Leksyon 111 1 Mga Taga-Corinto 15:1–29

Leksyon 111

1 Mga Taga-Corinto 15:1–29

Pasiuna

Nahibaloan ni Pablo nga may mga indibidwal didto sa Corinto nga nagtudlo nga walay Pagkabanhaw sa patay. Mipamatuod siya ngadto sa mga miyembro sa Simbahan sa Corinto nga Si Jesukristo mibangon gikan sa mga patay. Dayon midugang si Pablo sa pagpasabut sa doktrina sa Pagkabanhaw ug ang mga ipasabut niini alang ngadto sa tanang anak sa Langitnong Amahan. Gihisgutan ni Pablo nga ang ordinansa sa bunyag alang sa patay walay kahulugan kon wala ang Pagkabanhaw.

Mga Sugyot alang sa Pagtudlo

1 Mga Taga-Corinto 15:1–10

Mihatag si Pablo og ebidensya kabahin sa Pagkabanhaw ni Jesukristo

Dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson:

“Akong mga kaigsoonan, kita mokatawa, kita mohilak, kita motrabaho, kita modula, kita mohigugma, kita mabuhi. Ug unya kita mamatay. Kitang tanan mamatay gayud. Ang tanan kinahanglan moagi sa iyang mga ganghaan. Ang kamatayon moabut sa mga tigulang, sa mga gikapoy ug naluya. Mobisita kini sa kabatan-onan samtang anaa sa tumang paglaum ug pagpaabut sa maayong kaugmaon. Ni ang gagmayng mga bata libre niini” (“Ako Nasayud Akong Manunubos Buhi!” Ensign o Liahona, Mayo 2007,°24).

Dapita ang mga estudyante sa pagpamalandong sa mga hunahuna o mga pagbati nga ilang nasinati sa dihang adunay ilang kaila nga namatay. Mahimo nimong dapiton ang pipila ka mga estudyante sa pagpakigbahin sa ilang mga kasinatian kon sila mobati nga komportable sa pagbuhat niini.

Dapita ang mga estudyante sa pagpangita sa mga baruganan samtang magtuon sila sa 1°Mga Taga-Corinto 15:1–29 nga makatabang nila kon may tawo nga ilang kaila mamatay.

Ipasabut nga sa pagtapos ni Pablo sa iyang sulat ngadto sa mga Santos sa Corinto, iyang gitubag ang usa ka sayop nga pagtuo nga gitudlo sa pipila ka mga miyembro sa Simbahan. Dapita ang usa ka estudyante sa pagbasa og kusog sa 1°Mga Taga-Corinto 15:12, ug hangyoa ang klase sa pagpangita sa sayop nga pagtuo nga gitudlo.

Unsa ang mga gipangtudlo sa pipila ka mga Santos sa Corinto? (Walay Pagkabanhaw sa mga patay.)

Dapita ang usa ka estudyante sa pagbasa og kusog sa 1 Mga Taga-Corinto 15:3–8. Hangyoa ang klase sa pagsunod, nga mangita kon unsay gisulat ni Apostol Pablo aron matabangan ang mga miyembro sa Simbahan nga masabtan ang katinuod sa Pagkabanhaw sa Manluluwas.

Unsa ang gipamatuod ni Pablo aron makatabang sa mga miyembro sa Simbahan nga masabtan ang katinuod sa misyon ug Pagkabanhaw sa Manluluwas?
Unsa nga kamatuoran ang atong nakat-onan kabahin sa tahas sa usa ka Apostol gikan niining mga bersikulo? (Ang mga estudyante mahimong mogamit og lain-laing mga pulong apan kinahanglan makaila og usa ka kamatuoran nga susama sa mosunod: Ang mga apostoles nagpamatuod nga si Jesukristo namatay alang sa atong mga sala ug nabanhaw gikan sa mga patay.)
Sa unsang mga paagi nga ang mga pagpamatuod sa mga Apostoles sa Pagkabanhaw ni Jesukristo makatabang sa mga tawo kinsa nanlimbasug sa pagtuo sa Pagkabanhaw?

Aron matabangan ang mga estudyante nga mabati ang kamatuoran ug kaimportante niining kamatuoran, dapita ang usa ka estudyante sa pagbasa og kusog sa mosunod nga pagpamatuod ni Presidente Monson. (Mahimo usab nimong ipakigbahin ang mga pagpamatuod kabahin sa Pagkabanhaw ni Jesukristo nga nahatag sa ubang mga Apostoles sa bag-ong mga pakigpulong sa kinatibuk-ang komperensya.)

“Sa tibuok kong kasingkasing ug sa tumang pagbati sa akong kalag, mangusog ako sa akong tingog agig pagpamatuod isip usa ka linain nga saksi ug mamahayag nga ang Dios tinuod gayud nga buhi. Si Jesus Iyang Anak, ang Bugtong Anak sa Amahan diha sa unod. Siya ang atong Manunubos; Siya ang atong Tigpataliwala sa Amahan. Siya kadto ang namatay sa krus aron sa pagtubos sa atong mga kasal-anan. Nahimo Siya nga unang bunga sa Pagkabanhaw. Tungod kay Siya namatay, ang tanan gayud mabuhi pag-usab. ‘O, pagkanindot niining pulonga: “Ako nasayud nga ang akong Manunubos buhi!”’ Hinaut nga ang tibuok kalibutan masayud niini ug magsunod niana nga kahibalo” (“Ako Nasayud Nga ang Akong Manunubos Buhi!” 25).

Dapita ang mga estudyante sa pagpamalandong kon sa unsang paagi ang mga pagpamatuod sa mga Apostoles kalabut sa Pagkabanhaw ni Jesukristo nakatabang sa pagpalig-on sa ilang hugot nga pagtuo diha sa Pagkabanhaw. Mahimo nimong hangyoon ang pipila ka mga estudyante sa pagpakigbahin sa ilang mga hunahuna.

1 Mga Taga-Corinto 15:11–29

Si Pablo mipasabut sa doktrina sa Pagkabanhaw

I-summarize ang 1 Mga Taga-Corinto 15:11–15 pinaagi sa pagpasabut nga si Pablo mikwestyon nganong ang mga Santos sa Corinto nagsugod sa pagduha-duha sa katinuod sa Pagkabanhaw. Miingon siya nga kon si Jesukristo wala pa mobangon gikan sa mga patay, nan ang tanang mga saksi sa Iyang Pagkabanhaw sayop ug walay tumong ang pagsangyaw sa ebanghelyo.

Isulat ang mosunod nga mga pamahayag nga dili kompleto diha sa pisara:

Kon si Jesus wala pa mobangon gikan sa mga patay, nan … (tan-awa sa 1 Mga Taga-Corinto 15:16–19).

Tungod kay si Jesus mibangon gikan sa mga patay, … (tan-awa sa 1°Mga Taga-Corinto 15:20–22).

Dapita ang katunga sa klase sa pagbasa sa hilom sa 1 Mga Taga-Corinto 15:16–19 , nga mangita kon unsa kaha ang mahitabo kon si Jesus wala pa mobangon gikan sa mga patay. Dapita ang pikas katunga sa pagbasa sa hilom 1 Mga Taga-Corinto 15:20–22, mangita sa mga panalangin nga moabut agig resulta sa Pagkabanhaw ni Jesukristo.

Human sa igong panahon, hangyoa ang mga estudyante kinsa nagbasa sa 1°Mga Taga-Corinto 15:20–22 sa pagreport kon unsaon nila sa pagkompleto ang kapares nga pamahayag diha sa pisara. Paghangyo og usa ka estudyante sa pagsulat niining mga tubag sa estudyante diha sa pisara.

Ipasabut nga ang pulong nahaunang bunga sa bersikulo 20 nagpasabut ngadto sa unang bahin sa usa ka tanom nga naani pinaagi sa usa ka mag-uuma. Sama niining mga bunga sa pag-ani mao ang una sa daghan nga naani, si Jesukristo mao ang una sa tanang mga binuhat nga nabanhaw.

Sumala sa bersikulo 22, unsa ang mahitabo sa tanang anak sa Langitnong Amahan tungod kay si Jesukristo nabanhaw? (Ang mga estudyante mahimong mogamit og lain-laing mga pulong, apan siguroa nga ilang mailhan ang mosunod nga doktrina: Tungod sa Pagkabanhaw ni Jesukristo, ang tanan mabanhaw.)

Dapita ang mga estudyante kinsa nagbasa sa 1°Mga Taga-Corinto 15:16–19 sa pagreport kon unsaon sa pagkompleto ang ubang pamahayag diha sa pisara. Paghangyo og usa ka estudyante sa pagsulat niining mga tubag sa estudyante diha sa pisara.

Ipasabut nga sa mga bersikulo 14–19, mihangyo si Pablo sa mga Santos sa pagkonsiderar kon unsay mga sangputanan “kon si Kristo wala mibangon.” Mipasabut si Pablo nga ang tanang pagsangyaw mahimong kawang lamang kon si Jesukristo wala pa unta mipakita nga aduna Siyay gahum batok sa kamatayon ug sa ingon wala unta makahimo sa pag-ula sa atong mga sala. Apan tungod kay si Jesukristo nabanhaw gikan sa mga patay, kami nasayud nga Siya mao ang Anak sa Dios ug aduna niana nga gahum.

I-refer ngadto sa pamahayag ni Pablo sa bersikulo 19, “Kon niini rang kinabuhia may paglaum kita kang Kristo, nan, sa tanang mga tawo kita mao ang labing takus pagakaloy-an.”

Nganong mahimo kitang uyamot kon makabaton lang kita og paglaum diha ni Jesukristo niining kinabuhia o kon ang atong kinabuhi o kon ang atong paglaum nawala human sa atong kamatayon? (Kon wala pa ang Pagkabanhaw sa mga patay, nan ang atong paglaum diha kang Jesukristo dinhi lamang niining kinabuhia ug ang mga katuyoan sa plano sa kaluwasan dili matuman.)

Sumala sa mga bersikulo°20–22, unsang mahinungdanon nga paglaum ang gitanyag sa Pagkabanhaw ni Jesukristo? (Ang paglaum nga kitang tanan mabuhi pag-usab human sa kamatayon. Human makatubag ang mga estudyante, isulat ang mosunod nga kamatuoran diha sa pisara: Tungod sa Pagkabanhaw ni Jesukristo, kita makaangkon og paglaum.)

Sa unsang paagi nga ang Pagkabanhaw ni Jesukristo nagdala og paglaum ngari kanato kon ang usa ka tawo nga atong kaila mamatay o kon kita mahadlokon mahitungod sa ato mismong pagkamatay?

Aron matabangan ang mga estudyante nga mas makasabut sa kamahinungdanon sa Pagkabanhaw ni Jesukristo, hangyoa ang usa ka estudyante sa pagbasa og kusog sa mosunod nga pamahayag ni Propeta Joseph Smith. (Kon mahimo, ihatag kining pamahayag ngadto sa mga estudyante sa usa ka handout.)

“Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug ang ubang mga butang nga may kalabutan sa atong relihiyon mga sumpay lamang niini” (Mga Pagtulun-an sa mga Presidente sa Simbahan: Joseph Smith [2007], 58).

Unsa ang giingon ni Joseph Smith nga maoy sukaranang mga baruganan sa atong relihiyon?
Base sa unsay inyong nakat-unan niining leksyon, sa unsang paagi nga ang Pagkabanhaw ni Jesukristo importante ngadto sa ubang mga kamatuoran sa ebanghelyo?

Mahimo nimong ipamatuod ang katinuod sa Pagkabanhaw ug ang kamahinungdanon niini diha sa plano sa kaluwasan sa Langitnong Amahan.

Ipasabut nga sumala sa narekord diha sa 1°Mga Taga-Corinto 15:23–24, si Pablo mitudlo nga adunay usa ka han-ay ngadto sa Pagkabanhaw ug nga si Jesukristo “[motugyan] sa gingharian” ngadto sa Langitnong Amahan human matapos ang tanan nga mga matang dinhi sa yuta (o kalibutanong) “awtoridad ug gahum.”

Dapita ang usa ka estudyante sa pagbasa og kusog sa 1 Mga Taga-Corinto 15:25–26. Hangyoa ang klase sa pagsunod, nga mangita sa unsay gitudlo ni Pablo nga mahitabo sa mga kaaway ni Jesukristo sa katapusan.

Unsa ang giingon ni Pablo nga mahitabo sa mga kaaway ni Jesukristo sa katapusan? (Sila ibutang diha sa “ilalum sa iyang mga tiil” [bersikulo 25], o pagalaglagon.)
Kinsa o unsay makonsiderar nga mga kaaway ni Jesukristo? (Mga pananglitan naglakip sa sala, kahiwian, kadautan, ug ang yawa.)
Unsa ang katapusang kaaway nga pagalaglagon ni Jesukristo?
Ngano kaha nga ang kamatayon makonsiderar man nga kaaway ni Jesukristo ug sa plano sa Langitnong Amahan?

Pahinumdumi ang mga estudyante nga ang pipila ka mga miyembro sa Simbahan sa Corinto mituo nga ang mga patay dili mabanhaw, apan si Pablo mipasabut nga ang mga Santos nagbuhat og usa ka butang nga nagpakita sa ilang pagtuo sa pagkabanhaw sa mga patay.

Dapita ang usa ka estudyante sa pagbasa og kusog sa 1 Mga Taga-Corinto 15:29. Hangyoa ang klase sa pagsunod, nga mangita sa ordinansa nga gihimo sa mga Santos sa Corinto. Dapita ang mga estudyante sa pagreport sa ilang nakit-an.

Giunsa nimo pag-summarize kon unsa ang gihangyo ni Pablo sa mga Santos kalabot sa ilang pag-apil sa mga bunyag sa mga patay? (“Kon dili pa, unsa man ang ipasabut sa mga tawo sa ilang pagpabautismo alang sa mga patay?”)

Ipasabut nga ang ordinansa sa bunyag alang sa mga patay mao ang usa ka pagsaksi sa atong pagtuo sa Pagkabanhaw. Isulat ang mosunod nga kamatuoran diha sa pisara: Kadtong nangamatay nga walay bunyag makadawat niining mahinungdanong ordinansa.

Pagpakita og litrato sa templo. Dapita ang usa ka estudyante sa pagbasa og kusog sa mosunod nga pamahayag ni Presidente Gordon°B. Hinckley:

“Matag templo, madako man o magamay, karaan o bag-o, mao ang usa ka pagpamahayag sa atong pagpamatuod nga ang kinabuhi lapas pa sa lubnganan ingon ka tinuod sa pagkamortal” (“This Peaceful House of God,” Ensign, Mayo 1993, 74).

Dapita ang mga estudyante sa pagkonsiderar og usa ka panahon sa dihang mipahigayon sila og mga bunyag alang sa mga patay o nag-andam og mga pangalan nga dad-on sa templo. Dapita ang pipila ka mga estudyante sa pagtubag sa mosunod nga mga pangutana:

Unsa nga mga pagbati ang inyong naangkon samtang nag-andam kamo sa mga pangalan o gilihok ang buhat alang kanila diha sa templo?
Sa unsang paagi ang inyong mga kasinatian sa family history ug buhat sa templo nakapalig-on sa inyong hugot nga pagtuo diha sa Pagkabanhaw ni Jesukristo ug sa tanang katawhan?

Ikonsiderar sa pagpamatuod sa kaimportante sa pagpahigayon og family history ug buhat sa templo alang niadtong kinsa nangamatay na. Awhaga ang mga estudyante sa pagpakita sa ilang hugot nga pagtuo sa Pagkabanhaw ni Jesukristo ug sa katapusang Pagkabanhaw sa tanang mga binuhat pinaagi sa regular nga pag-apil sa family history ug buhat sa templo.

Scripture Mastery—1 Mga Taga-Corinto 15:20–22

Aron matabangan ang mga estudyante nga makasabut kon unsaon sa pagkahibalo sa doktrina diha sa 1°Mga Taga-Corinto 15:20–22 makaandam kanila sa pagtabang sa uban, dapita sila sa pagkonsiderar sa ilang kaila kinsa nawad-an og minahal. Hangyoa ang mga estudyante nga magsulat og mubo nga sulat ngadto niining tawo diha sa ilang mga class notebook o scripture study journal gamit ang ilang pagsabut niining tudling sa pagtudlo ug paghupay niining indibidwal. Dapita ang pipila ka mga estudyante sa pagpakigbahin kon unsa ang ilang gisulat uban sa klase.

Komentaryo ug Background nga Impormasyon

1°MgaTaga-Corinto 15:20. “Apan ang tinuod mao nga si Kristo gibanhaw gikan sa mga patay”

Elder D.°Todd Christofferson sa Korum sa Napulog Duha ka mga Apostoles mitudlo kon sa unsang paagi nga ang pagtuo nga si Jesukristo nabanhaw nagpasabut nga kita usab adunay hugot nga pagtuo nga kita mabanhaw:

Kon si Jesus tinuod gayud nga nabanhaw, mosunod dayon niini nga Siya usa ka balaanong binuhat. Walay mortal nga tawo nga dunay gahum sa iyang kaugalingon nga mabuhi og balik human mamatay. Tungod kay Siya nabanhaw, si Jesus dili mahimong usa lang ka panday, magtutudlo, rabbi, o propeta. Tungod kay Siya nabanhaw, si Jesus usa gayud ka Dios, gani ang Bugtong Anak sa Amahan.

“Busa, unsay Iyang gitudlo tinuod; ang Dios dili magbakak.

“Busa, Siya ang Tiglalang sa yuta, sama sa Iyang gisulti.

“Busa, ang langit ug ang impyerno tinuod, sama sa Iyang gitudlo.

“Busa, dunay usa ka kalibutan sa mga espiritu, nga Iyang gibisita human sa Iyang kamatayon.

“Busa, moanhi Siya pag-usab, sama sa giingon sa mga anghel, ug ‘mohari dinhi sa yuta.’

“Busa, dunay pagkabanhaw ug katapusang paghukom alang sa tanan” (“Ang Pagkabanhaw ni Jesukristo,” Ensign o Liahona, Mayo 2014, 113).

1°Mga Taga-Corinto 15:22. “Diha kang Kristo ang tanan mangabuhi”

Si Presidente Joseph Fielding Smith mipamatuod nga ang tanang tawo mabanhaw:

“Walay tawo nga nabuhi ug namatay dinhi sa yuta ang hikawan sa pagkabanhaw. Ang katarungan nagtudlo niini, ug kini yanong butang sa kaangayan. Si Adan lamang ang responsable sa kamatayon, ug busa ang Ginoo dili mobutang niini ngadto sa bisan kinsang tawo. Ang kaangayan mobungat nga walay tawo nga dili responsable sa kamatayon ang may tulubagon alang niini, ug busa, sama sa gipamahayag ni Pablo, ‘Maingon nga diha kang Adan ang tanan mamatay, gani diha kang Kristo ang tanan mangabuhi’” (Doctrines of Salvation,comp. Bruce R. McConkie, 3°vols. [1954–56], 2:274).