Leksyon 56

Lucas 18–21

Pasiuna

Samtang si Jesukristo mibiyahe padulong sa Jerusalem sa katapusan nga higayon sa mortalidad, Siya mitudlo sa Iyang ebanghelyo ug mihimo og mga milagro taliwala sa mga katawhan. Siya misakay nga madaugon ngadto sa Jerusalem, milimpyo pag-usab sa templo, ug mitudlo sa mga tawo nga anaa didto.

Mga Sugyot alang sa Pagtudlo

Lucas 18–21

Ang Manluluwas nagtudlo sa Iyang pagpadulong sa Jerusalem

Pasabta ang mga estudyante nga daghan na sila og nakat-unan sa mga panghitabo nga nasulat sa Lucas 18–21 gikan sa ilang pagtuon sa Mateo ug Marcos. Aron sa pagribyu sa duha niini nga mga panghitabo, ipakita ang mosunod nga mga litrato: Kristo ug ang Adunahang Batan-on nga Tigmando (Libro sa mga Hulagway sa Ebanghelyo [2009], no. 48; tan-awa usab sa LDS.org) ug Madaugon nga Pagsulod (Libro sa mga Hulagway sa Ebanghelyo, no. 50). Dapita ang mga estudyante sa pag-summarize niini nga mga istorya sa klase ug sa pagpasabut kon unsay ilang nahinumduman nga nakat-unan gikan sa mga istorya.

Mahimo ninyong gamiton ang mosunod nga summary sa Lucas 18–21 kon ang mga estudyante nagkinahanglan og tabang sa paghinumdom niini nga mga istorya. (Pahinumdom: Aron sa pagtabang sa mga estudyante nga makasabut kon kanus-a nahitabo ang mga panghitabo niini nga leksyon sa kinabuhi sa Manluluwas, mahimo nimong ipakita sa mga estudyante ang Ang Mortal nga Pangalagad ni Jesukristo sa usa ka Pagtan-aw nga paghulagway sa appendix niini nga manwal.)

Samtang si Jesukristo mibiyahe ngadto sa Jerusalem alang sa katapusan nga higayon sa pagka-mortal, Siya mitudlo sa pipila ka mga sambingay ug miayo sa daghan nga mga katawhan. Iyang gidapit ang dato nga batan-ong punoan sa pagtugyan sa tanan ngadto sa mga kabus ug pagsunod Kaniya. Siya miayo og usa ka buta nga tawo. Bisan pa sa pagbiay-biay, nakigsalo Siya uban sa usa sa labaw nga mga maniningil sa buhis sa Jerico.

Siya miabut sa Jerusalem ug, taliwala sa mga singgit sa pagdayeg, misakay og asno samtang Siya misulod sa dakbayan. Miusab Siya sa pagpapahawa sa mga tigpangilis og salapi gikan sa templo, mitudlo sa mga tawo didto, ug mitubag sa mga pangutana gikan sa mga sacerdote nga punoan ug mga escriba. Siya midayeg sa usa ka biyuda kinsa mihalad sa iyang duha ka diyot ngadto sa tipiganan sa templo. Iya usab nga gitudloan ang mga disipulo mahitungod sa Iyang Ikaduhang Pag-anhi.

Ipasabut nga kadaghanan sa mga istorya nga tun-an sa mga estudyante niini nga leksyon anaa ra sa Ebanghelyo ni Lucas.

Aron sa pag-andam sa mga estudyante sa pagtuon niini nga mga istorya, isulat sa pisara ang mosunod nga mga pangutana:

Unsa nga mga buhat ang tingali nagpasabut nga ang usa ka tawo tinud-anay nga gusto nga mas maduol ngadto sa Ginoo?

Unsa nga mga batasan ang nagpakita nga siya gayud gusto nga mapasaylo o nagtinguha sa tabang sa Ginoo?

Dapita ang mga estudyante sa pagkonsiderar niini nga mga pangutana samtang magtuon sila sa mosunod nga mga istorya gikan sa mga sinulat ni Lucas.

Isulat ang mosunod nga mga pakisayran sa kasulatan diha sa pisara: Lucas 18:1–8; Lucas 18:9–14; Lucas 18:35–43; Lucas 19:1–10. Ipasabut nga kini nga mga tudling sa kasulatan naglakip sa mga sambingay ug mga panghitabo gikan sa katapusang pagbiyahe sa Manluluwas paingon sa Jerusalem panahon sa Iyang mortal nga kinabuhi.

I-assign sa matag estudyante ang tagsa sa mga tudling sa kasulatan nga gisulat sa pisara, o ikonsiderar ang pagbahin sa klase ngadto sa upat ka grupo ug i-assign sa matag grupo ang tagsa sa mga tudling sa kasulatan diha sa pisara. Dapita ang matag estudyante o grupo sa pagbasa sa gi-assign nga tudling sa kasulatan ug pag-andam sa pagdrama-drama sa istorya o sambingay nga naglangkob niini. (Kon dili nimo grupohon ang mga estudyante, ikonsiderar ang pagdrama-drama sa matag istorya isip tibuok klase. Kon dili nimo ipadrama-drama kini nga mga istorya, mahimo nimong dapiton ang mga estudyante sa pagtuon sa tinagsa nga paagi sa gi-assign nga mga tudling sa kasulatan pinaagi sa paggamit sa mosunod nga mga pangutana ug dayon sa pagtudlo sa usag usa kon unsay ilang nakat-unan.) Ipasabut nga usa ka estudyante sa klase o sa matag grupo kinahanglan nga maoy tigsaysay ug mobasa sa istorya sa kasulatan samtang ang tibuok klase o grupo modrama-drama niini. Isip balaanong pagtahud ug pagrespeto sa Manluluwas, sultihi ang mga nagdrama-drama sa Lucas 18:35–43 ug Lucas 19:1–10 sa pagbuhat niini nga walay tawo nga morepresentar ni Jesukristo. Sugoa ang tigsaysay sa pagbasa sa mga pulong ni Jesus, ug hangyoa ang mga nagdrama-drama sa paglihok ingon nga Siya anaa dinha.

Pagpakita og balaang pagtahud ug respeto alang sa Ginoong Jesukristo

Aron sa pagtahud sa dignidad ni Jesukristo, ang Simbahan mainampingon sa paghulagway niini sa Manluluwas diha sa art ug teyatro. Kita usab kinahanglang magpakita og balaang pagtahud alang Kaniya diha sa atong mga klasehanan. Likayi ang paghulagway sa Manluluwas sa dili matinahuron nga paagi. Kadtong naghulagway sa Iyang tingog kinahanglan mogamit lamang sa Iyang mga pulong nga narekord diha sa mga kasulatan.

Samtang nag-andam ang mga grupo, dapita sila sa paghisgut og dungan sa mosunod nga mga pangutana ug mag-andam sa pagreport sa ilang mga tubag ngadto sa klase human sila modrama sa talan-awon. (Ikonsiderar ang pagsulat sa pisara niini nga mga pangutana o sa paghatag niini pinaagi sa usa ka handout.)

• Unsa ang gitinguha sa nag-unang mga karakter (biyuda, maniningil sa buhis, buta nga tawo, o Zaqueo) niini nga istorya?

• Unsa man ang gibuhat sa nag-unang karakter nga nagpakita nga ang iyang tinguha kinasingkasing?

• Unsa ang nahitabo tungod sa matinud-anong mga buhat sa nag-unang karakter?

• Unsa nga mga baruganan o mga doktrina ang inyong makita sa istorya?

Human sa igong panahon, dapita ang klase o ang matag grupo sa pagdrama-drama sa ilang istorya samtang gibasa sa narrator ang mga bersikulo. Samtang ang klase nagtan-aw o nagsunod diha sa ilang mga kasulatan, hangyoa ang mga estudyante sa pagkonsiderar unsay matudlo kanato sa matag istorya kabahin sa paggamit og hugot nga pagtuo sa Ginoo. Human sa matag pasundayag, hangyoa ang klase o grupo sa pagreport sa ilang mga tubag sa nag-unang mga pangutana. Hangyoa sila sa paglista diha sa pisara sa mga baruganan o mga doktrina nga ilang nailhan.

Human ang mga grupo makareport sa ilang mga tubag sa mga pangutana, pangutana sa mosunod nga mga pangutana:

• Unsa nga mga pagkapareha ang inyong namatikdan diha sa mga buhat sa matag usa sa nag-unang mga karakter? (Matag usa nagpakita og pagkamakanunayon o sinseridad samtang sila nagtinguha sa pag-angkon sa ilang mga tinguha.)

• Unsa ang matudlo kanato niini nga mga aksyon kabahin sa paggamit og hugot nga pagtuo sa Ginoo?

• Unsa nga mga pagkapareha ang inyong namatikdan sa unsay nadawat sa matag usa sa nag-unang mga karakter isip resulta sa iyang mga binuhatan? (Ang matag usa nakadawat og tabang o kalooy.)

Hangyoa ang mga estudyante sa pag-ila og usa ka baruganan gikan sa mga pagkapareha diha sa istorya. Ang mga estudyante mahimong moila og nagkalain-laing mga baruganan, apan siguroa nga mahatagan og gibug-aton nga kon kita sinsero ug makanunayon samtang kita naggamit sa hugot nga pagtuo sa Ginoo, kita makaangkon sa Iyang kalooy. Isulat kini nga baruganan diha sa pisara.

Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles. Hangyoa ang klase sa pagpaminaw alang sa unsay nagtimaan nga ang usa ka tawo naggamit og hugot nga pagtuo diha sa Ginoo.

“Ang tinuod nga hugot nga pagtuo nagtumong diha ni Ginoong Jesukristo ug sa kanunay mosangpot sa matarung nga aksyon” (“Pangayo Pinaagi sa Hugot nga Pagtuo,” Ensign o Liahona, Mayo 2008, 95).

I-refer ang mga estudyante ngadto sa mga pangutana nga gilista diha sa pisara sa pagsugod sa leksyon. Hangyoa ang mga estudyante sa pag-atubang ngadto sa usa ka pares ug paghisgut sa mga tubag sa mga pangutana.

• Unsa ang pipila ka mga paagi nga atong magamit karon ang atong hugot nga pagtuo sa Dios?

Dapita ang usa ka estudyante sa pagbasa og kusog sa mosunod nga pamahayag ni Elder Bednar, ug hangyoa ang klase sa pagpaminaw kon unsa ang gipasabut sa pagsinati sa mga kalooy sa Ginoo:

Ang malumo nga mga kalooy sa Ginoo mao ang mismong personal ug sa tinagsa-tagsa nga mga panalangin, kalig-on, proteksyon, pagpasalig, paggiya, mahigugmaong kalooy, paghupay, pag-abag, ug espirituhanong mga gasa diin atong nadawat gikan ni ug tungod ni ug pinaagi ni Ginoong Jesukristo” (“Ang Malumo nga mga Kalooy sa Ginoo,” Ensign o Liahona, May 2005, 99).

Dapita ang mga estudyante sa pagtubag sa mosunod nga mga pangutana diha sa ilang notebook sa klase o scripture study journal. (Mahimo nimong isulat ang mga pangutana diha sa pisara.)

• Sa unsang mga paagi nga kamo o tawo nga inyong kaila migamit og hugot nga pagtuo diha ni Jesukristo? Unsa nga kalooy nga inyo o ilang nasinati isip resulta?

• Ikonsiderar sa unsang mga paagi kamo nagtinguha sa tabang o kalooy sa Ginoo sa inyong kinabuhi. Unsay inyong buhaton sa paggamit sa inyong hugot nga pagtuo sa Ginoo aron makadawat sa Iyang kalooy?

Pagdapit og pipila ka mga estudyante kinsa komportable sa pagpakigbahin sa pagreport sa unsay ilang gisulat. Pahimangnoi sila sa dili pagpakigbahin sa bisan unsa nga personal ra kaayo. Mahimo usab nimong ipakigbahin ang imong kasinatian sa baruganan ug magpamatuod sa katinuod niini.

Komentaryo ug Background nga Impormasyon

Lucas 18:1–8. Ang sambingay sa babayeng balo [biyuda] ug sa maghuhukom

“Si Lucas mipahayag sa kinatibuk-ang mensahe sa sambingay sa nangamuyo nga biyuda ug sa maghuhukom nga dili makiangayon—‘kinahanglan magaampo sila kanunay ug dili magkaluya’ (Lucas 18:1). Ang Gresyanhon nga pulong nga gihubad isip ‘magkaluya’ nagpasabut nga mahimong mawad-an sa kadasig o maluya o kapuyon sa usa ka butang. Sa sambingay, ang pag-ampo sa walay paghunong girepresentaran sa usa ka biyuda kinsa pabalik-balik nga naghangyo sa usa ka maghuhukom sa pagtarung sa usa ka inhustisya. Si Elder Jeffrey R. Holland sa Korum sa Napulog Duha ka mga Apostoles mitudlo:

“‘Kon masulub-on, gitugnaw, moabut ang lisud nga panahon, kinahanglan kitang molahutay, kinahanglan kitang mopadayon, kinahanglan kitang mosugakod. Mao kana ang mensahe sa Manluluwas sa sambingay sa nangamuyo nga biyuda. … Padayon sa pagpanuktok niana nga pultahan. Padayon sa pagpangamuyo. Sa kasamtangan, hibaloi nga ang Dios naminaw sa inyong mga pangamuyo ug nakahibalo sa inyong pag-antus. Siya mao ang inyong Amahan, ug kamo Iyang anak’ (’Lessons from Liberty Jail,‘ Ensign, Sept. 2009, 30).

“Ang paglahutay nakagamut diha sa mga sukaranang mga baruganan sa ebanghelyo nga hugot nga pagtuo ug paglaum. Ang paglahutay nagpakita sa atong hugot nga pagtuo nga ang atong mga buhat magdala sa mga panalangin sa Ginoo sa atong kinabuhi” (New Testament Student Manual [manwal sa Church Educational System, 2014], 177).

Lucas 18:9–14. Ang sambingay sa Pariseo ug ang Maniningil sa Buhis

Si Presidente Howard W. Hunter mipasabut sa kalainan tali sa pag-ampo sa mga Pariseo ug sa pag-ampo sa mga maniningil sa buhis:

“Aduna pa bay mas dakong kalainan sa pag-ampo sa duha ka mga tawo? Ang Pariseo mibarug nga nagpalahi tungod kay siya mituo nga mas maayo siya kay sa ubang mga tawo, kinsa iyang gikonsiderar nga komon. Ang maniningil sa buhis mibarug usab nga nagpalahi, apan kini tungod kay gibati niya nga ang iyang kaugalingon dili takus. Ang Pariseo walay laing gihunahuna gawas sa iyang kaugalingon ug mitratar sa uban isip makasasala, samtang ang maniningil sa buhis naghunahuna sa tanan nga mga matarung kon ikumparar sa iyang kaugalingon, usa ka makasasala. Ang Pariseo walay gihangyo sa Dios, apan nagsalig sa iyang kinaugalingon nga pagpakamatarung. Ang maniningil sa buhis mihangyo sa Dios alang sa kalooy ug kapasayloan sa iyang mga sala.

“… Ang publikano, ang gitamay nga maniningil sa buhis, ‘sa iyang balay mipauli … nga mao hinooy gipakamatarung.’ (Lucas 18:14.) Sa laing pagkasulti, ang Ginoo miingon nga siya gipalingkawas sa sala, gipasaylo, o gilabanan. …

“Ang pagkamapainubsanon usa ka kinaiya sa pagkadiosnon nga gihuptan sa tinuod nga mga Santos. Sayon sabton nganong ang mapahitas-on nga tawo mapakyas. Siya kontento nga magsalig diha sa iyang kaugalingon lamang. … Ang mapahitas-on nga tawo nagpahilayo sa iyang kaugalingon gikan sa Dios, ug kon iya kining buhaton wala na siya magpuyo sa kahayag. …

“… Ang kasaysayan nagpamatuod nga kadtong nagpahitaas sa ilang kaugalingon igapahiubos, apan ang magapahiubos igapahitaas. Sa matag busy nga dalan adunay mga Pariseo ug mga maniningil sa buhis. Kini posible nga usa kanila nagdala sa atong ngalan” (“The Pharisee and the Publican,” Ensign, Mayo 1984, 65–66).

Lucas 18:35–43. Pag-ayo sa buta nga tawo

Ang hugot nga pagtuo ug pagkamakanunayon sa buta nga tawo nga ginganlan og Bartimeo makita sa unsang paagi siya misinggit ngadto ni Jesukristo alang sa kalooy—siya mipadayon sa pagsinggit bisan kon gibadlong na siya sa daghang mga tawo sa paghilum (tan-awa sa Marcos 10:47–48).

Lucas 18:1–8, 35–43. Magmapadayunon diha sa hugot nga pagtuo

Si Elder David A. Bednar sa Korum sa Napulog Duha ka mga Apostoles mipakigbahin og usa ka ehemplo sa kaimportante sa pagkamakanunayon taliwala sa mga pagsulay sa atong hugot nga pagtuo:

“Pipila ka tuig na ang milabay usa ka pamilya ang mibiyahe ngadto sa Europe gikan sa Estados Unidos. Pagkaabut gayud nila sa ilang destinasyon, ang 13 anyos nga anak nga lalaki nagkasakit. Ang inahan ug ang amahan sa sinugdanan nagtuo nga ang hinungdan sa iyang sakit sa tiyan mao ang kakapoy tungod sa taas nga biyahe, ug ang pamilya mipadayon sa ilang biyahe.

“Samtang sila nagpadayon, ang kahimtang sa anak nga lalaki nagkagrabe. Nagkagrabe ang dehydration [naughan sa tubig]. Gihatagan sa amahan ang iyang anak nga lalaki og panalangin sa priesthood, apan walay makita dayon nga kausaban.

“Paglabay sa daghang mga oras, ang inahan miluhod sa tupad sa iyang anak nag-ampo sa Langitnong Amahan alang sa kaayohan sa bata. Anaa sila sa dili sinati nga nasud layo kaayo sa ilang panimalay ug wala makahibalo unsaon sa pagpangayo og tabang medikal.

“Ang inahan nangutana sa iyang anak kon gusto ba siyang mag-ampo uban kaniya. Nasayud siya nga ang paghulat lamang sa gipaabut nga panalangin dili pa igo, kinahanglan silang magpadayon sa paglihok. Nagpasabut nga ang panalangin nga iyang nadawat sige pa gihapon, misugyot siya nga mag-ampo pag-usab, sama sa karaang mga apostoles, ‘Ginoo, dugangi ang among pagtuo’ (Lucas 17:5). Ang pag-ampo naglakip sa usa ka buhat sa pagsalig sa gahum sa priesthood ug pasalig sa pagpadayon sa pagbuhat sa bisan unsa nga gikinahanglan aron dunggon ang panalangin—kon kana nga panalangin nianang higayona nasubay sa kabubut-on sa Dios. Sa wala madugay human makahalad niining yano nga pag-ampo, ang kahimtang sa anak nga lalaki miarang-arang.

“Ang matinud-anong buhat sa inahan ug sa iyang anak nakatabang sa pagdapit sa gisaad nga gahum sa priesthood. … Ang pagkaayo niining 13 anyos nga batang lalaki wala mahitabo human sa ilang pagtuo ug natuman ‘sumala sa ilang hugot nga pagtuo diha sa ilang mga pag-ampo’ (D&P 10:47)” (“Pangayo Pinaagi sa Hugot nga Pagtuo,” Ensign o Liahona, Mayo 2008, 96).

Lucas 19:1–10. Si Zaqueo, ang punoan sa mga maniningil sa buhis

Alang sa dugang nga impormasyon mahitungod ni Zaqueo, adto sa New Testament Student Manual ([manwal sa Church Educational System, 2014], 177).