Pasiuna sa Unang Sulat ni Pablo ngadto sa mga Taga-Tesalonica
Ngano nga kinahanglang tun-an kini nga basahon?
Ang Unang Sulat ngadto sa mga Taga-Tesalonica gituohan nga maoy pinakauna nga anaa nga sulat ug tingali ang pinakadaan nga basahon sa Bag-ong Tugon. Ang mga pagtulun-an ni Pablo dinhi niini nga sulat una sa tanan nagtutok sa Ikaduhang Pag-anhi ni Jesukristo, lakip ang mga kalisdanan nga sagubangon sa mga sumusunod ni Jesukristo sa dili pa Siya mobalik (tan-awa sa 1 Mga Taga-Tesalonica 3:3), ang Pagkabanhaw sa mga Kristiyano sa Ikaduhang Pag-anhi (tan-awa sa 1 Mga Taga-Tesalonica 4:13–14), ug ang panahon sa Ikaduhang Pag-anhi ni Kristo (tan-awa sa 1 Mga Taga-Tesalonica 5:1–2). Pinaagi sa ilang pagtuon niini nga basahon, makat-unan sa mga estudyante ang mahitungod sa Ikaduhang Pag-anhi ug pagdawat og pagdasig aron magpabiling matinud-anon sa Ginoo.
Kinsa ang nagsulat niini nga basahon?
Si Pablo ang misulat sa 1 Mga Taga-Tesalonica (tan-awa sa 1 Mga Taga-Tesalonica 1:1; tan-awa usab sa 2:18).
Kanus-a ug diin kini gisulat?
“Gihimo ni Pablo kini nga sulat ngadto sa Mga Taga-Tesalonica gikan sa Corinto panahon sa iyang ikaduhang misyonaryo nga panaw,” sa tuig mga A.D. 50–51 (tan-awa sa Giya ngadto sa mga Kasulatan, “Epistola ni Pablo, Mga,” scriptures.lds.org).
Para kang kinsa kini gisulat ug ngano?
Gisulat ni Pablo ang 1 Mga Taga-Tesalonica para sa mga miyembro sa Simbahan sa Tesalonica. Ang Tesalonica mao ang pinakadaghan og tawo ug pinakamalambuong siyudad sa karaang gingharian sa Gresya sa Macedonia tungod sa duha ka importanting mga feature: ang siyudad natukod sa pinakamaayong natural nga dunggoanan sa Aegean Sea, ug nahimutang kini sa dakong highway nga nagsumpay sa Roma ug Asia.
Atol sa ikaduhang misyonaryo nga panaw ni Pablo, ang Espiritu migiya ni Pablo ug sa iyang mga kauban—nga si Silas, Timoteo, ug Lucas—nga tabukon ang Aegean Sea ngadto sa Macedonia (tan-awa sa Mga Buhat 16:6–12). Dinhi nagsugod ang pagsangyaw sa ebanghelyo sa Uropa. Human sa pagsangyaw didto sa Filipos (tana-wa sa Mga Buhat 16:12–40), si Pablo ug Silas mibiyahe ngadto sa Tesalonica.
Mitrabaho si Pablo kauban ni Silas didto sa Tesalonica, apan gipugos sila sa mga lider sa mga Judeo sa pagpahawa sa siyudad (tan-awa sa Mga Buhat 17:1–9). Sa wala madugay, mireport si Timoteo kang Pablo nga ang mga Santos sa Tesalonica nagpabiling matinud-anon bisan sa mga pagpanggukod ug ang ilang matarung nga impluwensya mikatap na (tan-awa sa Mga Buhat 18:5; 1 Mga Taga-Tesalonica 1:7–8; 3:6–8).
Ang kinabig nga mga Taga-Tesalonica mao ang pipila sa unang mga taga-Uropa nga mihangop sa ebanghelyo, ug gipanggukod sila isip sangputanan. Duna usab silay daghang mga pangutana mahitungod sa Ikaduhang Pag-anhi. Mao nga, sa iyang sulat ngadto sa mga Taga-Tesalonica, misulat si Pablo og mga pulong sa pagdasig ug kalig-on ug gitubag ang ilang mga pangutana mahitungod sa Ikaduhang Pag-anhi ni Jesukristo.
Unsa ang pipila ka mga butang nga nakalahi niini nga basahon?
Usa sa pinakaunang mga tema ni Pablo sa Una niyang Sulat ngadto sa mga Taga-Tesalonica mao ang Ikaduhang Pag-anhi. Gitutukan niya ang partisipasyon sa mga matarung sa mahitabo sa Ikaduhang Pag-anhi, ilabi na sa mga Santos nga una nang nangamatay (tan-awa sa 1 Mga Taga-Tesalonica 2:19; 3:13; 4:13–17; 5:1–10). Lahi sa uban pang daghan nga mga sulat ni Pablo, ang 1 Mga Taga-Tesalonica walay dinagkong mga pagbadlong apan hinoon nagtanyag og mga pagdayeg ug komendasyon para sa mga Santos sa Tesalonica.
Outline
1 Mga Taga-Tesalonica 1–3 gipahayag ni Pablo ang dakong pasalamat sa mga Santos sa Tesalonica. Gipahinumduman niya ang iyang mga tigbasa bahin sa mabination niyang pangalagad diha kanila ug gipahayag ang kalipay tungod sa ilang kamatinud-anon. Giawhag niya ang mga Santos nga palamboon ang gugma ngadto sa usag usa ug sa tanang katawhan.
1 Mga Taga-Tesalonica 4–5 Gisultihan ni Pablo ang mga Santos nga balaanon ug ibalaan ang ilang kaugalingon. Iyang gipasabut nga kon Siya moanhi pag-usab, ang mga Santos nga nagmatinud-anon sa ilang pagpamatuod kang Kristo, kadtong mga nangamatay na ug mga buhi pa, mobangon ug mohimamat sa Ginoo. Gipahinumduman sa Apostol ang mga miyembro sa Simbahan nga sa pagpangandam ug pagbantay sa adlaw nga pag-anhi ni Kristo.