Leksyon 153: Pinadayag 4-5

Leksyon 153

Pinadayag 4–5

Pasiuna

Nakita ni Apostol Juan ang nahimaya nga mga binuhat nga nagsimba sa Langitnong Amahan samtang naglingkod Siya sa Iyang trono. Nakita usab ni Juan ang basahon nga gisilyohan sa pito ka mga silyo ug nakita ang Kordero, o si Jesukristo, kinsa takus nga moabli sa basahon.

Mga Sugyot alang sa Pagtudlo

Pinadayag 4

Nakita ni Apostol Juan ang nahimaya nga mga binuhat nga nagsimba sa Langitnong Amahan

Ikonsiderar ang pagkanta sa “Glory to God on High” (Hymns, nu. 67) isip pangbukas nga himno, o pagkanta og laing himno nga nagdayeg ug nagpasidungog sa Dios.

Hangyoa ang mga estudyante sa paghunahuna nga naa sila sa celestial nga gingharian. Dapita ang pipila ka mga estudyante sa paghulagway kon unsa kaha ang pagbati nga naa sa celestial nga gingharian.

Ipasabut nga sumala sa narekord sa Pinadayag 4-5, nakita ni Apostol Juan ang panan-awon sa usa ka bahin sa celestial nga gingharian. Hangyoa ang usa ka estudyante nga mobulontaryo sa pagdrowing sa pisara. Dapita ang pipila ka mga estudyante nga magpuli-puli sa pagbasa og kusog sa Pinadayag 4:1-8, ug hangyoa ang klase sa pagsunod, nga mangita kon unsay nakita ni Juan. Sugoa ang miboluntaryo sa pagdrowing, samtang gibasa kini nga bersikulo, sa unsay nakita ni Juan. Kadtong mga nagbasa mahimong mohunong panagsa aron mahatagan ang estudyante nga nagdrowing og panahon sa pagkompleto sa matag bahin sa drowing. (Hangyoa ang miboluntaryo nga dili iapil ang “sa trono [ang usa] naglingkod” [bersikulo 2], o Langitnong Amahan, sa drowing alang sa pagpakita og pagtahud Kaniya. Alang sa dugang nga partisipasyon, mahimo kang magdapit og mga estudyante nga magpuli-puli sa pagdrowing.)

Ipasabut nga ang “nahisulod sa espiritu” (bersikulo 2) nagpasabut nga mapalibutan sa Espiritu sa usa ka mapanagnaon nga kahimtang o panan-awon, ug ipasabut nga ang mutya nga “haspe” diha sa bersikulo 3 nagpasabut sa may kolor nga bato o diamante ug ang “cornalina nga bato” (bersikulo 3) usa ka bililhong bato nga kasagaran pula o pulahon nga pagka-orange.

Ipasabut nga ang modernong pagpadayag makatabang nato sa pagsabut og dugang mahitungod sa unsay nakita ni Juan. Sama pananglit, gihatag sa Ginoo ang pagpadayag nga narekord sa Doktrina ug mga Pakigsaad 77 human mihangyo si Propeta Joseph Smith Kaniya nga ihubad ang pipila ka mga simbolo ug mga panghitabo nga narekord sa Pinadayag 1–11.

Bahina ang mga estudyante ngadto sa magtinagurha o tinagutlo ka grupo, ug hatagi ang matag grupo og kopya sa mosunod nga handout. Dapita ang mga estudyante sa matag grupo sa pagbasa og kusog sa mga cross-reference nga passage ug sa pagsulat diha sa tsart og dugang nga impormasyon nga ilang makit-an mahitungod sa nakita ni Juan.

Pinadayag 4

Manwal sa Seminary Teacher sa Bag-ong Tugon—Leksyon 153

Unsa ang Nakita ni Juan	Cross-Reference	Dugang nga Impormasyon
Trono (Pinadayag 4:2–3)	Doktrina ug mga Pakigsaad 137:1–4
Kawhaan ug upat [baynte kwatro] ka mga anciano o elder nga dunay purong-purong (Pinadayag 4:4)	Doktrina ug mga Pakigsaad 77:5
Pito ka Espiritu sa Dios (Pinadayag 4:5)	Ang Hubad ni Joseph Smith niini nga bersikulo nag-usab sa “pito ka Espiritu” ngadto sa “pito ka sulugoon.”
Dagat nga bildo (Pinadayag 4:6)	Doktrina ug mga Pakigsaad 77:1; 130:6–9
Upat ka mga buhing binuhat [beasts] (Pinadayag 4:6–7)	Doktrina ug mga Pakigsaad 77:2–3
Ang buhing mga binuhat’ dagha’g mata ug unom ang pako (Pinadayag 4:8)	Doktrina ug mga Pakigsaad 77:4

Human sa igo nga panahon, dapita ang mga estudyante sa pagreport sa dugang nga impormasyon nga ilang nakit-an. Kon gikinahanglan, gamita ang mosunod nga mga tubag aron sa pagklaro o pagdugang sa panabut sa mga estudyante: naglingkod ang Dios sa trono sa celestial nga gingharian; ang 24 ka mga elder nga adunay mga korona mao ang matinud-anon nga mga elder kinsa nasakop sa pito ka mga simbahan; ang pito ka mga sulugoon sa Dios gihisgutan, dili ang pito ka mga espiritu; ang dagat nga bildo mao ang kalibutan sa iyang nahimaya, na-celestial nga kahimtang; ang upat ka buhing mga binuhat [beast] mga aktwal kini nga mga hayop nagrepresentar sa mga matang (o kasama nga kaliwat) sa nahimaya nga mga binuhat; ang mga mata sa buhing mga binuhat nagrepresentar sa dakong kahayag ug kahibalo, ug ang mga pako sa buhing mga binuhat nagrepresentar sa gahum sa paglihok ug sa pagbuhat.

Dapita ang pipila ka estudyante nga magpuli-puli sa pagbasa og kusog sa Pinadayag 4:8-11. Hangyoa ang klase sa pagsunod, nga mangita kon unsay gisulti ug gihimo niadtong mga nanag-alirong sa Langitnong Amahan.

Unsa ang gisulti niadtong mga nanag-alirong sa Langitnong Amahan mahitungod Kaniya? Unsay ilang gihimo?
Unsa ang girepresentahan sa pagpangitsa sa mga elder sa ilang mga purong-purong o korona atubangan sa Langitnong Amahan? (Ang posibling mga tubag maglakip sa ilang pag-ila sa kahalangdon sa Langitnong Amahan; ilang pag-ila nga utang nila ang ilang kahimayaan ngadto Kaniya; ug sa ilang pagtahud, pagdayeg, ug matugyanong debosyon ngadto Kaniya.)
Unsa nga baruganan ang atong makat-unan gikan niini nga istorya kon sa unsang paaagi ang pag-ila sa kahalangdon sa Langitnong Amahan makaapekto kanato? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Kon ilhon nato ang kahalangdon sa Langitnong Amahan, magtinguha kita sa pagsimba ug pagdayeg Kaniya.)
Unsa ang makatabang nato sa pag-ila sa kahalangdon sa Langitnong Amahan?

Pinadayag 5

Nakita ni Juan ang basahon nga gisilyohan sa pito ka mga silyo ug ang Kordero, kinsa takus nga moabli niini

Dapita ang pipila ka estudyante nga magpuli-puli sa pagbasa og kusog sa Pinadayag 5:1-4. Hangyoa ang klase sa pagsunod, mangita kon unsay nakita ni Juan nga anaa sa kamot sa Langitnong Amahan.

Unsa ang nakita ni Juan nga anaa sa kamot sa Langitnong Amahan? (Usa ka basahon, o linukot, nga dunay pito ka mga timri o silyo.)

Ipasabut nga sa karaang mga panahon, ang importanting mga dokumento silyuhan og lapok o wax [o tinulo sa kandila] nga mga pangsilyo. Ang tag-iya lamang sa dokumento ug kadtong gihatagan og katungod sa tag-iya ang tugutang mobuak sa silyo ug mobasa sa teksto.

Sumala sa bersikulo 2, unsa nga kwalipikasyon ang gikinahanglan sa usa ka tawo aron mahimo siyang moabli sa basahon?

Dapita ang mga estudyante sa pagbasa og hilum sa Doktrina ug mga Pakigsaad 77:6–7, nga mangita sa buot ipasabut sa basahon ug sa mga silyo.

Unsa ang sulod sa basahon?

Ipasabut nga ang 7,000 ka tuig nga gidugayon nagpasabut sa panahon sukad sa Pagkapukan ni Adan ug ni Eva. Wala kini magpasabut sa aktwal nga edad sa kalibutan, lakip ang mga panahon sa paglalang.

Sumala sa Doktrina ug mga Pakigsaad 77:7, unsa ang girepresentahan sa pito ka mga silyo? (Pito ka libo ka tuig nga gidugayon sa temporal nga pagkaania sa kalibutan, nga gisumpay gikan sa Pagkapukan ni Adan hangtud sa katapusan sa Milenyum.)

Ipasabut nga sa pagkonsiderar sa unsay buot ipasabut sa basahon ug sa mga silyo, dihang daw walay tawong takus nga moabli niini, tingali naghunahuna si Juan nga ang kabubut-on ug mga buhat sa Dios dili mapadayag o mapatuman.

Unsay mahitabo sa mga anak sa Langitnong Amahan kon ang Iyang plano alang sa ilang kaluwasan dili mapatuman?

Dapita ang usa ka estudyante sa pagbasa og kusog sa Pinadayag 5:5–7. Ipasabut nga ang Hubad ni Joseph Smith sa bersikulo 6 miusab sa tanang reference ngadto sa numero siyete ngadto sa numero dose. Hangyoa ang klase sa pagsunod, nga mangita kon nganong gisultihan si Juan sa dili pagbakho. Mahimo nimong ipasabut nga diha sa mga kasulatan, ang mga sungay nagsimbolo sa gahum o awtoridad; ang mga mata mahimong nagsimbolo sa kahayag ug kahibalo; ug ang numero dose mahimong nagsimbolo sa balaang panggobyerno ug organisasyon, o ang priesthood.

Nganong gisultihan man si Juan sa dili pagbakho?
Sumala sa narekord sa Pinadayag 5:6 unsa ang gipadayag mahitungod kang Jesukristo sa tawag o titulo nga gigamit para Kaniya? (Siya ang ihalad nga sakripisyo nga gihatag aron matubos ang mga anak sa Dios [tan-awa usab sa Isaias 53:7; 1 Mga Taga-Corinto 5:7; 1 Pedro 1:18–19]. Mahimo nimong ipasabut nga ang “Kordero nga nagtindog nga daw gipatay” [Pinadayag 5:6] nagpasabut sa Kordero nga mipakita sa mga marka sa pagkamatay. Ipasabut nga si Juan Bautista nag-refer sa Manluluwas isip “Kordero sa Dios” [Juan 1:29, 36].)

Dapita ang usa ka estudyante sa pagbasa og kusog sa Pinadayag 5:8–10. Hangyoa ang klase sa pagsunod, mangita kon sa unsang paagi ang mga binuhat nga nag-alirong sa trono sa Langitnong Amahan midayeg sa Kordero. Mahimo nimong ipasabut nga ang “panaksan nga napuno sa incienso” (bersikulo 8) nagpasabut sa dagkong mga baso o mga panaksan nga puno sa incienso.

Sa unsang paagi kining mga binuhat midayeg sa Kordero, o ni Jesukristo?
Base sa unsay nakita ug nadungog ni Juan mahitungod sa Kordero, unsa nga kamatuoran ang atong makat-unan mahitungod ni Jesukristo? (Ang mga estudyante mahimong mogamit og lain-laing mga pulong, apan siguroa nga mahibaloan nila ang mosunod nga kamatuoran: Si Jesukristo ra ang bugtong takus ug makahimo sa pagtubos kanato.)
Ngano kaha nga si Jesukristo ra man ang bugtong takus ug makahimo sa pagtubos kanato?
Sumala sa bersikulo 10, mamahimong unsa ang mga tawo nga natubos ni Jesukristo? (Mga hari ug mga pari, nga naglakip sa kababayen-an isip mga rayna ug mga paring babaye [tan-awa sa Bruce R. McConkie, Mormon Doctrine, 2nd ed. (1966), 613].)

Hangyoa ang mga estudyante sa pagpamalandong kon unsay kahulugan diha sa ilang kaugalingon sa plano sa Langitnong Amahan sa kaluwasan ug sa tahas sa Manluluwas niana nga plano. Dapita ang mga estudyante nga isulat ang ilang mga hunahuna ug mga pagbati diha sa ilang mga class notebook o mga scripture study journal. Pahibaloa sila nga sila dapiton aron mopakigbahin kon unsay ilang gisulat unya dapit sa katapusan sa leksyon.

Dapita ang pipila ka mga estudyante nga magpuli-puli sa pagbasa og kusog sa Pinadayag 5:11–14. Hangyoa ang klase sa pagsunod, nga mangita kon giunsa sa uban nga makaapil sa pagsimba ug pagdayeg kang Jesukristo ug sa Langitnong Amahan.

Human ang Kordero mikuha sa basahon gikan sa kamot sa Langitnong Amahan, ngano nga ang nahimaya nga mga binuhat ug ang tanang nilalang misimba ug midayeg man Kanila? (Ang mga binuhat miila sa kamaayo sa Langitnong Amahan ug ni Jesukristo ug gibati ang pagpasalamat sa tahas sa Kordero diha sa plano sa Langitnong Amahan.)
Unsa nga kamatuoran ang atong makat-unan mahitungod sa unsay mogiya kanato sa pagsimba ug pagdayeg sa Langitnong Amahan ug ni Jesukristo sama sa gihimo sa mga binuhat ug mga nilalang nga nakita ni Juan? (Ang mga estudyante mahimong mogamit og lain-laing mga pulong, apan siguroa nga ilang mahibaloan ang mosunod nga baruganan: Kon ilhon nato ug mobati kita sa pagpasalamat sa mga nahimo sa Langitnong Amahan ug ni Jesukristo kanato, magtinguha kita sa pagsimba ug pagdayeg Kanila.)

Ipasabut nga ang nahimaya nga mga binuhat ug ang tanang nilalang misimba sa Langitnong Amahan ug ni Jesukristo pinaagi sa kanta. Sa samang paagi, kita manganta sa pagsimba ug sa pagdayeg Kanila. Dapita ang klase sa pagkanta sa “All Creatures of Our God and King” (Hymns, nu. 62) o laing himno nga nagdayeg o naghimaya sa Dios, ug hangyoa sila sa paghunahuna kon sa unsang paagi ang himno may kalabutan sa Pinadayag 5:9–14.

Agig dugang sa kanunay natong pagsimba sa Langitnong Amahan ug ni Jesukristo pinaagi sa musika, unsa pa ang atong mahimo sa pagsimba Kanila?

Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles. Hangyoa ang klase nga maminaw kon unsay iyang gitudlo mahitungod sa pagsimba:

“Ang tinuod ug hingpit nga pagsimba naglakip sa pagsunod sa mga lakang sa Anak sa Dios; kini naglakip sa pagsunod sa mga sugo ug pagsunod sa kabubut-on sa Amahan hangtud niana nga ang-ang diin kita mouswag gikan sa grasya ug dugang pa nga grasya hangtud nga kita mahimaya diha kang Kristo sama kaniya diha sa iyang Amahan. Kini mas labaw pa kay sa pag-ampo ug wali ug kanta. Kini mao ang pagpakabuhi ug pagbuhat ug pagsunod. Pagsunod kini sa kinabuhi sa talagsaong Ehemplo” (“How to Worship,” Ensign, Dis. 1971, 129, 130).

Sa unsang paagi ang mga pagtulun-an ni Elder McConkie nakadugang sa inyong panabut kon unsaon nato sa pagsimba ang Langitnong Amahan ug si Jesukristo?
Sa unsang paagi kita mapanalanginan pinaagi sa pagsimba ug pagdayeg sa Langitnong Amahan ug ni Jesukristo?
Ngano nga nagtinguha man kamo sa pagsimba ug pagdayeg sa Langitnong Amahan ug ni Jesukristo? (Dapita ang mga estudyante sa pagpakigbahin og pipila ka mga hunahuna ug mga pagbati nga una nilang gisulat.)

Ikonsiderar ang pagpakigbahin sa imong mga pagbati mahitungod sa Langitnong Amahan ug ni Jesukristo, ilakip kon nganong ikaw andam nga mosimba Kanila.

Dapita ang mga estudyante sa pagpamalandong ug pagtubag sa mosunod nga pangutana diha sa ilang mga class notebook og scripture study journal:

Unsa pay inyong mahimo aron sa pagsimba sa Langitnong Amahan ug ni Jesukristo?

Human ang mga estudyante dunay igong panahon sa pagsulat, awhaga sila sa paggamit sa unsay ilang gisulat.

Komentaryo ug Background nga Impormasyon

Pinadayag 4–5. Mga simbolo sa unsay nakita ni Juan

Tan-awa sa pahina 541 sa New Testament Student Manual (manwal sa Church Educational System, 2014) alang sa commentary sa upat ka buhing mga binuhat o mga hayop (Pinadayag 4:6–9), ang mga tawag nga “Leon sa banay ni Juda”, ug “Gamut ni David” (Pinadayag 5:5), ug ang tahas sa Manluluwas isip Kordero sa Dios (Pinadayag 5:6–14).

Pinadayag 4:3. “Ug [Siya nga] naglingkod [niini nga trono] may panagway nga morag mutya nga haspe [jasper] ug cornalina”

Si Elder Bruce R. McConkie sa Korum sa Napulog Duha ka mga Apostoles mipasabut nganong gihisgutan man ni Juan ang haspe ug cornalina (tan-awa sa Pinadayag 4:3):

“Sa paningkamot nga marekord alang sa mortal nga panabut sa kahamili, himaya, ug katahum sa Kinalabwan sa tanang Makagagahum, gipahisama ni Juan ang iyang panagway sa bililhon ug sa dili kaayo bililhon nga mga mutya. Ang haspe nga gihisgutan gituohan sa mga komentarista nga usa ka diamante …

“… Sa unsang paagi ang mortal nga mga propeta makapangita og pinulongan nga makaabli sa tabil aron makita sa ilang isigka-mortal ang kaanindot ug katahum niana nga mahangturong kalibutan sa celestial nga gahum ug himaya? Namulong sila mahitungod sa mga bangaw ug mga mutya, sa nagliyok nga mga kalayo, sa nagdilaab nga mga uling sa kalayo nga dunay mga kilat nga nagpangidlap; gihisgutan nila ang mga dalugdog ug mga tingog, ang dahunog sa dagkong agos nga katubigan, ug sa harianong mga pasundayag sa gahum ug katahum—tanan sa paningkamot nga marekord diha sa mortal nga mga pulong diin kini makita ug mahibaloan lamang pinaagi sa Espiritu. (Ezeq. 1 ug 10; Isa. 6.) Apan ang Ginoo pagadayegon nga nahimo nila ang ingon nga mga pagpaningkamot aron kadtong wala makakita ug makadungog makabaton og gamayng kahibalo niadtong mga butanga nga natago luyo sa mga bintana sa langit” (Doctrinal New Testament Commentary, 3 vols. [1965–73], 3:464–66).

Pinadayag 4:6. “Usa ka dagat nga bildo”

Miingon si Propeta Joseph Smith sa mosunod mahitungod sa “dagat nga bildo” (Pinadayag 4:6):

“Samtang nanihapon, misulti ko sa akong pamilya ug mga higala nga didto, nga kon ang kalibutan mahimong balaan ug mahimong sama sa dagat nga bildo, mamahimo kining usa ka talagsaong urim ug thummim, ug ang mga Santos makakita niini ingon nga sila makit-an” (sa History of the Church, 5:279).

Si Presidente Brigham Young mihatag sa mosunod nga panglantaw:

“Kining kalibutana mamahimong celestial nga lawas—mamahimong sama sa dagat nga bildo, o sama sa urim ug thummim; ug kon nangandoy kang mahibalo bisan unsa, mahimo ra kang motan-aw dinhi sa yuta ug makita ang tanang kahangturan sa Dios” (sa Journal of Discourses, 8:200; tan-awa usab sa D&P 88:17–20, 25–26; 130:6–9).