Mga Taga-Efeso 2–3

Pasiuna

Gitudloan ni Pablo ang mga Santos sa Efeso nga ang tanang makasasala mahimong maluwas pinaagi sa grasya sa Dios ug ang mga Judeo ug mga Hentil mahimong usa diha sa panimalay sa Dios. Gipasabut usab ni Pablo nga ang Simbahan ni Jesukristo gitukod sa usa ka pundasyon nga dunay mga apostoles ug mga propeta, ug gipakigbahin niya ang iyang tinguha nga ang mga Santos makasinati sa gugma ni Jesukristo.

Mga Sugyot alang sa Pagtudlo

Mga Taga-Efeso 2

Gitudlo ni Pablo sa unsang paagi ang dugo ni Jesukristo miluwas sa mga Judeo ug sa mga Hentil

Samtang magsugod ang klase, dapita ang usa o daghan pa sa imong mga estudyante (depende sa gidak-on sa imong klase) nga palingkuron sa salog sa lahi nga dapit sa classroom. Butangi og utlanan ang nahimutangan niining mga estudyante ug sa nahibilin nga klase gamit ang tape o hilo, ug dayon sugoa ang nabulag nga mga estudyante nga dili (una) sila motingog atol sa leksyon. Pangutan-a ang uban diha sa klase:

Unsa kaha ang gipakita niini nga sitwasyon mahitungod sa relasyon tali ninyo ug sa nabulag nga mga estudyante? (Nga ang usa ka pundok mas gipaboran kay sa uban.)
Sa inyong hunahuna unsa kaha ang gibati sa gibulag nga mga estudyante? Ngano man?

Hangyoa ang mga estudyante sa paghunahuna kon mibati na ba sila og ingon niini sa piho nga mga kahimtang sa kinabuhi.

Isulat ang mga pulong nga mga Hentil ug mga Judeo diha sa pisara, nga maghimo og duha ka mga kolum.

Base sa unsay inyong nakat-unan mahitungod sa sosyal nga mga kahimtang sa pipila ka branch sa Simbahan panahon sa pagpangalagad ni Pablo, asa nga label ang mohaum sa gibulag nga mga estudyante? (Mga Hentil.) Asa nga label ang mohaum sa wala ibulag sa klase? (Mga Judeo.)
Unsa man kaha ang hinungdan niini nga pagkabulag? (Ang ubang mga Judeo nagtuo nga tungod kay sila mga Israelite sa pagkatawo ug nangatuli, mas gipaburan sila sa Dios ug mas superyor kay sa mga kinabig nga mga Hentil.)

Dapita ang usa ka estudyante sa pagbasa og kusog sa Mga Taga-Efeso 2:1–3. Hangyoa ang klase sa pagsunod, nga mangita kon giunsa ni Pablo sa paghulagway ang espirituhanong kahimtang sa mga Santos nga Hentil (“kamo” sa mga bersikulo 1–2) ug sa mga Santos nga mga Judeo (“kita” diha sa bersikulo 3) sa wala pa sila makabig ngadto sa Manluluwas ug sa Iyang Simbahan. Ipasabut nga ang mga pulong nga “magbubuot sa kagamhanan sa kahanginan” diha sa bersikulo 2 nag-refer sa yawa ug sa dako niyang impluwensya sa tibuok kalibutan.

Sumala sa bersikulo 1–2, giunsa man sa paghulagway ni Pablo ang mga Hentil sa wala pa ang ilang pagkakabig? (Isulat sa pisara ang tubag sa mga estudyante ubos sa kolum nga may label nga “Mga Hentil.”)
Sumala sa bersikulo 3, giunsa man sa paghulagway ni Pablo ang iyang kaugalingon ug ang mga Judeo sa wala pa ang ilang pagkakabig? (Isulat sa pisara ang tubag sa mga estudyante ubos sa kolum nga may label nga “Mga Judeo.”)

Ipasabut nga ang mga Hentil ingon man ang mga Judeo patay sa espirituhanong paagi, o nahimulag sa Dios, tungod sa ilang mga sala (tan-awa sa bersikulo 1).

Dapita ang usa ka estudyante sa pagbasa og kusog sa Mga Taga-Efeso 2:4–6. Hangyoa ang klase sa pagsunod, nga mangita sa mga espirituhanong kahimtang sa mga Hentil ug sa mga Santos nga mga Judeo human sa ilang pagkakabig. Ipasabut nga ang pulong nga nagbuhi nagbasabut nga gipalagsik ug nga ang langitnong mga dapit nagpasabut sa mga gingharian sa langit nga mapanunod sa mga tawo.

Giunsa sa paghulagway ni Pablo ang mga Santos human sa ilang pagkakabig? (Ang Ginoo nagbuhi kanila, o mipalagsik kanila, gikan sa espirituhanon nilang pagkamatay ug masalaypong kahimtang. Pahinumdumi ang mga estudyante nga kini gisabut usab nato nga natawo pag-usab sa esprituhanong paagi [tan-awa sa Mosiah 27:24–26].)

Dapita ang pipila ka mga estudyante sa pagbasa og kusog sa Mga Taga-Efeso 2:7–10. Hangyoa ang klase sa pagsunod, nga mangita kon unsay hinungdan nga nausab ang mga Hentil ug ang mga Judeo sa ingon niini.

Unsay hinungdan nga nausab sa ingon niini kining duha ka pundok sa mga Santos? (Ang grasya ni Jesukristo.)
Unsa nga kamatuoran ang atong makat-unan gikan niini nga mga bersikulo mahitungod sa unsay nahimong posible ngadto sa tanang anak sa Dios gumikan niini nga grasya ni Jesukristo? (Human makatubag ang mga estudyante, isulat sa pisara ang mosunod nga kamatuoran: Tungod sa grasya ni Jesukristo, ang tanang tawo maluwas pinaagi sa hugot nga pagtuo Kaniya.)

Ipasabut nga giklaro ni Pablo nga kita dili maluwas pinaagi sa atong mga buhat lamang bisan unsa pa kamaayo kana nga mga buhat (tan-awa sa mga bersikulo 8–9). Aron matabangan ang klase nga mas makasabut sa kamatuoran nga gihisgutan sa ibabaw, dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan:

“Sanglit nakasala man ang tanan ug nakabsan sa himaya sa Dios’ [Mga Taga-Roma 3:23] ug tungod kay ‘walay butang nga mahugaw nga makasulod sa gingharian sa Dios’ [1 Nephi 15:34], ang matag usa nato dili takus nga makabalik sa presensya sa Dios. …

“… Dili kita makaangkon sa atong agianan ngadto sa langit; ang gipangayo sa hustisya nagbarug isip babag, diin kita walay gahum sa pagbuntog sa atong kaugalingon.

“Apan ang tanan wala mawagtang.

“Ang grasya sa Dios mao ang atong dako ug walay katapusan nga mga paglaum.

“Pinaagi sa sakripisyo ni Jesukristo, ang laraw sa kalooy nga gipangayo sa kaangayan [tan-awa sa Alma 42:15] ‘ug [modala] og mga kahigayunan ngadto sa mga tawo nga sila mahimo nga makabaton og hugot nga pagtuo ngadto sa paghinulsol’ [Alma 34:15].

“Ang atong mga sala, bisan pa kini mapula, kini pagapution ingon sa nieve [tan-awa sa Isaias 1:18]. Tungod kay ang atong hinigugma nga Manluluwas ‘naghatag sa iyang kaugalingon ingon nga lukat alang sa tanan’ (1 Timoteo 2:6), ang pagsulod ngadto sa Iyang walay katapusan nga gingharian gihatag ngari kanato [tan-awa sa 2 Pedro 1:11].

“Ang ganghaan giablihan! …

“Aron mapanunod kini nga himaya, kita nagkinahanglan og labaw kay sa naabli nga ganghaan; kita kinahanglan nga mosulod pinaagi niini nga ganghaan uban sa sinserong tinguha nga mag-usab—kausaban nga hilabihan ka mahinuklugon nga gihulagway kini sa mga kasulatan og “matawo pag-usab; oo, matawo sa Dios, mausab gikan sa atong kalibutanon napukan nga kahimtang, ngadto sa kahimtang sa pagkamatarung, ingon nga natubos sa Dios, nahimo nga iyang anak nga mga lalaki ug anak nga mga babaye’ [Mosiah 27:25]. …

Ang grasya usa ka gasa sa Dios, ug ang atong tinguha nga magmasulundon sa matag sugo sa Dios mao ang paghatag sa atong mortal nga kamot sa pagdawat niining sagradong gasa gikan sa atong Langitnong Amahan” (“Ang Gasa sa Grasya,” Ensign o Liahona, Mayo 2015, 108, 110).

Sa unsang paagi ang paggamit sa hugot nga pagtuo kang Jesukristo ug paghinulsol sa atong mga sala makatabang nga atong madawat ang gasa sa grasya?

Aron matabangan ang mga estudyante nga makasabut sa makasaysayanon nga konteksto sa relasyon tali sa mga Judeo ug sa mga Hentil sa wala pa masangyaw ang ebanghelyo ngadto sa tanang anak sa Dios, ipakita ang kauban nga litrato sa “nag-ulang [giali] nga bongbong” (Mga Taga-Efeso 2:14) sa gawas nga nataran sa templo sa Jerusalem (o dapita ang mga estudyante sa pagpakli ngadto sa Mga Hulagway [sa Biblia], nu. 9, “Templo ni Herodes”). Ipasabut nga ang mga Hentil, nga wala makahimo og mga pakigsaad uban sa Ginoo, gidid-an sa pag-adto lapas niini nga bongbong sa mas sagradong mga dapit sa templo; gitratar sila nga “mga langyaw ug mga dumuloong” (Mga Taga Efeso 2:19). Ang pisikal nga nag-ali nga bongbong nagsimbolo sa espirituhanong pagkabulag tali sa mga Judeo ug sa mga Hentil sa wala pa ang pagpadayag ni Pedro nga ang ebanghelyo isangyaw ngadto sa mga Hentil.

Dapita ang pipila ka estudyante kinsa gibulag sa klase nga magpuli-puli sa pagbasa og kusog sa Mga Taga-Efeso 2:12–15. Hangyoa ang klase sa pagsunod, nga mangita sa unsay gihimo sa Manluluwas sa giulang [giali] sa mga Judeo ug mga Hentil. Ipasabut nga ang pulong nga kasilag nagpasabut nga “pagkadili gusto, kaaway, ug kasuko” (Giya ngadto sa mga Kasulatan, “Kasilag,” scriptures.lds.org).

Unsa ang nakapahiusa sa mga Hentil ug sa mga Judeo? (Pinaagi sa dugo ni Kristo, gitangtang ang bongbong nga naghulagway sa espirituhanong panagbulag sa mga Judeo ug sa mga Hentil, ug sila nahimong “usa ka bag-ong tawo” [Mga Taga-Efeso 2:15], o nahiusa nga lawas ni Kristo. Isulat sa pisara ang mosunod nga kamatuoran: Kon moduol kita ngadto ni Jesukristo ug moambit sa Iyang grasya, mahiusa kita uban sa mga Santos sa Dios.)

Tangtanga ang tape o hilo nga nagbulag sa mga estudyante, ug dapita ang nabulag nga mga estudyante nga moipon sa kaubanan nga klase. Awhaga ang mga estudyante nga nagrepresentar sa mga Judeo nga dapiton nila ang nabulag nga mga estudyante sa paglingkod tapad nila.

Dapita ang mga estudyante nga magpuli-puli sa pagbasa og kusog sa Mga Taga-Efeso 2:16–19. Hangyoa ang klase sa pagsunod, nga mangita sa mga pulong nga naghatag og dugang importansya sa kamatuoran nga kon kita moduol ngadto ni Jesukristo ug moambit sa Iyang grasya, mahiusa kita sa mga Santos sa Dios.

Unsa nga mga pulong ang inyong nakit-an nga naghatag og dugang importansya sa kamatuoran nga kon kita moduol ngadto ni Jesukristo ug moambit sa Iyang grasya, mahiusa kita sa mga Santos sa Dios?
Ngano kaha nga importante man nga masabtan nato kining kamaturoan ug ma-apply sa Simbahan karon?
Sa unsang paagi kita makatabang sa uban nga mobati og usab sama nga “katagi-lungsod” (bersikulo 19) dinhi sa Simbahan kay sa mga dumuloong [estranghero]?
Kanus-a kamo natabangan og usa ka tawo nga mobati nga kamo katagi-lungsod sa mga Santos kay sa usa ka estranghero? Kanus-a kamo nakasulay og tabang og usa ka tawo nga mobati og ingon niini?

Dapita ang usa ka estudyante sa pagbasa og kusog sa Mga Taga-Efeso 2:20–22. Hangyoa ang klase sa pagsunod, nga mangita kon unsay gitudlo ni Pablo nga mao ang pundasyon sa Simbahan.

Unsa nga kamatuoran ang gitudlo ni Pablo niini nga mga bersikulo mahitungod sa estraktura sa Simbahan sa Ginoo? (Ang mga estudyante mahimong mogamit og lain-laing mga pulong, apan tabangi sila nga mahibalo nga ang Simbahan sa Ginoo dunay pundasyon nga mga apostoles ug mga propeta, nga si Jesukristo mao ang punoang tukuranang bato sa pamag-ang.)
Unsa ang tukuranang bato sa pamag-ang? (Usa ka dakong bato nga gipahimutang sa kilid sa pundasyon aron mahatagan og kusog ug kalig-on ang tibuok nga estraktura.)

Pagdrowing og simple nga litrato sa usa ka tukuranang bato sa pamag-ang nga nagsumpay sa duha ka mga bongbong.

Sa unsang mga paagi si Jesukristo mao ang punoang tukuranang bato sa Simbahan? Sumala sa bersikulo 21, unsa ang mahitabo sa tibuok Simbahan tungod niining tukuranang bato sa pamag-ang?
Sa unsang mga paagi ang mga apostoles ug mga propeta miporma sa nahibilin nga pundasyon sa Simbahan?
Sa unsang paagi kini nga pundasyon naghatag og kalig-on sa Simbahan ug nanalipud niini batok sa pagpang-atake sa mga dautan?

Mga Taga-Efeso 3

Gipahayag ni Pablo ang iyang mga tinguha para sa mga Santos sa Efeso

I-summarize ang Mga Taga-Efeso 3:1–16 pinaagi sa pagpasabut nga gisangyaw ni Pablo ang mahitungod ni Jesukristo ug mitudlo nga pinaagi Kaniya, ang mga Hentil mamahimong mga “isigkamanununod” (bersikulo 6) kang Israel ug mag-aambit sa mga saad Dios.

Dapita ang mga estudyante nga magpuli-puli sa pagbasa og kusog sa Mga Taga-Efeso 3:14–19. Hangyoa ang klase sa pagsunod, nga mangita kon unsa pay gitinguha ni Pablo aron matabangan ang mga Santos nga mahibalo ug mobati.

Sumala niini nga mga bersikulo, unsa ang gusto ni Pablo nga mahibaloan ug mabati sa mga Santos?

Isulat sa pisara ang mosunod nga kamatuoran: Ang mga apostoles ug mga propeta nagtinguha nga matabangan ang mga anak sa Dios nga mahibalo ug mobati sa gugma ni Jesukristo.

I-display ang pahina diin anaa ang Unang Kapangulohan ug Korum sa Napulog Duha ka mga Apostoles sa pinakabag-o nga isyu sa kinatibuk-ang komperensya sa Ensign o Liahona.

Sa unsang paagi ang mga apostoles ug mga propeta nagtinguha sa pagtabang sa mga anak sa Dios nga mahibalo ug mobati sa gugma ni Jesukristo sa atong panahon?
Kanus-a ang mga pagtulun-an sa mga apostoles ug mga propeta nakatabang ninyo nga mas mahibalo ug mibati sa gugma ni Jesurkristo?

Tapusa pinaagi sa pagpakigbahin sa imong pagpamatuod bahin sa mga kamatuoran nga gihisgutan sa leksyon, ug dapita ang mga estudyante nga sundon kini nga mga kamatuoran.

Komentaryo ug Background nga Impormasyon

Mga Taga-Efeso 2:8–10. “Kay tungod sa grasya kamo nangaluwas pinaagi sa pagtuo … alang sa mga maayong binuhatan”

“Sa Mga Efeso 2:8–10, gihisgutan ni Pablo ang relasyon tali sa grasya, pagtuo, ug maayong mga buhat. Sa katapusan, ang kaluwasan moabut pinaagi sa maayo nga mga buhat ni Jesukristo, dili tungod sa atong kaugalingon. Gitawag ni Pablo ang mga sumusunod ni Jesukristo og ‘mga binuhat [sa Dios], hinimo diha kang Kristo Jesus alang sa mga maayong binuhatan’ (Mga Taga-Efeso 2:10). Naghatag kini og emphasis sa buhat sa Ginoo kay sa atong kaugalingon ug nagtudlo nga ang atong abilidad sa paghimo og maayong mga buhat naggikan sa kausaban nga nahimo gumikan sa grasya ni Jesukristo ngari nato dihang mibalik kita Kaniya uban sa hugot nga pagtuo (tan-awa usab sa 1 Mga Taga-Corinto 15:10 ug Mga Taga-Filipos 2:13)” (New Testament Student Manual [manwal sa Church Educational System, 2014], 425).

Si Elder Bruce R. McConkie sa Korum sa Napulog Duha ka mga Apostoles mipasabut:

“Ang kaluwasan sa bisan unsa nga porma, matang, ug ang-ang nagagikan sa grasya sa Dios. Nahimo kana, tungod sa iyang gugma, kalooy, ug sa pagpakig-angay, ang Dios nga atong Amahan miorden sa plano ug pamaagi sa kaluwasan nga ‘magpahinabo sa pagka-imortal ug sa kinabuhi nga dayon sa tawo.’ (Moises 1:39.) Sa pagpadayon sa plano iyang gipadala ang iyang Bugtong Anak nganhi sa kalibutan aron buhaton ang walay katapusan ug mahangturon nga maulaong pagsakripisyo. …

“Ang mga katawhan sa grasya lamang naluwas, kon hisgutan ang pagkabanhaw; maluwas sila pinaagi sa grasya inubanan sa kamasulundon, kon hisgutan ang pag-angkon og kinabuhing dayon. Ang plano sa ebanghelyo mao ang pagluwas sa katawhan nga makasulod sa celestial nga gingharian, mao nga gitudlo ni Pablo ang kaluwasan pinaagi sa grasya gumikan sa hugot nga pagtuo, pagkamasulundon, pinaagi sa pagdawat ni Kristo, pinaagi sa pagtuman sa mga sugo. Sa ingon si Nephi misulat, ‘Makig-uli sa Dios; kay kami nasayud nga pinaagi sa grasya kami maluwas, human sa tanan nga atong mabuhat ‘(2 Ne. 25:23), ug girekord ni Moroni, ‘Oo, duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon; ug kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo.’ (Moro. 10:32.)” (Doctrinal New Testament Commentary, 3 vols. [1965–73], 2:498–99).

Mga Taga-Efeso 2:20–22. Ang pundasyon ug tukurang bato sa pamag-ang sa Simbahan

Si Elder Jeffrey R. Holland sa Korum sa Napulog Duha ka mga Apostoles miingon mahitungod sa estraktura sa Simbahan:

“Sa panahon sa Bag-ong Tugon, sa mga panahon sa Basahon ni Mormon, ug sa mga moderno nga mga panahon kini nga mga opisyal mao ang pundasyon nga mga bato sa tinuod nga Simbahan, gipahiluna ug nakaangkon sa ilang kusog gikan sa bato sa pagmag-ang, ‘ang bato sa atong Manunubos, kinsa mao si [Jesu] Kristo, ang Anak sa Dios’ [Helaman 5:12]. … Ang mao nga pundasyon diha ni Kristo mao ug sa kanunay mao ang panalipud sa mga panahon ‘nga ang yawa mopadala sa iyang mapintas nga mga hangin, oo, ang iyang mga pana diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo’” (“Mga Propeta, Mga Manalagna, ug Mga Tigpadayag,” Ensign o Liahona, Nob. 2004, 7).

Ang mga pulong nga “ang tibuok nga tinukod nausa” sa Mga Taga-Efeso 2:21 nagsugyot og importanting leksyon mahitungod sa kahiusahan sa Simbahan. Walay duha ka bloke nga bato nga gigamit og tukod sa usa ka estraktura ang hingpit nga magkaparehas, ug dunay daghang lahi-lahing gidak-on ug porma. Sa gihapon tungod sa bloke ang “tibuok nga tinukod nausa” sa pagporma og estraktura. Sa samang paagi, walay duha ka miyembro sa Simbahan ang hingpit nga magkaparehas, apan tanan nga “tibuok nga tinukod” nausa sa pagporma sa Simbahan sa Ginoo.