Leksyon 97: Mga Buhat 23–26

Leksyon 97

Mga Buhat 23–26

Pasiuna

Giimbistigar sa mga lider nga Judeo si Pablo, ug usa ka pundok sa mga Judeo nagsabut sa pagpatay kaniya. Gidala si Pablo ngadto sa Cesarea, diin siya mipanalipod sa iyang kaugalingon batok sa bakak nga mga pasangil diha sa atubangan sa daghang mga lider nga Romano. Gibalik niya pag-istorya ang iyang pagkakabig ug mipamatuod ni Jesukristo.

Mga Sugyot alang sa Pagtudlo

Mga Buhat 23–25

Si Pablo gigukod, gitaral, ug gibilanggo

Sa wala pa ang klase, isulat ang mosunod sa usa ka pirasong papel: Mga sugo ug mga panalangin sa Dios. Paggamit og tape o pisi sa pagmarka og dapit sa classroom, ug ibutang ang papel diha sa salog sulod niining gigahin nga dapit. Kon magsugod na ang klase, dapita ang estudyante sa pagtindog diha sa dapit nga nagrepresentar sa mga sugo ug mga panalangin sa Dios.

Samtang kita mas magpaduol ngadto sa Dios pinaagi sa pagsunod sa Iyang mga sugo ug mga pagtulun-an, unsa ang pipila sa mga panalangin nga atong madawat?

Dapita ang estudyante sa pagpahawa sa dapit nga nagrepresentar sa mga sugo ug mga panalangin sa Dios.

Unsa ang pipila ka mga impluwensya sa kalibutan nga tingali motintal sa usa ka tawo sa pagbiya ug paghunong sa pagkinabuhi sumala sa mga sugo ug mga pagtulun-an sa Dios?
Unsa ang mahitabo kon ang mga tawo mopalayo sa ilang mga kaugalingon gikan sa Dios?

Pasalamati ang estudyante, ug dapita siya sa paglingkod. Hangyoa ang mga estudyante sa pagpamalandong unsa nga direksyon sa karon sila nag-atubang ug unsa kaduol o kalayo sila nagtuo gikan sa Langitnong Amahan. Dapita ang mga estudyante sa pagpangita sa mga kamatuoran samtang sila nagtuon sa Mga Buhat 23–26 nga motabang kanila kon ilang bation nga gipalayo nila ang ilang mga kaugalingon gikan sa Dios ug sa Iyang mga panalangin.

Pahinumdumi ang mga estudyante nga gidakop si Pablo sa gawas sa templo sa Jerusalem ug gidala sa atubangan sa mga lider nga Judeo (tan-awa sa Mga Buhat 21:30–33; 22:23–30). I-summarize ang Mga Buhat 23:1–10 pinaagi sa pagpasabut nga si Pablo giimbistigar sa mga lider nga Judeo ug gibilanggo.

Dapita ang usa ka estudyante sa pagbasa og kusog sa Mga Buhat 23:11. Hangyoa ang klase sa pagsunod, mangita sa unsay nahitabo samtang si Pablo diha sa bilanggoan. Dapita ang mga estudyante sa pagreport unsa ang ilang nakaplagan.

Unsa ang gisulti sa Ginoo kang Pablo diha sa bilanggoan?

Pahinumdumi ang mga estudyante sa saad nga girekord diha sa Mga Buhat 18:9–10 nga ang Ginoo magauban ni Pablo ug magpanalipod kaniya samtang gibuhat niya ang mga buhat sa Ginoo. Dapita ang mga estudyante sa pagkonsiderar og marka sa mga pulong “ang Ginoo magpanalipod kaniya” ug sa pagsulat sa Mga Buhat 18:9–10 isip usa ka cross reference diha sa margin sunod sa bersikulo 11.

Dapita ang usa ka estudyante sa pagbasa og kusog sa mosunod nga summary:

Diha sa Mga Buhat 23:12–25:27 atong nahibaloan nga ang kapitang Romano kinsa midakop ni Pablo mipadala niya ngadto sa Cesarea sa pagpugong sa usa ka grupong mga Judeo sa pagpatay kaniya. Gideklarar ni Pablo ang iyang pagkawalay sala sa atubangan sa Romanong gobernador nga si Felix. Bisan og nakumbinse sa pagkawalay sala, gipadayon ni Felix ang pagbutang ni Pablo ubos sa house arrest sulod sa duha ka tuig. Gipulihan ni Festo si Felix isip gobernador sa Judea. Si Hari Herodes Agripa, kinsa nagmando og dapit nga anaa sa amihanang-sidlakan sa Dagat sa Galilea, mibisita ni Festo ug mitinguha sa pagpaminaw sa kaso ni Pablo. Gidala si Pablo sa atubangan ni Hari Agripa.

Mga Buhat 26

Nag-istorya og balik si Pablo sa iyang pagkakabig ug nagpamatuod ni Jesukristo sa atubangan ni Hari Agripa

Dapita ang pipila ka mga estudyante sa pagpuli-pulig basa og kusog gikan sa Mga Buhat 26:4–11. Hangyoa ang klase sa pagsunod, mangita kon sa unsa nga paagi gihulagway ni Pablo ang iyang kagahapon ngadto ni Hari Agripa.

Giunsa ni Pablo paghulagway ang iyang kagahapon ngadto ni Hari Agripa?

Ipasabut nga dayon giistorya og balik ni Pablo ang iyang panan-awon sa Manluluwas. Dapita ang usa ka estudyante sa pagbasa og kusog sa Mga Buhat 26:16–18. Hangyoa ang klase sa pagsunod, mangita sa misyon nga gihatag sa Ginoo ngadto ni Pablo diha sa dalan sa Damascus.

Unsa nga misyon ang gihatag sa Ginoo ngadto ni Pablo? (Mahimo kang mosugyot nga ang mga estudyante momarka sa mga pulong nga naghulagway sa misyon nga gihatag sa Ginoo ngadto ni Pablo.)

Ipasabut nga dinhi niining kinatibuk-ang kahulugan ang pulong bahin (bersikulo 18) nagpasabut sa pagsulod ngadto sa celestial nga gingharian sa Dios.

Unsa ang makatabang sa usa ka tawo sa pagtalikod sa kangitngit ug sa impluwensya ni Satanas ug moatubang sa kahayag ug sa mga sugo ug mga panalangin sa Dios?

Dapita ang usa ka estudyante sa pagbasa og kusog sa Mga Buhat 26:19–23. Hangyoa ang klase sa pagsunod, mangita sa unsay gisulti ni Pablo nga iyang gitudlo ngadto sa mga Judeo ug sa mga Hentil nga kinahanglan gayud nga ilang buhaton aron madawat ang mga panalangin nga gihisgutan diha sa bersikulo 18. Mahimong imong ipasabut nga ang mga pulong “maghimog mga buhat nga mahiangay sa ilang paghinulsol” diha sa bersikulo 20 mahimong nagpasabut nga magpuyo sa matarung nga paagi aron sa pagpakita nga ikaw sa tinud-anay naghinulsol.

Sumala sa bersikulo 20, unsa ang natudlo ni Pablo sa mga Judeo ug mga Hentil nga buhaton?

Isulat ang mosunod nga dili kompleto nga pamahayag diha sa pisara: Kon kita maghinulsol ug mobalik sa Dios …

Basi sa unsay atong nakat-unan sa bersikulo 18, sa unsa nga paagi imong makompleto ang pamahayag diha sa pisara? (I-summarize ang mga tubag sa mga estudyante pinaagi sa pagkompleto sa pamahayag diha sa pisara aron nga mabasa ingon sa mosunod: Kong kita maghinulsol ug mobalik sa Dios, atong mabuntog ang gahum ni Satanas diha sa atong kinabuhi, makadawat og kapasayloan sa atong mga sala, ug makasarang alang sa ginghariang celestial.)

Aron sa pagtabang sa mga estudyante sa pagsabut niini nga baruganan, dapita ang usa ka estudyante sa pagbasa og kusog sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles (ikonsiderar ang paghatag sa mga estudyante og kopya sa pamahayag):

“Kon kita makasala, kita mopalayo gikan sa Dios. Kon kita maghinulsol, kita mobalik ngadto sa Dios.

“Ang pagdapit sa paghinulsol dili kanunay nga usa ka tingog sa pagkastigo apan hinoon usa ka mahigugmaon nga hangyo sa pagbalik ug sa ‘pagduol og usab’ ngadto sa Dios [tan-awa sa Helaman 7:17]. Kini mao ang tawag sa usa ka mahigugmaon nga Amahan ug sa Iyang Bugtong Anak nga kita mahimong mas maayo pa kay sa karon, nga mokab-ot sa mas taas nga matang sa kinabuhi, nga mag-usab, ug nga mobati og kalipay sa pagsunod sa mga sugo” (“Paghinulsol … Aron Ako Moayo Kaninyo,” Ensign o Liahona, Nob. 2009, 40).

Sumala ni Elder Andersen, unsa ang atong makab-ut samtang kita maghinulsol ug mobalik ngadto sa Langitnong Amahan ug ni Jesukristo?

Dapita ang mga estudyante sa pagpangita samtang nagpadayon sila sa pagtuon sa Mga Buhat 26 alang sa unsay nagpugong ni Festo ug ni Hari Agripa sa paghinulsol, pagbalik ngadto sa Dios, ug pagkakabig ngadto ni Jesukristo. Isulat ang mosunod nga dili kompleto nga pamahayag diha sa pisara: Aron makabig ngadto ni Jesukristo …

Bahina ang mga estudyante ngadto sa paris. Dapita ang mga estudyante sa pagbasa sa Mga Buhat 26:24–28 uban sa ilang mga paris. Hangyoa sila sa pag-ila ug sa pagtandi sa mga paagi nga kada usa ni Festo ug Hari Agripa mi-react sa mga pagtulun-an ug pagpamatuod ni Pablo sa Manluluwas. Samtang ang mga estudyante nagbasa ug naghisgot uban sa ilang mga paris, kopyaha ang mosunod nga tsart diha sa pisara (ayaw ilakip ang mga pamahayag ubos sa matag ulohan):

Mga Reaksyon ngadto sa mga Pagtulun-an ni Pablo
Misulti nga dakog tingog Miingon nga si Pablo diha sa iyang kiliran Giakusar si Pablo nga buang	Hapit maaghat nga mahimong Kristyano

Mga Reaksyon ngadto sa mga Pagtulun-an ni Pablo

Festo

Hari Agripa

Misulti nga dakog tingog

Miingon nga si Pablo diha sa iyang kiliran

Giakusar si Pablo nga buang

Hapit maaghat nga mahimong Kristyano

Human sa igo nga panahon, dapita ang daghang mga estudyante sa pagduol ngadto sa pisara ug sa pagsulat unsa ang ilang nakit-an (ang mga tubag kinahanglan nga susama sa mga pulong diha sa tsart sa ibabaw).

Unsay gipadayag sa reaksyon ni Festo mahitungod sa iyang opinyon sa mga pagtulun-an ni Pablo? (Idugang ang pulong Kawalay pagtuo sa mga tubag sa mga estudyante ubos sa ulohan “Festo.”)
Sumala sa bersikulo 27, unsa ang gisulti ni Pablo nga iyang nahibaloan mahitungod ni Hari Agripa? (Idugang ang Mituo sa mga propeta ubos sa ulohan “Hari Agripa.”)
Unsa ang atong makat-unan gikan sa komentaryo ni Agripa ngadto ni Pablo mahitungod sa pasalig ni Agripa nga mahimong Kristyano (tan-awa sa bersikulo 28)? (Idugang ang Dili andam nga mopasalig sa hingpit ubos sa ulohan “Hari Agripa.”)

Dapita ang usa ka estudyante sa pagbasa ug kusog sa Mga Buhat 26:29. Hangyoa ang klase sa pagsunod, mangita sa giunsa pagtubag ni Pablo ang komentaryo ni Hari Agripa nga siya hapit aghata nga mahimong Kristyano.

Unsa ang gitinguha ni Pablo alang sa hari ug sa tanan niadtong kinsa nakadungog sa iyang mga pagtulun-an?
Unsa sa imong hunahuna ang nagpugong ni Festo gikan sa pagkakabig ngadto ni Jesukristo?
Unsa sa imong hunahuna ang nagpugong ni Hari Agripa nga makabig?
Unsa ang atong makat-unan gikan ni Festo ug ni Hari Agripa mahitungod sa unsa ang kinahanglan natong buhaton nga makabig ngadto ni Jesukristo? (Ang mga estudyante mahimong mogamit og lain-laing mga pulong, apan siguroa nga ilang mailhan ang mosunod nga baruganan: Aron mahimong makabig ngadto ni Jesukristo, kita kinahanglan gayud nga mopili sa pagtuo sa ug sa hingpit mopasalig sa pagsunod sa ebanghelyo.)

Aron pagtabang sa mga estudyante sa pagsabut niini nga baruganan, dapita ang usa ka estudyante sa pagbasa og kusog sa mosunod nga pahayag ni Presidente Dieter F. Uchtdorf sa Unang Kapangulohan:

“Duha ka managsoong lalaki ang mibarug ibabaw sa gamay nga pangpang nga nagdungaw sa lunsay nga mga tubig sa asul nga linaw. Kini mao ang usa ka inilang dapit nga kaambakan ngadto sa tubig, ug ang managsoon kanunay nga maghisgot sa pagpangambak—usa ka butang nga nakita nila nga gibuhat sa uban.

“Bisan tuod kon silang duha gusto nga moambak, walay usa kanila ang gustong mouna. Ang kahabugon sa pangpang dili kaayo ingon og taas, apan alang sa duha ka batan-ong mga lalaki, daw ang distansya magkadugang kon sila mosugod sa paghana og ambak—ug ang ilang kaisug nagkahanaw og dali.

“Sa katapusan, ang usa ka igsoon mibutang sa usa ka tiil sa ngilit sa pangpang ug mihana na sa pag-ambak. Nianang higayona ang iyang igsoong lalaki mihunghong, ‘Kinahanglan tingaling atong hulaton hangtud sa sunod ting-init.’

Apan, ang pagsugod og lihok sa unang igsoong lalaki, nagbitad na kaniya sa pagpadayon. ‘Brod,’ siya mitubag, ‘committed na ko!’

“Siya mitampisaw sa tubig ug dali nga milutaw uban sa madaugon nga singgit. Ang ikaduhang igsoon misunod dayon. Human niana, silang duha nangatawa kabahin sa katapusang mga pulong sa unang batang lalaki sa wala pa moambak ngadto sa tubig: ‘Brod, committed na ko.’

“Ang pasalig daw sama sa pag-ambak ngadto sa tubig. Bisan man kon kamo committed o dili. Bisan kon kamo nag-irog o nagbarug lang. Walay naa sa tunga-tunga. …

“Kadtong kinsa dili kaayo committed maglaum lamang nga dili kaayo makadawat og mga panalangin sa pagpamatuod, hingpit nga kalipay, ug kalinaw. Ang mga bintana sa langit tingali dili kaayo moabli alang kanila. …

“Sa pipila ka paagi, ang matag usa kanato kinahanglang modesisyon samtang nag-ambo sa tubig. Kini akong pangaliya nga kita makabaton og hugot nga pagtuo, makapadayon, makaatubang sa atong mga kahadlok ug mga pagduha-duha uban sa kaisug, ug moingon sa atong mga kaugalingon, ‘Committed na ko!’” (“Brod, Committed na Ko” Ensign, Hulyo 2011, 4, 5).

Sa unsa nga paagi nga ang pagpasalig sa pagsunod sa ebanghelyo sama sa pag-ambak ngado sa tubig?
Sumala ni Presidente Uchtdorf, nganong importante kini nga hingpit nga mopasalig kay sa “dili kaayo mopasalig” sa pagsunod sa ebanghelyo?
Sa unsa nga paagi nga ang imong pasalig sa pagsunod sa usa ka sugo o baruganan sa ebanghelyo mitabang sa paglig-on sa imong pagkakabig ngadto ni Jesukristo? (Ikonsiderar ang pagpakigbahin og ehemplo nga imong kaugalingon.)

Dapita ang mga estudyante sa pagsulat diha sa ilang mga notebook sa klase o mga scripture study journal og usa ka lista sa mga sugo o mga baruganan sa ebanghelyo nga ilang gibati nga sila sa hingpit mipasalig sa pagsunod. Hangyoa sila sa paghunahuna og bisan unsa nga mga baruganan sa ebanghelyo nga ilang gibati nga “hapit” apan dili “tanan” (Mga Buhat 26:29) ipasalig sa pagsunod. Dapita ang mga estudyante sa pagsulat og usa ka tumong sa unsay ilang mabuhat sa pagdugang sa ilang pagsabut ug sa pagpasalig ngadto sa usa niini nga mga baruganan. Awhaga ang mga estudyante sa pag-ampo alang sa panabang samtang sila naninguha nga mahimong makabig ngadto ni Jesukristo pinaagi sa mas hingpit nga pagsunod sa ebanghelyo.

I-summarize ang Mga Buhat 26:30–32 pinaagi sa pagpasabut nga si Festo ug si Hari Agripa nakakita nga si Pablo walay sala ug unta buhian siya, apan tungod kay si Pablo midangop sa iyang kaso ngadto ni Cesar gikinahanglan nga ilang ipadala siya ngadto sa Roma.

Taposa pinaagi sa pagrebyu ug sa pagpamatuod sa mga baruganan nga gitudlo diha sa Mga Buhat 23–26.

Komentaryo ug Background nga Impormasyon

Mga Buhat 25:13. Kinsa si Herodes Agripa?

Alang sa makatabang nga tsart nga nagpakita sa mga relasyon tali sa nagkalain-laing mga miyembro sa pamilyang Herodes nga gihisgutan diha sa Bag-ong Tugon, tan-awa ang entry “Herodes” diha sa Ang Giya ngadto sa mga Kasulatan.

“Si Herodes Agripa II (gitawag usab og Marcus Julius Agrippa) mao ang ikapito ug katapusang hari sa kaliwatan sa mga hari sa Judeo nga mga Herodianhon. Naghari siya sa teritoryo sa amihan-silangang Dagat sa Galilea gikan sa mga A.D. 55 hangtud sa 93. Siya mao ang anak nga lalaki ni Herodes Agripa 1, kinsa misugo sa pagpatay ni Santiago ug sa pagpabilanggo ni Pedro (tan-awa sa Mga Buhat 12:1–4); ang apo nga lalaki ni Herodes Antipas, kinsa nagpapunggot sa ulo ni Juan Bautista (tan-awa sa Mateo 14:1–12); ug ang apo sa tuhod ni Halangdong Herodes, kinsa misugo sa pagpapatay sa gagmayng bata nga mga lalaki sa Betlehem (tan-awa sa Mateo 2:16).

Ang gingharian ni Agripa nahimutang ngadto sa amihanan sa teritoryo ni Festo. Si Agripa ug ang iyang igsoong babaye nga si Bernice … mibisita ni Festo didto sa Cesarea samtang gibilanggo si Pablo didto. Tungod kay si Agripa usa ka Judeo ug busa mas pamilyar sa mga kalihokang Judeo kay ni Festo, kinsa usa ka Romano, gipanghinaut ni Festo nga si Agripa makatabang kaniya sa pagsabut sa mga gipamasangil batok ni Pablo ug usab sa pagtabang og buhat sa iyang sulat ngadto ni Cesar (tan-awa sa Mga Buhat 25:24–27; 26:3)” (New Testament Student Manual [manwal sa Church Educational System, 2014], 326).

Mga Buhat 26:24. “Nagsalimoang ka, Pablo. Ang imong daghang hingkat-unan nakapabuang kanimo”

Gitandi ni Propeta Joseph Smith ang pagpanggukod nga iyang nasinati human sa Unang Panan-awon ngadto sa mga kasinatian ni Apostol Pablo (tan-awa sa Joseph Smith—Kasaysayan 1:24–25). Si Pablo ug si Joseph Smith nakakita sa Manluluwas ug nakadungog sa Iyang tingog. Silang duha mipamatuod nga nakakita sila og panan-awon. Agi og resulta, ang duha gigukod ug gibiaybiay, apan mipabiling tinuod sa ilang pagsaksi ug pagpamatuod kabahin ni Jesukristo. Agi og dugang, adunay lain-laing mga istorya kabahin sa Unang Panan-awon ni Joseph Smith, ingon usab nga adunay lain-laing istorya sa panan-awon ni Pablo kabahin sa Manluluwas (tan-awa sa Mga Buhat 9:3–9; Mga Buhat 22:6–11; Acts 26:13–18). Bisan sa gagmay nga mga kalainan sa detalye, ang ilang lain-laing mga istorya nagkauyon sa importanting kamatuoran nga ang matag usa kanila nakakita ug nakigsulti uban ni Jesukristo.

Mga Buhat 26:28. “Naghunahuna ka diay nga dali mo ra akong mahimong Kristohanon.”

Samtang nag-alagad isip sakop sa Seventy, si Elder Bruce C. Hafen mitudlo:

“Kon kita kinahanglan gayud nga mohatag sa tanan nga kita aduna, nan ang atong paghatag lamang sa hapit tanan dili igo. Kon kita mohupot hapit sa mga sugo, kita hapit makadawat sa mga panalangin” (“Ang Pag-ula: Ang Tanan alang sa Tanan” Ensign o Liahona, May 2004, 98).

Gigamit ni Presidente Harold B. Lee ang mga pulong ni Hari Agripa ngadto sa mga miyembro sa Simbahan kinsa misulay sa pagpamalibad sa ilang mga kaugalingon gikan sa pagsunod sa mga sugo:

“Ang usa ka maayong bishop mihimo og usa ka makalingaw nga komentaryo mahitungod sa unsay iyang gitawag og labing makaguol nga mga pulong nga iyang nahibaloan sa usa ka tawo nga halangdon. Gibasa niya gikan sa mga pulong ni Apostol Pablo sa mga adlaw sa dihang si Pablo sa atubangan ni Haring Agripa mihatag og gamhanang pagpamatuod sa iyang pagkakabig. Ang tubag ni Haring Agripa mao, ‘Naghunahuna ka diay nga dali mo ra akong mahimong Kristohanon.’ (Mga Buhat 26:28.) Dayon ang bishop miingon, ‘Ang hari nasayud sa kamatuoran apan nagkulang siya sa kaisug sa pagbuhat nianang unsay gikinahanglan. …’

“Ug dayon [ang bishop] mipaila og pipila ka mga butang nga iyang nadiskobrehan diha sa iyang kaugalingong ward sa mubo apan gamhanang wali. ‘Agi og tubag ngadto sa Agalon, “Umanhi ka … sumunod kanako” (Marcos 10:21), ang pipila ka mga miyembro hapit,’ miingon siya, ‘apan dili kaayo, moingon, “naghunahuna ka diay nga dali mo ra akong mahimong magmatinuoron apan nagkinahanglan akog dugang nga tabang sa pagpasar sa eksamen.”’ …

“[Ang bishop mipadayon,] ‘Naghunahuna ka diay nga dali mo ra akong pasundon sa pagbalaan sa adlawng Igpapahulay, apan makalingaw ang pagbola ma Dominggo.

“‘Naghunahuna ka diay nga dali mo ra akong pahigugmaon sa akong silingan, apan bastos siya; sa pagsabut sa mga panan-aw sa uban, apan sayop kaayo sila; … sa pag-home teaching, apan hilabihan sa katugnaw ug katun-og sa gawas karong gabii; sa pagbayad og ikapulo ug mga puasa, apan nagkinahanglan kami og bag-ong may kolor nga TV. … Hapit! Hapit! Hapit!’” (sa Conference Report, Abr. 1964, 23–24.)