Leksyon 4
Ang Pagtuon sa mga Kasulatan
Pasiuna
Kini nga leksyon makatabang ninyo nga makasabut sa kaimportante sa inadlaw nga pagtuon sa mga kasulatan ug pagbasa sa tibuok Bag-ong Tugon isip kabahin niini nga kurso sa pagtuon. Makakat-on usab kamo og mga paagi sa pagpalambo sa inyong pagtuon sa mga kasulatan.
Mga Sugyot alang sa Pagtudlo
Ang panginahanglan sa epektibo nga inadlaw nga pagtuon sa kasulatan
Hatagi ang matag estudyante og kopya sa mosunod nga survey. Dapita ang mga estudyante sa paghunahuna sa mga pamahayag ug pagmarka sa ilang mga tubag diha sa linya. Isiguro sa mga estudyante nga ikaw dili mohangyo nila sa pagreport sa ilang mga tubag.
Human makompleto sa mga estudyante ang survey, dapita sila sa pagpamalandong panahon sa leksyon unsaon nila nga molambo pa ang ilang pagtuon sa kasulatan.
Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles.
“Ang kasulatan naglakip sa mga pulong ni Kristo ug tinubdan sa buhi nga tubig nga atong ma-access ug diin kita makainom og daghan ug dugay. …
“Pinaagi sa normal nga kalihokan kada adlaw kamo ug ako mawad-an og igong gidaghanon sa tubig nga maoy kadaghanan sa atong pisikal nga lawas. Ang kauhaw maoy pagpangayo sa mga selula sa lawas sa tubig, ug ang tubig sa atong lawas kinahanglang pulihan kada adlaw. Dili gyud kaayo masabtan nga usahay atong paimnon ang ‘atong lawas’ og tubig, pero human sa taas kaayo nga panahon sa kauga. Mao usab kana sa pagkaespirituhanon. Ang espirituhanon nga kauhaw mao ang panginahanglan sa buhi nga tubig. Ang kanunay nga pag-agas sa buhi nga tubig mas maayo kaayo sa panagsa nga pag-inom” (“A Reservoir of Living Water” [Church Educational System fireside, Peb. 4, 2007], 1, 7, broadcast.lds.org).
-
Unsa nga baruganan ang atong makat-unan gikan sa pamahayag ni Elder Bednar mahitungod sa unsay atong madawat sa kada adlaw nga pagtuon sa kasulatan: (Ang mga estudyante kinahanglang moila og baruganan susama sa mosunod: Sa atong pagtuon sa mga kasulatan, kada adlaw, madawat nato ang “buhi nga tubig” nga atong gikinahanglan. Isulat kini nga baruganan sa pisara.)
Ang bili sa balaan nga mga kasulatan sa atong panahon
Sa pagtabang sa mga estudyante nga makasabut sa bili ug kaimportante sa mga kasulatan sa atong panahon, mahimo nimong ipakita ang video “The Blessings of Scripture” (3:04), nga anaa sa LDS.org. Niini nga video, si Elder D. Todd Christofferson sa Korum sa Napulog Duha ka mga Apostoles naghulagway sa sakripisyo nga gihimo sa usa ka tawo aron daghang mga tawo ang makabasa sa Biblia. Kon imong ipasalida ang video, ikonsiderar ang paghunong human mangutana si Elder Christofferson, “Unsay ilang nasabtan nga kinahanglan usab natong masabtan?” (time code 1:56) sa pagpangutana sa mga estudyante unsaon nila sa pagtubag sa iyang pangutana. Dayon ipadayon ang pagpasalida ang video. Sa pagkahuman sa video, ipadayon ang leskyon sa paragrap nga nagsugod og, “Human sa video …”
Kon dili nimo ipasalida ang video, pagdapit og upat ka mga estudyante sa pagduol sa atubangan sa klase ug basaha ang mosunod nga mga porsyon sa pakigpulong ni Elder Christofferson.
1. “Niadtong Oktubre 6, sa tuig 1536, usa ka makalolooy nga tawo gidala gikan sa prisohan sa Vilvorde Castle duol sa Brussels, Belgium. Sulod sa dul-an sa usa ka tuig ug tunga, ang tawo nag-antus nga nag-inusara sa mangitngit, tun-og nga selda. Karon sa gawas sa bongbong sa palasyo, ang piniriso gigaid sa usa ka poste. Siya adunay higayon sa pagpahayag og kusog sa iyang katapusan nga pag-ampo, ‘Ginoo! ablihi ang mga mata sa hari sa England,’ ug dayon siya gibitay. Pagkahuman dayon, ang iyang lawas gisunog. Kinsa kining tawhana, ug unsa ang sala … ?” (“Ang mga Panalangin sa Kasulatan,” Ensign o Liahona, Mayo 2010, 32).
2. “Ang iyang ngalan mao si William Tyndale, ug ang iyang sala mao ang paghubad ug pagmantala sa Biblia sa Iningles.
“… Sa usa ka grabe nga debati uban sa pari nga milalis batok sa paghatag sa kasulatan sa mga kamot sa komon nga tawo, nanumpa si Tyndale, ‘Kon buhion pa ko Dios, akong himoon nga ang usa ka bata nga tigdaro makakat-on og daghan sa mga Kasulatan kay kaninyo!’ …
“Si William Tyndale dili ang nag-una, ni ang katapusan, niadtong kinsa sa daghang mga nasud ug mga pinulongan misakripisyo, bisan ngadto sa kamatayon, sa pagpagawas sa pulong sa Dios gikan sa kangitngit. … Unsay ilang nahibaloan sa kaimportante sa mga kasulatan nga kinahanglan usab natong mahibaloan? Unsay nasabtan sa mga tawo sa England sa ika-16 nga siglo, kinsa mibayad og dako ug grabeng personal nga mga risgo aron lang makabasa sa Biblia nga kinahanglan usab natong masabtan?” (“Ang Panalangin sa Kasulatan,” 32).
Pangutan-a ang klase:
-
Ngano sa inyong hunahuna nga ang mga tawo misakripisyo og dako aron makabasa sa mga kasulatan?
Hangyoa ang ikatulo nga magbabasa sa pagpadayon og basa sa pamahayag ni Elder D. Todd Christofferson.
3. “Sa panahon ni Tyndale daghan ang ignorante sa kasulatan tungod kay ang mga tawo dili makabasa sa Biblia ilabi na sa pinulongan nga dili nila masabtan. Karon ang Biblia ug ubang mga kasulatan sayon na lang basahon, apan nagkadaghan gihapon ang ignorante sa kasulatan tungod kay ang mga tawo dili moabli sa mga libro. Ang sangputanan ilang nalimtan ang mga butang nga nahibaloan sa ilang mga apohan” (“Ang Panalangin sa Kasulatan,” 33).
Pangutan-a ang klase:
-
Ngano sa inyong hunahuna nga ang mga tawo sa atong panahon dili mobasa sa mga kasulatan?
Hangyoa ang ikaupat nga magbabasa sa pagpadayon og basa sa pamahayag ni Elder D. Todd Christoofferson.
4. “Hunahuna ang gidaghanon sa atong panalangin nga dunay Balaan nga Biblia ug mga 900 ka dugang nga mga pahina sa kasulatan, lakip sa Basahon ni Mormon, sa Doktrina ug mga Pakigsaad, ug sa Perlas nga Labing Bililhon. … Sa tinud-anay uban niini nga panalangin ang Ginoo nagsulti kanato nga ang atong panginahanglan sa mga mga kasulatan mas labaw pa ka dako kay sa bisan hain nga panahon” (“Ang mga Panalangin sa Kasulatan,” 35).
Human sa video (o sa human sa ikaupat nga magbabasa nakatapos sa pagbasa sa pamahayag ni Elder Christofferson), dapita ang mga estudyante sa pagpasabut unsay ilang gituohan sa gisulti ni Elder Christofferson mahitungod sa atong panginahanglan sa pagtuon sa mga kasulatan. Human makatubag ang mga estudyante, isulat ang mosunod nga kamatuoran sa pisara: Ang atong panginahanglan sa mga kasulatan mas labaw pa kay sa miaging panahon.
-
Ngano sa inyong hunahuna nga ang atong panginahanglan sa mga kasulatan mas labaw pa kay sa miaging panahon.
Sa pagtabang sa mga estuadyante nga makasabut kon sa unsa nga paagi nga ang pagtuon sa mga kasulatan makabenepisyo nato sa atong panahon, ipasabut nga si Apostol Pablo misulat og sulat diin iyang gihulagway ang mga kahimtang sa kalibutan sa katapusang mga adlaw. Dapita ang usa ka estudyante sa pagbasa og kusog sa 2 Timoteo 3:1–5, 13. Hangyoa ang klase sa pagsunod, mangita sa mga sala ug mga kinaiya nga komon sa atong panahon. (Mahimo nimong ipabasa sa mga estudyante ang mga footnote aron matabangan ang lisud nga mga pulong niini nga mga bersikulo.)
-
Unsa ang pipila ka mga sala ug mga kinaiya nga gilista niini nga mga bersikulo nga inyong nasaksihan sa atong katilingban karon?
Dapita ang usa ka estudyante sa pagbasa og kusog sa 2 Timoteo 3:14–17. Hangyoa ang klase sa pagpangita kon unsaon nato nga makakita og kaluwasan niining mga panahon nga malisud.
-
Unsaon nato nga makakita og kaluwasan niining mga panahon nga malisud?
Isulat ang mosunod nga dili kompleto nga pamahayag diha sa pisara: Samtang kita magtuon sa mga kasulatan, kita makadawat …
-
Sumala sa 2 Timoteo 3:15–17, unsa nga mga panalangin ang atong maangkon samang kita magtuon sa mga kasulatan ug magsunod sa mga pagtulun-an niini? (Human makatubag ang mga estudyante, kompletuha ang pamahayag diha sa pisara aron kini mabasa sama sa mosunod: Samtang kita magtuon sa mga kasulatan, kita makadawat og kaalam, koreksyon, ug instruksyon nga mogiya nato ngadto sa kaluwasan.)
Ipasabut nga ang pamahayag diha sa pisara usa ka ehemplo sa baruganan. Ang mga baruganan ug mga doktrina sa ebanghelyo ni Jesukristo mao ang sukaranan, dili mausab nga mga kamatuoran nga naghatag og giya sa atong mga kinabuhi. Ang importanting katuyoan sa mga kasulatan mao ang pagtudlo sa mga doktrina ug mga baruganan sa ebanghelyo. Mahimo natong mas makahuluganon ang atong personal nga pagtuon sa kasulatan pinaagi sa pagpangita sa mga doktrina ug mga baruganan, mamalandong sa kahulugan niini, ug paggamit niini sa atong mga kinabuhi.
Gamita pag-usab ang baruganan nga imong gisulat diha sa pisara.
-
Unsa sa inyong hunahuna ang gipasabut nga kita makadawat og kaalam, koreksyon, ug instruksyon nga samtang magtuon kita sa kasulatan?
-
Kanus-a kamo mibati nga kamo nakadawat og kaalam, kahayag, kamatuoran, koreksyon, o instruksyon isip resulta sa pagtuon sa mga kasulatan? (Mahimo usab nga ikaw mopakigbahin og kasinatian.)
Basaha ang Bag-ong Tugon kada adlaw
Ipasabut nga usa sa usa sa mga gipaabut alang niining kurso sa pagtuon sa seminary mao nga inyong basahon ang tibuok Bag-ong Tugon. Gikinahanglan kini aron makadawat og seminary diploma.
Ipasabut nga ang pagbasa sa tibuok Bag-ong Tugon magkinahanglan og kanunay nga paningkamot apan dili masayang ang paningkamot. Sa paghulagway niini, ipakita ang duha sihag nga mga baso nga dunay tubig (o softdrink). Pagdapit og duha ka estudyante nga ang kada usa mobarug tupad sa usa ka baso. Hatagi ang usa ka estudyante og straw. Hatagi ang laing estudyante og pito ka mga straw nga gibugkos. Sultihi sila sa pag-inom sa tanang tubig sa labing dali kutob sa ilang mahimo gamit ang straw o mga straw. (Ang estudyante nga naggamit og usa ka straw sayon rang makainom sa tubig ug unang makahuman; ang laing estudyante magkalisud sa pagsuyop sa tanang tubig gamit ang mga straw.) Dapita ang duha ka estudyante sa paglingkod, ug pangutan-a ang klase:
-
Unsaon ninyo sa pagpahaum niini nga kalihokan ngadto sa atong tumong sa pagbasa sa tibuok Bag-ong Tugon isip kabahin niini nga kurso sa pagtuon? (Ang estudyante nga dunay pito ka mga straw sama sa usa ka tawo nga mosulay og basa sa daghang bahin sa mga kasulatan sa usa ka higayon. (Ang estudyante nga dunay usa ka straw sama sa usa ka tawo nga mobasa og ginagmay kada adlaw.)
Sa pagtabang sa mga estudyante nga makahibalo unsaon nila pagbasa ang tibuok Bag-ongTugon pinaagi sa pagbasa og ginagmay nga porsyon kanunay, dapit sila sa pagbahin sa gidaghanon sa mga pahina sa Bag-ongTugon (404 ka pahina sa edisyon sa mga Santos sa Ulahing mga Adlaw sa King James Version sa Biblia) sa gidaghanon sa tanang mga adlaw hangtud sa katapusan sa kurso. Pananglit, kon ang kurso itudlo sa tuig ting-eskwela nga 280 ka adlaw, ang mga estudyante kinahanglang mobasa og mga 1.5 ka pahina kada adlaw aron mahuman ang Bag-ong Tugon sa katapusan sa kurso.
Ipamatuod ang mahitungod sa mga panalangin nga moabut ngadto sa mga estudyante kon sila magkugi sa pagtuon sa Bag-ong Tugon. Ang mga estudyante makadawat og kaalam, koreksyon ug intruksyon gikan sa kasulatan ug mapanalanginan sa panang-uban sa Espiritu Santo.
Gamita pag-usab ang mga baruganan nga naa sa pisara, ug ipamatuod nga pinaagi sa pagtuon sa mga kasulatan kada adlaw, ang mga estudyante makasinati sa mga panalangin nga gihulagway ni Pablo sa 2 Timoteo 3:15–17. Awhaga ang mga estudyante sa paghimo og mga tumong sa paggahin og oras kada adlaw alang sa personal nga pagtuon sa kasulatan ug sa pagbasa sa tibuok Bag-ong Tugon. Dapita ang mga estudyante sa pagsulat sa ilang mga tumong diha sa ilang mga scripture study journal.
Komentaryo ug Background nga Impormasyon
Mga panalangin nga moabut kon kita magtuon sa mga kasulatan kada adlaw
Si Elder Todd Christofferson sa Korum sa Napulog Duha ka mga Apostoles mipahayag:
“Ang Dios migamit sa kasulatan sa pagbutyag sa sayop nga panghunahuna, sayop nga mga tradisyon, ug sala uban sa makalaglag nga mga epekto niini. Kini sama sa usa ka malumong ginikanan kinsa molayo kanato gikan sa wala kinahanglana nga pag-antus ug kasubo ug sa samang higayon motabang kanato sa pagkab-ot sa atong balang potensyal. …
“Sa katapusan, ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo” (“Ang mga Panalangin sa Kasulatan,” Ensign or Liahona, Mayo 2010, 33–34).
Si Sister Julie B. Beck, kanhi kinatibuk-ang presidente sa Relief Society, mitudlo:
“Kon wala pa ninyo nabatasan ang kada adlaw nga pagbasa sa mga kasulatan, sugdi kini karon ug pagtuon kanunay aron maandam alang sa inyong mga responsibilidad niini nga kinabuhi ug sa kahangturan.” …
“… Ang paagi sa pag-abli sa importanteng kahibalo mao ang pagsige og tuon. … Ang mga kasulatan nagpamatuod kang Kristo (tan-awa sa Juan 5:39). Kini nagtug-an kanato sa tanang mga butang ang atong buhaton (tan-awa sa 2 Nephi 32:3). Kini ‘nagtudlo [kanato] ngadto sa kaluwasan’ (2 Timoteo 3:15).
“… Pinaagi sa inyong kinaiya sa pagtuon sa kasulatn kada adlaw, kamo ‘madala sa pagtuo sa balaan nga mga kasulatan, oo, ang mga panagna sa balaan nga mga propeta, nga nahisulat’ (Helaman 15:7). Mahimo mong mga inahan [ug mga amahan] ug mga lider nga motabang og andam sa sunod nga henerasyon uban sa panabut sa ebanghelyo ug pagpamatuod” (“Ang Akong Kalag Nalipay sa mga Kasulatan,” Ensign or Liahona, Mayo 2004, 108–9).
Ang Milagro sa Balaang Biblia
Sa pakigpulong sa kinatibuk-ang komperensya nga giulohan og “Ang Milagro sa sa Balaang Biblia” (Ensign o Liahona, Mayo 2007, 80–82), si Elder M. Russell Ballard sa Korum sa Napulog Duha ka mga Apostoles mitudlo sa kaimportante ug kabililhon sa Balaang Biblia ug nagpasalamat sa mga paningkamot sa Kristiayno nga mga martir ug mga reformer kinsa mitabang nga ang tanan makagamit sa Biblia. Miashag siya nato nga magmapasalamaton sa Balaan nga Biblia ug magpamatuod nga “dili sulagma o naatol lamang nga aduna kitay Biblia karon” (“Ang Milagro sa Balaang Biblia,” 80).