Leksyon 128: 1 Mga Taga-Tesalonica 3–5

Leksyon 128

1 Mga Taga-Tesalonica 3–5

Pasiuna

Tinguha ni Apostol Pablo nga malig-on ang pagtuo sa mga miyembro sa Simbahan sa Tesalonica. Iya silang gitudloan mahitungod sa Pagkabanhaw sa mga patay sa Ikaduhang Pag-anhi ni Jesukristo ug gitudloan sila unsaon sa pagpangandam para sa Ikaduhang Pag-anhi.

Mga Sugyot alang sa Pagtudlo

1 Mga Taga-Tesalonica 3–4:12

Tinguha ni Apostol Pablo nga malig-on ang pagtuo sa mga miyembro sa Simbahan sa Tesalonica

Hatagi ang mga estudyante og usa ka kopya sa mosunod nga husto–sayop nga test mahitungod sa Ikaduhang Pag-anhi ni Jesukristo, ug hangyoa sila sa pagpili sa tubag nga husto o sayop tupad sa matag pangutana:

1 Mga Taga-Tesalonica 3–5

Manwal sa Seminary Teacher sa Bag-ong Tugon—Leksyon 128

H / S 1. Ang matinud-anong mga Santos nga mamatay sa dili pa ang Ikaduhang Pag-anhi mabanhaw hangtud sa katapusan sa Milenyum.
H / S 2. Ang matinud-anong mga Santos nga buhi pa sa Ikaduhang Pag-anhi pagasakgawon aron sa pagsugat ni Kristo sa Iyang pag-abut.
H / S 3. Ang Ikaduhang Pag-anhi mo-surprisa sa tanan sama sa kawatan sa kagabhion.

Ipasabut nga dili ka mohatag og mga tubag sa test niining puntoha apan madiskubrihan sa mga estudyante ang hustong mga tubag atol sa leksyon karon. Dapita ang mga estudyante sa pagpangita sa mga kamatuoran mahitungod sa Ikaduhang Pag-anhi ni Jesukristo samtang tun-an nila ang 1 Mga Taga-Tesalonica 3–5.

Pahinumdumi ang mga estudyante nga human masangyaw ang ebanghelyo sa mubo nga panahon didto sa Tesalonica, sila si Pablo, Silas, ug Timoteo gipugos sa pagpapahawa sa siyudad sa mga lider sa mga Judeo (tan-awa sa Mga Buhat 17:5–15). Sa wala madugay, gipadala og balik ni Pablo si Timoteo ngadto sa Tesalonica sa pagsusi sa bag-ong mga kinabig ug paglig-on sa ilang pagtuo. Sa 1 Mga Taga-Tesalonica 3:1–7, atong nakat-unan nga si Timoteo mireport ngadto ni Pablo nga ang mga Santos nagpabiling matinud-anon bisan sa nasinati nga mga pagpanggukod. Lagmit usab nga gireport ni Timoteo nga ang mga Santos dunay daghang pangutana mahitungod sa Ikaduhang Pag-anhi ni Jesukristo. Gihimo ni Pablo ang iyang sulat ngadto sa mga Santos sa Tesalonica sa pagtubag sa ilang mga pangutana.

Dapita ang usa ka estudyante sa pagbasa og kusog sa 1 Mga Taga-Tesalonica 3:9–10. Hangyoa ang klase sa pagsunod, nga mangita sa gisulti ni Pablo nga siya nag-ampo alang sa mga Santos sa Tesalonica samtang wala siya.

Unsa ang gisulti ni Pablo nga iyang giampo samtang wala siya?
Unsay ipasabut sa mga pulong nga “makasangkap sa nakulang diha sa inyong pagtuo” sa bersikulo 10? (Tinguha ni Pablo nga malig-on ang pagtuo sa mga miyembro sa Simbahan sa Tesalonica.)

Ipasabut nga usa ka paagi nga gitinguha ni Pablo aron malig-on ang pagtuo sa mga miyembro sa Simbahan sa Tesalonica mao ang pagtabang nga ila pang mas masabtan kon unsaon sa pagpangandam para sa Ikaduhang Pag-anhi. Dapita ang usa ka estudyante sa pagbasa og kusog sa 1 Mga Taga-Tesalonica 3:11–13. Hangyoa ang klase sa pagsunod, nga mangita kon unsay gipanghinaot ni Pablo nga buhaton sa Ginoo para sa mga Santos aron maandam sila para sa Iyang Ikaduhang Pag-anhi.

Unsa ang gipanghinaot ni Pablo nga buhaton sa Ginoo aron maandam ang mga Santos para sa Iyang Ikaduhang Pag-anhi?

Dapita ang usa ka estudyante sa pagbasa og kusog sa 1 Mga Taga-Tesalonica 4:1. Hangyoa ang klase sa pagsunod, nga mangita kon unsay giawhag ni Pablo nga buhaton sa mga Santos sa Tesalonica aron maandam para sa Ikaduhang Pag-anhi.

Unsa ang giawhag ni Pablo nga buhaton sa mga Santos sa Tesalonica aron maandam para sa Ikaduhang Pag-anhi?

I-assign ang matag estudyante sa klase og usa sa mosunod nga mga reference (depende sa gidak-on sa imong klase, mahimong sobra sa usa ka estudyante ang i-assign sa mao ra gihapon nga reference): 1 Mga Taga-Tesalonica 4:2–5; 4:6–8; 4:9–12. Dapita ang mga estudyante sa pagbasa sa gi-assign diha nila nga mga reference ug pagtubag sa mosunod nga mga pangutana (mahimo nga isulat nimo sa pisara kining mga pangutana):

Unsa ang giawhag ni Pablo nga buhaton sa mga Santos sa pagpahimuot sa Ginoo?
Sa unsa nga paagi kaha nga ang pagsunod sa mga pagtulun-an makatabang nila nga maandam sila para sa Ikaduhang Pag-anhi?

Human sa igo nga panahon, dapita ang pipila ka estudyante sa pagreport sa ilang mga tubag diha sa klase.

1 Mga Taga-Tesalonica 4:13–18

Gitudlo ni Pablo ang mahitungod sa Pagkabanhaw sa mga patay sa Ikaduhang Pag-anhi ni Jesukristo

I-display ang litrato sa Ang Ikaduha nga Pag-anhi (Libro sa Hulagway sa Ebanghelyo [2009], nu. 66; tan-awa usab sa LDS.org).

Ipasabut nga ang mga Santos sa Tesalonica nasayop sa pagsabut sa pihong mga aspeto sa Ikaduhang Pag-anhi. Nabalaka sila nga ang mga miyembro sa Simbahan sa Tesalonica nga mga patay na dili makasinati sa mga panalangin sa Ikaduhang Pag-anhi.

Dapita ang usa ka estudyante sa pagbasa og kusog sa 1 Mga TagaTesalonica 4:13–14, 16. Hangyoa ang klase sa pagsunod, nga mangita kon unsay gitudlo ni Pablo mahitungod sa mga Santos nga namatay sa wala pa ang Ikaduhang Pag-anhi. Ipasabut nga migamit si Pablo sa mga pulong nga nangamatay [nangatulog] ug namatay sa pag-refer ngadto sa mga patay.

Unsa nga kamatuoran ang gitudlo ni Pablo mahitungod sa matinud-anong mga Santos nga nangamatay sa wala pa ang Ikaduhang Pag-anhi? (Ang mga estudyante kinahanglang mahibalo sa mosunod nga kamatuoran: Ang matinud-anong mga Santos nga mamatay sa dili pa ang Ikaduhang Pag-anhi mabanhaw inig balik ni Kristo.)
Unsa ang buot ipasabut sa mga pulong nga “maingon man usab, sila nga mga nangamatay pagadad-on ra unya sa Dios pinaagi kang Jesus uban kaniya” sa bersikulo 14? Ang matinud-anong mga Santos nga mabanhaw sa Ikaduhang Pag-anhi pagasakgawon aron sa pagsugat ni Kristo ug mopaubos uban Kaniya sa himaya [tan-awa sa D&P 88:97–98].)

Dapita ang usa ka estudyante sa pagbasa og kusog sa 1 Mga Taga-Tesalonica 4:15–17. Hangyoa ang klase sa pagsunod, nga mangita kon unsay gitudlo ni Pablo mahitungod sa mga Santos nga buhi pa inig anhi og usab ni Kristo. Dayon dapita usab ang estudyante sa pagbasa sa Hubad ni Joseph Smith sa bersikulo 15, Ipasabut nga ang Hubad ni Joseph Smith sa bersikulo 17, miusab sa bersikulo nga mabasa nga, “Dayon sila kinsa buhi, dungan nga pagasakgawon ngadto sa mga panganod uban kanila nga nagpabilin, sa pagsugat sa Ginoo diha sa kahanginan; ug sa ingon niini kita makipag-uban sa Ginoo.”sa tanang panahon. Mahimo nimong ipasabut nga ang Hubad ni Joseph Smith mipuli sa kita niini nga bersikulo ngadto sa sila, nagpasabut nga ang Ikaduhang Pag-anhi dili mahitabo sa kapanahunan ni Pablo.

Unsa nga kamatuoran ang gitudlo ni Pablo mahitungod sa matinud-anong mga Santos nga buhi pa sa Ikaduhang Pag-anhi? (Ang mga estudyante kinahanglang mahibalo sa mosunod nga kamatuoran: Ang matinud-anong mga Santos nga buhi pa sa Ikaduhang Pag-anhi pagasakgawon aron mosugat ni Kristo sa Iyang pag-abut.)

Dapita ang mga estudyante sa pagbasa og hilum sa 1 Mga Taga-Tesalonica 4:18, nga mangita kon unsay gipanghinaot ni Pablo nga buhaton sa mga Santos sa Tesalonica human nila madungog kini nga mga kamatuoran mahitungod sa Ikaduhang Pag-anhi. Dapita ang mga estudyante sa pagreport unsay ilang nakit-an.

Unsang kahupayan ang inyong nakita niini nga mga doktrina mahitungod sa Ikaduhang Pag-anhi?

1 Mga Taga-Tesalonica 5

Gitudloan ni Pablo ang mga miyembro sa Simbahan sa Tesalonica kon unsaon sa pagpangandam para sa Ikaduhang Pag-anhi

Dapita ang usa ka estudyante sa pagbasa og kusog sa 1 Mga Taga-Tesalonica 5:1–3. Hangyoa ang klase sa pagsunod, nga mangita sa duha ka mga analohiya nga gigamit sa paghulagway kon kanus-a gayud ang panahon sa Ikaduhang Pag-anhi.

Unsa ang duha ka analohiya nga gigamit ni Pablo sa paghulagway kon kanus-a gayud ang panahon sa Ikaduhang Pag-anhi? (“Usa ka kawatan sa kagabhion” [bersikulo 2] ug “pagbati sa kasakit nga moabut sa babaye nga tali-anak” [bersikulo 3].)

Ipasabut nga ang kawatan sa kagabhion kasagaran moabut nga “dili dahumon ug walay pagpahimangno” (Bruce R. McConkie, Doctrinal New Testament Commentary, 3 vols. [1965–73], 3:54).

Sa unsang paagi ang analohiya ni Pablo mahitungod sa kawatan sa kagabhion nagtudlo nato mahitungod sa Ikaduhang Pag-anhi?
Sa unsang paagi ang analohiya ni Pablo mahitungod sa pagbati sa kasakit nga moabut sa babaye nga tali-anak nagtudlo nato mahitungod sa Ikaduhang Pag-anhi?

Human ang estudyante makatubag sa nag-unang mga pangutana, mahimo nimong ipasabut nga si Elder Bruce R. McConkie sa Korum sa Napulog Duha mitudlo sa mosunod kalabut sa analohiya sa usa ka tali-anak nga babaye: “Wala siya masayud sa oras o sa minutos kanus-a mogawas ang bata apan nahibalo siya sa gibanabana nga oras” (Doctrinal New Testament Commentary, 3:54). Base niini nga analohiya, mahimo sab natong makonsiderar sa unsang paagi ang mga pagsulay nga nag-una sa Ikaduhang Pag-anhi susama sa pagbati sa kasakit sa tali-anak nga babaye. Apan sama ka talagsaon sa pag-abut sa usa ka masuso, mao usab katalagsaon ang Ikaduhang Pag-anhi para sa mga matarung.

Dapita ang usa ka estudyante sa pagbasa og kusog sa 1 Mga Taga Tesalonica 5:4–6. Hangyoa ang klase sa pagsunod, nga mangita kon nganong ang matinud-anong mga Santos dili makalitan sa Ikaduhang Pag-anhi.

Ngano nga ang matinud-anong mga Santos dili man makalitan sa Ikaduhang Pag-anhi?
Unsay ipasabut nga mahimong “mga anak sa kahayag”? (Ang mga pulong nga “mga anak sa kahayag” diha sa bersikulo 5 nag-refer sa mga miyembro sa Simbahan kinsa “[mo]salikway sa mga buhat sa kangitngit” [Mga Taga-Roma 13:12], dunay pakig-uban sa Espiritu Santo, ug maandam para sa Ikaduhang Pag-anhi [tan-awa sa D&P 106:4–5].)
Unsa ang buot ipasabut sa “managtukaw kita ug magmahusay sa hunahuna”? (1 Mga Taga-Tesalonica 5:6).
Unsaon ninyo sa pag-summarize ang gisulti ni Pablo sa mga Santos sa Tesalonica kon unsaon sa pagpangandam para sa Ikaduhang Pag-anhi? (Gamit ang mga pulong sa mga estudyante, isulat sa pisara ang mosunod nga kamatuoran: Kon magmatinud-anon kita ug managtukaw para sa nag-unang mga timailhan sa Ikaduhang Pag-anhi ni Jesukristo, niana maandam kita sa Iyang pagbalik.)

Dapita ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith, ug hangyoa ang klase sa pagpaminaw sa unsang paagi kita maandam para sa Ikaduhang Pag-anhi:

“Ang kalibutan puno sa kalamidad ug kasamok. Ang kasingkasing sa katawhan nagapakyas kanila. Atong nakita ang mga timailhan samtang nakita nato ang mga dahon sa kahoyng igira [fig tree] nga nagpangatagak; ug nahibalo nga kining panahuna duol na, tukma kini alang kanako ug tukma alang kaninyo, ug ang tanang tawo sa ibabaw sa yuta mopatalinghug sa mga pulong ni Kristo, sa iyang mga apostoles ug managtukaw, kay kita wala masayud sa adlaw bisan sa oras” (Doctrines of Salvation, comp. Bruce R. McConkie, 3 vols. [1954–56], 3:52–53).

Sumala ni Presidente Smith, unsaon nato nga maandam para sa Ikaduhang Pag-anhi?

Dapita ang mga estudyante sa pagribyu sa husto–sayop nga mga pamahayag ug sa mga tubag nga ilang gisulat sa pagsugod sa klase.

Base sa mga kamatuoran nga inyong nakat-unan niini nga leksyon, duna ba moy gustong usbon sa inyong mga tubag? (Mga tubag: [1] Sayop, [2] Husto, [3] Sayop.)

I-summarize ang 1 Mga Taga-Tesalonica 5:7–22 pinaagi sa pagpasabut nga padayon pang gitambagan ni Pablo ang mga Santos kon unsaon nga maandam para sa Ikaduhang Pag-anhi.

Dapita ang mga estudyante sa pagbasa og hilum sa 1 Mga Taga-Tesalonica 5:12–22, nga mangita sa unsay gitambag ni Pablo nga buhaton sa mga Santos aron maandam ang ilang kaugalingon ug ang uban sa pagsugat sa Manluluwas sa Iyang Ikaduhang Pag-anhi. Awhaga ang mga estudyante sa pagpili og usa ka tipik o item sa tambag nga importante para nila. Dapita ang mga estudyante sa pagtubag sa mosunod nga mga pangutana diha sa ilang mga class notebook o mga scripture study journal. (Mahimo nga imong isulat sa pisara kining mga pangutana.)

Unsa nga tambag gikan sa 1 Mga Taga-Tesalonica 5:12–22 ang importante para nimo?
Sa unsang paagi ang pagsunod niini nga tambag makatabang ninyo ug sa uban nga maandam para sa Ikaduhang Pag-anhi?
Unsaon ninyo sa pagdasig ang usa ka tawo nga gamiton kini nga tambag sa inadlawng pagpakabuhi?

Human sa igo nga panahon, dapita ang mga estudyante sa pagreport sa ilang mga tubag ngadto sa ilang classmate.

Dapita ang usa ka estudyante sa pagbasa og kusog sa 1 Mga Taga-Tesalonica 5:23–24. Hangyoa ang klase sa pagsunod, nga mangita kon unsay gisulti ni Pablo nga buhaton sa Dios ngadto sa Iyang matinud-anong mga Santos samtang mangandam sila para sa Ikaduhang Pag-anhi.

Unsay buhaton sa Dios ngadto sa Iyang matinud-anong mga Santos samtang mangandam sila para sa Ikaduhang Pag-anhi?

Tapusa pinaagi sa pagpakigbahin sa mga kamatuoran nga gitudlo niini nga leksyon, ug dapita ang mga estudyante nga magmatinud-anon sa pagpangandam para sa Ikaduhang Pag-anhi.

Komentaryo ug Background nga Impormasyon

1 Mga Taga-Tesalonica 4:17. “Dungan nga Pagasakgawon”

“Ang Hubad ni Joseph Smith sa 1 Mga Taga-Tesalonica 4:17 mabasa: ‘Dayon sila nga buhi, dungan nga pagasakgawon ngadto sa mga panganod uban nila nga nagpabilin, sa pagsugat sa Ginoo diha sa kahanginan; ug sa ingon niini kita makipag-uban sa Ginoo sa tanang panahon’ (sa 1 Mga Taga Tesalonica 4:17). Daghang mga Kristiyanos mogamit sa pulong nga kahimuot (gikan sa Latin nga termino nga nagpasabut nga ‘gisakgaw’) kon magpaabut sa panahon diin ang mga matarung pagasakgawon sa pagsugat sa Manluluwas sa Iyang pag-anhi” (New Testament Student Manual [manwal sa Church Educational System, 2014], 450).

1 Mga Taga-Tesalonica 5:19. “Ayaw ninyo pagpalunga ang espiritu”

“Dapit sa katapusan sa 1 Mga Taga-Tesalonica, mihatag si Pablo og pipila ka mga tipik o item sa mapuslanong mga tambag kon unsaon nga makaandam para sa pag-anhi sa Ginoo (tan-awa sa 1 Mga Taga-Tesalonica 5:6–23). Isip kabahin niini nga tambag, mihangyo si Pablo sa mga Santos nga ‘ayaw ninyo pagpalunga ang Espiritu’ (1 Mga Taga-Tesalonica 5:19). Ang pagpalong sa espiritu nagpasabut nga hunungon o tapuson ang impluwensya sa Espiritu Santo sa usa ka kinabuhi sa tawo (tan-awa usab sa Mga Taga-Efeso 4:30–31). Si Elder David A. Bednar [sa Korum sa Napulog Duha ka mga Apostoles] mipasabut nga aron hingpit nga matagamtam ang pakig-uban sa Espiritu, kinahanglang maglikay kita sa mga kalihokan nga mopalayo sa Espiritu gikan kanato:

“‘Kon adunay butang nga atong mahunahuna, makita, madungog, o mabuhat nga makapalayo kanato sa Espiritu Santo, nan moundang kita sa paghunahuna, pagtan-aw, pagpaminaw, o pagbuhat sa mao nga butang. Kon kanang butang gituyo aron sa paglingaw, pananglitan, makapabulag kanato sa Balaang Espiritu, nan sigurado kana nga kalingawan dili para kanato. Tungod kay ang Espiritu dili makapuyo nianang bulgar, mahugaw, o dili ligdong, nan klaro nga ang ingon nga mga butang dili gayud para kanato. Tungod kay atong gibugaw ang Espiritu sa Ginoo kon kita mohimo og mga kalihokan nga nahibaloan nato nga dili angay, nan ang ingon nga mga butang dili gayud para kanato.

“‘… Samtang kita mahimong mas mapuno sa Espiritu sa Ginoo, kinahanglan kitang maningkamot sa pag-ila sa mga impresyon kon kini moabut ug sa mga impluwensya o panghitabo nga maoy hinungdan nga kita mopahilayo sa atong kaugalingon sa Espiritu Santo’ (‘Nga Kita Unta sa Kanunay Makabaton sa Iyang Espiritu Uban Kanato,’ Ensign o Liahona, Mayo 2006, 30)” (New Testament Student Manual [manwal sa Church Educational System, 2014], 451).

1 Mga Taga-Tesalonica 5:20–21. “Sulayi ninyo ang tanang butang; sagupa ninyo ang maayo”

Isip mga miyembro sa Simbahan, gipahimangnoan kita sa pagsusi ug pagprubar (o pagtesting) sa mga butang nga atong nabasa, nadungog, o natudlo ngari nato. Si Presidente Joseph Fielding Smith mitudlo nga matestingan nato ang matuod sa unsay atong gibasa, nadungog, o natudlo ngari nato pinaagi sa pagkumpara niini nga mga pagtulun-an sa pulong sa Dios ngadto sa mga sumbanan nga basahon (tan-awa sa Doctrines of Salvation, comp. Bruce R. McConkie, 3 vols. [1954–56], 3:203). Kon ang atong mga nabasa, nadungog, o ang natudlo ngari nato dili uyon sa mga pulong sa Dios nga naa sa mga kasulatan o sa mga pulong sa Iyang buhi nga mga propeta ug mga apostoles “nga pinasubay sa … mga sumbanan nga mga kasulatan,” nan may responsibilidad kita sa pagsalikway niini isip dili tinuod (Joseph Fielding Smith, Doctrines of Salvation, 3:203). Kon tinuod man kini, niana may responsibilidad kita sa pagsunod sa mga pagtulun-an niini.

1 Mga Taga-Tesalonica 5:22. “Likayi ninyo ang tanang dagway sa kadautan”

“Gitudlo ni Pablo sa mga Santos nga likayan ang tanang ‘dagway’ sa kadautan, o sa laing pagkasulti, gikan sa tanang ‘matang’ sa pagkadautan (1 Mga Taga-Tesalonica 5:22). Ang mga opisyal sa Simbahan migamit usab sa 1 Mga Taga-Tesalonica 5:22 sa pagtudlo nga kinahanglan kitang maglikay nga makita nga sama og naghimo kita og dautan. Sama pananglit, si Presidente James E. Faust [sa Unang Kapangulohan] mitudlo nga: ‘Ako moawhag gayud kaninyo kon duna may pangutana diha sa inyong hunahuna o kasingkasing kon ang inyong personal nga kinaiya husto ba o sayop, ayaw na kini buhata. Responsibilidad sa mga propeta sa Dios ang pagtudlo sa mga pulong sa Dios, dili ang pagpasabut sa matag detalye. Kon sa mahunahaong paagi gipaningkamutan nato nga malikayan dili lang ang dautan apan ang panagway sa kadautan, nag-aghat kita sa atong kaugalingon ug wala pagaaghata’ (‘The Devil’s Throat,’ Ensign o Liahona, May 2003, 51). Mitanyag si Pablo og susama nga tambag diha sa 1 Mga Taga-Corinto 8:9–13” (New Testament Student Manual [manwal sa Church Educational System, 2014], 451).