Leksyon 66: Juan 7

Leksyon 66

Juan 7

Pasiuna

Si Jesus mitambong sa Fiesta sa mga Payag [Tabernakulo] sa Jerusalem. Miadto siya sa templo ug nanudlo sa mga tawo didto kon unsaon nga makadawat sila og saksi nga ang Iyang mga pagtulun-an gikan sa Dios nga Amahan. Tungod kay ang mga tawo nanaglalis mahitungod kon si kinsa si Jesus, migamit siya og mga pagkumparar sa tubig ug kahayag aron sa pagpamatuod sa Iyang kabalaan. Siya mitudlo usab kanila mahitungod sa Espiritu Santo.

Mga Sugyot alang sa Pagtudlo

Juan 7:1–13

Si Jesus mitambong sa Fiesta sa mga Payag

Isulat sa pisara ang mosunod nga pangutana: Si Jesus duna bay mga igsoon?

Dapita ang mga estudyante sa pagtubag sa pangutana. Kon gikinahanglan, tabangi ang mga estudyante sa pagsabut nga si Jose ug Maria nanganak pa human natawo si Jesus ug tingali gipadako sa mao ra gihapon nga balay uban Kaniya. Hinoon, tungod kay si Jesukristo mao man ang tinuod nga Anak ni Maria ug sa Dios nga Amahan, dili kang Jose, kining mga tawhana mga igsoon ni Jesus sa inahan (tan-awa sa Mateo 13:55–56).

Sa inyong hunahuna unsa kaha ang pagbati nga magtubo nga naa sa sama nga panimalay kauban ni Jesus?
Sa inyong hunahuna mas sayon kaha nga motuo Kaniya kon nagtubo pa mo uban Niya? Ngano o nganong dili man?

Ipasabut nga sa Juan 7 atong nakat-unan unsa ang pagtan-aw sa ubang mga “igsoon” ni Jesus (Juan 7:3, 5) ngadto Kaniya. Ang termino nga mga igsoon tingali nagpasabut sa mga igsoon ni Jesus sa inahan, bisan og tingali naglakip sab kini sa ubang suod nga mga kaliwat.

Dapita ang pipila ka mga estudyante nga magpuli-puli sa pagbasa og kusog sa Juan 7:1–5 .

Unsa man ang atong nakat-unan gikan sa bersikulo 5 mahitungod sa mga igsoon ni Jesus?

Dapita ang usa ka estudyante sa pagbasa og kusog sa mosunod nga pamahayag ni Elder Richard G. Scott sa Korum sa Napulog Duha ka mga Apostoles:

“Ang pagpamatuod sa kabalaan ni Kristo ug ang makaluwas nga gahum sa iyang ebanghelyo dili awtomatik nga ihatag tungod lamang sa relasyon sa pamilya.

“… Bisan og sila nagtubo gikan sa usa ra ka panimalay ug ubos sa mabinationg impluwenya ni Jose ug ni Maria, bisan tuod sila nahibalo sa mga pagtulun-an, pangalagad, ug sa mga milagro ni Jesus mismo, apan kining suod niyang mga kaparyentihan wala pa modawat kaniya isip ang Mesiyas. Hinoon, tanan sila, dayag, nga nakabig ra sa kaulahian (Mga Buhat 1:14)” (Doctrinal New Testament Commentary, 3 vols. [1965–73], 1:437).

Sa unsang paagiha posible nga ang pipila sa kaugalingong kapamilya ni Jesus wala pa motuo Kaniya, bisan og nahibalo na sila sa Iyang mga pagtulun-an ug mga milagro?

Ipasabut nga ang Juan 7 nagrekord sa mga hitabo dihang ang Fiesta sa mga Payag gipahigayon didto sa Jerusalem (tan-awa sa Juan 7:2). Atol niiining walo ka adlaw nga fiesta, nga gikonsiderar nga maoy “pinakasadya sa tanan” (Bible Dictionary, “Feasts”), daghan sa mga Judeo mibiyahe sa Jerusalem sa pagsaulog sa mga panalangin sa Dios nganha sa mga anak sa Israel dihang didto sila sa kamingawan, nagpuyo sa temporaryong mga katulganan, o mga tabernakulo, human sa ilang pagkaluwas gikan sa pagkaulipon sa Ehipto (tan-awa sa Levitico 23:39–43). Gisaulog usab sa mga Judeo ug gipasalamatan ang tinuig nga ani nga mga prutas ug mga pinugas (tan-awa sa Exodo 23:16).

Sumala sa bersikulo 3–4, unsa ang gusto sa mga igsoon ni Jesus nga Iyang buhaton?

I-summarize ang Juan 7:6–10 pinaagi sa pagpasabut nga nakahukom si Jesus nga ilangay ang pag-adto sa fiesta, apan giawhag Niya ang Iyang mga igsoon sa pag-adto. Dihang nasugdan na ang fiesta, sa hilum miadto si Jesus—nahibalo nga pipila sa mga lider sa Judeo gustong mopatay kaniya apan ang Iyang panahon nga mamatay wala pa moabut.

Dapita ang usa ka estudyante sa pagbasa og kusog sa Juan 7:11–13 .

Unsa ang gipanulti sa lain-laing mga tawo sa Jerusalem mahitungod ni Jesus?

Ipasabut nga sama sa kapanahunan ni Jesus, dunay managlahing opinyon mahitungod kang Jesukristo sa atong panahon. Ang pipila sa mga katawhan nahibalo ug mipamatuod nga Siya ang Anak sa Dios ug Manluluwas sa tanang katawhan. Ang uban mituo Kaniya ug nanghinaot nga tinuod ang Iyang ebanghleyo. Hinoon, may mga tawo usab nga nagduda sa kabalaan ni Jesukristo ug sa katinuod sa Iyang mga pagtulun-an. Dapita ang mga estudyante nga mangita samtang padayon silang magtuon sa Juan 7 kon sa unsang paagi atong mahibaloan nga si Jesukristo mao ang atong Manluluwas ug tinuod ba ang Iyang mga pagtulun-an.

Juan 7:14–36

Gitudloan ni Jesus ang mga Judeo didto sa templo

Dapita ang usa ka estudyante sa pagbasa og kusog sa Juan 7:14–15 . Hangyoa ang klase sa pagsunod, nga mangita kon unsay gihimo ni Jesus didto sa templo. Makatabang ang pagpasabut nga ang templo mao ang pinakasentro sa kasaulugan nga nahitabo atol sa Fiesta sa mga Payag.

Unsay gihimo ni Jesus?
Nganong natingala man ang mga Judeo?

Dapita ang usa ka estudyante sa pagbasa og kusog sa Juan 7:16–18 . Hangyoa ang klase sa pagsunod, nga mangita kon unsay gisulti ni Jesus ngadto sa mga tawo aron mahibalo kon ang Iyang doktrina, o mga pagtulun-an, tinuod.

Sumala sa bersikulo 16, kang kinsa naggikan ang nadawat ni Jesus nga doktrina nga Iyang gitudlo?
Sa unsang paagi ang usa ka tawo mahibalo nga ang doktrina nga gitudlo ni Jesus tinuod nga gikan sa Dios?
Unsa nga baruganan ang atong makat-unan kon unsaon nato nga makadawat og usa ka pagpamatuod bahin sa mga pagtulun-an sa Langitnong Amahan? (Gamit ang kaugalingon nilang mga pulong, kinahanglang mahibaloan sa mga estudyante ang baruganan sama sa mosunod: Kon buhaton nato ang kabubut-on sa Langitnong Amahan, niana makadawat kita og pagpamatuod sa Iyang doktrina. Mahimo nimong dapiton ang mga estudyante nga markahan ang mga pulong diha sa bersikulo 17 nga nagtudlo niini nga baruganan.)

Aron matabangan ang mga estudyante nga makasabut kon unsaon sa paggamit kini nga baruganan sa atong kinabuhi, dapita ang usa ka estudyante sa pagbasa og kusog sa mosunod nga pamahayag ni Presidente James E. Faust sa Unang Kapangulohan:

“Makaangkon kita og pagpamatuod sa mga baruganan sa ebanghelyo pinaagi sa masulundong paningkamot sa pagsunod niini. … Ang usa ka pagpamatuod sa kaepektibo sa pag-ampo moabut pinaagi sa mapaubsanon ug sinsero nga pag-ampo. Ang usa ka pagpamatuod sa ikapulo moabut pinaagi sa pagbayad og ikapulo” (“Ginoo, Nagatuo Ako; Tabangi ang Pagtuo Ko nga Nakulangan,” Ensign o Liahona, Nob 2003, 22).

Bisan og ang kaugalingon Niyang mga igsoon sa sinugdanan wala motuo Kaniya, sa kaulahian naangkon ra nila ang pagpamatuod ug nakabig sila (tan-awa sa Mga Buhat 1:14).

Sa unsang paagi ang baruganan nga nahibaloan diha sa Juan 7:17 makatabang sa mga igsoon ni Jesus nga makaangkon og pagpamatuod bahin ni Jesukristo ug sa Iyang mga pagtulun-an?

Hangyoa ang mga estudyante sa pag-imagine nga sila adunay higala nga naglisud sa kaugalingon niyang pagpamatuod sa ebanghelyo.

Unsaon kaha ninyo sa paggamit ang baruganan nga atong nahibaloan diha sa Juan 7:17 aron matabangan kini nga higala?

Aron matabangan ang mga estudyante nga makapamatuod sa baruganan nga ilang nahibaloan sa ibabaw ug mobati sa kamatuoran ug kaimportante niini, i-display ang mosunod nga pahayag:

Nasayud ko tinuod tungod kay sa akong pagsunod niini ako .

Awhaga ang mga estudyante sa pagkompleto sa pamahayag diha sa ilang mga class notebook o mga scripture study journal pinaagi sa pagsulat mahitungod sa usa ka sugo sa ebanghelyo o baruganan nga ilang nahibaloan nga tinuod pinaagi sa ilang pagpaningkamot nga masunod kini.

Dapita ang pipila ka estudyante sa pagpakigbahin unsay ilang gisulat diha sa klase.

Dapita ang mga estudyante nga isulat ang usa ka kamatuoran sa ebanghelyo, sugo, o pagtulun-an diin sila gusto nga makadawat og mas lig-ong pagpamatuod bahin niini. Dapita sab sila sa pagsulat unsay ilang buhaton aron makadawat og mas lig-ong pagpamatuod bahin niini nga kamatuoran, sugo, o pagtulun-an pinaagi sa paggamit sa baruganan nga ilang nakat-unan sa Juan 7:17.

I-summarize ang Juan 7:19–36 pinaagi sa pagpasabut nga gibadlong ni Jesus ang mga lider sa mga Judeo gumikan sa pagsalikway sa Iyang mga pagtulun-an ug mga milagro ug sa tinguha nga pagpatay Kaniya. Daghang tawo ang naglibug kon Siya ba ang Mesiyas, ug ang punoang mga pari ug mga Pariseo mipadala og mga opisyal sa pagkuha Kaniya.

Juan 7:37–53

Gitudlo ni Jesus ang mahitungod sa gasa sa Espiritu Santo

Paghangyo og usa nga giuhaw nga moboluntaryo sa pag-adto sa atubang sa klase. Hatagi ang estudyante og walay sulod nga baso, ug pangutan-a siya:

Makatagbaw ba ni sa imong kauhaw?
Unsa pay imong gikinahanglan?

I-display ang tinubdan sa tubig sama sa botelya o pitsel nga puno sa tubig. Sudli og tubig ang baso, ug dapita ang estudyante sa pag-inom. Dayon hangyoa ang estudyante nga mobalik sa iyang gilingkuran.

Iisa ang pitsel o ang botelya nga gigamit sa pagpuno sa baso sa estudyante. Ipasabut nga atol sa walo ka adlaw nga Fiesta sa mga Payag ang pinili nga pari mikalos og tubig gikan sa tuburan sa Siloam gamit ang bulawan nga pitsel ug gibu-bu ang tubig ngadto sa silver nga palanggana sa may tiilan sa altar sa templo. Sa katapusang adlaw sa Fiesta sa mga Payag, dihang nahimo na kini sa pari, mibarug si Jesus ug mitanyag og usa ka pagdapit sa mga tawo. (Tan-awa sa Bruce R. McConkie, Doctrinal New Testament Commentary, 3 vols. [1965–73], 1:446.)

Dapita ang usa ka estudyante sa pagbasa og kusog sa Juan 7:37 . Hangyoa ang klase sa pagsunod, nga mangita kon unsa ang gidapit sa Manluluwas nga buhaton sa mga tawo human Siya mipakita sa templo sa ikawalo ug katapusang adlaw sa fiesta.

Unsa ang gidapit sa Manluluwas nga buhaton sa mga tawo?
Sa pagkonsiderar bahin sa pagkalos ug pagbu-bu sa tubig nga gihimo sa pari sa adlaw sa fiesta, ngano kaha nga si Jesus mihatag man niini nga pagdapit niining tukma kaayo nga panahon?

Isulat sa pisara ang mosunod nga dili kompleto nga pamahayag: Kon moduol kita ni Jesukristo ug motuo Kaniya …

Dapita ang usa ka estudyante sa pagbasa og kusog sa Juan 7:38–39, ug pagkahuman ipasabut nga ang Joseph Smith Translation sa Juan 7:39 nagklaro sa katapusang bahin sa bersikulo nga mabasa, “…kay ang Espiritu Santo gisaad ngadto kanila kinsa mituo, human niana si Jesus nahimaya.” Dapita ang mga estudyante sa pagpangita sa gisaad ni Jesus niadtong kinsa moduol Kaniya ug motuo Kaniya.

Ipasabut nga ang mga pulong nga “gikan sa iyang kasingkasing” nagsugyot nga ang buhi nga tubig maanaa sa sulod ug modagayday gikan sa magtutuo, kay sa maggikan sa gawas nga tinubdan.

Sumala sa bersikulo 39, unsa ang girepresentaran sa buhi nga tubig nga gipamulong sa Manluluwas?

Ipasabut nga “sa ubang mga rason nga wala mapasabut sa hingpit diha sa mga kasulatan, ang Espiritu Santo wala maglihok sa hingpit ngadto sa mga Judeo panahon sa mga katuigan sa mortal nga panaw ni Jesus (Juan 7:39; 16:7)” (Ang Giya ngadto sa mga Kasulatan, “Espiritu Santo”). Samtang ang gasa sa Espiritu Santo dili pa ihatag niana nga dispensasyon hangtud nga ang Manluluwas mahimaya pinaagi sa pagkompleto sa Iyang mortal nga misyon, ang gahum sa Espiritu Santo anaa na aron sa pagtabang sa mga tawo nga makadawat og pagpamatuod sa mga kamatuoran nga gitudlo sa Manluluwas ug sa Iyang mga disipulo.

Basi sa mga pagtulun-an sa Manluluwas diha sa Juan 7:37–39, unsaon ninyo sa pagkompleto ang pamahayag diha sa pisara? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga baruganan: Kon moduol kita kang Jesukristo ug motuo Kaniya, niana mapuno kita sa Espiritu Santo.)

Ipasabut nga kadtong napuno sa Espiritu Santo maka-impluwensya og kaayohan ngadto sa uban. Dapita ang mga estudyante sa paghunahuna og usa ka panahon dihang napuno sila sa Espiritu Santo ug, agig resulta, naka-impluwensya og kaayohan ngadto sa uban. Dapita ang pipila ka estudyante sa pagpakigbahin sa ilang mga kasinatian.

I-summarize ang Juan 7:40–53 pinaagi sa pagpasabut nga ang punoang mga pari ug mga Pariseo nagtinguha na usab sa pagdakop ni Jesus. Si Nicodemo, ang Pariseo kinsa miadto sa Manluluwas sa pagkagabii (tan-awa sa Juan 3:1–2), nanalipod sa Manluluwas ug mipahinumdom sa iyang kaubanang mga Pariseo ug sa punoang mga pari nga ang kaugalingon nilang balaod dili motugot sa usa ka indibidwal nga hukman hangtud nga may higayon siya nga makapamahayag.

Tapusa pinaagi sa pagpamatuod sa mga kamatuoran nga nahibaloan sa mga estudyante sa ilang pagtuon sa Juan 7.

Komentaryo ug Background nga Impormasyon

Juan 7:3. Kinsay mga “igsoon” ni Jesukristo?

Si Elder Bruce R. McConkie sa Korum sa Napulog Duha ka mga Apostoles mitanyag sa mosunod nga pagpasabut mahitungod sa mga “igsoon” ni Jesukristo:

“Daghang espesyal nga mga paghisgut ang gihimo ngadto sa mga anak ni Jose ug ni Maria isip mga ‘igsoon’ ni Jesus, bisan sa pagkatinuod sila iyang mga igsoon sa inahan. (Mat. 12:46; 13:55; Juan 2:12; Mga Buhat 1:14; 1 Cor. 9:5.) Bisan sila nagtubo diha sa usa ra ka panimalay ug ubos sa mabinationg impluwenya ni Jose ug ni Maria, bisan tuod sila nahibalo sa mga pagtulun-an, pangalagad, ug sa mga milagro ni Jesus mismo, apan kining suod niyang mga kaparyentihan wala pa modawat kaniya isip ang Mesiyas. Hinoon, ang tanan kanila, sa pagkatinuod, sa wala madugay nakabig ra (Mga Buhat 1:14); ang usa kanila giila ni Pablo nga si ‘Santiago ang igsoon sa Ginoo’ (Gal. 1:19), nga mangalagad sa balaan nga pagkaapostol; ug gani ang lain pa, si Judas, nga mitawag sa iyang kaugalingon nga, ‘si Judas, ang … igsoon ni Santiago’ (Judas 1), misulat sa epistola ni Judas” (Doctrinal New Testament Commentary, 3 vols. [1965–73], 1:437).

Juan 7:17. “Kon tuyoon ni bisan kinsa ang pagbuhat sa kabubut-on sa Dios”

Si Sister Bonnie L. Oscarson sa kinatibuk-ang Kapangulohan sa Young Women mitudlo:

“Usahay bali ang atong buhaton. Pananglit, atong gamiton kini nga paagi: Malipay kong nagsunod sa balaod sa ikapulo, apan kinahanglan ko unang mahibaloan nga kini tinuod. Tingali mag-ampo kita aron makaangkon og pagpamatuod sa balaod sa ikapulo ug manghinaut nga ang Ginoo mopanalangin kanato niana nga pagpamatuod sa dili pa gayud kita makasulat diha sa resibo sa ikapulo [tithing slip]. Kini dili gayud mosalir. Ang Ginoo nagpaabut nga kita mopakita og hugot nga pagtuo. Kinahanglan kanunay kitang mobayad og hingpit ug tinud-anay nga ikapulo aron makaangkon og pagpamatuod sa ikapulo. Kining sama nga sumbanan magamit ngadto sa tanang mga baruganan sa ebanghelyo, mabalaod man sa kaputli, sa baruganan sa hustong pagsinina, sa Pulong sa Kaalam, o sa balaod sa puasa” (“Magpakabig Kamo,” Ensign o Liahona, Nob. 2013, 77).

Juan 7:38–39. “Buhi nga tubig”

“Sa Juan 7:39, atong mabasa ang dugang nga komentaryo gikan ni Juan, nagpasabut nga ang ‘buhi nga tubig’ nga gihisgutan sa Manluluwas sa Juan 7:38 nagpasabut sa Espiritu Santo, kansang una nga misyon mao ang pagpamatuod bahin sa Langitnong Amahan ug ni Jesukristo. Ang gihimo sa Manluluwas nga pagkumpara sa ‘buhi nga tubig’ gikuha gikan sa karaan nang tradisyon nga ang tubig nagrepresentar og importanting mga kamatuoran. Sa ting-init nga klima sa karaang Near East, ang tubig lisud kaayo, ug ang kanihit sa tubig naghimo niini nga labihan ka bililhong kapanguhaan ug impluwensyal nga simbolo. Giluwas sa Manluluwas ang Israel sa Horeb dihang milagruso nga napaagas ni Moises ang tubig gikan sa bato (tan-awa sa Exodo 17; Numeros 20). Ang mga propeta sa Daang Tugon nga si Isaias, Jeremias, ug Ezequiel migamit sa tubig isip simbolo sa Espiritu sa Ginoo, sa mainampingong pag-amuma, ug makaayo nga gahum (tan-awa sa Isaias 41:17–18; 58:11; Jeremias 2:13; Ezequiel 47:1–12).

“Ang saad sa Manluluwas nga kadtong motuo Kaniya sa umaabut nga panahon makabaton og ‘buhi nga tubig’ diha kanila nga nagpakita sa katinuod kay ang ‘Espiritu wala pa man ikahatag’ (Juan 7:39). Sa ubang mga rason nga wala mapasabut sa hingpit diha sa mga kasulatan, ang Espiritu Santo wala maglihok sa hingpit ngadto sa mga Judeo panahon sa mga katuigan sa mortal nga panaw ni Jesus (Juan 7:39; 16:7). Ang mga pamahayag nga nag-ingon nga ang Espiritu Santo wala moanhi hangtud nga nabanhaw si Jesus nag-refer lamang niana nga partikular nga dispensasyon, kay klaro man kaayo nga ang Espiritu Santo miimpluwensya man sa nag-unang mga dispensasyon. Dugang pa, nag-refer lamang kini sa gasa sa Espiritu Santo nga wala diha, tungod kay ang gahum sa Espiritu Santo nagalihok man atol sa mga pagpangalagad ni Juan Bautista ug ni Jesus; kay kondili walay tawo nga makadawat og pagpamatuod sa mga kamatuoran nga gitudlo niining mga tawhana (Mat. 16:16–17; tan-awa usab sa 1 Mga Taga-Cor. 12:3)’ (Ang Giya ngadto sa mga Kasulatan, ‘Espiritu Santo’)” (New Testament Student Manual [manwal sa Church Educational System, 2014], 224).