Leksyon 118

Mga Taga-Galacia 1–4

Pasiuna

Gibadlong ni Apostol Pablo ang mga Santos sa Galacia tungod sa pagsunod sa sayop nga mga pagtulun-an ug mitudlo nga mamahimo silang mga manununod sa Dios pinaagi sa pagbaton og hugot nga pagtuo ug pagsunod ni Jesukristo.

Mga Sugyot alang sa Pagtudlo

Mga Taga-Galacia 1–2

Gibadlong ni Pablo ang mga Santos tungod sa pagsunod sa sayop nga mga magtutudlo ug giawhag sila nga mobalik sa ebanghelyo

Dapita ang mga estudyante sa paghunahuna nga usa sa ilang igsoon o higala misulti nga wala na siya makasiguro nga ang mga pagtulun-an sa Simbahan tinuod. Agig resulta, kining tawhana wala na mosimba ug wala na magsunod sa ebanghelyo. Hangyoa ang mga estudyante nga isulat sa ilang mga class notebook o mga scripture study journal kon unsay ilang isulti niini nga igsoon o higala aron matabangan siya nga mahibalo nga ang mga pagtulun-an sa Simbahan tinuod.

Dapita ang mga estudyante sa pagpangita sa kamatuoran samtang tun-an nila ang Mga Taga-Galacia 1 nga makatabang nila nga masayud unsaon sa pag-ila sa tinuod nga mga pagtulun-an.

Ipasabut nga ang Galacia usa ka rehiyon sa north-central Asia Minor nga naglangkob og daghang siyudad nga gibisitahan ni Pablo atol sa iyang ikaduha ug ikatulong misyonaryo nga panaw (tan-awa sa Mga Buhat 16:6; 18:23). (Mahimo nimong dapiton ang mga estudyante nga pangitaon ang Galacia diha sa Mga Mapa sa Biblia, nu. 13, “Ang Misyonaryo nga mga Panaw ni Apostol Pablo.”) Dapita ang usa ka estudyante sa pagbasa og kusog sa Mga Taga-Galacia 1:6–7. Hangyoa ang klase sa pagsunod, nga mangita sa problema nga anaa tali sa mga Santos sa Galacia.

• Nganong daghan man sa mga Santos sa Galacia mibiya sa tinuod nga ebanghelyo?

Ipasabut nga kadtong mga nagsamok-samok sa mga Taga-Galacia ug midaot sa mga pagtulun-an sa ebanghelyo nagmugna og mga pagduha-duha mahitungod sa gitudlo ni Pablo nga ang kaluwasan moabut lamang pinaagi kang Jesukristo. Kining mini nga mga magtutudlo mga Judeo nga mga Kristiyano kinsa nangangkon nga ang mga Santos sa Galacia kinahanglan nga matuli (tan-awa sa Giya ngadto sa mga Kasulatan, “Pagpatuli”) ug mosunod sa mga ritwal sa balaod ni Moises aron maluwas.

Tabangi ang mga estudyante nga masabtan ang sulod [content]

Ang sulod sa mga kasulatan mao ang katuyoan sa basahon, katawhan, panghitabo, mga wali o sermon, ug dinasig nga mga pagpasabut nga nahimong teksto sa kasulatan. Naghatag kini og kinabuhi ug kahulugan sa mga doktrina ug mga baruganan nga naa sa scripture block. Tabangi ang mga estudyante nga makasabut sa sulod aron ilang maila ang mahangturong mga kamatuoran nga naa sa teksto, apan ayaw pasubrai ang paghatag og emphasis sa background ug mga detalye nga mao na hinoon kini ang mahimong sentro sa leksyon.

Dapita ang usa ka estudyante sa pagbasa og kusog sa Mga Taga-Galacia 1:8–9. Hangyoa ang klase sa pagsunod, nga mangita sa gisulti ni Pablo mahitungod sa mga tawo nga misangyaw sa ebanghelyo nga sukwahi kaysa iyang gisangyaw isip Apostol sa Ginoo. Hangyoa ang mga estudyante sa pagreport sa ilang nakit-an.

Dapita ang usa ka estudyante sa pagbasa og kusog sa Mga Taga-Galacia 1:10–12. Hangyoa ang klase sa pagsunod, nga mangita kon si kinsa ang tinubdan sa mga pagtulun-an ni Pablo.

• Sumala sa bersikulo 12, kinsa man ang tinubdan sa mga pagtulun-an ni Pablo?

• Unsa nga kamatuoran ang atong makat-unan gikan sa mga pulong ni Pablo diha sa mga bersikulo 10–12 mahitungod sa tinuod nga doktrina? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Gipadayag ni Jesukristo ang tinuod nga doktrina ngadto sa Iyang mga propeta.)

• Sa unsang paagi ang paghinumdom niini nga mga kamatuoran makatabang kon duna kitay mga pangutana mahitungod sa pagtulun-an sa mga propeta?

Ipasabut nga tungod kay gipadayag ni Jesukristo ang tinuod nga doktrina ngadto sa Iyang mga Apostoles, Siya usab makapadayag ngari nato sa katinuod sa mga pagtulun-an sa mga propeta.

• Unsay atong mahimo aron makadawat og pagpadayag gikan sa Ginoo aron masayud ta sa atong kaugalingon nga ang pagtulun-an sa mga propeta tinuod?

Pahinumdumi ang mga estudyante bahin sa sitwasyon nga imong gihatag sa pagsugod sa leksyon. Dapita ang pipila ka estudyante nga ipasabut sa klase kon unsaon nila sa paggamit ang kamatuoran nga bag-o lang nilang nahibaloan mahitungod sa pagtubag sa tawo nga mikwestiyon sa mga pagtulun-an sa Simbahan.

Ipamatuod nga atong maila ang tinuod nga doktrina samtang atong tun-an ang pagtulun-an sa mga propeta ug tinguhaon ang pagpadayag gikan sa Ginoo.

I-summarize ang Mga Taga-Galacia 1:13–2:21 pinaagi sa pagpasabut nga gisugilon ni Pablo ang iyang pagkakabig ug ang una niyang mga misyonaryo nga panaw. Gipasabut sab niya nga ang kaluwasan wala sa balaod ni Moises, apan kita hinoon mapasaylo, o mahatagan og kaangayan, pinaagi sa hugot nga pagtuo kang Jesukristo.

Mga Taga-Galacia 3–4

Gidapit ni Pablo ang mga Taga-Galacia nga angkunon ang tanang panalangin nga gisaad ngadto kang Abraham pinaagi ni Jesukristo

Basaha og kusog ang mosunod nga mga sitwasyon. Human og basa sa matag usa, hangyoa ang mga estudyante sa pagpasabut nganong ang mga tawo niana nga sitwasyon mobati man nga dili bintaha ang pagkadawat sa tanang panalangin sa Ginoo kumpara sa uban diha sa Simbahan kinsa nagmatinud-anon sa ebanghelyo sukad sa batan-on pa.

1. Usa ka batan-ong lalaki nagtubo sa dili kaayo aktibong pamilya ug wala matudloi sa ebanghelyo samtang batan-on pa. Ang iyang pamilya naaktibo na karon sa Simbahan ug nagsugod na sa pagkat-on ug pagsunod sa ebanghelyo.

2. Usa ka babaye misaway sa Simbahan sulod sa daghang katuigan. Bag-o lang nasinati niya ang kausaban sa kasingkasing ug nabunyagan.

Dapita ang mga estudyante sa pagpangita sa kamatuoran samtang tun-an nila ang Mga Taga-Galacia 3–4 nga makatabang nila nga makasabut unsa nga mga panalangin ang maanaa para sa tanan, sa walay pagtagad sa iyang mga sirkumstansya ug nangaging mga pagpili.

Ipasabut nga daghan sa mga Santos sa Galacia mga kinabig sa pagka-Kristiyano ug mao nga dili literal nga kaliwatan ni Abraham, diin gisaad ang tanang panalangin sa Dios. Dapita ang usa ka estudyante sa pagbasa og kusog sa Mga Taga-Galacia 3:7–9. Hangyoa ang klase sa pagsunod, nga mangita sa gitudlo ni Pablo mahitungod sa mga tawo nga “adunay pagtuo” (bersikulo 7), o mituo, ni Jesukristo.

• Unsa man ang gitudlo ni Pablo mahitungod sa mga tawo nga mituo ni Jesukristo?

• Sumala sa bersikulo 8, unsa ang gisaad sa Ginoo kang Abraham?

• Sumala sa bersikulo 9, unsay mahitabo niadtong magbaton og hugot nga pagtuo kang Jesukristo?

Ipasabut nga ang “mabulahan uban kang Abraham nga may pagtuo” nagpasabut sa pagkahimong benipisaryo sa pakigsaad sa Dios nga gihimo uban kang Abraham nga pinaagi kaniya ang tanang katawhan makatagamtam sa mga panalangin sa ebanghelyo (tan-awa sa Abraham 2:11).

I-summarize ang Mga Taga-Galacia 3:10–25 pinaagi sa pagpasabut nga gitudlo ni Pablo nga ang balaod ni Moises gituyo aron matabangan ang mga Israelites sa pagduol kang Jesukristo ug mahatagan og kaangayan pinaagi sa hugot nga pagtuo Kaniya.

Dapita ang usa ka estudyante sa pagbasa og kusog sa Mga Taga-Galacia 3:26–27. Hangyoa ang klase sa pagsunod, nga mangita kon unsay angay natong buhaton aron madawat ang mga panalangin nga gisaad ngadto kang Abraham.

• Unsay angay natong buhaton aron madawat ang mga panalangin nga gisaad ngadto kang Abraham?

Isulat sa pisara ang mosunod nga dili kompleto nga pamahayag: Ang tanan nga mogamit og hugot nga pagtuo kang Jesukristo ug mosulod sa pakigsaad sa ebanghelyo mamahimong …

Dapita ang usa ka estudyante sa pagbasa og kusog sa Mga Taga-Galacia 3:28–29. Hangyoa ang klase sa pagsunod, nga mangita sa mga pulong nga ilang magamit sa pagkompleto diha sa pisara sa wala matiwas nga pamahayag nga baruganan.

• Sumala sa bersikulo 28, unsa ang makab-ot sa mga indibidwal kon mosulod sila sa pakigsaad sa ebanghelyo?

• Sumala sa bersikulo 29, unsa usab ang makab-ot niadtong giihap nga mga binhi ni Abraham pinaagi ni Jesukristo?

Ipasabut nga ang usa ka manununod mao ang tawo nga gihatagan og katungod pinaagi sa balaod nga makadawat og estado, o mga kabtangan, gikan sa laing tawo.

Dapita ang usa ka estudyante sa pagbasa og kusog sa Mga Taga-Galacia 4:7. Hangyoa ang klase sa pagsunod, nga mangita kon kang kinsa kita mamahimong mga manununod.

• Kang kinsa kita mahimong mga manununod? (Gamit ang pulong sa mga estudyante, kompletuha ang baruganan diha sa pisara aron maghatag kini sa mosunod nga kamatuoran: Ang tanan nga mogamit og hugot nga pagtuo kang Jesukristo ug mosulod sa pakigsaad sa ebanghelyo mamahimong usa kang Jesukristo ug manununod sa Dios.)

• Nganong importante man nga makahibalo nga gisaad sa Dios kini nga mga panalangin ngadto sa tanan nga mosulod sa pakigsaad, nga dili magtagad kon unsa ang iyang kahimtang?

Ipamatuod nga ang mga saad sa Langitnong Amahan ihatag sa tanan kinsa mosulod sa pakigsaad sa ebanghelyo. Awhaga ang mga etudyante sa pagmatinud-anon sa mga pakigsaad nga ilang gihimo.

I-summarize ang Mga Taga-Galacia 4:8–31 pinaagi sa pagpasabut nga gidapit ni Pablo ang mga Santos sa Galacia sa pagbalik ngadto kang Kristo ug moeskapo gikan sa pagkaulipon nga moabut gumikan sa pagsunod sa balaod ni Moises.

Komentaryo ug Background nga Impormasyon

Mga Taga-Galacia 1:8–10. “Usa ka manulonda [anghel] gikan sa langit”

Ang mga pagtulun-an ni Pablo nga narekord sa Mga Taga-Galacia 1:8–10 usahay masayop sa paggamit sa pakiglantugi batok sa mga panan-awon bahin sa mga anghel ug pagsangyaw sa usa ka gipahiuli nga ebanghelyo. Hinoon, si Pablo wala magtudlo nga ang tanang pagpakita sa mga anghel angay nga isalikway, kay ang mga kasulatan nagpakita nga ang mga anghel sa pagkatinuod moabut sa ulahing mga adlaw aron masangyaw pag-usab ang ebanghelyo (tan-awa sa Pinadayag 14:6). Hinoon, gitudlo ni Pablo nga kon ang usa ka anghel moabut sa pagpahisalaag sa mga tawo gikan sa tinuod nga ebanghelyo, nan kana nga anghel kinahanglang isalikway (tan-awa usab sa Alma 30:53). Ang tinuod nga ebanghelyo karon, sama sa kapanahunan ni Pablo, gipangalagad sa awtorisadong mga propeta ug mga apostoles (tan-awa sa Mga Taga-Efeso 2:19–20; 4:11–14) ug magapadayon “sa grasya ni Kristo” (Mga Taga-Galacia 1:6; tan-awa usab sa 2 Nephi 2:8; 10:24).

Mga Taga-Galacia 2:11–16. Ang pakig-atubang ni Pablo kang Pedro

Alang sa dugang nga impormasyon bahin sa panagsumpaki ni Pablo ug ni Pedro samtang mibisita si Pedro sa mga Santos sa Antioquia, tan-awa sa New Testament Student Manual (manwal sa Church Educational System, 2014), 413.

Mga Taga-Galacia 3:10–14. “Ang tunglo sa kasugoan”

Sumala sa narekord sa Mga Taga-Galacia 3:10, gitudlo ni Pablo nga kadtong nagtinguha og kaangayan sa balaod ni Moises obligado sa pagtuman niini. “Matinunglo ang tanan nga wala magbantay sa tanang kalagdaan nga nahisulat sa basahon sa kasugoan, aron sa pagtuman niini,” miingon si Pablo. Kining imposible nga kinahanglanon magbilin sa tanan nga nagtinguha og kapaangayan pinaagi sa balaod ubos usab sa “tunglo sa kasugoan” (Mga Taga-Galacia 3:13). Mipasabut og dugang si Pablo nga si Jesukristo nag-antus para sa “tunglo sa kasugoan” gumikan kay “nahimo siyang tunglo alang kanato” pinaagi sa Iyang Pag-ula (Mga Taga-Galacia 3:13). Pinaagi sa Pag-ula ni Jesukristo, ang tanan makadawat sa mga panalangin ni Abraham pinaagi sa paggamit og hugot nga pagtuo kang Jesukristo ug pagsulod sa pakigsaad sa ebanghelyo.

Mga Taga-Galacia 3:24. “Ang kasugoan nahimong atong magtatagad [schoolmaster]”

Si Elder Paul V. Johnson sa Seventy mipasabut nga daghang tawo sa kapanahunan sa Bag-ong Tugon nasayop sa pagsabut sa katuyoan sa balaod ni Moises:

“Daghang mga Judeo, ug gani ang Kristiyanong mga Judeo, … wala na makakita sa katuyoan ug tukmang dapit sa balaod. Usa sa mga rason niini mao ang dili awtorisadong pagdugang og mga kinahanglanon ug mga tradisyon libut sa balaod nga nagdugang sa pagpahanap sa tinuod nga katuyoan niini. Kini nga mga gipangdugang ug mga tradisyon dili na usa ka ‘magtatagad … kang Kristo’ (Mga Taga-Galacia 3:24), ‘nagpunting sa atong mga kalag ngadto kaniya’ (Jacob 4:5), apan hinoon usa ka dakong palas-anon ug malisud hinungdan nga ang mga Judeo mitan-aw ‘lapas sa tumong’ (Jacob 4:14) ug gipahimutang ang hiwi nga balaod puli sa Tighatag Mismo sa Balaod” (“Responding Appropriately to Change” [address to Church Educational System religious educators, Peb. 8, 2013], 1, si.lds.org).

Mga Taga-Galacia 3:28. “Kamong tanan usa ra diha kang Kristo Jesus”

Usahay ang mga tawo magpanuko nga mabunyagan o pag-apil sa hingpit sa Simbahan kay nabalaka sila basin og mabiyaan nila ang ilang kultura o kay tingali mibati sila nga dili angay. Si Presidente James E. Faust sa Unang Kapangulohan mitudlo nga ang pagkamiyembro sa Simbahan mahimong may pagkalahi-lahi ug may pagkahiusa:

“Wala mawala ang atong pagkatawo sa pagkahimo natong mga miyembro sa simbahan. Mamahimo kitang mga manununod sa gingharian sa Dios, nga nahisakop sa lawas ni Kristo ug sa espirituhanong paagi gikalimtan ang pipila ka mga panagkalahi aron mahiusa sa mas mahinungdanon nga espirituhanong katuyoan. Moingon kami ngadto sa tanang mipasakop sa Simbahan, nga hupti ang tanang may kahamili, maayo, ug makabayaw nga kultura ug personal nga pagkatawo. Hinoon, ubos sa awtoridad ug gahum sa mga yawe sa priesthood, ang tanang mga pagkalahi mawala samtang maningkamot kita nga mahimong mga manununod sa gingharian sa Dios” (“Heirs to the Kingdom of God,” Ensign, Mayo 1995, 62).

Dugang nga mga Ideya sa Pagtudlo

Mga Taga-Galacia 2:16–21. Gitudlo ni Pablo nganong dili na kinahanglanon ang pagsunod sa balaod ni Moises

Dapita ang usa ka estudyante sa pagbasa og kusog sa Mga Taga-Galacia 2:16. Hangyoa ang klase sa pagsunod, nga mangita kon nganong ang Santos nga mga Hentil wala magkinahanglan nga motuman sa mga ritwal sa balaod ni Moises.

• Nganong ang mga Santos nga mga Hentil wala magkinahanglan nga motuman sa tanang mga ritwal sa balaod ni Moises? (Ang “mga buluhaton sa balaod” naglakip sa pipila ka mga ritwal nga desinyong mobulag sa Israel gikan sa ubang mga nasud ug nagpaabut sa pag-anhi ni Kristo. Ang pagtuli usa niini sa mga buluhaton sa balaod. Tungod kay ang balaod natuman kang Jesukristo, ang mga Santos sa Galacia niadtong higayuna nagkinahanglang mogamit sa ilang pagtuo kang Jesukristo aron mahatagan og kaangayan.)

• Unsa ang buot ipasabut sa mahatagan og kaangayan? (“Aron mapasaylo gikan sa silot sa sala ug ideklarar nga dili sad-an” [Giya ngadto sa mga Kasulatan, “Kaangayan,” scriptures.lds.org].)

Dapita ang usa ka estudyante sa pagbasa og kusog sa Mga Taga-Galacia 2:18-20. Hangyoa ang klase sa pagsunod, nga mangita kon unsay giingon ni Pablo nga maoy “makahimo [niya] nga malapason” (bersikulo 18).

• Sumala sa bersikulo 18, unsa nga buhat ang giingon ni Pablo nga maghimo niyang malapason? (Pagbalik sa mga butang nga iya nang naguba, buot ipasabut pagbalik sa kanhi niyang mga gituohan ug binuhatan bisan og ang balaod gituman na pinaagi ni Kristo.)

Aron matabangan ang mga estudyante nga makasabut sa mga pagtulun-an ni Pablo diha sa Mga Taga-Galacia 2:18–20, pil-a sa katunga ang tulo ka pirasong papel. Isulat ang pulong nga mga gituohan sa usa ka papel ug ang pulong nga mga binuhatan sa laing papel. Pabaruga kining duha ka papel itapad nga magporma og kwadrado. Ibutang ang laing papel sa ibabaw sa kwadrado aron mahimong atop, sigun sa gihulagway sa kauban nga diagram. Ipasabut nga kining balaya nagrepresentar sa kinabuhi ni Pablo sa wala pa siya mahimong disipulo ni Kristo.

• Unsa man ang giguba o gibiyaan ni Pablo aron mahimong usa ka disipulo ni Jesukristo? (Ang iyang pagtuman sa balaod ni Moises. Human makatubag ang mga estudyante, tumbaha ang balay.)

• Nganong si Pablo maghimo man sa iyang kaugalingon nga malapason kon mobalik siya sa kanhi niyang papakabuhi?

Ipasabut ang mga pulong nga “gilansang ako uban kang Kristo” sa bersikulo 20, ug ipasabut nga gigamit ni Pablo kining mga pulonga aron mahulagway ang proseso nga iyang giagian sa pagbiya niya sa iyang kanhi mga gituohan ug binuhatan ug tugutan kining mamatay.

• Sumala sa bersikulo 20, giunsa sa pagpakabuhi ni Pablo human sa iyang pagkakabig? (Nagpakabuhi siya uban sa hugot nga pagtuo kang Jesukristo.)

• Unsa nga kamatuoran ang atong makat-unan gikan sa ehemplo ni Pablo kon unsaon sa pagpakabuhi pinaagi sa hugot nga pagtuo kang Jesukristo? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga baruganan: Gigamit nato ang hugot nga pagtuo kang Jesukristo samtang atong giwala ang mga gituohan ug binuhatan nga sukwahi sa Iyang kabubut-on ug sa dili na gayud pagbuhat niini. Isulat sa pisara kini nga kamatuoran.)

• Unsa ang ubang mga sanglitanan sa mga gituohan o binuhatan nga tingali gikinahanglang biyaan sa usa ka tawo aron magpakabuhi sa ebanghelyo ni Jesukristo?

Hangyoa ang mga estudyante sa paghunahuna og usa ka tawo nga ilang kaila kinsa mibiya sa karaan niyang mga gituohan ug binuhatan aron magpakabuhi og bag-o ug mas diosnong kinabuhi. Dapita ang mga estudyante sa pagpamalandong kon sa unsang paagi migamit og hugot nga pagtuo kang Jesukristo kining tawhana.

Dapita ang mga estudyante sa paghunahuna og bisan unsang gituohan o mga binuhatan nga tingali kinahanglan nilang biyaan. Awhaga sila sa pagpakabuhi pinaagi sa hugot nga pagtuo kang Jesukristo pinaagi sa pagbiya niana nga mga gituohan o mga binuhatan.