Leksyon sa Home-Study:

Ang Plano sa Kaluwasan–Pasiuna ug Kinatibuk-ang Kahulugan sa Bag-ong Tugon (Unit 1)

Materyal sa Pagpangandam alang sa Home-Study Teacher

Summary sa Inadlaw nga mga Leksyon sa Home-Study:

Ang mosunod mao ang summary sa mga panghitabo, mga doktrina, ug mga baruganan nga nakat-unan sa mga estudyante samtang sila magtuon sa upat ka mga leksyon sa estudyante sa home-study alang sa unit 1. Kon makahibalo unsay gitun-an sa mga esudyante makatabang nimo nga makaandam sa klase. Ang summary dili kabahin sa leksyon ug dili angay nga ipakigbahin sa mga estudyante. Tungod kay ang leksyon nga imong itudlo alang sa unit 1 naghisot lamang sa pipila ka mga doktrina ug mga baruganan nga gilista diha sa summary, ikaw mahimong madasig sa pagribyu o paghisgot og lain sumala sa mga pag-aghat sa Espiritu ug sa mga panginahanglan sa imong mga estudyante.

Day 1 (Ang Plano sa Kaluwasan)

Sa ilang pagtuon sa plano sa kaluwasan, ang mga estudyante makat-on nga si Jesukristo napili didto sa kinabuhi nga wala pa dinhi sa yuta nga mahimong Manunubos sa katawhan ug nga ubos sa direksyon sa Langitnong Amahan, Iyang gilalang kini nga yuta. Makat-unan usab nila ang mosunod nga mga kamatuoran: Mianhi si Jesukristo aron sa pagluwas nato gikan sa atong mga sala.) Tungod sa Pagkabanhaw ni Jesukristo, ang tanang mga tawo mabanhaw. Si Jesukristo mohukom sa tanang mga tawo. Kon atong gamiton ang hugot nga pagtuo diha ni Jesukristo ug magpuyo sumala sa Iyang ebanghelyo, nan kita makadawat og kinabuhing dayon.

Day 2 (Ang Tahas sa Tigkat-on)

Ang mga estudyante makat-on nga ang Espiritu Santo nagtudlo sa kamatuoran. Mahibaloan usab nila nga kon kita maningkamot sa pagkat-on pinaagi sa hugot nga pagtuo, dayon atong dapiton ang Espiritu Santo diha sa atong mga kasingkasing sa pagtudlo ug sa pagpamatuod sa kamatuoran.

Day 3 (Pagtuon sa mga Kasulatan)

Ang mga estudyante makat-on sa kaimportante sa pagbasa sa tibuok Bag-ong Tugon ug pagtuon sa mga kasulatan matag adlaw. Dugang pa, ang mga estudyante makadiskobre nga ang atong panginahanglan sa mga kasulatan mas dako karon kay sa bisan unsang miaging panahon ug nga kon kita magtuon sa mga kasulatan, makadawat kita og kaalam, kahayag, kamatuoran, koreksyon, ug panudlo nga mogiya nato ngadto sa kaluwasan. Mahibaloan usab nila nga kon kita magtuon sa mga kasulatan matag adlaw, madawat nato ang “buhi nga tubig” o espirituhanong pag-amuma, nga atong gikinahanglan.

Day 4 (Pasiuna ug Kinatibuk-ang Kahulugan sa Bag-ong Tugon)

Makat-on ang mga estudyante kon mapamilyar nila ang masaysayon ug kultural nga kinatibuk-ang kahulugan sa Bag-ong Tugon, mas makasabut sila ug makagamit sa mga pagtulun-an niini. Makat-on usab sila nga si Jesukristo, gipadala aron sa pagluwas sa tanang mga katawhan ug nga kon kita moduol ngadto ni Jesukristo, makabaton kita og dakong tinguha sa pagdapit sa uban sa pagduol ngadto Kaniya.

Pasiuna

Kini nga leksyon gitumong sa pag-andam ug pagdasig sa mga estudyante sa pagtuon sa Bag-ong Tugon pinaagi sa pagpaila ngadto nila sa duha ka importante nga tema nga makita sa mga pagtulun-an ni Jesukristo ug sa Iyang karaang mga Apostoles. Samtang ang mga estudyante magtuon sa Bag-ong Tugon, makat-unan nila unsaon sa pagtubag ang gibalikbalik nga imbitasyon sa Manluluwas sa pagduol ngadto Kaniya ug pagdawat sa Iyang tabang ug direksyon sa ilang mga kinabuhi.

Mga Sugyot alang sa Pagtudlo

Pasiuna sa Bag-ong Tugon

Ang Bag-ong Tugon motabang nato sa pagduol ni Kristo

Sa dili pa ang klase, isulat ang mosunod nga mga pangutana diha sa pisara: Unsa ang pipila ka mga luwan nga nasinati sa kabatan-onan sa atong panahon?

Pagdala diha sa klase og walay sulod nga kahon o backpack ug bug-at nga mga butang nga isulod sa kahon o backpack, sama sa dagko nga mga bato o mga libro. Dapita ang usa ka estudyante sa pagduol sa atubangan sa klasehanan ug hangyoa siya sa paggunit sa kahon o pagbutang sa backpack sa likod. Hangyoa ang klase sa pagtubag sa pangutana nga gisulat sa pisara, ug hangyoa ang laing estudyante sa pagsulat sa mga tubag sa mga estudyante diha sa pisara. Human sa matag tubag, isulod ang bug-at nga butang diha sa kahon o backpack hangtud nga mapuno kini.

• Unsay inyong bation kon kamo ang magdala niini nga luwan sa tibuok adlaw?

Hangyoa ang mga estudyante sa pagpasabut sa mga hagit o mga kalisud nga ang pipila sa mga luwan nga gilista sa pisara makaapekto sa usa ka tawo.

Ipasabut nga ang Bag-ong Tugon nagtudlo kanato mahitungod sa pangalagad ni Jesukristo sa mortal pa siya ug human sa pagkabanhaw, lakip sa Iyang mga pagtulun-an, mga milagro, maulaong sakripisyo, ug mga pagbisita sa unang mga tinun-an sa simbahan. Sa kinatibuk-an sa Iyang mga pagtulun-an ug mga inter-aksyon sa uban mao ang balik-balik nga kamatuoran nga makatabang sa atong gipas-an nga luwan.

Ipasabut nga ang Mateo 11 naglakip sa ehemplo niining importante nga tema nga makita kanunay sa mga estudyante sa ilang pagtuon sa Bag-ong Tugon. Dapita ang usa ka estudyante sa pagbasa og kusog sa Mateo 11:28. Hangyoa ang klase sa pagsunod, mangita sa imbitasyon sa Manluluwas niadtong kinsa nagpas-an og lisud nga mga luwan.

• Unsa sa inyong hunahuna ang gipasabut sa nabudlay ug nabug-atan?

• Unsa ang gisulti sa Manluluwas nga kinahanglan natong buhaton aron makadawat sa Iyang kapahulayan? (Gamit ang mga pulong sa mga estudyante, isulat ang mosunod nga baruganan sa pisara: Kon kita moduol ngadto ni Kristo uban sa atong mga luwan, Siya mohatag nato og kapahulayan.)

• Unsa sa inyong hunahuna ang gipasabut sa pagduol ngadto ni Jesukristo?

Sa pagtabang sa mga estudyante nga makasabut unsa ang gipasabut sa pagduol ngadto ni Kristo, pagdapit og usa ka studyante sa pagbasa og kusog sa Mateo 11:29–30. Hangyoa ang klase sa pagsunod, mangita sa mga instruksyon sa Manluluwas niadtong kinsa nagtinguha sa pagduol ngadto Kaniya.

• Sumala niini nga mga bersikulo, unsay atong kinahanglan nga buhaton aron sa pagduol ngadto ni Kristo?

Pagdrowing og litrato sa usa ka yugo sa baka diha sa pisara, o ipakita ang litrato sa usa ka yugo.

Ipasabut nga ang yugo usa ka kahoy nga naghiusa sa duha ka parisan nga baka o lain nga mga hayop, nga makahimo kanila sa pagbitad og dungan sa luwan.

• Unsay katuyoan ug benepisyo sa usa ka yugo? (Bisan og ang yugo bug-at o usa ka luwan, kini makapahiusa sa duha ka hayop sa pagtingob sa ilang gahum ug kusog, sa ingon makadugang sa ilang kamapuslanon.)

• Unsa sa imong hunahuna ang gipasabut sa pagdala ngari nato sa yugo sa Manluluwas?

Dapita ang usa ka estudyante sa pagbasa og kusog sa mosunod nga pahayag ni Elder David A. Bednar sa Korum sa Napulog Duha ka mga Apostoles. Hangyoa ang klase sa pagpaminaw kon unsaon nato sa pagdala sa yugo sa Manluluwas ngari nato ug unsa nga mga panalangin ang atong madawat kon atong buhaton.

“Ang yugo nagbutang sa mga hayop nga mag-abay aron sila makalihok og dungan aron mahimo ang usa ka buhat.

“Hunahunaa ang talagsaong indibidwal nga pagdapit sa Ginoo nga ‘isangon ninyo ang akong yugo diha kaninyo.’ Ang paghimo ug paghupot og sagradong mga pakigsaad nagyugo kanato ngadto ug uban ni Ginoong Jesukristo. Sa tinuod nga kahulugan, ang Manluluwas nagtawag kanato sa pagsalig diha ug pagbitad og dungan uban Kaniya, bisan tuod ang atong labing maayo nga paningkamot dili makatumbas ug dili ikatandi sa Iya. Samtang kita nagsalig ug nagbitad sa atong luwan uban Kaniya panahon sa atong panaw sa mortalidad, sa tinuod masayon ang Iyang yugo ug magaan ang Iyang luwan.

“Kita dili ug dili gayud kinahanglan nga mag-inusara. Makalahutay kita sa atong inadlaw nga mga kinabuhi uban sa langitnong panabang. Pinaagi sa Pag-ula sa Manluluwas makadawat kita og kapasidad ug ‘kalig-on lapas sa atong kaugalingon’ (‘Lord, I Would Follow Thee,’ Hymns, no. 220)” (“Makadaug sa Ilang mga Alantuson uban sa Kasayon,” Ensign or Liahona, Mayo 2014, 88).

• Unsay “nagyugo” nato ngadto sa Manluluwas nga si Jesukristo?

• Sumala ni Elder Bednar, unsa ang mga panalangin nga nayugo ngadto sa Manluluwas?

Itudlo nga ang saad sa Maluluwas sa “kapahulayan” sa Mateo 11:28–29 wala magpasabut nga Iyang kuhaon ang atong mga problema o mga hagit. Kasagaran, ang Manluluwas mohatag nato sa kalinaw ug kalig-on nga atong gikinahanglan sa pagbuntog o paglahutay sa atong mga pagsulay, sa ingon nahimong magaan ang atong luwan. Kon kita matinud-anon sa mga hagit sa pagka-mortal, ang pinakataas nga pahulay nga atong madawat mao ang kahimayaan uban sa Dios (tan-awa sa D&P 84:23–24).

Hangyoa ang mga estudyante sa pagpamalandong sa unsa nga paagi ang Manluluwas mihatag nila og kapahulayan kon sila moduol ngadto Kaniya. Dapita ang pipila ka mga estudyante sa pagpakigbahin sa ilang mga kasinatian uban sa klase.

Dapita ang mga estudyante sa paghimo og mga tumong kabahin sa mga paagi nga sila makaduol ngadto ni Jesukristo niining tibuok tuig sa pagtuon sa Bag-ong Tugon. Awhaga sila nga ilakip sa ilang mga tumong ang pagtuon sa mga kasulatan kada adlaw ug pagbasa sa tibuok Bag-ong Tugon niining tuiga.

Usa ka Mubo nga Preview sa Bag-ong Tugon

Ang mga basahon sa Bag-ong Tugon nagpamatuod nga si Jesukristo mao ang Anak sa Dios ug atong Manluluwas

Isulat ang mga pangalan sa mga magsusulat sa upat ka mga Ebanghelyo diha sa pisara: Mateo, Marcos, Lucas, ug Juan. Ipasabut nga ang matag usa niini nga mga tinun-an ni Jesukristo mirekord sa mga panghitabo ug mga pagtulun-an gikan sa kinabuhi sa Manluluwas. Ang ilang mga rekord gitawag og mga Ebanghelyo. Ang pulong ebanghelyo nagpasabut og “maayong balita.” Itudlo nga ang Hubad ni Joseph Smith miusab sa ulohan sa matag Ebanghelyo ngadto sa pagpamatuod, ingon nga “Ang Pagpamatuod ni San Matthew.”

• Ngano nga mapuslanon nga dunay mas daghang ebanghelyo o pagpamatuod sa kinabuhi ug mga pagtulun-an ni Jesukristo?

Ipasabut nga bisan ang upat ka mga Ebanghelyo magkalahi sa pipila ka mga detalye ug panlantaw, kining tanan naghisgot sa mga panghitabo sa kinabuhi ug yutan-ong pangalagad sa Manluluwas taliwala sa mga Judeo. Ang tanang upat ka mga Ebanghelyo nagpamatuod nga si Jesukristo mao ang anak sa Dios ug ang Manunubos niining kalibutan. Ipatan-aw sa mga estudyante ang tsart sa “Ang Mortal nga Kinabuhi ni Jesukristo sa Lakbit” sa katapusan sa Unit 1. Day 4 nga leksyon. Dapita ang mga estudyante sa paggamit sa tsart sa pag-ila sa pipila ka dagkong mga panghitabo sa mortal nga pangalagad sa Manluluwas.

• Sumala sa tsart, unsa ka dugay ang pangalagad sa Manluluwas?

• Diin man ang Manluluwas sa kasagaran sa Iyang pangalagad?

Dapita ang mga estudyante sa paggamit niini nga tsart aron mas makasabut sa kinatibuk-ang kahulugan sa upat ka mga Ebanghelyo samtang sila magtuon sa Bag-ong Tugon.

Dapita ang mga estudyante sa pag-abli sa talaan sa mga sulod sa Biblia. Ipasabut nga samtang ang mga Ebanghelyo naghisgot sa pangalagad sa Manluluwas, ang mga libro gikan sa Mga Buhat hangtud sa Pinadayag nagrekord sa pangalagad sa karaang mga Apostoles ni Kristo human sa Iyang Pagkalansang, Pagkabanhaw, ug Pagkayab. Kini nga mga Apostoles mopanaw sa tibuok yuta sa Israel ug sa Gingharian sa Roma magsangyaw sa ebanghelyo ug magtukod sa mga sanga sa Simbahan. Pinaagi sa pagtuon sa mga buhat ug mga sinulat niini nga mga Apostoles, atong mapalig-on ang atong pagtuo sa Manluluwas ug makat-on unsaon sa pagdawat sa mga panalangin sa Iyang Pag-ula. Makita usab nato kon unsa ka duol Ang Simbahan ni Jesukristo sa mga Santos sa Ulahing mga Adlaw sa karaan nga simbahan ni Jesukristo.

Hunahunaa ang pagpakigbahin sa inyong pagpamatuod sa bag-ong Tugon, ug dapita ang mga estudyante sa pagpangita sa kamatuoran nga mopanalangin nila samtang sila magtuon sa kinabuhi ug mga pagtulun-an ni Jesukristo ug sa Iyang mga Apsotoles diha sa Bag-ong Tugon.

Sunod nga Unit (Mateo 1–5)

Ipasabut nga sa sunod nga unit ang mga estudyante magtuon sa pipila ka mga detalye nga naglibut sa pagkatawo sa Anak sa Dios. Magtuon usab sila sa mga pagtulun-an ni Jesukristo kon unsaon nga tinud-anay nga magmalipayon niini nga kinabuhi ug mahimong hingpit sama sa Langitnong Amahan.