Pinadayag 20

Pasiuna

Nakita ni Juan sa panan-awon ang mga panghitabo nga mahitabo diha gayud sa dili pa ug atol sa milenyal nga paghari ni Jesukristo. Nasaksihan sab niya ang katapusang gubat tali ni Satanas ug sa mga pwersa sa Dios dapit sa katapusan sa Milenyum ug nakita ang Katapusang Paghukom, diin sa maong panahon hukman sa Dios ang tanan base sa nahisulat sa mga basahon.

Mga Sugyot alang sa Pagtudlo

Pinadayag 20:1–6

Nakita ni Juan sa panan-awon kon unsay mahitabo diha dayon sa dili pa ug atol sa milenyal nga paghari ni Jesukristo

Hangyoa ang mga estudyante sa paghunahuna og usa ka kontest o kompetisyon (sama sa artistik o atletik nga kalihokan) nga ilang giapilan bisan og nagtuo sila nga mapildi ra sila. Dayon pahunahunaa sila og usa ka panahon nga miapil sila og usa ka kontest o kompetisyon nga nagtuo sila nga modaog sila.

Sa unsang paagiha kaha nga ang inyong mga gilauman mahitungod sa resulta sa kontest o kompetisyon makausab sa paagi sa inyong paghimo niini?
Ngano kaha ang mga tawo moundang man kon magtuo sila nga mapildi na sila? Kanus-a ang panahon nga nagtuo mong mapildi na mo ug sa aktwal midaog?

Ipasabut sa mga estudyante nga samtang magtuon sila sa Pinadayag 20 makakat-on sila og dugang mahitungod sa gubat tali sa maayo ug dautan ug sa katapusang resulta sa gubat. Dapita sila sa pagpangita og mga kamatuoran samtang magtuon sila sa Pinadayag 20 nga makahatag nila og kadasig sa pagpabiling matinud-anon sa Manluluwas atol niini nga gubat.

Dapita ang usa ka estudyante sa pagbasa og kusog sa Pinadayag 20:1–3. Hangyoa ang klase sa pagsunod, nga mangita kon unsay mahitabo ni Satanas atol sa Milenyum.

Unsay mahitabo ni Satanas atol sa Milenyum? (Ipasabut nga ang bung-aw nga walay kinutuban nagrepresentar sa impyerno.)
Sumala sa bersikulo 3, unsay dili mahimo ni Satanas tungod kay ginapos siya?

Dapita ang usa ka estudyante sa pagbasa og kusog sa Pinadayag 20:4–6. Hangyoa ang klase sa pagsunod, nga mangita kon kinsay nakita ni Juan nga gihukman.

Sumala sa bersikulo 4, kinsa man ang nakita ni Juan nga gihukman?
Unsa nga ganti ang nadawat niining mga tawhana tungod sa ilang kamatinud-anon?
Unsa man ang ilang maapilan atol sa Milenyum? (Ang Unang Pagkabanhaw.)
Unsa nga baruganan ang atong makat-unan gikan sa Pinadayag 20:4–6 mahitungod sa mga panalangin nga atong madawat kon nagmatinud-anon kita kang Jesukristo? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang usa ka baruganan nga susama sa mosunod: Kon magmatinud-anon kita kang Jesukristo, makaapil kita sa Unang Pagkabanhaw ug maghari uban ni Kristo atol sa Milenyum.)

Ipasabut nga ang Unang Pagkabanhaw nagsugod sa Pagkabanhaw ni Jesukristo ug naglakip sa mga matarung nga nangamatay sa wala pa ang Pagkabanhaw ni Kristo (tan-awa sa Mosiah 15:21–25; Alma 40:16–20). Ang kadaghanan sa mga matarung nga nangamatay human sa Pagkabanhaw ni Kristo mabanhaw agig sumpay sa Ikaduhang Pag-anhi ni Jesukristo (tan-awa sa James E. Talmage, The Articles of Faith, 12th ed. [1924], 385). Ang mga dautan ug ang wala maghinulsol dili mabanhaw hangtud sa Ikaduhang Pagkabanhaw, nga mahitabo sa katapusan sa Milenyum (tan-awa sa D&P 76:85).

Sa unsang paagi ang pagkahibalo nga kamo adunay apil sa Unang Pagkabanhaw ug maghari kauban ni Jesukristo atol sa Milenyum makatabang ninyo nga magmatinud-anon sa gubat batok sa dautan karon?

Ipamatuod nga kadtong magpabiling matinud-anon mahimong kabahin sa Unang Pagkabanhaw ug maghari kauban sa Manluluwas atol sa Milenyum.

Pinadayag 20:7–11

Nakita ni Juan ang katapusang gubat tali ni Satanas ug sa mga pwersa sa Dios sa katapusan sa Milenyum

Isulat sa pisara ang mosunod nga dili kompleto nga pamahayag: Sa katapusan sa Milenyum …

Dapita ang usa ka estudyante sa pagbasa og kusog sa Pinadayag 20:7–10. Hangyoa ang klase sa pagsunod, nga mangita sa mga panghitabo nga gihulagway ni Juan nga mahitabo sa katapusan sa Milenyum.

Unsa nga mga hitabo ang gihulagway ni Juan? (Ipasabut nga ang mga ngalan nga Gog ug Magog sa bersikulo 8 nagpasabut sa mga pwersa nga gamiton ni Satanas sa katapusan sa Milenyum sa pakiggubat sa katapusang higayon batok sa mga katawhan sa Ginoo [tan-awa sa D&P 88:110–14].)
Human niini nga gubat, unsay mahitabo sa yawa ug sa iyang mga sumusunod? (Human makatubag ang mga estudyante, kompletuha ang pamahayag diha sa pisara aron mabasa kini nga sama sa mosunod: Sa katapusan sa Milenyum, ang mga pwersa sa Dios mopildi ni Satanas ug sa iyang mga sumusunod.)
Nganong importante man nga masabtan nato ang katapusang resulta sa gubat tali sa Dios ug ni Satanas?

Pinadayag 20:12–15

Nakita ni Juan ang Katapusang Paghukom

Ipasabut nga isip kabahin sa plano sa Langitnong Amahan alang sa kaluwasan, ang matag tawo nga nakapuyo sa kalibutan mobarug atubangan sa Dios aron mahukman. Hangyoa ang mga estudyante sa paghunahuna kon unsa kaha ang mahitabo sa Katapusang Paghukom.

Unsa man ang gilauman ninyong mahunahuna ug mabatyagan kon magbarug na kamo atubangan sa Dios aron mahukman?

Dapita ang usa ka estudyante sa pagbasa og kusog sa Pinadayag. Hangyoa ang klase sa pagsunod, nga mangita kon sa unsang paagiha kita hukman sa Dios.

Unsa nga kamatuoran ang atong makat-unan gikan sa bersikulo 12 kon sa unsang paagiha kita pagahukman? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga kamatuoran: Hukman kita sa Dios gikan sa mga basahon nga nahisulat sumala sa atong mga binuhatan.)
Unsa nga mga basahon ang nakita ni Juan? (Mga kasulatan, mga rekord sa Simbahan nga nagrekord sa makaluwas nga mga ordinansa ug tingali sa ubang mga binuhatan, ug ang basahon sa kinabuhi [tan-awa sa 2 Nephi 29:10–11; D&P 128:6–7].)

Dapita ang usa ka estudyante sa pagbasa og kusog sa mosunod nga pagpasabut sa basahon sa kinabuhi:

“Sa usa ka pagsabut ang basahon sa kinabuhi mao ang suma total sa mga hunahuna ug binuhatan sa usa ka tawo—ang rekord sa iyang kinabuhi. Hinoon, ang mga kasulatan nagpasabut nga usa ka langitnong rekord gihimo alang sa mga matinud-anon, kansang mga ngalan girekord, ingon man sa usa ka sugilanon sa matarung nilang mga binuhatan (D&P 88:2; 128:7)” (Ang Giya ngadto sa mga Kasulatan, “Basahon sa Kinabuhi”).

Ipasabut nga ang Ginoo mipadayag ngadto kang Propeta Joseph Smith nga agig dugang sa atong mga buhat, hukman kita sumala sa tinguha sa atong mga kasingkasing (tan-awa sa D&P 137:9; tan-awa usab sa Alma 41:3–5).

Sumala sa Pinadayag 20:13, unsa ang mahitabo sa dili pa kita hukman? (Kon gikinahanglan, ipasabut nga “ang dagat mitugyan sa mga patay nga diha niini; ang Kamatayon ug ang Hades [impyerno] mitugyan sa mga patay nga diha kanila” nagpasabut sa Pagkabanhaw sa tanang mga tawo.)
Unsa kahay kahulugan niini nga kita mabanhaw sa dili pa kita mobarug atubangan sa Dios aron hukman?

Ipamatuod nga ang matag usa kanato mobarug atubangan sa Dios aron hukman ug ang atong mga binuhatan maoy motino kon unsa nga matang kana nga kasinatian ngari kanato. Basaha og kusog ang mosunod nga mga pangutana, ug dapita ang mga estudyante sa pagtubag niini diha sa ilang mga class notebook o mga scripture study journal:

Unsay mas maayo ninyong himoon sa inyong kinabuhi aron andam sa paghukom sa Ginoo?

Scripture Mastery—Pinadayag 20:12

Ikonsiderar ang pagdapit sa mga estudyante nga gamiton ang ilang mga scripture-study tools sama sa mga footnotes sa kasulatan, sa Giya ngadto sa mga Kasulatan (nga anaa sa scriptures.lds.org), ug ang Topical Guide sa pagpangita sa dugang nga mga kasulatan nga nagtudlo mahitungod sa Katapusang Paghukom. Ang mga estudyante mahimong mosulat niining dugang nga mga pakisayran o reference sa kasulatan diha sa ilang mga kasulatan duol sa Pinadayag 20:12. Dapita ang mga estudyante nga ireport diha sa klase ang dugang nga mga kamatuoran mahitungod sa Katapusang Paghukom nga ilang nakat-unan pinaagi niini nga kalihokan.

Komentaryo ug Background nga Impormasyon

Pinadayag 20:2–3. Si Satanas gapuson

Mahitungod sa paggapos ni Satanas, si Presidente Joseph F. Smith miingon:

Si “[Satanas] gapuson pinaagi sa hugot nga pagtuo sa mga matarung ug sa mga balaod sa Labawng Makagagahum atol sa Milenyal nga paghari ug itambog ngadto sa impyerno” (From Prophet to Son: Advice of Joseph F. Smith to His Missionary Sons, comp. Hyrum M. Smith III and Scott G. Kenney [1981], 71).

Si propeta Nephi mitudlo nga tungod sa pagkamatarung sa mga Santos, si Satanas mawad-an og gahum (tan-awa sa 1 Nephi 22:26).

Si Presidente George Q. Cannon sa Unang Kapangulohan mipasabut:

“Gihisgutan nato ang mahitungod ni Satanas nga gigapos. Si Satanas gapuson pinaagi sa gahum sa Dios; apan gapuson usab siya pinaagi sa determinasyon sa mga katawhan sa Dios sa dili pagpaminaw kaniya, nga sila dili madumala kaniya” (Gospel Truth: Discourses and Writings of President George Q. Cannon, comp. Jerreld L. Newquist, 2 vols. [1957–74], 1:86).

Gitudlo ni Presidente Spencer W. Kimball nga dili kinahanglang maghulat pa kita sa Milenyum para gapuson si Satanas:

“Kon si Satanas maggapos na diha sa usa ka panimalay—kon si Satanas naggapos na diha sa usa ka kinabuhi—ang Milenyum nagsugod na diha niana nga panimalay, niana nga kinabuhi” (The Teachings of Spencer W. Kimball, ed. Edward L. Kimball [1982], 172).

Pinadayag 20:5–6. Ang Unang Pagkabanhaw

Si Elder James E. Talmage sa Korum sa Napulog Duha ka mga Apostoles misulti sa mosunod mahitungod sa Unang Pagkabanhaw:

“Ang [Unang Pagkabanhaw] gisaulog pinaagi sa pagkabanhaw ni Jesukristo; diha dayon human niana diin daghan sa mga santos ang mibangon gikan sa ilang mga lubnganan. Ang sumpay niini, ang pagkabanhaw sa mga makiangayon, nagpadayon sukad niadto, ug mas masumpayan pa sa kinatibuk-ang paagi, agig sumpay sa pag-anhi ni Kristo uban sa Iyang himaya” (The Articles of Faith, 12th ed. [1924], 385).

Si Elder Bruce R. McConkie sa Korum sa Napulog Duha ka mga Apostoles mipasabut sa duha ka managlahing paagi sa pagsabut sa termino nga Unang Pagkabanhaw:

“Alang niadtong nagpakabuhi sa wala pa ang pagkabanhaw ni Kristo, ang adlaw sa iyang pagbangon gikan sa pagkamatay nailhan nga unang pagkabanhaw. Si Abinadi ug si Alma, sila usab, mikonsiderar niini. (Mosiah 15:21–25; Alma 40.) Alang niadtong nagpakabuhi sugod niadtong adlawa, ang unang pagkabanhaw umaabut pa ug mahitabo sa Ikaduhang Pag-anhi. (D&P 88:96–102.)” (Mormon Doctrine, 2nd ed. [1966], 639).

Kadtong mobangon sa Unang Pagkabanhaw naglakip sa “tanang propeta, ug ang tanan nga mituo sa ilang mga pulong” (Mosiah 15:22), kadtong nangamatay nga walay alamag nga wala “masangyaw kanila ang kaluwasan” (Mosiah 15:24; tan-awa usab sa D&P 45:54), ug ang gagmayng mga bata kinsa namatay sa wala pa silay mga tulubagon (tan-awa sa Mosiah 15:25; Moroni 8:4–24).