Leksyon 116: 2 Mga Taga-Corinto 8–9

Leksyon 116

2°Mga Taga-Corinto 8–9

Pasiuna

Si Pablo misulat ngadto sa mga Santos sa Corinto, nagpasabut nga ang mga miyembro didto sa Macedonia gawasnong nanghatag niadtong nanginahanglan. Iyang giawhag usab ang mga Santos sa Corinto sa pagsunod sa ehemplo sa Manluluwas pinaagi sa paghatag ngadto sa mga kabus. Gitudlo ni Pablo ang mahitungod sa mga panalangin nga moabut niadtong malipayon nga mohatag sa mga kabus.

Mga Sugyot alang sa Pagtudlo

2 Mga Taga-Corinto 8

Si Pablo mitambag sa mga Santos sa pag-amuma sa mga kabus

Isulat ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles (gikan sa “Dili ba Kitang Tanan Makililimos?” Ensign o Liahona, Nob. 2014, 40) sa pisara sa dili pa magklase, apan pagbilin og blangko nga luna imbis sa pulong nga kawad-on. Sugdi ang leksyon pinaagi sa pagdapit og usa ka estudyante sa pagbasa og kusog sa pamahayag.

“Sa tibuok kasaysayan ang, kawad-on usa sa kinadak-ang hagit sa tawhanong kaliwat. Tataw nga ang pag-antus kasagaran pisikal, apan ang espiritwal ug emosyonal nga kadaut nga dala niini tingali mas grabe pa sa tanang sitwasyon.”

Hangyoa ang mga estudyante sa pagtag-an sa nawala nga pulong diha sa pamahayag. Dayon isulat diha ang pulong nga kawad-on.

Unsa ang kawad-on? (Ang kahimtang sa pag-angkon og gamay o walay kwarta, pagkaon, o pamaagi sa pag-abag.)
Nganong ang kawad-on, mahimong ingon kalisud nga hagit?

Awhaga ang mga estudyante sa paghunahuna og mga indibidwal nga ilang nailhan kinsa nagkinahanglan og tabang sa bisan unsang matang, lakip ang pisikal, emosyonal, sosyal, o espiritwal. Dapita ang mga estudyante sa pagpangita sa mga kamatuoran samtang sila magtuon sa 2 Mga Taga-Corinto 8–9 nga makatabang kanila nga makasabut ug motuman sa ilang katungdanan sa pagtabang sa uban kinsa anaa sa panginahanglan.

I-summarize ang 2 mga taga Corintoi 8:1–8 pinaagi sa pagpasabut nga si Pablo misulti sa mga Santos sa Corinto nga ang mga miyembro sa Simbahan didto sa Macedonia madagayaong mihatag aron matabangan ang mga kabus diha sa ilang temporal nga mga panginahanglan. (Mahimo nimong itudlo sa mga estudyante ang Corinto ug Macedonia diha sa Bible Maps, nu.°13, “The Missionary Journeys of the Apostle Paul.”) Mipasabut si Pablo nga ang mga miyembro sa Macedonia mibuhat sa ingon tungod kay sila nagtinguha sa pagbuhat sa kabubut-on sa Dios. Iyang giawhag ang mga Santos sa Corinto sa pagsunod niining ehemplo sa pagsangkap sa mga panginahanglan sa uban tungod sa sinsero nga gugma.

Isulat ang mga pulong nga adunahan ug kabus diha sa pisara.

Dapita ang mga estudyante sa pagbasa sa hilum ang 2 Mga Taga-Corinto 8:9, nga mangita kon unsay gisulti ni Pablo nga gibuhat ni Jesukristo alang sa mga Santos. Pagkahuman sa igong panahon ipangutana ang mosunod nga mga pangutana, ug ilista ang mga tubag sa mga estudyante sa pisara ubos sa mga pulong adunahan ug kabus.

Sa unsang paagi nga si Jesukristo adunahan didto sa kinabuhi nga wala pa dinhi sa yuta? (Ang mga tubag sa mga estudyante mahimong maglakip sa mosunod: Si Jesukristo mao ang Unang Natawo sa Amahan diha sa espiritu ug gani sa wala pa Siya matawo dinhi sa mortalidad. Si Jesukristo usa ka Dios kinsa nagbarug sunod sa Langitnong Amahan sa awtoridad, gahum, ug himaya ug milalang sa daghang kalibutan ubos sa pagdumala sa Amahan.)
Sa unsang pamaagi kaha Siya giisip nga kabus sa Iyang panahon sa mortalidad? (Siya mibiya sa Iyang posisyon sa himaya aron matawo ug makapuyo uban sa mapainubsanon nga mga kahimtang dinhi sa yuta.)
Sa imong hunahuna unsa ang gipasabut sa bersikulo°9 nga kita “pinaagi [sa Manluluwas] nga kakabus kamo mahimong dato”? (Tungod kay Si Jesukristo nakig-angay sa Iyang trono sa kinabuhi nga wala pa sa yuta ug mianhi sa yuta aron sa pagpangalagad, nahimong ehemplo alang kanato, ug gihimo ang Pag-ula, kita makaangkon sa mga bahandi sa kinabuhing dayon.)

Ipasabut sa mga estudyante nga mga sayo sa usa ka tuig ang, ang mga Santos sa Corinto nakahimo og koleksyon sa mga pagkaon alang sa mga kabus nga mga Santos didto sa Judea. Dapita ang usa ka estudyante sa pagbasa og kusog sa 2 Mga Taga-Corinto 8:10–11. Hangyoa ang klase sa pagsunod, nga mangita sa unsay gitambag ni Pablo nga buhaton sa mga Santos sa Corinto.

Unsa man ang gitambag ni Pablo nga buhaton sa mga Santos sa Corinto?

Ipasabut nga ang mga pulong “buhatonon” ug “himoon ang pagbuhat niini” nagpasabut nga si Pablo mipahimangno sa mga Santos sa pagtuman sa ilang nangagi nga pasalig nga mohatag kutob sa ilang mahimo sa mga kabus nga mga Santos, sama sa gihatag sa Manluluwas walay katapusan nga mga bahandi ngadto kanila.

Unsay mahitabo sa matag usa kanato kon ato nang masabtan ang tanang nahatag sa Manluluwas ngari kanato? (Ang mga estudyante mahimong mogamit og lain-laing mga pulong apan kinahanglang makaila sa baruganan nga susama sa mosunod: Kon ato nang masabtan ang tanang nahatag sa Manluluwas ngari kanato, kita mahimong mas andam nga mohatag sa atong kabtangan ngadto sa uban.)
Sa unsang paagi nga ang pagpamalandong sa mga gasa sa Manluluwas kanato makapadasig nato sa paghatag niadtong anaa sa panginahanglan?
Unsang piho nga mga gasa ang nahatag sa Manluluwas ninyo nga mahimong modasig ninyo sa paghatag ngadto sa uban?

Dapita ang pipila ka mga estudyante sa pagbasa og kusog sa 2 Mga Taga-Corinto 8:12–15. Hangyoa ang klase sa pagsunod, nga mangita og dugang nga kamatuoran nga gitudlo ni Pablo mahitungod sa kaimportante sa pagsuporta sa usag usa sa temporal nga paagi.

Unsa nga mga baruganan nga atong makat-unan sa mga bersikulo 12–13? (Tabangi ang mga estudyante nga mahibaloan ang mosunod nga kamatuoran: Gusto sa Dios nga andam kitang mohatag bisan kon kita walay bisan unsang butang nga ikahatag.)

Aron matabangan ang klase nga makasabut niining kamatuoran, dapita ang usa ka estudyante sa pagbasa og kusog sa mosunod nga pamahayag ni Elder Jeffrey°R. Holland:

“Datu o kabus, kinahanglang mohimo “kutob sa atong mahimo” kon ang uban nanginahanglan” (“Dili Ba Kitang Tanan Makililimos?” 41).

Unsay atong mabuhat para sa uban kon kita walay bisan unsang butang nga ikahatag nila?
Sumala sa mga bersikulo 14–15, kinsa ang makabenepisyo kon ang tanang mga Santos makanunayong manghatag niadtong anaa sa panginahanglan? (Bisan kinsa mahimong anaa sa panginahanglan sa bisan unsang panahon.)
Unsa ang pipila ka pamaagi diin ang tanan makahatag og kaayohan kon kita andam sa paghatag?

Aron matabangan ang mga estudyante nga mobati sa kaimportante niining mga kamatuoran ug mga baruganan ug mogamit niini, basaha og kusog ang mosunod nga pamahayag ni Elder Holland. Dapita ang mga estudyante sa pagpaminaw kon sa unsang paagi nga ang Ginoo makatabang nato nga motubag sa maloloy-ong paagi ngadto sa mga kabus.

“Wala gyud ko masayud unsaon sa matag usa ninyo ang pagtuman sa inyong obligasyon ngadto sa dili o wala makatabang kanunay sa ilang mga kaugalingon. Apan nasayud ko nga nahibalo ang Dios, ug Siya motabang ug mogiya kaninyo sa inyong manggiloy-ong mga buhat sa pagkadisipulo kon mahunahunaon ug mainampoon ug mangita kamo og paagi sa pagsunod sa sugo nga balik-balik Niyang gihatag kanato.” (“Dili Ba Kitang Tanan Makililimos?” 41).

Unsa ang giingon ni Elder Holland nga angay natong buhaton aron mahimong andam sa pagtabang sa kabus ug timawa?
Unsa ang pipila ka paagi nga ang Simbahan naestablisar nga pinaagi niini atong makab-ot ang mga panginahanglan sa mga kabus? (Pinaagi sa mga halad sa puasa, lokal nga mga service project, ug humanitarian nga mga oportunidad.)

Awhaga ang mga estudyante sa pagsulat sa ilang mga class notebook o scripture study journal og usa ka butang nga ilang giplano nga buhaton base sa unsay gitudlo ni Pablo mahitungod sa paghatag ngadto sa kabus ug timawa.

I-summarize ang 2 Mga Taga-Corinto 8:16–24 pinaagi sa pagpasabut nga si Pablo namulong ngadto sa mga Santos sa Corinto mahitungod ni Tito ug sa laing duha ka kaigsoonan nga gipadala sa pagkolekta og mga hinabang alang sa mga Santos didto sa Jerusalem. Si Pablo namulong mahitungod sa iyang kompyansa sa mga Santos sa Corinto ug mipasabut nga ang ilang paghatag og ubay-ubay magsilbing ebidensya sa ilang paghigugma sa uban.

2 Mga Taga-Corinto 9

Si Pablo nagtudlo mahitungod sa mga panalangin sa pagka sinsero nga tighatag

I-summarize ang 2 Mga Taga-Corinto 9:1–5 pinaagi sa pagpasabut nga si Pablo mipadayon sa pagdayeg sa mga Santos sa Corinto. Misulti siya sa mga Santos nga siya mipadala ni Tito ug sa uban aron sa pagsiguro sa ilang kaandam sa pagpanghatag.

Hangyoa ang mga estudyante sa pagpamalandong kon nakahatag ba sila og butang sa usa ka tawo o miserbisyo alang sa usa ka tawo sa paagi nga kontra-gusto.

Nganong usahay lisud ang mahimong madasigon sa paghatag sa inyong panahon, kwarta o ubang mga kapanguhaan ngadto sa uban?

Dapita ang usa ka estudyante sa pagbasa og kusog sa 2 Mga Taga-Corinto 9:6–7. Hangyoa ang klase sa pagsunod, nga mangita og ikakomparar sa gigamit ni Pablo sa pagtudlo sa mga miyembro sa Corinto mahitungod sa paghatag nga gawasnon.

Unsay ipasabut niining nagapugas? (Sa pagpugas og mga liso.)
Sa unsa gikumparar ni Pablo ang pagpugas? (Paghatag sa uban.)

Guniti pataas ang pipila ka prutas o liso sa utanon, o pagpakita og litrato sa uban.

Kinsa ang mga tigpugas dinhi niini nga pagkomparar? (Ang mga Santos, o kita.)
Sumala sa bersikulo°7, sa unsang paagi nga ang Ginoo naglaum kanato nga magpugas, o manghatag? (Magmalipayon, dili kontra sa gusto. Tan-awa usab sa Moroni 7:8.)

Isulat ang mosunod nga pamahayag nga dili kompletohon diha sa pisara: Kon kita mohatag ngadto sa nanginahanglan nga may malipayong kasingkasing°…

Sa unsang paagi nga ang paghatag ngadto sa uban nahisama sa pagpugas og mga liso diha sa uma?
Unsa ang mahitabo kon magpugas lang kita og ginagmay?
Unsa ang mahitabo kon magpugas kita og dinaghan?

Kompletoha ang baruganan diha sa pisara aron nga kini maghatud sa mosunod nga kamatuoran: Kon kita mohatag ngadto niadtong nanginahanglan nga may malipayon nga kasingkasing, ang Dios madagayaon nga mopanalangin kanato.

Sa unsang paagi nga ang paghatag ngadto sa uban nga may malipayong kinaiya sa tinuoray mosangput ngadto sa atong pagdawat og mas daghan labaw pa kay sa atong nasugdan?

Dapita ang usa ka estudyante sa pagbasa og kusog sa 2 Mga Taga-Corinto 9:8–10. Hangyoa ang klase sa pagpangita sa mga panalangin nga giingon ni Pablo nga moabut sa mga Santos kon sila mohatag nga may malipayong kasingkasing.

Unsa ang mga pulong nga gigamit ni Pablo sa paghulagway sa mga panalangin nga gihatag sa Ginoo niadtong mohatag nga may malipayon nga kasingkasing? (Ang mga tubag mahimong maglakip sa “tanang panalangin sa madagayaon gayud” [bersikulo°8], “igo sa tanang butang” [bersikulo°8], “ang iyang pagkamatarung nagapadayon sa walay katapusan” [bersikulo°9], ug “magapatubo sa mga bunga sa inyong pagkamatarung” [bersikulo°10].)

Ipasabut nga kining mga pulong nga mosugyot nga atong madawat ang grasya sa Ginoo, nga naglakip sa temporal nga mga panalangin, igo sa atong mga panginahanglan.

Sumala sa bersikulo°10, kinsa man ang “siya nga magahatag sa binhi ngadto sa magpupugas”? (Ang Ginoo. Ipakita pag-usab ang binhi, ug ipasabut nga angay lang kitang manghatag sa uban tungod kay ang Ginoo nanghatag kanato og una.)
Sa unsang paagi nga ang paghinumdom diin gikan ang tanang anaa kanato nagtabang kanato nga mohatag nga malipayon?

Dapita ang pipila ka estudyante nga magpuli-puli sa pagbasa og kusog sa 2°Mga Taga-Corintho 9:11–15. Hangyoa ang klase sa pagsunod, nga mangita kon unsay gitudlo ni Pablo mahitungod mga Santos kinsa mohatag ug malipayong modawat.

Sumala sa mga bersikulo 11–15, unsa ang bation sa mga Santos kinsa gawasnong mihatag ug midawat sa mga butangsa usag usa ngadto sa Diyos ?

Mahimo nimong dapiton ang mga estudyante sa pagkonsiderar nga markahan ang mga pulong sa pagpasalamat nga anaa niining mga bersikulo, sa ingon “nga makapahimo kanato pinaagi sa pagpasalamat ngadto sa Dios” (bersikulo°11), “daghang mga pagpasalamat ngadto sa Dios” (bersikulo°12), “sila magahimaya sa Dios” (bersikulo°13), ug “salamat sa Dios tungod sa iyang gasa nga dili maasoy sa pulong” (bersikulo°15).

Mahimo nimong isugyot nga ang mga estudyante mosulat sa mosunod nga kamatuoran sa ilang mga kasulatan duol sa mga bersikulo 11–15: Ang pag-ila sa pagkamanggihatagon sa Dios sa pagpanalangin kanato makatabang nato nga mobati og pasalamat ngadto Kaniya.

Kanus-a kamo mibati og kamapasalamaton ngadto sa Dios human sa pag-ila sa mga panalangin nga Siya mipadala kaninyo sa pagserbisyo ug sa paghatag ngadto sa uban sa malipayong kinaiya?

Pagpamatuod sa mga baruganan ug mga kamatuoran nga giila sa mga estudyante sa 2 Mga Taga-Corinto 8–9.

Awhaga ang mga estudyante sa pagkonsiderar og mga paagi nga sila unta makatabang og usa ka tawo nga anaa sa panginahanglan niining semanaha. Dapita sila sa pagpahigayon og tumong sa pagtabang niana nga tawo.

Komentaryo ug Background nga Impormasyon

2 Mga Taga-Corinto 8:9. “Nga bisan tuod siya dato, siya mahimong kabus alang kaninyo”

Alang sa pagpasabut sa talagsaon nga pagpakig-angay ni Jesukristo alang kanato, tan-awa sa “Ang Pagpakig-angay sa Dios ug sa Tawo” ([debosyonal sa Pasko sa Unang Kapangulohan, Dis.°7, 2014], lds.org/broadcasts), ni Elder D. Todd Christofferson sa Korum sa Napulog Duha ka mga Apostoles.

2°MgaTaga-Corinto 8:14. “Sa ingon niana adunay pagkaangay-angay”

Sa kinatibuk-ang sesyon sa priesthood, si Presidente Dieter°F. Uchtdorf sa Unang Kapangulohan mipakigbahin sa mosunod nga pamahayag, diin magamit usab sa mga lalaki ug mga babaye:

“Niini gayung orasa adunay daghang mga miyembro sa Simbahan ang nag-antus. Sila gigutom, walay kwarta, ug nanlimbasug sa tanang matang sa pisikal, emosyonal, ug espirituhanong kasakit. Sila nag-ampo sa tibuok kusog sa ilang kalag alang sa panabang, alang sa kahupayan.

Mga kaigsoonan, palihug ayaw hunahunaa nga kini responsibilidad sa ubang tawo. Kini akoa, ug kini inyoha. Apil kitang tanan. Ang ‘tanan’ buot pasabut nga tanan—matag naghupot sa Aaronic ug Melchizedek Priesthood, adunahan ug kabus, diha sa tanang nasud. Diha sa plano sa Ginoo, adunay usa ka butang nga ang tanan dunay ikatampo” (“Pagsangkap pinaagi sa Pamaagi sa Ginoo,” Ensign o Liahona, Nob. 2011, 54).