2 Mga Taga-Corinto 8–Mga Taga-Efeso 1 (Unit 24)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga mga summary sa panghitabo, mga doktrina, ug mga baruganan nga nakat-unan sa mga estudyante samtang gitun-an nila ang 2 Mga Taga-Corinto 8–Mga Taga-Efeso 1 (unit 24) dili tuyo nga itudlo isip usa ka bahin sa imong leksyon. Ang leksyon nga imong itudlo magtutok sa pipila lamang niining mga doktrina ug mga baruganan. Sunda ang mga pag-aghat sa Espiritu Santo samtang imong ikonsiderar ang panginahanglan sa imong mga estudyante.

Day 1 (2 Mga Taga-Corinto 8–9)

Niini nga leksyon nakat-unan sa mga estudyante nga kon atong masabtan ang tanan nga gihatag sa Manluluwas kanato, mas andam kita nga mohatag sa unsay naa nato ngadto sa uban. Nakat-unan usab sa mga estudyante nga gusto sa Dios nga kita andam nga mohatag bisan og tingali kita walay ikahatag. Agig dugang, nakat-unan sa mga estudyante nga kon mohatag kita ngadto sa mga nagkinahanglan uban ang malipayong kasingkasing, ang Dios mopanalangin kanato sa hilabihan, ug ang pag-ila sa kamanggihatagon sa Dios sa pagpanalangin kanato makatabang nga mobati kita mobati sa pagpasalamat Kaniya.

Day 2 (2 Mga Taga-Corinto 10–13)

Gikan sa mga pagtulun-an ni Pablo bahin sa espirituhanong panglimbasug, nakat-unan sa mga estudyante nga kon atong kontrolahon ang atong mga hunahuna sa pagsunod kang Jesukristo, mas magmalampuson kita sa pakiggubat batok ni Satanas. Gikan sa mga pagtulun-an ni Pablo mahitungod sa kaugalingon niyang mga pagsulay, nadiskubrihan sa mga estudyante nga ang Ginoo motugot nga kita makasinati og mga kahuyang ug pagsulay aron makakat-on kita sa pagpaubos. Ang grasya ni Jesukristo igo nga makalig-on kanato diha sa atong mga kahuyang, ug ang Ginoo dili sa kanunay motangtang sa atong mga hagit, apan siya molig-on nato samtang matinud-anon kita sa paglahutay niini.

Day 3 (Mga Taga-Galacia)

Dihang gitun-an sa mga estudyante ang mga pagtulun-an ni Pablo ngadto sa mga Taga-Galacia, ilang nakat-unan nga mipadayag si Jesukristo sa tinuod nga doktrina ngadto sa Iyang mga propeta. Nakat-unan usab sa mga estudyante nga ang tanan nga mogamit sa hugot nga pagtuo kang Jesukristo ug mosulod sa pakigsaad sa ebanghelyo mamahimong usa diha ni Kristo ug manununod sa Dios. Ilang nasabtan nga kon molakaw kita uban sa Espiritu, mabuntog nato ang mga tintasyon sa unod ug kon magkugi kita sa paghimo og maayo, atong maani ang mga panalangin sa atong mga binuhatan.

Day 4 (Mga Taga-Efeso 1)

Gikan sa unang kapitulo sa mga pagtulun-an ni Pablo ngadto sa mga Taga-Efeso, nakat-unan sa mga estudyante nga ang mga anak sa Dios giorden nang daan nga makadawat sa mga panalangin sa ebanghelyo. Nakat-unan sab nila nga atol sa dispensasyon sa kahingpitan sa mga panahon, ang tanang butang gikan sa nangaging mga dispensasyon mapahiuli ug kita makaila sa Langitnong Amahan pinaagi sa espiritu sa pagpadayag.

Pasiuna

Giawhag ni Apostol Pablo ang mga Santos sa Galacia nga ipahiuli ang ilang pagtuo kang Jesukristo ug mosalig nga ang kaluwasan makab-ot lamang pinaagi Kaniya kaysa pinaagi sa pagsunod sa balaod ni Moises.

Mga Sugyot alang sa Pagtudlo

Mga Taga-Galacia 5

Giawhag ni Pablo ang mga Santos sa Galacia nga ipahiuli ang ilang pagtuo kang Jesukristo

Pagdrowing og imahe sa tug-of-war sa pisara.

Unsa ang tug-of-war? Unsaon man ninyo sa pagdaog niini?
Sa unsang mga paagi nga ang atong kinabuhi susama sa tug-of-war?

Kon ang mga estudyante wala mosulti niini, ipasabut nga usa ka aspeto sa atong kinabuhi nga susama sa tug-of-war mao ang atong pagpakigbatok sa tintasyon. Dapita ang mga estudyante sa pagpangita og mga kamatuoran samtang tun-an nila ang Mga Taga-Galacia 5 nga makatabang nila nga mahibalo unsaon nga makadaog sa pagpakigbatok sa tintasyon.

Pahinumdumi ang mga estudyante nga ang mga Judeo nga mga Kristiyano mipasalaag sa mga Santos sa Galacia pinaagi sa pagtudlo nila nga kinahanglan silang mosunod sa balaod ni Moises ug magpatuli aron maluwas. Gihulagway ni Pablo kining sayop nga mga pagtulun-an mahitungod sa balaod ni Moises isip usa ka “yugo sa pagkaulipon” (Mga Taga-Galacia 5:1).

Dapita ang usa ka estudyante sa pagbasa og kusog sa Mga Taga-Galacia 5:1. Hangyoa ang klase sa pagsunod, nga mangita kon kinsay giingon ni Pablo nga maghatag og kagawasan gikan niining yugo sa pagkaulipon.

Kinsa man ang nagdala og kagawasan gikan niining yugo sa pagkaulipon?

I-summarize ang Mga Taga-Galacia 5:2–15 pinaagi sa pagpasabut nga gipanton ni Pablo ang mga Santos sa Galacia gumikan sa pagkadali rang mapadpad gikan sa kagawasan sa ebanghelyo ni Jesukristo ug mibalik hinoon ngadto sa pagkaulipon sa balaod ni Moises. Dayon iyang giklaro nga bisan og ang mga sumusunod ni Kristo gawasnon na gikan sa pagkaulipon sa balaod ni Moises, wala kana magpasabut nga gawasnon na silang magpatuyang sa pagpakasala.

Dapita ang usa ka estudyante sa pagbasa og kusog sa Mga Taga-Galacia 5:16–17. Hangyoa ang klase sa pagsunod, nga mangita sa duha ka nag-ilog nga pwersa nga gihulagway ni Pablo.

Unsa man ang duha ka nag-ilog nga pwersa nga gihulagway ni Pablo?

Paghimo og tsart sa pisara pinaagi sa pagdrowing og vertical o pinatindog nga linya padung sa tunga sa imahe sa tug-of-war. Isulat ang Panaggawi sa Espiritu sa ibabaw sa unang bahin sa tug-of-war, ug isulat ang Pagtumana ang mga pangibug sa unod sa ibabaw nga laing bahin.

Unsay ipasabut sa “panaggawi kamo diha sa Espiritu”? (Mga Taga-Galacia 5:16). (Magpakabuhing takus ug mosunod sa Espiritu Santo.)
Unsa ang gi-refer sa “pangibug sa unod” (Mga Taga-Galacia 5:–16)? (Mga tintasyon sa pagpakasala.)
Sa unsang paagi gikonsiderar kini nga nag-inilogay nga mga pwersa?
Unsa nga baruganan ang atong makat-unan gikan sa Mga Taga-Galacia 5–16 kon unsaon nato sa pagbuntog ang mga tintasyon sa unod? (Ang mga estudyante mahimong mogamit og lain-laing mga pulong apan kinahanglang mahibalo sa baruganan nga susama sa mosunod: Kon magpakabuhi kitang takus sa Espiritu, atong mabuntog ang mga tintasyon sa unod. Isulat kini nga baruganan diha sa pisara.)

Dapita ang usa ka estudyante sa pagbasa og kusog sa mosunod nga pamahayag ni Elder Melvin J. Ballard sa Korum sa Napulog Duha ka mga Apostoles. Hangyoa ang klase sa pagpaminaw sa pangutana nga gihangyo ni Elder Ballard nga atong ikonsiderar.

“Ang tanang pagpangatake nga buhaton sa kaaway sa atong mga kalag sa pagsikop kanato himoon pinaagi sa unod. … Ang iyang pagtintal kanato himoon pinaagi sa pangibug, sa mga gana, sa mga ambisyon sa unod. Ang tanang tabang nga moabut kanato gikan sa Ginoo niining panglimbasug moabut kanato pinaagi sa espiritu nga magapuyo niining mortal nga lawas. Busa kining duha ka kusog nga pwersa nagtrabaho diri nato pinaagi niining duha ka channel.

“Kumusta man ang imong pakiggubat niini? … Mahinungdanon kaayo kana nga pangutana. Ang labing dakong sangka nga atubangon ni bisan kinsa (wala koy labut kon bisan unsa pa kadaghan ang ilang mga kaaway) mao ang pakiggubat sa kaugalingon” (“Struggle for the Soul,” New Era, Mar. 1984, 35).

Hangyoa ang mga estudyante sa pagpamalandong kon asang dapita sila niining tug-of-war ug asa nga pwersa nga dumadaog sa ilang kinabuhi.

Bahina ang klase ngadto sa grupo nga magtinagurha o tinagutlo. I-assign ang katunga sa grupo sa pagbasa og kusog sa Mga Taga-Galacia 5:19–21 nga magdungan, nga mangita sa mga resulta sa “[pagtuman] sa pangibug sa unod.” Dapita ang laing katunga sa pagbasa og kusog sa Mga Taga-Galacia 5:22–23 nga magdungan, nga mangita sa mga resulta sa paglakaw kauban ang Espiritu. Kon mahuman na ang ilang pagbasa, dapita ang usa ka miyembro gikan sa matag grupo sa paglista ubos sa tukma nga kolum diha sa pisara sa usa sa mga tubag nga ilang nakit-an. Dapita sila nga ipadayon ang paglista sa ilang mga tubag hangtud ang tsart magpakita kon unsay gisulat ni Pablo. Mahimo kang magdala og diksyonaryo sa klase ug dapita ang usa ka estudyante sa pagpangita og bisan unsang mga pulong nga lisud sabton.

Sumala sa Mga Taga-Galacia 5:21, unsay gitudlo ni Pablo nga mahitabo sa mga tawo nga magpadala sa “mga binuhatan sa unod”? (Mga Taga-Galacia 5:19).
Sumala sa Mga Taga-Galacia 5:22–23, unsa ang mga bunga, o mga resulta, ang nagpasabut nga ang usa ka tawo naglakaw uban sa Espiritu? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Ang mga bunga sa Espiritu mao ang “gugma, kalipay, kalinaw, pailub, pagkamapuanguron, pagkamaayo, hugot nga pagtuo, kaaghup, ug pagpugong sa kaugalingon. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.)

I-refer ngadto sa kilid sa tsart diin nakalista ang mga bunga sa Espiritu.

Ngano nga bililhon ang pag-angkon niini nga mga panalangin?

Sa ubos sa tsart pagdrowing og dakong arrow nga nag-atubang sa kilid diin nakalista ang pangibug sa unod. Hangyoa ang mga estudyante sa paghunahuna nga niining hulagway sa tug-of-war gitugutan nato ang atong kaugalingon nga magpadulong sa pangibug sa unod.

Unsay mahitabo sa mga bunga sa Espiritu kon magpadala kita sa pangibug sa unod? (Magsugod sa pagkawala kanato ang mga bunga sa Espiritu.)

Papasa ang arrow ug pagdrowing og laing arrow nga mag-atubang sa mga bunga sa Espiritu. Hangyoa ang mga estudyante sa paghunahuna nga karon gitugutan nato ang atong kaugalingon nga magpadulong ngadto niining dapita.

Unsay mahitabo sa mga binuhatan sa unod kon maglakaw kita uban sa Espiritu? (Dili na kini mahimong kabahin sa atong kinabuhi.)

Dapita ang mga estudyante nga isulat sa ilang mga class notebook o mga scripture study journal ang mahitungod sa usa ka panahon dihang mibati sila o nakasinati og usa niining mga bunga sa Espiritu. Hangyoa sila nga ilakip ang unsay ilang gihimo sa paglakaw uban sa Espiritu nianang higayuna. Kon mahuman na sila, dapita ang pipila ka estudyante sa pagpakigbahin unsay ilang gisulat.

Dapita ang usa ka estudyante sa pagbasa og kusog sa Mga Taga-Galacia 5:24–25. Hangyoa ang klase sa pagsunod, nga mangita kon unsay gitinguhang buhaton sa mga disipulo ni Jesukristo sa pangibug sa unod.

Unsay gitinguhang buhaton sa mga disipulo ni Jesukristo sa pangibug sa unod? (Ilansang kini, o wagtangon kini sa ilang kinabuhi.)

Dapita ang mga estudyante sa paghunahuna kon unsay ilang buhaton aron maglakaw sa hingpit uban sa Espiritu. Awhaga sila nga sundon ang mga pag-aghat nga ilang nadawat aron ilang matagamtam ang mga bunga sa Espiritu.

Sunod nga Unit (Mga Taga-Efeso 2–Mga Taga-Filipos 4)

Dapita ang mga estudyante sa paghunahuna mahitungod sa nagkausab nga mga hiyas, mga balaod, ug mga opinyon sa kalibutan. Unsaon nato sa pagkahibalo sa unsay husto ug sayop dinhi sa kalibutan nga ang mga ideya padayong nagkausab? Mitambag si Apostol Pablo sa mga Santos ug gitabangan sila aron masabtan unsa ang gihatag sa Ginoo sa pagsiguro nga dili kita madala sa sayop nga mga pilosopiya sa kalibutan. Ipasabut usab nga samtang padayon nilang tun-an ang mga sinulat ni Pablo sa sunod nga semana, makakita sila og mga tubag sa mosunod nga mga pangutana: Unsay angay nga pagtagad sa mga anak ngadto sa ilang mga ginikanan? Unsa ang giingon ni Pablo nga “makapalong sa tanang mga nagadilaab nga udyong sa dautan” (Mga Taga-Efeso 6:16)?