Leksyon 87: Mga Buhat 8

Leksyon 87

Mga Buhat 8

Pasiuna

Ang pagpanggukod batok sa Simbahan didto sa Jerusalem miresulta sa pagkatibulaag sa mga miyembro sa Simbahan sa tibuok Judea ug Samaria. Si Felipe nangalagad sa Samaria, diin daghan nga mga tawo midawat sa ebanghelyo ni Jesukristo. Human itugyan ni Pedro ug Juan ang gasa sa Espiritu Santo diha sa bag-ong mga kinabig, usa ka tigsalamangka nga ginganlan og Simon misulay sa pagtanyag og salapi sa priesthood. Sa wala madugay ang Dios migiya ni Felipe ngadto sa usa ka opisyal nga Etiopiahanon kinsa gitudloan ni Felipe mahitungod ni Jesukristo ug gibunyagan.

Mga Sugyot alang sa Pagtudlo

Mga Buhat 8:1–25

Si Felipe nangalagad sa Samaria, diin si Simon ang tigsalamangka misulay sa pagtanyag og salapi sa priesthood

Pagpakita og pipila ka salapi. Hangyoa ang mga estudyante sa paghanduraw nga sila nakadawat og dakong kantidad nga salapi.

Unsa ang usa ka butang nga imong paliton sa salapi?

Ipasabut nga pipila ka mga tawo nagtuo nga ang salapi makapalit og bisan unsa. Apan, pipila sa labing bililhon nga mga butang sa kinabuhi dili mapalit. Dapita ang mga estudyante sa pagpangita samtang sila magtuon sa Mga Buhat 8 alang sa usa ka gasa gikan sa Dios nga dili mapalit.

Pahinumdumi ang mga estudyante nga diha sa Mga Buhat 7 atong makat-unan ang mahitugod sa kamatayon sa disipulo nga si Esteban diha sa mga kamot sa mga manggugukod. Dapita ang pipila ka mga estudyante sa pagpuli-pulig basa og kusog gikan sa Mga Buhat 8:1-5. Hangyoa ang klase sa pagsunod, mangita sa unsay gibuhat sa mga miyembro sa Simbahan isip resulta sa pagpanggukod batok sa Simbahan sa Jerusalem. Mahimong imong ipasabut nga ang pagtaral (Mga Buhat 8:3) nagpasabut og pagguyod o pagbitad.

Sa unsa migiya ang pagpanggukod sa buhaton sa mga miyembro sa Simbahan?

Giyahi ang atensyon sa mga estudyante ngadto sa pangalan nga Felipe diha sa bersikulo 5. Pahinumdumi ang mga estudyante nga si Felipe usa sa pito ka mga disipulo nga gi-orden sa pagtabang sa Napulog Duha ka mga Apostoles sa pagpangalagad sa mga panginahanglan sa mga miyembro sa Simbahan (tan-awa sa Mga Buhat 6:5). Hangyoa ang mga estudyante sa pagdangop ngadto sa “Kinatibuk-ang Pagpasabut sa Mga Buhat sa mga Apostoles” nga handout (tan-awa sa appendix niini nga manwal) ug pangitaa ang sugo sa Manluluwas ingon nga girekord diha sa Mga Buhat 1:8.

Sumala sa Mga Buhat 8:5, giunsa ni Felipe pagsugod og tuman ang sugo sa Manluluwas?

Dapita ang usa ka estudyante sa pagbasa og kusog sa Mga Buhat 8:6–8. Hangyoa ang klase sa pagsunod, mangita kon sa unsa nga paagi mitubag ang mga Samaritanhon ngadto sa pagsangyaw ni Felipe.

Sa unsa nga paagi kini nga mga Samaritanhon mitubag sa pagsangyaw ni Felipe?
Agi og dugang sa pagsangyaw sa ebanghelyo, unsa nga laing mga buhat ang gihimo ni Felipe?

Dapita ang usa ka estudyante sa pagbasa og kusog sa Mga Buhat 8:9–11. Hangyoa ang klase sa pagsunod ug mangita sa paghulagway sa usa ka Samaritanhon nga ginganlan og Simon.

Unsa ang atong makat-unan mahitungod ni Simon gikan niini nga mga bersikulo? (Ipasabut nga ang “paggamit og gahum nga naangkon gikan sa pagtabang o pagpugong sa dautang mga espiritu gitawag og salamangka” [Bruce R. McConkie, Doctrinal New Testament Commentary, 3 bols. (1965–73), 2:82].)
Unsa nga impluwensya aduna si Simon diha sa mga tawo?

Dapita ang usa ka estudyante sa pagbasa og kusog sa Mga Buhat 8:12–13. Hangyoa ang klase sa pagsunod, mangita kon sa unsa nga paagi mitubag si Simon ngadto sa pagsangyaw ni Felipe. Hangyoa ang mga estudyante sa pagreport unsa ang ilang nakit-an.

Sumala sa bersikulo 13, sa unsa nga paagi naapektuhan si Simon sa “mga milagro ug mga ilhanan” nga iyang nakita?

I-summarize ang Mga Buhat 8:14–16 pinaagi sa pagpasabut nga si Pedro ug si Juan miadto sa Samaria human makabati nga ang mga tawo didto midawat sa pulong sa Dios. Sila nag-ampo nga ang mga kinabig nga mga Samaritanhon modawat sa gasa sa Espiritu Santo.

Hangyoa ang mga estudyante sa pagbasa sa hilum sa Mga Buhat 8:17, mangita sa unsay gibuhat ni Pedro ug ni Juan alang sa bag-o nga mga miyembro sa Simbahan sa Samaria.

Unsa ang atong makat-unan gikan niini nga istorya mahitungod sa unsaon paghatag sa gasa sa Espiritu Santo? (Human motubag ang mga estudyante, isulat ang mosunod nga doktrina diha sa pisara: Ang gasa sa Espiritu Santo gihatag human sa bunyag pinaagi sa pagpandong sa mga kamot sa gihatagan og awtoridad nga mga tighupot sa priesthood.)

Dapita ang usa ka estudyante sa pagbasa og kusog sa Mga Buhat 8:18–19. Hangyoa ang klase sa pagsunod, mangita sa tanyag nga gihimo ni Simon ngadto ni Pedro.

Unsa nga tanyag ang gihimo ni Simon ngadto ni Pedro?

Ipakita sa mga estudyante ang salapi nga imong gipasundayag sa sinugdanan sa leksyon. Dapita sila sa paghunahuna kon sa unsa nga paagi sila motubag ngadto ni Simon kon sila anaa sa kahimtang ni Pedro.

Dapita ang pipila ka mga estudyante sa pagpuli-pulig basa og kusog gikan sa Mga Buhat 8:20–24. Hangyoa ang klase sa pagsunod, mangita sa unsay gitudlo ni Pedro ngadto ni Simon mahitungod sa pagdawat sa priesthood.

Unsa ang gitudlo ni Pedro ngadto ni Simon mahitungod sa priesthood, ingon nga girekord diha sa bersikulo 20?
Sa diha nga siya mitanyag sa mga Apostoles og salapi agi og ilis alang sa pagdawat sa priesthood, unsa ang wala masabti ni Simon mahitungod sa priesthood? (Tungod kay ang priesthood iya sa Dios, kini ikatugyan lamang sumala sa Iyang kabubut-on. Ang Dios mipahimutang sa paagi nga ang priesthood mahimong maangkon.)
Sumala sa mga bersikulo 21–23, ngano nga si Simon dili pa makadawat sa priesthood? Sa unsa nga mga paagi sa imong hunahuna ang kasingkasing ni Simon “dili matarung sa atubangan sa Dios”? (bersikulo 21).
Unsa ang atong makat-unan gikan niini nga istorya mahitungod sa pagdawat sa priesthood? (Ang mga estudyante mahimong mogamit og lain-laing mga pulong, apan siguroa nga ilang mailhan ang mosunod nga kamatuoran: Ang priesthood gitugyan sumala sa kabubut-on sa Dios ug sa sumbanan sa katakus. Isulat kini nga kamatuoran diha sa pisara.)
Ngano sa imong hunahuna kini importante nga mahibalo nga ang priesthood gitugyan diha sa mga indibidwal lamang sumala sa kabubut-on sa Dios ug sa sumbanan sa katakus?

I-summarize ang Mga Buhat 8:25 pinaagi sa pagpasabut nga si Pedro ug si Juan misangyaw sa ebanghelyo didto sa daghang mga balangay nga Samaritanhon.

Mga Buhat 8:26–40

Nagtudlo ug nagbunyag si Felipe og opisyal nga Ethiopiahanon

Hangyoa ang mga estudyante sa paghunahuna og mga sitwasyon diin sila nagkinahanglan o magkinahanglan og usa ka tawo nga mogiya kanila.

Unsa ang pipila ka mga sitwasyon diin ikaw mahimo nga giya alang sa uban nga tawo? (Mahimo nga modapit ka og mga estudyante sa paghunahuna og mga padulnganan o mga hilisgutan nga sila adunay kahibalo o mga talento nga ilang napalambo.)

Dapita ang mga estudyante sa pagpangita samtang sila nagtuon sa nahibilin sa Mga Buhat 8 alang sa importanting paagi diin sila makagiya alang sa uban.

Dapita ang usa ka estudyante sa pagbasa og kusog sa Mga Buhat 8:26–28. Hangyoa ang klase sa pagsunod, mangita kon nganong si Felipe miadto sa Gaza.

Nganong miadto sa Gaza si Felipe?
Kinsa usab ang mibiyahe diha sa dapit nga dinha si Felipe? (Usa ka Etiopiahanon nga eunoco. Ipasabut nga ang usa ka eunoco usa ka opisyal diha sa mga alagad sa hari o reyna [tan-awa sa Bible Dictionary, “Eunuch”].)
Unsa ang gibuhat sa opisyal nga Etiopiahanon diha sa iyang karwahe? (Balasahon gikan sa Esaias, o ang mga pulong ni Isaias.)

Pagbutang og duha ka lingkuranan nga nag-atubang sa usag usa diha sa atubangan sa kwarto. Paghangyo og duha ka boluntaryo sa paglihok sa bahin sa opisyal nga Etiopiahanon ug ni Felipe sa istorya nga mosunod. (Mahimo nga imong ihatag kini nga mga bahin sa wala pay klase ug sa pagdapit niini nga mga estudyante sa pag-andam sa pagdula sa ilang mga bahin.) Hangyoa ang estudyante nga nagdala sa papel sa opisyal nga Etiopiahanon sa paglingkod sa usa sa mga lingkuranan ug ang estudyante nga nagdala sa papel ni Felipe sa pagbarug sa may pultahan. Dapita ang ikatulo nga estudyante sa pagdala sa papel sa tigsaysay.

Hangyoa ang mga estudyante sa pagbasa og kusog gikan sa Mga Buhat 8:29–39 ug sa paglihok sa tagsa-tagsa nila nga mga bahin. Hangyoa ang klase sa pagtan-aw unsay nahitabo tali ni Felipe ug sa opisyal nga Etiopiahanon. Samtang ang mga estudyante nagbasa ug naglihok sa ilang mga bahin, buhata ang mosunod:

Human mabasa sa tigsaysay ang mga bersikulo 32–33, dapita ang mga estudyante sa paghunahuna og sulat sa Isaias 53:7–8 isip usa ka tandi nga pakisayran [cross reference] diha sa ilang mga mga kasulatan tupad sa Mga Buhat 8:32–33.
Human mabasa sa tigsaysay ang bersikulo 35, hangyoa ang estudyante nga nagdala sa papel ni Felipe sa pagpasabut ngadto sa klase unsa ang iyang itudlo mahitungod sa Manluluwas niini nga sitwasyon. (Mahimo kang modapit sa klase sa paghimo usab og mga sugyot.)
Kon ang tigsaysay nagbasa sa bersikulo 38, palihug hangyoa ang mga boluntaryo sa dili paglihok sa pagpahigayon sa bunyag.

Human ang mga boluntaryo mahuman niini nga kalihokan, pasalamati sila ug dapita sila sa pagbalik ngadto sa ilang mga lingkuranan.

Sumala sa bersikulo 29, ngano nga si Felipe miadto sa karwahe sa opisyal nga Etiopiahanon?
Sumala sa bersikulo 31, unsa ang gisulti sa opisyal nga iyang gikinahanglan aron masabtan ang mga panulat ni Isaias?
Sumala sa mga bersikulo 35–38, sa unsa nga paagi si Felipe usa ka giya alang sa opisyal?
Unsa nga baruganan ang atong makat-unan gikan sa kasinatian ni Felipe mahitungod sa resulta sa pagpamati sa mga pag-aghat gikan sa Dios? (Ang mga estudyante mahimong mogamit og lain-laing mga pulong, apan siguroa nga kini tataw nga samtang kita namati sa mga pag-aghat gikan sa Dios, kita makadawat og mga oportunidad sa pagtabang og giya sa uban ngadto ni Jesukristo. Isulat kini nga baruganan diha sa pisara.)

Hatagi ang mga estudyante og mga kopya sa mosunod nga handout. Dapita ang mga estudyante sa pagsunod sa mga panudlo diha sa handout ug paghunahuna og mga paagi nga sila makatabang og giya sa usa ka tawo ngadto ni Jesukristo. Ipasabut nga sila makabaton og oportunidad sa pagpakigbahin ngadto sa klase kon unsa ang ilang gisulat.

Naggiya sa Uban ngadto ni Jesukristo

Manwal sa Magtutudlo sa Seminary sa Bag-ong Tugon—Leksyon 87

Pagpili og usa sa mosunod nga mga sitwasyon:

Usa ka batan-ong lalaki nga imong higala sakop sa lain nga Kristyanong simbahan. Usa ka adlaw panahon sa paniudto, gibati nimo ang pag-aghat nga makigsulti kaniya mahitungod sa Simbahan.
Samtang naglakaw pauli sa panimalay gikan sa eskwelahan, nakakita ka og batan-ong babaye kinsa naghilak. Imong nailhan siya nga miyembro sa imong ward kinsa wala na magtambong og bisan unsa nga mga miting sa simbahan sulod sa pipila ka katuigan. Gibati nimo ang pag-aghat nga makigsulti kaniya. Samtang naninguha ka sa paghupay kaniya, iyang gihulagway ang iyang mga hagit ug nangutana, “Nganong dili man lang ako magmalipayon?”
Ang inahan sa usa ka batan-ong lalaki nga imong higala sa social media bag-ohay nga namatay. Gibati nimo ang pag-aghat nga motubag sa mosunod nga pahibalo nga bag-ohay niyang gihimo: “Gibati nga nag-inusara karon gyud. Nanghinaut nga usa ka tawo nakasabut.”

Sa luyo niining piraso nga papel o sa inyong class notebook o scripture study journal, isulat unsa ang imong isulti ug buhaton aron sa pagtabang og giya niini nga tawo ngadto ni Jesukristo. Sa inyong paghulagway, ilakip ang mga tubag sa mosunod nga mga pangutana:

Unsa nga mga kamatuoran sa ebanghelyo ang imong ipakigbahin aron sa pagtabang og giya niini nga tawo ngadto ni Jesukristo?
Unsa ang usa ka kasulatan nga tingali imong dapiton kini nga tawo sa pagtuon?
Unsay gusto nimo nining tawo nga buhaton?

Human sa igo nga panahon, bahina ang mga estudyante ngadto sa pares. Dapita ang mga estudyante sa pagpasabut ngadto sa ilang kapares kon unsa ang ilang gisulat ug nganong mogamit sila niini nga paagi. Dayon dapita ang pipila ka mga estudyante sa pagpasabut ngadto sa tibuok klase kon unsa ang ilang gisulat. Mahimong maghunahuna ka sa pagdapit og mga estudyante kinsa mipili og usa sa unang duha ka mga sitwasyon sa pagdula sa bahin kon unsa ang ilang isulti ug buhaton niini nga mga sitwasyon, uban nimo nga nagdala sa papel sa indibidwal nga ilang gitinguha nga tabangan. (Kon imong buhaton ang mao, hatagi ang mga estudyante og minuto sa pag-andam sa dili pa dapiton sila sa pagdula sa sitwasyon uban kanimo.) Dayon pangutan-a ang klase sa mosunod nga mga pangutana:

Kanus-a ug sa unsa nga paagi inyong natabangan og giya ang usa ka tawo ngadto ni Jesukristo?
Kanus-a ug sa unsa nga paagi ang usa ka tawo mitabang og giya kanimo ngadto ni Jesukristo?

Awhaga ang mga estudyante sa pagpamati sa mga pag-aghat gikan sa Dios aron sila magiyahan ngadto sa indibidwal kinsa ilang matabangan og giya ngadto ni Jesukristo. Dapita ang mga estudyante sa pagpamalandong kon unsa ang ilang mabuhat sa sunod nga pipila ka mga adlaw aron sa pagtabang og giya sa usa ka tawo nga ilang kaila ngadto ni Jesukristo. Awhaga ang mga estudyante sa pagreport og balik ngadto sa klase kon unsa ang ilang nasinati.

Komentaryo ug Background nga Impormasyon

Mga Buhat 8:18–23. Pagdawat ug paggamit sa priesthood

Si Presidente James E. Faust sa Unang Kapangulohan mipasabut nga ang paagi diin ang gahum sa priesthood madawat lahi gikan sa paagi diin ang kalibutanong gahum madawat.

“Kining labing gamhanan sa tanang mga gahum, ang gahum sa priesthood, dili madawat sa paagi nga ang gahum gigamit sa kalibutan. Dili kini mapalit o mabaligya. … Daghan kaninyo nagtan-aw ug nagdayeg sa mga inilang mga magdudula diha sa nagkalain-laing mga dula, maingon usab niadtong kinsa naghupot og bahandi, dungog, ug politikal ug militar nga gahum. Ang kalibutanong gahum kasagaran gigamit sa kabangis. Apan, ang gahum sa priesthood gigamit lamang pinaagi niadtong mga baruganan sa pagkamatarung pinaagi diin ang priesthood gidumala” (“Power of the Priesthood,” Ensign, Mayo 1997, 43).

Gipahayag ni Presidente Gordon B. Hinckley:

“Ang personal nga katakus nahimong sumbanan sa angayan nga modawat ug mogamit niining sagrado nga gahum” (“Personal Worthiness to Exercise the Priesthood,” Ensign, Mayo 2002, 52).

Mga Buhat 8:27–38. Naggiya sa Uban ngadto ni Jesukristo

Si Elder Jeffrey R. Holland sa Korum sa Napulog Duha ka mga Apostoles mitudlo mahitungod sa importansya sa pagtabang og giya sa uban ngadto ni Jesukristo:

“Alang sa matag usa kanato sa ‘pagduol ngadto ni Kristo’ [D&P 20:59], sa paghupot sa iyang mga sugo ug pagsunod sa Iyang ehemplo balik ngadto sa Amahan sa pagkatinuod mao ang labing taas ug labing balaang katuyoan sa tawhanong kinabuhi. Aron sa pagtabang sa uban nga mobuhat usab niana—sa pagtudlo, pagdani, ug mainampuong mogiya kanila sa paglakaw usab nianang dalan sa katubsanan—sa pagkatinuod kana kinahanglan gayud himoong ikaduha nga labing mahinungdanong buhat sa atong mga kinabuhi. Tingali kana mao kon nganong si Presidente David O. McKay makausa miingon, ‘Walay mas dakong responsibilidad nga mahatag diha ni bisan kinsa nga lalaki [o babaye] kay sa mahimong usa ka magtutudlo sa mga anak sa Dios’ [sa Conference Report, Okt. 1916, 57]” (“A Teacher Come from God,” Ensign, Mayo 1998, 25).

Dugang nga Ideya sa Pagtudlo

Mga Buhat 8:26–39. Ang Dios motabang kanato sa pagsabut sa mga kasulatan

Human maila sa mga estudyante ang baruganan diha sa Mga Buhat 8:29–39 mahitungod sa pagpamati sa mga pag-aghat gikan sa Dios, mahimong mangutana ka kanila sa pag-ila og lain nga baruganan gikan niini nga mga bersikulo. (Bisan og ang mga estudyante mahimong moila og nagkalain-laing mga kamatuoran, tabangi sila sa pagsabut sa mosunod nga baruganan: Samtang kita naninguha alang sa paggiya diha sa pagsabut sa mga kasulatan, ang Dios motabang kanato.

Dapita ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. Hangyoa ang klase sa pagsunod, maminaw kon sa unsa nga paagi kita usahay sama sa Etiopiahanon nga eunoco:

“Kita, sa tinuod, tanan ingon og sama sa lalaki sa Etiopia ngadto kang kinsa si Felipe gipadala. Sama kaniya, mahimong kita mahibalo og igo sa pagpangita og relihiyon. Mahimong kita mogahin sa atong mga kaugalingon diha sa mga kasulatan. Mahimo gani nga atong biyaan ang atong yutan-on nga mga bahandi, apan kon walay igong panudlo mahimong dili nato masabtan ang kahulugan sa tanan niini ug ang mga kinahanglanon nga sa gihapon anaa sa atong atubangan. Busa kita mosinggit uban niining tawo nga dako kaayo og awtoridad, ‘Sa unsa nga paagi [kita makasabut,] gawas kon pipila ka [magtutudlo] kinahanglan nga mogiya [kanato]?’ [Mga Buhat 8:31]” (“A Teacher Come from God,” Ensign, Mayo 1998, 25).

Unsa ang pipila ka mga sitwasyon diin kita tingali manginahanglan og paggiya sa pagsabut sa mga kasulatan?
Unsa ang angay nga mga tinubdan gikan diin kita makapangita og paggiya sa pagsabut sa mga kasulatan? (Mahimo nimong ikonsiderar ang pagpahinumdom sa mga estudyante mahitungod sa mga tabang sa pagtuon nga giandam sa Simbahan, ingon man usab sa Gospel Topics nga website sa Simbahan [tan-awa sa lds.org/topics].)
Sa unsa nga paagi nga ang pagtuon sa mga kasulatan modangat ngadto sa pagpadayag?
Sa unsa nga paagi ang Dios mitabang kanimo samtang ikaw naninguha og paggiya sa pagsabut sa mga kasulatan?