Pinadayag 12–22 (Unit 32)

Materyal sa Pagpangandam alang sa Magtutudlo sa Home-Study

Summary sa mga Leksyon sa Daily Home-Study

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante dihang gitun-an nila ang Pinadayag 12–22 (unit 32) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.

Day 1 (Pinadayag 12–13)

Samtang gitun-an sa mga estudyante ang panan-awon ni Juan mahitungod sa dragon ug sa babaye nga dunay anak, ilang nakat-unan nga si Satanas, nga girepresentar sa dragon, nagtinguha sa pagdaot sa Simbahan ug sa gingharian sa Langitnong Amahan ug ni Jesukristo. Nagsugod kini nga gubat sa kinabuhi sa wala pa dinhi sa yuta. Nakat-unan sa mga estudyante nga atong mabuntog ang mga impluwensya ni Satanas pinaagi sa Pag-ula sa Manluluwas ug pinaagi sa pagpabiling matinuoron sa atong mga pagpamatuod sa ebanghelyo.

Day 2 (Pinadayag 14–16)

Gikan sa panan-awon ni Juan sa pagkakita niya sa anghel nga mibalik sa yuta niining ulahing mga adlaw, nakat-unan sa mga estudyante nga ang usa ka rason nga gipahiuli sa Dios ang ebanghelyo ni Jesukristo mao ang pag-andam sa mga lumulupyo sa kalibutan sa Ikaduhang Pag-anhi ni Jesukristo. Nakat-unan sab nila ang mosunod: Kon magpakabuhi kitang matarung, niana mapanalanginan kita sa atong mga buhat ug makapahulay gikan sa atong mga kahago human kita mamatay. Kon kita mabinantayon ug espirituhanong andam, niana maandam kita alang sa Ikaduhang Pag-anhi ni Jesukristo.

Day 3 (Pinadayag 17–19)

Nakat-unan sa mga estudyante nga sa katapusang mga adlaw, buntugon ni Jesukristo ang kadautan sa kalibutan. Ila usab nga nakat-unan nga ang pagpalayo sa atong kaugalingon gikan sa kadautan sa kalibutan makatabang nato nga makalikay sa sala ug sa mga paghukom nga moabut sa mga dautan sa katapusang mga adlaw. Samtang gikumpara sa mga estudyante ang kaminyoon ngadto sa Ikaduhang Pag-anhi, ilang nakat-unan nga kon limpyo kita ug matarung, niana maandam kita alang sa pag-anhi sa Ginoo nga si Jesukristo.

Day 4 (Pinadayag 20–22)

Gikan sa hinapos nga mga kapitulo sa panan-awon ni Juan, nakat-unan sa mga estudyante ang mosunod nga mga kamatuoran: nga hukman kita sa Dios gikan sa mga basahon nga nasulat sumala sa atong mga binuhatan. Ang Dios makig-uban ug mohupay sa Iyang mga katawhan, ug dili na sila makasinati pa og kamatayon, kasubo, o kasakit. Kon tumanon nato ang mga sugo sa Ginoo, niana makadawat kita sa tanang panalangin sa Pag-ula ni Jesukristo ug makasulod sa celestial nga gingharian.

Pasiuna

Nakita ni Apostol Juan sa panan-awon ang mga panghitabo nga mahitabo diha gayud sa dili pa ug atol sa milenyal nga paghari ni Jesukristo. Nasaksihan sab niya ang katapusang gubat tali ni Satanas ug sa mga pwersa sa Dios dapit sa katapusan sa Milenyum ug nakita ang Katapusang Paghukom, diin sa maong panahon hukman sa Dios ang tanan base sa nahisulat sa mga basahon.

Mga Sugyot alang sa Pagtudlo

Pinadayag 20:1–6

Nakita ni Juan sa panan-awon kon unsay mahitabo diha dayon sa dili pa ug atol sa milenyal nga paghari ni Jesukristo

Hangyoa ang mga estudyante sa paghunahuna og usa ka kontest o kompetisyon (sama sa artistik o atletik nga kalihokan) nga ilang giapilan bisan og nagtuo sila nga mapildi ra sila. Dayon pahunahunaa sila og usa ka panahon nga miapil sila og usa ka kontest o kompetisyon nga nagtuo sila nga modaog sila.

Sa unsang paagiha kaha nga ang inyong mga gilauman mahitungod sa resulta sa kontest o kompetisyon makausab sa paagi sa inyong paghimo niini?
Ngano kaha ang mga tawo moundang man kon magtuo sila nga mapildi na sila? Kanus-a ang panahon nga nagtuo mong mapildi na mo ug sa aktwal midaog?

Ipasabut sa mga estudyante nga samtang magtuon sila sa Pinadayag 20 makakat-on sila og dugang mahitungod sa gubat tali sa maayo ug dautan ug sa katapusang resulta sa gubat. Dapita sila sa pagpangita og mga kamatuoran samtang magtuon sila sa Pinadayag 20 nga makahatag nila og kadasig sa pagpabiling matinud-anon sa Manluluwas atol niini nga gubat.

Dapita ang usa ka estudyante sa pagbasa og kusog sa Pinadayag 20:1–3. Hangyoa ang klase sa pagsunod, nga mangita kon unsay mahitabo ni Satanas atol sa Milenyum.

Unsay mahitabo ni Satanas atol sa Milenyum?
Sumala sa bersikulo 3, unsay dili mahimo ni Satanas tungod kay ginapos siya?

Dapita ang usa ka estudyante sa pagbasa og kusog sa Pinadayag 20:4–6. Hangyoa ang klase sa pagsunod, nga mangita kon kinsay nakita ni Juan nga gihukman.

Sumala sa bersikulo 4, kinsa man ang nakita ni Juan nga gihukman?
Unsa nga ganti ang nadawat niining mga tawhana tungod sa ilang kamatinud-anon?
Unsa man ang ilang maapilan atol sa Milenyum? (Ang Unang Pagkabanhaw.)
Unsa nga baruganan ang atong makat-unan gikan sa Pinadayag 20:4–6 mahitungod sa mga panalangin nga atong madawat kon nagmatinud-anon kita kang Jesukristo? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang usa ka baruganan nga susama sa mosunod: Kon magmatinud-anon kita kang Jesukristo, maapil kita sa Unang Pagkabanhaw ug maghari uban ni Kristo atol sa Milenyum.)

Ipasabut nga ang Unang Pagkabanhaw nagsugod sa Pagkabanhaw ni Jesukristo ug naglakip sa mga matarung nga nangamatay sa wala pa ang Pagkabanhaw ni Kristo (tan-awa sa Mosiah 15:21–25; Alma 40:16–20). Ang kadaghanan sa mga matarung nga nangamatay human sa Pagkabanhaw ni Kristo mabanhaw agig sumpay sa Ikaduhang Pag-anhi ni Jesukristo (tan-awa sa Bruce R. McConkie, Mormon Doctrine, 2nd ed. [1966], 639; James E. Talmage, The Articles of Faith, 12th ed. [1924], 385). Kadtong mobangon sa Unang Pagkabanhaw naglakip sa “tanang propeta, ug ang tanan nga mituo sa ilang mga pulong” (Mosiah 15:22), kadtong nangamatay nga walay alamag nga wala “masangyaw kanila ang kaluwasan” (Mosiah 15:24; tan-awa usab sa D&P 45:54), ug ang gagmayng mga bata kinsa namatay sa wala pa silay mga tulubagon (tan-awa sa Mosiah 15:25; Moroni 8:4–24). Ang mga dautan ug ang wala maghinulsol dili mabanhaw hangtud sa Ikaduhang Pagkabanhaw, nga mahitabo sa katapusan sa Milenyum (tan-awa sa D&P 76:85).

Sa unsang paagi ang pagkahibalo nga kamo maapil sa Unang Pagkabanhaw ug maghari kauban ni Jesukristo atol sa Milenyum makatabang ninyo nga magmatinud-anon sa gubat batok sa dautan karon?

Ipamatuod nga kadtong magpabiling matinud-anon mahimong kabahin sa Unang Pagkabanhaw ug maghari kauban sa Manluluwas atol sa Milenyum.

Pinadayag 20:7–11

Nakita ni Juan ang katapusang gubat tali ni Satanas ug sa mga pwersa sa Dios sa katapusan sa Milenyum

Isulat sa pisara ang mosunod nga dili kompleto nga pamahayag: Sa katapusan sa Milenyum …

Dapita ang usa ka estudyante sa pagbasa og kusog sa Pinadayag 20:7–10. Hangyoa ang klase sa pagsunod, nga mangita sa mga panghitabo nga gihulagway ni Juan nga mahitabo sa katapusan sa Milenyum.

Dapita ang pipila ka mga estudyante sa pag-adto sa pisara ug pagsulat unsay ilang nakit-an. Dayon ipangutana ang mosunod nga mga pangutana:

Unsa nga mga hitabo ang gihulagway ni Juan? (Ipasabut nga ang mga ngalan nga Gog ug Magog sa bersikulo 8 nagpasabut sa mga pwersa nga gamiton ni Satanas sa katapusan sa Milenyum sa pakiggubat sa katapusang higayon batok sa mga katawhan sa Ginoo [tan-awa sa D&P 88:110–114].)
Human niini nga gubat, unsay mahitabo sa yawa ug sa iyang mga sumusunod? (Human makatubag ang mga estudyante, kompletuha ang pamahayag diha sa pisara aron mabasa kini nga sama sa mosunod: Sa katapusan sa Milenyum, ang mga pwersa sa Dios mopildi ni Satanas ug sa iyang mga sumusunod.)
Nganong importante man nga masabtan nato ang katapusang resulta sa gubat tali sa Dios ug ni Satanas?

Pinadayag 20:12–15

Nakita ni Juan ang Katapusang Paghukom

Ipasabut nga isip kabahin sa plano sa Langitnong Amahan alang sa kaluwasan, ang matag tawo nga nakapuyo sa kalibutan mobarug atubangan sa Dios aron mahukman. Hangyoa ang mga estudyante sa paghunahuna kon unsa kaha ang mahitabo sa Katapusang Paghukom.

Unsa man ang gilauman ninyong mahunahuna ug mabatyagan kon magbarug na kamo atubangan sa Dios aron mahukman?

Dapita ang usa ka estudyante sa pagbasa og kusog sa Pinadayag 20:12–13. Hangyoa ang klase sa pagsunod, nga mangita kon sa unsang paagiha kita hukman sa Dios.

Unsa nga kamatuoran ang atong makat-unan gikan sa bersikulo 12 kon sa unsang paagiha kita pagahukman? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga kamatuoran: Hukman kita sa Dios gikan sa mga basahon nga nasulat sumala sa atong mga binuhatan.)
Unsa nga mga basahon ang nakita ni Juan? (Mga kasulatan, mga rekord sa Simbahan nga nagrekord sa makaluwas nga mga ordinansa ug tingali sa ubang mga binuhatan, ug sa basahon sa kinabuhi [tan-awa sa 2 Nephi 29:10–11; D&P 128:6–7; Giya ngadto sa mga Kasulatan, “Basahon sa Kinabuhi”].)
Unsa pa ang imong nakat-unan mahitungod sa Katapusang Paghukom? (Pahinumdom: Sa Unit 32: Day 4, assignment 3, nakita sa mga estudyante ang dugang nga kasulatan nga nagtudlo mahitungod sa Katapusang Paghukom.)

Ipasabut nga ang Ginoo mipadayag ngadto kang Propeta Joseph Smith nga agig dugang sa atong mga buhat, hukman kita sumala sa tinguha sa atong mga kasingkasing (tan-awa sa D&P 137:9; tan-awa usab sa Alma 41:3–5).

Sa unsang paagi ang pagkahibalo nga kita pagahukman sumala sa tinguha sa atong mga kasingkasing makaimpluwensya sa unsay gusto ninyong buhaton?

Ipamatuod kini nga doktrina ug sa unsang paagi kini nakaimpluwensya sa imong mga pagpili.

Dapita ang usa ka estudyante sa pagbasa og kusog sa Pinadayag 22:14. Hangyoa ang klase sa pagsunod ug paghinumdom sa baruganan nga ilang nakat-unan gikan niini nga bersikulo sa ilang pagtuon niini diha sa balay.

Unsa nga baruganan ang inyong nakat-unan gikan niini nga bersikulo? (Kon tumanon nato ang mga sugo sa Ginoo, niana makadawat kita sa tanang panalangin sa Pag-ula ni Jesukristo ug makasulod sa celestial nga gingharian. Isulat sa pisara kini nga baruganan.)
Ngano nga usa man kini ka kamatuoran nga haum alang sa pagtapos sa atong pagtuon sa Bag-ong Tugon?

Ikonsiderar ang pagdapit sa mga estudyante nga ipakigbahin ang pipila ka mga kamatuoran nga nakaimpluwensya kanila atol sa ilang pagtuon sa Bag-ong Tugon niining tuiga. Dapita si bisan kinsa sa pagpakigbahin sa ilang mga pagpamatuod niining mga kamatuoran ug sa kabalaan ni Ginoong Jesukristo.

Awhaga ang mga estudyante nga ipadayon ang pagtuon sa mga kasulatan matag adlaw. Kon moeskwela sila og seminary sa sunod tuig o kon nag-andam sila para sa misyon, dapita sila sa pagsugod og basa sa Basahon ni Mormon karon.