Leksyon 101: Mga Taga-Roma 8–11

Leksyon 101

Mga Taga-Roma 8–11

Pasiuna

Si Pablo mitudlo mahitungod sa mga panalangin sa pagkahimong matawo pag-usab sa espirituhanong paagi ug pagtugyan ngadto sa kabubut-on sa Langitnong Amahan. Mitudlo usab siya mahitungod sa pagsalikway sa Israel sa pakigsaad sa Dios ug mahitungod sa pagsabwag sa ebanghelyo diha sa mga Hentil.

Mga Sugyot alang sa Pagtudlo

Mga Taga-Roma 8

Gihulagway ni Pablo ang mga panalangin sa pagkahimong matawo pag-usab sa espirituhanong paagi

Sugdi ang leksyon pinaagi sa pagpangutana sa mosunod nga mga pangutana:

Unsa ang kabilin?
Kon makapanunod kamo og mga katigayunan ni bisan kinsa nga tawo, kang kansang katigayunan ang inyong pilion ug ngano?
Kinsa ang sagad nga makapanunod sa mga katigayunan sa usa ka tawo?

Hangyoa ang mga estudyante sa pagkonsiderar sa mga panalangin nga madawat sa usa ka tawo isip tigpanunod sa tanan nga gipanag-iya sa Langitnong Amahan. Dapita ang mga estudyante sa pagpangita samtang sila magtuon sa Mga Taga-Roma 8:1–18 alang sa unsa ang atong gikinahanglang buhaton aron makapanunod sa tanang unsay anaa sa Langitnong Amahan.

Dapita ang pipila ka estudyante nga magpuli-pulig basa og kusog sa Mga Taga-Roma 8:1, 5–7, 13. Hangyoa ang klase sa pagsunod, nga mangita sa unsay gitudlo ni Pablo mahitungod sa nagakinabuhi “uyon sa unod,” o pagtugyan ngadto sa kalagmitan sa pagpakasala, ug nagakinabuhi “uyon sa Espiritu” (bersikulo 5).

Unsa ang ipasabut sa “panghunahuna alang sa unod”? (bersikulo 6). (Aron matutokan ang pagtagbaw sa mga pagbati ug mga kahigal sa pisikal nga lawas.)
Unsa ang ipasabut niining “panghunahuna alang sa espiritu”? (bersikulo 6).

Ipasabut nga aron “ patyon ang mga binuhatan sa lawas” (bersikulo 13) nagpasabut sa pagpatay o pagpa-undang sa mga kahuyang, mga tintasyon, ug mga sala nga may kalabut sa atong mortal nga lawas (tan-awa sa Mosiah 3:19).

Unsa nga baruganan ang atong makat-unan gikan sa bersikulo 13 kon unsa ang makatabang nato sa pagbuntog sa kalagmitan sa kinaiyanhon sa tawo sa pagpakasala? (Tabangi ang mga estudyante nga mahibaloan ang mosunod nga baruganan: Kon mosunod kita sa impluwensya sa Espiritu, mabuntog nato ang kalagmitan sa kinaiyanhon nga tawo sa pagpakasala. Isulat kini nga baruganan diha sa pisara.)

Dapita ang usa ka estudyante sa pagbasa og kusog sa Mga Taga-Roma 8:14–16. Hangyoa ang klase sa pagsunod, mangita kon giunsa ni Pablo pagpasabut niadtong kinsa nagsunod sa Espiritu.

Sa unsang paagi nga mipasabut si Pablo niadtong kinsa nagsunod sa Espiritu? (Ipasabut nga ang pulong anak nga mga lalaki niining kinatibuk-ang kahulugan nangahulugan sa mga anak nga lalaki ug babaye [tan-awa sa D&P 25:1].)

Ipasabut ang mga pulong nga “Espiritu sa pagkainanak” (bersikulo 15). Ipasabut nga ang “atong espiritu” (bersikulo 16), nagpasabut sa atong espiritu nga mga lawas, gilalang pinaagi sa Langitnong Amahan, naghimo sa kada tawo sa literal usa ka espiritu nga anak sa Langitnong Amahan. Hinoon, kini pinaagi sa paghimo og mga pakigsaad uban sa Dios pinaagi sa mga ordinansa ug dayon pagtuman niadtong mga pakigsaad nga ang mga tawo espirituhanon nga natawo pag-usab, o sinagup, isip Iyang anak nga mga lalaki ug mga babaye diha sa pakigsaad sa ebanghelyo. Ang pakig-uban sa Espiritu Santo nagpakita nga ang ingon nga mga tawo dili lang mga anak nga espiritu sa Dios pinaagi sa hiyas sa paglalang, apan sila usab mao ang Iyang mga anak sa pakigsaad.

Dapita ang usa ka estudyante sa pagbasa og kusog sa Mga Taga-Roma 8:17–18. Hangyoa ang klase sa pagsunod, mangita kon unsay sangputan sa mga anak sa pakigsaad sa Dios.

Unsay mahimong sangputan sa mga anak sa pakigsaad sa Dios? (Isulat sa pisara ang mosunod nga baruganan, pagbilin og blangko isip puli sa pulong nga pagkamatinud-anon: Kon kita matinud-anon nga mga anak sa pakigsaad sa Dios, mahimo kita nga tigpanunod uban ni Jesukristo sa tanan nga iya sa Langitnong Amahan.)
Unsa ang usa ka kaubang tigpanunod? (Usa ka tawo kinsa makadawat og usa ka bahin nga kabilin uban sa mga tigpanunod.)
Sumala sa bersikulo 17, Unsay kinahanglan buhaton sa mga anak sa pakigsaad sa Dios aron mahimong tigpanunod uban ni Kristo?

Ipasabut nga ang “pag-antus uban kang [Jesukristo]” (bersikulo 17) wala nangahulugan nga atong antuson unsay nahimo sa Manluluwas isip kabahin sa Iyang maulaon nga sakripisyo. Hinoon, sama sa Manluluwas, angay natong pagadid-an ang atong mga kaugalingon sa tanang dili balaanon, maghupot sa mga sugo, ug matinud-anon nga molahutay sa pagbatok (tan-awa sa Mateo 16:24; Hubad ni Joseph Smith , Mateo 16:26 [diha sa Giya sa mga Kasulatan]). Idugang ang pulong matinud-anon aron pagkompleto sa baruganan diha sa pisara. Pagdrowing og tulo ka kolum nga tsart diha sa pisara. Butangi og pangalan ang unang kolum Kinahanglanon, ang kolum sa tunga Oposisyon, ug ang ikatulo nga kolum Kabilin. Ilista ang mga tubag sa mga estudyante sa mosunod nga mga pangutana diha sa angay nga mga kolum.

Unsa ang pipila ka butang nga gikinahanglan nga atong buhaton aron makonsiderar nga matinud-anong mga anak sa pakigsaad sa Dios?
Unsa nga mga ehemplo sa oposisyon nga atong masinati samtang maningkamot kita sa pagsunod isip matinud-anong mga anak sa pakigsaad sa Dios?
Unsa nga mga panalangin nga atong mapanunod gikan sa Langitnong Amahan kon kita maningkamot nga magpakabuhi sama sa Iyang matinud-anong mga anak sa pakigsaad? (Usa ka posible nga tubag mao nga kita mahimong sama sa Langitnong Amahan [tan-awa sa Mga Taga-Roma 8:17].)

Hangyoa ang mga estudyante sa pagpamalandong sa mga nalista diha sa pisara.

Human sa pagbasa sa mga pagtulun-an ni Pablo diha sa bersikulo 18, sa unsa nga paagi nga ang pagka-manununod ni Kristo ikatandi ngadto sa mga panalangin? Ngano?

Ipasabut nga diha sa Mga Taga-Roma 8:19–30, atong mabasa nga si Pablo mitudlo nga ang Espiritu motabang kanato sa atong mga kahuyang ug magtabang kanato nga masayud kon unsa ang iampo. Atong mabasa usab nga si Jesukristo gitawag didto sa kinabuhi nga wala pa dinhi sa yuta nga mahimong Manluluwas sa mga anak sa Dios (tan-awa sa Joseph Smith Translation, Mga Taga-Roma 8:29–30).

Pahinumdom: Sa Mga Taga-Roma 8:29–30, ang pulong predestinate nagpasabut nga gi-orden nang daan o gitawag. Ang mga estudyante magtuon nang daan sa mga pagtulun-an ni Pablo bahin sa pag-orden nang daan diha sa leksyon sa Mga Taga-Efeso 1.

Pagdapit og pipila ka mga estudyante nga magbanos-banos sa pagbasa og kusog gikan sa Mga Taga-Roma 8:28, 31–39. Hangyoa ang klase sa pagsunod, nga mangita sa kamatuoran nga gitudlo ni Pablo mahitungod sa gugma sa Dios nga may kalabutan sa oposisyon, mga hagit, ug kasakit sa mortalidad. Ipasabut nga sa Joseph Smith Translation sa Mga Taga-Roma 8:31 mohulip sa mga pulong “nga batok sa” uban sa “makabuntog”.

Unsa nga kamatuoran ang atong makat-unan gikan niini nga mga bersikulo? (Ang mga estudyante mahimong moila sa pipila ka mga baruganan, lakip sa mosunod: Kon atong gihigugma ang Dios, tanang mga butang molihok alang sa atong kaayohan. Pinaagi kang Jesukristo mahimo natong mabuntog ang tanang mga hagit ug kasakit sa mortalidad. Walay makapabulag kanato gikan sa gugma sa Dios, nga makita diha sa Pag-ula ni Jesukristo.)
Sa unsa nga paagi nga si Jesukristo ug ang Iyang mga pagtulun-an makatabang nato sa pagbuntog sa mga hagit ug mga kasakit sa pagkamortal?
Sa paghunahuna sa mga hagit ug mga kalisdanan nga inyong nasinati sa mortalidad, unsa nga mga pamahayag dinhi niini nga mga bersikulo ang mipatigbabaw para kaninyo? Ngano?
Sa unsang paagi nga inyong nasinati ang gugma sa Dios taliwala sa inyong mga hagit ug mga kalisdanan?

Dapita ang mga estudyante sa pagsulat diha sa ilang mga class notebook o mga scripture study journal kon unsa nga pag-aghat ang ilang nabati nga buhaton aron nga, pinaagi ni Jesukristo, sila makabuntog sa ilang mga hagit ug mga kalisdanan. Awhaga ang mga estudyante nga i-apply unsay ilang gisulat.

Mga Taga-Roma 9–11

Si Pablo nagtudlo mahitungod sa pagsalikway sa Israel sa pakigsaad sa Dios ug sa pagdala sa ebanghelyo ngadto sa mga Hentil

Hangyoa ang mga estudyante sa pagpamalandong kon unsaon nila sa pagtubag ang mosunod nga mga kahimtang:

Giubanan nimo ang imong bishop sa pagbisita sa usa ka batan-ong lalaki kansang pamilya aktibo sa Simbahan, apan siya dili. Sa dihang ang imong bishop sa mabinationg paagi naningkamot sa pagtabang sa batan-ong lalaki nga masabtan ang mga sangputanan sa dili pagsunod sa ebanghelyo, ang batan-ong lalaki miingon, “Ayaw og kabalaka. Nabunyagan na ko, ug ang akong mga ginikanan aktibo. Ang Dios dili mopugong sa bisan unsang panalangin diri kanako.”
Bag-ohay lang ka nga nakighigala og usa ka batan-ong babaye sa laing tinuohan. Nangutana siya mahitungod sa mga baruganan nga inyong gisunod. Human nimo mahulagway ang pipila ka mga sumbanan sa Ginoo, miingon siya, “Wala ko makasabut nganong buhaton ninyo kanang tanan. Ang kinahanglan lang nimong buhaton aron maluwas mao ang pagtuo diha ni Jesukristo.”

Dapita ang mga estudyante sa pagpangita sa kamatuoran samtang sila magtuon sa Mga Taga-Roma 9–11 nga makatabang kanila nga makasabut unsa ang gikinahanglan aron madawat ang mga panalangin sa ebanghelyo.

Dapita ang usa ka estudyante sa pagbasa sa mosunod nga pagpasabut mahitungod sa mga pagtulun-an ni Pablo diha sa Mga Taga-Roma 9–11:

Sama sa narekord diha sa Mga Taga-Roma 9–11, si Pablo migamit sa mga pulong nga Israel ug mga Israelite imbis sa mga Judeo sa paghisgot og mga pagpili nga nahimo sa daghan nga mga Judeo. Ang mga anak sa Dios sa pakigsaad usahay mao ang gipasabut isip ang balay ni Israel. Sa kapanahonan sa Daang Tugon, ang Dios mipili sa mga kaliwatan ni Jacob, o Israel, nga mahimong kabahin sa Iyang pakigsaad uban kang Abraham (tan-awa sa Mga Taga Roma 9:4–5), nga naglakip sa dakong mga panalangin sama sa ebanghelyo, sa awtoridad sa priesthood, sa kinabuhing dayon, mahangturong mga kaliwatan, usa ka yuta nga kabilin, ug ang responsibilidad sa pagpanalangin sa kalibutan sa ebanghelyo.

Dapita ang usa ka estudyante sa pagbasa og kusog sa Mga Taga-Roma 9:6, 8. Hangyoa ang klase sa pagsunod, nga mangita kon unsay gitudlo ni Pablo mahitungod sa mga sakop sa balay ni Israel.

Unsa kaha ang ipasabut ni Pablo sa “dili tanang misanay gikan kang Israel, nasakop sa Israel”? (bersikulo 6). (Daghang mga Judeo nga sa sayop nga paagi misalig sa ilang kaliwatan pinaagi ni Abraham nga nagpasalig kanila sa mga panalangin sa pakigsaad.)

Ipasabut nga sa Mga Taga-Roma 9:25–30, atong mabasa nga si Pablo mitudlo nga ang mga Hentil kinsa mipasakop sa Simbahan mahimong makadawat sa mga panalangin sa pakigsaad ug mahimong matarung pinaagi sa paggamit sa hugot nga pagtuo diha ni Jesukristo.

Dapita ang pipila ka mga estudyante nga magpuli-puli sa pagbasa og kusog gikan sa Mga Taga-Roma 9:31–33; 10:1–4. Hangyoa ang klase sa pagsunod, nga mangita kon sa unsang paagi nga ang pipila sa mga Israelite sa panahon ni Pablo nagtinguha nga mamahimong matarung diha sa atubangan sa Dios. Ipasabut nga “ang pagkamatarung nga pinasikad sa kasugoan” (Mga Taga-Roma 9:31) nagpasabut sa balaod ni Moises; ang “batong makapandol” (Mga Taga-Roma 9:32, 33) mao si Jesukristo; ug “ang pagkamatarung nga nagagikan sa Dios” (Mga Taga-Roma 10:3) nagpasabut ngadto ni Jesukristo ug sa Iyang ebanghelyo.

Sumala sa Mga Taga-Roma 9:31–33, sa unsang paagi ang pipila ka mga Israelite mitinguha nga mahimo nga matarung atubangan sa Dios? (Pinaagi sa estriktong paghimo sa mga buhat sa balaod ni Moises.)
Sumala sa Mga Taga-Roma 10:3–4, unsa ang gisalikway sa mga Israelite? (Si Jesukristo ug ang pagkamatarung nga nahimong posible pinaagi Kaniya.)

Ipasabut nga sama sa narekord diha sa Mga Taga-Roma 10:8–13, si Pablo mipasabut kon unsaon “sa pagkamatarung nga pinaagi sa pagtuo” (Mga Taga-Roma 9:30) maangkon. Dapita ang pipila ka mga estudyante nga magpuli-puli sa pagbasa og kusog sa Mga Taga-Roma 10:8–13. Hangyoa ang klase sa pagsunod, nga mangita kon sa unsa nga paagi nga mabatonan kining pagkamatarung.

Unsa ang kinahanglan gayud nga buhaton sa usa ka tawo aron maangkon ang pagkamatarung nga naggikan sa hugot nga pagtuo?

Ipasabut nga ang Gresyanhon nga pulong nga gihubad isip magasugid diha sa bersikulo 9 nagpasabut sa usa ka dayag nga pag-ila sa pagdawat, o pakigsaad, ug ang Gresyanhon nga pulong nga gihubad isip nagtuo nagpasabut sa usa ka masaligong pasalig. Kining lawom nga pagsalig sa Manluluwas modala sa katawhan ngadto sa dayag nga pag-ila sa ilang pagdawat Kaniya sa paagi nga Iyang gitudlo. Kining gi-orden nga mga paagi naglakip sa pagsunod sa mga sugo, paghinulsol, ug pagdawat sa makaluwas nga mga ordinansa sama sa bunyag ug sa gasa sa Espiritu Santo.

Sumala sa mga pagtulun-an ni Pablo, unsay angay natong buhaton kon kita nagtinguha nga makadawat sa mga panalangin sa pakigsaad sa Dios, lakip ang kaluwasan? (Tabangi ang mga estudyante nga mahibaloan ang mosunod nga baruganan: Kon kita modawat ug mosunod ni Jesukristo ug sa Iyang ebanghelyo, kita makadawat sa mga panalangin sa pakigsaad sa Dios ug maluwas. Isulat kini nga baruganan diha sa pisara.)

Ipasabut nga pipila ka mga tawo ang naggamit sa Mga Taga-Roma 10:9, 13 sa pag-angkon sa tanang angay natong buhaton aron maluwas mao ang pagsugid sa atong pagtuo diha ni Jesukristo. Pahinumdumi ang mga estudyante sa mga sitwasyon nga gipakita sa sinugdanan sa leksyon.

Sa unsang paagi nga ang mga kamatuoran niining leksyon makatabang ninyo nga makatubag niining sitwasyon?

I-summarize ang nahabilin sa Mga Taga-Roma 10–11 pinaagi sa pagpasabut nga si Pablo nagtudlo nga ang pagkadungog sa pulong sa Dios maoy mahinungdanon sa pagpalambo sa pagtuo diha kang Kristo. Migamit Siya og usa ka analohiya sa pagsumpay sa mga sanga gikan sa usa ka ihalas nga kahoy nga oliba ngadto sa usa ka maayo nga kahoy nga oliba sa pagrepresentar sa pagsunod sa mga Hentil ngadto sa balay ni Israel (tan-awa usab sa Jacob 5:3–14). Mitudlo usab Siya nga ang ebanghelyo itanyag usab ngadto sa mga Judeo.

Tapusa pinaagi sa pagpamatuod sa mga kamatuoran nga gitudlo niini nga leksyon.

Komentaryo ug Background nga Impormasyon

Mga Taga-Roma 8:14–17. “Kita mga anak sa Dios”

Si Elder Jeffrey R. Holland sa Korum sa Napulog Duha ka mga Apostoles mipamatuod sa atong balaanong panulundon isip mga anak sa Dios:

“Ang inyong Amahan sa Langit nakahibalo sa inyong ngalan ug nakahibalo sa inyong kahimtang. Nakadungog Siya sa inyong mga pag-ampo. Nakahibalo Siya sa inyong mga gilauman ug mga damgo, lakip na sa inyong mga kahadlok ug mga kahigawad. Ug nakahibalo Siya kon unsay inyong maabut pinaagi sa pagtuo diha Kaniya. Tungod niining balaanong panulundon kamo, uban sa tanan ninyong espirituhanong mga kaigsoonan, adunay hingpit nga kaangayan diha sa Iyang panan-aw ug gitugutan pinaagi sa pagkamasulundon nga mahimong usa ka tinuod nga manununod sa Iyang mahangturon nga gingharian, usa ka “[manununod] sa Dios, ug isigka-[manununod] uban kang Kristo” [Mga Taga-Roma 8:17]. Tinguhaa nga makasabut sa kaimportante niining mga doktrina (“Ngadto sa mga Batan-ong Babaye,” Ensign o Liahona, Nob. 2005, 28).

“Ang mga kasulatan naghisgut kanato isip ‘mga anak sa Dios’ labaw sa pagsabut (Mga Taga-Roma 8:16). Una, matag tawo literal nga pinalanggang anak nga espiritu sa Langitnong Amahan (tan-awa sa Malaquias 2:10; Mga Buhat 17:29; Mga Hebreohanon 12:9; ‘Ang Pamilya: Usa ka Pamahayag ngadto sa Kalibutan,’ Ensign o Liahona, Nob. 2010, 129). Ikaduha, kita ‘natawo pag-usab’ isip mga anak sa Dios pinaagi sa pagpakigsaad nga relasyon kon kita mopakita og hugot nga pagtuo kang Jesukristo, maghinulsol, mabunyagan, ug modawat sa Espiritu Santo [ug sa ubang mga ordinansa] (tan-awa sa Juan 1:12; Mga Taga-Galacia 3:26–29; Mosiah 5:7; D&P 11:30; [D&P 84: 33–38;] Moises 6: 65–68)” (New Testament Student Manual [manwal sa Church Educational System, 2014],°348).

Dili lamang nga ang Espiritu mopamatuod nga kita mga anak sa pakigsaad sa Dios, apan kini mahimo usab mopamatuod sa atong mga espiritu nga kita tinuoray pinalangga nga mga anak sa Dios ug nga kita nagpuyo uban Kaniya sa wala pa kita matawo.

Mga Taga-Roma 8:15. “Ang Espiritu sa pagkainanak”

“Pagsagop komon didto sa Roma ug mahimong usa ka konsepto nga pamilyar ang mga magbabasa ni Pablo. Ang usa ka tawo nga legal nga misagop og usa ka tawo mihatag nianang tawhana sa tanang mga katungod ug mga pribilihiyo nga madawat sa usa ka natural-born. Busa, kon atong madawat ‘ang Espiritu sa pagkainanak’ (Mga Taga-Roma 8:15) pinaagi sa pagbutang sa mga pakigsaad sa ebanghelyo, kita nahimong mga anak sa Dios ug ‘isigkamanununod uban kang Kristo’ (Mga Taga-Roma 8:17)” (New Testament Student Manual [manwal sa Church Educational System, 2014], 348).

Diha sa Basahon ni Mormon, Si Haring Benjamin mitudlo usab kon sa unsang paagi kita mahimong “mga anak ni Kristo” (tan-awa sa Mosiah 5:5–10). Si Presidente Joseph Fielding Smith mitudlo nga si Jesukristo usab “mahimong atong Amahan” tungod kay Siya “nagtanyag kanato og kinabuhi, kinabuhing dayon, pinaagi sa pag-ula nga iyang gibuhat alang kanato.” Si Presidente Smith mipasabut, “Kita mahimong mga anak, lalaki ug babaye nga mga anak ni Jesukristo, pinaagi sa atong mga pakigsaad nga magmasulundon ngadto kaniya” (Doctrines of Salvation, comp. Bruce R. McConkie, 3 vols. [1954–56], 1:29).

Mga Taga-Roma 8:31–32. “Kon ang Dios dapig kanato, kinsa pa man ang batok kanato?”

“Si Pablo mitudlo nga ang Pag-ula ni Kristo nagpakita nga ang ‘Dios [mao] kita’ ug gitugyan ngari kanato ug sa atong mahangturong kaayohan. Tungod kay ang Dios mihatag sa Iyang Bugtong Anak alang kanato, kita makasiguro nga ang Dios magpadayon sa pagtrabaho alang sa atong kaluwasan ug pag-andam kanato nga makapanunod sa tanan nga Iyang gustong ihatag kanato. Si Elder Jeffrey R. Holland sa samang paagi miawhag sa mga miyembro sa Simbahan:

“‘Kon hunahunaon ang dili daling sabton nga Pagkamatay sa krus ug Pag-ula, ako mosaad kaninyo nga siya dili makaako nga motalikod kanato karon. … Mga kaigsoonan, bisan unsa pa ang inyong gikabalak-an, palihug ayaw pag-undang’ (‘Mga Butang nga Guba Mahimong Ayohon,’ Ensign o Liahona, Mayo 2006,°71)” (New Testament Student Manual [manwal sa Church Educational System, 2014],°350).

Mga Taga-Roma 8:29–30; 9:11; 11:2, 5,7, 28. Predestination, gi-orden nang daan, ug pagpili

“Sa Mga Taga-Roma 8:29–30, ang pulong nga Gresyanhon gihubad nga predestinate nagpasabut ‘nga gitudlo o gitino nang daan’ ug nagpasabut ngadto sa pipila ka mga tawo nga gi-orden nang daan, base sa daan nang kasayuran sa Dios, sa pagsunod ni Jesukristo ug mahimong sama Kaniya (tan-awa usab sa Mga Taga-Efeso 1:3–4; 1 Pedro 1:2). ‘Ang pagka-inordinahan nang daan wala mogarantiya nga ang mga indibidwal makadawat sa pihong mga calling o mga responsibilidad. Ang maong mga oportunidad moabut niining kinabuhia isip resulta sa matarung nga paggamit sa kabubut-on, sama nga ang pagka-inordinahan nang daan miabut isip resulta sa pagkamatarung diha sa kinabuhi sa wala pa dinhi sa yuta’ (‘Pagka-inordinahan nang Daan,’ Matinud-anon sa Tinuohan: Usa ka Pakisayran sa Ebanghelyo [2004], 69; tan-awa usab sa Alma 13:3–4)” (New Testament Student Manual [manwal sa Church Educational System, 2014], 350).

Gipasabut sa Giya ngadto sa mga Kasulatan nga ang pagpili mao ang “usa ka teyolohikanhon nga termino nga nagpasabut sa pinili sa Dios sa balay ni Israel nga mga katawhan sa pakigsaad uban sa mga pribilihiyo ug mga responsibilidad, nga sila unta mahimo nga usa ka paagi nga panalangin ngadto sa tibuok kalibutan. …

“Ang gipili mao ang napili ‘sa wala pa ang katukuran sa kalibutan’, apan walay usa nga napili ngadto sa kinabuhing dayon nga walay kondisyon. Ang matag usa kinahanglan gayud, sa iyang kaugalingon, mopatalinghug sa ebanghelyo ug modawat sa mga ordinansa niini ug mga pakigsaad gikan sa mga kamot sa mga sulugoon sa Ginoo aron maangkon ang kaluwasan. Kon ang usa napili apan dili moserbisyo, ang iyang pagkapili mahimong kawang lamang, sama sa gipamahayag ni Pablo sa 2 Mga Taga-Cor. 6:1.

“… Usa ka ‘piniliay sa grasya’ nga gipamulong diha sa … Mga Taga-Rom. 11:1–5 adunay reference ngadto sa sitwasyon sa usa ka tawo diha sa mortalidad; nga mao ang, matawo sa usa ka panahon, sa usa ka dapit, ug diha sa kahimtang diin ang usa ka tawo moabut diha sa maayo nga panag-uyon sa ebanghelyo. Kini nga pagpili nahitabo didto sa kinabuhi sa wala pa dinhi sa yuta. Kadtong matinud-anon ug makugihon diha sa ebanghelyo sa mortalidad makadawat og mas labaw pa ka madanihon nga mga pagpili niining kinabuhi ug mahimo nga pinili sa Dios. Kini nakadawat sa saad sa usa ka kahingpitan sa himaya sa Dios sa kahangturan (D&P 84:33–41)” (Giya ngadto sa mga Kasulatan, “Pagpili”; tan-awa usab sa Alma 13:3–4).

Ang Propeta Joseph Smith mipasabut nga “ang walay kondisyon nga pagpili sa indibidwal sa kinabuhing dayon [predestination] wala gitudlo sa mga Apostoles. Ang Dios nagpili o predestinate, nga kadtong tanan nga mahimong luwason, kinahanglan maluwas diha kang Kristo Jesus, ug pinaagi sa pagsunod sa Ebanghelyo” (sa History of the Church, 4:360). Kana mao, ang tanang katawhan kinsa maluwas makadawat og kaluwasan pinaagi sa Pag-ula ni Jesukristo ug walay laing paagi.

Mga Taga-Roma 11:25. “Ang kahingpitan sa mga Hentil”

Si Elder Bruce R. McConkie sa Korum sa Napulog Duha ka mga Apostoles mipasabut kon unsay gipasabut sa “ang kahingpitan sa mga Hentil”:

“Dihay higayon o panahon nga gitudlo alang sa mga Judeo sa pagpaminaw sa pulong, ug dayon tagal sa panahon alang sa mga Hentil sa pag-una. Ang mga panahon sa mga Hentil mao ang yugto diin ang ebanghelyo diha kanila pinasikad sa pagpili, ug kini mopadayon hangtud sila makabaton og hingpit nga oportunidad sa pagdawat sa kamatuoran, o sa lain nga pagkasulti hangtud sa kahingpitan sa mga Hentil. Unya ang mensahe moadto na usab sa mga Judeo, nagpasabut ngadto sa mga Judeo isip usa ka nasud ug isip mga katawhan” (Doctrinal New Testament Commentary, 3 vols. [1965–73], 2:290).

Sa nag-unang mga siglo sa wala pa misulat si Pablo sa iyang mga epistola, si Nephi mitudlo sa iyang mga kaigsoonan nga kini pinaagi sa kahingpitan sa mga Hentil sa ulahing mga adlaw nga ang ebanghelyo pagadalhon ngadto sa iyang mga kaliwatan ug sa mga kaliwatan sa iyang mga igsoon. Kini makapahimo kanila nga “moabut sa kasayuran sa ilang Manunubos ug ang mga katuyoan sa iyang doktrina, nga sila masayud unsaon pagdangop ngadto kaniya ug maluwas.” (1 Nephi 15:14). Kini nga pagpundok sa binhi ni Lehi kabahin sa ulahing mga adlaw sa pagsumbak sa kinaiyanhon nga mga sanga balik ngadto sa kahoy nga oliba sama sa gipanagna ni Pablo ug Zenos (tan-awa sa Mga Taga-Roma 11:23–25; Jacob 5:52, 60, 63, 67–68).

Dihang ang anghel Moroni mipakita kang Propeta Joseph Smith niadtong 1823, si Moroni miingon nga “ang kahingpitan sa mga Hentil hapit na moabut” (Joseph Smith—Kasaysayan 1:41).