Leksyon 104: 1°Mga Taga-Corinto 3–4

Leksyon 104

1°Mga Taga-Corinto 3–4

Pasiuna

Mipasabut si Pablo sa mga Santos sa Corinto sa mga tahas sa mga misyonaryo sa pagtukod sa gingharian sa Dios. Mitudlo siya nga ang ilang mga kongregasyon mao ang mga dapit diin ang Espiritu makapuyo ug miawhag kanila nga dili maghunahuna nga ang ubang mga tawo mas maayo kay sa uban. (Pahinumdom: Ang doktrina nga ang atong pisikal nga mga lawas sama sa mga templo maapil niini nga leksyon sa 1°Mga Taga-Corinto°6.)

Mga Sugyot alang sa Pagtudlo

1 Mga Taga-Corinto 3

Gipasabut ni Pablo ang mga tahas sa mga misyonaryo ug sa mga miyembro sa Simbahan diha sa pagtukod sa gingharian sa Dios

Dapita ang mga estudyante sa paghunahuna nga ang usa ka higala mikuha og advance nga klase sa Math, sama sa calculus, apan wala mikuha sa gikinahanglan nga mga kurso, sama sa sukaranang algebra.

Sa inyong hunahuna unsaon kaha sa inyong higala nga magmalampuson sa advanced nga klase sa math? Ngano?
Nganong gikinahanglan man nga masabtan ang sukaranan nga mga ideya sa usa ka hilisgutan sa dili pa nimo i-master ang mas advance nga mga konsepto?

Dapita ang usa ka estudyante sa pagbasa og kusog sa 1 Mga Taga-Corinto 3:1–3. Hangyoa ang klase sa pagsunod, mangita sa susama nga analohiya nga gigamit ni Pablo sa pagpakita sa mga Santos sa Corinto nga sila dili pa andam alang sa mas advance nga mga kamatuoran sa ebanghelyo. Ipasabut nga ang mga pulong “kondili sa mga tawong kalibutanon” sa bersikulo 1 nagpasabut sa kinaiyanhon nga tawo, o “usa ka tawo kinsa mopili nga maimpluwensya pinaagi sa mga kahilayan, mga tinguha, mga kagana, ug mga pagbati sa unod kay sa pinaagi sa mga pag-awhag sa Balaan nga Espiritu. Kana nga tawo makasabut sa yutan-on nga mga butang apan dili sa mga espirituhanon nga mga butang” (Giya ngadto sa mga Kasulatan, “Kinaiyanhon nga Tawo,” scriptures.lds.org).

Isulat ang mga pulong gatas ug karne diha sa pisara.

Hain niining mga pagkaon ang imong ipakaon sa inyong bata? Ngano?
Unsa ang gisugyot sa mga pulong nga “sa mga masuso pa diha kang Kristo” sa bersikulo°1 mahitungod sa espirituhanon nga kahingkod sa mga Santos sa Corinto?

Aron matabangan ang mga estudyante nga makasabut nga ang mga Santos dili pa andam sa pagdawat sa mas dakong kamatuoran, pahinumdumi sila nga ang mga Santos sa Corinto wala magkahiusa ug nga ang pipila nila naglakip sa pagano (dili diosnon) nga tinuohan ug mga binuhatan sa pagtuman sa ebanghelyo. Ipasabut nga si Pablo migamit og daghang simbolo sa pagtudlo niining mga Santos sa kaimportante sa panaghiusa, sa pagkorihir sa mini nga mga tinuohan ug mga binuhatan, ug sa pagpalig-on sa ilang hugot nga pagtuo sa ebanghelyo ni Jesukristo.

Bahina ang mga estudyante ngadto sa tulo ka mga grupo. I-assign ang matag tawo sa grupo sa mosunod nga mga outline sa pagtudlo. Hatagi ang matag estudyante og handout sa outline sa pagtudlo nga gi-assign niya, ug tuguti ang mga estudyante og pipila ka minuto sa pagbasa niini. Human sa igong panahon, dapita ang matag estudyante sa paggamit sa outline aron itudlo ngadto sa laing duha ka sakop sa grupo. (Kon dili mahimo nga mag grupo sa tinagutlo, mahimo nimong ipares-pares ug i-assign ang duha ka mga outline sa pagtudlo sa usa sa mga estudyante sa matag pares.)

Estudyante°1

Manwal sa Seminary Teacher sa Bag-ong Tugon—Leksyon°104

Dapita ang inyong grupo sa paghunahuna nga sila mitambong sa miting sa sakrament diin ang usa ka returned missionary mihisgot mahitungod sa iyang misyon. Atol sa iyang pakigpulong, iyang gisaysay nga siya nakabunyag og pipila ka tawo. Usa ka semana ang milabay, laing returned missionary namulong sa miting sa sakrament mahitungod sa iyang misyon ug misaysay nga siya nakatudlo og daghang tawo kinsa sa katapusan nabunyagan human nga nabalhin siya sa lain nga mga area.

Unsaon man ninyo pagtubag kon adunay moingon nga ang misyonaryo kinsa nakabunyag og daghang tawo sa iyang misyon mas malampuson kay sa misyonaryo kansang mga investigator wala mabunyagi hangtud nabalhin siya sa area?

Isulat ang mga pulong gitanom ug gibu-boan sa usa ka pirasong papel, ug ipakita kini sa inyong grupo. Ipasabut nga si Pablo mikomparar sa mga misyonaryo ngadto sa mga tawo nga mipugas og mga binhi ug gibu-buan og tubig ang mga pananum. Pahinumdumi ang imong grupo nga ang mga Santos sa Corinto nagsugod na sa pagkabahin-bahin kon kinsa ang nakabunyag nila. Mituo sila nga ang ilang kahimtang diha sa Simbahan gibase sa kaimportante sa tawo kinsa mibunyag nila. (Tan-awa sa 1 Mga Taga-Corinto 1:10–16.)

Papuli-puliha ang mga miyembro sa inyong grupo sa pagbasa og kusog gikan sa 1 Mga Taga-Corinto 3:4–9. Hangyoa ang grupo sa pagsunod, nga mangita sa unsay gisulti ni Pablo mahitungod sa mga misyonaryo kinsa nagtudlo ug nagbunyag sa mga tawo didto sa Corinto.

Sumala sa bersikulo 5, unsa ang giingon ni Pablo bahin nila ni Apolos? (Ipasabut ang bersikulo 5, ug ipasabut nga ang mga ministro nagpasabut sa mga sulugoon.)
Sumala sa mga bersikulo 6–7, unsa ang giingon ni Pablo mahitungod sa misyonaryo nga nagpugas sa liso sa ebanghelyo ug sa mga misyonaryo kinsa mitabang sa mga liso nga motubo?

Kon gikinahanglan, ipasabut ang hugpong sa mga pulong “ang may bili dili ang nagtanum o ang nagbisibis” diha sa bersikulo°7, ug ipasabut nga si Pablo migamit niining mga pulong sa pagtudlo nga wala niining mga tahas ang mas importante kay sa tahas sa Dios.

Unsa ang gipasabut sa mga pulong “kondili ang nagpatubo, nga mao ang Dios lamang” (bersikulo 7)? (Ang Dios, pinaagi sa Espiritu Santo, kinsa nakahimo og mga kausaban sa kasingkasing sa mga tawo nga mogiya ngadto sa pagkakabig, dili kadtong nagtudlo ug nagbunyag.)
Unsa nga kamatuoran ang atong makat-unan gikan sa 1°Mga Taga-Corinto 3:6–7 mahitungod sa atong tahas ug ang tahas sa pagtabang sa uban nga makabig ngadto sa ebanghelyo ni Jesukristo? (Human makatubag inyong grupo, dapita sila sa pagsulat sa mosunod nga mga kamatuoran sa ilang mga kasulatan sunod sa 1°Mga Taga-Corinto 3:6–7: Samtang makatabang kita sa uban nga makat-on mahitungod sa ebanghelyo ni Jesukristo, pinaagi sa gahum sa Espiritu Santo ang mga tawo makabig.)

Klaroha nga aron ang tawo makadawat sa Espiritu Santo ug makabig, kinahanglan ilang buhaton ang ilang bahin pinaagi sa paggamit sa hugot nga pagtuo ug sa pagsunod sa mga sugo sa Dios.

Sa unsang paagi kaha nga ang pagkahibalo niining kamatuoran mahimong makatabang sa mga Santos sa Corinto nga mas magkahiusa?

Hangyoa ang inyong grupo kon sa unsang paagi kining kamatuoran makatabang nila sa pagtubag sa mga sitwasyon mahitungod sa duha ka mga returned missionary.

Nganong importante man alang kanato nga makasabut nga ang Espiritu Santo ang makapakabig, dili ang atong kaugalingong gahum?

Estudyante 2

Manwal sa Seminary Teacher sa Bag-ong Tugon—Leksyon°104

Isulat ang pulong nga pundasyon sa usa ka piraso nga papel, ug ipakita kini sa inyong grupo.

Nganong ang pundasyon usa man ka importanting bahin sa building?
Unsa ang mahimong mahitabo kon dunay problema sa pundasyon?

Dapita ang usa ka sakop sa inyong grupo sa pagbasa og kusog sa 1 Mga Taga-Corinto 3:10, ug hangyoa ang tanan sa grupo nga mangita sa unsay gisulti ni Pablo mahitungod sa iyang misyonaryo nga buhat taliwala sa Mga Taga-Corinto.

Unsa ang gisulti Pablo nga iyang gibuhat samtang siya nagtrabaho isip usa ka misyonaryo didto sa Corinto?
Sa imong hunahuna unsa kaha ang gipasabut ni Pablo sa dihang siya miingon “laing tawo mao ang magatukod ibabaw niini”?

Dapita ang laing sakop sa inyong grupo aron basahon og kusog ang 1 Mga Taga-Corinto 3:11, ug hangyoa ang tanan sa inyong grupo sa pagpangita kon unsa nga pundasyon ang gipahimutang ni Pablo alang sa mga Santos sa Corinto.

Unsa nga pundasyon ang gipahimutang ni Pablo samtang siya mitudlo sa Corinto?
Sumala sa bersikulo°11, kinsa ang nagkinahanglan nga mahimong pundasyon sa atong kinabuhi? (Siguroha nga ang inyong grupo makaila sa mosunod nga kamatuoran: Si Jesukristo mao ang pundasyon diin gikinahanglan gayud nga atong tukuron. Ikonsiderar ang pagdapit sa inyong grupo sa pagmarka niining kamatuoran sa bersikulo 11.)
Sa unsang paagi nga ang pagtukod diha sa pundasyon ni Jesukristo makatabang nato sa paglahutay sa mga tintasyon ug mga pagsulay? (Tan-awa usab sa Helaman 5:12.)
Unsaon nato pagsiguro nga ang atong mga kinabuhi natukod diha sa pundasyon ni Jesukristo?

Dapita ang usa ka sakop sa inyong grupo sa pagpakigbahin sa usa ka tawo nga iyang kaila kansang kinabuhi nagpakita nga gitukod sa pundasyon ni Jesukristo. Hangyoa ang estudyante sa pagpasabut kon sa unsang paagi nga ang pagtukod diha kang Kristo nakapanalangin niining tawhana.

Dapita ang matag sakop sa grupo sa paghimo og tumong nga makatabang kaniya o sa iyang pagtukod diha sa pundasyon ni Jesukristo.

Estudyante 3

Manwal sa Seminary Teacher sa Bag-ong Tugon—Leksyon°104

Isulat ang pulong templo sa usa ka piraso nga papel, ug ipakita kini sa inyong grupo. Ipasabut nga si Pablo kasagarang mag-refer sa templo sa simbolikanhon nga paagi. Sumala sa narekord diha sa 1 Mga Taga-Corinto 3:16–17, migamit siya sa pulong templo nga nagpasabut ngadto sa kongregasyon sa Simbahan.

Dapita ang usa ka sakop sa inyong grupo sa pagbasa og kusog sa 1 Mga Taga-Corinto 3:16–17. Hangyoa ang grupo sa pagsunod, nga mangita kon unsay gisulti ni Pablo sa mga miyembro sa Simbahan sa Corinto nga kinahanglang masabtan. Ipasabut nga kamo sa (bersikulo°16) nagpasabut ngadto sa mga kongregasyon sa Simbahan ug kana nga mga pulong nga “kon adunay molaglag sa templo sa Dios” (bersikulo 17) nagpasabut ngadto ni bisan kinsa nga mosulay sa paglaglag sa mga tawo sa Dios.

Sumala sa bersikulo°16, unsa ang gusto ni Pablo nga masabtan sa mga miyembro sa Simbahan aron makasabut mahitungod sa ilang mga kongregasyon?

Bisan tuod ang 1 Mga Taga-Corinto 3:16–17 tingali nagpasabut nga ang lawas sa Simbahan isip usa ka kongregasyon, kining mga bersikulo usab magamit sa atong pisikal nga lawas.

Unsaon kaha nga ang 1 Mga Taga-Corinto 3:16–17 ma-apply usab sa atong pisikal nga mga lawas? Unsa man ang mga sangputanan sa paglaglag sa atong mga lawas?

I-summarize ang 1 Corinthians 3:18–23 pinaagi sa pagpasabut sa imong grupo nga si Pablo mitudlo sa mga Santos nga ang tinuod nga kaalam makaplagan diha ni Jesukristo ug ang kalibutanon nga kaalam “usa ka binuang sa atubangan sa Dios” (bersikulo 19).

Human sa igong panahon, dapita ang pipila ka mga estudyante sa pagreport unsay ilang nakat-unan sa ilang mga grupo ug unsay ilang buhaton isip resulta sa unsay ilang nakat-unan.

1 Mga Taga-Corinto 4

Si Pablo misulti sa mga Santos sa Corinto nga dili maghunahuna nga ang ubang mga tawo mas maayo kay sa uban

Ipasabut nga base sa tambag ni Pablo nga narekord diha sa 1 Mga Taga-Corinto 4:1–3, makita nga ang pipila ka mga miyembro sa Simbahan sa Corinto mihukom sa gihimo ni Pablo isip usa ka misyonaryo ug lider sa Simbahan. Mahimong ilang gikwestyon ang iyang paghukom o naghunahuna nga tingali adunay pay laing tawo nga mas nakahimo og maayo.

Dapita ang usa ka estudyante sa pagbasa og kusog sa 1 Mga Taga-Corinto 4:3–5. Hangyoa ang klase sa pagsunod, nga mangita sa unsang paagi gitubag ni Pablo ang ilang mga paghukom.

Giunsa ni Pablo pagtubag ang ilang mga paghukom?
Nganong wala man ikabalaka ni Pablo ang mahitungod sa paghukom sa uban?
Unsa nga kamatuoran ang atong makat-unan gikan sa bersikulo 5 mahitungod sa unsang paagi ang Ginoo mohukom kanato? (Ang mga estudyante mahimong mogamit og lain-laing mga pulong, apan siguroa nga mahibalo sila og usa ka kamatuoran nga susama sa mosunod: Ang Ginoo mohukom kanato sa makiangayong paagi tungod kay Siya nasayud sa tanan nga butang, lakip sa mga hunahuna ug mga tinguha sa atong mga kasingkasing.)
Sa unsang paagi nga ang pagtuo niining kamatuoran makatabang sa usa ka tawo kinsa dili makiangayong gihukman?

Dapita ang usa ka estudyante sa pagbasa og kusog sa 1 Mga Taga-Corinto 4:6–7, ug hangyoa ang klase sa pagpangita sa unsay gitudlo ni Pablo sa mga Santos mahitungod sa ilang relasyon sa ubang miyembro sa Simbahan, lakip sa mga lider sa Simbahan.

Sumala sa bersikulo 6, unsa ang gisulti ni Pablo sa mga Santos nga dili buhaton kon ilang obserbaran ang kalainan sa mga misyonaryo ug mga lider sa Simbahan? (Kinahanglan dili sila “magpaburot” sa garbo ug magtuo nga ang ubang mga tawo mas maayo kay sa uban.)
Base sa mga pangutana ni Pablo nga narekord diha sa bersikulo 7, kinsa ang mihatag sa mga tawo sa nagkalainlaing mga talento ug abilidad?
Sa unsang paagi nga ang tambag ni Pablo makatabang kanato samtang kita maghunahuna mahitungod sa atong mga lider sa Simbahan ug mga magtutudlo?

I-summarize ang 1 Corinthians 4:8–21 pinaagi sa pagpasabut nga si Pablo misulti sa mga Santos sa Corinto nga ang mga Apostoles ni Jesukristo gitawag aron moantos tungod sa kadautan sa kalibutan. Ang kalibutan mohukom sa mga Apostoles ug ubang mga lider sa Simbahan nga “mga buang” (bersikulo 10) tungod sa pagtinguha sa pagsunod ni Kristo.

Tapusa pinaagi sa pagpamatuod sa mga kamatuoran nga gitudlo niining leksyon.

Komentaryo ug Background nga Impormasyon

1 Mga Taga-Corinto 3:16–17. “Kamo ang templo sa Dios”

“Si Pablo mitudlo, ‘Wala ba kamo masayud nga kamo templo sa Dios?’ (1 Mga Taga-Corinto 3:16). Niini nga bersikulo, migamit si Pablo og kamo, dinaghan, nga nagpasabut sa mga Santos sa Corinto sa tiningub isip templo sa Dios. Ang punto ni Pablo mao nga ang mga kongregasyon sa Simbahan milihok isip mga templo diin ang Espiritu sa Dios makapuyo (tan-awa sa 2 Mga Taga-Corinto 6:16; Mga Taga-Efeso 2:21). Kining analohiya ma y pagkalahi gikan sa usa nga gamiton unya ni Pablo sa 1°Mga Taga-Corinto 6:19, diin siya mikomparar sa pisikal nga lawas sa tawo ngadto sa usa ka templo” (New Testament Student Manual [manwal sa Church Educational System, 2014], 365).

1 Mga Taga-Corinto 4:9–10. Kamatayon sa mga Apostoles

“Sa dihang mitudlo si Pablo nga ang mga Apostoles ‘ginahin aron igapapatay’ (1°Mga Taga-Corinto 4:9), siya nagpasabut nga ang iyang calling isip usa ka Apostol mohatud ngadto sa iyang kamatayon. Misaysay usab siya nga kadaghanan didto sa Corinto naglantaw sa ilang mga kaugalingon isip maalamon ug lig-on samtang maghunahuna nga si Pablo ug ang ubang mga Apostoles mga buang, huyang, ug dinaug-daug (tan-awa sa 1°Mga Taga-Corinto 4:10). Kining duha ka mga aspeto—ang kamatayon sa mga Apostoles ug pagsalikway sa apostolikanhong awtoridad sa mga miyembro sa Simbahan—sa katapusan makatampo sa Dakong Apostasiya” (New Testament Student Manual [manwal sa Church Educational System, 2014],°365).