Leksyon 92: Mga Buhat 15

Leksyon 92

Mga Buhat 15

Pasiuna

Ang pipila ka mga miyembro sa Simbahan nga gikan sa Judea misulti sa mga kinabig nga Hentil diha sa Antioquia nga sila gikinahanglan nga masirkunsidar [matuli] aron maluwas. Gidala ni Pablo ug Bernabe ang isyu ngadto sa mga Apostoles sa Jerusalem. Atol sa hitabo nga gitawag og komperensya sa Jerusalem (mga A.D. 49–50), mipamatuod si Pedro nga ang Dios moluwas sa matinud-anon nga mga Judeo ug mga Hentil, sa walay pagsapayan kon sila ba nasirkunsidar. Mipadala og mga sulat ang mga Apostoles ngadto sa mga miyembro sa Simbahan nagpasabut nga ang sirkunsisyon [pagtuli] wala kinahanglana sa kaluwasan. Gipili ni Pablo si Silas isip iyang kauban nga misyonaryo ug misugod sa iyang ikaduha nga misyon.

Mga Sugyot alang sa Pagtudlo

Mga Buhat 15:1–29

Pinaagi sa dinasig nga tambag, si Pedro ug ang uban nga mga Apostoles mihukom nga ang sirkunsisyon wala na kinahanglana sa Ginoo

Dapita ang mga estudyante sa paghimo og lista diha sa pisara sa pipila nga importanting mga desisyon nga kinahanglan nga ilang himoon karon ug sa umaabut.

Kang kinsa ka makigsulti kon kinahanglan kang maghimo og importanting mga desisyon? Nganong makigsulti ka ngadto kanila?
Nganong maalamon ang pagpangayo og panabang sa Dios sa dili pa himoon ang mga desisyon?

Dapita ang mga estudyante sa pagpangita sa mga kamatuoran samtang sila nagtuon sa Mga Buhat 15 nga makagiya kanila kon sila magtinguha nga mahibalo sa kabubut-on sa Dios alang kanila.

Ipasabut nga samtang si Pablo ug si Bernabe namisita sa mga Santos sa Antioquia, ang pipila sa mga Judeo nga gikan sa Judea kinsa nakabig ngadto sa Kristyanismo mihimo og pipila ka mga pahayag mahitungod sa unsay gikinahanglan nga buhaton sa mga kinabig nga Hentil aron maluwas.

Dapita ang mga estudyante sa pagbasa og kusog sa Mga Buhat 15:1. Hangyoa ang klase sa pagsunod, mangita sa unsay gipahayag niining mga tawo nga gikan sa Judea nga kinahanglang buhaton sa mga kinabig nga Hentil aron maluwas.

Unsay gipahayag niini nga mga tawo nga kinahanglang buhaton sa mga kinabig nga Hentil aron maluwas?

Ipasabut nga isip kabahin sa pakigsaad nga gihimo uban ni Abraham, misugo ang Dios nga ang tanang mga lalaki kinsa misulod ngadto sa pakigsaad uban Kaniya masirkunsidar. “Ang pagtuli gihimo pinaagi sa pagputol sa ‘unod sa yamis’ sa lalaki nga mga masuso ug sa mga hamtong usab.” (Giya ngadto sa mga Kasulatan, “Pagtuli,” scriptures.lds.org). Ang sirkunsisyon gibuhat isip usa ka timailhan o pahinumdom sa pakigsaad nga gihimo sa tawo ngadto sa Dios.

Dapita ang usa ka estudyante sa pagbasa og kusog sa Mga Buhat 15:2–3. Hangyoa ang klase sa pagsunod, mangita sa unsay nahitabo human si Pablo ug si Bernabe nakadungog sa pahayag niining mga tawo nga ang mga kinabig nga Hentil gikinahanglan nga magpasirkunsidar.

Sumala sa bersikulo 2, unsa ang nahitabo sa dihang kini nga mga tawo miingon nga ang mga kinabig sa Simbahan gikinahanglan nga magpasirkunsidar?
Unsa ang gikahukman sa mga miyembro sa Simbahan sa Antioquia nga kinahanglang pagabuhaton?

Dapita ang usa ka estudyante sa pagbasa og kusog sa Mga Buhat 15:4–6. Hangyoa ang klase sa pagsunod, mangita sa unsay nahitabo sa dihang miabut si Pablo ug ang uban sa Jerusalem.

Human giistorya ni Pablo ug Bernabe ang ilang mga kasinatian kalabut sa pagpakigbahin sa ebanghelyo ngadto sa mga Hentil, unsa ang gituohan sa pipila ka mga kinabig nga mga Pariseo nga gikinahanglang pagabuhaton sa mga kinabig nga Hentil aron maluwas?
Sumala sa bersikulo 6, unsa ang gibuhat sa mga Apostoles ug sa mga elder [anciano] diha sa panagtigum?

Kopyaha ang mosunod nga mga pangutana diha sa pisara o ihatag kini ngadto sa mga estudyante nga handout:

Mga Buhat 15:7–11

Manwal sa Magtutudlo sa Seminary sa Bag-ong Tugon—Leksyon 92

Kinsa ang mibarug aron sa pagsulti?
Unsa sa imong hunahuna ang gipasabut ni Pedro sa dihang siya miingon nga ang Dios “wala maghimog kalainan tali kanato [ang nakabig nga mga Judeo] ug kanila [ang nakabig nga mga Hentil]”?
Unsa nga mga pulong diha sa mga bersikulo 8, 9, ug 11 ang nagpakita nga ang mga kinabig nga Hentil wala kinahanglana nga magpasirkunsidar aron maluwas?

Bahina ang klase ngadto sa pares. Dapita ang mga estudyante sa pagbasa sa Mga Buhat 15:7–11 uban sa ilang kapares, mangita sa mga tubag ngadto sa gilista nga mga pangutana. Sa dili pa sila mobasa, ipasabut nga ang mga pulong “sa hataas nga lantugi” diha sa bersikulo 7 nagpasabut nga ang mga Apostoles milahutay sa pakiglalis sa isyu kabahin sa sirkunsisyon.

Human sa igong panahon, dapita ang pipila ka mga estudyante sa pagreport sa ilang mga tubag ngadto sa klase. Human mitubag ang mga estudyante ngadto sa unang pangutana, pahinumdumi sila nga si Pedro mao ang unang Apostoles dinhi sa yuta ug mao, tungod niana, ang gihatagan og awtoridad sa pagsulti alang sa Ginoo.

Unsa ang usa ka paagi nga kita makahibalo sa kabubut-on sa Ginoo? (Ang mga estudyante kinahanglan nga makaila og kamatuoran nga susama sa mosunod: Kita makahibalo sa kabubut-on sa Ginoo pinaagi sa Iyang buhi nga mga propeta ug mga apostoles. Isulat kini nga kamatuoran diha sa pisara.)
Unsa ang pipila ka mga paagi nga ang buhi nga mga Apostoles nagtabang kanato nga mahibalo sa mga pagpadayag nga ilang nadawat?

Dapita ang usa ka estudyante sa pagbasa og kusog sa Mga Buhat 15:12–15. Hangyoa ang klase sa pagsunod, mangita kon giunsa pagtubag sa pundok sa mga katawhan ang pahayag ni Pedro nga ang sirkunsisyon wala kinahanglana alang sa kaluwasan.

Giunsa pagtubag sa pundok sa mga katawhan ang pahayag ni Pedro?
Unsa ang gibuhat ni Pablo ug ni Bernabe sa paghimatuod sa pahayag ni Pedro nga ang mga Hentil wala magkinahanglan nga pagasirkunsidaron?
Sumala sa bersikulo 15, kang kinsa nga mga pulong ang giingon ni Santiago nga mitakdo ang pahayag ni Pedro (Simeon)?

Mahimo nimong ipasabut nga gidumala ni Pedro ang komperensya, ug kini ingon og si Santiago adunay mahinungdanon usab nga tahas didto. Si Santiago mao ang igsoong lalaki ni Jesukristo sa inahan ug ang unang bishop sa Simbahan sa Jerusalem. I-summarize ang Mga Buhat 15:16–18 pinaagi sa pagpasabut nga gikutlo ni Santiago ang Amos 9:11–12 aron sa pagpakita nga ang pahayag ni Pedro mitakdo sa mga pulong sa mga propeta, ingon nga narekord diha sa mga kasulatan.

Pinasikad sa unsay gitudlo ni Santiago, unsa ang lain nga paagi nga kita makahibalo sa kabubut-on sa Ginoo? (Ang mga estudyante mahimong mogamit og lain-laing mga pulong, apan kinahanglan nga makaila og kamatuoran nga susama sa mosunod: Kita makahibalo sa kabubut-on sa Ginoo pinaagi sa pagtuon sa mga kasulatan. Isulat kini diha sa pisara.)

Dapita ang usa ka estudyante sa pagbasa og kusog sa Mga Buhat 15:19–20. Hangyoa ang klase sa pagsunod, mangita sa unsa ang gitambag ni Santiago nga buhaton sa mga lider sa Simbahan. Ipasabut nga ang pulong hukom diha sa bersikulo 19 nagpasabut og usa ka tanyag o rekomendasyon (tan-awa sa Bruce R. McConkie, Doctrinal New Testament Commentary, 3 bols. [1965–73], 2:143).

Unsa ang gitambag ni Santiago nga buhaton sa mga lider sa Simbahan alang sa mga Hentil? (Girekomendar ni Santiago nga ang mga lider sa Simbahan “dili pagasamokon sila” [bersikulo 19], o dili himoon ang pagsunod sa ebanghelyo nga mas malisud alang sa nakabig nga mga Hentil, ug dili pugson sila sa paghimo sa mga ritwal sa balaod ni Moises sa dili pa mopasakop sa Simbahan. Sa pagsulti niini, si Santiago nagsuporta sa desisyon nga gihatag sa una ni Pedro.)
Sumala sa bersikulo 20, unsa nga mga bahin sa balaod ni Moises nga gihunahuna ni Santiago nga ang mga kinabig nga Hentil gikinahanglan gihapon nga mosunod? (Mga gidili batok sa pagbuhat og sekswal nga sala, pagkaon og mga karne nga gihalad isip mga sakripisyo ngadto sa mga dios-dios, ug pagkaon og dugo.)

Dapita ang daghang mga estudyante sa pagpuli-pulig basa og kusog gikan sa Mga Buhat 15:22–27. Hangyoa ang klase sa pagsunod, mangita sa desisyon sa konseho.

Unsa ang desisyon sa mga Apostoles nga pagabuhaton? (Magpadala og sulat ngadto sa mga miyembro sa Simbahan nagpahayag nga ang sirkunsisyon wala kinahanglana alang sa kaluwasan.)
Ngano sa imong hunahuna ang mga Apostoles midesisyon sa pagpadala sa mga lider sa Simbahan sama ni Pablo ug ni Silas sa paghatag sa sulat? (Ang mga estudyante mahimong adunay nagkalain-laing mga tubag, apan usa ka rason mao nga aron mamatud-an nga ang pahayag nahimo pinaagi sa nagkahiusang desisyon sa mga Apostoles. Ipasabut nga ang Unang Kapangulohan ug ang Korum sa Napulog Duha ka mga Apostoles nagsunod niining sama nga mga paagi sa atong panahon aron sa paghatag og dinasig nga paggiya ngadto sa mga miyembro sa Simbahan.)
Unsa nga kamatuoran ang atong makat-unan gikan niini nga istorya mahitungod kon sa unsa nga paagi ang mga lider sa Simbahan nagdawat og inspirasyon mahitungod sa malisud nga mga problema? (Human sa tubag sa mga estudyante, isulat ang mosunod nga kamatuoran diha sa pisara: Pinaagi sa pagtinambagay ug pagpaninguha og pagpadayag gikan sa Dios, ang mga lider sa Simbahan nagdawat og inspirasyon mahitungod sa lisud nga mga problema.)

Aron tabangan ang mga estudyante sa pagsabut kon sa unsa nga paagi kini nga kamatuoran kalabut ngadto sa Simbahan karon, dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

“Kining sama nga mga sumbanan gisunod karon diha sa gipahiuli nga Simbahan ni Jesukristo. Ang Presidente sa Simbahan mahimong mopahibalo o mohubad og mga doktrina pinasikad sa pagpadayag ngadto kaniya (tan-awa, pananglit sa, D&P 138). Ang doktrinal nga pagpasabut moabut usab pinaagi sa hiniusa nga council sa Unang Kapangulohan ug sa Korum sa Napulog Duha ka mga Apostoles (tan-awa, pananglit ang, Opisyal nga Pahayag 2). Ang mga paghisgot sa konseho sa kasagaran maglakip og pagtimbang-timbang sa lagda sa mga kasulatan, sa mga pagtulun-an sa mga lider sa Simbahan, ug sa nangagi nga mga paagi. Apan sa katapusan, sama lamang sa Simbahan sa Bag-ong Tugon, ang katuyoan dili lamang ang hunahuna sa mga miyembro sa council apan sa pagpadayag gikan sa Dios. Proseso kini nga naglakip sa katarungan ug hugot nga pagtuo aron maangkon ang hunahuna ug kabubut-on sa Ginoo” (“Ang Doktrina ni Kristo,” Ensign o Liahona, Mayo 2012, 88).

Ngano sa imong hunahuna importante kini alang sa mga lider sa Simbahan ang pagtinambagay kanunay kon mangayo og pagpadayag gikan sa Dios?

Dapita ang usa ka estudyante sa pagbasa og kusog sa Mga Buhat 15:28–29. Hangyoa ang klase sa pagsunod, mangita sa unsay gisulat sa mga Apostoles ug sa mga elder diha sa sulat ngadto sa mga miyembro sa Simbahan.

Unsay gisulat sa mga Apostoles ug sa mga elder diha sa sulat ngadto sa mga miyembro sa Simbahan?
Diha sa bersikulo 28, unsa ang gipasabut sa mga pulong “sa dili pagdat-og kaninyo sa bisan unsa nga luwan gawas lamang sa pipila nga kinahanglanong butang?” (Ang mga tawo wala kinahanglana sa pagsunod og sobra nga mga kinahanglanon nga nagagikan sa mga tawo ug dili gikan sa Dios.)
Sumala sa bersikulo 28 sa unsa nga paagi ang mga Apostoles nahibalo sa kabubut-on sa Dios kalabut sa mga kinahanglanon alang sa nakabig nga mga Hentil?

Ipasabut nga ang Espiritu Santo midasig sa mga Apostoles samtang sila nagtinambagay. Mihatag usab Siya og panghimatuod nga saksi nga ang ilang desisyon husto.

Pinasikad sa kon sa unsa nga paagi ang mga lider sa Simbahan nahibalo sa kabubut-on sa Ginoo ingon nga narekord diha sa bersikulo 28, sa unsa nga paagi kita mahibalo sa kabubut-on sa Ginoo? (Ang mga estudyante mahimong mogamit og lain-laing mga pulong, apan siguroa nga ilang nasabtan nga kita makahibalo sa kabubut-on sa Ginoo pinaagi sa inspirasyon sa Espiritu Santo. Isulat kini nga kamatuoran diha sa pisara.)

Dapita ang mga estudyante sa pagtan-aw sa mga kamatuoran diha sa pisara.

Sa unsa nga paagi nga kining mga kamatuoran makatabang kanato kon kita nagkinahanglan nga mohimo og importanting desisyon?
Sumala niini nga mga kamatuoran, unsa ang atong kinahanglan nga pagabuhaton aron mahibalo sa kabubut-on sa Dios?
Kanus-a ikaw mibati nga imong nahibaloan ang kabubut-on sa Ginoo samtang imong gisunod kini nga mga kamatuoran?

Awhaga ang mga estudyante sa pagtuon sa mga pulong sa mga propeta karon ug sa mga kasulatan. Ipasabut nga samtang sila nagbuhat sa mao, mahibaloan nila ang kabubut-on sa Ginoo pinaagi sa Espiritu Santo kon maghimo og importanting mga desisyon.

Mga Buhat 15:30–41

Gihatud ni Pablo ug sa uban ang sulat sa mga Apostoles ngadto sa mga miyembro sa Antioquia

I-summarize ang Mga Buhat 15:30–41 pinaagi sa pagpasabut nga daghang mga lider sa Simbahan ang mihatud sa sulat sa mga Apostoles ngadto sa mga miyembro sa Simbahan sa Antioquia. Human magsangyaw didto sa Antioquia, gihangyo ni Pablo si Bernabe sa pag-uban kaniya sa pagduaw sa tanang mga dapit diin ilang gisangyaw ang ebanghelyo. Gusto ni Bernabe nga dad-on nila si Marcos, apan midumili si Pablo. Human sa panagbangi tali sa duha ka mga lider sa Simbahan, mihukom si Bernabe sa pagdala ni Marcos uban kaniya, busa si Pablo mipili ni Silas isip usa ka kauban sa misyon ug mipadayon sa iyang ikaduhang misyon. Ipasabut nga dili mahunahuna nga sala ang dili pag-uyon ngadto sa uban. Hinoon, kay sa mahimong mabingkilon, kinahanglan gayud nga maghiusa kitang mangita og mga solusyon sa atong dili panag-uyon. (Atong nakat-unan diha sa 2 Timoteo 4:11 nga ang problema tali ni Pablo ug ni Marcos sa kadugayan nasulbad.)

Taposa pinaagi sa pagpamatuod sa mga kamatuoran nga nailhan sa mga estudyante diha sa Mga Buhat 15.

Komentaryo ug Background nga Impormasyon

Mga Buhat 15:6. “Nanagtigum ang mga apostoles ug ang mga elder aron sa pag-usisa niining butanga”

Si Elder D. Todd Christofferson sa Korum sa Napulog Duha ka mga Apostoles mipasabut kon sa unsa nga paagi nagpadayag ang Manluluwas sa Iyang kabubut-on ngadto sa Iyang mga propeta:

“Sa unsa nga paagi nagpadayag ang Manluluwas sa Iyang kabubut-on ug doktrina ngadto sa mga propeta, mga manalagna ug mga tigpadayag? Tingali mopadala siya og mensahero o mopakita sa Iyang kaugalingon. Tingali mosulti Siya pinaagi sa Iyang kaugalingong tingog o pinaagi sa tingog sa Balaang Espiritu—usa ka komunikasyon sa Espiritu ngadto sa espiritu nga mahimong ipahayag sa mga pulong o sa mga pagbati nga nagdala og pagsabut lapas sa mga pulong (tan-awa sa 1 Nephi 17:45; D&P 9:8). Mahimong Siya Mismo motudlo ngadto sa Iyang mga sulugoon sa tinagsa o naglihok uban sa konseho (tan-awa sa 3 Nephi 27:1–8)” (“Ang Doktrina ni Kristo,” Ensign o Liahona, Mayo 2012, 87).

Mga Buhat 15:6–11. Gipahayag ni Pedro ang hunahuna sa Ginoo human ang mga Apostoles nagtinambagay

Mitudlo si Presidente Gordon B. Hinckley mahitungod sa mga desisyon sa Unang Kapangulohan ug sa Korum sa Napulog Duha ka mga Apostoles:

“Walay mga desisyon nga magagikan sa Unang Kapangulohan ug sa Korum sa Napulog Duha nga walay hingpit nga panag-uyon sa tanang may kalabutan. Sa pagsugod og hunahuna sa mga hilisgutan, mahimong adunay mga kalainan sa opinyon. Kini gipaabut. Kini nga mga tawo nagagikan sa lainlaing mga kaagi. Sila mga tawo kinsa naghunahuna alang sa ilang mga kaugalingon. Apan sa dili pa himoon ang katapusang desisyon, adunay mahimong panaghiusa sa salabutan ug sa tingog.

“Kini gipaabut kon ang gipadayag nga pulong sa Ginoo gisunod. Pag-usab nagkutlo ako gikan sa pagpadayag:

“‘Ang mga hukom niini nga mga korum, o bisan hain kanila, kinahanglan nga pagahimoon diha sa tanan nga pagkamatarung, diha sa pagkabalaan, ug pagkamapainubsanon sa kasingkasing, pagkamaaghup ug pagkamainantuson, ug diha sa hugot nga pagtuo, ug hiyas, ug kahibalo, pagkamapugnganon, pailub, pagkadiosnon, inigsoon nga pagkamabination ug gugma nga putli;

“‘Tungod kay ang saad mao, kon kini nga mga butang buhong diha kanila sila dili magkulang sa kasayuran sa Ginoo’ (D&P 107:30–31).

“Ako modugang pinaagi sa personal nga pagpamatuod nga sulod sa baynte ka tuig miserbisyo ko isip usa ka miyembro sa Konseho sa Napulog Duha ug sulod sa hapit trese ka tuig nga ako miserbisyo diha sa Unang Kapangulohan, wala gayud mahitabo nga adunay dako nga buhat nga gihimo diin kini nga pamaagi wala sunda. Nadungog ko ang lainlain nga mga opinyon nga gihan-ay niini nga mga paglantugi. Gikan gayud niini nga proseso sa mga lalaki nga nagpagula sa ilang mga hunahuna miabut ang pag-ayag ug pag-alig-ig sa mga ideya ug mga konsepto. Apan wala gayud ako makaobserbar og seryoso nga panagbangi o personal nga away taliwala sa akong mga Kaigsoonan. Ako aduna, hinoon, naobserbahan nga maanindot ug talagsaon nga butang—ang panaghiusa, ubos sa makaimpluwensya nga pagdumala sa Balaang Espiritu ug ubos sa gahum sa pagpadayag, sa nagkalainlaing mga hunahuna hangtud adunay tibuok nga panaghiusa ug hingpit nga panag-uyon. Diha lamang niana ang implimentasyon nahimo. Kana, ako mopamatuod, nagrepresentar sa espiritu sa pagpadayag nga gipakita og balik-balik sa pagdumala niining buhat sa Ginoo” (“God Is at the Helm,”Ensign, Mayo 1994, 54, 59).

Mga Buhat 15:20. “Sa mga mananap nga naluok ug sa dugo”

“Tungod kay ang balaod ni Moises nagdili sa pagkaon sa dugo (tan-awa sa Levitico 3:17; 17:10–14; 19:26), Ang tambag ni Santiago sa paglikay gikan sa ‘mga mananap nga naluok ug sa dugo’ tingali gipasabut ang paglikay sa paghatag og sala ngadto sa mga Judeo ug sa ingon magpugong sa misyonaryo nga buhat taliwala kanila” (New Testament Student Manual [manwal sa Church Educational System, 2014], 309).