Leksyon sa Home-Study
Pinadayag 1–11 (Unit 31)
Materyal sa Pagpangandam alang sa Magtutudlo sa Home-Study
Summary sa mga Leksyon sa Daily Home-Study
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante dihang gitun-an nila ang Pinadayag 1–11 (unit 31) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.
Day 1 (Pinadayag 1–3)
Samtang gitun-an sa mga estudyante ang mahitungod sa pinadayag ni Apostol Juan, ilang nakat-unan nga kon mobasa kita, maningkamot sa pagsabut, ug magsunod sa mga pulong sa Ginoo, mapanalanginan kita. Gitudloan ni Juan ang mga miyembro sa Simbahan nga si Jesukristo nagbantay ug nag-atiman sa matinud-anon Niyang mga sumusunod ug nga Siya usa ka nahimayang nabanhaw nga binuhat kinsa dunay gahum batok sa kamatayon ug impyerno. Nakat-unan usab sa mga estudyante nga kon ablihan nato ang pultahan alang sa Manluluwas, mosulod Siya ug makigsalo kanato sa pagkaon.
Day 2 (Pinadayag 4–5)
Niini nga leksyon, nabasa sa mga estudyante ang mahitungod sa panan-awon ni Juan bahin sa Kordero sa Dios ug nakat-unan ang mosunod nga mga kamatuoran: Kon ilhon nato ang kahalangdon sa Langitnong Amahan, magtinguha kita sa pagsimba ug pagdayeg Kaniya. Si Jesukristo mao lamang ang bugtong takus ug makahimo sa pagtubos kanato. Kon ilhon nato ug mobati kita sa pagpasalamat sa mga butang nga nahimo sa Langitnong Amahan ug ni Jesukristo kanato, maangkon nato ang tinguha sa pagsimba ug pagdayeg Kanila.
Day 3 (Pinadayag 6–7)
Dihang nakat-unan sa mga estudyante ang mahitungod sa pito ka timri o silyo, ilang nadiskubrihan nga kon malahutay nato ang mga kalisdanan sa matinud-anong paagi ug mahimong putli pinaagi sa Pag-ula ni Jesukristo, matagamtaman nato ang celestial nga himaya uban sa Dios.
Day 4 (Pinadayag 8–11)
Naribyu sa mga estudyante ang baruganan nga nahibaloan sa day 3 nga leksyon samtang nagkat-on sila sa panan-awon ni Juan mahitungod sa pag-abli sa ikapito nga silyo.
Pasiuna
Kini nga leksyon makatabang sa mga estudyante nga masabtan unsay buhaton sa Ginoo para kanato tungod kay Siya nakaila ug nahigugma kanato. Dugang pa, kini makatabang sa mga estudyante nga mahibalo unsay angay nilang buhaton aron makaangkon og kinabuhing dayon.
Mga Sugyot alang sa Pagtudlo
Pinadayag 2–3
Gisulat ni Juan ang mga pulong ni Jesukristo ngadto sa mga lider sa pito ka simbahan
Pahinumdom: Alang sa dugang nga impormasyon mahitungod sa mga instruksyon sa Ginoo ngadto sa pito ka kongregasyon sa Simbahan, mahimo kang mo-refer ngadto sa New Testament Student Manual (manwal sa Church Educational System, 2014), 531–32.
Dapita ang usa ka estudyante sa pagbasa og kusog sa mosunod nga istorya ni Sister Sydney S. Reynolds, kanhi sakop sa kinatibuk-ang kapangulohan sa Primary. Hangyoa ang klase sa pagpaminaw kon unsay ilang makat-unan mahitungod sa Ginoo gikan niini nga istorya.
“Si Sister Gayle Clegg sa kinatibuk-ang kapangulohan sa Primary ug ang iyang bana nagpuyo sa Brazil sulod sa mga katuigan. Bag-o lang duna siyay Primary assignment sa Japan. Sa pag-abut niya sa chapel nianang Dominggo, nakamatikud siya nga sa Japanese nga mga Santos dunay usa ka taga Brazil nga pamilya. … Mga usa ka minutos siyang nakig-istorya kanila ug nakita nga madasigon kaayo ang inahan ug ang mga anak apan nakamatikud nga hilum ra ang amahan. ‘Makig-istorya ko nila inigkahuman sa miting,’ naghunahuna siya dihang dali siyang gigiyahan pag-adto sa atubang. Namulong siya gamit ang Iningles, nga gihubad ngadto sa Japanese, ug dayon naaghat sab siya nga mopamatuod gamit ang pinulungan sa Portuguese. Nagpanuko siya kay walay mga tighubad nga Portuguese, ug 98 porsyento sa mga tawo dili makasabut sa iyang gisulti.
“Human sa miting giduol siya sa Brazilian nga amahan ug miingon, ‘Sister, ang kustombre lahi kaayo dinhi, ug naguol kaayo ko. Lisud ang pag-anhi sa Simbahan ug wala kay masabtan bisan gamay. Usahay maghunahuna ko kon mas maayo ba nga magbasa na lang ko sa mga kasulatan sa balay. Miingon ko sa akong asawa, “Mohatag ko’g usa pa ka higayon,” ug mianhi ko karon sa hunahuna nga katapusan na kini nga higayon. Dihang mipamatuod ka gamit ang Portuguese nga pinulongan, gitandog sa Espiritu ang akong kasingkasing, ug nahibalo ko nga dinhi ko nahisakop. Nahibalo ang Dios nga nia ko dinhi, ug Iya kong tabangan’” (“He Knows Us; He Loves Us,” Ensign o Liahona, Nob. 2003, 76).
-
Unsa man ang atong makat-unan mahitungod sa Ginoo gikan niini nga kasinatian?
Isulat sa pisara ang dili kompleto nga mga pulong: Tungod kay nakaila ang Ginoo sa matag usa kanato … Dapita ang mga estudyante sa pagpangita sa mga kamatuoran samtang tun-an nila ang Pinadayag 2–3 nga makatabang nila sa pagsabut kon unsay mahimo sa Ginoo para nila tungod kay Siya nakaila kanila.
Ipasabut nga ang Pinadayag 2–3 naglangkob sa rekord ni Apostol Juan mahitungod sa mga pulong ni Jesukristo ngadto sa pito ka mga kongregasyon sa Simbahan sa Asia Minor (moderno nga Turkey).
Dapita ang usa ka estudyante sa pagbasa og kusog sa Pinadayag 2:1–3, 6. Hangyoa ang klase sa pagsunod, nga mangita unsay nahibaloan sa Ginoo mahitungod sa mga Santos sa Efeso.
-
Unsay nahibaloan sa Ginoo mahitungod sa mga Santos sa Efeso? (Ipasabut nga ang pulong nga Nicolaita sa bersikulo 6 nagpasabut sa usa ka grupo kansang mga sakop nangangkon nga mahimo ra silang magpakasala sa sekswal nga walay silot tungod kay ang grasya sa Dios moluwas kanila [tan-awa sa Bible Dictionary, “Nicolaitans”].)
Ipasabut nga kini nga mga bersikulo nagrekord nga ang Ginoo mipasidungog o midayeg, sa mga Santos sa maayo nilang mga buhat. Dugangi ang pamahayag diha sa pisara aron mabasa nga: Tungod kay nakaila ang Ginoo sa matag usa kanato, Siya makahatag kanato og personal nga pagdayeg …
Dapita ang usa ka estudyante sa pagbasa og kusog sa Pinadayag 2:4–5. Hangyoa ang klase sa pagsunod, nga mangita unsa pay nahibaloan sa Ginoo mahitungod sa mga Santos sa Efeso.
-
Unsa pay nahibaloan sa Ginoo mahitungod sa mga Santos sa Efeso?
Ipasabut nga ang Ginoo mihatag sa mga Santos og mga pagkorihir tungod sa ilang mga sala. Kompletuha ang pamahayag nga naa sa pisara aron maghatag kini sa mosunod nga kamatuoran nga: Tungod kay nakaila ang Ginoo sa matag usa kanato, Siya makahatag kanato og personal nga pagdayeg ug pagkorihir.
-
Unsa ang pipila ka mga paagi nga kita makadawat og personal nga pagdayeg ug pagkorihir gikan sa Ginoo? (Pinaagi sa atong personal nga pag-ampo, pagtuon sa kasulatan, tambag gikan sa mga lider sa Simbahan ug mga ginikanan, ug sa patriyarkal nga mga panalangin.)
-
Sa unsang paagi nga ang pagkahibalo nga ang Ginoo makahatag nato og personal nga pagdayeg ug pagkorihir makaimpluwensya sa pamaagi sa atong personal nga pagtuon sa kasulatan ug pag-ampo? Sa unsang paagi kini moimpluwensya sa atong pagsanong sa tambag sa atong mga lider sa Simbahan ug mga ginikanan?
-
Nganong kinahanglan man nga maningkamot kita nga mangita og personal nga pagdayeg ug pagkorihir gikan sa Ginoo?
-
Kanus-a kamo nakasinati nga ang Ginoo mihatag ninyo og personal nga pagdayeg o pagkorihir? Sa unsang paagi kini nga kasinatian nakatabang ninyo nga mahibalo nga nakaila ang Dios kaninyo sa tinagsa-tagsa? (Pasidan-i ang mga estudyante nga dili ipakigbahin ang mga kasinatian nga sagrado o pribado ra kaayo. Mahimo ka usab nga mopakigbahin og usa ka kasinatian.)
Dapita ang mga estudyante sa pagpamalandong kon unsa nga mga buhat sa ilang hunahuna hatagan sila og pagdayeg sa Ginoo ingon man unsa nga mga hunahuna o ilang mga kinaiya ang korihian sa Ginoo. Dasiga ang mga estudyante sa paghimo og tumong sa paghinulsol kon ang Ginoo mokorihir kanila.
Dapita ang usa ka estudyante sa pagbasa og kusog sa Pinadayag 2:7. Hangyoa ang klase sa pagsunod, nga mangita kon unsay gisaad sa Ginoo niadtong makabuntog, o matinud-anong makalahutay hangtud sa katapusan.
-
Unsa ang gisaad sa Ginoo niadtong makabuntog, o makalahutay hangtud sa katapusan diha sa pagkamatarung?
-
Sa inyong hunahuna unsay ipasabut sa “pagkaon sa bunga sa kahoy”? (bersikulo 7).
-
Sa unsang paagi ang pagkadungog niining gisaad nga panalangin human makadawat og personal nga pagkorihir nakatabang sa mga Santos sa Efeso?
Pahinumdumi ang mga estudyante nga agi og dugang sa pagpamulong ngadto sa kongregasyon sa Efeso, namulong ang Ginoo ngadto sa ubang mga kongregasyon sa Simbahan sa Asia Minor.
Bahina ang klase ngadto sa lima ka grupo, ug i-assign ang matag grupo og usa sa mosunod nga mga pakisayran o reference:
-
Pinadayag 2:18–29; Joseph Smith Translation, Pinadayag 2:26–27 (sa Bible appendix)
Dapita ang mga estudyante sa pagbasa sa gi-assign diha nila nga mga bersikulo isip grupo, nga mangita kon unsay gitambag sa Ginoo nga buhaton sa mga Santos ug unsay madawat nilang mga panalangin kon buhaton nila kini. Ipasabut nga si Elder Bruce R. McConkie sa Korum sa Napulog Duha ka mga Apostoles mitudlo nga “ang mana nga tinagoan” diha sa Pinadayag 2:17 mao ang “pan sa kinabuhi, ang maayo nga pulong sa Dios, ang mga doktrina mahitungod Kaniya kinsa mao ang Pan sa Kinabuhi—kining tanan gitago gikan sa kalibutanong hunahuna. Kadtong mokaon niini dili na gayud gutumon; ang kinabuhing dayon maoy ilang maangkon” (Doctrinal New Testament Commentary, 3 vols. [1965–73], 3:451).
Human sa igong panahon, ipareport sa kada grupo kon unsa ang ilang nakita. Dapita ang usa ka estudyante sa pagsulat sa pisara (ubos sa gisaad nga mga panalangin gikan sa Pinadayag 2:7) sa gisaad nga panalangin nga nahibaloan sa matag grupo (tan-awa sa Pinadayag 2:11, 17, 26; 3:5, 12). Human makompleto ang lista, ipasabut nga ang matag usa niini nga mga saad nagpasabut sa pagkadawat og mga panalangin sa kahimayaan, nga mag-agad sa matinud-anon natong paglahutay hangtud sa katapusan.
-
Unsa nga baruganan ang atong mahibaloan gikan niini nga mga bersikulo mahitungod sa angay natong buhaton aron madawat ang mga panalangin sa kahimayaan? (Tabangi ang mga estudyante nga mahibaloan nila ang baruganan nga susama sa mosunod: kon makalahutay kita, madawat nato ang mga panalangin sa kahimayaan.)
Ipasabut nga kadtong makadawat sa mga panalangin sa kahimayaan mao kadtong kinsa, pinaagi sa grasya sa Dios, makabuntog sa mga babag nga mahimong magpugong kanila sa pagbalik ngadto Kaniya. Naglakip kini sa pagkakalibutanon, mga pagsulay, sala, ug kamatayon.
Pangutan-a ang mga estudyante unsay kinahanglan nilang mabuntog sa ilang kinabuhi. Dapita sila sa pag-ampo ug pagpangayo og tabang sa Langitnong Amahan aron mabuntog ang mga babag nga maoy magpugong kanila sa pagbalik ngadto Kaniya. Ipamatuod ang gahum sa Langitnong Amahan sa pagtabang kanila nga mabuntog ang bisan unsang babag.
Sunod nga Unit (Pinadayag 12–22)
Pangutan-a ang mga estudyante kon nasulayan na ba nila ang paghunahuna mahitungod sa Katapusang Paghukom ug mga hitabo nga nahitabo sa premortal nga kinabuhi. Unsa man ang gisulat ni Apostol Juan mahitungod sa Gubat sa Langit? Pila ang gisalikway kauban ni Satanas? Unsa kaha ang anaa sa Katapusang Paghukom? Unsa ang hukman ngari kanato kon moatubang na unya kita sa Dios? Giunsa sa paghulagway ni Juan ang celestial nga katahum? Ipasabut nga samtang tun-an nila ang Pinadayag 12-22 sa mosunod nga semana, makat-unan nila ang mga tubag sa mosunod nga mga pangutana.