Leksyon 11

Mateo 6

Pasiuna

Gipadayon ni Jesus ang Iyang Wali Ibabaw sa Bungtod. Gitudlo Niya nga ang matarung nga mga buhat sa pagpahinungod kinahanglang buhaton sa hustong hinungdan ug gipasabut nga buhaton nila kini sa pagpahimuot sa Langitnong Amahan. Gitudloan usab Niya ang Iyang mga disipulo nga tinguhaon og una ang pagtukod sa gingharian sa Dios.

Mga Sugyot alang sa Pagtudlo

Mateo 6:1–18

Ang Manluluwas mitudlo sa Iyang mga disipulo sa pagbuhat og mga matarung

Pagdala og ginagmayng premyo ngadto sa klase (sama sa mga kendi). Inig pangabut sa mga estudyante ug makita nimo silang mobuhat og maayo (sama sa pagpagawas sa ilang mga kasulatan, pag-abi-abi sa uban, o pagtabang og plano sa debosyunal), hatagi sila og premyo ug ipahibalo ang maayo nilang buhat ngadto sa klase. Ang ubang estudyante mahimong mokopya sa maayong buhat sa ilang mga higala aron makadawat og kaugalingon nilang premyo. Ipadayon ang pagpremyo sa mga estudyante hangtud sa oras nga magsugod ang klase.

Sa pagsugod sa klase, pangutan-a ang mga estudyante nganong mihimo man sila og maayong mga buhat diin sila imong gipremyuhan. Ipasabut nga sigun sa narekord sa Mateo 6, gipadayon sa Manluluwas ang Iyang Wali Ibabaw sa Bungtod ug mitudlo bahin sa lain-laing mga motibo sa usa ka tawo sa paghimo og matarung. Samtang magtuon ang mga estudyante sa Mateo 6, ipapangita nila ang mga bruganan nga makatabang nila sa paghimo og matarung para sa hustong mga hinungdan.

Dapita ang usa ka estudyante sa pagbasa og kusog sa Mateo 6:1–2. Hangyoa ang klase sa pagsunod, nga mangita sa unsay gisulti sa Manluluwas nga dili tukmang motibo sa pagbuhat og matarung. (Ipasabut nga ang paglimos mga buhat sa relihiyusong debosyon, sama sa paghatag ngadto sa kabus [tan-awa bersikulo 1].)

• Sumala niini nga mga bersikulo, ngano nga ang ubang tawo mohatag man og limos?

• Unsa ang tawag sa Manluluwas niining mga tawhana? (Mahimo nimong ipasabut nga ang pulong nga gihubad sa Gresyanhon isip mga “maut” [hipokrito] nagpasabut nga mga tigpakaaron-ingnon [tan-awa sa bersikulo 2].)

• Sa inyong hunahuna unsa ang buot ipasabut sa mga pulong nga “sila nakadawat na sa ilang balus”?

Dapita ang usa ka estudyante sa pagbasa og kusog sa Mateo 6:3–4. Hangyoa ang klase sa pagsunod, nga mangita sa unsay gitudlo sa Manluluwas kon unsaon gayud sa Iyang mga disipulo sa paghimo og matarung nga mga buhat.

• Ngano kaha nga gusto man sa Ginoo nga buhaton sa Iyang mga disipulo “diha sa tago” ang buhat sa pagserbisyo?

• Unsa nga tinguha ang buot ipakita sa tawo sa paghimo og matarung nga mga buhat sa tago? (Tinguha niya ang pagpahimuot sa Langitnong Amahan ug moserbisyo sa uban kay sa tinguha nga makita sa uban.)

• Unsa ang gisaad sa Manluluwas para sa mga mohimo og matarung nga mga buhat alang sa husto nga mga hinungdan?

Tabangi ang mga estudyante nga makakat-on unsaon sa pagkahibalo sa mga doktrina ug mga baruganan

Usa ka importanting katuyoan sa pagtuon sa mga kasulatan mao ang pagkat-on sa mga doktrina ug mga baruganan sa ebanghelyo. Ang pagkahibalo sa mga doktrina ug mga baruganan gikan sa mga kasulatan mao ang mahinungdanon sa pagtudlo ug pagkat-on sa ebanghelyo. Ang pagkat-on unsaon sa pagkahibalo niini nagkinahanglan og mahunahunaong paningkamot ug praktis. Samtang tabangan nimo nga mahibaloan sa mga estudyante ang mga doktrina ug mga baruganan, siguroha nga matabangan silang makasulti niining mga kamatuoran uban sa kaklaro ug kasayon aron masiguro nga kini ilang nasabtan.

• Unsa nga baruganan ang atong makat-unan gikan sa mga pagtulun-an sa Manluluwas bahin sa paghimo og mga buhat sa pagpahinungod? (Tabangi ang mga estudyante nga mahibaloan ang mosunod nga baruganan: Kon mopahigayon kita og mga buhat sa pagpahinungod nga makalipay sa Langitnong Amahan kay sa tinguha nga matagad sa uban, niana Siya dayag nga moganti kanato. Isulat kini nga baruganan diha sa pisara.)

• Unsa ang ipasabut niini diha ninyo nga ang Langitnong Amahan sa dayag moganti kanato?

Ipares-pares ang mga estudyante sa pagtrabaho. Dapita ang usa ka estudyante sa matag pares sa pagbasa sa Mateo 6:5–6 ug ang laing magkaparis mobasa sa Mateo 6:16–18. Dapita ang matag estudyante sa pagpangita og usa ka ehemplo nga gigamit sa Manluluwas sa paghulagway sa baruganan bahin sa paghimo og matarung nga mga buhat sa pagpahimuot sa Langitnong Amahan. Dapita sila sa pagpakigbahin sa usag usa sa unsay ilang nakat-unan. Dayon pangutan-a ang klase:

• Niining duha ka tudling [passages], asa niini nga relihiyusong mga buhat ang gipasabut ni Jesus nga kinahanglang buhaton sa tago?

Siguroha nga masabtan sa mga estudyante nga ang pag-ampo diha sa kadaghanan dili sayop gumikan lang kay wala kini buhata sa tago. Ang pag-ampo ug ubang relihiyusong mga buhat mahimong himoon sa publiko kon himoon kini uban sa sinseridad ug pagpahinungod.

• Sumala sa mga bersikulo nga gitun-an, ngano nga ang mga hipokrito mag-ampo ug magpuasa?

Mahimo nimong ipasabut nga ang mga pulong nga “magpadayag nga masulub-on” ug “magapadautdaut sa ilang mga nawong” diha sa bersikulo 16 nagtumbok sa mga tawo kinsa nagpakita nga sila nagpuasa aron sila matagad.

I-refer og usab diha sa baruganan nga naa sa pisara. Dapita ang mga estudyante sa paghunahuna sa usa ka panahon dihang mihimo sila og mga buhat sa pagpahinungod—sama sa pag-ampo ug pagpuasa—aron sa pagpahimuot sa Langitnong Amahan. Hangyoa sila sa pagpamalandong sa mga paagi nga gibati nila nga napanalanginan gumikan sa ilang sinsero nga pagsimba. Mahimo kang mohangyo og pipila ka estudyante nga mopakigbahin sa mga panalangin nga ilang nadawat, kon ganahan sila.

I-summarize ang Mateo 6:7–15 pinaagi sa pagpasabut nga ang Manluluwas mihatag og instruksyon ug sundanan para sa tukmang paagi sa pag-ampo. Ang kaugalingon Niyang ehemplo sa pag-ampo mao ang gitawag nga ang Pag-ampo sa Ginoo. Dapita ang mga estudyante sa pagribyu og kadiyot niini nga mga bersikulo nga mangita kon unsay atong makat-unan bahin sa pag-ampo gikan sa ehemplo sa Ginoo. Dapita ang mga estudyante sa pagreport sa ilang nakit-an. (Isip kabahin niini nga panaghisgot, mahimo nimong ipasabut nga ang pahimangno sa Ginoo batok sa “pagyamyam sa mga pamulong-pulong nga walay kapuslanan” wala gayud magdili sa paggamit og sama o pare-pareha nga mga pulong sa matag higayon nga kita mag-ampo. Ang Ginoo mipahimangno usab batok sa mga pag-ampo nga wala sa hunahuna, dili importante, o walay pulos. Ang atong mga pag-ampo kinahanglang may pagpaubos, kinasingkasing, ug ipahayag uban sa pagtuo.)

Mateo 6:19–24

Si Jesukristo mitudlo sa panon sa pagtigom og bahandi sa langit

Pag-display og litrato sa kahon sa bahandi. Ipasabut nga ang bahandi usa ka butang nga kanato dako og bili.

• Unsang butanga ang gikonsiderar ninyo nga usa ka bahandi?

Dapita ang usa ka estudyante sa pagbasa og kusog sa Mateo 6:19–21. Hangyoa ang klase sa pagsunod, nga mangita sa unsay gitudlo sa Manluluwas bahin sa mga bahandi.

• Unsa nga matang sa bahandi ang gitudlo sa Manluluwas sa Iyang mga disipulo nga maoy tinguhaon?

• Unsa ang gisulti sa Manluluwas nga maoy kalainan tali sa mga bahandi nga gitipigan sa yuta ug sa mga bahandi nga gitipigan sa langit?

Isulat sa pisara ang mosunod:

Mga bahandi sa yuta

Mga bahandi sa langit

Dapita ang mga estudyante sa pagduol sa pisara ug ipasulat ang mga ehemplo sa mga bahandi sa yuta ug mga bahandi sa langit.

Dapita ang usa ka estudyante sa pagbasa og kusog sa Mateo 6:22–24, ug hangyoa ang klase sa pagpangita kon unsay gitudlo sa Manluluwas nga makatabang nato nga makatigom og bahandi sa langit.

• Unsa ang gitudlo sa Manluluwas diha sa mga bersikulo 22–23 nga maoy makatabang nato sa pagtigom og bahandi sa langit? (Ipasabut nga ang Hubad ni Joseph Smith sa bersikulo 22 mabasa nga “kon ang atong mga mata bug-os ngadto sa himaya sa Dios” [sa Mateo 6:22]. Mahimo nimong pahinumduman ang mga estudyante nga ang buhat sa Dios ug himaya mao ang “pagpahinabo sa pagkaimortal ug kinabuhing dayon sa tawo” [Moises 1:39].)

• Unsaon man nato nga ang atong mga mata bug-os ngadto sa himaya sa Dios?

• Unsa ang gitudlo sa Manluluwas diha sa katapusan sa bersikulo 24 nga makatabang nato nga mahinumdom sa pagtigom og bahandi sa langit? (Kinahanglang mahibaloan sa mga estudyante ang mosunod nga kamatuoran: Dili kita makaserbisyo sa Dios ug sa bahandi. Ipasabut nga ang pulong nga mammon nagpasabut sa mga katigayunan.)

• Sa inyong hunahuna unsay ipasabut sa “pag-alagad” og katigayunan? (Pagpahimutang sa atong mga kasingkasing diha sa kalibutanong mga butang nga makapalayo kanato sa Dios.)

Sa paghulagway sa kamatuoran nga nahibaloan sa mga estudyante diha sa Mateo 6:24, i-tape ang duol sa tumoy sa duha ka drinking straw aron magdikit. I-display ang baso nga may katunga sa tubig, ug ibutang ang straw nga ang usa naa sa tubig ug ang usa sa gawas sa baso. Dapita ang usa ka estudyante nga sulayan og suyop ang tubig gamit ang mga straw. (Siguroha nga dunganon ang duha ka straw sa pagsuyop sa estudyante aron mosalir ang object lesson.) Pangutan-a ang estudyante:

• Nganong wala man ka makainom og daghang tubig?

Pangutan-a ang klase:

• Kon ang mga straw nagrepresentar kanato, unsa kaha ang girepresentaran sa tubig? (Atong mga paningkamot nga makaserbisyo sa Dios.)

• Ngano kaha nga dili man nato madungan sa pagserbisyo ang Dios ug ang bahandi? (Tan-awa usab sa Santiago 1:8.)

• Unsa ang angay natong buhaton sa mga straw aron masuyop ang tubig? Sa unsang paagi kini may kalabutan sa atong paningkamot nga makaserbisyo sa Dios?

Dapita ang mga estudyante sa pagpamalandong sa ilang mga tubag sa mosunod nga pangutana. Mahimo nimong dapiton ang mga estudyante nga irekord sa ilang mga class notebook o mga scripture study journal ang ilang mga tubag.

• Sa inyong kinabuhi, unsa ang usa ka ehemplo nga ang pagpahimutang sa inyong kasingkasing sa pagkakalibutanon makabalda sa inyong pagserbisyo sa Dios ug sa pagtigom og mga bahandi sa langit?

Mateo 6:25–34

Gisugo sa Manluluwas ang Iyang mga disipulo sa pagpangita og una sa gingharian sa Dios

I-summarize ang Mateo 6:25–34 pinaagi sa pagpasabut nga ang Manluluwas misugo sa Iyang mga disipulo sa dili kaayo pagkabalaka sa pagsangkap sa nag-una nilang panginahanglan. Ang Hubad ni Joseph Smith sa Mateo 6:25–27 makatabang sa atong pagsabut nga ang Manluluwas namulong para gayud niadtong moadto aron sa pagsangyaw sa Iyang ebanghelyo.

Dapita ang usa ka estudyante sa pagbasa og kusog sa Mateo 6:31–34. Hangyoa ang klase sa pagsunod, mangita sa unsay gitudlo sa Manluluwas sa Iyang mga disipulo nga maoy unahon sa ilang kinabuhi. (Ipasabut og tarung ang pulong gikan sa Joseph Smith Translation nga naa sa bersikulo 33, “Busa, ayaw pangitaa ang mga butang niining kalibutana apan maoy unaha ninyo pagpangita ang gingharian ug ang pagkamatarung gikan sa Dios, ug unya kining tanang mga butanga igadugang ra kaninyo.”

• Unsa ang gitudlo sa Manluluwas sa Iyang mga disipulo nga maoy unahon sa ilang kinabuhi?

• Unsa ang gisaad ni Jesukristo niadtong mga nagtinguha sa pagtukod sa gingharian sa Dios (o sa Iyang Simbahan) kay sa magtinguha sa pang-angkon sa mga butang sa kalibutan? (Human makatubag ang mga estudyante, isulat sa pisara ang mosunod nga mga baruganan: Kon kita maningkamot sa pagtukod og una sa gingharian sa Dios, Siya mopanalangin kanato sa unsay Iyang nahibaloan nga atong gikinahanglan.)

Aron matabangan ang mga estudyante nga makasabut niini nga baruganan, dapita ang usa ka estudyante sa pagbasa og kusog sa mosunod nga pamahayag ni Presidente Ezra Taft Benzon:

“Kinahanglan nga unahon nato ang Dios sa tanang butang sa atong kinabuhi. …

“Kon atong unahon ang Dios, ang tanan nga butang mapahimutang sa tukma nilang dapit o mawala kini sa atong kinabuhi. Ang atong gugma sa Ginoo modumala sa mga pangangkon sa atong pagbati, sa kapuno sa atong panahon, sa mga kaayohan nga atong gitinguha, ug sa pagpahimutang sa atong mga prayoridad.

“Kinahanglang ibutang nato og una ang Dios kay ni bisan kinsa sa atong kinabuhi” (“The Great Commandment—Love the Lord,” Ensign, Mayo 1988, 4).

• Kanus-a ka nakasinati og mga panalangin sa Langitnong Amahan dihang gitinguha nimo nga unahon Siya sa imong kinabuhi?

Ikonsiderar ang pagpakigbahin sa imong pagpamatuod sa mga panalangin nga miabut tungod kay giuna nimo ang Langitnong Amahan sa atong kinabuhi.

Dapita ang mga estudyante sa paghunahuna sa makadiyot kon sa unsang paagi kaha sila tintalon aron ang ilang kasingkasing mapahiluna sa pagkakalibutanon. Awhaga sila sa paghimo og tumong nga mabuntog kini nga tintasyon pinaagi sa pagsulat diha sa ilang mga class notebook o mga scripture study journal sa usa ka paagi unsaon nga mauna nila ang Langitnong Amahan sa ilang kinabuhi.

Komentaryo ug Background nga Impormasyon

Mateo 6:22. “Busa kon maayo ra ang imong mata”

“Ang maayo, nga gigamit niini nga bersikulo, naggikan sa pinulongan nga Gresyanhon nagpasabut nga ‘kondisyon, himsog, simpol, sinsero.’ Ang pagkahibalo niini nga pagpatin-aw [definition] makatabang nato nga makasabut sa mga sugo sa Manluluwas bahin sa paghatag og limos, pag-ampo, ug pagpuasa. Kinahanglan nga buhaton kining tanan uban sa simpol ug sinserong pag-focus ngadto sa Amahan sa Langit o sa tigdawatan. Mahimo natong ikonsiderar ang mga pangutana sama sa: Kon mohatag ko sa mga kabus, nanghinaot ba ko nga makahatag og himaya sa Dios o sa akong kaugalingon ra? Kon moserbisyo ko sa Ginoo, gibuhat ba ni nako aron madayeg sa Dios o sa tawo? Kon mag-ampo ko sa publiko, nag-ampo ba ko sa Dios o sa kongregasyon? (Tan-awa sa 2 Nephi 2:30; D&P 88:67–68; Moises 4:2; Joseph Smith—Kasaysayan 1:46)” (New Testament Student Manual [manwal sa Church Educational System, 2014], 29).

Dugang nga mga Ideya sa Pagtudlo

Mateo 6:7–15. Ang Pag-ampo sa Ginoo

Aron maandam ang mga estudyante sa padayong pagtuon sa mga pagtulun-an ni Jesukristo bahin sa pag-ampo, pangutan-a:

• Unsa nga mga pulong ang kasagarang gibalik-balik sa pag-ampo? (Isulat sa pisara ang tubag sa mga estudyante.)

Ang pahimangno sa Ginoo batok sa “pagyamyam sa mga pamulongpulong nga walay kapuslanan” wala gayud magdili sa paggamit og sama o pare-pareha nga mga pulong sa matag higayon nga kita mag-ampo. Sa ingon, dili na sayop ang kanunayng pagbalik-balik sa mga pulong kon mag-ampo. Kondili, ang importante mao ang sinseridad ug pagpahinungod diin gihatag ang pag-ampo. Ang Ginoo mipahimangno batok sa mga pag-ampo nga wala hunahunaa, dili importante, o walay pulos. Ang atong mga pag-ampo kinahanglang may pagpaubos, kinasingkasing, ug ipahayag uban sa pagtuo.

• Unsa ang peligro sa pag-ampo nga wala hunahunaa gamit ang dili importante, o walay pulos nga mga pulong sa atong mga pag-ampo?

Ipasabut nga ang Manluluwas mihatag og instruksyon og usa ka sundanan para sa hustong paagi sa pag-ampo. Ang kaugalingon Niyang ehemplo sa pag-ampo nailhan nga ang Pag-ampo sa Ginoo. Dapita ang mga estudyante nga magpuli-puli sa pagbasa og kusog sa Mateo 6:7–15. Hangyoa ang klase sa pagsunod, nga mangita sa unsay gitudlo sa Manluluwas bahin sa pag-ampo.

• Unsang piho nga mga doktrina o mga baruganan bahin sa husto nga pag-ampo ang gitudlo sa Ginoo. (Dapita ang mga estudyante sa paglista diha sa pisara sa mga doktrina ug mga baruganan nga ilang nahibaloan. Kini mahimong maglakip sa mosunod: Ang makahuluganong pag-ampo mao ang sinsero ug dili balik-balik nga pagyamyam sa mga pulong nga walay kapuslanan. Nasayud ang Langitnong Amahan sa atong panginahanglan sa wala pa kita mag-ampo. Mahimo natong sundon ang ehemplo ni Jesukristo pinaagi sa pag-ampo para matuman ang kabubut-on sa Langitnong Amahan. Madawat nato ang pagpasaylo sa Langitnong Amahan kon pilion nato ang pagpasaylo sa uban. Ang pag-ampo makahatag nato og kalig-on sa pagbatok sa mga tintasyon.)

Aron matabangan ang mga estudyante nga makasabut sa mga doktrina ug mga baruganan nga ilang nahibaloan, mahimo kang mohatag og mga follow-up question sama sa mosunod:

• Unsa man ang atong mabuhat aron malikayan ang balik-balik nga pagyamyam sa mga pulong nga walay pulos?

• Nganong kinahanglan man nga mangayo sa Langitnong Amahan sa mga butang nga atong gikinahanglan kon Siya nahibalo na sa atong gikinahanglan?

• Ngano kaha nga ang Langitnong Amahan nagkinahanglan man nga pasayloon nato ang uban sa dili pa nato madawat ang Iyang pagpasaylo?