Lucas 18–Juan 1 (Unit 12)

Materyal sa Pagpangandam alang sa Magtutudlo sa Home-Study

Summary sa mga Leksyon sa Daily Home-Study

Ang mosunod nga mga summary sa mga panghitabo, mga doktrina, ug mga baruganan nga nakat-unan sa mga estuyante dihang gitun-an nila ang Lucas 18–Juan 1 (unit 12) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.

Day 1 (Lucas 18–21)

Dinhi niini nga leksyon gitun-an sa mga estudyante ang mga sambingay sa dili makiangayon nga mga maghuhukom ug mga Pariseo ug publicano. Ila usab nga nabasa ang mahitungod sa tawo nga buta kinsa nagtinguha sa tabang sa Ginoo ug mahitungod ni Zacheo. Gikan niini nga mga istorya nakat-unan sa mga estudyante nga kon sinsero kita ug dili mohunong samtang naggamit sa atong pagtuo sa Ginoo, maangkon nato ang Iyang kalooy.

Day 2 (Lucas 22)

Dihang gibasa sa mga estudyante ang mahitungod sa tambag sa Ginoo ngadto ni Pedro, ilang nakat-unan nga kon kita makabig sa ebanghelyo ni Jesukristo, mapalig-on nato ang uban. Nakat-unan usab sa mga estudyante ang mosunod nga mga kamatuoran dihang gibasa nila ang mahitungod sa pag-antus sa Manluluwas didto sa Getsemani: Kon kita andam nga mosunod sa Langitnong Amahan, Iya kitang hatagan og kalig-on nga mahimo ang Iyang kabubut-on. Si Jesukristo gisingot og dagkong tulu sa dugo dihang nag-antus Siya sa Tanaman sa Getsemani.

Day 3 (Lucas 23–24)

Niini nga leksyon gibasa sa mga estudyante ang mahitungod sa Paglansang, paglubong, ug Pagkabanhaw ni Jesukristo. Ilang nakat-unan ang mosunod nga mga kamatuoran: Atong masunod ang ehemplo ni Jesukristo pinaagi sa pagpili nga mopasaylo sa mga tawo nga dili maayo ang pagtratar kanato. Ang mga espiritu sa tanang tawo mosulod sa kalibutan sa espiritu sa panahon nga mamatay sila. Si Jesukristo dunay nabanhaw nga lawas nga unod ug bukog.

Day 4 (Juan 1)

Dihang gitun-an sa mga estudyante ang mga pulong ni Juan ang Hinigugma ug ni Juan Bautista, ilang nakat-unan nga si Jesukristo kauban sa Dios sa sinugdanan, nga ang tanang butang Iyang hinimo, ug Siya ang Kahayag sa Kalibutan. Dihang gibasa sa mga estudyante kon sa unsang paagi ang mga disipulo makaila ni Jesukristo, ilang nakat-unan nga kon kita modawat sa imbitasyon nga magkat-on ug mosunod ni Jesukristo, makadawat kita og kaugalingon natong pagsaksi bahin Kaniya.)

Pasiuna

Kini nga lesyon makatabang nga masabtan sa mga estudyante unsaon sa pagdapit ang Espiritu Santo nga motudlo bahin ni Jesukristo. Sa pagdugang, makat-unan nila nga si Jesukristo usa ka nabanhaw nga binuhat nga may mga unod ug bukog.

Mga Sugyot alang sa Pagtudlo

Lucas 24:13–32

Ang nabanhaw nga Ginoo nakigsulti sa duha ka mga disipulo sa dalan sa Emmaus

Hangyoa ang mga estudyante sa pagpamalandong kon nasulayan ba nila nga nanglimbasug aron mahibalo kon ang usa ka konsepto sa ebanghelyo tinuod.

Ipasabut nga sa Lucas 24:13 atong nakat-unan nga ang duha ka disipulo mibiya sa Jerusalem sa samang adlaw nga ang pundok sa mga babaye nakabantay nga wala nay sulod ang gilubngan ni Jesus. Mibiyahe sila og mga 6–7.5 ka milyas (10–12 ka kilometros) “ngadto sa balangay nga gitawag og Emmaus.” Ang pagtuon sa ilang kasinatian sa dalan sa Emmaus makatabang aron mahibalo kita unsaon sa paglig-on sa atong mga pagpamatuod ni Jesukristo ug sa Iyang ebanghelyo.

Dapita ang usa ka estudyante sa pagbasa og kusog sa Juan 24:14–17 . Hangyoa ang klase sa pagsunod, nga mangita kon si kinsa ang mikuyog sa duha ka disipulo samtang naglakaw sila.

Kinsa ang mikuyog sa mga disipulo dihang naglakaw sila ngadto sa Emmaus?
Nganong ang mga disipulo wala makaila ni Jesus? (Ipasabut nga ang pulong nga nahipugngan diha sa Lucas 24:16 nagpasabut nga gipugngan o gitabunan.)

Dapita ang mga estudyante nga magpuli-puli sa pagbasa og kusog sa Lucas 24:17–33 . Hangyoa ang klase sa pagsunod, nga mangita kon unsay nakat-unan sa mga disipulo gikan ni Jesus dihang naglakaw sila uban Niya nga wala mamatikdi kon si kinsa Siya.

Kon anaa sa inyong pinulongan, imbis basahon ang Lucas 24:17–33, mahimo nimong ipasalida ang video nga “Christ Appears on the Road to Emmaus” (3:32) gikan sa The Life of Jesus Christ Bible Videos, nga anaa sa LDS.org. Hangyoa ang mga estudyante sa pagsusi kon unsay nakat-unan sa mga disipulo gikan ni Jesus dihang naglakaw sila uban Niya nga wala mamatikdi kon si kinsa Siya. Sa dili pa ipasalida ang video, ipasabut nga ang diyalogo diha sa video naggikan sa Lucas 24:17–33 aron ang mga estudyante makasunod sa pagbasa sa ilang mga kasulatan kon ganahan sila.

Ipasabut nga dinhi sa video, dili nato madungog unsay gitudlo ni Jesus sa mga disipulo samtang naglakaw sila. Dapita ang usa ka estudyante sa pagbasa og kusog sa Lucas 24:27 . Hangyoa ang klase sa pagsunod, nga mangita kon unsay gitudlo ni Jesus sa Iyang mga disipulo.

Unsa ang gitudlo ni Jesus sa mga disipulo?
Unsa nga himan ang Iyang gigamit sa pagtudlo mahitungod Kaniya? (Ang mga kasulatan.)
Sa bersikulo 32, unsay ipasabut nga ang kasingkasing sa mga disipulo nagdilaab sa sulod kanila? (Ang Espiritu Santo mipamatuod nga ang mga pagtulun-an ni Jesus nga naa sa mga kasulatan tinuod.)

Dapita ang mga estudyante sa paghunahuna kon unsa kaha ang nakat-unan sa mga disipulo gikan ni Jesus nga migamit og mga kasulatan kay sa gidiretso lang og tug-an kon si kinsa Siya. Mahimo sab kang mohangyo og pipila ka estudyante nga mopakigbahin sa ilang mga hunahuna.

Unsa nga baruganan ang gitudlo niini nga mga bersikulo mahitungod sa mga epekto bahin sa kaugalingon natong pagtuon sa kasulatan? (Human makatubag ang mga estudyante, isulat sa pisara ang mosunod nga baruganan: Samtang magtuon kita sa mga kasulatan, gidapit nato ang Espiritu Santo nga motudlo kanato bahin ni Jesukristo.)
Gawas sa pag-init sa atong mga kasingkasing, unsa pay inyong mahulagway nga posible natong masinati samtang ang Espiritu Santo mopamatuod kang Jesukristo?

Hangyoa ang mga estudyante sa pagpangita og usa ka kasulatan nga nakatabang nilang mobati nga ang Espiritu Santo nagtudlo nila mahitungod ni Jesukristo. Dapita sila sa pagpakigbahin sa ilang mga kasulatan ug sa mga epekto sa unsay ilang gibati. Mahimo sab kang mopakigbahin og usa ka kasulatan nga personal nga nakatabang kanimo.

Pahinumdumi ang mga estudyante nga bisan og importante ang pagbasa sa Bag-ong Tugon para maka-credit sa seminary, mas labaw ka importante nga tun-an ang kasulatan sa paagi nga madapit ang Espiritu Santo aron malig-on ang ilang mga pagpamatuod sa Manluluwas.

Kon mahimo, paghatag og mga kopya sa bookmark nga adunay mosunod nga pamahayag ni Elder D. Todd Christofferson sa Korum sa Napulog Duha ka mga Apostoles, o dapita ang mga estudyante nga isulat ang pamahayag diha sa usa ka blangko nga papel o card nga mahimong magamit nga bookmark. (Ang pwedeng i-print nga PDF sheet nga dunay daghang bookmark anaa sa online version niini nga leksyon.)

Manwal sa Seminary Teacher sa Bag-ong Tugon—Leksyon sa Home-Study (Unit 12)

“Ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo. …

“… Ang hugot nga pagtuo moabut pinaagi sa pagsaksi sa Balaang Espiritu sa atong mga kalag, Espiritu ngadto sa espiritu, samtang kita maminaw o magbasa sa pulong sa Dios. Ug ang hugot nga pagtuo mohingkod samtang magpadayon kita sa pagbusog sa pulong. …

“… Tun-i ang mga kasulatan sa mabinantayon nga paagi, nga may katuyoan. Hinuktuki ug pag-ampo niini. Kining mga kasulatan mga pagpadayag, ug mohatag kini og dugang nga pagpadayag” (D. Todd Christofferson, “Ang Panalangin sa Kasulatan,” Ensign o Liahona, Mayo 2010, 34–35).

Dapita ang usa ka estudyante sa pagbasa og kusog sa pamahayag ni Elder Christofferson. Hangyoa ang klase sa pagsunod, nga mangita sa mga paagi diin ilang mapalambo ang ilang personal nga pagtuon sa kasulatan.

Dapita ang mga estudyante sa paghimo og tumong nga magtuon sa ilang mga kasulatan sa mga paagi nga madapit ang Espiritu Santo aron mapalambo ang ilang pagtuo ug kahibalo bahin ni Jesukristo. Mahimo kang mosugyot nga isulat nila kini nga tumong sa luyo sa bookmark aron magamit nila kini nga pahinumdom atol sa ilang pagtuon sa kasulatan.

Lucas 24:36–39

Mipakita si Jesus sa Iyang mga disipulo ug gipakita kanila ang nabanhaw Niya nga lawas

Ipasabut nga ang mga disipulo nga kauban ni Jesus diha sa dalan sa Emmaus namalik dayon sa Jerusalem ug gisugilon ang ilang kasinatian ngadto sa mga Apostoles ug sa ubang mga disipulo (tan-awa sa Lucas 24:33–35).

Dapita ang klase nga magdungan sa pagbasa og kusog sa scripture mastery passage sa Lucas 24:36–39, nga mangita kon unsay nahitabo samtang ang mga disipulo mireport sa ilang mga kasinatian ngadto sa mga disipulo.

Unsa ang nahitabo samtang ang mga disipulo mireport sa ilang kasinatian?

I-display ang litrato nga Jesus Mipakita sa Iyang mga Samad (Libro sa mga Hulagway sa Ebanghelyo [2009], nu. 60; tan-awa usab sa LDS.org).

Unsa ang gidapit ni Jesus nga buhaton sa mga disipulo aron matabangan silang makasabut nga dili Siya usa lang ka espiritu apan dunay pisikal nga lawas?
Unsa nga doktrina ang atong makat-unan gikan niini nga mga bersikulo? (Mahimong makahibalo ang mga estudyante og lain-laing mga doktrina, apan siguora ang pagpasabut nga si Jesukristo usa ka nabanhaw nga binuhat nga adunay lawas nga unod ug mga bukog. (Isulat sa pisara kini nga doktrina; tan-awa usab sa D&P 130:22.)

Dapita ang pipila ka estudyante sa pagpakigbahin sa ilang mga pagpamatuod bahin sa Pagkabanhaw sa Manluluwas ug ipasabut nganong kini nga doktrina importante para kanila, o dapita sila sa pagpakigbahin unsa ang ilang gisulat diha sa ilang mga scripture study journal para sa assignment 3 gikan sa Unit 12: Day 3 nga leksyon. Tapusa pinaagi sa pagpamatuod sa reyalidad sa Pagkabanhaw ni Jesukristo.

Sunod nga Unit (Juan 2–6)

Ipasabut ngadto sa mga estudyante nga samtang tun-an nila ang Juan 2–6, makat-unan nila ang mga tubag sa mosunod nga mga pangutana: Unsa ang unang milagro nga gihimo ni Jesus sa publiko? Sa unsang paagi kini nakatabang sa Iyang inahan? Nganong gilimpyuhan Niya ang templo? Si kinsa ang unang gisultihan ni Jesus nga Siya ang Mesiyas? Unsa ang Iyang gipadayag niining babayhana mahitungod sa iyang kinabuhi nga Siya lamang ang nasayud? Nganong gi-refer man sa Manluluwas ang Iyang kaugalingon nga mao ang buhi nga tubig ug ang Tinapay sa Kinabuhi? Mabasa usab sa mga estudyante ang mahitunogd sa pagpangalagad ni Jesukristo uban sa kahalangdon ug gahum.