Pasiuna sa Ikaduhang Sulat ni Pablo ngadto kang Timoteo
Ngano nga kinahanglang tun-an kini nga basahon?
Ang Ikaduhang Sulat ni Pablo kang Timoteo naghatag og importansya sa gahum nga moabut gumikan sa pagbaton og pagpamatuod kang Jesukristo. (tan-awa sa 2 Timoteo 1:7–8). Naglangkob usab kini sa panagna bahin sa mga “panahon nga malisud” nga moabut sa kapanahunan ni Pablo ug Timoteo ingon man sa ulahing mga adlaw (tan-awa sa 2 Timoteo 3:1–7). Aron matabangan si Timoteo sa mga hagit nga giatubang, giawhag siya ni Pablo nga saligan ang kasulatan ug ang mga lider sa Simbahan (tan-awa sa 2 Timoteo 3:14–17) ug mosalig sa tinood nga doktrina (tan-awa sa 2 Timoteo 4:2). Pinaagi sa pagtuon sa basahon, makat-unan sa mga estudyante ang mga doktrina ug mga baruganan nga makatabang nila nga magpakabuhing matinud-anon samtang masinati nila ang mga panahon nga malisud sa ulahing mga adlaw.
Kinsa ang nagsulat niini nga basahon?
Si Pablo ang misulat sa 2 Timoteo (tan-awa sa 2 Timoteo 1:1).
Kanus-a ug diin kini gisulat?
Ang Ikaduhang Sulat ni Pablo ngadto ni Timoteo ingon og gisulat sa mga tuig A.D. 64 ug 65 (tan-awa sa Giya ngadto sa mga Kasulatan, “Epistola ni Pablo, Mga,” scriptures.lds.org). Si Pablo misulat niini nga epistola atol sa ikaduha niyang pagkabilanggo sa Roma sa hapit na ang iyang pagkamartir (tan-awa sa Giya ngadto sa mga Kasulatan, “Epistola ni Pablo, Mga”).
Atol sa iyang pagkabilanggo gikadenahan [gitalikala] si Pablo (tan-awa sa 2 Timoteo 1:16; 2:9), sama og naa siya sulod sa selda o bilanggoan ug nakasinati sa ingon niana nga mga kahimtang (tan-awa sa 2 Timoteo 4:13, 21), ug naglisud sila sa pagpangita kaniya (see 2 Timoteo 1:17). Maingon og ang regular ra niyang tigbisita si Lucas (tan-awa sa 2 Timoteo 4:11), ug gituohan ni Pablo nga matapus na ang iyang kinabuhi (tan-awa sa 2 Timoteo 4:6–8).
Para kang kinsa kini gisulat ug ngano?
Niini nga sulat, gidasig ni Pablo si Timoteo ug gitanyagan og kalig-on aron matabangan siya sa pagpadayon dihang nagsingabut ang kamatayon ni Pablo. Nahibalo si Pablo nga mubo na lang ang iyang kinabuhi, ug tinguha niya ang pakigkita kang Timoteo, kinsa sa mahulagwayong paagi gitawag niya nga “akong hinigugmang anak” (2 Timoteo 1:2).
Dapit sa katapusan sa iyang sulat, mihangyo si Pablo nga si Timoteo ug Marcos mobisita niya ug dad-on ang pipila ka butang nga iyang nabiyaan (tan-awa sa 2 Timoteo 4:9–13). Bisan og ang sulat ni Pablo piho nga gitumong para kang Timoteo, ang mga tambag niini magamit para niadtong nagpuyo “sa katapusang mga adlaw” (2 Timoteo 3:1) tungod kay gitudlo ni Pablo ang mga hagit ug mga sulbad nga haum sa atong panahon ingon man sa iyaha.
Unsa ang pipila ka mga butang nga nakalahi niini nga basahon?
Kini nga sulat usa sa mga pastoral nga Sulat, kauban sa 1 Timoteo ug Tito, ug “naglangkob sa katapusan nga mga pulong ni Pablo ug nagpakita sa katingalahan nga kaisug ug pagsalig diin siya miatubang sa kamatayon” (tan-awa sa Giya ngadto sa mga Kasulatan, “Epistola ni Pablo, Mga”). Subay sa Kronolohiya, ang 2 Timoteo makita nga maoy katapusang sulat ni Pablo sa Bag-ong Tugon (tan-awa sa 2 Timoteo 4:6).
Kini nga sulat naglangkob sa mga pagpamalandong ni Pablo mahitungod sa mga panalangin ug kalisdanan sa pagserbisyo isip “usa ka tigsangyaw [magwawali], ug apostol, ug magtutudlo sa mga Hentil” (2 Timoteo 1:11). Gipamahayag ni Pablo nga, “Gibugno ko na ang maayong pakigbugnoay, natapus ko na ang akong pagdalagan sa lumba, gikabantayan ko ang pagtuo: tungod niana aduna nay giandam alang kanako nga purong purong sa pagkamatarung” (2 Timoteo 4:7–8), nagpasabut nga siya dunay personal nga kasiguroan nga iyang mapanunod ang kinabuhing dayon. Isip usa nga nakapangalagad kang Jesukristo kapin sa 30 ka tuig, si Pablo naa sa pinakamaayong posisyon sa pagtudlo kang Timoteo kon unsaon sa pagserbisyo nga epektibo sa pagpalig-on sa pagtuo sa uban (tan-awa sa 2 Timoteo 2:15–17, 22–26; 4:1–2, 5).
Outline
2 Timoteo 1 Namulong si Pablo kalabut sa gasa ug gahum sa Dios nga nadawat pinaagi sa pagka-orden sa priesthood. Gitudlo niya nga ang “espiritu sa katalaw” (2 Timoteo 1:7) dili maggikan sa Dios ug gitambagan si Timoteo nga dili ikaulaw ang iyang pagpamatuod kang Jesukristo. Gipamatuod ni Pablo nga gitawag siya ni Jesukristo aron sa pagsangyaw sa ebanghelyo (tan-awa sa 2 Timoteo 1:11).
2 Timothy 2 Migamit si Pablo og mga paghulagway sa usa ka maayong sundalo, madaugon nga atleta, ug usa ka kugihan nga mag-uuma sa paghulagway sa gikinahanglan nga paglahutay sa mga kalisdanan aron madawat ang himaya nga dayon. Iyang gikumpara ang husto ug mini nga mga magtutudlo ug ang pinasidunggan ug dili pinasidunggan nga mga sudlanan [tawo]. Gipasidan-an niya si Timoteo nga likayan ang mga kontrobersiya ug sa mapailubong paagi tudloan kadtong nagkinahanglan nga maghinulsol.
2 Timoteo 3–4 Gihulagway ni Pablo ang dautang mga kahimtang sa ulahing mga adlaw ug miawhag nga gamiton ni Timoteo ang mga kasulatan sa iyang tahas isip lider sa priesthood. Gisulat niya ang mahitungod sa nagsingabut niyang kamatayon ug mipahayag nga, “gikabantayan ko ang hugot nga pagtuo” (2 Timoteo 4:7). Gipamatuod ni Pablo nga ang Ginoo modala niya ngadto sa “langitnong gingharian” (2 Timoteo 4:18).