Leksyon 154: Pinadayag 6–11, Part 1

Leksyon 154

Pinadayag 6–11, Part 1

Pasiuna

Nakita ni Juan ang panan-awon sa Kordero sa Dios nga nag-abli sa unang unom ka mga timri o silyo sa silyado nga basahon. Sa ikaunom nga silyo, nakita ni Juan ang mga sulugoon sa Dios diin ang ilang “bisti gilabhan nila … sa dugo sa Cordero” (Pinadayag 7:14).

Mga Sugyot alang sa Pagtudlo

Pinadayag 6

Nakita ni Juan ang Kordero sa Dios nga nag-abli sa unang unom ka mga timri o silyo sa silyado nga basahon

Dapita ang mga estudyante sa pagpakigbahin og bisan unsang mga pangutana mahitungod sa pagpakabuhi niining ulahing mga adlaw. Ilista sa pisara ang ilang mga tubag.

Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith. Hangyoa ang klase sa pagpaminaw kon unsay pagbati sa karaaang mga propeta mahitungod sa atong panahon:

“Ang mga propeta, mga pari ug mga hari … nanglantaw sa unahan uban sa malipayon nga pagpaabut sa adlaw diin kita mopuyo; ug gidasig uban sa langitnon ug mahimayaon nga mga pagpaabot nga ilang giawit ug gisulat ug gipanagna kining atong panahon” (Mga Pagtulun-an sa mga Presidente sa Simbahan [2007], 221).

Unsay pagbati sa karaang mga propeta bahin sa atong panahon?

Ipasabut nga si Juan nga Tigpadayag usa sa mga propeta kinsa nahibalo sa mga panghitabo sa ulahing mga adlaw ug nanagna sa atong panahon uban sa mahimayaong pagpaabut.

Dapita ang mga estudyante sa pagpangita samtang magtuon sila sa Pinadayag 6–7 sa mga rason nganong ang karaang mga propeta naglantaw sa atong panahon uban sa kalipay.

Pahinumdumi ang mga estudyante nga sigun sa narekord sa Pinadayag 5:1-5, nakita ni Juan ang basahon nga dunay pito ka mga timri o silyo nga ang Kordero lamang ang takus nga moabli. Ipasabut nga sa iyang panan-awon, nakita ni Juan ang mahulagwayon nga representasyon sa pipila ka dagkong panghitabo mahitungod sa matag liboan ka tuig nga panahon nga girepresentahan sa pito ka mga silyo.

Isulat sa pisara ang mosunod nga mga lista (ikonsiderar ang paghimo niini sa dili pa magklase):

Una nga timri o silyo (Pinadayag 6:1–2)

Ikaduha nga timri (Pinadayag 6:3-4)

Ikatulo nga timri (Pinadayag 6:5-6)

Ikaupat nga timri (Pinadayag 6:7-8)

Ikalima nga timri (Pinadayag 6:9-11)

Hatagi ang matag estudyante og usa ka pirasong papel. I-assign ang matag estudyate ngadto sa usa ka silyo (ang matag silyo mahimong i-assign sa sobra sa usa ka estudyante). Hangyoa ang mga estudyante sa pagbasa sa mga pakisayran o reference nga motukma sa silyo nga gi-assign diha nila ug i-drowing ang pipila ka mga hitabo nga nakita ni Juan mahitungod niana nga silyo.

Human sa igo nga panahon, dapita ang mga estudyante sa pagpakita sa ilang mga gidrowing ngadto sa klase, nga magsunod, magsugod sa mga estudyante nga gi-assign sa una nga silyo. Dapita ang usa ka estudyante gikan sa matag grupo nga gamiton ang iyang drowing sa pagpasabut unsay nakita ni Juan dihang giablihan kana nga silyo. Inig report sa mga estudyante, ipakigbahin ang mosunod nga posibling mga interpretasyon nga gisugyot ni Elder Bruce R. McConkie nga sakop sa Korum sa Napulog Duha ka mga Apostoles. Mahimo nimong awhagon ang mga estudyante nga isulat kini nga impormasyon diha sa ilang mga kasulatan o sa ilang mga class notebook o mga scripture study journal.

Una nga Timri o Silyo

(Mga tuig 4000 hangtud 3000 B.C.)

Puti nga kabayo = Kadaugan

Pana = Panggubat

Purong-purong = Tigbuntog

Si Elder McConkie miingon nga ang mga bersikulo 1–2 naghulagway sa kapanahunan ni Enoch ug nga ang nagkabayo mao si Enoch (tan-awa sa Doctrinal New Testament Commentary, 3 vols. [1966–73], 3:476–78).

Ikaduha nga Silyo

(Mga tuig 3000 hangtud 2000 B.C.)

Pula nga kabayo = Miagas nga dugo

Espada = Gubat ug pagkapukan

Si Elder McConkie miingon nga ang mga bersikulo 3–4 naghulagway sa kapanahunan ni Noah, dihang ang kadautan mipuno sa yuta. Ang nagsakay sa pula nga kabayo mao ang yawa mismo o tingali “tawo nga nagrepresentar sa daghang manggugubat nga pumapatay” (Doctrinal New Testament Commentary, 3:478–79).

Ikatulo nga Silyo

(Mga tuig 2000 hangtud 1000 B.C.)

Itom nga kabayo = Kagutom

Mga timbangan = Taas nga mga kantidad sa pagkaon

Si Elder McConkie miingon nga ang mga bersikulo 5–6 naghulagway sa kapanahunan ni Abraham, dihang daghan ang nangamatay sa kagutom (tan-awa sa Doctrinal New Testament Commentary, 3:479–80). Ang tawo makapalit lamang og pagkaon nga makasugakod sa tibuok adlaw nga kinitaan, nagpasabut sa kantidad sa hilabihang kagutom.

Ikaupat nga Silyo

(Mga 1000 B.C. hangtud sa pagkatawo ni Kristo)

Luspad nga kabayo = Kamatayon

Kamatayon ug impyerno = Kalaglagan sa dautan ug ang pagdawat kanila sa bilanggoan sa espiritu (tan-awa sa Isaias 5:14)

Si Elder McConkie miingon nga ang mga bersikulo 7–8 nagpasabut sa “milenyum niadtong bantugan nga mga gingharian ug mga kanasuran kansang mga pagbudhi misakit ug balik-balik nga mibihag sa [Israel]” (Doctrinal New Testament Commentary, 3:481). Kini nga mga nasud naglakip sa Babelonia, Persia, Ehipto, Gresya, ug Roma.

Ikalima nga Silyo

(Mga tuig sa pagkatawo ni Kristo ngadto sa A.D. 1000)

Altar = Sakripisyo

Mga kalag = mga Martir, mga Kristiyanos nga gipamatay tungod sa ilang mga gituohan

Si Elder McConkie miingon nga ang mga bersikulo 9-11 nagpasabut sa daghang nag-una nga mga Kristiyanos, lakip sa kadaghanan sa pinaka-orihinal nga mga Apostoles, kinsa nangamatay nga mga martir (tan-awa sa Doctrinal New Testament Commentary, 3:482-83). Tungod kay kining mga tawhana mibuhis sa ilang kinabuhi “alang sa pulong sa Dios, ug sa pagpamatuod nga ilang gihuptan” (Pinadayag 6:9), gipanghatagan sila og “puti nga mga kupo,” nagsimbolo sa kaputli (tan-awa sa Pinadayag 7:13–14; 3 Nephi 27:19).

Human ang matag grupo nakapresentar, ipasabut nga ang ikaunom nga silyo nagrepresentar sa atong panahon ug sa mga panghitabo nga mag-una sa Milenyum, kon si Jesukristo personal nga maghari dinhi sa yuta (tan-awa sa Doctrinal New Testament Commentary, 3:485–86).

Dapita ang pipila ka estudyante nga magpuli-puli sa pagbasa og kusog gikan sa Pinadayag 6:12–17, ug ipasabut nga ang Hubad ni Joseph Smith sa bersikulo 14 mabasa nga, “Ug naabli ang kalangitan sama sa pagkaabli sa usa ka linukot kon kini dungan nga ilukot, ug ang matag kabungturan, ug mga isla, nabalhin sa nahimutangan niini. Hangyoa ang klase sa pagsunod, nga mangita sa mga panghitabo nga nakita nang daan ni Juan.

Dihang giablihan ang ikaunom nga silyo, unsa nga mga panghitabo ang nakita ni Juan? (Ipasabut nga kini nga mga katalagman mga timailhan sa katapusang mga adlaw.)
Sumala sa bersikulo 16, unsa ang panganduyon niadtong maningkamot nga maka-eskapo sa “kapungot” sa Dios?
Unsa nga pangutana ang narekord sa bersikulo 17?

Isulat sa pisara ang mosunod nga pangutana diha sa pisara: Kinsa ang makahimo sa pagbarug?

Ipasabut nga ang Pinadayag 7 makatabang nato sa pagsabut kon si kinsa ang makahimo sa pagbarug, o makalahutay, sa mga katalagman sa ikaunom nga silyo.

Pinadayag 7

Nakita nang daan ni Juan ang mga sulugoon sa Dios nga gilabhan ang ilang mga kupo sa dugo sa Kordero

Dapita ang usa ka estudyante sa pagbasa og kusog sa Pinadayag 7:1 ug dapita ang laing estudyante sa pagbasa og kusog sa Doktrina ug mga Pakigsaad 77:8. Hangyoa ang klase sa pagsunod, nga mangita kon unsa pay nakita ni Juan sa ikaunom nga silyo.

Unsa ang gibuhat sa upat ka anghel? (Ipasabut nga ang mga hangin nga ilang gigunitan dunay gahum sa paggun-ob sa kinabuhi dinhi sa yuta. Tan-awa sa D&P 86:5–7.)

Dapita ang usa ka estudyante sa pagbasa og kusog sa Pinadayag 7:2–3 ug ang laing estudyante sa pagbasa og kusog sa Doktrina ug mga Pakigsaad 77:9. Hangyoa ang klase sa pagsunod, nga mangita kon unsay gisulti sa laing anghel ngadto sa upat ka mga anghel.

Sumala sa Doktrina ug mga Pakigsaad 77:9, kinsa ang anghel “nga misaka gikan sa silangan”? (Pinadayag 7:2).

Ipasabut nga ang pulong nga Elias niini nga sitwasyon usa ka “titulo o tawag niadtong kansang misyon [mao] ang pagtugyan sa mga yawe ug gahum ngadto sa mga lalaki sa katapusang dispensasyon” (Doctrinal New Testament Commentary, 3:491–92; tan-awa usab sa Ang Giya ngadto sa mga Kasulatan, “Elias”).

Unsa ang gisulti niini nga anghel ngadto sa upat ka mga anghel?

Ipasabut nga “ang timri o silyo, o pagmarka, sa ‘mga ulipon sa atong Dios diha sa ilang mga agtang’ usa ka pagkumpara sa ilang debosyon, serbisyo, ug pagkahisakop sa Dios (Pinadayag 7:3; tan-awa usab sa Pinadayag 9:4; 14:1). …

“Si Propeta Joseph Smith mitudlo nga ang pagsilyo sa mga matinud-anon diha sa ilang mga agtang ‘nagpasabut sa pagsilyo sa panalangin diha sa ilang mga ulo, buot ipasabut ang walay katapusang pakigsaad, sa ingon naghimo nga masiguro ang ilang pagkatinawag ug pagkapinili’ (sa History of the Church, 5:530)” (New Testament Student Manual [manwal sa Church Educational System, 2014], 544).

Ipasabut nga sumala sa narekord sa Pinadayag 9, nakita ni Juan kon unsay mahitabo niadtong dili magdala niini nga silyo. Dapita ang usa ka estudyante sa pagbasa og kusog sa Pinadayag 9:3–4. Hangyoa ang klase sa pagsunod, mangita sa mga kahimtang niadtong wala niini nga silyo. Dapita ang mga estudyante sa pagreport sa unsay ilang nakit-an.

Dapita ang mga estudyante sa pagbasa og hilum sa Pinadayag 7:4, nga mangita kon pila ka mga tawo ang nasilyuhan sa ilang mga agtang pinaagi niini nga anghel. Hangyoa ang mga estudyante sa pagreport sa ilang nakit-an.

Ipasabut nga gisultihan sa Ginoo si Propeta Prophet Joseph Smith nga “ang gidaghanon nga 144,000 nga gihisgutan sa Pinadayag 7:4–8 mao ang gidaghanon sa na-orden nga mga high priest gikan sa napulog duha ka mga tribo sa Israel kinsa moabag sa uban sa ilang pagpangita sa kahimayaan [tan-awa sa D&P 77:11]. Wala kini mag-ingon, sama sa gituohan sa ubang mga tawo, nga mao ang total nga gidaghanon sa mga tawo nga makakab-ot og kahimayaan” (New Testament Student Manual [manwal sa Church Educational System, 2014], 544).

Dapita ang usa ka estudyante sa pagbasa og kusog sa Pinadayag 7:9–10. Hangyoa ang klase sa pagsunod, nga mangita kon si kinsa pa ang nakita ni Juan.

Kinsa ang nakita ni Juan?
Unsa ang gipangsul-ob ug gikuptan sa nagtampusisok nga mga tawo? (Kinahanglan nimong ipasabut nga ang mga palwa mahimong magsimbolo sa kadaugan ug kalipay.)

Dapita ang usa ka estudyante sa pagbasa og kusog sa Pinadayag 7:13–17. Dapita ang klase sa pagsunod, nga mangita kon unsay nakat-unan ni Juan kabahin niini nga mga tawo.

Unsa ang gilahutay niining mga tawhana?
Giunsa sa pagkahimong puti sa ilang mga kupo? (Pinaagi sa “dugo sa Kordero”—simbolo sa Pag-ula ni Jesukristo.)
Sumala sa bersikulo 15–17, unsa nga mga panalangin ang nadawat niining mga tawhana tungod kay nahimo silang putli pinaagi sa Pag-ula ni Jesukristo? (Mahimo nimong ipasabut nga kining mga bersikulo naghulagyaw sa kalipay, kalinaw, ug debosyon sa mga tawo nga makasulod sa celestial nga himaya.)
Unsa nga baruganan ang atong mahibaloan gikan niini nga mga bersikulo kon unsaon sa pagsulod sa celestial nga himaya? (Ang mga estudyante mahimong mogamit og lain-laing mga pulong, apan siguroa nga ilang mahibaloan ang usa ka baruganan nga susama sa mosunod: Kon malahutay nato ang mga kalisdanan sa matinud-anong paagi ug mahimong putli pinaagi sa Pag-ula ni Jesukristo, matagamtaman nato ang celestial nga himaya uban sa Dios. Isulat sa pisara kini nga baruganan.)

Dapita ang mga estudyante sa pagpamalandong kon unsa kaha ang pagbati nga makabarug nga putli sa presensya sa Dios.

Sa unsang paagi kini nga mga pagbati ikakumpara sa mga pagbati sa mga tawo nga gihulagway diha sa Pinadayag 6:16?
Unsay angay natong buhaton aron ang Manluluwas makahimo natong putli pinaagi sa Iyang Pag-ula?
Sa unsang paagi ang paghinumdom sa mga panalangin sa celestial nga himaya makatabang ninyo sa inyong paningkamot nga makalahutay sa mga kalisdanan ug mamahimong putli?

Pahinumdumi ang mga estudyante sa gilista nga mga kabalaka diha sa pisara sa pagsugod sa klase. Dapita sila sa pagkonsiderar kon sa unsang paagi ang baruganan nga nasulat diha sa pisara makatabang nila sa higayon nga mobati silag kabalaka mahitungod sa pagpakabuhi sa ulahing mga adlaw. Dapita ang pipila ka mga estudyante kinsa andam nga mopakigbahin sa ilang mga hunahuna diha sa klase.

Dapita ang mga estudyante nga gahinan og pipila ka minutos ang pagpamalandong sa unsang paagi nila magamit ang baruganan nga ilang nakat-unan karon. Awhaga sila sa pagrekord sa bisan unsang pag-aghat nga ilang nadawat.

Komentaryo ug Background nga Impormasyon

Pinadayag 6–11. Pagpakabuhi sa katapusang mga adlaw

Si Presidente Boyd K. Packer, sa Korum sa Napulog Duha ka mga Apostoles mitudlo sa mosunod mahitungod sa pagpakabuhi sa katapusang mga adlaw:

“Usahay maghunahuna ang mga batan-on, ‘Unsay kapuslanan? Ang kalibutan sa dili madugay mabungkag ra man ug matapos.’ Kana nga pagbati naggikan sa kahadlok, dili gikan sa pagtuo. Walay usa nga nasayud sa oras o adlaw (tan-awa sa D&P 49:7), apan ang katapusan dili moabut hangtud ang tanang katuyoan sa Ginoo matuman. Ang tanan nga akong nakat-unan gikan sa mga pagpadayag ug gikan sa kinabuhi nagkombinser kanako nga aduna pay panahon nga gigahin kaninyo alang sa mainampingon nga pagpangandam sa usa ka taas nga kinabuhi” (“To Young Women and Men,” Ensign, Mayo 1989, 59).

Pinadayag 7:1–3. Ang mga matarung makasinati og mga pagsulay ug pag-antus

“Nakita ni Apostol Juan nga ang piho nga mga kalamidad sa dili pa ang Ikaduhang Pag-anhi dili makaapekto sa tanan dinhi sa yuta o sa mga lumulupyo niini ‘kondili ang mga tawo lamang nga walay timri [silyo] sa Dios diha sa ilang mga agtang’ (Pinadayag 9:4). Mitukma kini sa ubang mga saad diha sa kasulatan nga sa katapusang mga adlaw, kadtong mga nagmatinud-anon sa katapusan mapanalipdan (tan-awa sa 1 Nephi 22:17–19; D&P 115:5–6). …

“Bisan og ang Ginoo misaad og panalipud sa mga matarung sa katapusang mga adlaw, giklaro ni Propeta Joseph Smith nga ang pipila nga mga matarung mahimong mawad-an sa ilang kinabuhi gumikan sa mga pagsulay ug mga kalamidad sa katapusang mga adlaw: ‘[Akong] gipasabut ang mahitungod sa pagbalik sa Anak sa Tawo; nga usab kini usa ka sayop nga pagtuo nga ang mga Santos makalingkawas sa tanang mga paghukom, samtang ang dautan mag-antus; kay ang tanang tawo ubos sa pag-antus, ug, ‘ang matarung maglisud sa pag-ikyas” [tan-awa sa D&P 63:34]; bisan pa man daghang mga Santos makaikyas, kay ang matarung mabuhi pinaagi sa hugot nga pagtuo [tan-awa sa Habacuc 2:4]; unya daghang mga matarung mabiktima sa sakit, sa katalagman, ug uban pa, nga ang hinungdan gumikan sa kahuyang sa unod,ug bisan pa niana mangaluwas ngadto sa Gingharian sa Dios’ (Mga Pagtulun-an sa mga Presidente sa Simbahan: Joseph Smith [2007], 304)” (New Testament Student Manual [manwal sa Church Educational System, 2014], 547).

Pinadayag 7:2. Elias

Si Elder Bruce R. McConkie (1915–85) sa Korum sa Napulog Duha ka mga Apostoles mipasabut sa tawag nga Elias:

Daghang mensaherong mga anghel nga nangalagad ang gipadala gikan sa kahimayaan aron sa pagtugyan sa mga yawe ug mga gahum, aron itugyan pag-usab ang ilang mga dispensasyon ug kahimayaan ngadto sa mga katawhan dinhi sa yuta. Ang mosunod mao ang mianhi: Moroni, Juan Bautista, Pedro, Santiago, ug Juan, Moises, Elijah, Elias, Gabriel, Raphael, ug Miguel. (D&P 13; 110; 128:19–21.) Tungod kay klaro nga walay usa ka mensahero nga magdala sa tibuok palas-anon sa pagpahiuli, apan hinoon nga ang matag usa miabut nga may usa ka piho nga tuga gikan sa kahitas-an, kini klaro nga ang Elias kombinasyon sa lain laing personahe. Ang pagpahayag kinahanglan gayud nga masabtan nga usa ka tawag ug titulo alang niadtong kansang misyon mao ang pagtugyan sa mga yawe ug mga gahum ngadto sa mga tawo dinhi niining katapusan nga dispensasyon. ([Tan-awa sa Joseph Fielding Smith,] Doctrines of Salvation, vol. 1, pp. 170–174.)” (Mormon Doctrine, 2nd ed. [1966], 221). Tan-awa sa Ang Giya ngadto sa mga Kasulatan, “Elias.”