Leksyon 82
Mga Buhat 1:9-26
Pasiuna
Human panudlo-i ang Iyang mga disipulo sulod sa 40 ka mga adlaw, si Jesukristo misaka sa langit. Ang mga Apostoles ug ang uban naghiusa sa pag-ampo ug pangamuyo. Pinaagi sa inspirasyon, gitawag si Matias sa pagpuli sa bakante diha sa Korum sa Napulog Duha ka mga Apostoles nga gibiyaan pinaagi sa pagluib ug kamatayon ni Judas Iscariote.
Mga Sugyot alang sa Pagtudlo
Mga Buhat 1:9–12
Ang Manluluwas misaka sa langit
Isulat ang mosunod nga pangutana diha sa pisara: Tinuod o Dili Tinuod?
Basaha og kusog ang mosunod nga mga pamahayag mahitungod sa Ikaduhang Pag-anhi ni Jesukristo. Dapita ang mga estudyante sa pagpakita kon ang mga pamahayag tinuod o dili tinuod. (Pahinumdom: Niini nga bahin sa leksyon, ang mga estudyante dili kinahanglan nga mahibalo sa tubag sa matag pangutana o mogahin og dako nga panahon sa paghisgot sa ilang mga tubag.)
-
Si Jesukristo mobalik nganhi sa yuta sa ulahing mga adlaw.
-
Sa Iyang Ikaduhang Pag-anhi, si Jesukristo mopakita lamang ngadto sa matarung nga mga tawo.
-
Tungod kay si Jesukristo magtakuban kon Siya moanhi pag-usab, kadaghanan sa mga tawo dili makaamgo nga ang Ikaduhang Pag-anhi nahitabo.
Mahimo nimong ribyuhon sa daklit ang tubag sa matag pamahayag: (1) Tinuod (tan-awa sa Moises 7:60); (2) Dili tinuod (tan-awa sa Joseph Smith—Mateo 1:26; D&P 101:23); (3) Dili tinuod (tan-awa sa D&P 49:22–23).
Ipasabut nga sa panahon sa Iyang mortal nga pangalagad, nanagna si Jesukristo nga sa katapusang mga adlaw pipila sa mga tawo mopasiugda og sayop nga mga pagtulun-an mahitungod sa Iyang Ikaduhang Pag-anhi (tan-awa sa Joseph Smith—Mateo 1:22–25).
-
Sa unsa nga paagi kita mahibalo kon ang talagsaon nga pagtulun-an mahitungod sa Ikaduhang Pag-anhi ni Jesukristo tinuod o dili tinuod? (Kon atong pamation ang mga pulong sa Manluluwas ug ang mga pulong sa Iyang mga propeta, atong malikayan nga malingla [tan-awa sa Joseph Smith—Mateo 1:37].)
Dapita ang mga estudyante sa pagtan-aw samtang sila magpadayon sa pagtuon sa Mga Buhat 1 alang sa usa ka importanting kamatuoran kalabut sa Ikaduhang Pag-anhi ni Jesukristo.
Pahinumdumi ang mga estudyante nga ang Manluluwas mitudlo sa Iyang mga disipulo sulod sa 40 ka mga adlaw human sa Iyang Pagkabanhaw (tan-awa sa Mga Buhat 1:3). Ipakita ang hulagway Ang Pagsaka sa Langit (Libro sa mga Hulagway sa Ebanghelyo [2009], nu. 62; tan-awa usab LDS.org).
Dapita ang usa ka estudyante sa pagbasa og kusog sa Mga Buhat 1:9–12. Pangutan-a ang klase sa pagsunod, mangita sa unsay nahitabo human ang Manluluwas nahuman sa pagtudlo sa Iyang mga Apostoles.
-
Unsa ang nahitabo human ang Manluluwas nahuman sa pagtudlo sa Iyang mga Apostoles?
-
Kon ikaw nakakita sa Manluluwas nga misaka sa langit, unsa nga mga panghunahuna ug mga pagbati sa imong pagtuo nga tingali ikaw maaduna?
Ipasabut nga sa karaang Israel ang panganod usahay nagsilbi isip usa ka makita nga pagpaila sa presensya ug himaya sa Dios (tan-awa sa Exodo 40:34). Ang panganod nga gihisgutan sa Mga Buhat 1:9 usa ka panganod sa himaya (tan-awa sa Bible Dictionary sa LDS version sa Biblia “Cloud”), ug ang duha ka mga tawo nga gihisgutan sa bersikulo 10 mga anghel.
-
Unsa ang gisulti sa mga anghel sa mga Apostoles?
-
Unsa sa imong hunahuna ang gipasabut nga si Jesus moanhi pag-usab “sa paagi nga sama” (Mga Buhat 1:11) sa Iyang pagsaka sa langit? (Human sa tubag sa mga estudyante, isulat ang mosunod nga kamatuoran diha sa pisara: Diha sa Iyang Ikaduhang Pag-anhi, ang Manluluwas manaog gikan sa langit diha sa himaya.)
Ipasabut nga ang Pagsaka sa Langit sa Manluluwas nahitabo sa Bukid sa mga Olivo (tan-awa sa bersikulo 12). Ipasabut nga kon ang Manluluwas moanhi pag-usab, usa sa Iyang pagpakita mahimo kon Siya manaog ug sa tinuod mobarug diha sa Bukid sa mga Olivo (tan-awa sa Zacarias 14:4; D&P 45:47–53; D&P 133:19–20). Kini mahimo sa dili pa ang Iyang dako ug halangdong pagpakita ngadto sa kalibutan (tan-awa sa Isaias 40:5).
-
Sa unsa nga paagi nga ang pagkahibalo sa paagi nga ang Manluluwas mobalik nagtabang kanato sa paglikay nga malingla samtang kita naghulat sa Iyang Ikaduhang Pag-anhi?
Mga Buhat 1:13-26
Si Matias napili sa pagpuli sa bakante diha sa Korum sa Napulog Duha ka mga Apostoles
Ipasabut nga human ang mga Apostoles mibalik ngadto sa Jerusalem, sila nagpundok uban sa pipila ka matinud-anong mga lalaki ug mga babaye, lakip ni Maria ang inahan ni Jesus, sa pag-ampo ug pagsimba. Dapita ang mga estudyante sa pagbasa sa hilum sa Mga Buhat 1:13 ug ipha ang gidaghanon sa mga Apostoles nga gilista. Hangyoa ang mga estudyante sa pagreport unsay ilang nakit-an.
-
Nganong may 11 lamang ka mga Apostoles nianang higayona? (Gibudhian ni Judas Iscariote si Jesukristo ug dayon naghunos sa iyang kaugalingong kinabuhi [tan-awa sa Mateo 27:3–5].)
I-summarize ang Mga Buhat 1:15–20 pinaagi sa pagpasabut nga si Pedro mibarug sa atubangan sa 120 ka mga disipulo ug giasoy ang pagkamatay ni Judas Iscariote. Tungod kay si Judas kaniadto usa sa Napulog Duha ka mga Apostoles, ang mga disipulo nagpundok aron sa pagpili og bag-ong Apostol.
Dapita ang mga estudyante sa paghulagway sa lain-laing mga paagi diin ang pipila sa mosunod nga mga lider gipili: lider sa team, lokal nga lider sa panggobyerno, usa ka hari o reyna, ug presidente sa usa ka kompaniya.
-
Unsa kaha ang pipila sa mga kwalipikasyon alang niini nga posisyon sa pagkapangulo?
Ipakita sa mga estudyante ang usa ka hulagway o mga hulagway sa Unang Kapangulohan ug Korum sa Napulog Duha ka mga Apostoles karon, ug ipamatuod nga ang matag usa niini ka mga tawo usa ka Apostol ni Jesukristo. Hangyoa ang mga estudyante sa pagkonsiderar kon sa unsa nga paagi ang usa ka Apostol ni Jesukristo gipili ug unsa ang naka-kwalipikar sa usa ka tawo sa pagserbisyo isip usa ka Apostol.
Bahina ang mga estudyante ngadto sa paris. Dapita sila sa pagbasa og kusog sa Mga Buhat 1:21–26 uban sa ilang paris ug pangitaa kon sa unsa nga paagi ang usa ka bag-ong Apostol gipili human sa pagkamatay ni Judas Iscariote.
-
Unsa ang ipasabut nga “ilang giripahan sila”? (bersikulo 26).
Tingali kinahanglan nimong ipasabut nga sa karaan, ang pagripa usa ka matinud-anong paagi sa paggamit og hugot nga pagtuo sa paghimo og desisyon nga nagpakita og pagsalig sa Ginoo nga naggiya sa resulta (tan-awa sa Mga Buhat 1:26; tan-awa usab sa Proverbio 16:33). “Kon sila magripa, kini usa ka sitwasyon diin ang Ginoo mipili sa resulta. Malagmit pa, hinoon, ‘ilang giripahan,’ tingali ‘pagpaluyo nga mga boto’ aron sa pagbulig kaniya kinsa napili sa Dios sa pagserbisyo diha sa balaan nga pagka-apostol” (Bruce R. McConkie, Doctrinal New Testament Commentary, 3 vols. [1965–73], 2:32).
-
Sumala sa mga bersikulo 21–22, unsa nga mga kwalipikasyon ang gisulti ni Pedro nga kinahanglan ang bag-ong Apostol aduna? (Kinahanglan gayud nga siya usa ka sumusunod ni Jesukristo kinsa usa usab ka saksi sa Iyang pagpangalagad ug Pagkabanhaw.)
-
Kinsa ang nakadani sa imong atensyon mahitungod sa pag-ampo sa mga Apostoles nga girekord diha sa mga bersikulo 24–25?
-
Unsa nga kamatuoran ang atong makat-unan gikan sa bersikulo 24 mahitungod sa unsa nga paagi tawagon ang Apostol ni Jesukristo? (Ang mga estudyante mahimong mogamit og lain-laing mga pulong, apan siguroa sa pagklaro nga ang mga Apostoles ni Jesukristo gitawag sa Dios pinaagi sa pagpadayag. Isulat kini nga kamatuoran diha sa pisara, ug dapita ang mga estudyante sa pagkonsiderar og sulat niini diha sa ilang mga kasulatan tupad sa bersikulo 24.)
-
Ngano sa inyong hunahuna importante kini nga ang usa ka Apostol gitawag sa Dios pinaagi sa pagpadayag imbis nga pilion sa paagi nga susama ngadto sa ubang mga lider sa kalibutan?
Sa pagpasabut kon sa unsa nga paagi ang usa ka Apostol niini nga panahon gitawag sa Dios pinaagi sa pagpadayag, dapita ang usa ka estudyante sa pagpabasa og kusog sa mosunod nga istorya gikan sa kinabuhi ni Presidente Heber J. Grant:
“Si Presidente [Heber J.] Grant nagdawat og mga pagpadayag isip Pesidente sa Simbahan aron sa paggiya sa Simbahan sa kinatibuk-an. Usa ka ehemplo sa pagpadayag miabut human lamang gyud siya gi-set apart isip Pesidente sa Simbahan, sa diha nga siya nangayo sa kabubut-on sa Ginoo sa pagpili og usa ka bag-ong miyembro sa Korum sa Napulog Duha ka mga Apostoles. Samtang siya namalandong niini nga responsibilidad, nagsige siya og hunahuna mahitungod sa iyang tibuok kinabuhi nga higala nga si Richard W. Young, usa ka matinud-anong Santos sa Ulahing mga Adlaw ug usa ka napamatud-an nga lider. Gihisgutan ni Presidente Grant kini nga posibilidad uban sa iyang mga counselor, kinsa misuporta sa iyang desisyon. Sa dihang sa katapusan iyang gibati ang kompyansa sa desisyon, gisulat niya ang pangalan sa iyang higala sa usa ka piraso nga papel ug iyang gidala ang papel ngadto sa senimana nga miting sa templo uban sa Unang Kapangulohan ug sa Korum sa Napulog Duha. Apan, sa dihang hapit na niya ipresentar ang pangalan alang sa pag-uyon sa iyang Kaigsoonan, wala siya makahimo sa mao. Imbis ipresentar ang pangalan ni Richard W. Young, gipresentar niya ang pangalan ni Melvin J. Ballard, usa ka tawo nga dili kaayo niya kaila. Sa kaulahian gisulti ni Presidente Grant ang gibug-aton niini nga kasinatian diha kaniya:
“‘Akong gibati ang inspirasyon sa buhi nga Dios nga naggiya kanako sa akong mga buhat. Sukad niadtong adlaw nga ako mipili sa wala kaayo hiili nga tawo nga mahimong usa ka apostol, imbis sa akong dugay na ug suod kaayo nga higala, akong nailhan sama sa akong nasayran nga ako buhi, nga ako adunay katungod sa kahayag ug sa pagdasig ug sa paggiya sa Dios diha sa pagdumala sa Iyang buhat dinhi sa yuta’” (Mga Pagtulun-an sa mga Presidente sa Simbahan: Heber J. Grant [2002], 181–82).
-
Giunsa pagtudlo ang kamatuoran diha sa Mga Buhat 1:24 nga gipakita dinhi sa istorya nga naghulagway sa calling sa usa ka Apostol niini nga panahon karon?
-
Sa unsa nga paagi nga ang calling sa usa ka Apostol nagpakita nga ang Manluluwas nagpadayon sa pagdumala sa Iyang Simbahan? (Mahimo nimong pahinumduman ang mga estudyante sa kamatuoran nga gitudlo diha sa Mga Buhat 1:2—nga si Jesukristo nagdumala sa Iyang Simbahan pinaagi sa pagpahibalo sa Iyang kabubut-on ngadto sa Iyang mga Apostoles pinaagi sa Espiritu Santo.)
I-refer ngadto sa hulagway o mga hulagway sa buhing mga Apostoles nga imong gipakita sa sinugdanan. Mahimo ka nga mohatag og higayon sa pagtabang sa mga estudyante sa pagkat-on o sa pagribyu sa ilang mga pangalan.
Isulat ang mosunod nga mga pangutana diha sa pisara:
Unsa nga mga kasinatian ang nakatabang kaninyo nga mahibalo nga ang buhi nga mga Apostoles natawag pinaagi sa Dios?
Nganong importante kaninyo nga magbaton og pagpamatuod nga ang buhi nga mga Apostoles natawag pinaagi sa Dios?
Dapita ang mga estudyante sa pagsulat og tubag sa usa sa mga pangutana diha sa ilang mga class notebook o sa mga scripture study journal. Dapita ang pipila ka mga estudyante sa pagpakigbahin sa ilang mga tubag uban sa klase.
Taposa pinaagi sa pagpamatuod sa mga kamatuoran nga nailhan sa mga estudyante diha sa Mga Buhat 1:9–26.
Ribyu sa Scripture Mastery
Aron sa pagtabang sa mga estudyante sa pagribyu sa unang napulo ka mga scripture mastery passage, isulat ang mosunod nga mga pakisayran ug ang nabagay nga mga key word diha sa pisara (kon ikaw gusto, makahatag ka sa mga estudyante og mga kopya sa tsart):
|
Ipadan-ag ang inyong kahayag. |
Ang nabanhaw nga lawas adunay unod ug mga bukog. | ||
|
Umari kanako. |
Igaanak sa tubig ug sa Espiritu | ||
|
Ang mga yawe sa gingharian |
Ang dalan, ang kamatuoran, ug ang kinabuhi | ||
|
Higugmaa ang Ginoo; higugmaa ang imong silingan. |
Kon nahigugma kamo kanako, inyong pagatumanon ang akong mga sugo. | ||
|
Magtudlo ug magbautismo sa tanang kanasuran. |
Ug ang kinabuhing dayon mao kini, ang pagkaila sa Dios ug kang Jesukristo. |
Bahina ang mga estudyante ngadto sa paris. Hangyoa ang mga estudyante sa pagribyu uban sa ilang mga pares sa mga scripture mastery passage nga gisulat diha sa pisara. Mahimong imong isugyot nga ang usa sa pares mobasa og kusog sa mga key word gikan sa scripture mastery passage ug ang lain nga pares mohatag sa nabagay nga pakisayran. Dapita ang mga estudyante sa pagbanos-banos og mga tahas hangtud ilang naribyu ang tanang 10 ka mga tudling.
Kon itugot sa panahon, ikonsiderar ang paghatag sa mga estudyante og eksamin. Hatagi ang mga estudyante og mga piraso sa papel nga naglakip sa mga key word alang sa matag scripture mastery passage nga sundan og blangko nga linya. Dapita ang mga estudyante sa pagsulat sa nabagay nga pakisayran diha sa blangko nga linya. Human sa igo nga panahon, ribyuha ang eksamin.
Komentaryo ug Kaagi nga Impormasyon
Mga Buhat 1:18. Kamatayon ni Judas
Ang Hubad ni Joseph Smith nagtabang sa pagpatin-aw sa kalainan tali sa Mateo 27:3–5, nga nagrekord nga si Judas nagbitay sa iyang kaugalingon, ug ang Mga Buhat 1:18, nagrekord nga si Judas nahulog ug “nayagyag ang iyang tinai.” Ang Hubad ni Joseph Smith sa Mateo 27:6 mabasa ingon sa mosunod: “Ug siya milabay sa mga piraso sa pilak diha sa templo, ug mibiya, ug milakaw, ug mibitay sa iyang kaugalingon sa usa ka kahoy. Ug diha-diha siya nabitay, ug ang iyang mga ginhawaan milugwa, ug siya namatay”.
Mga Buhat 1:21–22. “Usa ka saksi ngari kanato sa iyang pagkabanhaw”
Gitudlo ni Presidente Joseph Fielding Smith nga ang labing dako nga saksi sa pagkabalaan sa Manluluwas nagagikan sa Espiritu Santo:
“Sila [ang Napulog Duha ka mga Apostoles] linain nga mga saksi alang kang Jesukristo. Ilang katungod ang mahibalo sa kamatuoran ug sa pagbaton og malungtaron nga saksi. Kini usa ka seryoso kaayo nga responsibilidad diha kanila, nga mahibalo nga si Jesukristo sa pagkatinuod ang Mao Lamang nga Bugtong Anak sa Dios, ang Manunubos sa kalibutan. …
“Ang kanunay nga gipangutana: ‘Kinahanglan ba alang sa usa ka miyembro sa Konseho sa Napulog Duha nga makakita sa Manluluwas aron mahimong apostol?’ Kini ilang pribilelihiyo nga makakita kaniya kon ang higayon nagkinahanglan, apan nagtudlo ang Ginoo nga adunay mas lig-on nga saksi kay sa makakita og usa ka personahe, gani mas lig-on pa kay sa makakita sa Anak sa Dios diha sa usa ka panan-awon. Mga pagpaila diha sa kalag nga nagagikan sa Espiritu Santo mas labaw ka makahuluganon kay sa usa ka panan-awon” (“The First Presidency and the Council of the Twelve,” Improvement Era, Nob. 1966, 979).
Mga Buhat 1:24–26. Sa unsa nga paagi gitawag ang mga Apostoles sa atong panahon?
Human sa pagtawag ug pagpaluyo ni Elder Robert D. Hales nga mahimong usa ka Apostol, gipasabut ni Presidente Gordon B. Hinckley kon sa unsa nga paagi gitawag ang usa ka Apostol karon:
“Sumala sa plano sa Ginoo, kadtong kinsa adunay responsibilidad sa pagpili og mga lider gidumala sa usa ka labing importante nga pangutana: ‘Kinsa ang gusto nga ipapili sa Ginoo?’ Adunay mahilum ug mahunahunaon nga pagtimbang-timbang. Ug adunay daghan nga pag-ampo aron madawat ang panghimatuod sa Balaang Espiritu nga ang pinili husto.
“… Sa pagpuli [sa bakante diha sa Korum sa Napulog Duha], ang matag miyembro sa Unang Kapangulohan ug ang Korum sa Napulog Duha adunay kagawasan sa paghimo og mga sugyot. Ako kompyansa nga sa matag higayon, dihay ligdong ug matinguhaon nga pag-ampo. Usa dayon ka pagpili himoon sa Unang Kapangulohan, usab gihapon human sa ligdong ug kinasingkasing nga pag-ampo. Kini nga pagpili gipaluyohan sa Konseho sa Napulog Duha. Karon, ang ginsakupan sa Simbahan nagpundok sa komperensya nagpaluyo niana nga pagpili.
“Ako mohatag sa akong pagpamatuod … nga ang mga pagpaila sa pagtawag ni Brother Hales ngadto niining taas ug sagrado nga responsibilidad nagagikan sa Balaang Espiritu, pinaagi sa espiritu sa pagpanagna ug pagpadayag. Si Brother Hales wala magsugyot sa iyang kaugalingon nga pangalan. Ang iyang pangalan gisugyot pinaagi sa Espiritu” (“God Is at the Helm,” Ensign, Mayo 1994, 53–54).
Mga Buhat 1:24–26. Gitawag ang mga Apostoles sa atong panahon
Bisan tuod ang kinatibuk-ang ginsakupan sa Simbahan dili mopili sa sunod nga Apostol o bisan ang lokal nga mga lider nga priesthood sa Simbahan, kita adunay oportunidad sa pagpaluyo niadtong kinsa gitawag sa Dios. Si Presidente Gordon B. Hinckley mitudlo kon unsa ang gipasabut sa pagpaluyo sa uban: “Ang pamaagi sa pagpaluyo sobra pa kay sa naandang pagpataas sa kamot. Kini usa ka pasalig sa pagdapig, sa pagsuporta, sa pagtabang niadtong kinsa napili” (“This Work Is Concerned with People,” Ensign, Mayo,1995, 51).