Leksyon 62: Juan 3

Leksyon 62

Juan 3

Pasiuna

Usa ka gabii ang Pariseo nga si Nicodemo miduol kang Jesus ug nakig-istorya Kaniya. Gitudloan ni Jesus si Nicodemo nga ang tanang tawo gikinahanglan nga igaanak pag-usab aron makasulod sa gingharian sa Dios. Sa wala madugay, si Juan Bautista mipasabut sa iyang mga disipulo nga ang iyang tahas mao ang pag-andam sa agianan para ni Jesukristo.

Mga Sugyot alang sa Pagtudlo

Juan 3:1–21

Si Jesus mitudlo ni Nicodemo sa espirituhanong mga kamatuoran

Dapita ang mga estudyante sa pag-imagine nga usa ka adlaw dihang naghisgot bahin sa relihiyon uban sa pipila ka mga higala, ang usa miingon, “Basta magbinuotan lang ko, makaadto ko sa langit.” Dapita ang mga estudyante sa pagpamalandong kon unsaon nila sa pagtubag kini nga higala.

Awhaga ang mga estudyante sa pagtan-aw sa Juan 3 kon unsay angay natong buhaton aron makasulod sa gingharian sa Dios.

Ipasabut nga sa sinugdanan sa Iyang pangalagad, ang Manluluwas miadto sa Jerusalem aron sa pagsaulog sa Pagpalabay. Daghang tawo sa Jerusalem mituo kang Jesus human ilang nakita ang mga milagro nga Iyang gihimo (tan-awa sa Juan 2:23–25).

Dapita ang usa ka estudyante sa pagbasa og kusog sa Juan 3:1–2 . Hangyoa ang klase sa pagsunod, nga mangita kon unsay nahitabo samtang ang Manluluwas didto sa Jerusalem.

Kinsa ang mibisita ni Jesus?

Ipasabut nga isip “punoan sa mga Judeo” (Juan 3:1), si Nicodemo usa ka sakop sa Sanhedrin. Ang Sanhedrin usa ka tigdumala nga council nga gilangkuban sa mga Pariseo ug mga Saduceo nga nagdumala sa kadaghanang sibil ug relihiyusong mga kalihokan sa mga katawhan nga Judeo.

Nicodemus and Jesus — Si Nicodemo mibisita ni Jesus

Ngano kaha nga si Nicodemo miadto man aron sa pagbisita ni Jesus sa pagkagabii?
Sumala sa bersikulo 2, unsa ang pag-ila ni Nicodemo mahitungod ni Jesus?

Ipasabut nga ang pag-ila ni Nicodemo nga si Jesus “usa ka magtutudlo nga gikan sa Dios” (bersikulo 2) nagsugyot nga si Nicodemo gustong magkat-on gikan ni Jesus. Dapita ang usa ka estudyante sa pagbasa og kusog sa Juan 3:3–5 . Hangyoa ang klase sa pagsunod, nga mangita kon unsay gitudlo sa Manluluwas kang Nicodemo.

Sumala sa bersikulo 3, unsa ang gitudlo sa Manluluwas kang Nicodemo?
Unsa ang hunahuna ni Nicodemo nga maoy giapasabut sa Manluluwas sa mga pulong nga “igaanak pag-usab” (bersikulo 3)?

Ipasabut nga ang igaanak pag-usab mao ang “pagkabaton sa Espiritu sa Ginoo nga naghimo og dako nga kausaban sa kasingkasing sa usa ka tawo nga siya dili na magtinguha sa paghimo og dautan, apan hinoon magtinguha sa pagpapangita sa mga butang sa Dios” (Ang Giya ngadto sa mga Kasulatan, “Natawo Pag-usab, Natawo sa Dios,” scriptures.lds.org; tan-awa usab sa Mosiah 5:2; Alma 5:14–15; Moises 6:59).

Sumala sa bersikulo 5, unsa ang duha ka butang nga gitudlo ni Jesus kang Nicodemo nga gikinahanglan aron makasulod sa gingharian sa Dios? Sa inyong hunahuna unsay ipasabut sa “igaanak sa tubig ug sa Espiritu”?
Unsaon ninyo sa pag-summarize ang gitudlo niini nga mga bersikulo mahitungod sa panginahanglan para igaanak pag-usab sa spirituhanong paagi ug pagsulod sa celestial nga gingharian? (Human makatubag ang mga estudyante, isulat sa pisara ang mosunod nga baruganan gamit ang mga pulong sa mga estudyante: Ang pagpabunyag ug pagkadawat sa Espiritu Santo gikinahanglan aron igaanak pag-usab sa espirituhanong paagi ug makadawat sa kahimayaan sa celestial nga gingharian.)

Pahinumdumi ang mga estudyante bahin sa sitwasyon sa usa ka higala. Ipares-pares ang mga estudyante. Dapita ang usa ka estudyante sa matag pares nga kunohay maoy higala kinsa nagtuo nga ang bugtong gikinahanglan aron makasulod sa gingharian sa Dios mao ra ang pagkamaayong tawo. Dapita ang laing estudyante sa matag pares nga praktison ang paghatag og katin-awan sa sayop nga pagsabut gamit ang Juan 3:5.

I-summarize ang Juan 3:6–12 pinaagi sa pagpasabut nga si Nicodemo nangutana ni Jesus kon unsaon nga posibling igaanak pag-usab ang usa ka tawo. Mitubag si Jesus pinaagi sa pagpangutana nganong si Nicodemo usa ka relihiyusong lider ug magtutudlo sa Israel unya wala masayud nga ang espirituhanong pagkatawo gikinahanglan ug sa unsang paagi mahimong posible ang pagpakatawo pag-usab.

Sa Juan 3:13–21 atong mabasa nga ang Manluluwas mipasabut kang Nicodemo sa unsang paagi nga mahimong posible nga ang tawo igaanak pag-usab. Papuli-puliha sa pagbasa og kusog ang pipila ka mga estudyante sa Juan 3:13–15. Hangyoa ang klase sa pagsunod ug mangita kon giunsa sa pagtubag ni Jesus ang pangutana ni Nicodemo.

Unsa ang gisulti sa Manluluwas mahitungod sa Iyang kaugalingon diha sa Juan 3:13? (Mihatag Siya og pagpamatuod bahin sa Iyang Kaugalingon isip Anak sa Dios kinsa mikanaog gikan sa langit.)

I-display ang litrato nga Si Moises ug ang Tumbaga [Brass] nga Bitin (Libro sa mga Hulagway sa Ebanghelyo [2009], nu. 16; tan-awa usab sa LDS.org). Hangyoa ang mga estudyante nga ipasabut ang istorya gikan sa mga kasulatan nga girepresentaran sa litrato. Kon gikinahanglan, ipasabut nga atol sa kapanahunan ni Moises ang Ginoo mipadala og mapintas nga mga bitin agig sangputanan sa pagpakasala sa mga Israelites batok sa Dios. Ang mga Israelite mamatay kon mapahitan sila sa bitin. Ang Ginoo misugo ni Moises nga magbutang og usa ka tumbaga nga bitin sa usa ka bandila ug mosaad nga bisan kinsa nga Israelite ang motan-aw sa bitin nga naa sa bandila mamaayo. (Tan-awa sa Numeros 21:4-9.)

Sumala sa Juan 3:14, unsa ang girepresentaran sa tumbaga nga bitiin?

I-display ang litrato nga Ang Paglansang (Libro sa mga Hulagway sa Ebanghelyo [2009], nu. 57; tan-awa usab sa LDS.org).

Sumala sa bersikulo 15, unsa nga panalangin ang moabut niadtong kinsa mosalig sa Manluluwas?
Unsa nga doktrina ang atong makat-unan gikan niini nga mga bersikulo mahitungod sa Pag-ula ni Jesukristo? (Ang mga estudyante mahimong mogamit og lain-laing mga pulong, apan siguroha nga mahatagan og emphasis ang mosunod nga kamatuoran: Ang tanang tawo makabaton og kinabuhing dayon pinaagi sa Pag-ula ni Jesukristo. Isulat sa pisara kini nga baruganan.)

Dapita ang usa ka estudyante sa pagbasa og kusog sa Juan 3:16–17 . Hangyoa ang klase sa pagsunod, nga mangita sa doktrina nga atong makat-unan mahitungod sa Langitnong Amahan.

Unsa ang tuyo nga ipabuhat sa Langitnong Amahan sa pagpadala sa Iyang Anak?
Unsa nga doktrina ang atong makat-unan gikan niini nga mga bersikulo mahitungod sa Langitnong Amahan? (Ang mga estudyante mahimong mogamit og lain-laing mga pulong, apan siguroha nga mahibaloan ang mosunod nga doktrina: Ang Langitnong Amahan nahigugma kaayo sa Iyang mga anak nga Siya mipadala sa Iyang Bugtong Anak aron mag-antus para sa ilang mga sala. Idugang kini nga doktrina diha sa nakalista na sa pisara.)
Sa unsang paagi nga ang pagpadala sa Langitnong Amahan sa Iyang Anak, si Jesukristo, nganhi sa yuta nagpakita sa Iyang gugma sa matag usa kanato.

Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha. Hangyoa ang klase sa paghunahuna kon unsay ilang gibati nga nahibalo sa gugma sa Langitnong Amahan alang kanila.

“Walay labaw nga ebidensya sa walay kinutuban nga gahum ug kahingpitan sa gugma sa Dios kay sa gisulti ni Apostol Juan [sa Juan 3:16]. … Hunahunaa kon unsa ang kaguol sa atong Langitnong Amahan sa pagpadala sa Iyang Anak sa paglahutay sa dili matugkad nga pag-antus alang sa atong mga sala. Kana mao ang labing dako nga ebidensya sa Iyang gugma alang sa matag usa kanato!” (“Gugma ug Balaod,” Ensign o Liahona, Nob. 2009, 26).

Unsay inyong gibati nga nahibalo nga ang Langitnong Amahan nahigugma kaayo kaninyo nga Siya mipadala sa Iyang Bugtong Anak aron mag-antus ug magpakamatay para kaninyo?
Sumala sa Juan 3:16–17, unsaon nato nga maluwas pinaagi sa Pag-ula? (Human makatubag ang mga estudyante, isulat sa pisara ang mosunod nga baruganan: Kon kita motuo ni Jesukristo, nga naglakip sa paghinulsol sa atong mga sala ug pagsunod sa Iyang pulong, maangkon nato ang kinabuhing walay katapusan pinaagi sa Iyang Pag-ula.)

Dapita ang mga estudyante sa pagribyu sa mga kamatuoran nga gitudlo ni Jesus kang Nicodemo nga nalista diha sa pisara.

Sa unsang paagi kini nga mga kamatuoran may kalabutan sa usag usa?
Unsa ang pipila ka pamaagi nga atong mapakita ang atong pagtuo kang Jesukristo?

Ipamatuod nga samtang mopakita kita sa atong pagtuo kang Jesukristo pinaagi sa paghinulsol ug pagsunod Kaniya, maluwas kita ug makadawat og kinabuhing dayon pinaagi sa Pag-ula.

Isulat sa pisara ang mosunod nga mga pulong: Akong ipakita ang akong pagtuo kang Jesukristo pinaagi sa … Hangyoa ang mga estudyante nga tiwason nila ang mga pulong diha sa ilang mga class notebook o mga scripture study journal pinaagi sa pagsulat kon unsay ilang buhaton nga mapakita ang ilang pagtuo kang Jesukristo.

Juan 3:22–36

Si Juan Bautista nagtudlo nga si Jesus mao ang Kristo

I-display ang usa ka sihag nga sudlanan nga puno sa tubig. Dugangi ang tubig og usa o duha ka tu-lu sa food coloring.

Sa unsang paagi kaha ang food coloring ikakumpara sa atong impluwensya ngadto sa uban?

Dapita ang usa ka estudyante sa pagbasa og kusog sa mosunod nga mga pamahayag ni Presidente David O. McKay. Hangyoa ang klase sa pagpaminaw sa unsay atong makat-unan mahitungod sa atong impluwensya diha sa kinabuhi sa uban.

“Ang matag tawo nga nagpuyo niini nga kalibutan nakahatag og impluwensya, alang sa maayo o alang sa dautan (Mga Pagtulun-an sa mga Presidente sa Simbahan: David O. McKay [2003], 274).

“Dako og epekto ang atong mga pulong ug mga buhat niini nga kalibutan. Sa matag gutlo sa kinabuhi inyong giusab sa hinayhinay ang mga kinabuhi sa tibuok kalibutan” (Mga Pagtulun-an: David O. McKay, 274).

Ipapangita sa mga estudyante ang usa ka baruganan diha sa Juan 3:22–36 nga nagtudlo nato unsaon nga kita makaimpluwensya og kaayohan sa uban.

I-summarize ang Juan 3:22–26 pinaagi sa pagpasabut nga ang ubang mga disipulo ni Juan Bautista nabalaka tungod kay ang mga tawo misunod kang Jesus imbis kang Juan Bautista.

Dapita ang usa ka estudyante sa pagbasa og kusog sa Juan 3:27–30 . Hangyoa ang klase sa pagsunod, nga mangita kon unsay nasabtan ni Juan Bautista mahitungod sa iyang tahas nga may kalabutan ni Jesukristo.

Unsa ang gusto ni Juan Bautista nga masabtan sa iyang mga disipulo mahitungod sa iyang tahas? (Gipadala siya sa wala pa si Jesukristo aron maandam ang uban para Kaniya.)
Unsa nga pagkumpara ang gigamit ni Juan Bautista (bersikulo 29)?

Ipasabut nga ang pamanhunon nagrepresentar kang Jesus, ang pangasaw-unon nagrepresentar sa mga tawo nga miduol kang Kristo, ug ang higala sa pamanhunon nagrepresentar kang Juan Bautista.

Sa inyong hunahuna unsa man ang gipasabut ni Juan Bautista sa iyang pag-ingon nga, “Siya kinahanglan magatubo, samtang ako kinahanglan magakunhod” (bersikulo 30)? Unsa ang gipakita niini mahitungod sa kinaiya ni Juan Bautista?
Unsa ang mahimo ni Jesukristo sa mga tawo nga dili mahimo ni Juan Bautista?
Unsa ang atong makat-unan gikan sa ehemplo ni Juan Bautista kon unsay atong mahimo nga maka-impluwensya og kaayohan para sa uban? (Ang mga estudyante mahimong makahibalo og lain-laing mga kamatuoran, apan siguroha nga maklaro nga kita makaimpluwensya og kaayohan sa uban pinaagi sa paggiya kanila ngadto ni Jesukristo.)
Nganong importante nga gamiton nato ang atong impluwensya sa paggiya sa uban ngadto ni Jesukristo?
Kanus-a mo nakakita og tawo nga migiya sa uban ngadto sa Manluluwas?

Dapita ang mga estudyante sa paghunahuna og mga paagi nga ilang magiyahan ang uban ngadto sa Manluluwas. Awhaga sila nga magtinguha sa giya sa Espiritu Santo sa ilang mga paningkamot sa paghimo sa ingon.

I-summarize ang Juan 3:31–36 pinaagi sa pagpasabut nga si Juan Bautista mipahayag nga si Jesus gipadala sa Dios ug ang tanan nga motuo Kaniya makadawat og kinabuhing dayon.

Scripture Mastery—Juan 3:5

Aron matabangan ang mga estudyante nga makamemorya sa Juan 3:5, dapita ang mga estudyante nga isulat ang unang letra sa matag pulong sa bersikulo diha sa ilang mga scripture study journal. Awhaga ang mga estudyante nga mag-praktis sa pagsulti og kusog sa kasulatan gamit ang unang mga letra ug mag-refer ngadto sa tudling sa kasulatan kon gikinahanglan. Kon masulti na sa mga estudyante ang tibuok tudling gamit ang unang mga letra, ipapraktis nila ang pag-recite sa tudling gikan sa ilang hunahuna. Mahimo nimo silang papraktison sa pag-recite niini nga kasulatan sa pagsugod o sa dapit sa katapusan sa klase sulod sa pipila ka adlaw.

Komentaryo ug Background nga Impormasyon

Juan 3:3. Nga igaanak pag-usab

Sama ni Nicodemus, ang pipila maghunahuna kon unsaon nga igaanak pag-usab. Si Presidente Ezra Taft Benson mitudlo: “Agig dugang sa pisikal nga ordinansa sa bunyag ug sa pagpandong sa mga kamot, ang usa kinahanglang igaanak pag-usab sa espirituhanong paagi aron maangkon ang kahimayaan ug kinabuhing dayon” (“Born of God,” Ensign, Hulyo 1989, 2–4). Busa, ang igaanak pag-usab nagkinahanglan og labaw pa kay sa bunyagan lamang ug makumpirmahan. Aron igaanak pag-usab ang usa kinahanglang magpakabuhi sa paagi nga ang Espiritu Santo makausab sa kasingkasing.

Si Elder David A. Bednar sa Korum sa Napulog Duha ka mga Apostoles mitudlo:

“Atong sugdan ang proseso sa pagpakatawo pag-usab pinaagi sa pagpakita og hugot nga pagtuo ni Kristo, maghinulsol sa atong mga sala, ug magpabunyag pinaagi sa pagpaunlod alang sa kapasayloan sa mga sala pinaagi sa tawo nga adunay awtoridad sa priesthood. …

“Ang hingpit nga paghumol ug pagtuhop sa ebanghelyo sa Manluluwas importante nga mga lakang sa proseso sa pagpakatawo pag-usab” (“Kinahanglang Matawo Kamo Pag-usab,” Ensign o Liahona, Mayo 2007, 21).

Si Elder D. Todd Christofferson sa Korum sa Napulog Duha ka mga Apostoles mitudlo nga ang pagpakatawo pag-usab usa ka proseso nga nagkinahanglan og panahon:

“Tingali makapangutana kamo, Ngano nga kining dakong kausaban dili diha-diha dayon moabut kanako? … Alang sa kadaghanan kanato, ang mga kausaban, mas hinay-hinay ug mahitabo dili diha dayon. Ang pagpakatawo pag-usab, dili sama sa atong pisikal nga pagkatawo, mas labaw nga proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagkamortal.

“Sa samang higayon kinahanglan nga dili kita mangatarungan sa atong kaugalingon sa dili tininuod nga paningkamot. Kinahanglang dili kita makontento nga ipabilin ang pipila ka kinaiya sa pagbuhat og dautan. Kinahanglang takus kitang moambit sa sakramento matag semana ug magpadayon sa pagtawag sa Balaan nga Espiritu aron motangtang sa katapusang mga lama sa pagkadili putli nga anaa kanato. Ako mopamatuod nga samtang kamo mopadayon diha sa dalan sa espirituhanon nga pagkatawo pag-usab ang maulaon nga grasya ni Jesukristo mokuha sa inyong mga sala ug sa lama niadto nga mga sala ninyo, ang tintasyon mawad-an sa ilang pagkamadanihon, ug pinaagi ni Kristo kamo mahimong balaan, sama nga Siya ug ang atong Amahan mga balaan” (“Natawo Pag-usab,” Ensign o Liahona, Mayo 2008, 78).

Juan 3:5. Gikinahanglan nato ang mga ordinansa aron maangkon ang kaluwasan

Ang pagtulun-an sa Manluluwas diha sa Juan 3:5 nagmatuod nga ang mga ordinansa gikinahanglan sa pagsulod sa gingharian sa Dios. Sama sa gitudlo ni Propeta Joseph Smith, “Ang pagpakatawo pag-usab, moabut ang Espiritu sa Dios pinaagi sa mga ordinansa” (Mga Pagtulun-an sa mga Presidente sa Simbahan: Joseph Smith [2007], 113).

Si Presidente Boyd K. Packer sa Korum sa Napulog Duha ka mga Apostoles miingon, “Ang maayong kinaiya nga wala ang mga ordinansa sa ebanghelyo dili gayud makatubos o dili makabayaw sa tawhanong binuhat; ang mga pakigsaad ug mga ordinansa mahinungdanon” (“The Only True Church,” Ensign, Nob. 1985, 82).

Juan 3:7–8. Nganong gikumpara ni Jesus ang “igaanak pag-usab” ngadto sa hangin?

Agig tubag sa kalibug ni Nicodemo mahitungod sa pagpakatawo pag-usab, ang Manluluwas mikumpara sa pagpakatawo sa Espiritu ngadto sa hangin. (Ang Gresyanhon nga pulong para sa espiritu mao ang pneuma, nga nagpasabut usab nga gininhawa o hangin.) Sama nga ang hangin lisud nga makita, mao usab kalisud nga makita ang proseso sa pagpakatawo pag-usab. Atong makita ang mga epekto sa hangin apan lisud ang pagkahibalo kon kanus-a kini nagsugod ug kanus-a motapos ingon man kon diin kini gikan. Ang susama nga konklusyon makuha pinaagi sa proseso sa pagpakatawo pag-usab. Lisud nga makit-an kon asa gayud kini nagsugod o asa kini motapus, apan ang mga epekto klaro kaayo samtang ang mga buhat ug mga tinguha mausab.

Juan 3:16. “Kay gihigugma gayud sa Dios ang kalibutan”

Niini nga bersikulo si Elder Bruce R. McConkie sa Korum sa Napulog Duha ka mga Apostoles mipahayag:

“Tingali mao kini ang pinaka inila ug bugtong gamhanan nga bersikulo sa kasulatan nga sukad gipamulong. Nag-summarize kini sa kinatibuk-ang plano sa kaluwasan, nga naghiusa sa Amahan, sa Anak, sa iyang maulaong sakripisyo, kana nga pagtuo diha kaniya nga gituohang makahimo og matarung nga mga buhat, ug walay katapusang himaya alang sa mga matinud-anon.

“… Sa sama nga paagi, ang atong Ginoo ‘nahigugma sa kalibutan nga siya mihatag sa iyang kaugalingon nga kinabuhi, nga kutob sa motuo mahimo nga mga anak sa Dios. (D&P 34:3.)” (Doctrinal New Testament Commentary, 3 vols. [1965–73], 1:144).