Leksyon 51: Lucas 10:38–Lucas 12:59

Leksyon 51

Lucas 10:38–Lucas 12:59

Pasiuna

Ang Manluluwas mitudlo ni Maria ug Marta sa panimalay ni Marta. Sa wala madugay, Siya mitudlo og daghang mga kamatuoran ngadto sa Iyang mga disipulo mahitungod sa pag-ampo ug mipasidaan batok sa pagpakaaron-ingnon ug pagkamasinahon.

Mga Sugyot alang sa Pagtudlo

Lucas 10:38–42

Si Jesus nagtudlo kang Maria ug Marta

Hangyoa ang mga estudyante sa paghunahuna sa mga pagpili nga ilang gihimo kagahapon. Dapita sila sa paggahin og usa ka minuto sa paglista niadto nga mga pagpili sa labing daghan nga ilang mahimo diha sa ilang mga notebook sa klase o scripture study journal. Hangyoa ang pipila ka mga estudyante sa pagreport sa ilang maayong mga pagpili ngadto sa klase.

Unsa ang pipila ka mga sitwasyon diin kita tingali kinahanglang mopili tali sa duha ka maayo nga mga kapilian?

Samtang ang mga estudyante nagtuon sa Lucas 10:38–42, dapita sila sa pagpangita og usa ka baruganan nga gitudlo sa Manluluwas nga makagiya kanato sa atong mga desisyon—ilabi na kon sobra sa usa ang maayo natong kapilian.

Ipasabut nga human sa pagtudlo sa sambingay sa maayong Samarianhon, ang Manluluwas mibiyahe ngadto sa Betania ug mibisita sa panimalay sa usa ka babaye nga ginganlan og Marta.

Dapita ang usa ka estudyante sa pagbasa og kusog sa Lucas 10:38–40. Hangyoa ang klase sa pagsunod, nga mangita kon unsay gibuhat sa matag usa nila ni Marta ug sa iyang igsoon, si Maria, samtang ang Manluluwas diha sa panimalay.

Unsa ang gibuhat ni Maria samtang ang Manluluwas anaa sa panimalay?
Unsay gibuhat ni Marta? (Ipasabut nga ang pulong nagkalibug-libog diha sa bersikulo 40 nagpasabut nga nabug-atan.)

Ipakita ang litrato nga Si Maria ug Marta (Libro sa mga Hulagway sa Ebanghelyo [2009], nu. 45; tan-awa usab sa LDS.org). Ipasabut nga ang kamaabi-abihon importante kaayo sa panahon ni Jesus. Si Marta naningkamot sa pagbuhat sa unsay gipaabut kaniya isip tagbalay. Nakatutok siya sa temporal nga mga kabalaka sama sa pag-andam ug pagdulot sa pagkaon.

Sumala sa bersikulo 40, unsa man ang gipangutana ni Marta sa Manluluwas nga nagpakita nga siya nabalaka kabahin sa temporal nga mga butang?

Dapita ang usa ka estudyante sa pagbasa og kusog sa Lucas 10:41–42. Hangyoa ang klase sa pagsunod, nga mangita sa tubag sa Manluluwas ngadto ni Marta.

Unsa kaha ang gipasabut sa Manluluwas sa dihang Siya miingon, “Usa ra gayud ka butang ang kinahanglanon; ug hingpilian ni Maria ang maayong bahin”?

Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

“Dalaygon si Marta nga ‘nagmatngon ug nabalaka sa daghang mga butang’ (b. 41), apan ang pagkat-on sa ebanghelyo gikan sa Labing Maayong Magtutudlo mas labaw nga ‘gikinahanglan’” (“Maayo, Mas Maayo, Labing Maayo,” Ensign o Liahona, Nob. 2007, 104).

Unsa kaha ang gipasabut sa Manluluwas sa dihang Siya miingon nga ang “maayong bahin” nga gipili ni Maria “dili na makuha gikan kaniya” (Lucas 10:42)? (Pinaagi sa pagpili sa pagpaminaw ngadto sa Manluluwas kay sa magtutok sa temporal nga mga kabalaka, si Maria makadawat og espirituhanon nga mga panalangin, nga walay katapusan.)
Unsa nga baruganan ang atong makat-unan gikan sa mga pulong sa Manluluwas ngadto ni Marta? (Ang mga estudyante mahimong mosulti niini sa lahi nga paagi, apan kinahanglang mahibalo sila sa mosunod nga baruganan: Kon kita mopili sa pagpahinungod sa atong mga kaugalingon ngadto sa espirituhanon nga mga butang kay sa temporal nga mga kabalaka, nan kita makadawat og mahangturong mga panalangin.)
Unsaon nato sa pagpahinungod sa atong mga kaugalingon ngadto sa espirituhanon nga mga butang ug sa gihapon moatiman sa ubang mga butang nga “kinahanglanon” (Lucas 10:42) apan dili kaayo importante?

Dapita ang usa ka estudyante sa pagbasa og kusog sa mosunod nga pamahayag ni Elder Oaks:

“Samtang maghunahuna kita sa ubang kapilian, kinahanglan natong hinumduman nga dili tungod kay maayo ang pipila ka butang igo na ang tanan. Ang ubang mga kapilian mas maayo, ug ang uban pinakamaayo. …

“Hunahunaa giunsa nato paggamit ang atong oras diha sa mga pagpili nga atong gihimo sa pagtan-aw og telebisyon, pagdula og mga video games, pag-surf sa Internet, o sa pagbasa og mga basahon o mga magasin. Siyempre maayo ang pagtan-aw og nindot nga salida o sa pagkuha og makalingaw nga impormasyon. Apan dili tanan niana nga matang takus sa bahin sa atong kinabuhi nga atong gihatag sa pagkuha niini. Ang ubang mga butang mas maayo, ug ang uban labing maayo” (“Maayo, Mas Maayo, Labing Maayo,” 104–5).

Hangyoa ang mga estudyante sa pagribyu sa lista sa mga kapilian nga ilang gihimo kagahapon ug butangan og label ang matag positibo nga mga pagpili isip “maayo,” “mas maayo” o “labing maayo.” Pagdapit og usa o duha ka estudyante sa pagpamatuod kabahin sa unsang paagi sila napanalanginan tungod sa pag-una sa espirituhanon nga mga butang kay sa temporal nga mga kabalaka.

Lucas 11

Si Jesus nagtudlo sa Iyang mga disipulo mahitungod sa pag-ampo

Dapita ang mga estudyante sa paghunahuna nga sila full-time nga mga misyonaryo nga nagtudlo og usa ka investigator nga kadaghan na misulay sa pag-ampo ug mibati nga wala motubag ang Dios. Ang investigator naghunahuna nga moundang na sa pag-ampo.

Basi sa inyong kaugalingong mga kasinatian, unsaon kaha ninyo pagtubag niini nga mga kabalaka?

Samtang ang mga estudyante nagtuon sa Lucas 11, dapita sila sa pagpangita sa mga kamatuoran nga makatabang og tawo nga mibati nga wala motubag ang Dios sa iyang mga pag-ampo.

I-summarize ang Lucas 11:1–4 pinaagi sa pagpasabut nga human maminaw sa Manluluwas nga nag-ampo, usa sa Iyang mga disipulo nangutana kon motudlo ba Siya kanila unsaon sa pag-ampo, ug gibuhat kini sa Manluluwas.

Ipasabut nga human ang Ginoo mitudlo sa Iyang mga disipulo unsaon sa pag-ampo, migamit Siya og mga pasumbingay aron sa pagtudlo og dugang nga mga kamatuoran mahitungod sa pag-ampo, lakip ang kaandam sa Dios sa pagtubag sa mga pag-ampo.

Dapita ang mga estudyante nga magparis-paris sa pagtuon sa Lucas 11:5–13, nga mangita kon unsa ang gitudlo sa Manluluwas mahitungod sa pag-ampo. Itudlo ang mga dugang sa Joseph Smith Translation diha sa bersikulo 5 ug 13. Kini nga mga pagdugang makita diha sa Joseph Smith Translation, Luke 11:5–6 ug Joseph Smith Translation, Luke 11:14. Human sa igong panahon, pangutan-a ang klase:

Diha sa sambingay nga inyong nabasa sa mga bersikulo 5–8, unsa ang gihangyo sa usa ka higala ngadto sa usa? Ngano man?
Sa inyong hunahuna ngano kaha nga gituman man sa ikaduhang higala ang hangyo sa unang higala? (Mahimo nimong ipasabut nga ang mga pulong nga pagsigisiging hangyo diha sa bersikulo 8 nagpasabut sa kamapadayunon sa tawo sa pagpangayo bisan kon sa sinugdanan gibalibaran na siya sa iyang higala.)
Kon ang tawo nga nanginahanglan nagrepresentar kanato, ug ang iyang higala nga adunay pan nagrepresentar sa atong Amahan sa Langit, unsa man ang gisugyot sa Manluluwas nga angay natong buhaton panahon sa panginahanglan?

Isulat sa pisara ang mosunod nga dili kompleto nga pamahayag: Kon mapadayunon kita sa pag-ampo ug pagtinguha sa mga panalangin sa Langitnong Amahan sa mga panahon sa panginahanglan …

Sumala sa bersikulo 13, unsa man ang ihatag sa Langitnong Amahan niadtong mapadayunon sa pag-ampo ug pagtinguha sa Iyang mga panalangin?
Basi sa mga pagtulun-an sa Manluluwas diha sa Lucas 11:5–13, unsaon man ninyo pagkompleto ang pamahayag sa pisara? (Human makatubag ang mga estudyante, kompletuha ang pamahayag sa pisara aron mapasabut niini ang mosunod nga kamatuoran: Kon kita makanunayon sa pag-ampo ug pagtinguha sa mga panalangin sa Langitnong Amahan sa mga panahon sa panginahanglan, nan Siya motubag sa atong mga pag-ampo sa mga paagi nga labing mopanalangin kanato.)

Ikonsiderar ang pagdapit sa mga estudyante sa pagpakigbahin og mga ehemplo sa dihang nakadawat sila og mga tubag sa ilang pag-ampo samtang sila makanunayon nga nagtinguha sa mga panalangin sa Langitnong Amahan.

I-summarize ang Lucas 11:14–54 pinaagi sa pagpasabut nga si Jesus nagpagula sa yawa gikan sa usa ka tawo, mitambag sa mga katawhan sa pagpamati sa pulong sa Dios, ug nasuko sa mga Pariseo ug mga escriba tungod sa ilang espirituhanong pagkawalay alamag ug pagkadautan.

Lucas 12

Ang Manluluwas nagpasidaan batok sa pagpakaaron-ingnon ug pagkamasinahon

Basaha ang mosunod nga mga pangutana ngadto sa klase, ug dapita ang mga estudyante nga mamalandong sa hilum sa ilang mga tubag:

Nakagusto ba mo og maayo og usa ka butang nga kanunay ninyo kining gihunahuna?
Unsa ang negatibo nga mga epekto ang mahimo niini nga matang sa panghunahuna ngari kanato?

I-summarize ang Lucas 12:1–13 pinaagi sa pagpasabut nga samtang ang Manluluwas nagbarug sa atubangan sa usa ka dako nga pundok sa mga katawhan, Siya mitudlo sa Iyang mga disipulo sa pagbantay sa pagpakaaron-ingnon. Siya usab mipahinumdom kanila nga ang tanan nga tinago nga mga butang ipadayag usa ka adlaw ug nga ang Dios nakaila ug nagbantay sa Iyang mga anak. Usa ka tawo dayon mihangyo sa Manluluwas kon mahimo ba Niyang istoryahan ang igsoon sa tawo ug kumbinsihon ang igsoon nga bahinon ang panulundon uban kaniya.

Dapita ang usa ka estudyante sa pagbasa og kusog sa Lucas 12:14–15. Hangyoa ang klase sa pagsunod, nga mangita kon unsay tubag sa Manluluwas sa hangyo sa tawo.

Unsa nga pasidaan ang gihatag sa Manluluwas ngadto sa mga tawo kinsa uban Kaniya?

Ipasabut nga ang pagkadalo nagpasabut sa sobra nga pagtinguha sa usa ka butang. Isulat sa pisara ang mosunod nga kamatuoran: Ang Ginoo nagtudlo kanato nga dili magdinalo sa kalibutanong mga butang.

Nganong kinahanglan man nga ang usa ka tawo maglikay sa pagkadalo? Sa unsang paagi kini nga kamatuoran makatabang kanato sa pagpuyo og mas malipayon nga mga kinabuhi?

Ipasabut nga human ang Manluluwas misulti sa Iyang mga disipulo sa paglikay sa pagkamaibugon, Siya mihatag og usa ka sambingay aron sa paghulagway sa kaimportante niini nga sugo. Dapita ang mga estudyante sa pagbasa sa Lucas 12:16–19 sa hilum nga paagi, nga mangita kon kapila gigamit sa tawo diha sa sambingay ang mga pulong nga [a]ko ug akong. Hangyoa ang mga estudyante nga mo-report sa unsay ilang nakat-unan.

Unsa man ang gitudlo kanato sa kanunay nga paggamit sa tawo sa [a]ko ug akong mahitungod sa iyang mga kabalaka?
Sa unsang mga paagi nga kita mahimong matintal nga mahisama niini nga tawo?

Dapita ang usa ka estudyante sa pagbasa og kusog sa Lucas 12:20–21. Hangyoa ang klase sa pagsunod, nga mangita kon unsay gisulti sa Dios kabahin sa kahakog ug kamaibugon sa tawo. Hangyoa ang mga estudyante nga moreport sa unsay ilang nakat-unan.

Isulat sa pisara ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles. (Kini nga pamahayag makita sa “Ang Pinakamahinungdanon Mao ang Molungtad og Dugay,” Ensign o Liahona, Nob. 2005, 44):

“Ang pinakamahinungdanon mao ang molungtad og dugay” (Elder M. Russell Ballard).

Sa unsang mga paagi nga ang dato nga tawo diha sa sambingay napakyas sa pagtutok diha sa “pinakamahinungdanon”?
Nganong matawag man nga binuang ang binuhatan niining tawhana?

I-summarize ang Lucas 12:22–30 pinaagi sa pagpasabut nga ang Ginoo miklaro nga ang Iyang mga disipulo dili kinahanglan nga mabalaka kaayo sa ilang temporal nga mga panginahanglan.

Dapita ang usa ka estudyante sa pagbasa og kusog sa Lucas 12:31–34. Dapita siya sa pagbasa usab sa Joseph Smith Translation, Luke 12:34 (sa Luke 12:31, footnote a sa LDS English version sa Biblia). Hangyoa ang klase sa pagsunod, nga mangita kon unsay gitambag sa Manluluwas nga tinguhaon sa Iyang mga disipulo kay sa magtutok sa ilang kaugalingong hinakog nga mga tinguha.

Unsa ang gitambag ni Jesus nga tinguhaon sa Iyang mga disipulo?
Unsa ang gisaad kanila kon ilang tinguhaon ang pagtukod sa gingharian sa Dios?
Unsaon ninyo sa pag-summarize sa mga pagtulun-an sa Manluluwas diha sa Lucas 12:31–34 isip usa ka baruganan? (Ang mga estudyante mahimong mogamit sa kaugalingon nilang mga pulong, apan kinahanglang mahibalo sila sa mosunod nga baruganan: Kon kita magtinguha sa pagtukod sa gingharian sa Dios ug sa Iyang pagkamatarung, Siya motabang sa pagsangkap sa atong panginahanglan ug moandam og dapit alang kanato sa Iyang gingharian.)
Sa unsang paagi nga kita magtinguha sa pagtukod sa gingharian sa Dios? (Samtang motubag ang mga estudyante, mahimo ka nga mo-refer ngadto sa baruganan nga ilang nahibaloan sa sayo pa mahitungod sa pagpahinungod sa atong mga kaugalingon ngadto sa espirituhanon nga mga butang kay sa temporal nga mga kabalaka.)

Pagpamatuod kon sa unsang paagi ikaw napanalanginan samtang nagtinguha ka nga i-prayoridad ang espirituhanong mga butang kay sa temporal nga mga kabalaka ug sa pagtukod sa gingharian sa Dios. Awhaga ang mga estudyante sa pagpamalandong kon sila mas nakatutok ba sa espirituhanon nga mga butang o sa temporal nga mga kabalaka. Dapita sila sa pagsulat sa ilang mga notebook sa klase o scripture study journal kon unsay ilang buhaton aron mahatagan og prayoridad ang espirituhanong mga butang kay sa temporal nga mga kabalaka ug sa pagpalambo sa gingharian sa Dios.

I-summarize ang Lucas 12:35–59 pinaagi sa pagpasabut nga ang Manluluwas mitudlo sa Iyang mga sumusunod nga mangandam sa Iyang Ikaduhang Pag-anhi. Siya mitabang kanila nga makasabut nga kon “gikahatagan og daghan, pagapangayoan og daghan” (bersikulo 48), ug Siya mipasabut nga ang Iyang ebanghelyo mahimong hinungdan sa dagko nga mga pagkabahin tali sa mga katawhan.

Komentaryo ug Background nga Impormasyon

Lucas 10:38–42. “Hingpilian ni Maria ang maayong bahin”

“Ang kamaabi-abihon importante kaayo sa katilingban sa Judeo, ug ang dungog ug reputasyon sa usa ka babaye magdepende sa usa ka bahin kon unsa siya kamaayo mituman sa mga ekspektasyon sa kultura kalabut sa buluhaton sa tagbalay. Tungod niining sosyal nga mga kustumbre, ang reklamo ni Marta nga gipasagdan siya sa iyang igsoon, si Maria, nga mao ray mosilbi (tan-awa sa Lucas 10:40) makita nga makatarunganon sa daghang mga tawo niana nga panahon. Apan ang Manluluwas mitubag ngadto kang Marta pinaagi sa pagdayeg sa pagpili sa iyang igsoon: ‘Hingpilian ni Maria ang maayong bahin’ (Lucas 10:42). Usa sa mga butang nga giklaro sa tubag sa Manluluwas mao nga adunay mas taas nga mga prayoridad kay sa sosyal nga mga kustumbre, bisan kon kini maayo nga mga kustombre” (New Testament Student Manual [manwal sa Church Educational System, 2014], 160).

Dihang mireklamo si Marta, “Ginoo, wala ba ikaw magkabana nga gipasagdan man lamang niining akong igsoon nga mag-inusara ako sa pag-amoma” (Lucas 10:40), gitugutan niya ang iyang kaugalingon nga sayop nga motan-aw sa Ginoo nga wala magpakabana. Kon atong tugutan ang atong mga prayoridad nga magkahibat, mahimong magsugod kita nga adunay mga hunahuna o pagbati ngadto sa Ginoo nga dili maayo sa espirituhanong paagi. Ang malumo nga pagbadlong ni Jesus gituyo aron sa pagtabang ni Marta nga hunahunaon pag-usab ang iyang mga prayoridad ug magtinguha sa mga panalangin nga mapinanggaon Niyang gitinguha nga iyang madawat.

Lucas 10:42. Pagpili sa mas maayong bahin

Si Sister Bonnie D. Parkin, kanhi kinatibuk-ang presidente sa Relief Society, mi-refer ngadto sa istorya ni Marta ug Maria sa pagtudlo sa kaimportante sa pagpili sa maayo nga bahin:

“Ang tubag sa Manluluwas klarong nagpasabut kon unsa gayud ang labing mahinungdanon. Nianang gabhiuna sa panimalay ni Marta, ang maayong bahin wala sa kusina; naa didto sa tiilan sa Ginoo. Ang panihapon makahulat. …

“…Kitang tanan naninguha sa pagpili sa maayong bahin nga dili gayud makuha gikan kanato, aron pagbalanse sa espiritwal ug temporal sa atong kinabuhi. Dili ba kini sayon kon kita mopili lamang tali sa visiting teaching o mangawat sa banko? Hinoon, ang atong mga pagpili kasagaran dili kaayo klaro. Kinahanglang mopili kita tali sa daghang angay nga kapilian. …

“…Usa ra ka butang ang gikinahanglan, ang pagsunod Kaniya matag adlaw. Busa pilia ninyo si Kristo ang Ginoo. Pilia ang pagbusog sa Iyang pulong. Pilia ang pagsalig Kaniya nga anaa sa itaas. Pilia ang paghulat sa Iyang gugma. Pilia ang paghatag Kaniya sa tibuok ninyong kasingkasing. Busa pilia gayud kanang maayong bahin” (“Pagpili sa Gugmang Putli: Nianang Maayong Bahin,” Ensign o Liahona, Nob. 2003, 104, 106).

Lucas 11:5–10. Ang sambingay sa higala sa tungang gabii

Si Elder James E. Talmage sa Korum sa Napulog Duha ka mga Apostoles nakamatikod sa kalainan tali sa higala dinhi niini nga sambingay ug sa atong Langitnong Amahan:

“Ang leksyon sa Ginoo mao, nga kon ang tawo, uban sa iyang tanan nga kahakog ug kawalay hilig nga mohatag, mohatag na lang sa unsay gitarung og hangyo sa iyang silingan ug padayon nga gihangyo bisan pa sa pagsupak ug temporaryo nga pagbalibad, sigurado nga ang Dios mohatag sa unsay kanunay nga gipangayo diha sa hugot nga pagtuo ug uban sa matarung nga katuyoan. Walay pagkasusama tali sa hinakog nga pagbalibad sa tawo ug sa maalamon ug mahigugmaon nga paghulat sa Dios. Kinahanglan gayud nga adunay pagkaamgo sa tinud-anay nga panginahanglan alang sa pag-ampo, ug tinud-anay nga pagsalig diha sa Dios, aron mahimong epektibo ang pag-ampo; ug diha sa kalooy ang Amahan usahay molangan sa paghatag aron ang paghangyo mas kinasingkasing”(Jesus the Christ, 3rd ed. [1916], 435).