Leksyon 132
2 Timoteo 3–4
Pasiuna
Gisulatan ni Pablo si Timoteo ug mipasabut nga ang apostasiya ug kadautan maanaa sa ilang kapanahunan ingon man sa katapusang mga adlaw. Gisugo niya si Timoteo nga magpabiling matinud-anon sa mga kamatuoran nga iya nang nakat-unan. Gitudlo ni Pablo ang mahitungod sa mga katuyoan sa mga kasulatan. Gitapos ni Pablo ang iyang sulat pinaagi sa pag-awhag kang Timoteo nga magmakugihon sa pagtuman sa iyang pangalagad.
Mga Sugyot alang sa Pagtudlo
2 Timoteo 3
Gihulagway ni Pablo ang malisud nga mga panahon sa katapusang mga adlaw
Sa dili pa magsugod ang klase, hangyoa ang duha o tulo ka mga estudyante nga nangabut sa pagdrowing og litrato diha sa pisara sa malisud o kuyaw nga sitwasyon. Kon masugdan na ang klase, pangutan-a ang klase sa mosunod nga pangutana:
-
Unsa nga mga pulong ang inyong gamiton sa paghulagway sa mga sitwasyon nga gidrowing sa pisara?
Ipasabut nga isip kabahin sa iyang Ikaduhang Sulat ngadto kang Timoteo, gipanagna ni Pablo ang mga kahimtang sa iyaha ug sa atong kapanahunan. Dapita ang usa ka estudyante sa pagbasa og kusog sa 2 Timoteo 3:1. Hangyoa ang klase sa pagsunod, nga mangita kon giunsa sa paghulagway ni Pablo ang mga kapanahunan nga atong gipuy-an.
-
Giunsa sa paghulagway ni Pablo ang mga kapanahunan nga atong gipuy-an? (Kon gikinahanglan, ipasabut nga ang pulong nga malisud nagpasabut nga puno sa peligro ug kakuyaw.)
-
Unsa ang pipila ka moral o espirituhanong mga kalisud [peligro] o kakuyaw nga nakita ninyo sa atong panahon?
Ipares-pares ang mga estudyante. Hatagi ang matag pares og kopya sa mosunod nga tsart. Dapita ang matag pares sa pagbasa sa 2 Timoteo 3:2–7 ug pagtubag sa mga pangutana nga naa sa tsart. Sultihi sila sa paggamit sa mga footnote aron matabangan para sa lisud nga mga pulong.
Manwal sa Seminary Teacher sa Bag-ong Tugon—Leksyon 132
|
Unsa ang pipila ka mga ehemplo sa mga kahimtang sa ulahing adlaw nga gihulagway ni Pablo? |
Asa man niini nga mga kahimtang ang inyong nakita sa atong panahon? (Ilha ang duha og tulo niini.) Ngano nga kini nga mga kahimtang peligro? |
© 2015 pinaagi sa Intellectual Reserve, Inc. Tanang mga katungod gigahin.
Human sa igo nga panahon, dapita ang mga estudyante sa pagreport sa ilang gihisgutan, lakip kon nganong kini nga mga kahimtang peligro kaayo.
Hangyoa ang mga estudyante sa pagpamalandong kon nakasulay na ba silang mabalaka nga basin og maapektuhan sila sa ubang mga peligro nga gihisgutan ni Pablo diha sa mga bersikulo nga ilang gitun-an.
-
Sumala sa katapusan sa 2 Timoteo 3:5, unsa ang giawhag ni Pablo nga buhaton ni Timoteo nga makatabang sab nato karon? (Kinahanglan nga mopalayo kita sa kadautan.)
I-summarize ang 2 Timoteo 3:8–11 pinaagi sa pagpasabut nga miingon si Pablo kang Timoteo nga si kinsa man ang mobalibad sa kamatuoran mabutyag ang ilang mga kaboang. Gisulat sab niya ang daghang kalisud ug mga pagpanggukod nga iyang giantus tungod sa iyang mga paningkamot sa pagsunod sa ebanghelyo.
Dapita ang usa ka estudyante sa pagbasa og kusog sa 2 Timoteo 3:12–13. Hangyoa ang klase sa pagsunod, nga mangita kon unsay gipanagna ni Pablo nga mahitabo sa mga mosunod sa ebanghelyo.
-
Unsa ang gipanagna ni Pablo nga mahitabo sa mga mosunod sa ebanghelyo?
Ipasabut nga bisan sa kaseryuso niining makadisturbo nga mga kahimtang, makapangita kita og tabang ug proteksyon. Dapita ang usa ka estudyante sa pagbasa og kusog sa 2 Timothy 3:14–15. Hangyoa ang klase sa pagsunod, nga mangita kon unsay gitudlo ni Pablo nga makatabang nga kita malayo gikan niining mga kalisud.
-
Unsa ang gitudlo ni Pablo mahitungod sa paglikay sa mga kalisud nga iyang gihulagway?
-
Sa inyong hunahuna unsay ipasabut diha sa bersikulo 14 nga “magpadayon ka diha sa mga butang nga imong nahikat-unan ug imong ginatuohan pag-ayo”?
Aron matabangan ang mga estudyante nga makasabut sa gipasabut niining mga pulong, dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
“Sa mga higayon sa kahadlok o pagduha-duha o sa malisud nga mga panahon, gamita ang hugot nga pagtuo nga napalambo na ninyo. … Kon kini nga mga higayon moabut ug mogawas ang mga problema, ang kasulbaran dili dayon moabut, panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo” (“Ginoo, Mituo Ako,”Ensign o Liahona, Mayo 2013, 93–94).
Ipasabut nga ang mga pulong nga “sanglit ikaw nahibalo man kong kinsa ang imong nahikat-onan niini” diha sa bersikulo 14. Ipasabut nga makakat-on ra kita ug makadawat og kasiguroan sa kamatuoran gikan sa kasaligan nga tinubdan sama sa mga propeta, mga lider, o mga magtutudlo, mga ginikanan, ug sa Espiritu Santo.
-
Unsa nga baruganan ang atong makat-unan gikan sa bersikulo 14–15 kon unsaon sa pagbuntog ang espirituhanong mga kalisud sa katapusang mga adlaw? (Human makatubag ang mga estudyante, isulat sa pisara ang mosunod nga baruganan: Kon atong ipadayon ang mga kamatuoran nga atong nakat-unan gikan sa kasaligan nga mga tinubdan ug sa mga kasulatan, atong mabuntog ang espirituhanong mga kalisud sa katapusang mga adlaw.)
-
Sa unsang paagi ang pagsalig sa mga kasulatan ug sa mga kamatuoran nga atong nakat-unan makatabang nato nga makabuntog sa mga kalisud sa atong panahon?
-
Kanus-a kamo nakasulay nga mopili sa mga kamatuoran nga inyong nakat-unan? Sa unsang paagi kamo napanalanginan sa paghimo sa ingon? (Mahimo nga patubagon una nimo ang mga estudyante sa mga pangutana diha sa ilang mga scripture study journal o mga class notebook ug dayon dapita ang pipila ka estudyante sa pagpakigbahin sa unsay ilang gisulat.)
Dapita ang usa ka estudyante sa pagbasa og kusog sa 2 Timoteo 3:16–17, ug hangyoa ang klase sa pagpangita kon unsay gitudlo ni Pablo mahitungod sa mga kasulatan. Mahimo nimong isugyot nga markahan sa mga estudyante ang ilang mga nakit-an.
-
Unsa man ang gitudlo ni Pablo mahitungod sa pagtuon sa mga kasulatan nga makatabang nato sa atong panahon? (Tabangi ang klase nga makahibalo sa mosunod nga baruganan: Samtang tun-an nato ang mga kasulatan, makakat-on kita og mga doktrina ug makadawat og mga pagpanul-id [koreksyon] ug pahimatngon nga makatabang nato nga molambo padulong sa pagakahingpit. Isulat kini nga baruganan diha sa pisara.)
Lingini ang mga pulong nga doktrina, koreksyon, ug pahimatngon diha sa pamahayag nga inyong gisulat sa pisara. Hangyoa ang mga estudyante sa paghunahuna og usa ka panahon dihang ang mga kasulatan nakatabang nila sa usa o sa mosunod nga mga paagi: (1) nga masabtan ang usa ka doktrina sa ebanghelyo; (2) pinaagi sa gitanyag nga pagpamadlong o koreksyon mahitungod sa butang nga ilang gihunahuna, mga pagpili, o kinaiya nga dili husto; o (3) pinaagi sa paghatag og tubag sa pag-ampo o pagpanudlo kon unsaon nila sa pagsulbad ang usa ka problema. Hatagi og panahon ang mga estudyante sa paghunahuna sa mga kasinatian, ug dayon dapita ang pipila ka estudyante sa pagpakigbahin ngadto sa klase sa unsay ilang nahunahunaan. (Pahinumdumi ang mga estudyante nga dili ipakigbahin ang bisan unsa nga personal kaayo o pribado, lakip ang nangaging mga sala.)
-
Gumikan sa unsay atong nakat-unan mahitungod sa bili sa mga kasulatan, ngano kaha nga giawhag man ta nga tun-an kini kada adlaw?
Hatagi ang mga estudyante og kopya sa mosunod nga pamahayag ni Elder Richard G. Scott sa Korum sa Napulog Duha ka mga Apostoles. Dapita ang usa ka estudyante sa pagbasa niini og kusog, ug hangyoa ang klase sa pagpangita sa gitambag ug gisaad ni Elder Scott mahitungod sa pagtuon sa mga kasulatan.
“Ayaw patuo sa bakak ni Satanas nga kamo walay panahon sa pagtuon sa kasulatan. Pilia nga makagahin og panahon sa pagtuon niini. Ang pagbusog sa pulong sa Dios matag adlaw mas importante kay sa katulog, eskwelahan, trabaho, salida sa telebisyon, mga video game, o social media. Tingali kinahanglan ninyong i-organisar og usab ang inyong mga prayoridad aron makagahin og panahon sa pagtuon sa pulong sa Dios. Kon mao, buhata kini!
“… Sa paggahin ninyo og panahon matag adlaw, sa personal ug uban sa pamilya, sa pagtuon sa pulong sa Dios, ang kalinaw mopatigbabaw sa inyong kinabuhi” (“Himoa ang Paggamit sa Pagtuo nga Inyong Unang Prayoridad,” Ensign o Liahona, Nob. 2014, 93).
Ipamatuod ang kasiguroan ug kalinaw nga moabut niadtong kinsa magpadayon sa mga kamatuoran nga naa sa mga kasulatan. Dapita ang mga estudyante sa pagkonsiderar kon unsaon kaha nila sa paggamit kini nga mga baruganan sa ilang kinabuhi. Awhaga ang mga estudyante sa paghimo og tumong base sa mga pag-aghat nga ilang gibati.
2 Timoteo 4
Gipamahayag ni Pablo nga gibugno na niya ang maayong pakigbugnoay ug gisangunan si Timoteo nga ipadayon ang pagsangyaw
Hangyoa ang mga estudyante sa pag-isa sa ilang mga kamot kon nakasulay na ba sila nga gusto na silang mohunong sa usa ka malisud nga tahas.
-
Unsa nga mga kasinatian ang inyong nabatunan dihang mipadayon gyud mo bisan og gusto na mong mohunong?
Ipasabut nga ang 2 Timoteo ingon og maoy katapusang sulat nga gihimo ni Pablo sa wala pa siya mamatay. Dapita ang katunga sa klase sa pagbasa og hilum sa 2 Timoteo 4:1–5, nga mangita sa tambag ni Pablo kang Timoteo. Dapita ang laing katunga sa pagbasa sa mao gihapon nga tudling [passage], nga mangita sa panagna ni Pablo mahitungod sa kaugmaon sa karaang Kristiyano nga Simbahan. Awhaga ang mga estudyante sa paggamit sa mga footnote aron matabangan sila nga makasabut unsay ilang gibasa. Human sa ilang pagbasa, dapita ang mga estudyante gikan sa matag grupo nga ireport unsay ilang nakit-an.
Ipasabut nga ang mga bersikulo 3–4 nagrekord sa deskripsyon ni Pablo kalabut sa nagsugod na nga apostasiya sa Simbahan. Ang mga kinaiya nga sama niadtong mga gihulagway ni Pablo misangput sa Dakong Apostasiya, hinungdan nga ang pagpahiuli gikinahanglan nga himoon.
-
Ngano kaha nga giawhag man ni Pablo si Timoteo nga ipadayon ang pagsangyaw ug pagpangalagad sa mga tawo bisan og nahibalo siya nga daghan ang motalikod sa kamatuoran?
Dapita ang usa ka estudyante sa pagbasa og kusog sa 2 Timoteo 4:6–8, ug hangyoa ang klase sa pagpangita kon unsay gisulat ni Pablo mahitungod sa kaugalingon niyang paningkamot sa pagsangyaw sa ebanghelyo.
-
Unsa ang gisulti ni Pablo mahitungod sa iyang mga paningkamot isip usa ka misyonaryo? (Ipasabut nga ang mga gihimong pagkumpara ni Pablo bahin sa gibugno ko na ang maayong pakigbugnoay ug ang pagtapus sa lumba naghulagway sa iyang kamatinud-anon sa paghuman sa iyang misyon.)
-
Sumala sa bersikulo 8, unsay nahibaloan ni Pablo nga naghulat kaniya human sa kamatayon?
-
Unsa nga baruganan ang atong makat-unan gikan niining mga bersikulo sa pagpabiling matinud-anon sa paghimo sa unsay gipabuhat sa Ginoo kanato? (Ang mga estudyante kinahanglang mahibalo sa mosunod: Kon kita magpabling matinud-anon sa tanang gikinahanglan sa Ginoo kanato, atong madawat ang purongpurong sa pagkamatarung. Isulat kini nga baruganan diha sa pisara.)
Ipasabut nga ang pagkadawat og “purongpurong sa pagkamatarung” naglakip sa pagkahimong sama sa Langitnong Amahan. Dapita ang mga estudyante nga ilista diha sa pisara ang ubang mga rekisito nga gihatag sa Ginoo ngadto sa mga kabatan-onan sa Simbahan aron matabangan sila nga mahimong mas sama sa ilang Amahan sa Langit.
-
Ngano kaha nga pilion man sa mga batan-on ang ilang pagkamatinud-anon sa pipila niining mga rekisito?
-
Kinsa ang inyong nailhan nga, sama ni Pablo, usa ka maayong ehemplo sa pagpabiling matinud-anon bisan kon lisud kini? Unsay ilang mga gibuhat nga sila nahimong ehemplo niini nga baruganan?
I-summarize ang 2 Timoteo 4:9–22 pinaagi sa pagpasabut nga gitapus ni Pablo ang iyang sulat pinaagi sa pagpasabut nga bisan og usahay mobati siya og kalaay sa iyang trabaho, ang Ginoo nag-uban kaniya ug milig-on kaniya.
Awhaga ang mga etudyante sa pagpabiling matinud-anon sa mga gikinahanglan sa Ginoo kanila.
Scripture Mastery—2 Timoteo 3:15–17
Hangyoa ang mga estudyante sa pagpilo og usa ka papel ngadto sa tulo ka bahin, nga maghimo og tulo ka kolum. Ipaukab nila ang pinilo ug ipasulat ang Doktrina sa ibabaw sa unang kolum, Pagpamadlong ug pagpanul-id [koreksyon] sa ibabaw sa ikaduhang kolum, ug pagmatuto [pagpanudlo] sa pagkamatarung sa ibabaw sa ikatulong kolum.
Dapita ang mga estudyante nga gamiton kini nga papel isip usa ka bookmark sa ilang mga kasulatan sulod sa usa ka semana, nga sulatan diha sa tukmang seksyon ang matag higayon nga nakabasa sila og kasulatan nga nagtuman sa usa niini nga mga katuyoan. Sama pananglit, ubos sa heading nga Doktrina, mahimong isulat sa mga estudyante ang mga reference sa kasulatan ug ang mga doktrina o mga baruganan nga ilang nakat-unan gikan niini nga mga bersikulo. Ubos sa heading nga Pagpamadlong ug Pagpanul-id, mahimong isulat sa mga estudyante ang mga reference sa kasulatan ug kon sa unsang paagi ang mga tudling mitul-id sa sayop nga mga ideya o sa kaugalingon nilang mga pagpili ug mga kinaiya. Ug ubos sa Pagmatuto [Pagpanudlo] sa pagkamatarung, ang mga estudyante mahimong morekord sa mga tudling nga naghatag nila og panabut kon unsa nga maayong mga buhat ang ilang mahimo.
Awhaga ang mga estudyante nga dad-on nila ang ilang mga papel sa klase sulod sa usa ka semana sa pagreport sa ilang mga kasinatian. Mahimo nimong butangan og pahinumdom diha sa imong mga kasulatan o manwal alang sa paghimo og mubo nga diskusyon sulod sa usa ka semana sa pagribyu niini nga scripture mastery passage.
Komentaryo ug Background nga Impormasyon
2 Timoteo 3:1–7. “Sa kaulahiang mga adlaw managpangabut ang mga panahon nga malisud”
Si Presidente Boyd K. Packer sa Korum sa Napulog Duha ka mga Apostoles mitudlo nga ang mga kalisud nga gipanagna diha sa 2 Timoteo 3:1–7 mao ang kasamtangang mga kahimtang nga anaa sa kalibutan karon:
“Kini nga mga bersikulo nagsilbing pasidaan, nagpakita asa nga mga sundanan ang likayan. Magmatngon gayud kita ug magkugi kanunay. Atong maribyu ang matag usa niini nga mga panagna ug sutaon nga kining tanan ug ang mga angayng kabalak-an ania sa kalibutan karon:
“Mga panahon nga malisud—karon. Nagpuyo kita sa delikadong panahon.
“Masinahon, tigpagawal, hambugiro—tanan anaa ug taliwala kanato.
“Tampalasan, masukihon sa mga ginikanan, walay igabalus, dili diosnon, walay pagbati sa paghigugma—tanan kini nagdagsang sa kalibutan.
“Dili malukmay, tigbutang-butang, ug uban pa—ang tanan maprubar base sa nagpatigbabawng ebidensya nga anaa libut kanato.” (“Ang Yawe sa Espirituhanong Panalipod,” Ensign o Liahona, Nob. 2013, 26).
Niini nga pakigpulong, gipadayon ni Presidente Packer ang pagpamatuod nga ang mga kasulatan mao ang yawe diin atong mapanalipdan ang atong kaugalingon sa malisud nga mga panahon sa katapusang mga adlaw.
2 Timoteo 3:14. “Magpadayon ka diha sa mga butang nga imong nahikat-unan ug imong ginatuohan pag-ayo”
Si Elder Paul B. Pieper sa Seventy miingon:
“Karon ang pakigbisog nagpadayon. Ang sekyular nga mga tingog nagkadaghan ug nagkakusog. Kanunay nilang giawhag ang mga tumutuo sa pagbiya sa mga gituohan nga giisip sa kalibutan nga walay katarungan ug malisud. … Kita usahay matintal sa pagbiya o pagbaliwala ug nanginahanglan og mas dakong espirituhanon nga kasiguroan. Ang Ginoo misulti kang Oliver Cowdery:
“Kon ikaw nagtinguha og dugang nga saksi, hinumdumi ang gabii nga ikaw misangpit ngari kanako diha sa imong kasingkasing, nga ikaw unta mahibalo mahitungod sa kamatuoran niini nga mga butang.
“‘Wala ba Ako magsulti og kalinaw nganha sa imong hunahuna mahitungod niini nga butang? Unsa ka labaw nga kamatuoran ang imong maangkon kay sa gikan sa Dios?’ (D&P 6:22–23).
“Ang Ginoo mipahinumdom ni Oliver ug nato sa pagsalig sa sagrado nga personal nga mga saksi nga ato nang nadawat kon hagiton ang atong pagtuo. … Kining balaan nga panagkita nagsilbi nga espirituhanong angkla nga maghimo natong luwas ug anaa sa sakto nga dalan panahon sa pagsulay” (“Huptan nga Sagrado,” Ensign o Liahona, Mayo 2012, 110–11).
2 Timoteo 4:7–8. “Natapus ko na ang akong pagdalagan sa lumba”
Si Elder Robert D. Hales sa Korum sa Napulog Duha ka mga Apostoles mihatag og paglaum sa tanan kanato sa atong mga imperpeksyon atol sa atong pakiglumba dinhi sa pagka-mortal:
“Sa kinabuhi, wala kita ipadala dinhi sa kalibutan aron lamang matawo sa pagka-mortal. Mianhi kita kauban sa usa ka misyon ug katuyoan, ug kana mao ang paglahutay hangtud sa katapusan. …
“Kon may mga sayop man sa inyong mga lakang sa pagkabatan-on, ayaw tuguti nga ang pagka-discourage mobuntog kaninyo. Ang mga paghukom sa Ginoo dili sama sa paghimo sa imong average o grado sa eskwelahan—nga ang nangaging mga sala ug mga sayop iapil og subay para sa average sa final grade. Siya misaad nga ‘siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila’ (D&P 58:42).
“Busa, kon wala kamo didto sa gusto ninyong adtoan, hukmi karon ang pag-abut didto.
“Ang atong kinabuhi hatagan og grado kon giunsa nato sa pagsunod ang mga pakigsaad nga gihimo sa atong makaluwas nga mga ordinansa—bunyag, pagdawat sa Espiritu Santo, mga paghugas, pagdihog, mga endowment, ug mga pag-seal.
“Kamo makahimo sa paglatas sa finish line kauban sa uban.
“‘Padayon ug ayaw pag-atras. Pagmaisugon, … ug sa kanunay, ngadto sa kadaugan!’ (D&P 128:22)” (“Ten Axioms to Guide Your Life,” Ensign, Peb. 2007, 29).