Leksyon 43: Lucas 1

Leksyon 43

Lucas 1

Pasiuna

Ang anghel Gabriel mipakita ngadto ni Zacarias ug mipahibalo nga si Zacarias ug ang iyang asawa, si Elisabet, makaangkon og anak, nga kinahanglan nilang hinganlan og Juan. Paglabay sa unom ka bulan, ang mao gihapon nga anghel mipakita ni Maria ug mipahibalo nga siya mahimong inahan sa Anak sa Dios. Si Maria mibisita kang Elisabet, ug sila nagmaya sa pag-anhi sa Manluluwas. Paglabay sa tulo ka bulan, si Elisabet nanganak ni Juan.

Mga Sugyot alang sa Pagtudlo

Lucas 1:1–4

Si Lucas mipasabut sa mga rason sa pagsulat sa iyang Ebanghelyo

Ipakita ang mosunod nga mga litrato, ug hangyoa ang mga estudyante sa pagpasabut unsa ang nahitabo diha sa matag usa: Si Jose ug Maria Mibiyahe ngadto sa Bethlehem (Libro sa mga Hulagway sa Ebanghelyo [2009], nu. 29; tan-awa usab sa LDS.org), Ang Anghel Mipakita ngadto sa mga Magbalantay sa Karnero (nu. 31), Si Simeon Mihatag og Balaang Pagtahud sa Batang Jesus (nu. 32), Ang Batang Jesus diha sa Templo (nu. 34), Ang Maayong Samarianhon (nu. 44), Si Maria ug Marta (nu. 45), ug Ang Napulo ka mga Sanlahon (nu. 46). Ipasabut nga kini ug daghan pang mga panghitabo ug mga pagtulun-an gikan sa mortal nga pangalagad sa Manluluwas narekord ni Lucas apan wala diha sa mga Ebanghelyo ni Mateo, Marcos, ug Juan.

Ang Anghel Mipakita ngadto sa mga Magbalantay sa Karnero

Si Simeon Mihatag og Balaang Pagtahud sa Batang Kristo

Ipaila sa daklit ang Ebanghelyo ni Lucas pinaagi sa pagpasabut nga si Lucas misugod sa iyang Ebanghelyo pinaagi sa pagpamulong ngadto sa usa ka tawo nga ginganlan og “Teofilo” (bersikulo 3) ug mipasabut sa iyang mga rason sa pagsulat. Teofilo nagpasabut og “higala sa Dios” (Bible Dictionary sa LDS English nga bersyon sa Biblia, “Theophilus”). Dapita ang usa ka estudyante sa pagbasa og kusog sa Lucas 1:1–4. Hangyoa ang klase sa pagsunod, nga mangita kon unsa ang mga rason ni Lucas sa pagsulat.

Unsa man ang pipila sa mga rason ni Lucas sa pagsulat niini nga istorya?
Basi sa Lucas 1:4, unsa man ang mahimo kanato sa pagtuon sa Ebanghelyo ni Lucas?

Isiguro sa mga estudyante nga samtang sila magtuon sa Ebanghelyo ni Lucas, mahimo nila nga “maila ang pagkatinuod” (bersikulo 4) sa mga kamatuoran nga gitudlo kanila mahitungod ni Jesukristo.

Lucas 1:5–25

Si anghel Gabriel nagpahibalo sa umaabut nga pagkatawo ni Juan ngadto ni Zacarias, ug si Elisabet nanamkon

Hangyoa ang mga estudyante sa pagpamalandong og usa ka panalangin o tubag gikan sa Dios nga ilang gihulat o gipangandoy. Dapita ang mga estudyante sa pagpangita og mga kamatuoran samtang sila nagtuon sa Lucas 1 nga makatabang kanila samtang sila naghulat og usa ka panalangin o tubag gikan sa Dios.

Ipabasa og kusog sa usa ka estudyante ang Lucas 1:5–7, ug hangyoa ang klase sa pagpangita kon kinsa ang naghulat og piho nga panalangin sa halos tibuok nilang kinabuhi.

Unsa nga mga detalye ang atong makat-unan mahitungod ni Zacarias ug Elisabet gikan niini nga mga bersikulo?

I-summarize ang Lucas 1:8–10 pinaagi sa pagpasabut nga si Zacarias natudlo sa pagsunog og incienso sa templo sa Jerusalem, usa ka pasidungog nga moabut sa usa ka sacerdote tingali kausa lamang sa iyang kinabuhi.

Hangyoa ang mga estudyante sa pagbasa sa Lucas 1:11–13 sa hilum nga paagi, nga mangita kon unsay nahitabo samtang didto sa templo si Zacarias.

Sumala sa bersikulo 13, unsa nga pag-ampo ang pagatubagon alang ni Zacarias ug Elisabet? (Ipasabut nga si Zacarias ug Elisabet malagmit nag-ampo sulod sa daghang katuigan aron makabaton og anak. Mahimo nimong isugyot nga markahan sa mga estudyante ang mga pulong nga “ang imong pangamuyo nadungog” niini nga bersikulo.)
Unsa kaha ang gibati ni Zacarias sa dihang iyang nadungog nga siya ug si Elisabet makabaton og anak nga lalaki bisan tuod sila “tag-as na kaayog panuigon”? (bersikulo 7).

I-summarize ang Lucas 1:14–17 pinaagi sa pagpasabut nga ang anghel Gabriel misulti ni Zacarias nga siya ug si Elisabet “mabatonan ang kalipay ug pagmaya” (bersikulo 14) ug nga ang ilang anak nga lalaki moandam og daghang mga tawo alang sa Ginoo.

Ipabasa og kusog sa usa ka estudyante ang Lucas 1:18–20, ug hangyoa ang klase sa pagpangita kon giunsa ni Zacarias pagtubag ang anghel. Dapita ang mga estudyante nga moreport sa unsay ilang nakat-unan.

Unsay nahitabo ni Zacarias tungod sa iyang pagduha-duha sa mga pulong sa anghel?
Sumala sa bersikulo 20, unsay gisulti sa anghel nga mahitabo sa mga pulong nga iyang gisulti kang Zacarias? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Ang mga pulong sa Ginoo nga gipamulong pinaagi sa Iyang mga sulugoon matuman sa ilang tagal nga panahon. Isulat kini nga kamatuoran sa pisara.)
Unsay gipasabut sa mga pulong “sa ilang tagal nga panahon”? (Sumala sa panahon sa Ginoo.)

I-refer ngadto sa pamahayag nga anaa sa pisara, ug pangutana:

Sa unsang paagi nga ang pagkasayud niini nga kamatuoran makaapekto kon unsay atong buhaton agig tubag sa mga saad sa Ginoo? (Human makatubag ang mga estudyante, usaba ang kamatuoran diha sa pisara aron mamugna ang mosunod nga pamahayag: Kita makasalig sa mga saad sa Ginoo tungod kay ang Iyang mga pulong matuman sa ilang tagal nga panahon.)
Sa unsang paagi kini nga kamatuoran makatabang sa usa ka tawo kinsa nangandoy nga matuman ang balaanong saad?

I-summarize ang Lucas 1:21–24 pinaagi sa pagpasabut nga sa diha nga si Zacarias mibiya sa templo, siya dili makasulti. Si Elisabet wala madugay namabdos, sama sa gisaad sa anghel.

Ipabasa og kusog sa usa ka estudyante (mas maayo kon batan-ong babaye) ang mga pulong ni Elisabet sa Lucas 1:25. Dapita ang klase sa pagkonsiderar kon unsa kaha ang gibati ni Elisabet samtang nangandam siya nga makaanak. Tingali kinahanglan nimong ipasabut nga ang pamahayag ni Elisabet nga ang Ginoo “[n]agwagtang sa [iyang] pagkatinamay taliwala sa mga tawo” mahimong nagpasabut sa kaulaw nga iyang nasinati tungod sa sayop nga panglantaw nga komon sa karaan nga kultura nga ang pagkawalay anak usa ka silot gikan sa Dios.

Lucas 1:26–38

Ang anghel Gabriel nagpahibalo sa umaabut nga pagkatawo ni Jesus ngadto ni Maria

Angel Gabriel appears to Mary — Si Anghel Gabriel nagpakita ni Maria

Ipakita ang litrato nga Ang Pagpahibalo: Ang Angel Gabriel Mipakita ni Maria (Libro sa mga Hulagway sa Ebanghelyo, nu 28; tan-awa usab sa LDS.org), ug hangyoa ang mga estudyante sa paghunahuna kon unsay bation kon adunay anghel nga kalit nga mopakita ngadto kanila. I-summarize ang Lucas 1:26–27 pinaagi sa pagpasabut nga sa ikaunom nga bulan sa pagmabdos ni Elisabet, ang anghel nga si Gabriel gipadala ngadto ni Maria, usa ka batan-ong babaye sa Nazaret.

Dapita ang usa ka estudyante sa pagbasa og kusog sa Lucas 1:28–33. Hangyoa ang klase sa pagsunod ug pagpangita sa mga pulong nga tingali nakatabang ni Maria nga makasabut sa importansya sa tahas nga gihatag sa Dios kaniya.

Unsa nga mga pulong ang tingali nakatabang ni Maria nga makasabut sa kaimportante sa tahas nga gihatag sa Dios kaniya?
Unsa ang gipasabut sa ulohan nga “Anak sa Labing Halangdon” (bersikulo 32)? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga doktrina: Si Jesukristo mao ang Anak sa Dios nga Amahan.)

Hangyoa ang mga estudyante sa pagbasa sa Lucas 1:34 sa hilum nga paagi, nga mangita sa pangutana ni Maria. Dapita sila nga moreport sa unsay ilang nakat-unan. Ipasabut nga ang sulti ni Maria nga “wala man akoy bana” nagpasabut nga siya usa ka birhen.

Ipabasa og kusog sa usa ka estudyante ang Lucas 1:35–37, ug hangyoa ang mga estudyante sa pagpangita sa tubag sa anghel sa pangutana ni Maria.

Ipasabut nga kita wala masayud, gawas sa mga istorya sa mga kasulatan, giunsa pagkahitabo ang milagro sa pagpanamkon kang Jesukristo; kita yano lang nga giingnan nga kini milagroso ug nga ang bata nga matawo mao ang Anak sa Dios.

Sumala sa narekord sa Lucas 1:37, unsa nga kamatuoran ang gisulti sa anghel nga nagtabang sa pagpasabut niining milagroso nga panghitabo? (Ang mga estudyante kinahanglang mahibalo sa mosunod nga kamatuoran: Sa Dios walay butang nga dili mahimo. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.
Sa inyong hunahuna unsa kaha ang isulti ni Maria o Elisabet aron sa pag-awhag kanato kon kita mobati nga dili mahimo ang usa ka butang nga atong gilauman?
Unsa man ang usa ka kasinatian nga nakapalig-on sa inyong pagtuo nga walay imposible uban sa Dios?

Dapita ang mga estudyante sa pagbasa sa hilum nga paagi sa Lucas 1:38, nga mangita kon giunsa pagtubag ni Maria ang anghel.

Unsa nga ebidensya ang inyong nakita niini nga bersikulo nga si Maria mituo sa mga pulong sa anghel?
Unsay nakalahi sa pagdawat ni Maria sa mga pulong sa anghel ngadto sa tubag ni Zacarias sa pahibalo sa anghel diha sa templo?

Awhaga ang mga estudyante sa pagsunod sa ehemplo ni Maria ug Elisabet pinaagi sa pagtuo nga sa ilang kaugalingong mga kinabuhi walay imposible sa isugo sa Ginoo kanila uban sa Iyang tabang.

Lucas 1:39–56

Si Maria nagbisita kang Elisabet, ug kining duha ka babaye nagpamatuod sa Manluluwas

Mary and Elizabeth — Si Maria nagbisita kang Elisabet

Kon mahimo, pagpakita og litrato ni Maria nga nagbisita kang Elisabet atol sa pagmabdos ni Elisabet. Pangutan-a ang mga estudyante kon ila bang maila kon kinsa ang gihulagway ug unsa ang nahitabo diha sa litrato.

Si Maria ug Elisabet daw ordinaryo nga mga babaye, apan sa unsang mga paagi nga sila nagtuman sa importanting mga tahas nga mousab sa kalibutan?

Dapita ang usa ka estudyante sa pagbasa og kusog sa Lucas 1:41–45. Hangyoa ang klase sa pagsunod, nga mangita sa pagpamatuod ni Elisabet ngadto kang Maria.

Unsa man ang nasabtan nang daan ni Elisabet mahitungod ni Maria?

Dapita ang usa ka estudyante sa pagbasa og kusog (mas maayo kon batan-ong babaye) sa Lucas 1:46–49. Hangyoa ang klase sa pagsunod, nga mangita kon giunsa pagdayeg ni Maria ang Ginoo.

Unsa nga mga pulong nga narekord diha sa bersikulo 49 ang gigamit ni Maria sa paghulagway kon unsa ang gihimo sa Ginoo alang kaniya? (“Dagkong mga butang.”)

Dapita ang mga estudyante sa pag-usab og basa sa hilum nga paagi sa Lucas 1:38, 45–46, nga mangita kon unsa ang nabuhat ni Maria nga nagtugot sa Ginoo sa paghimo og “dagkong mga butang” alang kaniya.

Unsa man ang nabuhat ni Maria nga nagtugot sa Ginoo sa paghimo og “dagkong mga butang” alang kaniya?

Ipasabut nga sama nga si Zacarias, Elizabet, ug Maria adunay kaugalingon nilang mga tahas nga buhaton diha sa balaanong plano, kita usab adunay importanting mga tahas nga gihatag sa Ginoo.

Basi sa ehemplo ni Maria, unsay mahitabo sa atong kinabuhi kon kita matinud-anong maningkamot sa pagtuman sa buluhaton nga gisangon sa Ginoo ngari kanato? (Tabangi ang mga estudyante nga mahibaloan ang mosunod nga baruganan: Kon kita matinud-anong maningkamot sa pagtuman sa buluhaton nga gisangon sa Ginoo ngari kanato, Siya makahimo og dagkong mga butang sa atong kinabuhi.)
Unsa ang pipila ka mga tahas nga gusto sa Ginoo nga inyong tumanon diha sa Iyang plano?
Unsa kaha ang mahitabo sa inyong kinabuhi kon inyong tubagon ang Ginoo sama sa gibuhat ni Maria?

Lucas 1:57–80

Si Juan Bautista natawo

I-summarize ang Lucas 1:57–80 pinaagi sa pagpasabut nga human nanganak si Elisabet, gisulat ni Zacarias nga ang bata kinahanglan nga panganlan og Juan. Dihang iya kining gibuhat, siya diha-diha dayon nabalikan sa iyang abilidad sa pagsulti ug siya nanagna mahitungod sa mga misyon ni Jesukristo ug ni Juan.

Ipamatuod nga samtang kita matinud-anong nagtuman sa atong balaanong gihatag nga mga tahas sama sa gibuhat ni Zacarias, Elisabet, ug Maria, ang Ginoo makahimo og dagko nga mga butang alang kanato ug pinaagi nato. Awhaga ang mga estudyante sa pagtuman sa ilang kaugalingong mga tahas diha sa plano sa Ginoo.

Komentaryo ug Background nga Impormasyon

Lucas 1:34–35. Ang pagpanamkon kang Jesukristo

Samtang magtudlo ka sa Lucas 1:34–35, tingali adunay mga pangutana nga motumaw mahitungod sa pagpanamkon kang Jesukristo. Kon aduna gayuy mga pangutana, timan-i kining pasidaan gikan ni Presidente Lee:

“Kon ang mga magtutudlo maalamon sa paghisgot sa [pagpanamkon kang Jesus] diin wala kaayoy gisulti ang Ginoo, ilang limitahan ang ilang diskusyon niini nga hilisgutan sa mga pulong nga narekord niini nga hilisgutan diha sa Lucas 1:34–35. …

“Magmakontento sa impormasyon nga gihatag sa Ginoo kanato ug maghulat hangtud nga Iyang makita nga angay na nga mosulti kanato og dugang” (The Teachings of Harold B. Lee, ed. Clyde J. Williams [1996], 14).

Lucas 1:38. “Matuman unta kanako kanang imong giingon”

Ang Gresyanhon nga pagkasulat ni Lucas sa mga pulong ni Maria nagpakita sa kalig-on sa iyang desisyon. Wala siya nagduha-duha sa pagtugyan apan maisugon nga midawat sa iyang tahas diha sa plano sa kaluwasan, nga daw og moingon, “Oo siyempre. Ako mahimong sulugoon sa Ginoo sumala sa imong giingon.” (Alang sa dugang nga panabut sa tubag ni Maria, tan-awa ang seksyon alang sa Lucas 1:38 diha sa New Testament Student Manual [manwal sa Church Educational System, 2014], 142.)

Lucas 1:76.. “Ang propeta sa Labing Halangdon”

Si Zacarias ug Elisabet mga kaliwat ni Aaron, kansang kaliwatan naggikan ang tanan nga mga sacerdote ug labawng mga sacerdote [priests and high priests] sa Israel. Busa si Juan usa ka natural nga manununod sa Aaronic Priesthood ug sa pagpangulo niini. Ang Propeta Joseph Smith mitudlo, “Si Juan usa ka pari sama sa iyang amahan, ug naghupot sa mga yawe sa Aaronic Priesthood” (sa History of the Church,5:257).

Dugang nga mga Ideya sa Pagtudlo

Lucas 1:26–56. Si Maria gitawag nga mahimong inahan sa Anak sa Dios

Dapita ang mga estudyante sa pagbasa sa hilum nga paagi sa Lucas 1:28, nga mangita kon unsay gisulti sa anghel mahitungod kang Maria.

Sa inyong hunahuna unsa kaha ang gipasabut sa mga pulong nga “hinatagan sa grasya”?

Dapita ang katunga sa klase sa pagsiksik sa mga bersikulo 29–38 ug ang laing katunga sa pagsiksik sa mga bersikulo 39–49, nga mangita sa mga buhat ug kinaiya ni Maria nga nagpakita nganong siya hinatagan sa grasya sa Ginoo.

Hangyoa ang mga estudyante nga moreport sa unsay ilang nakat-unan. Mahimo nimong ipamatuod nga isip mortal nga inahan ni Jesus, si Maria hinatagan sa grasya ug naghatag og talagsaon nga ehemplo sa matarung nga pagka-inahan. Aron sa pagtabang sa mga estudyante sa pagpamalandong kon unsa ang ilang makat-unan gikan sa ehemplo ni Maria, mahimo ka nga mangutana:

Giunsa ni Maria pagpakita ang iyang hugot nga pagtuo ug kaandam sa pagsakripisyo sa dihang gihangyo siya nga mahimo nga mortal nga inahan ni Jesukristo?
Sa unsang paagi nga ang matinud-anong mga inahan ug amahan karon nagpakita sa ilang hugot nga pagtuo ug pagkaandam nga mosakripisyo samtang sila nagtuman sa ilang balaang mga tahas?
Sa unsang mga paagi nga ang mga indibidwal makaandam sa pagtuman sa balaang misyon sa pagkainahan ug pagkaamahan bisan unsa pa karon ang ilang kahimtang sa kinabuhi?

Awhaga ang batan-ong mga lalaki ug babaye sa inyong klase sa pagsunod sa ehemplo ni Maria samtang sila nangandam sa pagtuman sa ilang balaang mga tahas ug mga misyon ug sa pagsuporta sa mga paningkamot sa usag usa nga magmatarung.

Lucas 1:31–35. “Anak sa Labing Halangdon”

I-drowing ang kauban nga diagram sa pisara:

Pangutana og usa ka estudyante:

Unsa man ang usa ka pisikal nga kinaiya nga inyong napanunod gikan sa inyong amahan? Unsa man ang usa ka pisikal nga kinaiya nga inyong napanunod gikan sa inyong inahan?

Sulati ang diagram sa mga kinaiya nga giila sa estudyante (tan-awa ang sunod nga diagram alang sa ehemplo):

Dapita ang pipila ka mga estudyante sa pagpuli-puli sa pagbasa og kusog gikan sa Lucas 1:31–35. Hangyoa ang klase sa pagsunod ug pag-ila sa mga pulong nga naghulagway sa ginikanan ni Jesukristo. (Kini nga mga pulong naglakip sa “magasamkon ikaw” [bersikulo 31], “pagatawgon nga Anak sa Labing Halangdon” [bersikulo 32], ug “ang bata nga matawo paganganlan nga balaan, ang Anak sa Dios” [bersikulo 35].) Hisguti kon unsa ang nasayran sa mga estudyante ug unsa nga mga pulong ang makahuluganon kanila sa paghulagway sa pagkatawo sa Manluluwas.

Papasa ang miaging diagram ug idrowing ang kauban nga diagram sa pisara:

Dapita ang usa ka estudyante sa pagbasa og kusog sa mosunod nga pamahayag ni Elder James E. Talmage sa Korum sa Napulog Duha ka mga Apostoles:

“Kana nga Bata nga matawo kang Maria … angay lang nga pagatawgon og ‘Anak sa Labing Halangdon.’ Diha sa Iyang kinaiya mahiusa ang mga gahum sa pagka-Dios uban sa kapasidad ug mga posibilidad sa pagka-mortal; ug kini pinaagi sa ordinaryo nga paglihok sa sukaranan nga balaod sa kaliwat, gipahayag sa Dios, gipakita sa siyensya, ug gidawat sa pilosopiya, nga ang buhi nga mga binuhat mosanay—sumala sa ilang matang. Ang Bata nga si Jesus mopanunod sa pisikal, mental, ug espirituhanong mga kinaiya, mga kalagmitan, ug mga gahum nga anaa sa Iyang mga ginikanan—ang usa imortal ug nahimaya—Dios, ang usa tawo—babaye” (Jesus the Christ, 3rd ed. [1916], 81).

Basaha og kusog ang mosunod nga pamahayag ug hangyoa ang mga estudyante sa pagpaminaw alang sa importanting mga kinaiya nga napanunod sa Manluluwas gikan sa matag usa sa Iyang mga ginikanan:

“Si Elder Talmage mitudlo usab nga pinaagi sa mortal nga inahan ni Jesus, nga si Maria, Siya nakapanunod sa abilidad nga ‘boluntaryong itugyan ang Iyang kinabuhi.’ Apan gikan sa Iyang Langitnong Amahan, napanunod ni Jesus ang abilidad sa paglahutay sa pag-antus panahon sa Iyang maulaong sakripisyo ‘nga walay lain nga binuhat nga nakapuyo sa yuta nga makahunahuna nga posible’ (Jesus the Christ, 613). Tungod kay kini nga pag-antus ‘labaw nga ang tawo makaantus, gawas kini ngadto sa kamatayon’ (Mosiah 3:7), ang Binuhat lamang nga adunay gahum batok sa kamatayon ang makalahutay niini” (New Testament Student Manual [manwal sa Church Educational System, 2014], 141).

Unsa nga mga kinaiya ang napanunod sa Manluluwas gikan sa Iyang inahan? Unsa ang Iyang napanunod gikan sa Iyang Amahan?

Samtang motubag ang mga estudyante, diha sa diagram sa pisara, ilista ubos sa Maria ang mga kinaiya nga napanunod ni Jesukristo gikan sa Iyang inahan (sama sa pagkamortal—ang abilidad nga mag-antus sa kasakit ug pisikal nga mamatay), ug ilista ubos sa Langitnong Amahan ang mga kinaiya nga napanunod gikan sa Iyang Amahan (sama sa mga gahum sa pagka-Dios—pagka-imortal o ang gahum nga mabuhi sa kahangturan).

Aron sa pagtabang sa mga estudyante nga makasabut nga si Jesus nakapanunod sa gahum batok sa kamatayon gikan sa Iyang Amahan, dapita ang mga estudyante sa pagbasa sa hilum nga paagi sa Juan 5:26, nga mangita kon unsay gihatag sa Amahan ngadto sa Iyang Anak.

Nganong ang mga ginikanan ni Jesus talagsaong nakahimo Kaniya nga mamahimong atong Manluluwas? (Tabangi ang mga estudyante nga mahibaloan ang mosunod nga kamatuoran: Tungod sa mga ginikanan ni Jesus, aduna Siyay imortal ug mortal nga mga kalidad, nga gikinahanglan Niya aron mabuhat ang Pag-ula. Siguroa nga masabtan sa mga estudyante nga kon si Jesukristo natawo sa duha ka mortal nga mga ginikanan, dili Siya makalahutay sa grabeng kasakit ug pag-antus sa Pag-ula o makabuntog sa kamatayon. Kon Siya natawo sa duha ka imortal nga mga ginikanan, dili Siya mahimong mag-antus sa pisikal ug mamatay. Tungod kay si Jesus natawo sa usa ka balaan nga ginikanan ug usa ka mortal nga ginikanan, Siya adunay abilidad sa pag-antus nga walay kinutuban, sa pagtugot sa Iyang kaugalingon nga mamatay, ug dayon sa pagbuntog sa kamatayon pinaagi sa Iyang Pagkabanhaw.)