Leksyon 64: Juan 5

Leksyon 64

Juan 5

Pasiuna

Ang Manluluwas mitambong og usa ka fiesta (sama sa Pagpalabay) sa Jerusalem ug miayo og tawo nga masakiton sa may tuburan sa Betsata. Gitudlo ni Jesukristo nga Siya nagrepresentar sa Amahan ug mipasabut nganong ang mga tawo kinahanglang motahud sa Anak sa Dios. Gihulagway sab niya ang ubang mga saksi nga mipamatuod sa Iyang kabalaan.

Mga Sugyot alang sa Pagtudlo

Juan 5:1–30

Si Jesus miayo sa usa ka masakiton nga tawo atol sa Igpapahulay ug mitudlo mahitungod sa Iyang relasyon ngadto sa Amahan

I-display ang usa ka litrato sa mga piraso sa buak nga kolon o plato (o pagdrowing og litrato sa buak nga plato diha sa pisara).

Hangyoa ang klase nga mo-isa sa ilang kamot kon nakabuak na ba sila og butang nga importante o bililhon. Ipasabut nga isip mga anak sa Langitnong Amahan, kita importante ug may dako kaayong bili. Hinoon, tungod sa atong mga pagpili o sa mga hagit nga atong giatubang, usahay mobati ta nga kita usa ka basag o sa ingon gamay ra og bili.

Unsa ang pipila ka pamaagi diin ang usa ka tawo tingali mobati nga nabasag siya sa espiritwal, pisikal, o emosyunal nga paagi? (Ilista sa pisara ang tubag sa mga estudyante.)

Dapita ang mga estudyante sa pagpangita sa kamatuoran samtang magtuon sila sa Juan 5:1–9 nga makatabang sa paghupay kanato ug makahatag nato og paglaum kon mobati kita nga nabasag.

I-summarize ang Juan 5:1 pinaagi sa pagpasabut nga human sa pagpangalagad ni Jesukristo sa Galilea, mibiyahe Siya ngadto sa Jerusalem aron sa pagtambong og usa ka fiesta sa mga Judeo, labing siguro sa Pagpalabay (tan-awa sa Juan 5:1). Samtang didto sa Jerusalem, miadto Siya sa usa ka tuburan duol sa templo.

Dapita ang usa ka estudyante sa pagbasa og kusog sa Juan 5:2–4 . Hangyoa ang klase sa pagsunod, nga mangita kon si kinsa ang nanagpundok libut sa linaw.

Unsa nga matang sa mga tawo ang nanagpundok sa tuburan sa Betsata? (Ipasabut nga ang mga pulong nga masakiton, buta, bakul, ug paralitiko sa [bersikulo 3] naghulagway sa mga tawo nga may balatian, dili kalakaw, o may kakulangan sa pipila ka paagi.)
Unsa man ang gihulat niining masakiton nga mga tawo? (Ipasabut nga tingali dunay tubod nga mag-agas usahay ngadto sa linaw ug hinungdan nga magbula ang tubig, nga tingali nakahatag og kahupayan niadtong mga tawo nga may mga balatian [tan-awa sa Bible Dictionary, “Bethesda”].)

Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

“Walay duda nga ang linaw sa Betsata usa ka mineral nga tubod nga ang tubig dunay makaayo nga elemento. Apan ang hunahuna nga usa ka anghel ang mikanaog ug mikutaw sa tubig, aron ang unang tawo nga makaubog niini mamaayo, usa ka patuo-tuo. Ang mga milagro sa pagpang-ayo wala mahitabo sa ingon niini nga paagi”, Doctrinal New Testament Commentary, 3 vols. (1965–73), 1:188.

Unsa ang gitudlo ni Elder McConkie mahitungod sa gituohan nga usa ka anghel ang naghimo sa tubig nga makaayo sa unang tawo nga makaubog niini?
Sa inyong hunahuna unsa ang talan-awon didto sa tuburan, nga dunay daghan kaayong tawo nga nanghinaot nga mamaayo pinaagi sa pag-una og ubog ngadto sa tubig?

Dapita ang pipila ka estudyante nga magpuli-puli sa pagbasa og kusog sa Juan 5:5–7 . Hangyoa ang klase sa pagsunod, nga mangita kon si kinsa ang nakita sa Manluluwas nga naghigda duol sa tubod.

I-display ang litrato nga Si Kristo Nag-ayo sa Masakiton didto sa Betsata (Libro sa mga Hulagway sa Ebanghelyo [2009], nu. 42; tan-awa usab sa LDS.org).

Sa unsang paagi kini nga mga bersikulo naghulagway sa tawo nga nakita ni Jesus?

Dapita ang mga estudyante sa pagbasa og hilum sa Juan 5:8–9, nga mangita sa tubag sa Manluluwas ngadto sa tawo. Hangyoa sila sa pagreport unsay ilang nakit-an. Dapita sila nga ikonsiderar ang pagmarka sa mga pulong nga “ang tawo diha-diha naayo” (bersikulo 9).

Isulat sa pisara ang pulong nga Betsata. Ipasabut nga ang Betsata mahimong hubaron nga “balay sa kalooy” (Bible Dictionary, “Bethesda”). Isulat sa pisara kini nga depinisyon tapad sa Betsata. Ipasabut nga ang kalooy mao ang kamanggiloy-on o kamabination. Ang pinakadakong buhat sa kalooy nga sukad nahitabo mao ang Pag-ula ni Jesukristo.

Ngano nga ang Betsata usa ka tukma nga ngalan alang niini nga dapit, ilabi na human giayo sa Manluluwas kini nga tawo?
Sa unsa kaha nga mga paagi kitang tanan susama niining tawhana sa may tubod sa Betsata?
Unsa nga kamatuoran ang atong makat-unan gikan sa pag-ayo sa Manluluwas niining tawhana? (Bisan og lahi ang masulti sa mga estudyante, siguroha ang pagpasabut nga pinaagi sa gahum ug sa kalooy ni Jesukristo, kita mamaayo.)

Aron matabangan ang mga estudyante nga makasabut niini nga kamatuoran, dapita ang usa ka estudyante sa pagbasa og kusog sa mosunod nga pamahayag ni Elder Merrill J. Bateman, kinsa mihatag niini nga ideya samtang nagserbisyo isip Presiding Bishop. Hangyoa ang klase sa pagpaminaw sa mga pamaagi diin ang Manluluwas makahimo sa pag-ayo kanato:

“Sama nga ang bakul nga tawo sa may Tubod sa Betsata nagkinahanglan og tawo nga mas lig-on kay kaniya aron mamaayo (tan-awa sa Juan 5:1–9), kita usab mag-agad sa mga milagro sa pag-ula ni Kristo kon ang atong mga kalag kinahanglang mamaayo gikan sa kagul-anan, kasubo, ug kasal-anan. … Pinaagi kang Kristo, ang masulub-ong mga kasingkasing pagaayuhon ug ang kalinaw mopuli sa mga kabalaka ug kasub-anan” (“The Power to Heal from Within,” Ensign, Mayo 1995, 13).

Unsa ang pipila ka pamaagi nga kita mamaayo pinaagi sa kalooy gikan ni Jesukristo ug sa Iyang Pag-ula? (Mahimo nimong ipasabut nga kita mamaayo tingali dinhi sa yuta o sa sunod nga kinabuhi.)
Unsa ang angay natong buhaton aron makadawat sa kalooy ug pagkaayo pinaagi sa Pag-ula sa Manluluwas?

Hangyoa ang mga estudyante sa pagpamalandong og mga panahon dihang ilang nasaksihan o gibati nga ang gahum, kalooy, o kamanggiloy-on ni Jesukristo nakatabang nila o sa usa ka tawo nga mibati og kasagmuyo, sa espirituhanon man, pisikal, o emosyunal nga paagi. Isulat sa pisara ang mosunod nga dili kompleto nga pamahayag: Nahibalo ko nga ang Manluluwas manggiloy-on tungod kay …

Hangyoa ang mga estudyante sa pagkonsiderar kon unsaon nila sa pagkompleto kini nga pamahayag. Dapita ang pipila ka estudyante sa pagpakigbahin sa ilang mga tubag.

I-summarize ang Juan 5:10–16 pinaagi sa pagpasabut nga sa wala madugay nakit-an sa Manluluwas ang tawo didto sa templo ug gitambagan siya nga “ayaw na pagpakasala” (Juan 5:14). Dihang nahibaloan sa mga lider sa mga Judeo nga ang maong tawo giayo ni Jesus atol sa Igpapahulay, ilang gilutos ug gisulayan sa pagpatay ang Manluluwas.

Dapita ang usa ka estudyante sa pagbasa og kusog sa Juan 5:17–18 . Hangyoa ang klase sa pagsunod, nga mangita sa laing hinungdan sa pagkasuko sa mga lider sa mga Judeo kang Jesus.

Ipasabut nga sigun sa narekord sa bersikulo 17, gitudloan sa Manluluwas ang mga lider sa mga Judeo nga pinaagi sa pag-ayo sa maong tawo, naghimo Siya sa buluhaton sa Langitnong Amahan. Gitudlo dayon sa Manluluwas ang mahitungod sa Iyang relasyon sa Amahan.

Sumala sa bersikulo 18, unsa ang laing hinungdan nga ang mga lider sa mga Judeo nasuko kang Jesus? (Nagtuo sila nga si Jesus sad-an sa pagpasipala tungod kay miingon Siya nga ang Dios mao ang Iyang Amahan ug busa nangangkon nga pareha sa Dios.)

Isulat sa pisara ang mosunod nga pangutana: Unsa man ang gitudlo sa Manluluwas mahitungod sa Iyang relasyon ngadto sa atong Langitnong Amahan? Ipares-pares ang mga estudyante. Dapita ang matag pares nga dungan sa pagbasa og kusog sa Juan 5:19–22, 26–27, 30 . Dapita sila sa pagpangita sa mga tubag niini nga pangutana.

Human sa igo nga panahon, dapita ang mga estudyante sa pagreport sa unsay ilang nakit-an. I-summarize ang ilang mga tubag sa pangutana pinaagi sa pagsulat sa mosunod nga kamatuoran diha sa pisara: Sa tanan nga Iyang gihimo, si Jesukristo nagrepresentar sa Langitnong Amahan ug nagtinguha sa pagsunod sa Iyang kabubut-on. Ipasabut nga gidapit kita sa Manluluwas sa paghimo sa sama nga butang.

Nganong importante ang pagkasabut nga sa tanan nga Iyang gihimo, si Jesukristo mao ang hingpit nga representante sa atong Amahan sa Langit?

Juan 5:31–47

Gitudlo ni Jesus ang mahitungod sa daghang mga saksi nga nagpamatuod sa Iyang kabalaan

Pagdala sa klase og usa ka gamayng mani nga duna pay panit (ang gamayng bakalaw [pea pod] mahimo usab). Guniti ang mani aron dili kini makita sa mga estudyante. Ipasabut nga may gigunitan ka nga usa ka butang nga wala pa gayud makita sa tawhanong mata. Pangutan-a ang mga estudyante sa pag-isa sa ilang kamot kon sila mituo ba nimo. Pagdapit og usa ka estudyante kinsa wala makasiguro kon tinuod ba kini pinaagi sa pagpili og pipila sa iyang mga classmate nga motan-aw sa butang. Ipakita sa mga estudyante kini nga butang, ug dapita sila sa pagsulti ngadto sa klase kon nagsulti ka ba sa tinuod.

Sa unsang paagi malig-on ang katinuod sa bisan unsang pag-angkon kon adunay saksi nga sobra sa usa ka tawo?

Ipakita sa klase ang mani ug ipasabut kon sa unsang paagi nga ang sulod niini wala pa makita sa tawhanon nga mata.

Dapita ang usa ka estudyante sa pagbasa og kusog sa Juan 5:31 . Hangyoa ang klase sa pagsunod, nga mangita kon unsay gisulti sa Manluluwas mahitungod sa kaugalingon Niyang pagsaksi sa Iyang relasyon ngadto sa Langitnong Amahan. Hangyoa ang mga estudyante sa pagreport sa ilang nakit-an.

Ipasabut nga ang Joseph Smith Translation naghatag og katin-awan sa mga bersikulo 31 ug 32: “Kon ako mao ang magpanghimatuod mahitungod sa akong kaugalingon, ang akong panghimatuod maisip nga dili tinuod. Apan adunay lain nga nagapanghimatuod mahitungod kanako” (Joseph Smith Translation, John 5:32–33). Ipasabut nga ang Manluluwas nagtudlo sa mga Judeo nga sila dunay laing mga saksi agi og dugang sa Iyaha.

Isulat sa pisara ang mosunod nga mga scripture reference: Juan 5:32–35; Juan 5:36; Juan 5:37–38; Juan 5:39; Juan 5:45–47. I-assign ang matag reference ngadto sa usa o daghan pang mga estudyante. Hangyoa sila sa pagbasa niini nga mga bersikulo ug sa pagpangita sa laing mga saksi sa kabalaan ni Jesus. Tabangi ang mga estudyante sa paghimo og lista niini nga mga saksi pinaagi sa pagdapit nila nga isulat sa pisara ang ilang mga nakit-an tapad sa gi-assign nga mga reference.

Ipasabut nga bisan og dunay daghang mga misaksi bahin ni Jesukristo, ang mga lider sa mga Judeo wala motuo sa kabalaan ni Jesus. Ipasabut nga sa bersikulo 39 dihang si Jesus namulong bahin sa mga kasulatan miingon Siya, “Nga pinaagi niini makakaplag kamo sa kinabuhing dayon.”

Unsang sayop nga pagtuo ang gipasabut ni Jesus ngadto sa mga Judeo? (Ipasabut nga daghang mga Judeo sa kapanahunan ni Jesus mituo nga sa pagtuon lamang sa mga kasulatan mahimo na nilang maangkon ang kinabuhing dayon. Napakyas sila sa pagsabut nga ang katuyoan sa mga kasulatan mao ang paggiya nila ngadto kang Jesukristo. Miingon Siya, sa tukmang paagi “Nagtuo kamo nga maangkon ninyo ang kinabuhing dayon, apan siksika ang mga kasulatan, kay kini nagpamatuod kanako.”)

Dapita ang usa ka estudyante sa pagbasa og kusog sa Juan 5:40 . Hangyoa ang klase sa pagsunod, nga mangita kon unsay gikinahanglan sa mga Judeo aron makaangkon og kinabuhing dayon.

Bisan og ang mga Judeo nagtuon sa mga kasulatan, unsa man ang wala nila mabuhat nga makatabang unta nila nga mo-qualify para makadawat og kinabuhing dayon?
Sumala sa mga pagtulun-an sa Manluluwas diha sa mga bersikulo 39 ug 40, unsay angay natong buhaton aron makaangkon og kinabuhing dayon? (Tabangi ang mga estudyante nga mahibaloan ang baruganan nga susama sa mosunod: Sa pagduol lamang kang Jesukristo kita makaangkon og kinabuhing dayon. Isulat sa pisara kini nga baruganan.)

Pahinumdumi ang mga estudyante nga ang kinabuhing dayon naglakip sa pagkahimong sama sa Langitnong Amahan ug pagpuyo sa hangtud kauban ang atong takus nga mga sakop sa pamilya didto sa Iyang presensya.

Unsa man ang buot ipasabut sa pagduol ngadto kang Jesukristo? (Ang pagduol ngadto kang Jesukristo mao ang paggamit sa pagtuo diha Kaniya, paghinulsol sa atong mga sala, ug pagsunod sa Iyang mga sugo.)
Ngano nga ang pagduol ngadto kang Jesukristo mahinungdanon para sa pagkadawat og kinabuhing dayon?

Dapita ang mga estudyante sa paghunahuna sa mga paagi diin ang mga saksi nga nakalista sa pisara makatabang sa usa ka tawo nga moduol ngadto sa Manluluwas?

Kanus-a kining usa sa mga saksi ni Jesukristo nakatabang ninyo nga moduol ngadto Kaniya?

Hangyoa ang mga estudyante sa pagpamalandong kon unsay ilang buhaton nga mas hingpit silang makaduol sa Manluluwas aron makadawat sila og kinabuhing dayon.

Tapusa pinaagi sa pagpamatuod sa mga kamatuoran nga gitudlo sa Juan 5.

Komentaryo ug Background nga Impormasyon

Juan 5:17–47. “Ang akong Amahan nagpadayon sa pagbuhat bisan pa hangtud karon, ug Ako nagabuhat sa ingon”

Sumala ni Elder James E. Talmage sa Korum sa Napulog Duha ka mga Apostoles, ang tubag sa Manluluwas ngadto sa mga lider sa mga Judeo nga narekord sa Juan 5:17–47 “nagbarug nga maoy pinakakompleto nga sermon diha sa kasulatan sa mahinungdanong hilisgutan bahin sa relasyon tali sa Mahangturong Amahan ug sa Iyang Anak, si Jesukristo” (Jesus the Christ, 3rd ed. [1916], 208).

Sa usa ka doktrinal nga pamahayag nga gipetsahan og Hunyo 30, 1916, ang Unang Kapangulohan ug ang Korum sa Napulog Duha ka mga Apostoles mitudlo:

“Si Jesukristo namulong ug nangalagad ug pinaagi sa ngalan sa Amahan; ug kon hisgutan ang gahum, awtoridad, ug pagkadios ang Iyang mga pulong ug buhat mao kadto ug mao usab sa Amahan” (“The Father and the Son: A Doctrinal Exposition by the First Presidency and the Quorum of the Twelve Apostles,” Ensign, Abr. 2002, 17).

Juan 5:29. Ang Pagkabanhaw sa tawo

Samtang namalandong sa Juan 5:29, si Propeta Joseph Smith ug Sidney Rigdon nakadawat og panan-awon nga narekord sa Doktrina ug mga Pakigsaad 76. Kini nga panan-awon naghatag og dugang nga panabut mahitungod sa Pagkabanhaw ug sa plano sa kaluwasan (tan-awa sa D&P 76:11–19).

Juan 5:39. “[Susiha ang] mga kasulatan; … pinaagi niini makakaplag kamo sa kinabuhing dayon”

Si Elder D. Todd Christofferson sa Korum sa Napulog Duha ka mga Apostoles mitudlo:

“Sa katapusan, ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo—hugot nga pagtuo nga Sila anaa; hugot nga pagtuo nga ang plano sa Amahan alang sa atong pagka-imortal ug kinabuhi nga dayon; hugot nga pagtuo sa Pag-ula ug Pagkabanhaw ni Jesukristo, nga mipalihok niining plano sa kalipay; hugot nga pagtuo sa paghimo sa ebanghelyo ni Jesukristo nga atong pamaagi sa kinabuhi; ug hugot nga pagtuo nga makaila ‘sa bugtong tinuod nga Dios, ug kang Jesukristo, nga [Iyang] pinadala’ (Juan 17:3)” (“Ang Panalangin sa Kasulatan,” Ensign o Liahona, Mayo 2010, 34).