Leksyon 12: Mateo 7

Leksyon 12

Mateo 7

Pasiuna

Gipadayon ni Jesukristo ang Iyang Wali Ibabaw sa Bungtod [Wali sa Bukid] pinaagi sa pagtudlo sa Iyang mga disipulo sa paghukom sa matarung nga paagi. Nagtudlo usab Siya mahitungod sa pagdawat og personal nga pagpadayag ug sa pagbuhat sa kabubut-on sa Langitnong Amahan.

Mga Sugyot alang sa Pagtudlo

Mateo 7:1–5

Isip kabahin sa Wali sa Bukid, nagtudlo si Jesukristo sa Iyang mga disipulo mahitungod sa paghukom sa matarung nga paagi

Sa dili pa magsugod ang klase, isulat sa pisara ang mosunod nga pangutana: Kinahanglan ba kitang mohukom sa uban o dili? Sa pagsugod sa klase, ipatubag sa mga estudyante ang pangutana.

Ipakita ang hulagway sa Ang Wali sa Bukid (Libro sa mga Hulagway sa Ebanghelyo [2009], nu. 39; tan-awa usab sa LDS.org). Ipasabut nga samtang nagpadayon si Jesukristo sa Iyang Wali sa Bukid, gitudloan Niya ang Iyang mga disipulo mahitungod sa paghukom.

Dapita ang usa ka estudyante sa pagbasa og kusog sa Mateo 7:1. Hangyoa ang klase sa pagsunod, nga mangita kon unsay gitudlo sa Manluluwas mahitungod sa paghukom. Ipasabut nga ang bersikulo 1 kasagaran masaypan sa pagsabut nga nangahulugan nga kinahanglan dili gayud kita mohukom. Hangyoa ang usa ka estudyante nga basahon ang Hubad ni Joseph Smith sa Mateo 7:1–2, “Karon mao kini ang mga pulong nga gitudlo ni Jesus sa iyang mga disipulo nga kinahanglan nilang isulti sa mga tawo. Ayaw kamo pagpanghukom sa uban sa dili matarung nga paagi, aron dili kamo pagahukman; apan paghukom sa matarung nga paghukom.”

Unsa ang gitudlo sa Manluluwas mahitungod sa paghukom?
Unsa man sa inyong hunahuna ang gipasabut sa paghukom sa matarung nga paagi?

Dapita ang usa ka estudyante sa pagbasa og kusog sa Mateo 7:2. Hangyoa ang klase sa pagsunod, nga mangita kon unsay mahitabo kanato basi sa paagi sa atong paghukom sa uban. Dapita ang mga estudyante sa pagreport kon unsay ilang nakit-an.

Unsay mahitabo kon kita mohukom sa uban sa matarung nga paagi? (Human makatubag ang mga estudyante, tabangi sila nga mahibalo sa mosunod nga baruganan: Kon kita mohukom sa uban sa matarung nga paagi, ang Dios mopadangat sa samang kalooy ug kaangayan ngari kanato.)

Kon mahimo, iapud-apod ang mga kopya sa mosunod nga pamahayag gikan sa Matinud-anon sa Tinuhoan ngadto sa matag estudyante. Dapita ang usa ka estudyante sa pagbasa niini og kusog. Hangyoa ang katunga sa klase sa pagsunod, nga mangita sa mga matang sa paghukom nga atong kinahanglan ug dili kinahanglang buhaton. Hangyoa ang laing katunga sa klase sa pagpangita kon unsaon nato sa paghukom sa uban sa matarung nga paagi.

Manwal sa Seminary Teacher sa Bag-ong Tugon—Leksyon 12

“Usahay ang mga tawo mobati nga sayop ang paghukom sa uban sa bisan unsang paagi. Samtang tinuod kini nga kinahanglang dili ka mopanghimaraut sa uban o mohukom kanila sa dili matarung nga paagi, kinahanglan ka nga mohimo og mga paghukom kabahin sa mga ideya, mga sitwasyon, ug mga tawo sa tibuok nimong kinabuhi. …

“Ang paghukom usa ka importante nga gamit sa imong kabubut-on ug nagkinahanglan og labihan nga pag-amping, ilabi na kon maghimo ka og mga paghukom kalabut sa ubang mga tawo. Ang tanan nimong mga paghukom kinahanglang giniyahan sa matarung nga mga sumbanan. Hinumdumi nga ang Dios lamang, kinsa nasayud sa matag kasingkasing sa indibidwal, ang makahimo og katapusang mga paghukom sa mga indibidwal (tan-awa sa Pinadayag 20:12; 3 Nephi 27:14; D&P 137:9). …

“… Kutob sa imong mahimo, hukmi ang mga kahimtang sa mga tawo kay sa maghukom sa mga tawo mismo. Kon posible, likayi ang paghimo og mga paghukom hangtud nga makabaton ka og igo nga kahibalo sa mga panghitabo. Kanunay nga magmahimong sensitibo ngadto sa Balaang Espiritu, kinsa makagiya sa imong mga desisyon” (Matinud-anon sa Tinuhoan: Usa ka Pakisayran sa Ebanghelyo [2004], 134–35).

Unsa nga mga matang sa mga paghukom ang kinahanglan natong himoon?
Unsaon nato sa paghukom sa matarung nga paagi?

I-display ang usa ka gamayng tipak sa kahoy ug taas, baga nga kahoy. Ipasabut nga samtang ang Manluluwas nagtudlo sa Iyang mga disipulo mahitungod sa paghukom, Iyang gitudlo ang usa ka gamayng tipak sa kahoy isip usa ka puling ug ang dakong kahoy isip usa ka troso. Dapita ang usa ka estudyante sa pagbasa og kusog sa Mateo 7:3, ug hangyoa ang klase sa pagpangita kon unsay gitudlo sa Manluluwas mahitungod sa paghukom sa uban.

Unsa kahay girepresentar sa puling ug sa troso diha sa analohiya sa Manluluwas?
Unsaon man ninyo sa pagpahayag og usab sa pagtulun-an sa Manluluwas diha sa bersikulo 3?

Pagdapit og duha ka estudyante sa pagduol sa atubangan sa klase. Sultihi ang usa ka estudyante sa pagkupot sa dakong kahoy ibabaw sa iyang mata. Pangutan-a ang ikaduhang estudyante:

Ganahan ba mo nga ang inyong classmate nga dunay dakong kahoy ang maoy motangtang sa tipak nga kahoy gikan sa inyong mata? Nganong dili man?

Pangutan-a ang estudyante nga dunay dakong kahoy:

Unsay angayan ninyong buhaton aron makakita og klaro aron igong makatangtang sa tipak sa kahoy gikan sa mata sa inyong classmate?

Ipabasa og kusog sa usa ka estudyante nga dunay dakong kahoy ang mosunod nga pamahayag ni Presidente Dieter F. Uchtdorf sa Unang Kapangulohan:

“Kini nga istorya kabahin sa mga troso ug mga puling ingon og konektado kaayo sa dili nato klaro nga pagtan-aw sa atong kaugalingon. Dili ko sigurado nganong maayo kaayo kitang mamantay ug mosugyot og mga solusyon sa mga sayop sa ubang tawo, samtang kasagaran maglisud kita sa pagkakita sa kaugalingon natong mga sayop” (“Ako ba, Ginoo?” Ensign o Liahona, Nob. 2014, 56).

Palingkura ang duha ka estudyante. Hangyoa ang usa ka estudyante sa pagbasa og kusog sa Mateo 7:4–5, ug hangyoa ang klase sa pagpangita kon kang kinsa nga sayop ang gitudlo sa Manluluwas nga angayan natong kabalak-an.

Kinahanglan ba nga ang atong kabalak-an ug pagkorihir magtutok sa mga sayop sa uban o sa atong kaugalingon? Ngano man?
Unsa nga baruganan ang atong makat-unan gikan niini nga mga bersikulo nga makatabang kanato nga malikayan ang paghukom sa uban sa dili matarung nga paagi? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga baruganan: Kon tutukan nato ang pagtangtang sa atong kaugalingong mga sala ug mga kahuyang, nan mas makalikay kita sa paghukom sa uban sa dili matarung nga paagi.)
Sa unsang paagi nga kini nga baruganan makatabang kanato kon makakita kita og sayop sa laing tawo?

Mahimo nimong hatagan ang mga estudyante og gagmayng piraso sa kahoy aron mapahinumduman sila mahitungod niini nga baruganan. Dapita ang mga estudyante sa pagpamalandong sa mga sala o mga kahuyang nga ilang matangtang sa ilang kaugalingong kinabuhi. Awhaga sila nga mangayo og panabang sa Ginoo sa pagtangtang sa ilang kaugalingong mga sayop imbis nga mohukom sa uban sa dili matarung nga paagi.

Mateo 7:6–14

Ang Manluluwas nagtudlo mahitungod sa pagtinguha og personal nga pagpadayag

I-summarize ang Mateo 7:6 pinaagi sa pagpasabut nga ang Joseph Smith Translation niini nga bersikulo makatabang kanato nga masabtan nga gitawag ni Jesukristo ang Iyang mga disipulo nga moadto sa kalibutan aron mosangyaw. Kinahanglan nilang itudlo ang paghinulsol apan ipabilin diha kanila ang mga misteryo sa gingharian. Sa ato pa, dili nila hisgutan ang sagrado nga mga hilisgutan ngadto sa mga tawo nga dili andam nga modawat niini. (Tan-awa sa Joseph Smith Translation, Mateo 7:9–11.

Ipasabut nga sumala sa Joseph Smith Translation, ang Mateo 7:7 nagsugod sa mga pulong nga “Sulti ngadto kanila, Pangayo sa Dios.” Dapita ang usa ka estudyante sa pagbasa og kusog sa bersikulo 7, nga magsugod niini nga mga pulong. Hangyoa ang klase sa pagsunod, nga mangita kon unsay gisulti sa Manluluwas ngadto sa Iyang mga disipulo nga ilang itudlo.

Unsa may ipasulti sa mga disipulo ngadto sa mga tawo nga gustong makadawat og kahibalo gikan sa Dios?
Unsa nga baruganan ang atong makat-unan gikan sa bersikulo 7 mahitungod kon sa unsang paagi nga atong masabtan ang sagrado nga kahibalo gikan sa Dios? (Human makatubag ang mga estudyante, tabangi sila nga mahibalo sa mosunod nga baruganan: Samtang kita mangayo, mangita, ug manuktok diha sa atong pagsiksik sa kamatuoran, ang Langitnong Amahan motubag ug mopanalangin kanato pinaagi sa personal nga pagpadayag.)
Unsa may gipasabut sa mga pulong nga mangayo, mangita, ug manuktok nga kinahanglan natong buhaton aron makadawat og personal nga pagpadayag?

Dapita ang pipila ka mga estudyante sa pagpakigbahin og usa ka higayon sa dihang ang ilang pagpangayo, pagpangita, ug pagpanuktok nakadapit og personal nga pagpadayag.

I-summarize ang Mateo 7:9–11 pinaagi sa pagpasabut nga ang Manluluwas nagtudlo nga ingon nga ang usa ka mahigugmaong amahan dili mohatag og bato o bitin kon ang iyang anak mangayo og pan o isda, ang Langitnong Amahan dili mohikaw sa gasa sa personal nga pagpadayag ngadto sa Iyang mga anak nga mangayo niini.

Awhaga ang mga estudyante sa pagpakita og hugot nga pagtuo pinaagi sa pagpangayo, pagpangita, ug pagpanuktok aron sa pagdapit og personal nga pagpadayag ug panabut mahitungod sa ebanghelyo. Ipamatuod nga kon ila kining buhaton diha sa hugot nga pagtuo ug pagpailub, ang Langitnong Amahan motubag.

Dapita ang usa ka estudyante sa pagbasa og kusog sa Mateo 7:12–14. Hangyoa ang mga estudyante sa pagsunod, nga mangita sa dugang nga mga kamatuoran nga gisulti sa Manluluwas ngadto sa Iyang mga disipulo nga ilang itudlo. Dapita ang mga estudyante sa pagreport kon unsay ilang nakit-an.

Mateo 7:15–27

Ang Ginoo misaad og kaluwasan niadtong mobuhat sa kabubut-on sa Amahan.

Hangyoa ang mga estudyante sa paglista diha sa pisara sa pipila ka mga ideya nga kasagarang gidawat sa kalibutan apan sukwahi sa plano sa Langitnong Amahan.

Nganong importante man nga makaila kon ang usa ka indibidwal o grupo nagpasiugda og ideya nga sukwahi sa plano sa Langitnong Amahan?

Dapita ang usa ka estudyante sa pagbasa og kusog sa Mateo 7:15. Dayon ipangutana:

Unsa ang gipasidaan sa Ginoo ngadto sa mga disipulo? Unsay Iyang gisulti bahin sa paagi sa pagtakuban niining mini nga mga propeta?

Ipasabut nga si Elder M. Russell Ballard sa Korum sa Napulog Duha ka mga Apostoles mipasidaan mahitungod sa mini nga mga propeta sa atong panahon nga naglakip sa “parehong mga lalaki ug babaye, kinsa nagtudlo sa ilang kaugalingon nga mamamahayag sa mga doktrina sa Simbahan” ingon man usab “niadtong mamulong ug momantala batok sa tinuod nga mga propeta sa Dios ug aktibong mangabig sa uban pinaagi sa pagbaliwala sa mahangturong kaayohan niadtong ilang giagni” (“Beware of False Prophets and False Teachers,” Ensign, Nob. 1999, 63).

Dapita ang usa ka estudyante sa pagbasa og kusog sa Mateo 7:16–20. Hangyoa ang mga estudyante sa pagsunod, nga mangita og usa ka paagi nga atong maila kon ang tawo usa ba ka mini nga propeta o mini nga magtutudlo.

Unsa man ang usa ka paagi nga atong maila kon ang tawo usa ba ka mini nga propeta o mini nga magtutudlo? (Human makatubag ang mga estudyante, isulat sa pisara ang mosunod nga kamatuoran: Atong maila ang mini nga mga propeta pinaagi sa ilang mga bunga.)

Ipakita sa mga estudyante ang duha ka matang sa prutas. Pangutan-a ang mga estudyante kon unsa nga matang sa mga tanum ang namunga sa matag prutas. Ipasabut nga sama sa pag-ila sa mga tanum pinaagi sa mga bunga niini, makaila kita sa mini nga mga propeta ug mini nga mga magtutudlo pinaagi sa ilang mga pagtulun-an, mga lihok, ug mga ideya.

Basi niini nga kamatuoran, unsaon nato pagkaila sa mga indibidwal ug mga grupo nga kinahanglan natong likayan?
Unsay kalabutan sa lista sa mga ideya diha sa pisara ngadto niini nga kamatuoran?

I-summarize ang Mateo 7:21–23 pinaagi sa pagpasabut nga dili tanan nga nagpahayag og pagtuo ni Jesukristo makasulod sa Iyang gingharian, apan kadtong nagbuhat sa kabubut-on sa Langitnong Amahan ug nakaila Kaniya ang makasulod sa gingharian sa langit.

I-display ang usa ka bato ug bandeha [tray] sa balas. Pangutan-a ang mga estudyante kon gusto ba nilang tukuron ang ilang balay ibabaw sa bato o ibabaw sa balas. Dapita sila sa pagpasabut kon ngano.

Hangyoa ang usa ka estudyante sa pagbasa og kusog sa Mateo 7:24–27.

Sumala sa bersikulo 24, unsa nga mga lihok ang giingon sa Manluluwas nga makapahimo sa usa ka tawo nga sama sa maalamon nga tawo nga nagtukod ibabaw sa bato?
Sumala sa bersikulo 26, unsa nga mga lihok ang giingon sa Manluluwas nga makapahimo sa usa ka tawo nga sama sa buang-boang nga tawo nga nagtukod ibabaw sa balas?
Sa inyong hunahuna unsa man ang girepresentar sa ulan, baha, ug hangin diha niini nga mga analohiya (tan-awa sa bersikulo 27; tan-awa usab sa Helaman 5:12)?
Unsa nga mga baruganan kalabut sa pagtuman sa mga pagtulun-an sa Ginoo ang atong makat-unan gikan niini nga mga analohiya? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga mga baruganan: Kon kita maminaw ug mobuhat sa mga pagtulun-an sa Ginoo, Siya molig-on kanato aron makalahutay sa atong mga pagsulay. Kon kita maminaw sa mga pagtulun-an sa Ginoo apan dili motuman niini, nan dili kita makabaton sa suporta nga atong gikinahanglan kon moabut na ang mga pagsulay.)

Dapita ang mga estudyante sa paghunahuna sa unsay gitudlo sa Ginoo diha sa Wali sa Bukid (tan-awa sa Mateo 5–7). Dapita sila nga mahimong sama sa maalamon nga tawo pinaagi sa pagdesisyon nga mobuhat diha sa mga baruganan nga gitudlo sa Manluluwas. Mahimo nimong hatagan og panahon ang mga estudyante sa pagsulat kon unsaon nila paggamit ang usa o dugang pa sa mga baruganan gikan niini nga leksyon o sa miaging tulo ka mga leksyon.

Komentaryo ug Background nga Impormasyon

Mateo 7:1–2. Paghimo og matarung nga mga paghukom

Si Elder Dallin H. Oaks sa Korum sa Napulog Duha ka mga Apostoles nagtudlo mahitungod sa mga baruganan nga makatabang kanato sa paghimo og matarung nga mga paghukom imbis nga katapusang mga paghukom:

“Dunay duha ka matang sa paghukom: katapusang mga paghukom, nga gidili nga atong himoon, ug ang intermediate nga mga paghukom, nga gimando nga atong himoon, apan diha sa matarung nga mga baruganan. …

“… Nganong gimando man sa Manluluwas nga dili kita mohukom og katapusang mga paghukom? Nagtuo ko nga kini nga sugo gihatag tungod kay maghunahuna man kita sa paghimo og katapusang mga paghukom sa higayon nga mamahayag kita nga ang usa ka tawo ma-impyerno (o malangit) tungod sa piho nga buhat o sa piho nga panahon. …

“Kitang tanan maghimo og mga paghukom sa pagpili sa atong mga higala, sa pagpili kon unsaon nato paggahin ang atong panahon ug ang atong kwarta, ug, siyempre, sa pagpili og mahangturong kauban. Ang pipila niining intermediate nga mga paghukom sigurado nga apil niadtong gipasabut sa Manluluwas sa dihang Siya nagtudlo nga ‘ang labi pang hinungdanong mga butang sa kasugoan’ naglakip sa paghukom (Mat. 23:23). …

“Sa intermediate nga mga paghukom nga kinahanglan natong himoon, kinahanglang mag-amping kita sa paghukom sa matarung nga paagi. Kinahanglan natong tinguhaon ang giya sa Espiritu diha sa atong mga desisyon. Kinahanglan natong limitahan ang atong mga paghukom diha sa atong kaugalingong katungdanan. Kon mahimo kinahanglan natong likayan ang paghukom sa mga tawo hangtud nga makabaton kita og igo nga kahibalo sa mga panghitabo. Kutob sa mahimo, kinahanglan mohukom kita sa mga kahimtang imbis nga sa mga tawo. Ang tanan natong mga paghukom kinahanglan gamiton nato ang matarung nga mga sumbanan. Ug, niining tanan kinahanglan gayud natong hinumduman ang sugo nga mopasaylo” (“‘Judge Not’ and Judging,” Ensign, Ago. 1999, 7, 9, 13).

Mateo 7:15–20. “Kinahanglan magbantay kamo sa mga mini nga propeta, nga moanha kaninyo nga managsaput sa pagka-karnero”

Si Elder M. Russell Ballard sa Korum sa Napulog Duha ka mga Apostoles namahayag:

“Kon maghunahuna kita sa mini nga mga propeta ug mini nga mga magtutudlo, malagmit maghunahuna kita niadtong mituo sa klaro kaayo nga sayop nga doktrina o naghunahuna nga dunay awtoridad sa pagtudlo sa tinuod nga ebanghelyo ni Kristo sumala sa ilang kaugalingong interpretasyon. Kanunay kitang maghunahuna nga kanang maong mga indibidwal dunay kalambigitan sa gagmayng radikal nga mga grupo nga kasagaran wala dawata sa katilingban. Hinoon, akong balikon: dunay mini nga mga propeta ug mini nga mga magtutudlo kinsa nangangkon nga miyembro sa Simbahan. Anaa kadtong kinsa, bisan walay awtoridad, nangangkon nga gisuportahan sa Simbahan ang ilang mga produkto ug mga ginabuhat. Pagbantay sa maong mga tawo. …

“… Pagbantay niadtong mamulong ug momantala batok sa tinuod nga mga propeta sa Dios ug aktibong mangabig sa uban pinaagi sa pagbaliwala sa mahangturong kaayohan niadtong ilang giagni” (“Beware of False Prophets and False Teachers,” Ensign, Nob. 1999, 62–63).