Leksyon 83
Mga Buhat 2
Pasiuna
Ang mga disipulo napuno sa Espiritu Santo sa adlaw sa Pentecostes ug napanalanginan sa gasa sa pagsulti og nagkalain-laing pinulongan samtang sila nagsangyaw sa ebanghelyo. Gipahayag ni Pedro nga si Jesus “Ginoo ug Kristo” (Mga Buhat 2:36) ug gidapit ang mga tawo sa paghinulsol, pagpabunyag, ug sa pagdawat sa gasa sa Espiritu Santo. Mga tulo ka libo ka mga tawo ang nakabig ug nabunyagan nianang adlawa, human diin mipadayon sila sa pagkamatinud-anon diha sa Simbahan.
Mga Sugyot alang sa Pagtudlo
Mga Buhat 2:1–13
Ang mga disipulo ni Jesukristo napuno sa Espiritu Santo sa adlaw sa Pentecostes
Hangyoa ang mga estudyante sa paghunahuna mahitungod sa labing bag-o nga opportunidad nga sila aduna sa pagpamulong sa simbahan, pagtudlo og leksyon, o pakigbahin sa ebanghelyo ngadto sa usa ka tawo.
-
Unsa ang makahagit mahitungod sa pagpamulong, pagtudlo, o pagpamatuod ngadto sa uban mahitungod sa ebanghelyo ni Jesukristo?
Dapita ang mga estudyante sa pagpangita og kamatuoran samtang sila nagtuon sa Mga Buhat 2:1–13 nga motabang kanila kon bation nila ang kabalaka o kahadlok mahitungod sa pagtudlo ug pagpamatuod ngadto sa uban mahitungod sa giphiuli nga ebanghelyo.
Ipasabut nga mga usa ka semana human misaka sa langit ang Manluluwas, ang mga Judeo gikan sa daghang mga nasud miadto sa Jerusalem sa pag-apil sa piyesta sa Pentecostes ug sa pagsimba diha sa templo ug sa pagpasalamat ngadto sa Ginoo. Kini nga piyesta nahitabo 50 ka adlaw human ang piyesta sa Pagpalabay ug gisaulog ang unang ani sa panahon (tan-awa sa Giya ngadto sa mga Kasulatan, “Pentecostes,” scriptures.lds.org).
Dapita ang usa ka estudyante sa pagbasa og kusog sa Mga Buhat 2:1–3. Hangyoa ang klase a pagsunod, mangita sa unsay nasinati sa mga disipulo ni Jesukristo sa adlaw sa Pentecostes.
-
Unsa ang nasinati sa mga disipulo sa adlaw sa Pentecostes? (Ang pagbu-bu sa Espiritu Santo.)
-
Sa unsa nga paagi kining pagbu-bu sa Espiritu Santo gihulagway?
Ipasabut nga ang mga pulong nga “dila nga daw kalayo” (bersikulo 3) nagpasabut ngadto sa mga dila nga giklabo o gisanga-sanga, o may hulagway sa siga sa kalayo. Sa karaan, ang kalayo kasagaran nga nagsimbolo sa balaang presensya o impluwensya. Kini usa ka timaan nga ang mga disipulo nakadawat sa gasa sa Espiritu Santo, nga gisaad sa Manluluwas.
Dapita ang usa ka estudyante sa pagbasa og kusog sa Mga Buhat 2:4–8. Hangyoa ang klase sa pagsunod, mangita sa unsay nahitabo samtang ang mga disipulo napuno sa Espiritu Santo.
-
Sumala sa bersikulo 4, unsay nahitabo samtang ang mga disipulo napuno sa Espiritu Santos? (Ang Espiritu “mihatag kanila og pinulongan” ug nakahimo kanila sa pagsulti sa nagkalain-laing mga pinulongan.)
-
Ngano nga ang mga Judeo gikan sa lain-laing mga nasud nahingangha sa unsay ilang nadungog?
Dapita ang mga estudyante sa pagpangita sa Mga Buhat 2:9–11 ug sa pag-ihap sa gidaghanon sa lain-laing mga grupo sa katawhan o nasyonalidad kinsa nakadungog sa mga disipulo nga nagsulti og lain-laing mga pinulongan pinaagi sa gahum sa Espiritu Santo. Hangyoa sila sa pagreport kon unsay ilang nakit-an. Ikonsiderar ang pagpakita sa kaubang mapa sa pagtabang sa mga estudyante sa pagtan-aw diin kini nga mga Judeo gikan.
Itudlo nga sumala sa bersikulo 11, ang matag usa niini nga mga grupo nakadungog sa ilang kaugalingong sinultihan sa “ang kahibulongang mga buhat sa Dios” nga gitudlo sa mga disipulo. Mahimong kinahanglan nimong ipasabut nga ang mga kinabig nga mga Hentil kinsa mipasakop sa tinuohang Judeo.
-
Ingon nga gipakita sa kasinatian sa mga disipulo sa adlaw sa Pentecostes, unsa ang makatabang kanato sa pagtudlo ug sa pagpamatuod ngadto sa uban? (Human sa tubag sa mga estudyante, isulat ang mosunod nga baruganan diha sa pisara: Samtang kita napuno sa Espiritu Santo, Siya motabang kanato sa pagtudlo ug sa pagpamatuod ngadto sa uban.)
Sa pagtabang sa mga estudyante sa pagsabut niini nga baruganan, pagdala sa klase og duha ka walay sulod nga mga tasa, usa ka pitsel sa tubig, ug usa ka tray. Ibutang ang mga tasa diha sa tray aron ang tray makapugong sa bisan unsang tubig nga mayabo. Dayon tabuni ang ibabaw sa usa sa mga tasa og piraso sa papel o tabon aron ang tubig dili mabu-bu ngadto niini, ug butangi og butang (sama sa usa ka dakong bato) ang lain nga tasa aron ang tasa hapit mapuno sa butang. Dapita ang usa ka estudyante sa pagsulay og sulod sa duha ka mga tasa og tubig gikan sa pitsel.
-
Kon ang mga tasa nagrepresentar kanato ug ang tubig nagrepresentar sa Espiritu Santo, unsa kaha ang piraso sa papel (o tabon) ug ang dakong bato nagrepresentar? Unsa nga mga pamatasan ug mga linihokan ang makapugong kanato gikan sa pagkapuno sa Espiritu Santo?
-
Unsa ang atong mabuhat nga mapuno sa Espiritu Santo aron Siya makatabang kanato sa pagtudlo ug sa pagpamatuod ngadto sa uban?
-
Sa unsa nga mga paagi ang Espiritu Santo mitabang kanimo sa pagtudlo sa ebanghelyo o sa pagpakigbahin sa imong pagpamatuod ngadto sa uban?
Pagpamatuod sa baruganan nga gisulat diha sa pisara, ug dapita ang mga estudyante sa paggamit niini nga baruganan pinaagi sa pagpaningkamot sa pakig-uban sa Espiritu Santo aron sila makatudlo ug makapagpamatuod ngadto sa uban.
I-summarize ang Mga Buhat 2:12–13 pinaagi sa pagpasabut nga pipila sa mga Judeo nahibulong sa unsay ilang nadungog, samtang ang uban mibiaybiay sa mga disipulo pinaagi sa pagpasangil kanila nga nakainom og daghang bino.
Mga Buhat 2:14–47
Si Pedro nagpamatuod ni Jesukristo ug nagtudlo kon unsaon sa pag-angkon og kaluwasan
Dapita ang usa ka estudyante sa pagbasa og kusog sa Mga Buhat 2:14, ug hangyoa ang klase sa pagpangita kon kinsa ang misugod sa pagtudlo sa pundok sa katawhan. Dapita ang mga estudyante sa pagreport unsa ang ilang nakit-an.
Hangyoa ang mga estudyante sa paghunahuna sa ilang mga kaugalingon diha sa sitwasyon ni Pedro, nagbarug atubangan sa pundok sa katawhan.
-
Kon ikaw anaa sa sitwasyon ni Pedro, unsa nga mga kamatuoran sa ebanghelyo ang imong itudlo ug ipamatuod? Ngano?
I-summarize ang Mga Buhat 2:15–35 pinaagi sa pagpasabut nga gipahayag ni Pedro nga ang mga panghitabo kabahin sa gasa sa mga pinulongan ug uban nga mga pagpaila sa Espiritu taliwala sa mga disipulo maoy usa ka katumanan ug kahulugan sa panagna ni Joel (tan-awa sa Joel 2:28–32). Dayon mitudlo ug mipamatuod si Pedro ngadto sa mga tawo gamit og pipila sa mga pulong ug mga salmo ni Haring David.
Isulat ang mosunod nga mga pakisayran ug mga pangutana sa kasulatan diha sa pisara:
Unsa ang pipila ka mga kamatuoran nga gitudlo ug gipamatuod ni Pedro?
Unsa ang molabaw kanimo mahitungod sa pagpamatuod ni Pedro ngadto sa mga Judeo?
Paris-parisa ang mga estudyante. Dapita ang matag paris sa pagtuon sa mga pakisayran nga kasulatan diha sa pisara ug hisgoti ang ilang mga tubag sa kauban nga mga pangutana. Human sa igo nga panahon, dapita ang pipila ka mga estudyante sa pagpakigbahin sa ilang mga tubag uban sa klase.
Pagpakita og usa ka hulagway nga naglarawan sa paglimud ni Pedro sa Manluluwas (sama pananglit, Paglimud ni Pedro ni Carl Heinrich Bloch, anaa sa LDS.org). Dapita ang usa ka estudyante sa pag-summarize unsay gisulti ug gibuhat ni Pedro sa dihang gipangutana mahitungod sa iyang relasyon ngadto ni Jesus nianang gabii nga ang Manluluwas gidakop.(tan-awa sa Lucas 22:54–62).
Ang Paglimud ni Pedro, ni Carl Heinrich Bloch. Gigamit pinaagi sa pagtugot sa National Historic Museum sa Frederiksborg Castle sa Hillerød, Denmark. Ayaw kopyaha.
-
Sa unsa nga paagi nga ang mga pulong ug mga lihok ni Pedro sa adlaw sa Pentecostes lahi gikan sa iyang mga pamatasan sa gabii nga ang Manunubos gidakop?
-
Unsa sa imong hunahuna ang miimpluwensya niining kausaban ni Pedro?
Dapita ang usa ka estudyante sa pagbasa og kusog sa Mga Buhat 2:37. Hangyoa ang klase sa pagsunod, mangita kon sa unsa nga paagi ang mga pulong ni Pedro nakaapekto sa pundok sa katawhan.
-
Sa unsa nga paagi ang mga pulong ni Pedro nakaapekto sa pundok sa mga katawhan?
Mahimong dapiton nimo ang mga estudyante sa pagmarka sa mga pulong “gisakitan sila sa kasingkasing.” Ipasabut nga ang Espiritu Santo mipasakit sa mga kasingkasing sa katawhan samtang ilang nadungog ang pagpamatuod ni Pedro. Ang pulong nga gisakitan dinhi nagpasabut nga “gituslok og maayo” ug nagsugyot nga ang mga tawo mibati og pagmahay tungod kay ang mga Judeo isip usa ka katawhan og nasud milansang sa ilang Ginoo, nga si Jesukristo. Si Pedro wala magsugyot nga ang grupo sa mga Judeo gikan sa nagkalain-laing nasyonalidad nga iyang gitudloan sa adlaw sa Pentecostes mao ang responsable sa Paglansang ni Jesukristo diha sa Krus.
-
Sumala sa bersikulo 37, unsay gipangutana sa mga tawo?
-
Unsay gipadayag niini nga pangutana mahitungod sa unsay nahitabo diha sa mga kasingkasing sa mga tawo? (Ang mga tawo misugod sa pagsinati og kausaban sa kasingkasing.)
Dapita ang usa ka estudyante sa pagbasa og kusog sa Mga Buhat 2:38–41. Hangyoa ang klase sa pagsunod, mangita sa unsay gitudlo ni Pedro sa mga tawo nga pagabuhaton. Ipasabut nga ang sukwahi nagpasabut nga sukol, tig-a, o hiwi.
-
Unsay gitudlo ni Pedro sa mga tawo nga pagabuhaton?
-
Sumala sa bersikulo 41, sa unsa nga paagi gitubag sa mga tawo ang mga pagtulun-an ug pagdapit ni Pedro sa paghinulsol ug pagpabunyag?
Isulat ang mosunod nga dili kompleto nga pamahayag diha sa pisara: Samtang kita nagdawat sa pulong sa Dios pinaagi sa gahum sa Espiritu Santo, …
Dapita ang pipila ka mga estudyante sa pagpuli-pulig basa og kusog sa Mga Buhat 2:42–47. Hangyoa ang klase sa pagsunod, mangita kon unsay gibuhat sa bag-ong mga nakabig sa Simbahan human nila madawat ang kamatuoran pinaagi sa gahum sa Espiritu Santo ug nabunyagan. Ipasabut nga ang mga pulong “pagpikas-pikas sa tinapay” (bersikulo 42) nagpasabut sa pag-apil diha sa ordinansa sa sacrament ug nga “gipanag-usahan sa pag-ambit ang tanang mga butang” (bersikulo 44) nagpasabut nga ang mga Santos magkahiusa ug magsunod sa balaod sa pagpahinungod.
-
Sumala niini nga mga bersikulo, unsa nga mga lihok mipakita nga kadtong kinsa gibunyagan sa tinuoray nakabig (tan-awa usab 3 Nephi 26:17–21)? (Dapita ang usa ka estudyante sa paglista sa mga tubag sa klase diha sa pisara.)
Pahinumdumi ang mga estudyante nga sa wala pa ang mga Judeo makadungog ug milihok sa mga pulong ni Pedro, wala sila midawat ni Jesus isip ilang Manluluwas, ni sila misunod sa Iyang mga pagtulun-an. Dapita sila sa pagkonsiderar sa unsa nga paagi ang mga tawo nausab.
-
Unsa nga baruganan atong makat-unan gikan sa Mga Buhat 2:37–47 mahitungod sa unsay mahimong mahitabo samtang atong madawat ang pulong sa Dios pinaagi sa gahum sa Espiritu Santo? (Gamit ang mga pulong sa mga estudyante, kompletoha ang pamahayag diha sa pisara aron kini mohatag sa mosunod nga kamatuoran: Samtang atong madawat ang pulong sa Dios pinaagi sa gahum sa Espiritu Santo, ang atong mga kasingkasing mausab ug kita makabig ngadto ni Jesukristo.)
-
Unsa ang atong mabuhat aron madawat ang pulong sa Dios pinaagi sa gahum sa Espiritu Santo?
Dapita ang mga estudyante sa pagribyu sa mga lihok nga gilista diha sa pisara niadtong kinsa gibunyagan ug nakabig.
-
Samtang kamo naninguha sa pagkat-on ug sa pagsunod sa mga kamatuoran sa ebanghelyo, giunsa sa Espiritu pagtabang kanimo sa pag-usab ug paghimong makabig ngadto ni Jesukristo? (Mahimo nimong ipakigbahin usab ang usa ka kasinatian gikan sa imong kaugalingong kinabuhi.)
Dapita ang mga estudyante sa pagpamalandong kon unsay ilang mabuhat aron mas maayo ang pagdawat sa mga pulong ug mga pagtulun-an sa Dios pinaagi sa gahum sa Espiritu Santo. Awhaga sila sa paglihok sa bisan unsa nga mga pag-aghat nga ilang madawat.
Scripture Mastery—Mga Buhat 2:36–38
Dapita ang mga estudyante sa pagtandi sa Mga Buhat 2:36–38 ngadto sa ikaupat nga artikulo sa hugot nga pagtuo. Hangyoa ang mga estudyante sa pag-ila diha sa Mga Buhat 2:36–38 sa mga pulong nga nagpakita o nagtudlo sa unang mga baruganan o mga ordinansa sa ebanghelyo. Dayon paris-parisa ang mga estudyante ug hangyoa ang matag usa nga paris sa paghisgot kon sa unsa nga paagi ang matag usa niini nga mga baruganan ug mga ordinansa nagtabang kanato sa pagdawat sa hingpit nga mga panalangin sa Pag-ula sa Manluluwas. Human sa igo nga panahon, pangutana:
-
Unsa nga panalangin ang gisulti ni Pedro nga dawaton sa mga tawo agi og resulta sa paghinulsol ug pagpabunyag?
-
Basi sa imong pagsabut sa Mga Buhat 2:38, unsa ang kinahanglan gayud natong buhaton sa pag-andam sa pagdawat sa gasa sa Espiritu Santo? (Gamit ang ilang kaugalingon nga mga pulong, ang mga estudyante kinahanglan nga makaila og kamatuoran nga susama sa mosunod: Kon kita adunay hugot nga pagtuo diha ni Jesukristo, maghinulsol, ug nabunyagan, andam kita sa pagdawat sa gasa sa Espiritu Santo. Isulat kini nga kamatuoran diha sa pisara.)
-
Sa unsa nga paagi ang hugot nga pagtuo, paghinulsol, ug bunyag nag-andaam sa usa ka tawo sa pagdawat sa gasa sa Espiritu Santo?
Komentaryo ug Background nga Impormasyon
Mga Buhat 2:1–4. “Ug sa kalit may miabut nga dahunog gikan sa langit ingon sa huros sa makusog nga hangin”
“Kining talagsaon kaayo nga kasinatian panahon sa Pentecostes, sa dihang ang Espiritu Santo nabu-bu diha sa dakong pundok sa katawhan, adunay susama nga kasaysayan sa Santos sa Ulahing mga Adlaw. Sa panahon sa paghalad nga mga serbisyo alang sa Templo sa Kirtland, si Propeta Joseph Smith … nag-ampo alang sa usa ka linain nga pagbu-bu sa Espiritu gikan sa kahitas-an: ‘Himoa nga kini matuman diha kanila, ingon kaniadto sa adlaw sa Pentecostes [Pagkunsad],’ siya nangamuyo alang sa mga Santos. ‘Himoa ang gasa sa mga pinulongan nga mabu-bu diha sa imong mga katawhan, gani ingon sa mga dila sa kalayo, ug ang pagkahubad niini. Ug himoa ang imong balay nga mapuno, ingon sa usa ka naghaguros nga kusog kaayo nga hangin, uban sa imong himaya’ (D&P 109:36–37). Kini nga pangamuyo natuman, dili lamang sa makausa, apan sa makadaghang panahon atol sa mga adlaw sunod sa unang pagpahinungod nga mga serbisyo. Girekord ni Joseph Smith nga sa usa ka higayon, ‘usa ka saba ang nadungog sama sa tingog sa usa ka naghaguros nga kusog kaayong hangin, nga mipuno sa Templo sa [Kirtland], ug ang tanang kongregasyon nagdungan og panindog, ingon nga natandog sa usa ka dili makita nga gahum; daghan ang nagsugod sa pagsulti og lain-laing pinulongan ug nanagna; ang uban nakakita og mahimayaong mga panan-awon; ug ako nakakita sa Templo nga napuno sa mga anghel, diin nga kamatuoran akong gipahayag ngadto sa kongregasyon’ (sa History of the Church, 2:428)” (New Testament Student Manual [manwal sa Church Educational System, 2014], 278).
Mga Buhat 2:3. Mga dila nga daw kalayo
Ang “mga dila nga daw kalayo” mahimo usab nga nagpaila nga kining gamhanang pagbu-bu sa Espiritu nabahin taliwala sa mga tawo nga diha nianang adlawa—matag usa kanila mibati ug nakasinati niini. Ang pulong nga pagpatong diha sa Mga Buhat 2:3 giusab ngadto sa mipuyo diha sa Joseph Smith Translation.
Mga Buhat 2:4–6. Ang gasa sa pagsulti sa lain-laing mga pinulongan
Gitudlo ni Propeta Joseph Smith ang mahitungod sa katuyoan sa gasa sa pagsulti sa lain-laing mga pinulongan:
“Ang gasa sa pagsulti sa lain-laing mga pinulongan pinaagi sa gahum sa Espiritu Santo diha sa Simbahan, alang sa kaayohan sa mga sulugoon sa Dios aron sa pagsangyaw ngadto sa mga dili tumutuo, sama sa adlaw sa Pentecostes” (Mga Pagtulun-an sa mga Presidente sa Simbahan: Joseph Smith [2007], 233).
Mga Buhat 2:16–21. Ang katumanan sa panagna ni Joel
Sa atong dispensasyon, gikutlo ni Moroni kining sama nga mga bersikulo ngadto ni propeta Joseph Smith ug gisultihan siya nga kini wala pa matuman apan hapit na mahitabo (tan-awa sa Joseph Smith—Kasaysayan 1:41). Gitudlo ni Elder Dallin H. Oaks sa Korum sa Napulog Duha ka mga Apostoles nga ang Joel 2:28–32 maoy ehemplo sa usa ka kasulatan nga mahimong adunay daghang mga kahulugan ug mga katumanan:
“Daghan sa mga panagna ug mga tudling sa doktrina diha sa mga kasulatan adunay daghang mga kahulugan. …
“[Usa] ka ehemplo sa lain-laing mga kahulugan makita sa panagna nga anaa sa basahon ni Joel nga sa katapusang mga adlaw ang Ginoo mobu-bu sa iyang espiritu diha sa tanang unod ug nga ang atong anak nga mga lalaki ug atong anak nga mga babaye magapanagna (tan-awa sa Joel 2:28). Sa adlaw sa Pentecostes, ang Apostol Pedro mipahayag nga ang mga panghitabo nga ilang nasaksihan mao kadtong ‘giingon sa propeta nga si Joel’ (Mga Buhat 2:16). Napulog walo ka gatos ka tuig ang milabay, ang anghel nga si Moroni mikutlo niining sama nga panagna ug miingon nga ‘kini wala pa matuman, apan hapit na mahitabo’ (JS—K 1:41)” (“Scripture Reading and Revelation,” Ensign, Enero. 1995, 8).
Busa, si Pedro ug si Moroni husto sa pagsulti nga ang panagna nga gihatag sa propeta nga si Joel adunay katumanan, kahulugan, ug kagamitan alang sa adlaw sa Pentecostes ug sa ulahing mga adlaw, sa tinagsa.
Mga Buhat 2:27.. “Kay dili mo man pagabiyaan ang akong kalag didto sa impiyerno [Hades]”
Kalabut sa mahangturong panulundon ni Haring David, gitudlo ni Elder Bruce R. McConkie sa Korum sa Napulog Duha ka mga Apostoles nga si David “midawat sa saad nga ang iyang kalag dili magpabilin sa impiyerno, nga mao, nga siya dili mahimong anak nga lalaki sa kapildihan, dili siya itambug sa kahangturan uban sa mga yawa ug sa iyang mga anghel. Hinoon, kon ang kamatayon ug ang impiyerno motugyan sa mga patay nga diha niini, siya mobangon gikan sa lubnganan ug modawat niana nga panulundon nga siya takus. Tan-awa sa Pin. 20:11–15” (Doctrinal New Testament Commentary, 3 vols. [1965–73], 2:39).
Acts 2:37. “Gisakitan sila sa kasingkasing”
Si Elder M. Russell Ballard sa Korum sa Napulog Duha ka mga Apostoles mitudlo:
“Ang tinuod nga pagkakabig nagagikan pinaagi sa gahum sa Espiritu. Kon ang Espiritu nagtandog sa kasinkasing, ang mga kasingkasing mausab. Kon ang mga indibidwal … mobati sa Espiritu nga nagtandog kanila, o kon ilang makita ang ebidensya sa gugma ug kapuangod sa Ginoo diha sa ilang mga kinabuhi, sila nalig-on sa espirituhanong paagi ug ang ilang hugot nga pagtuo diha Kaniya nagtubo. Kini nga mga kasinatian uban sa Espiritu sagad nga resulta kon ang usa ka tawo andam sa pagsulay sa pulong. Ingon niini ang atong bation nga ang ebanghelyo tinuod” (“Now Is the Time,” Ensign, Nob. 2000, 75).