ka espirituhanon nga mga gasa nga gihisgutan sa mga bersikulo 8–10 ug isulat diha sa ikaduha nga kolum sa tsart kon sa unsang paagi nga kadtong mga gasa makabenepisyo sa mga anak sa Dios. Human sa igo nga panahon, dapita ang pipila ka estudyante sa pagpasabut sa ilang mga tubag nga gikan sa ikaduha nga kolum ngadto sa klase.

Ipasabut nga ang espirituhanon nga mga gasa nga nahisgutan ilabi na diha sa mga kasulatan pipila lamang sa daghang mga gasa nga atong madawat pinaagi sa Espiritu.

• Unsa pay uban nga mga gasa nga moabut nato pinaagi sa Espiritu Santo?

• Unsa nga espirituhanong mga gasa nga inyong namatikdan diha sa inyong mga sakop sa pamilya, mga higala, ug mga classmate?

• Unsa ang atong mahimo aron madiskobrehan ang atong espirituhanon nga mga gasa? (Hangyoa ang Langitnong Amahan mahitungod niini diha sa pag-ampo ug dawata ug tun-i ang atong patriyarkal nga mga panalangin.)

Dapita ang mga estudyante sa pagpamalandong sa espirituhanon nga mga gasa nga sila nahatagan ug sa unsa nga paagi nga makabenepisyo sila gikan niini ug gamiton kini aron makabenepisyo sa uban.

1 Mga Taga-Corinto 12:12–31

Ang mga gasa sa Espiritu gihatag aron panalanginan ang tibuok miyembro sa Simbahan

Paghangyo og upat ka estudyante sa pag-adto sa pisara. Ayaw padungga ang tibuok klase, i-assign ang matag usa niining mga estudyante usa sa mosunod nga mga pulong: tiil, kamot, dalunggan, ug mata. Tudloi ang matag estudyante sa pag-drowing og usa ka hulagway sa iyang pulong diha sa pisara, ug hangyoa ang klase sa pagtag-an unsa ang gi-drowing sa matag estudyante. Human ang klase makaila og ensakto sa matag drowing, dapita ang mga estudyante sa pagbalik ngadto sa ilang mga lingkuranan. Hangyoa ang klase sa pagkonsiderar kon sa unsang paagi ang mga tiil, mga kamot, mga dalunggan, ug mga mata nakatampo sa pagtrabaho sa lawas.

• Nasulayan ba ninyo nga naangol ang usa sa parte sa lawas, sama sa tudlo, ngipon, o kumagko? Sa unsang paagi nga kining gamayng kaangol nakaapekto sa bisan simpling inadlaw-adlaw nga mga tahas?

Dapita ang usa ka estudyante sa pagbasa og kusog sa 1°Mga Taga-Corinto 12:12–14. Hangyoa ang klase sa pagsunod, nga mangita kon sa unsay gikatandi ni Pablo sa lawas ug sa mga parte niini.

• Unsay gikatandi ni Pablo sa lawas ug sa mga parte niini? (Ang Simbahan ni Jesukristo ug mga miyembro niini.)

Isulat ang mosunod nga pakisayran sa kasulatan ug pangutana diha sa pisara:

1 Mga Taga-Corinto 12:15–22, 25–30

Sa unsa nga mga paagi nga si Pablo mitandi sa lawas ngadto sa Simbahan?

Bahina ang mga estudyante ngadto sa samang mga grupo sama sa una. Hangyoa ang matag grupo sa pagbasa og kusog nga magdungan sa 1 Mga Taga-Corinto 12:15–22, 25–30, nga mangita sa mga paagi nga si Pablo mitandi sa mga miyembro sa Simbahan ngadto sa mga parte sa lawas. Mahimo nimong isugyot nga ang mga estudyante mangita alang sa unsay gitudlo ni Pablo mahitungod sa lawas ug sa mga parte niini sa dili pa ilhon kon giunsa niya pagpahisama ang lawas ngadto sa mga miyembro sa Simbahan. Human sa igo nga panahon, hangyoa ang mga estudyante sa pagreport unsa ang ilang nakit-an.

• Ngano kaha nga si Pablo mihisgut sa mga katungdanan sa matag usa sa mga miyembro sa Simbahan paghuman niya og sulat mahitungod sa espirituhanon nga mga gasa?

• Unsa nga mga kabalaka lagmit anaa sa mga miyembro sa Simbahan karon nga mahimong masulbad ra pinaagi sa mga pagtulun-an ni Pablo mahitungod sa pagpahisama sa mga miyembro sa Simbahan sa mga parte sa lawas?

• Unsa nga baruganan ang atong makat-onan gikan sa pagtandi ni Pablo sa mga miyembro sa Simbahan ngadto sa mga parte sa lawas? (Siguroha nga mailhan sa mga estudyante ang mosunod nga baruganan: Samtang naggamit kita sa atong lahi nga espirituhanon nga mga gasa sa pagserbisyo sa uban, makapalig-on kita sa Simbahan. Isulat kini nga baruganan diha sa pisara.)

Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley. Ikonsiderar ang paghatag sa mga estudyante og kopya sa pamahayag.

“Naapil kitang tanan niining talagsaong buluhaton. Ania kita dinhi aron sa pagtabang sa atong Amahan sa Iyang buhat ug Iyang himaya, ‘ang pagpahinabo sa pagka-imortal ug sa kinabuhi nga dayon sa tawo’ (Moises 1:39). Ang inyong obligasyon sama ra ka seryuso sa inyong responsibilidad sama sa akong obligasyon sa akong responsibilidad. Walay calling niini nga simbahan nga gamay o may gamay ra nga sangputanan. Kitang tanan nagtinguha sa atong katungdanan sa pagtandog sa mga kinabuhi sa uban” (“This Is the Work of the Master,” Ensign, Mayo 1995, 71).

• Sa unsang paagi nga ang Simbahan napanalanginan tungod sa nagkalain-laing espirituhanon nga mga gasa ug mga calling sa tagsa-tagsa ka mga miyembro?

• Sa unsang paagi nga inyong nakita nga ang inyong pamilya, klase sa seminary, o ward o branch nalig-on pinaagi sa espirituhanon nga mga gasa sa mga sakop niini?

Hangyoa ang mga estudyante sa pagpamalandong kon unsaon nila paggamit ang ilang espirituhanon nga mga gasa sa pagpalig-on sa Simbahan ug mopanalangin sa mga kinabuhi sa uban.

Dapita ang mga estudyante sa pagbasa sa hilum ang 1 Mga Taga Corinto 12:31, nga mangita kon unsa ang gitambag ni Pablo nga buhaton sa mga Santos nga Mga Taga Corinto.

• Unsa man ang gitambag ni Pablo nga buhaton sa mga Santos? (Ipasabut nga ang kasina dinhi niining bersikulo nagpasabut sa “tinguhaa hinoon pag-ayo” [besikulo 31].)

• Unsa ang atong buhaton aron magmatinguhaon sa pagpangita sa “ang labing maayo nga mga gasa” sa Espiritu (tan-awa usab sa D&P 46:8–9)?

Ipadayag ang imong pagpamatuod ug pagpasalamat alang sa espirituhanong mga gasa, ug awhaga ang mga estudyante sa pagpangita sa matinguhaon nga paagi ug sa paggamit sa espirituhanon nga mga gasa sa pagserbisyo sa uban ug pagpalig-on sa Simbahan.

Komentaryo ug Background nga Impormasyon

1 Mga Taga-Corinto 12:3. “Walay makaingon nga si Jesus Ginoo, kon dili pinaagi sa Espiritu Santo”

Si Elder M. Russell Ballard sa Korum sa Napulog Duha ka mga Apostoles mipasabut kon unsa ang atong mahimo aron makadawat og pagpamatuod sa ebanghelyo ni Jesukristo pinaagi sa gahum sa Espiritu Santo:

“Ang tinud-anay nga pagpamatuod sa … bililhong mga kamatuoran moabut isip saksi pinaagi sa Espiritu Santo human sa sinsero, ug mahalaron nga paningkamot, lakip sa pagtudlo diha sa panimalay, pag-ampo, pagtuon sa kasulatan, pagserbisyo sa uban, ug kakugi sa pagsunod sa mga kasugoan sa Langitnong Amahan. Ang pag-angkon ug paghupot kanunay sa usa ka pagpamatuod sa katinuod sa ebanghelyo angay sa bisan pila pay bili sa espirituhanong pagpangandam nga kinahanglan para ibayad” (“Lunsay nga Pagpamatuod,” Ensign o Liahona, Nob. 2004, 41).

1 Mga Taga-Corinto 12:4–10. Mga Gasa sa Espiritu

Ang mga gasa sa Espiritu importante kaayo ngadto sa Ginoo nga kini gitudlo diha sa upat ka sumbanan nga mga buhat (tan-awa ang 1 Mga Taga-Corinto 12, Moroni 10, ug Doktrina ug mga Pakigsaad 46).

Si Elder Marvin J. Ashton sa Korum sa Napulog Duha ka mga Apostoles mitudlo mahitungod sa mga espirituhanong gasa nga wala piho nga nalista sa mga kasulatan:

“Sa walay paghan-ay, tuguti ko nga maghisgut og pipila sa mga gasa nga dili kanunay nga makita o mabantayan apan importante kaayo. …

“Atong ribyuhon ang pipila niining dili kaayo makita nga mga gasa: ang gasa sa pagpangutana; ang gasa sa pagpaminaw; ang gasa sa pagkadungog ug paggamit sa hinay, hinagawhaw nga tingog; ang gasa nga makahimo sa pagbakho; ang gasa sa paglikay og panagbingkil; ang gasa nga dali rang mouyon; ang gasa sa paglikay sa kawang nga pagbalik-balik; ang gasa sa pagpangita sa matarung; ang gasa sa dili dayon mohukom; ang gasa sa pagpangayo og giya sa Dios; ang gasa sa pagkadisipulo; ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og makapatandog nga pagpamatuod; ug ang gasa sa pagdawat sa Espiritu Santo” (“There Are Many Gifts,” Ensign, Nob. 1987, 20).

1 Mga Taga-Corinto 12:7. Unsaon man nako sa pagkahibalo kon unsa ang espirituhanon nga gasa nga anaa nako?

Si Elder Robert D. Hales sa Korum sa Napulog Duha ka mga Apostoles mitudlo kon unsaon nato sa pagdiskobre unsa nga espirituhanon nga mga gasa nga nahatag ngari kanato:

“Sa pagkaplag sa mga gasa nga nahatag kanato, kinahanglan kita nga mag-ampo ug mag-puasa. Ang patriyarkal nga mga panalangin nagsulti kanato sa mga gasa nga atong nadawat ug namahayag sa saad sa mga gasa nga atong madawat kon ato kining tinguhaon. Awhagon ko ang matag usa kaninyo sa pagdiskubre sa inyong mga gasa ug sa pagpangita og mga butang nga makahatag og direksyon sa inyong buluhatunon sa kinabuhi ug sa mga buluhaton nga maoy makapadayon sa mga buluhaton sa langit” (“Gifts of the Spirit,” Ensign, Peb. 2002, 16).

1 MgaTaga-Corinto 12:22. “Kadtong mga sakop sa lawas, nga ingon og mas huyang, mao ang gikinahanglan”

Si Presidente Dieter F. Uchtdorf sa Unang Kapangulohan mitudlo:

“Tingali kamo mobati nga anaay uban nga labawng makahimo o may labaw nga kasinatian nga mas makahimo sa inyong mga calling ug ubang mga buluhaton labaw kay sa inyong mahimo, apan ang Ginoo naghatag ninyo niini nga mga responsibilidad nga may hinungdan. Tingali may mga tawo ug mga kasingkasing nga kamo ang bugtong makakab-ut ug makatandog. Tingali walay lain nga makahimo niini sa ingon nga pamaagi” (“Mangusog Diha sa Imong Gibarugan,” Ensign o Liahona, Nob. 2008, 56).