Leksyon 151
Pinadayag 1
Pasiuna
Samtang naa sa isla sa Patmos, mihimo si Juan og usa ka sulat sa pag-awhag ngadto sa pito ka mga kongregasyon sa Simbahan nga naghulagway sa pagpadayag nga iyang nadawat. Mipamatuod si Juan sa unsay gihatag ngadto kaniya gikan sa anghel ug gikan ni Jesukristo. Girekord usab ni Juan ang mga detalye mahitungod sa iyang panan-awon bahin sa Ginoo nga si Jesukristo.
Mga Sugyot alang sa Pagtudlo
Pinadayag 1:1–11
Gipamatud-an ni Juan ang iyang panan-awon
Sa dili pa magklase, ibutang ang usa ka butang sa lamesa o sa lingkuranan atubangan sa klase. Tabuni ang mao nga butang aron dili mailhan sa mga estudyante kon unsa kini. Inig sugod sa klase, dapita ang mga estudyante sa pagtag-an kon unsa kini nga butang. Human sa pipila ka pagtag-an, dapita ang usa ka estudyante sa pagduol sa atubangan sa klase ug hangyoa siya nga ablihan og gamay ang gitabon aron siya ra ang makakita sa butang. Hangyoa kini nga estudyante nga ihulagway ang butang ngadto sa klase.
-
Sa unsang paagi ang estudyante nga gipahulagway sa butang nagrepresentar og usa ka tahas sa mga propeta ug mga apostoles?
Hangyoa ang estudyante sa paglingkod. Dapita ang mga estudyante sa pagpakli ngadto sa basahon sa Pinadayag. Ipasabut nga kini nga basahon nailhan usab nga Apokalipsis, nga sa Gresyanhong pinulongan nagpasabut nga Pagpadayag, pagkuha sa tabon, o pagpakita sa unsay gitago. Niini nga basahon, si Apostol Juan mirekord sa mga kamatuoran nga gipadayag o gipakita ngadto kaniya mahitungod ni Ginoong Jesukristo, sa Iyang tahas sa plano sa kaluwasan sa Langitnong Amahan, sa mga panghitabo nga mag-una sa Iyang Ikaduha nga Pag-anhi, ug sa Iyang Milenyal nga paghari.
Dapita ang mga estudyante sa pagpangita og mga kamatuoran nga gipadayag ngadto ni Juan samtang sila magtuon sa basahon sa Pinadayag.
Dapita ang usa ka estudyante sa pagbasa og kusog sa Hubad ni Joseph Smith, Pinadayag 1:1–3, nga anaa sa Giya ngadto sa mga Kasulatan. Hangyoa ang klase sa pagsunod, nga mangita kon unsay gitudlo ni Juan mahitungod sa pagpadayag nga iyang nadawat.
-
Nganong kini nga pagpadayag gihatag man ngadto ni Juan?
-
Unsa ang gustong ipabuhat ni Juan sa mga Santos niini nga pagpadayag?
Aron matabangan ang mga estudyante sa pagsabut nganong gihisgutan man ni Juan kadtong mga tawo nga nakadungog sa iyang mga pulong ug kadtong nakabasa sa iyang mga pulong, ipasabut nga sa kapanahunan ni Juan daghang mga Santos ang dili makabasa, mao nga nakaila lamang sila sa basahon sa Pinadayag pinaagi sa pagpaminaw sa uban nga nagbasa niini og kusog.
-
Unsay gisulti ni Juan mahitungod sa mga tawo nga mobasa, maningkamot nga makasabut, ug motuman (o mosunod) sa mga pagtulun-an nga narekord sa basahon sa Pinadayag?
-
Unsaon ninyo sa pag-summarize ang mga pagtulun-an ni Juan nga naa sa Pinadayag 1:3 isip usa ka baruganan? (Kinahanglang mahibaloan sa mga estudyante ang mosunod nga baruganan: Samtang magbasa ta, maningkamot sa pagsabut, ug magsunod sa mga pulong sa Ginoo, mapanalanginan kita.)
Dapita ang usa ka estudyante sa pagbasa og kusog sa Pinadayag 1:4. Hangyoa ang klase sa pagsunod, nga mangita kon para kang kinsa kini nga sulat nga gihimo ni Juan.
-
Para kang kinsa kini nga sulat nga gihimo ni Juan? (Ipasabut nga “ang pito ka mga simbahan nga naa sa Asia” nagpasabut sa pito ka mga kongregasyon sa Simbahan, sama sa mga ward ug mga branch karon, nga nahimutang sa gitawag karon og kasadpang dapit sa modern-day nga Turkey. “Ang pito ka mga Espiritu” nagpasabut sa mga lider niadto nga mga kongregasyon.)
Dapita ang pipila ka estudyante nga magpuli-puli sa pagbasa og kusog sa Pinadayag 1:5–8. Hangyoa ang klase sa pagsunod, nga mangita kon unsay gusto ni Juan nga mahibaloan sa pito ka mga kongregasyon mahitungod ni Jesukristo. Ikonsiderar ang pagdapit sa mga estudyante nga markahan ang unsay ilang nakit-an.
-
Unsa ang gusto ni Juan nga mahibaloan sa pito ka mga kongregasyon mahitungod ni Jesukristo?
-
Asa nga mga pulong mahitungod sa Manluluwas dinhi sa mga bersikulo ang mahinungdanon kaayo kaninyo? Ngano man? (Mahimo nimong ipasabut nga ang Alpa ug Omega mao ang una ug katapusang mga letra sa Gresyanhon nga alpabeto. Kini nga tawag nagpasabut nga ang tahas ni Jesukristo sa plano sa Langitnong Amahan alang sa kaluwasan molukop sa tanan gikan sa sinugdanan hangtud sa katapusan. [Tan-awa usab sa Pinadayag 22:13.])
Dapita ang mga estudyante sa pagbasa og kusog sa Pinadayag 1:9–11. Hangyoa ang klase sa pagsunod, nga mangita kon diin si Juan niadtong panahona dihang nadawat niya kini nga pagpadayag ug kon asang dapita nahimutang ang pito ka mga simbahan.
-
Diin man si Juan niadtong panahona dihang nadawat niya kini nga pagpadayag? Asang dapita nahimutang ang pito ka mga kongregasyon?
Ikonsiderar ang paghangyo sa mga estudyante sa pagpakli ngadto sa mga Mapa sa Biblia, nu. 13, sa “Ang Misyonaryo nga mga Panaw ni Apostol Pablo,” sa pagpangita sa Patmos ug sa ubang pito ka nga siyudad nga nalista sa Pinadayag 1:11.
Aron matabangan ang mga estudyante nga masabtan kon unsay hitsura sa Patmos, ikonsiderar ang pagdapit nila sa pagpangita sa Mga Hulagway sa Biblia, nu. 32, “Isla sa Patmos.”
-
Sumala sa Pinadayag 1:9, nganong didto man si Juan sa isla sa Patmos?
Ipasabut nga nadawat ni Juan kini nga pagpadayag atol sa lisud nga panahon para sa mga miyembro sa Simbahan. Niining panahona, dunay grabing pagpanglutos batok sa mga Santos ug apostasiya ug pagkabahin-bahin tali sa mga miyembro sa Simbahan. Agig dugang, ang tanang mga Apostoles gawas kang Juan gipangpatay. Ang basahon sa Pinadayag tingali gisulat atol sa kapanahunan ni Roman emperor Domitian, kinsa miestablisar og balik sa emperor nga pagsimba sa tibuok Empiryo sa Roma ug mipalayas o mipatay niadtong dili mosimba sa mga dios-dios nga aprubado sa Romano nga panggobyerno. Daghang tawo ang nagtuo nga si Juan gipalayas ngadto sa isla sa Patmos tungod niana nga rason.
-
Sumala sa Pinadayag 1:10, giunsa ni Juan sa paghulagway ang iyang mga kahimtang dihang nadawat niya kini nga pagpadayag?
-
Sa inyong hunahuna unsa kaha ang ipasabut sa mga pulong nga “diha ako sa Espiritu”?
-
Sumala sa bersikulo 11, unsa man ang gisugo ni Jesukristo nga buhaton ni Juan?
Ipasabut nga nakat-unan nato gikan sa Basahon ni Mormon nga si Nephi dunay panan-awon nga susama sa panan-awon ni Juan. Nakita ni Nephi ang mga panghitabo sa katapusang mga adlaw (lakip ang Ikaduhang Pag-anhi ni Jesukristo, ang Milenyum, ug ang pagkakompleto sa buhat sa Dios dinhi sa yuta), apan gidid-an siya sa pagsulat mahitungod niini tungod kay si Juan ang giorden nang daan nga mohimo niini (tan-awa sa 1 Nephi 14:24–29).
-
Nganong importante man alang kanato ang pagtuon sa mga pulong ni Juan nga naa sa Pinadayag?
Dapita ang mga estudyante samtang padayon silang magtuon sa basahon sa Pinadayag sa pagpangita sa mga kamatuoran mahitungod sa katapusang mga adlaw, sa Ikaduhang Pag-anhi, sa Milenyum, ug sa pagkakompleto sa buluhaton sa Dios dinhi sa kalibutan.
Pinadayag 1:12–20
Nakita ni Juan ang Ginoo nga si Jesukristo sa usa ka panan-awon
Aron sa pagpaila sa ideya bahin sa simbolo, pag-display (o pagdrowing diha sa pisara) og mga litrato sa pipila ka mga timailhan sa inyong mga kultura nga sayon rang masabtan bisan walay mga pulong. Sama pananglit, mahimo kang mag-display og mga traffic sign o mga warning sign. Hangyoa ang mga estudyante sa pagpasabut unsay tuyo niini nga mga timailhan.
Ipasabut nga sa basahon sa Pinadayag migamit si Juan og mga simbolo ug mga imahe sa pagtudlo sa importanting mga mensahe mahitungod sa ebanghelyo. Ang mga simbolo mahimong epektibo nga mga gamit sa pagtudlo tungod kay mahimo kining gamiton sa pagpakigsulti sa mga tawo sa lahi nga mga henerasyon ug mga kultura. Mahimo usab kining gamiton sa pagpakigsulti sa pipila ka nagkalain-lain nga mga mensahe.
Ipares-pares ang mga estudyante. Dapita ang matag pares sa pagbasa og kusog sa Pinadayag 1:12–18 nga magdungan, nga mangita sa mga simbolo nga gigamit ni Juan sa paghulagway sa iyang pagpadayag. Mahimo nimong isugyot nga markahan sa mga estudyante ang mga simbolo nga ilang nabasa.
-
Unsa nga mga simbolo ang gigamit ni Juan sa paghulagway sa iyang pagpadayag?
Hatagi ang mga estudyante og handout sa mosunod nga tsart (o paghimo og tsart diha sa pisara). Dapita ang matag pares sa mga estudyante sa pagbasa sa mga scripture reference sa tuo nga bahin sa kolum diha sa tsart ug isulat niana nga kolum ang posibling kahulugan sa matag simbolo nga gigamit ni Juan.
Simbolo sa Pinadayag 1
New Testament Seminary Teacher Manual—Leksyon 151
|
Simbolo |
Posible nga Kahulugan |
|---|---|
|
Pinadayag 1:12—Pito ka mga kandiliro nga bulawan | |
|
Pinadayag 1:16–17—Ang tuo nga kamot | |
|
Pinadayag 1:16—Pito ka mga bitoon |
Joseph Smith Translation, Pinadayag 1:20. Ang pito ka mga bitoon mao ang mga sulugoon sa pito ka mga simbahan)— |
|
Pinadayag 1:16—Usa ka mahait nga espada nga duhay sulab | |
|
Pinadayag 1:18—Mga yawe sa kamatayon ug sa Hades [impyerno] |
© 2015 pinaagi sa Intellectual Reserve, Inc. Tanang mga katungod gigahin.
Human sa igong panahon, hangyoa ang pipila ka mga estudyante nga ireport ang posibling kahulugan sa matag simbolo nga gigamit ni Juan. Sumala sa panginahanglan, tabangi nga mahibaloan nila nga ang pito ka mga kandiliro nagrepresentar sa pito ka mga simbahan nga maoy magpabarug sa kahayag sa ebanghelyo; ang tuo nga kamot nagrepresentar sa balaang gahum ug pag-aprubar; ang pito ka mga bitoon nagsimbolo sa mga sulugoon o mga lider sa pito ka mga simbahan kinsa gipataas sa Dios, ang espada nagrepresentar sa pulong sa Dios, namulong og mga paghukom sa mga dautan ug paghimong gawasnon sa mga inosente; ug ang mga yawe sa impyerno ug kamatayon nagrepresentar sa gahum sa Ginoo sa pagbuntog sa espiritwal ug pisikal nga kamatayon.
-
Base sa mensahe nga gipadayag sa Ginoo ngadto sa Iyang mga Santos pinaagi ni Juan, unsa nga kamatuoran ang atong makat-unan mahitungod ni Jesukristo ug sa Iyang relasyon ngadto sa Iyang matinud-anon nga mga sumusunod? (Ang mga estudyante mahimong mogamit og lain-laing mga pulong, apan siguroa nga mahibaloan nila ang kamatuoran nga susama sa mosunod: Si Jesukristo nagbantay ug nagpangga sa Iyang matinud-anong mga sumusunod.)
Pahinumdumi ang mga estudyante sa mga hagit nga gisagubang sa mga miyembro sa Simbahan sa kapanahunan ni Juan.
-
Ngano nga importante man kaha alang sa mga miyembro sa Simbahan sa kapanahunan ni Juan ang masayud nga si Jesukristo padayon nga nagbantay ug nagpangga kanila?
-
Nganong importante man para kanato ang paghinumdom niining sama nga kamatuoran?
Dapita ang mga estudyante sa paghunahuna og panahon dihang gibati nila nga si Jesukristo nagbantay ug nagpangga kanila. Hangyoa ang pipila kanila sa pagpakigbahin sa ilang mga kasinatian diha sa klase. Ikonsiderar usab ang pagpakigbahin og usa sa imong mga kasinatian.
Dapita ang usa ka estudyante sa pagbasa og kusog sa Pinadayag 1:17–18. Hangyoa ang klase sa pagsunod, nga mangita kon unsay gisulti sa Manluluwas ngadto ni Juan.
-
Unsa nga doktrina ang atong makat-unan mahitungod ni Jesukristo base sa unsay Iyang gisulti kang Juan? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga doktrina: Si Jesukristo usa ka nahimaya nabanhaw nga binuhat kinsa dunay gahum batok sa kamatayon ug impyerno.)
-
Unsa kaha nga paglaum ang gidala niini nga doktrina ngadto sa mga Santos sa kapanahunan ni Juan?
-
Unsa nga paglaum ang madala niini nga doktrina ngari kanato?
-
Unsa ang gitudlo niini nga doktrina ngari nato mahitungod sa lintunganay sa gubat tali sa maayo ug sa dautan nga ania sa tibuok kalibutan?
Dapita ang usa ka estudyante sa pagbasa og kusog sa mosunod nga pamahayag mahitungod sa basahon sa Pinadayag:
“Ang mensahe sa Pinadayag susama ra sa tanang kasulatan; adunay kadaugan sa katapusan dinhi sa yuta sa Dios batok sa yawa; usa ka permanente nga kadaugan sa maayo batok sa dautan, sa mga santos batok sa ilang mga tiglutos, sa gingharian sa Dios batok sa mga gingharian sa tawo ug kang Satanas” (Bible Dictionary, “Revelation of John”).
Ipasabut nga tungod kay nahibalo kita nga ang mga maayo sa katapusan magmadaugon batok sa dautan, ang nagpabilin nga makita mao ang kon asa nga dapit ang atong pilion, kang Satanas o sa Dios. Mahimo nimong ipamatuod ang kadaugan sa Manluluwas batok sa kamatayon ug impyerno ug ang pagkatinuod nga tungod Kaniya makapili kita nga molaban sa Dios sa pakiggubat tali sa maayo ug sa dautan.
Dapita ang mga estudyante sa pagkonsiderar unsay ilang mahimo aron mas hingpit nilang pilion nga molaban sa Dios. Awhaga sila sa pagbuhat sa bisan unsang mga pag-aghat nga mahimo nilang madawat.
Dapita ang usa ka estudyante sa pagbasa og kusog sa Pinadayag 1:19. Hangyoa ang klase sa pagsunod, nga mangita kon unsay gisulti sa Ginoo nga isulat ni Juan. Dapita ang mga estudyante sa pagreport sa unsay ilang nakit-an.
Ipasabut nga ang Pinadayag 1 nagrekord sa unsay gisulat ni Juan mahitungod sa iyang panan-awon sa Manluluwas. Sumala sa narekord sa Pinadayag 2–3, misulat si Juan mahitungod sa “mga butang karon” (Pinadayag 1:19), o sa kahimtang sa Simbahan sa iyang panahon. Ang Pinadayag 4–22 nagrekord sa unsay gisulat ni Juan mahitungod sa “mga butang nga magakahitabo unya” (Pinadayag 1:19), o sa umaabut.
Komentaryo ug Background nga Impormasyon
Pinadayag 1:12. Pito ka mga kandiliro nga bulawan
Si Elder Bruce R. McConkie sa Korum Napulog Duha ka mga Apostoles mitudlo sa mosunod mahitungod sa pito ka mga kandiliro nga bulawan nga nakita ni Juan:
“Ang mga kandiliro nagdala sa kahayag; dili kay kini ang nagmugna niini. Ang gamit niini mao ang paghimo nga maanaa, dili sa paghimo niini nga usa ka binuhat. Busa pinaagi sa paggamit sa pito ka mga kandiliryo aron sa paghulagway sa pito ka mga simbahan nga karon maoy itambag ni Juan, ang Ginoo nagpakita nga ang Iyang mga kongregasyon dinhi sa yuta mao ang pagdala sa iyang kahayag dinhi sa kalibutan. Si Jesukristo ang Kahayag sa Kalibutan. (Juan 8:12.) Busa, ipakita ninyo ang inyong kahayag aron kini moiwag sa kalibutan. Tan-awa Ako mao ang kahayag diin kamo mopakita—nga diin kamo nakakita kanako nga mihimo.’ (3 Ne. 18:24; Mat. 5:14–16.)” (Doctrinal New Testament Commentary, 3 vols. [1965–73], 3:442).