Leksyon 155
Pinadayag 6–11, Part 2
Pasiuna
Nakita ni Juan ang pag-abli sa ikapito nga timri o silyo ug nahibaloan ang iyang misyon nga moapil sa panagpundok sa Israel sa katapusang mga adlaw.
Mga Sugyot alang sa Pagtudlo
Pinadayag 8–9
Nakita ni Juan ang pag-abli sa ikapito nga timri o silyo
Ipares-pares ang mga estudyante, ug hangyoa ang mga estudyante nga ipasabut ngadto sa ilang mga kapares unsay ilang nakat-unan sa ilang pagtuon sa Pinadayag 6–7 nga makatabang nila nga magpabiling malipayon ug positibo bisan pa sa walay kasiguroan ug sa kasamok.
Isulat sa pisara ang mosunod nga baruganan nga nahibaloan sa miaging leksyon: Kon malahutay nato ang mga kalisdanan sa matinud-anong paagi ug mahimong putli pinaagi sa Pag-ula ni Jesukristo, matagamtaman nato ang celestial nga himaya uban sa Dios. Awhaga ang mga estudyante sa pagpangita kon sa unsang paagi kini nga baruganan may kalabutan sa mga panghitabo nga ilang makat-unan sa leksyon karon.
Ihatag ang mosunod nga tsart isip usa ka handout, o idrowing kini sa pisara:
-
Sumala niini nga tsart, pila man ka mga bersikulo niini nga basahon sa Pinadayag ang naghisgot sa mga panghitabo sa unang unom ka mga silyo? (25.)
-
Pila ka mga bersikulo ang naghisgot sa mga panghitabo sa ikapito nga silyo? (211 + 15 = 226.)
Ipasabut nga misulat og mas daghan si Juan mahitungod sa mga panghitabo nga may kalabutan sa pito ka tuig nga panahon kay sa iyang gihimo mahitungod sa mga panghitabo nga may kalabutan sa bisan asa sa uban. Iyang gisulat ilabi na ang mahitungod sa mga panghitabo nga mahitabo sugod sa pag-abli sa ikapito nga silyo hangtud sa Ikaduhang Pag-anhi ni Jesukristo.
-
Ngano kaha nga gitutukan man ni Juan ang iyang pagsulat sa mga hitabo sa ikapito nga silyo?
I-summarize ang Pinadayag 8:1–6 pinaagi sa pagpasabut nga kini nga mga bersikulo naghulagway sa Manluluwas nga miabli sa ikapito nga silyo. Nakita ni Juan ang pito ka mga anghel kinsa gihatagan og pito ka trumpeta. Sa karaang panahon, ang trumpeta gamiton sa “pagpatingog og alarma, signal [sa kasundaluhan] alang sa gubat, o pagpahibalo nga miabut na ang hari” (Gerald N. Lund, “Seeing the Book of Revelation as a Book of Revelation,” Ensign, Dis. 1987, 50). Niini nga hitabo, ang pagpatingog sa trumpeta mag-signal sa pagsugod sa lain-laing mga hampak o kasakitan ug kalaglagan agig pangandam sa milenyal nga paghari ni Jesukristo.
Dapita ang mga estudyante sa pagsulat sa “Ang Ikapito nga Timri o Silyo” sa ibabaw sa piraso nga papel o diha sa ilang mga class notebook o mga scripture study journal ug sa pagdrowing og pito ka trumpeta sa ubos nga kilid sa pahina.
Isulat ang mosunod nga mga pakisayran o reference sa pisara, apan ayaw iapil ang mga pangutana nga nagsunod sa matag pakisayran. Dapita ang mga estudyante sa pagsulat sa pakisayran tupad sa mga trumpeta diha sa ilang mga papel:
Una—Pinadayag 8:7. Unsa ang nahitabo isip resulta sa “ulan ug nanigbug-ok nga kalayo” nga miabut sa kalibutan sa dihang ang unang anghel mipatingog sa iyang trumpeta?
Ikaduha—Pinadayag 8:8–9. Unsa ang tulo ka butang nga naapektuhan dihang gipatingog ang ikaduhang trumpeta?
Ikatulo—Pinadayag 8:10–11. Unsa ang ngalan sa bitoon nga natagak? (Ipasabut nga ang panyawan usa ka pait nga hilba o tanom nga gigamit sa paghulagway sa “grabe nga kalamidad o kasubo” [Bible Dictionary, “Wormwood”].) Unsay nahitabo dihang natagak kini?
Ikaupat—Pinadayag 8:12. Human sa pagpatingog sa ikaupat nga trumpeta, unsa ang tulo ka butang nga mingit-ngit og gamay?
Ikalima—Pinadayag 9:1–3. Unsa ang migawas gikan sa bung-aw sa kahiladman nga walay kinutuban sa dihang giablihan kini sa ikalima nga anghel?
Ikaunom—Pinadayag 9:13–16, 18. Pila ka mga sundalo ang naapil sa grabe nga gubat nga nakita ni Juan human gipatingog ang ikaunom nga trumpeta? Unsa nga porsyon sa katawhan ang nakita niya nga nangamatay niini nga gubat?
Ikapito—Pinadayag 11:15.
Bahina ang klase ngadto sa unom ka grupo, ug i-assign sa matag grupo ang usa sa nag-unang unom ka mga pakisayran sa kasulatan nga gilista sa pisara (kon gamay ra ang imong klase, mahimo nimong i-assign ang daghang mga pakisayran ngadto sa pipila ka grupo). Hangyoa ang mga grupo sa dungan nga pagbasa og kusog sa gi-assign diha nila nga mga tudling sa kasulatan, nga mangita kon unsay nahitabo human gipatingog ang mga trumpeta. Dapita sila sa pagsulat sa ilang nakit-an tupad sa tukma nga trumpeta diha sa ilang mga papel.
Human sa igo nga panahon, dapita ang usa ka estudyante sa pagreport unsay ilang nakit-an. Dapita ang mga estudyante nga isulat ang mga nakit-an tupad sa tukma nga mga trumpeta diha sa ilang mga papel. Samtang nagreport ang mga estudyante, kon gikinahanglan ihatag ang pangutana nga giuban sa gi-assign diha sa ilang grupo nga scripture reference.
-
Sa unsang paagi nga ang baruganan nga atong nahibaloan sa miaging leksyon nakatabang niadtong mga nabuhi atol sa mga panghitabo sa ikapito nga silyo?
Dapita ang usa ka estudyante sa pagbasa og kusog sa Pinadayag 9:20–21 . Hangyoa ang klase sa pagsunod, nga mangita kon sa unsang paagi mosanong ang mga dautan kinsa makalahutay niining mga hampak o kasakitan. Dapita ang mga estudyante sa pagreport sa unsay ilang nakit-an.
-
Unsay gitudlo niini ngari kanato mahitungod sa kadautan niining mga tawhana?
Pinadayag 10
Usa ka anghel mitudlo ni Juan mahitungod sa iyang misyon sa katapusang mga adlaw
Ipasabut nga ang Pinadayag 10 naghisgot sa paghunong sa sugilanon bahin sa pagpatingog sa pito ka trumpeta ug sa nag-uban niini nga mga hampak o kasakitan. Atong nabasa dinhi nga kapitulo nga gitudloan si Juan sa laing anghel.
Isulat sa pisara ang mga pulong nga Matam-is ug Mapait.
-
Unsa ang pipila ka mga kasinatian sa kinabuhi nga makonsiderar nga parehong matam-is ug mapait?
Dapita ang mga estudyante sa pagbasa og kusog sa Pinadayag 10:1–3. Hangyoa ang klase sa pagsunod, nga mangita kon unsay gigunitan sa anghel.
-
Unsa man ang gigunitan sa anghel?
Dapita ang duha ka estudyante nga magpuli-puli sa pagbasa og kusog sa Pinadayag 10:8–11. Hangyoa ang klase sa pagsunod, nga mangita kon unsay gisulti ngadto kang Juan nga iyang buhaton sa basahon.
-
Unsay gisulti ngadto kang Juan nga iyang buhaton sa basahon? Unsay lami niini?
Dapita ang usa ka estudyante sa pagbasa og kusog sa Doktrina ug mga Pakigsaad 77:14. Hangyoa ang klase sa pagsunod, nga mangita kon unsay girepresentahan bahin sa pagkaon ni Juan sa basahon.
-
Sumala niini nga bersikulo, unsa ang girepresentahan bahin sa pagkaon ni Juan sa basahon? (Ang pagdawat ni Juan sa iyang misyon sa pagtabang og “pundok sa mga tribo sa Israel” ug sa “pagpahiuli sa tanang butang” sa katapusang mga adlaw.)
Ipasabut nga napanalanginan si Juan nga siya dili mamatay aron madala niya ang mga tawo ngadto sa Manluluwas (tan-awa sa D&P 7:1–4).
-
Unsa kaha ang tam-is nga masinati ni Juan sa pagtuman sa iyang misyon? Unsa man kaha ang pait?
Pinadayag 11
Nakita ni Juan ang duha ka propeta nga gipatay sa Jerusalem ug ang pagpatingog sa ikapito nga trumpeta
Ipasabut nga ang Pinadayag 11 nagsugod pinaagi sa paghulagway ni Juan sa mga panghitabo nga mag-una sa pagpatingog sa ikapito nga trumpeta ug sa Ikaduhang Pag-anhi ni Jesukristo. Atol niini nga panahon, ang mga dautan makabaton og mas dakong gahum ug kontrol dinhi sa kalibutan, ug ang kasundalohan magtinguha sa pagbuntog sa Jerusalem.
Dapita ang usa ka estudyante sa pagbasa og kusog sa Pinadayag 11:3–6. Hangyoa ang klase sa pagunod, nga mangita kon unsay buhaton sa duha ka mga saksi sa Jerusalem atol niini nga panahon.
-
Unsay buhaton sa duha ka mga saksi?
-
Unsay ipasabut sa “kalayo nga magagula sa ilang baba”? (bersikulo 5). (Mahimong nagsimbolo kini sa gahum sa pagpamatuod nga ilang ipamatuod [tan-awa sa Jeremias 5:14; 20:9].)
Dapita ang usa ka estudyante sa pagbasa og kusog sa Doktrina ug mga Pakigsaad 77:15. Hangyoa ang klase sa pagsunod, nga mangita kon si kinsa kini nga mga saksi. Hangyoa ang mga estudyante sa pagreport sa ilang nakit-an.
Dapita ang usa ka estudyante sa pagbasa og kusog sa Pinadayag 11:7–12. Hangyoa ang klase sa pagsunod, nga mangita kon unsay mahitabo niining duha ka mga propeta human nila mahimo ang ilang pangalagad ngadto sa mga Judeo.
-
Unsay reaksyon sa mga dautan kon mapatay ang duha ka mga saksi?
-
Unsay mahitabo sa duha ka mga saksi human sila mamatay sulod sa tulo og tunga ka adlaw?
-
Unsay reaksyon sa mga tawo kon ang duha ka mga saksi buhion na pagbalik gikan sa pagkamatay ug dad-on ngadto sa langit?
Dapita ang usa ka estudyante sa pagbasa og kusog sa Pinadayag 11:13–15. Hangyoa ang klase sa pagsunod, nga mangita kon unsay mahitabo sa dili pa ang pagpatingog ug sa panahon nga patingugon na ang ikapito nga trumpeta. Dapita ang mga estudyante sa pagsulat diha sa ilang mga papel tupad sa ikapito nga trumpeta kon unsay ilang nakit-an.
-
Human sa pagpatingog sa ikapito nga trumpeta, kinsa man ang maghari sa “mga gingharian sa kalibutan”? (bersikulo 15).
I-summarize ang Pinadayag 11:16–19 pinaagi sa pagpasabut nga ang 24 ka mga elder nagpasalamat ug midayeg sa Dios tungod sa paghatag og ganti sa mga makiangayon ug pagsilot sa mga dautan. Nakita usab ni Juan sa panan-awon ang langitnong templo sa Dios ug ang arko sa pakigsaad, nga nagrepresentar sa presensya sa Dios.
Tapusa ang leksyon karon pinaagi sa pagpakigbahin sa kaugalingon nimong gibati nga pasalamat ug pagdayeg sa Dios tungod sa Iyang kamaayo ug hustisya.
Komentaryo ug Background nga Impormasyon
Pinadayag 8–11. Dugang nga komentaryo
Alang sa dugang nga impormasyon diha sa mga sulod sa Pinadayag 8–11, tan-awa ang komentaryo alang niini nga mga kapitulo nga anaa sa New Testament Student Manual (manwal sa Church Educational System, 2014) sa mga pahina 545–49.
Pinadayag 10:1–3, 8–11. Ang gamayng basahon nga gihatag ngadto ni Juan nga kaunon
Si Elder Bruce R. McConkie (1915–85) sa Korum sa Napulog Duha ka mga Apostoles mitudlo:
“Ang gibuhat ni Juan sa pagkaon og usa ka basahon diin anaa ang mga pulong sa Dios nganha kaniya gipahaum sa kustombre ug tradisyon sa karaang Israel. Ang mao nga buhat nagpakita nga nagkaon siya sa pan sa kinabuhi, nga siya nag-ambit sa maayong pulong sa Dios, nga siya nagbusog sa pulong ni Kristo—nga anaa sa iyang ‘ba-ba nga matam-is daw dugos.’ Apan naghimo kini nga “mapait sa iyang tiyan’; mao kana ang mga paghukom ug mga hampak o kasakitan nga gisaad alang sa mga tawo nga gipadalhan sa pulong sa Ginoo nga nakahatag kaniya og kasakit ug kasubo sa kalag” (Doctrinal New Testament Commentary, 3 vols. [1965–73], 3:507).
“Nga ang basahon ‘matam-is sama sa dugos’ sa ba-ba ni Juan apan ‘mapait’ diha sa iyang tiyan Ang (Pinadayag 10:10) mahimong nagsugyot nga ang iyang misyon maglangkob og daghang tam-is ug makalipay nga mga kasinatian apan may masinati usab nga mga pagsalikway ug sakit nga mga kasinatian (tan-awa usab sa Mga Salmo 119:103)” (New Testament Student Manual [manwal sa Church Educational System, 2014], 548).