Juan 16–21 (Unit 16)

Materyal sa Pagpangandam alang sa Magtutudlo sa Home-Study

Summary sa mga Leksyon sa Daily Home-Study

Ang mosunod nga mga summary sa panghitabo, mga doktrina, ug mga baruganan nga nakat-unan sa mga estudyante dihang gitun-an nila ang Juan 16–21 (unit 16) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.

Day 1 (Juan 16)

Gikan sa gipangtudlo ni Jesus sa Iyang mga Apostoles human sa Katapusang Panihapon, nakat-unan sa mga estudyante nga ang Espiritu Santo mogiya kanato sa tanang kamatuoran ug mopakita kanato sa tanang butang nga umaabut. Nakat-unan usab sa mga estudyante nga ang Espiritu Santo mopadayag sa kamatuoran ug instruksyon nga naggikan sa Langitnong Amahan ug ni Jesukristo. Tungod kay gibuntog ni Jesukristo ang kalibutan, mahimo kitang magmalipayon ug magmalinawon.

Day 2 (Juan 17)

Dihang gitun-an sa mga estudyante ang Pag-ampo ni Jesukristo alang sa Iyang mga disipulo, ilang nakat-unan nga aron makadawat og kinabuhing dayon, kinahanglang makabaton kita og pagpamatuod sa Langitnong Amahan ug sa Iyang Anak, si Jesukristo. Nakat-unan sab nila nga isip mga disipulo ni Jesukristo, maania kita sa kalibutan apan dili iya sa kalibutan. Dihang gibasa sa mga estudyante kon giunsa sa pag-ampo ni Jesus nga unta ang Iyang mga disipulo mahiusa Kaniya ug sa Amahan, ilang nakat-unan nga kon moduol kita kang Jesukristo ug modawat sa mga panalangin sa Iyang Pag-ula, mamahimo kitang usa sa Amahan ug sa Anak.

Day 3 (Juan 18–19)

Gikan sa hinakog nga ehemplo ni Pilato, nakat-unan sa mga estudyante nga ang pag-una sa kaugalingon natong interes kay sa paghimo sa unsay husto modala nato sa pagpakasala.) Dihang gitun-an sa mga estudyante ang istorya ni Juan bahin sa Paglansang, ilang nakat-unan nga atong masunod ang ehemplo sa Manluluwas pinaagi sa pagpili nga motabang sa uban bisan og kita mismo anaa sa panginahanglan.

Day 4 (Juan 20–21)

Niini nga leksyon, gitun-an sa mga estudyante ang istorya ni Juan mahitungod sa Pagkabanhaw ni Jesukristo. Ilang nakat-unan nga gibuntog ni Jesukristo ang kamatayon pinaagi sa Iyang Pagkabanhaw. Gikan sa kasinatian ni Tomas, ilang nakat-unan nga mapanalanginan kita kon atong pilion nga motuo ni Jesukristo bisan og dili kita makakita Kaniya.

Pasiuna

Ang nabanhaw nga Kristo mipakita ngadto sa Iyang mga disipulo samtang nanagat sila. Didto sa baybayon, si Jesus nakigsawo sa pagkaon sa Iyang mga disipulo ug midapit ni Pedro sa pagpakita sa iyang gugma para Kaniya pinaagi sa pagpakaon sa Iyang mga karnero.

Mga Sugyot alang sa Pagtudlo

Juan 21:1–17

Ang nabanhaw nga Kristo mipakita ngadto sa Iyang mga disipulo sa Dagat sa Tiberias (Dagat sa Galilea)

Pagdrowing sa pisara og dako nga kasingkasing.

Dapita ang mga estudyante nga moadto sa pisara ug isulat sa sulod sa kasingkasing ang duha o tulo sa paborito nilang mga butang. Ipasabut nga mahimo kining maglakip og mga tawo, kabtangan, o mga kalihokan.

Kon mahuman na ang mga estudyante, mahimo sab nimong ilista ang pipila sa paborito nimong mga butang.

I-summarize ang Juan 21:1–2 pinaagi sa pagpasabut nga human makita ang nabanhaw nga Ginoo sa duha ka okasyon, si Pedro ug ang ubang mga disipulo didto sa baybayon sa Dagat sa Galilea (nga gitawag usab og Dagat sa Tiberias).

Dapita ang usa ka estudyante sa pagbasa og kusog sa Juan 21:3 . Hangyoa ang klase sa pagsunod, nga mangita kon unsay nahukman ni Pedro nga buhaton.

Sa inyong hunahuna unsa kaha nga kalihokan ang idugang ni Pedro sa atong lista diha sa pisara sa paboritong mga butang? (Human makatubag ang mga estudyante, isulat sa pisara ang panagat sulod sa kasingkasing.)
Unsa kadugayon si Pedro ug ang ubang mga disipulo nanagat? Unsa ka daghan ang ilang nakuha?

Hangyoa ang mga estudyante sa paghunahuna kon unsa kaha ang gibati ni Pedro ug sa ubang mga disipulo human sa taas nga gabii nga walay nakuhang isda.

Dapita ang usa ka estudyante sa pagbasa og kusog sa Juan 21:4–6 . Hangyoa ang klase sa pagsunod, nga mangita kon unsay nahitabo sa pagkasunod buntag.

Unsa ang nahitabo human sa tibuok gabii nga dili malampusong pagpanagat?

I-summarize ang Juan 21:7–14 pinaagi sa pagpasabut nga samtang ang mga disipulo naglisud sa pagbira sa pukot nga puno sa isda, miingon si Juan nga ang tawo nga naa sa baybayon mao ang Ginoo. Si Pedro mahinamon kaayong miambak sa dagat ug milangoy padulong ni Jesus samtang ang uban nangadto sakay sa ilang sakayan. Dihang nangabut sila sa baybayon, si Jesus nag-andam og pagkaon para nila.

Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Human sa malipayong panagkita uban sa nabanhaw nga Jesus, si Pedro nakig-istorya sa Manluluwas nga akong gikonsiderar nga kritikal nga punto sa apostolikanhong pagpangalagad sa kinatibuk-an ug sa personal nga paagi alang kang Pedro, miusab niining tawhana ngadto sa talagsaong kinabuhi sa pagserbisyo ug pagpangulo. Nagtan-aw sa ilang guba nga sakayan, sa nagusbat nga pukot, ug naglut-od nga 153 ka isda, si Jesus [nakigsulti] sa Iyang senior nga Apostol” (“Ang Unang Dakong Sugo,” Ensign o Liahona, Nob. 2012, 84).

Dapita ang usa ka estudyante sa pagbasa og kusog sa Juan 21:15–17 . Hangyoa ang klase sa pagsunod, nga mangita sa pangutana nga gibalik-balik sa pagpangutana ni Jesus kang Pedro. Mahimo nimong isugyot nga pamarkahan sa mga estudyante ang ilang nakit-an.

Unsa nga pangutana ang gipangutana ni Jesus kang Pedro sa tulo ka higayon?
Dihang nangutana si Jesus, “Gihigugma mo ba ako labaw pa niini?” (bersikulo 15), unsa sa inyong hunahuna ang ipasabut sa pulong nga niini ? (Tingali nag-refer si Jesus sa daghang naglut-od nga isda o ubang butang nga may kalabutan sa kinabuhi sa usa ka mananagat. Isulat sa pisara ang mosunod nga pangutana duol sa kasingkasing: Gihigugma mo ba ako labaw pa niini?)
Giunsa ni Pedro sa pagtubag?
Unsa kaha ang inyong pagbati kon kamo pa ang naa sa posisyon ni Pedro ug gipangutana mo ni Jesus katulo ka higayon kon Siya inyo bang gihigugma?

Aron matabangan ang mga estudyante nga makasabut nganong si Jesus nangutana niini ug gipatubag Niya si Pedro sa tulo ka higayon, dapita ang usa ka estudyante sa pagbasa og kusog sa mosunod nga pamahayag ni Elder Holland:

“Si Jesus mitubag, (ug dinhi akong gamiton na usab ang akong pagpasabut nga wala sa kasulatan) tingali ingon ani: ‘Nan Pedro, nganong mianhi man mo? Nganong nibalik na man sad ta niining baybayon, sa samang pukot, naghisgut sa samang butang? Dili ba klaro niadto ug karon nga kon gusto ko og isda, makakuha ko og isda? Mga disipulo ang akong kinahanglan, Pedro,—hangtud sa hangtud. Nagkinahanglan ko og tawo nga mopakaon sa akong karnero ug moluwas kanila. Nagkinahanglan ko og tawo nga mosangyaw sa akong ebanghelyo ug manalipod sa akong pagtuo. Nagkinahanglan ko og tinuod nga mohigugma nako, ug mohigugma sa unsay ipabuhat sa atong Amahan sa Langit nako. … Mao, nga sa ikaduha ug katapusang higayon, Pedro, naghangyo ko nga imong biyaan kining tanan ug motudlo ug mopamatuod, motrabaho ug matinud-anong moserbisyo hangtud sa adlaw nga ilang buhaton nimo unsay ilang gibuhat nako’” (“Ang Unang Dakong Sugo Commandment,” 84).

Unsa nga baruganan ang atong makat-unan gikan sa pagpakigsulti sa Ginoo kang Pedro? (Human makatubag ang mga estudyante, isulat sa pisara ang mosunod nga baruganan: Kon atong gihigugma ang Manluluwas ug ang Langitnong Amahan labaw sa tanang butang, atong pakaunon ang Iyang karnero.)
Kinsa man ang karnero sa Langitnong Amahan ug ni Jesukristo? Unsaon nato sila sa pagpakaon?

Aron matabangan ang mga estudyante nga makasabut kon sa unsang paagi nato mapakaon ang karnero sa Langitnong Amahan ug ni Jesukristo, dapita ang usa ka estudyante sa pagbasa og kusog sa pamahayag ni Elder Robert D. Hales sa Korum sa Napulog Duha ka mga Apostoles:

“Kini mao ang tawag ni Kristo sa tanang Kristiyano karon: ‘Pakan-a ang akong mga nating karnero. … Pakan-a ang akong mga karnero’—ipaambit ang akong ebanghelyo sa batan-on ug sa tigulang, nagdasig, nagpanalangin, naghupay, nag-awhag, ug naglig-on kanila, ilabi na niadtong lahi ang hunahuna ug gituohan kay sa kanato” (“Mahimong Mas Kristohanon nga Kristiyano,” Ensign o Liahona, Nob. 2012, 91).

Aron matabangan ang klase nga masabtan sa unsang paagi magamit ang baruganan sa paghigugma sa Dios labaw sa bisan unsang butang, pagdapit og tulo ka estudyante nga magpuli-puli sa pagbasa og kusog sa mosunod nga mga sitwasyon. Human mabasa ang matag sitwasyon, ipangutana ang nagsunod nga mga pangutana.

Usa ka grupo sa batan-ong mga lalaki midapit og usa ka batan-ong lalaki nga modungan nila sa pagpangaon., ug nanghinaut nga mamahimo nilang higala. Atol sa ilang panagsultihay, gihimong kataw-anan sa usa sa kaubanang lalaki sa grupo ang laing lalaki.
Usa ka batan-ong babaye ganahan sa pagdula og soccer. Migahin siya og daghang oras sa semana sa pagdula og soccer ug gamay na lang ang panahon para sa ubang butang sama sa family home evening ug personal nga pagtuon sa kasulatan.
Usa ka batan-ong lalaki busy kaayo sa akademik ug sa extracurricular nga mga kalihokan. Sa tibuok semana, kanunay niyang gipaabut nga igahin ang talagsa ra niyang libre nga panahon uban sa mga higala sa Biyernes sa gabii. Sa wala pa siya manawag sa usa nila nianang gabhiona, ang iyang kompanyon sa home teaching nanawag aron sa pagsusi kon mahimo ba siyang mokuyog niya sa pagtabang sa usa ka pamilya nga giassign nila nag-ingon nga may dinaliang panginahanglan.

Unsa nga mga kapilian ang anaa niining tawhana?
Unsa ang mahimo niining tawhana aron ikapakita ang iyang gugma sa Ginoo? Sa unsang paagi kana nga lihok makapakita sa gugma alang sa Ginoo?

Dapita ang usa ka estudyante sa pagbasa og kusog sa mosunod nga pamahayag ni Elder Holland:

“Minahal ko nga mga kaigsoonan, dili ko sigurado unsa ang atong kasinatian sa Adlaw sa Paghukom, apan matingala gayud ako kon sa panahon sa pakig-istorya, ang Dios dili mangutana kanato sa sama gayud nga pangutana ni Kristo kang Pedro: ‘Gihigugma mo ba ako?’” (“Ang Unang Dakong Sugo,” 84).

Ipaambit ang imong pagpamatuod sa kaimportante sa pagpili nga higugmaon ang Langitnong Amahan ug si Jesukristo labaw sa tanang butang ug ipakita kana nga gugma pinaagi sa pagpakaon sa Ilang karnero.

I-refer ngadto sa mga item nga nakalista diha sa kasingkasing nga naa sa pisara ug ang pangutana nga nakasulat sa sunod niana nga mga item: Gihigugma mo ba ako labaw pa niini? Badlisi ang pulong nga niini, ug dapita ang mga estudyante sa pagtubag sa mosunod nga mga pangutana diha sa ilang mga class notebook o mga scripture study journal:

Kon si Jesus mangutana sa sama nga mga pangutana diha ninyo, unsa kaha sa inyong hunahuna ang ipasabut Niya sa “niini” diha sa inyong kinabuhi?
Unsaon man ninyo sa pagtubag ang Iyang pangutana?

Samtang tapuson nimo ang mga Ebanghelyo, dapita ang pipila ka mga estudyante sa pagpakigbahin sa unsay ilang gisulat para sa ilang day 4 nga assignment sa leksyon diha sa ilang scripture study journal mahitungod sa istorya, panghitabo, o pagtulun-an gikan sa mortal nga pangalagad sa Manluluwas nga nakatabang nila nga motuo o milig-on sa ilang gituohan nga si Jesukristo mao ang Anak sa Dios.

Sunod nga Unit (Mga Buhat 1-5)

Dapita ang mga estudyante sa pagpangita og mga tubag sa mosunod nga mga pangutana diha sa ilang pagtuon sa Mga Buhat 1–5: Kinsa ang mogiya sa Simbahan human namatay ug nabanhaw ang Manluluwas? Unsa ang paagi sa pagpili og ubang mga Apostoles? Unsa nga milagro ang nahitabo nianang adlaw sa Pentecostes? Sa unsa nga paagi ang Espiritu Santo miimpluwensya sa milagro nianang adlawa? Unsa nga milagro ang gihimo ni Pedro didto sa templo, ug unsay nahitabo ni Pedro gumikan niadto? Unsa ang nahitabo ni Ananias ug ni Safira sa ilang pagpamakak sa ilang lider sa priesthood?